1. ¿Filipenses 2:3 tä mäträre ño nibätä aune nikwe mikadre täte ye köböire dre kwin rabai nikwe?

NITA JEHOVÁ kukwei mike täte töi bobrebiti ñobätä ñan aune dre bäri kwin ni kräke ye gare ie (Efes. 4:22-24). Ni töi bobre ngwane Jehová tö dre ie ye bäri ütiäte ni tö dre ie ye kräke aune ni ñaka bäri ütiäte nitre mada kräke ye gare nie. Ye köböire nita nemen ja kete kwin Jehovabe aune ja mräkätre konkrekasionte yebe (ñäkädre Filipenses 2:3 yebätä).

2. a) ¿Apóstol Pablo dre mikani gare? b) ¿Nibike dre mike gare jai?

² Nitre töbike ja aibebätä aune bike kri yebätä nikwe ñaka ja ngübaibiti ngwane ni raba kite ja ngwen niaratre erere. * Nitre kristiano siklo kena ye ruärebätä bäsi kukwe ye erere nakaninkä, yebätä apóstol Pablo kukwe ne tikani konkrekasion Roma ie: “Munkwe ñan bika kri ni mda mdabtä, akwa munkwe töbika era metre au jabtä” (Rom. 12:3). Pablo mikani gare erere, ni abokän ütiäte, akwa nikwe ja töi mikai bobre ngwane, ja ñaka rabai ruin bäri ütiäte nie ni madabätä. Aisete ja töi mikadre bobre ye raba nitre gure dimike ño, ja mräkätre sribikä konkrekasionte aune nitre tä ja näkwite redes sociales yete ye dimike ño ñaka bike kri ye nibike mike gare jai.

3. a) ¿Ñobätä kukweta nemen jabätä nitre gure ie? b) ¿Ye köböite nitre gure ruäre töta nemen dre nuain?

³ Kä tädre juto nitre gure yebätä ie Jehová tö. Akwa ni ngite yebätä kukwe raba nemen jabätä nie. Pablokwe niebare, nire nire käkwe ja mäkädite ye rabai ja tuin kukwe kri ben (1 Cor. 7:28). Ja mräkätre gure ruäre abokän käre rüre jabe ruin ietre aune niaratre ñaka ja mäkädrete näre tätre nemen nütüre. Niaratre töbikai nitre ñaka Ngöbö mike täte erere ngwane, töbikai kwetre ja aibebätä aune ja tuanemetre kwetre ye bäri kwin rabai ruin ietre.

4. ¿Ni gure ye ñaka töbikadre ño?

⁴ Akwa nikwe ñaka töbikadre nikwe ja mäkäninte ye ñaka kwin. Ni gure rabadre ni madabe ye aibe ngwane raba ja tuenmetre nieta Bibliakwe (Mat. 5:32). Yebätä Pablo kukwe niebare ye erere ben nikwe ja tuai ngwane, nikwe ñaka bikadre kri aune nikwe ñaka töbikadre krörö: “Ti muko ñaka ti töibikaire jire, ñaka ti tarere ti tö ie erere aune ni mada raba kä mike juto tibätä ruin tie”. Nikwe töbikai ye erere ngwane, ni täi töbike ja aibebätä aune ñaka ni muko yebätä. Kukwe tuin ño ni kä tibienbätä ie ye käkwe ni töi mikai näin dre raba kä mike juto nibätä ye aibe jiebiti aune kukwe ngwarbebätä ni muko tuenmetre. Akwa nitre tä Jehová tuenmetre ja jie ngwen ye ñan tä töbike kukwe kwin yebätä “kaibe jakrä”, ñakare aune tä töbike kwin ni mada kräke arato (Filip. 2:4). Jehová tö ni tuai nüne käre jäme ni mukobe aune ñaka ja tuenmetre ni mukobe (Mat. 19:6). Niara tö dre ie yebätä nikwe töbikadre käne ie tö aune ñaka ni tö dre ie yebätä.

5. Efesios 5:33 tä niere erere, ¿ni rabadre ja töi mike ño jakrä kwärikwäri?

⁵ Ni rabadre ja tarere aune ja mike ütiäte jai kwärikwäri (ñäkädre Efesios 5:33 yebätä). Biblia tä ni töi mike töbike bäri ni madabätä  aune ñaka töbike krubäte jabätä (Hech. 20:35). Ja tarekäre aune ja mikakäre ütiäte jai yekäre ni rabadre ja töi mike bobre. Ye käkwe ni töi mikai ñaka kukwe kwin känene ja aibe kräke, ñakare aune ni muko kräke arato (1 Cor. 10:24).

