1. Ẹla ọmẹjẹ oyina à tị́ juwa ụ-ụpwụ nya Ala iFilipayị 2:3? Apyobwuna oyina ahị tị́ ka ye ụka kahị kpa họ ụkụrwọ?

AHỊ kaa kpịlọhị keji ju ihi nya iJihova, chajị ahị jẹ́ nyori ọ jẹ́ ang ọlẹ kọ há hahị ụka myị́ ụka. (Efe. 4:22-24) Ụka kahị kpịlọhị keji, ahị kaa kụ irya nyori ẹla ọlẹ kọ há iJihova baba gụ ẹla ọlẹ kahị tịtọ bala ọ-yẹ angịkịla lala angịlẹ kị gụụhị ịnyịnyị. Ọọwa kaa du ká igu oriri nyahị bala iJihova, tụ́ ịnya aanahị ịla ọjịra-jịra kaa la ọngịrị yẹẹyẹẹ.—Wa Ala iFilipayị 2:3.

2. Ịyẹ ọlẹrụ ịPọlụ à tị́ ya nyị baba ịnyịnyị? Ẹlịyẹ ahị tị́ ka kụ ẹhị yẹ a-ang ọjẹ́jẹ ọlẹ?

² Kori kahị tị dụmwọ-dụmwọ ka, abwẹla nya alodehe ọlẹ kị kaa hu ịlaa hwaa bala ọ-yẹ ịlaa-ịlaa kem * ka chị kịlahị myị́. Ọ lala o-ri angịnyị nya ịKịrayịsị ịhyẹ la oyi nya ọgbanyẹ la akama ọlịịwẹ, chajị ọlẹrụ ịPọlụ da ụpwụ du kịla Ala iRom nyori: “M jam bịlẹ ọng myị́ ọng lẹpwarịrị nyanụ yẹkẹẹ, anụ juwa me irya oluhye gidogbo ju ịlọnụ kpoye nya iwe-ahụrụ nya ịlọnụ kpong-kpong ka. Ma, ọkọkọ nya ọọwa lẹ, ká ọng myị́ ọng nyanụ a tụtụ juwa kpa ẹla ọjẹ́jẹ me irya ju ịlọmwụ meme labwọ.” (Rom. 12:3) ỊPọlụ ya nyori ahị nyị baba nyọka chị ihi ju ịlọhị chẹẹ. Ma, ịlọhị ọ-kpa keji ka dahị ụbwọ nyọka yẹ ịlọhị meme labwọ. Ang ọjẹ́jẹ ọlẹ ka ya ẹla u-uhye nya ẹga ịta ịlẹ ká ịlọhị ọ-kpa keji ka dahị ụbwọ cheji ba hi ọ-kụ irya ju ịlọhị kpoye-kpoye. Ẹga ịịwa ri (1) awụlẹ oyeye nyahị, (2) ụkụrwọ ọlẹ kahị la ogu nya iJihova, bala (3) abwọlẹ kahị kaa kpa intanẹtị ị-kpa joja họ ụkụrwọ.

3. Ịyẹ tị́ du ká o-wo lawụlẹ-ka ka ji ẹ-ẹpwụ nya awụlẹ oyeye myị́? Ányị angịhyẹ à tị́ kaa họ ụka kọ lịnyị?

³ IJihova tịtọ ká ahụ bala ọrụ ka chị ọkẹkẹnị lawụlẹ. Chajị nyọlẹ kị tị la kpẹẹkpẹẹ ka lẹ, ọ chịkpẹẹ kị ka la o-wo lawụlẹ-ka u-uhye nya ẹla ịhyẹ myị́. ỊPọlụ dọmwụ da ụpwụ nyori angịlẹ kị ye awụlẹ, nyị ka la akama ịhyẹ. (1 Kọr. 7:28) Angịhyẹ kaa rụ arụ bala ahụ nyaa lee ọrwaa ụka myị́ ụka, du kị ka kụ irya myị́ nyori ịwa nyị́ chịla nyọka ye awụlẹ ịnọ ka. Kori kị kaa gbịla abwẹla nya alodehe ọlẹ aalẹ, ị ka kụ irya ahyaahị nyori ịwa nyị pwa awụlẹ mẹ. Ị ka yẹ ịlaa-ịlaa kem bala o-me nyori ụka kị pwa awụlẹ lẹ, ị ka jẹ́-ẹ chị ọkẹkẹnị ẹẹ.

4. Ẹlịyẹ ahị tị́ ka cheji ba hi?

⁴ Ahị ka cheji ba hi ọ-kụ irya nyori ọkẹkẹnị nyị́ ka jẹ́-ẹ ji awụlẹ oyeye nyahị kaka. Ahị jẹ́ nyori ịBayịbụụ ya ẹga da nya awụlẹ ọ-pwapwa u-uhye nya ẹla ookpokpo kem, kọ ri ụya ọhọhọ. (Mat. 5:32) Lẹ, ụka kahị la akama a-awụlẹ oyeye nyahị, áhị ka hu ịlọhị hwaa bala ọ-kụ nyori: ‘Awụlẹ oyeye ọlẹ họ ịbaba nyam myị́? M̀ ye ọháha ọlẹ kam chịla nyọka la? M̀ ka chị ọkẹkẹnị gụ ẹ-ẹga nya ọngọkịla?’ Kori kahị họ ịnyị aalẹ, u-uhye nyịlọhị-ịlọhị kem ahị wẹẹ kụ irya lẹ. Angị jẹ́ ẹla nya odehe ka bying nyori ahụ nyị họ ẹla olirya nyang bala ang ọlẹ kọ ka ya ọkẹkẹnị hang, kori ká ẹla ọọwa á ri ọ-ka myị́ awụlẹ oyeye nyang wẹwẹ. Ohe Oluhye tị ya ahụ nyị ‘juwa tịtọ nya ịlahị ọkaka nya ịlọng-ịlọng kem ka. Ma, ahụ nyị juwa tịtọ nya ịlahị ọkaka nya anginyị aanang ịkịla ịnyịnyị.’ (Filip. 2:4) IJihova tịtọ á ka kịnyaa la awụlẹ oyeye nyang, ọkọkọ nyọka myọọ. (Mat. 19:6) Ọ tịtọ á ka kụ irya u-uhye nyamwụ ọwa ayịdang jene, u-uhye nyịlọng ka.

5. Ányị ahụ bala ọrụ à tị́ ka kpa awụlẹ, ká ụpwụ nya Ala Efesọsị 5:33 mẹjẹ?

⁵ Ahụ bala ọrụ ka kpa awụlẹ la ọháha bala ihi ojuju. (Wa Ala Efesọsị 5:33.) ỊBayịbụụ mẹjẹ́ẹhị nyori ahị nyị ya irya nyahị nọ u-uhye nyọka  hu ha ọkọkọ nyọka yeye. (Ụkụr. 20:35) Abwẹla oyina à tị́ ka da ahụ bala ọrụ ụbwọ nyọka mẹ ọháha bala ihi jẹ? Ịlaa ọ-kpa keji ịnyị. Ịhụ bala ịrụ ịlẹ kị kpịlaa keji-í ka tịtọ nya apyobwuna nyịlaa kem ka, ma ị ka tịtọ nya ịnya “angịnyị angịkịla ịnyịnyị.”—1 Kọr. 10:24.

6. Ẹlịyẹ a tị́ jẹ́ bwu ẹla ọlẹ ká Steven bala Stephanie ya?

⁶ Iru nya ịhụ bala ịrụ ịlẹ kị ri angịnyị nya ịKịrayịsị ye ọkẹkẹnị yẹẹyẹẹ a-awụlẹ oyeye nyaa bwula ọ-kpịlaa keji. Ọ-chụ pwokwita, ọrụ ọhẹ kọ ri Steven yẹkẹẹ: “Anụ angị imimiiye ka họ ụkụrwọ lawụlẹ, ọgụgụụgụ ụka ká akama-á ji. Ọkọkọ nyọka kụ irya nyori ‘ịyẹ à tị́ ka há ham gụ?’ à ka kụ irya nyori ‘ịyẹ à tị́ ka há hahị gụ?’ ” Ahụ nyamwụ kọ ri Stephanie la irya ụma nya ọrụmwụ ịnyịnyị. O yẹkẹẹ: “Ọ́ kaa há ọngọngọhẹ nyọka kụ bala ọngọ rụ arụ ụka myị́ ụka ka. Ụka kahị la o-wo lawụlẹ-ka, ahị kaa maga nyọka jẹ́ ang ọlẹ kọ ju ọmwụ nyamwụ. Lẹ ahị kaa raabwọ, jẹ́ ang u-uhye nya ẹla ọọwa bwu ịBayịbụụ bala o-ya ẹla lawụlẹ u-uhye nya abwọlẹ kahị ka bwu myị́ akama ọọwa lẹlẹ. Ahị kaa jahị da akama ọọwa, áhị kaa jahị da awụlẹ ka.” Ahụ bala ọrụ ka chị ọkẹkẹnị yẹẹyẹẹ kori ká ọngọhẹ á me irya nyori o ju apyobwuna lụmẹ gụ ọngọkịla ka.

7. Abwẹla ọlányị ọọnahị ọlẹng ọlẹ kị ya ụkụrwọ ha ọọjịra-jịra, à tị́ ka la?

⁷ Ahị yọọ lala ihi nyọka gbịgba ha iJihova ụ-ụgbẹyị ọlẹlẹhẹ ọlẹ kahị ka jụ́ họ myị́. (Eje. 27:4; 84:10) Ọ há kori ká ọọnahị ọlẹng ọhẹ á nwụlanọ nyọka họ ụkụrwọ gụ ọọwa ogu nya iJihova. ỊBayịbụụ dọmwụ yẹkẹẹ: “Ó ri ká ọngịnyị á juwa tịtọ nya iwe-ahụrụ nya ọngọgbikpịlọ ọlẹpwụ nya [ọjịra-jịra] aalẹ, ụkụrwọ ọnyịịla-ọnyịịla a wẹ kọ wẹẹ tịtọ lẹ.” (1 Tim. 3:1) Ma, ụka kị ya ụkụrwọ họọ, ọ́ ka kụ irya nyori ọwa nyị ri ọngọ ọtụka lẹẹlẹẹ lