1. Dɛ mbrɛ Philippifo 2:3 ma yehu no, sɛ yɛbrɛ hɛnho adze a, ebɛnadze ntsi na yɛnye afofor benya ebusuabɔ pa?

YEFI ahobrɛadze mu yɛ setsie ma Jehovah osiandɛ yenyim dɛ, aber nyina no, ɔno na onyim dza oye ma hɛn. (Eph. 4:22-24) Sɛ yɛyɛ nyimpa a yɛbrɛ hɛnho adze a, yɛdze Jehovah n’apɛdze a yɛbɛyɛ no bedzi kan wɔ hɛn asetsena mu, na yeebu afofor dɛ wɔkyɛn hɛn. Iyi bɛma yɛnye Jehovah nye hɛn nuanom mbarimba na mbaa enya ebusuabɔ pa.​—Kenkan Philippifo 2:3.

2. Ebɛnadze na Paul daa no edzi, na ebɛnadze na yebosusu ho wɔ adzesua yi mu?

² Sɛ yɛannyɛ ahwɛyie a, nyimpa a wɔwɔ wiadze yi mu a wɔmema hɔnho do na wɔyɛ pɛsɛankonya no botum enya hɛn do nkantando. * Ɔda edzi dɛ, tsetse Christianfo no hyiaa esian a ɔtse dɛm, osiandɛ ɔsomafo Paul ne krataa a ɔdze kɛmaa Rome asafo no, ɔkãe wɔ mu dɛ: “Mekã kyerɛ hom mu nyimpa biara dɛ mma ɔnndwen nntra dza ɔsɛ dɛ ɔdwen, na mbom ɔndwen enyidahɔ adwen.” (Rom. 12:3) Paul daa no edzi dɛ ɔsɛ dɛ yenya obu a ɔfata ma hɛnho. Naaso, ahobrɛadze bɔboa hɛn ma yeemmbu hɛnho anntra do. Yebosusu ndzɛmba ebiasa bi ho wɔ adzesua yi mu. No mu biara mu no, ahobrɛadze bɔboa hɛn ma yeekwetsir dɛ yɛbɔdwen hɛnho ma aatra do. Ndzɛmba ebiasa no nye (1) hɛn awar mu, (2) ɔsom ho kwan a yɛwɔ wɔ asafo no mu, nye (3) ber a yɛdze sohyial media ridzi dwuma no.

3. Ebɛnadze ntsi na ɔhaw botum asoɛr wɔ awar mu, na awarfo binom yɛ hɔn adze dɛn wɔ ɔhaw yi ho?

³ Jehovah hyehyɛɛ awar ama okun na ɔyer dze enyigye aatsena abɔ mu. Naaso, osiandɛ hɔn nyinara tɔ sin ntsi, obotum aba dɛ hɔn adwen rinnhyia wɔ ndzɛmba ahorow bi ho. Nokwasɛm nye dɛ, Paul kãa dɛ hɔn a wɔbɔwar no, wobehyia ɔhaw ahorow bi wɔ hɔn awar mu. (1 Cor. 7:28) Awarfo binom ehu dɛ dabaa wɔnye hɔn ahokafo ham, ntsi bi a, wobosusu dɛ nkyɛ onnyi dɛ hɔn beenu no war. Sɛ wiadze no enya hɔn adwen do tum a, wɔbɛper hɔnho akã dɛ ɔsɛ dɛ wogyaa awar. Wobosusu hɔn nkotsee hɔnho na wɔaakã dɛ, sɛ hɔn enyi bɛgye a, gyedɛ wogyaa awar.

4. Ebɛnadze na ɔsɛ dɛ yekwetsir?

⁴ Ɔsɛ dɛ yekwetsir dɛ yebenya adwen dɛ hɛn awar annkɔ yie. Yenyim dɛ adze kortsee na Kyerɛwnsɛm no kã dɛ obi botum egyina do egyaa awar. Ɔno nye ndwamanyɛ. (Matt. 5:32) Ntsi, sɛ yehyia ɔhaw a Paul kãa ho asɛm no wɔ hɛn awar mu a, onnyi dɛ ahomemado ma yɛper hɛnho kã dɛ: ‘Mo hokafo nndwen moho. Ɔnndɔ me dɛ mbrɛ ɔsɛ. Bi a mowar obi fofor a m’enyi bɛgye.’ Sɛ obi nya adwen a ɔtse dɛm a, ɔkyerɛ dɛ ɔdwen nankotsee noho, na ɔnndwen no hokafo no ho. Wiadze nyansa bɛma ehu dɛ ɔsɛ dɛ idzi w’akoma ekyir na eyɛ dza woho bɔtɔ wo, sɛ iyi hwehwɛ dɛ igyaa awar mpo a. Naaso, nyansa a ofi sor no se mma ‘nnhwɛ wo nko w’adze, na mbom hwɛ wo mfɛfo dze so bi.’ (Phil. 2:4) Jehovah pɛ dɛ ebɔ w’awar ho ban, na ɔmmpɛ dɛ ibegyaa wo hokafo. (Matt. 19:6) Ɔpɛ dɛ idzi kan dwen ɔno Jehovah ho, na nnyɛ wankasa woho.

