1. Nama jaku lalau ba Pilipi 2:3 sereta nama penguntung ba kitai?

KITAI enggau baruh ati ngasika Jehovah, laban kitai nemu Iya seruran nemu utai ti pemadu manah ke kitai. (Eps. 4:22-24) Baruh ati meransang kitai ngenuluka peneka Jehovah sereta ngumbai orang bukai pama agi ari kitai. Asil iya, kitai bisi kaul ti manah enggau Jehovah sereta bala menyadi Kristian.—Bacha Pilipi 2:3.

2. Nama ditemu Paul, lalu nama deka dikerandauka kitai ba artikel tu?

² Tang enti kitai enda bejimat, kitai engka nitihka orang ba dunya nyadi sumbung sereta berundingka diri empu. * Tu bisi nyadi ngagai orang Kristian ba abad keterubah. Rasul Paul meri jaku lalau ngagai orang Kristian ba Rome: “Aku bejaku ngagai genap iku kita: anang ngumbai diri pama agi ari ti patut, tang enggau ati ti baruh, peresa diri empu.” (Rom. 12:3) Paul madahka, enda salah kitai berundingka diri empu. Taja pia, baruh ati ulih nulung kitai bisi runding ti ngena pasal diri empu. Ba artikel tu, kitai deka berandauka baka ni kitai ulih baruh ati ba tiga iti pekara tu: (1) ba tikah kitai, (2) lebuh diberi tanggung pengawa ba gerempung Jehovah, sereta (3) lebuh ngena media sosial.

3. Nama utai ke ditapi laki bini, lalu nama deka digaga sekeda orang lebuh napi penanggul tu?

³ Jehovah deka laki bini berasai lantang ba tikah sida. Taja pia, ketegal enda sempurna, penanggul ulih nyadi ba tikah. Ke amat Paul bisi nulis, orang ke jadi melaki-bini deka dituntung penusah. (1 Kor. 7:28) Sekeda orang engka suah belaya enggau kaling pengidup sida empu, sereta ngumbai diri enda ulih idup begulai. Enti sida nitihka runding dunya, sida deka ngenuluka pengelantang ba diri empu lalu ngumbai sarak nya chara ti pemadu manah.

4. Nama patut diseliahka kitai?

⁴ Kitai anang ngumbai tikah kitai enda mujur. Kitai nemu Bup Kudus semina ngemendarka sarak enti seiku ari kaling pengidup butang. (Mat. 5:32) Nya alai, lebuh bisi penanggul ba tikah, anang nejuka ati ti sumbung ngasuh kitai berunding: ‘Aku ngasaika enda dikeibuhka sereta enda dikerinduka kaling aku. Engka manah agi aku ngiga orang bukai.’ Enti kitai berunding baka nya, reti nya kitai berundingka diri empu sereta enda berundingka kaling pengidup kitai. Orang ba dunya deka nuan ngumbai sarak nya enda salah. Pia mega sida meransang nuan nitihka ati diri lalu ngereja utai ti ngasuh nuan gaga ati. Tang Bup Kudus ngasuh kitai: “Anang semina berundingka diri empu aja, tang berunding mega ke orang bukai.” (Plp. 2:4) Jehovah deka nuan negapka tikah nuan, ukai sarak. (Mat. 19:6) Iya deka ke nuan berundingka asai ati Iya, ukai berundingka asai ati diri.

5. Nitihka Epesus 5:33, baka ni laki bini begulai enggau pangan diri?

 ⁵ Laki bini patut rindu sereta bebasaka pangan diri. (Bacha Epesus 5:33.) Bup Kudus ngajar kitai, meri manah agi ari ke nerima. (SKR. 20:35) Nama kualiti ke ulih nulung laki bini ngayanka pengerindu sereta basa? Iya nya baruh ati. Laki bini ke baruh ati enda berundingka diri empu, tang “berundingka” kaling pengidup sida.—1 Kor. 10:24.

6. Nama ulih dipelajarka kitai ari Steven enggau Stephanie?

⁶ Ketegal baruh ati, mayuh laki bini berasai lantang ati. Baka seiku laki ke benama Steven madahka: “Lebuh penanggul nyadi, laki bini besaup mutarka nya. Ari ke berunding ‘nama utai ti pemadu manah ke aku?’, manah agi berunding ‘nama utai ti pemadu manah ke kami?’” Bini iya Stephanie madahka: “Nadai sapa deka diau enggau orang ke suah deka belaya. Lebuh laya nyadi, kami duai nguji ngiga kebuah iya. Udah nya kami duai besampi, ngiga pansik, sereta berandau chara mutarka iya. Ke amat beguna, ukai nyalahka pangan diri tang mutarka penanggul nya.” Endang amat, lebuh laki bini enda ngumbai diri pama agi ari pangan diri, sida deka lantang ati.

7. Nama patut digaga seiku menyadi lelaki lebuh nerima pengawa ba gerempung Jehovah?

⁷ Kitai temegah ati gawa ke Jehovah ba mayuh chara. (Mas. 27:4; 84:10) Enti seiku menyadi lelaki sanggup ngereja mayuh pengawa ba gerempung Jehovah, iya patut dipuji. Bup Kudus madahka: “Barang sapa ingin deka nyadi tuai ti ngiring pengawa, iya inginka pengawa ti badas.” (1 Tim. 3:1, NWT) Taja pia, iya enda patut ngumbai diri manah agi ari orang bukai ketegal diberi tanggung pengawa. (Luk. 17:7-10) Tang iya patut baruh ati gawa ke orang bukai.—2 Kor. 12:15.

8. Nama ulih dipelajar kitai ari chunto Diotrepes, Usiah enggau Absalom?

⁸ Peratika chunto dalam Bup Kudus pasal orang ke ngumbai diri pama agi. Diotrepes deka “nyadi tuai” dalam eklisia. (3 Jhn. 9) Usiah ngenemuka diri ngereja pengawa ke enda diberi Jehovah ngagai iya. (2 Ban. 26:16-21) Absalom deka nyadi raja, lalu iya pura-pura rinduka rayat ngambika sida nyukung iya. (2 Sam. 15:2-6) Ari chunto sida tiga tu, kitai nemu Jehovah enda rinduka orang ke minta dipuji. (J-lam. 25:27) Kesuah iya, orang ke sumbung sereta deka dipuji nuju ngagai pengerusak.—J-lam. 16:18.

9. Nama ulih dipelajar kitai ari chunto Jesus?

⁹ Jesus enda baka Diotrepes, Usiah enggau Absalom. “Taja pen iya [Jesus] baka Petara tang iya enda ngumbai diri sebaka enggau Petara.” (Plp. 2:6, NWT) Jesus nemu, nadai utai ke bekuasa agi ari iya kelimpah ari Jehovah. Taja pia, iya enda ngeninggika diri. Ku Jesus madah ngagai bala murid iya: “Orang ke pemadu mit ba bala kita, nya meh orang ke pemadu besai.” (Luk. 9:48) Kitai tentu gaga ati ulih sama gawa enggau pengerintis, penulung gempuru, tuai gempuru sereta tuai ti ngabas ke nunda pemaruh ati Jesus! Enti kitai baruh ati, tu nulung kitai senang agi nunjukka pengerindu ngagai orang bukai. Lalu Jesus madahka, nembiak Petara ti bendar deka ngayanka pengerindu ngagai pangan diri.—Jhn. 13:35.

10. Nama patut digaga nuan enti nuan ngasaika tuai gempuru enda mutarka penanggul ba eklisia?

¹⁰ Nama patut digaga nuan enti bisi penanggul nyadi ba eklisia? Nuan engka ngasaika penanggul nya enda diputarka bala tuai  gempuru. Ari ke mutap, nuan ulih ngayanka baruh ati iya nya, nyukung sida. (Heb. 13:17) Baka ni chara iya? Tanya diri empu: ‘Kati penanggul nya besai nyentukka patut diadu? Kati tu maya ti betul ngaduka penanggul nya? Kati nya pengawa aku ngaduka iya? Kati aku nguji nyerakupka eklisia, tauka nunjukka diri pama agi ari orang bukai?’

11. Nitihka Epesus 4:2, 3, nama asil iya enti kitai gawa ke Jehovah enggau baruh ati?

¹¹ Ba Jehovah, pemaruh ati enggau penyerakup beguna agi ari pengelandik. Nya alai, enti nuan bebendar gawa ke Jehovah enggau baruh ati, nuan ulih negapka penyerakup ba eklisia. (Bacha Epesus 4:2, 3.) Ransing meh enggau pengawa nginjil. Giga meh peluang ngereja utai ti manah ngagai orang bukai. Ayanka pengerah jari ngagai semua orang nyengkaum sida ke nadai tanggung pengawa ba eklisia. (Mat. 6:1-4; Luk. 14:12-14) Lebuh nuan baruh ati gawa enggau bala menyadi ba eklisia, sida ukai semina meda pengelandik nuan, tang mega meda pemaruh ati nuan.

12. Nama dipadah Bup Kudus pasal bebakih?

¹² Jehovah deka kitai gaga ati begulai enggau bala bakih sereta diri sebilik. (Mas. 133:1) Jesus mega bisi pangan ti manah. (Jhn. 15:15) Bup Kudus madahka, ngembuan pangan ti bendar nya amat beguna. (J-lam. 17:17; 18:24) Lalu Bup Kudus mega madahka, enda manah enti kitai enda  begulai enggau orang bukai. (J-lam. 18:1) Mayuh orang ngasaika media sosial nulung sida bulih mayuh bakih ngambika enda berasai sunyi. Tang kitai patut bejimat lebuh ngena media sosial.

13. Nama kebuah sekeda orang ke ngena media sosial berasai sunyi sereta tusah ati?

¹³ Nitihka pansik, orang ke mayuh ngena awak meda komen sereta gambar orang bukai ba media sosial tau ngujungka sida berasai sunyi sereta tusah ati. Nama kebuah? Laban orang kesuah agi nepu gambar ti pemadu manah pasal diri empu, bakih sida, sereta endur ke dilawa sida. Orang ke meda gambar nya engka berengkah ngumbai pengidup diri enda semanah pengidup orang nya. Ku seiku menyadi indu ke beumur 19 taun madah: “Aku berasai chemburu lebuh meda orang bukai gaga ati ba ujung minggu, tang aku semina ba rumah aja.”

14. Baka ni jaku lalau ba 1 Peter 3:8 nulung kitai ngena media sosial enggau manah?

¹⁴ Endang amat, media sosial amat beguna kena berandau enggau diri sebilik sereta bala bakih. Tang kati nuan bisi beratika sekeda orang ngena media sosial kena nunjukka diri ngambika dipuji orang? Bisi mega meri jaku ti kasar sereta kamah lebuh sida meri komen ba gambar diri empu tauka orang bukai. Tang orang Kristian enda ngena media sosial enggau chara nya, laban sida diperansang nunjukka pemaruh ati enggau penyiru.—Bacha 1 Peter 3:8.

15. Baka ni Bup Kudus nulung kitai nyeliahka diri ari temegahka diri sereta minta dipuji?

¹⁵ Enti nuan ngena media sosial, tanya diri empu: ‘Kati komen, gambar, tauka video aku ngasuh orang bukai ngumbai aku temegahka diri? Kati tu ulih ngasuh orang berasai chemburu?’ Bup Kudus madahka: “Semua utai di  dunya tu—utai ti dikinginka tubuh, utai ti dikinginka mata, temegahka pengaya—ukai datai ari Apai, tang datai ari dunya.” (1 Jhn. 2:16) Siti salin Bup Kudus nyalin rambai jaku “temegahka pengaya” ngagai “ngasuh ati orang temegah.” Orang Kristian enggai temegahka diri tauka minta dipuji orang. Tang sida nitihka jaku lalau ba Bup Kudus: “Anang sumbung; anang nyemekih pangan diri; anang ngining pangan diri.” (Gal. 5:26) Enti kitai baruh ati, kitai enda nunda orang ba dunya ke rindu temegahka diri sereta minta dipuji.

16. Nama kebuah kitai enda patut sumbung?

¹⁶ Orang ke sumbung enda ngembuan “ati ti baruh.” (Rom. 12:3) Orang ke sumbung ngumbai diri pama agi lalu rindu bepekit. Runding enggau ulah sida ulih ngenusahka diri empu sereta orang bukai. Enti sida enda berubah, runding sida deka dipampul sereta ditesatka Sitan. (2 Kor. 4:4; 11:3) Orang ke baruh ati bisi runding ti manah ba diri empu lalu ngumbai orang bukai pama agi ari iya. (Plp. 2:3) Lalu iya mega nemu, ‘Petara ngelaban orang ke sumbung, tang ngayanka pengasih ngagai orang ke baruh ati.’ (1 Pet. 5:5) Nya alai, orang ke baruh ati, enggai nyadi munsuh Jehovah.

17. Nama patut digaga kitai ngambika mengkang baruh ati?

¹⁷ Ngambika mengkang baruh ati, kitai nitihka jaku lalau Bup Kudus, iya nya ‘ngelengkaka pengidup ti lama, enggau semua pengawa iya, lalu nyadi mensia ti baru.’ Kitai patut bebendar ngereja tu. Kitai patut belajar pasal Jesus sereta bebendar nitihka teladan iya. (Kol. 3:9, 10; 1 Pet. 2:21) Enti kitai ngereja nya, kitai deka bulih asil ti manah. Lebuh kitai ngemansangka pemaruh ati, ruang bilik kitai deka gaga ati, eklisia deka beserakup, lalu kitai enda ngena media sosial ngambika dipuji orang. Ke amat beguna, kitai ngasuh Jehovah gaga ati sereta bulih berekat ari Iya.