6. ¿Steven aune Stephanie tä kukwe niere ye tä dre driere nie?

⁶ Ja mräkätre kwati tä ja töi mike bobre jai kwärikwäri ye köböire kätä juto bätätre. Ñodre ja mräkä iti kädekata Steven tä niere: “Nita ja mike tuin jai ni ja dimikaka kwrere ngwane käre nikwe ja dimikai kwärikwäri aune bäri kukwe tare näire nikwe ja dimikai. ‘¿Dre bäri kwin tikrä?’ ye erere nikwe ñaka töbikai, ñakare aune, ‘¿dre bäri kwin nun nibu kräke?’ yebätä nikwe töbikai”. Muko kwe Stephanie tä töbike ye erere aune tä niere: “Ni ñaka tö rabadre nemen nünain ni rüe ben. Kukwe tä nemen jabätä nun ie ngwane, nunta ja di ngwen mike gare jai ñobätä kukwe ye tä nemen bare. Biti nunta orare, kukwe känene aune nunta blite kukwe yebätä. Nunta ja di ngwen kukwe ye ükete aune ñaka rüre jabe”. Nitre gure ie ja ñaka rabai ruin bäri ütiäte muko kwe yebiti ta ngwane, nibutre nünain kä jutobiti.

7. ¿Ja mräkä iti kädekadre sribi nuainkäre ngwane ja töi mikadre ño kwe?

⁷ Nita ja di ngwen sribire kwin Jehová kräke ye tuin ütiäte krubäte nie (Sal. 27:4; 84:10). Ja mräkä töta sribidi bäri Jehová kräke ye ñaka blo. Biblia tä niere: “Nire tö ja mikai nitre tödekaka Jesubti jie ngwianka, ye abko tö sribi kuin nuein” (1 Tim. 3:1). Akwa kädekadre sribi nuainkäre ngwane ñaka ja töi mikadre kwe bike kri o ja ñaka rabadre ruin ie bäri ütiäte (Luc. 17:7-10). Ñakare aune ja töi mikadre kwe kukwe kwin nuainne ni mada kräke töi bobrebiti (2 Cor. 12:15).

8. ¿Diótrefes, Uzías aune Absalón kukwe ñaka kwin nuainbare ye tä dre driere nie?

⁸ Biblia tä mike gare nitre ruäre ie ja namani ruin bäri ütiäte. Ñodre, Diótrefes töi ñan nämäne bobre aune tö nämäne ja tuai ni ji ngwanka bäri ütiäte konkrekasionte (3 Juan 9). Uzías bikabare kri ñobätä ñan aune Jehovakwe sribi ñan biani ie ye nuainbare kwe (2 Crón. 26:16-21). Absalón tö namani ja tuai reire yebätä nämäne bike kwin nitre okwäbiti ne kwe tö ngwandre kwetre ie (2 Sam. 15:2-6). Nitre kira ne ja ngwani ño ye tä mike gare, nire tö ja käikitaikä ye ñaka tuin kwin Jehovai (Prov. 25:27). Nitre bikaka kri ye tö ja käikitakamana, akwa kukwe tare aibe rabadi bare bätätre (Prov. 16:18).

9. ¿Jesukwe dre bämikani ni käne?

⁹ Jesús abrä kukwe kwin bämikani ni käne. Biblia tä mike gare, “niara nämäne Ngöbö kwrere, akwa ñaka ja töi mikani kwe nemen Ngöböre aune ja mike Ngöbö täte” (Filip. 2:6, TNM). Jehová ye bitikäre Jesús ye bäri dite krubäte, akwa ja ñaka ruin bäri ütiäte ie ni mada kräke. Kukwe ne niebare kwe nitre ja tötikaka ie: “Nire käkwe ja töi mikai ja ngwen bäri chi ye abokän ja ngwain ni ünä erere” (Luc. 9:48, TNM). Nitre prekursor, siervo ministerial, nitre umbre ji ngwanka aune nitre circuito tuabitikä tä ja töi mike bobre Jesús erere yebe nita sribire ye käi juto nibätä. Nikwe ja töi mikai bobre ngwane, nikwe ni mada taredi aune ye köböire ni abokän Ngöbö mikaka täte ye nikwe bämikai (Juan 13:35).

10. Kukweta nemen bare konkrekasionte aune ñaka ükateta tä nemen ruin nie ngwane, ¿dre nuaindre?

¹⁰ Konkrekasionte kukweta nemen bare aune ñaka ükateta tä nemen ruin nie ngwane, ¿dre nuaindre? Nikwe ñaka ñäkädre blo ja  mräkätrebätä, bäri kwin nikwe ja töi mikadre bobre aune nitre tä ni jie ngwen ye dimikadre (Heb. 13:17). ¿Ni raba niaratre dimike ño? Nikwe ngwandretari jai: “¿Kukwe tuin tie ye tare krubäte aune ükate rabadre ya? ¿Nuaindre bengwairebe ye bäri kwin ya? ¿Ükadrete ye tä gare tie ya? ¿Ti tö konkrekasion tuai keteitibe o ti käikitadrekä ye tita känene?”.

11. Efesios 4:2, 3 tä niere erere, ¿nikwe sribidi Jehová kräke töi bobrebiti ngwane dre rabai bare?

¹¹ Ni töi bobre ye bäri ütiäte Jehová kräke kukwe nuain gare krubäte nie ye kräke. Aune ni tädre ja kete kwin jabe ye bäri ütiäte Jehová kräke ni sribikä tä sribi keta kabre nuainne jötrö ye kräke. Yebätä nikwe ja di ngwandre Jehová mike täte töi bobrebiti. Ye erere nikwe nuaindi ngwane, nikwe konkrekasion dimikai nemen keteitibe (ñäkädre Efesios 4:2, 3 yebätä). Ni tädre käre kukwe driere. Nikwe kukwe kwin nuaindre ni mada kräke. Nikwe ja ngwandre mantiame ni jökrä ben aune ñaka nitre tä kädekani sribikäre konkrekasionte ye aibe ben (Mat. 6:1-4; Luc. 14:12-14). Nikwe sribidi töi bobrebiti ja mräkätre ben ngwane, nita sribire kwin jutuai ietre akwa bäri ütiäte ni abokän töi bobre rabai gare ietre.

12. ¿Ja ketamuko rabadre nikwe yebätä Biblia tä dre niere?

¹² Jehová tö ni tuai kä ngwen juto jabätä ja mräkätre aune ja ketamukotre nikwe yebe (Sal. 133:1). Ja ketamuko kwin namani Jesukwe (Juan 15:15). Biblia tä mike gare kukwe kwin tä nemen bare ni kräke ja ketamuko kwin tä nikwe ye ngwane (Prov. 17:17; 18:24). Aune nikwe ñaka ja diandrekä mento mikata  gare kwe nie arato (Prov. 18:1). Nitre kwati tä nütüre redes sociales yebiti ja ketamuko kwati raba nemen nikwe ne kwe ja ñaka rabadre ruin kaibe nie. Akwa nikwe ñaka ja näkwitadrebätä okwä kware.

13. ¿Ñobätä nitre ruäre tä ja näkwite redes sociales yebiti yei jata nemen ruin kaibe aune drepimido ietre?

¹³ Üai aune kukwe tikata redes sociales yete ye nire tä tuin käre yei ja raba kite ruin kaibe aune raba nemen bren depresión kisete ye nitre ja tötikaka kukwe nebätä tä niere. ¿Ñobätä? Ñobätä ñan aune dre bäri ütiäte nitre kräke ye mikata kwetre redes sociales yete. Ñodre, nitre tä ja üai bäri kwin mike yete, ja ketamuko kwetre ye üai mike aune tädre niken basare kä bä nuäre känti ye üai mikata kwetre. Nire tä üai ye tuin ye raba nemen nütüre niaratre ye ngwarbe aune ñaka tä nüne kwin. Meri testiko kä 19 biti tä niere: “Nitre mada nämä kä ngwen juto jabätä ti ngwä, ti abokän kwekebe gwi ye jataba ti mike töbike krubäte aune ja jataba ruin ngwarbe tie”.

14. ¿1 Pedro 3:8 ye raba ni dimike ño ja ngwen töbätä redes sociales yete?

¹⁴ Erametre redes sociales yebiti kukwe kwin nuain raba, ñodre, ni raba blite ni mräkätre aune ja ketamuko nikwe ben. Akwa, dre mikata redes sociales yete ye metrere nuainta nitre töi mikakäre jabätä aune nitre töi mikakäre niä. Nitre mada abokän tä ñäke käme aune blite käme üai ni madakwe yebätä aune ñäke tare ni madai. Akwa ni kristiano abokän ñaka kukwe ye kwrere nuaindi redes sociales yete ñobätä ñan aune nikwe ja töi mikadre bobre aune nitre mada töi mikadre nüke gare jai ribeta nie (ñäkädre 1 Pedro 3:8 yebätä).

15. ¿Biblia raba ni dimike ño ne kwe ja ñaka rabadre ruin bäri ütiäte nie ni madabätä?

¹⁵ Redes sociales tärä nikwe ngwane nikwe kukwe ne ngwandretari jai: “¿Tita kukwe tike, jondron üai aune video mike ye tä bämike tita ja dikaire o ño? ¿Ti raba nitre mike bätä ngwen jabätä?”. Biblia tä niere: “Jondron tä kä nete jökrä, ni ngätä tö krubäte ie, ni okwä tö ie, aune arato jondronbiti ja nebe ruin kri nie; jondron ne jökrä ñakare Ngöbö känti kite, akwa jondron ne abrä kä nete kite” (1 Juan 2:16, NGT). Ni käikitadrekä ye ni ñaka ribere jai, ñakare aune Biblia tä kukwe niere  ne nita mike täte: “Nikwe ñan bikadre krikri jabtä kwärikwäri. Erere arato, nikwe ñan ja kwitadre ja rüere kwärikwäri amne jändrän ni mdakwe, dokwäre nikwe ñan bätä ngwiandre btä” (Gál. 5:26). Nikwe ja töi mikai bobre ngwane, nitre tä bike kri aune ja ruin bäri ütiäte ietre ni mada kräke ye erere nikwe ñaka ja ngwandi.

16. ¿Ñobätä ni ñaka tö bikai kri?

¹⁶ Nikwe ja töi mikadre bobre ñobätä ñan aune ni bike kri ye ni ñaka töbike kwin jabätä (Rom. 12:3). Tä rüre ni madabe aune tä töbike ja aibebätä. Tä töbike ño aune tä ja ngwen ño yebiti tä ja nuainne tare aune ni mada nuainne tare. Ni bike kri ñaka ja töi kwitai ngwane, Satanakwe kä mikai iko okwäte aune töi juain ngwarbe kwe (2 Cor. 4:4; 11:3). Akwa ni töi bobre yei ja ñaka ruin bäri ütiäte ni madabätä, käne tä töbike kwin aune tä ni mada mike bäri ütiäte jai kukwe keta kabrebätä (Filip. 2:3). Arato, “nire nire käta bike kri abko rüere Ngöbö motota nebe romon. Akwa nire nire käta bike tidrä Ngöbö ngwärekri abko kräke Ngöböta ja moto mike kuin” ye gare ni töi bobre ie (1 Ped. 5:5). Ni töbikaka kwin ye ñan töta nemen Ngöbö tuai ja rüere ben.

17. Ni tö käre ja töi mikai bobre ngwane, ¿nikwe dre nuaindre?

¹⁷ Ni tö käre ja töi mikai bobre ngwane, kukwe nieta Bibliakwe ne nikwe mikadre täte: “Mun nämäne ja ngwen ño käne ye munkwe tuanmetre, aune munkwe ja ngwan ni bitin kwrere”. Kukwe ne kräke nikwe ja di ngwandre krubäte ñobätä ñan aune nikwe ja tötikadre Jesubätä aune ja ngwani ño kwe ye erere ja ngwandre (Col. 3:9, 10, TNM; 1 Ped. 2:21). Nikwe ja di ngwain ye erere ngwane kukwe kwin rabai nikwe. Nikwe ja töi mikai bobre ngwane, nikwe nünain kä jutobiti ni mräkäbe, konkrekasion täi keteitibe aune nikwe kukwe kwin nuaindi redes sociales yebiti. Akwa bäri ütiäte, nikwe kä ngwain juto Jehovabätä aune ni kadi ngäbiti kwe.