5. Dɛ mbrɛ Ephesusfo 5:33 kyerɛ no, ebɛn kwan do na ɔsɛ dɛ okun na ɔyer nye hɔnho dzi?

⁵ Ɔsɛ dɛ okun na ɔyer da obu na ɔdɔ edzi kyerɛ hɔnho. (Kenkan Ephesusfo 5:33.) Bible no tu hɛn fo dɛ, yɛmma kyɛn dɛ yɛbɛgye. (Andw. 20:35) Ebɛn suban na ɔbɔboa awarfo  ma wɔaada ɔdɔ na obu edzi wɔ hɔn awar mu? Mbuae no nye ahobrɛadze. Kunnom na yernom a wɔda ahobrɛadze edzi no, wɔronnhwehwɛ dza ɔfa hɔn nkotsee ho mbom wɔbɔhwehwɛ dza ɔfa ‘hɔn nyɛnko’ so ho.​—1 Cor. 10:24.

6. Ebɛn esuadze na enya efi Steven na Stephanie hɔn asɛm no mu?

⁶ Ahobrɛadze a Christianfo awarfo beberee ada no edzi no aboa hɔn ma woenya enyigye piinara wɔ hɔn awar mu. Dɛ nhwɛdo no, okun bi a wɔfrɛ no Steven kãa dɛ: “Sɛ hom yɛ kor a, hom yɛ adze bɔ mu nkanka ber a ɔhaw ahorow asoɛr no. Dɛ nkyɛ ebɔdwen ho dɛ, ‘Ebɛnadze na oye ma me?’ no, ɔbɛyɛ papa dɛ ebɔdwen ho dɛ, ‘Ebɛnadze na oye ma hɛn?’” Dɛmara na ne yer Stephanie so tse nka. Ɔkãa dɛ: “Obiara mmpɛ dɛ ɔnye ne tamfo bɛtsena. Sɛ akasakasa soɛr a, yɛhwehwɛ mbrɛ ɔyɛe a ɔhaw no bae. Afei yɛbɔ mpaa, yɛyɛ nhwehwɛmu na mbrɛ ɔbɛyɛ a yebesiw ɔhaw no ano no yɛkã ho asɛm. Yɛnye hɛnho nnkõ na mbom yɛbɔ mbɔdzen dɛ yɛbɛpɛ ɔhaw no ano edur.” Sɛ kunnom na yernom anndwen hɔn nkotsee ho dɛ mbrɛ ɔnnsɛ a wobenya enyigye kɛse wɔ hɔn awar mu.

7. Sɛ onua bi nya ɔsom ho kwan wɔ Jehovah n’ahyehyɛdze no mu a, ebɛn kwan do na ɔsɛ dɛ ɔyɛ n’adze?

⁷ Yebu no dɛ ɔyɛ ho kwan dɛ yɛbɔsom Jehovah wɔ kwan biara a yebotum do. (Ndw. 27:4; 84:10) Sɛ onua bi bɔ noho mbɔdzen dɛ ɔbɛyɛ pii wɔ Jehovah n’ahyehyɛdze no mu a, ɔfata nkamfo. Nokwasɛm nye dɛ, Bible no kã dɛ: “Sɛ obi pɛ ɔhwɛfo-dwuma a, ɔapɛ edwuma pa.” (1 Tim. 3:1) Naaso, sɛ onya ho kwan a ɔtse dɛm a, onnyi dɛ ɔdwen dɛ sesei dze ɔyɛ nyimpa tsitsir bi araa ma. (Luke 17:7-10) Ɔsɛ dɛ ɔdze yɛ no botae dɛ obefi ahobrɛadze mu asom afofor.​—2 Cor. 12:15.

8. Diotrephes, Uzziah, na Absalom hɔn nhwɛdo no, ebɛnadze na yesũa fi mu?

⁸ Bible no kã binom a wɔdween hɔnho ma ɔtraa do ho asɛm. Na ɔyɛ kɔkɔbɔ ma hɛn. Nna Diotrephes nnyi ahobrɛadze, na ‘ɔpɛ dɛ odzi panyin’ wɔ asafo no mu. (3 John 9) Ahomemado ntsi, Uzziah tuu anamɔn dɛ ɔbɛyɛ edwuma a nna Jehovah mmfaa nnhyɛɛ ne nsa dɛ ɔnyɛ. (2 Mber. 26:16-21) Ɔhen a Absalom pɛ dɛ ɔyɛ ntsi, ɔyɛɛ noho dɛ gyama ɔdɔ ɔmamfo no araa ma, mbrɛ ɔbɛyɛ a wɔbɛtaa n’ekyir. (2 Sam. 15:2-6) Dɛ mbrɛ Bible mu nsɛm yi ma yehu no, nyimpa a wɔpɛ enyimnyam ma hɔnho no, Jehovah n’enyi nngye hɔnho. (Mbɛ. 25:27) Ewiei koraa no, nyimpa a wɔyɛ ahomemado na wɔpɛ dɛ afofor bɔ gye hɔn do no, behyia ɔhaw.​—Mbɛ. 16:18.

9. Ebɛn nhwɛdo na Jesus daa no edzi?

⁹ Dza ɔnye kɔkɔbɔ nhwɛdo a yɛakã ho asɛm yi bɔ ebira no, susu Jesus ho hwɛ. Nna ‘ɔwɔ Nyankopɔn subea, naaso oemmbu no ohwimadze dɛ ɔnye Nyankopɔn bɛsɛ.’ (Phil. 2:6) Ɔwɔ mu dɛ Jehovah nkotsee na ɔwɔ tum kyɛn Jesus dze, naaso Jesus anndwen noho anntra dza ɔsɛ dɛ ɔdwen. Ɔkãa kyerɛɛ n’esuafo no dɛ: “Nyia ɔyɛ ekumaba wɔ hom nyina mu no, ɔno na ɔyɛ kɛse.” (Luke 9:48) Hwɛ nhyira ara a ɔyɛ dɛ yɛnye akwampaaefo, asafo mu asomfo, asafo mu mpanyimfo, nye amansin do ahwɛfo a wosũasua ahobrɛadze a Jesus daa no edzi no bɔ mu som! Sɛ yɛbrɛ hɛnho adze a, yɛbɛda ɔdɔ kɛse edzi akyerɛ afofor. Jesus kãa dɛ, Nyankopɔn n’asomfo anokwafo bɛda ɔdɔ edzi akyerɛ hɔnho.​—John 13:35.

10. Sɛ isusu dɛ asafo mu mpanyimfo nndzii ɔhaw ahorow bi ho dwuma yie wɔ asafo no mu a, ebɛnadze na ɔsɛ dɛ eyɛ?

¹⁰ Sɛ ɔtse dɛ mbrɛ ɔhaw ahorow bi asoɛr wɔ asafo no mu ma etse nka dɛ asafo mu mpanyimfo no nndzii ho dwuma yie a, ebɛyɛ w’adze dɛn? Dɛ nkyɛ ibohwinhwin no, ibotum ataa hɔn a wodzi ndzɛmba enyim no ekyir dze akyerɛ dɛ ebrɛ woho adze. (Heb. 13:17) Dza ɔbɔboa wo ma eetum ayɛ dɛm no, bisa woho  dɛ: ‘Ana ɔhaw a muhu no, ɔyɛ kɛse a ɔsɛ dɛ wodzi ho dwuma? Ana dɛm ber yi na ɔsɛ dɛ wodzi ɔhaw no ho dwuma? Ana ɔyɛ m’asodzii dɛ midzi ɔhaw no ho dwuma? Ana morobɔ mbɔdzen dɛ mebɛma koryɛ aba asafo no mu anaa mepɛ dɛ ɔda edzi dɛ emi na moho hia kyɛn obiara?’

11. Dɛ mbrɛ Ephesusfo 4:2, 3 kyerɛ no, sɛ yefi ahobrɛadze mu som Jehovah a, ebɛnadze na obefi mu aba?

¹¹ Ahobrɛadze a yɛbɛda no edzi no som bo ma Jehovah kyɛn mbɔdzen a yɛbɔ. Na dɛmara so na koryɛ som bo ma no kyɛn dɛ yɛbɛyer hɛnho ayɛ biribi yie. Dɛm ntsi, yɛ dza ibotum nyina fi ahobrɛadze mu som Jehovah. Sɛ eyɛ dɛm a, ebɛma koryɛ atsena asafo no mu. (Kenkan Ephesusfo 4:2, 3.) Yer woho wɔ asɛnka edwuma no mu. Hwehwɛ akwan ahorow a ibotum afa do ayɛ afofor papa fa som hɔn. Da ahɔhoyɛ edzi kyerɛ obiara a hɔn a wonnyi ho kwan wɔ asafo no mu mpo ka ho. (Matt. 6:1-4; Luke 14:12-14) Ber a ifi ahobrɛadze mu nye asafo no yɛ edwuma no, nnyɛ wo mbɔdzembɔ no nko na afofor bohu na mbom wobohu w’ahobrɛadze no so.

12. Ana Bible no hyɛ anyɛnkofa ho nkuran? Kyerɛkyerɛ mu.

¹² Jehovah pɛ dɛ yɛnye hɛn ebusuafo nye hɛn anyɛnkofo bɔ mu gye hɛn enyi. (Ndw. 133:1) Nna Jesus wɔ anyɛnkofo pa. (John 15:15) Bible no ma yehu dɛ, sɛ yɛwɔ anyɛnkofo pa a, yenya mfaso fi hɔn nkyɛn. (Mbɛ. 17:17; 18:24) Na dɛmara na ɔkã dɛ ɔnnsɛ dɛ yɛtsew hɛnho fi afofor ho. (Mbɛ. 18:1) Nyimpa piinara tse nka dɛ sohyial media yɛ kwan a wɔfa do nya anyɛnkofo pii na ɔno ma wɔtse nka dɛ wɔnnyɛ ankonam. Naaso, sɛ yɛdze dɛm kwan yi a  wɔfa do dzi nkitaho yi ridzi dwuma a, ɔsɛ dɛ yɛyɛ ahwɛyie.

13. Ebɛnadze ntsi na nyimpa binom a wɔdze sohyial media dzi dwuma no tse nka dɛ wɔayɛ ankonam na adwendwen ahyɛ hɔn do?

¹³ Nhwehwɛmu ada no edzi dɛ, nyimpa a wɔdze mber pii hwehwɛ nsɛm na mfonyin a afofor dze egu sohyial media do no, obowie ase no, nna wɔtse nka dɛ wɔayɛ ankonam na adwendwen ahyɛ hɔn do. Ebɛnadze ntsi a? Obotum aba dɛ, mfonyin a afofor taa dze gu sohyial media do no, ɔtaa fa biribi tsitsir bi a akɔ do wɔ hɔn asetsena mu ho; bi tse dɛ hɔnankasa hɔn mfonyin fɛɛfɛw bi, hɔn anyɛnkofo hɔndze anaadɛ beebi a ɔyɛ fɛw a wɔakɔ ho mfonyin. Nyimpa fofor a ɔbɔhwɛ mfonyin a ɔtse dɛm no, bi a ɔbɛtse nka dɛ sɛ ɔdze n’asetsena toto hɔnho a, ohu dɛ ɔayew mu koraa. Hɛn akyerɛbaa bi a oedzi mfe 19 kãa dɛ: “Ber a muhun mbrɛ afofor si gye hɔn enyi wɔ dapɛn n’ewiei na emidze mehyɛ fie dzinn no, metsee nka dɛ awerɛhow aka me.”

14. Ebɛn kwan do na afotu a Bible no dze ma wɔ 1 Peter 3:8 no boa hɛn ma yɛdze sohyial media dzi dwuma nyansa mu?

¹⁴ Nokwasɛm nye dɛ, yebotum dze sohyial media edzi dwuma wɔ kwan pa do. Dɛ nhwɛdo no, yebotum dze sohyial media edzi dwuma nye hɛn ebusuafo na anyɛnkofo edzi nkitaho. Naaso, ana ahyɛ no nsew dɛ, nsɛm, mfonyin na video a afofor dze gu sohyial media do no, wɔdze gu hɔ mbrɛ ɔbɛyɛ a afofor bɔbɔ agye hɔn do? Ɔtse dɛ mbrɛ wɔpɛ dɛ wɔkã kyerɛ afofor dɛ; “Emi nye yi o, wɔnhwɛ me.” Binom mpo kyerɛw nsɛm a ɔnnkyerɛ obu nye kasafĩ fa hɔn mfonyin nye mfonyin a afofor dze egu hɔ ho. Wɔhyɛ Christianfo nkuran dɛ wɔnda ahobrɛadze na tsema edzi, ntsi wɔremmfa sohyial media nndzi dwuma wɔ kwan a ɔtse dɛm do.​—Kenkan 1 Peter 3:8.

15. Adwen a ɔnye dɛ hɛnho hia kyɛn afofor no, ebɛn kwan do na Bible no botum aboa hɛn ma yeekwetsir?

¹⁵ Sɛ edze sohyial media dzi dwuma a, bisa woho dɛ: ‘Nsɛm, mfonyin, anaa video ahorow a medze gu sohyial media do no, obotum ama nkorɔfo enya adwen dɛ mutuw moho anaa? Ana dza meyɛ no botum ama afofor enyi aber me anaa?’ Bible no kã dɛ: “Dza ɔwɔ wiadze nyina, honam akɔndɔ, enyiwa akɔndɔ, nye asetsena mu enyimnyampɛ, ommfir Egya no, na mbom ofir wiadze.” (1 John 2:16) Bible  nkyerɛase bi kyerɛ asɛm “asetsena mu enyimnyampɛ” ase dɛ “obi pɛ dɛ ɔyɛ noho dɛ ɔkyɛn afofor.” Christianfo dze, ɔnnsɛ dɛ wɔmema hɔnho do anaa wonya adwen dɛ hɔnho hia kyɛn afofor. Wɔdze Bible mu afotusɛm yi yɛ edwuma. Ɔkã dɛ: “Mma yɛnnyɛ enyimnyampɛ hun nnyiyi hɛnho ebufuw, nntentan hɛnho.” (Gal. 5:26) Sɛ yɛbrɛ hɛnho adze a, yɛrennyɛ hɛn adze tse dɛ nyimpa a wɔwɔ wiadze a wɔmema hɔnho do na wɔpɛ dɛ afofor nya adwen dɛ hɔn na hɔnho hia kyɛn obiara no.

16. Ebɛnadze ntsi na ɔnnsɛ dɛ yɛmema hɛnho do?

¹⁶ Ɔsɛ dɛ yɛda ahobrɛadze edzi, osiandɛ hɔn a wɔmema hɔnho do no, wɔnndwen “enyidahɔ adwen.” (Rom. 12:3) Nkorɔfo a wɔmema hɔnho do no, wɔpɛ enyimnyam hun, na wɔnye afofor si akan. Adwen a wɔwɔ nye hɔn ndzeyɛɛ taa ma hɔnankasa nye afofor dzi yaw. Sɛ wɔannsesa adwen a ɔtse dɛm a, Satan bofura hɔn adwen enyi na ɔaasɛɛ hɔn adwen. (2 Cor. 4:4; 11:3) Obi a ɔbrɛ noho adze no dze, ɔdwen enyidahɔ adwen. Ommbu noho dɛ ɔkyɛn afofor na mbom ɔgye to mu dɛ afofor kyɛn no wɔ akwan pii do. (Phil. 2:3) Obi a ɔbrɛ noho adze no nyim dɛ “Nyankopɔn siw ahopɔwfo kwan, na ɔdom ahobrɛadzefo.” (1 Pet. 5:5) Hɔn a wɔdwen enyidahɔ adwen no mmpɛ dɛ Jehovah bɛyɛ hɔn tamfo.

17. Sɛ yɛbɔkɔ do ada ahobrɛadze edzi a, ebɛnadze na ɔsɛ dɛ yɛyɛ?

¹⁷ Sɛ yɛbɔkɔ do ada ahobrɛadze edzi a, Bible mu afotu a ɔkã dɛ, ‘yenyi nyimpa dadaw no nye ne nyɛe no ngu; na yɛnhyɛ nyimpa fofor’ no, ɔsɛ dɛ yɛdze yɛ edwuma. Dɛm a yɛbɛyɛ no gye edwumadzen. Nhwɛdo a Jesus yɛe no, ɔsɛ dɛ yesũa ho adze na yɛbɔ mbɔdzen yɛ dza yebotum biara dɛ yebedzi n’ekyir pɛpɛɛpɛr. (Col. 3:9, 10; 1 Pet. 2:21) Sɛ yɛyɛ dɛm a yebenya do mfaso kɛse. Sɛ yɛbrɛ hɛnho adze a, hɛn ebusua asetsena bɛyɛ enyigye na yɛbɛma asomdwee atsena asafo no mu. Afei so, ɔbɛma yekwetsir dɛ yɛdze sohyial media bedzi dwuma wɔ kwan bi do a ɔbɛma afofor enya adwen dɛ hɛnho hia kyɛn obiara. Dza ɔkyɛn ne nyinara no, yebenya Jehovah ne nhyira nye n’enyimpa.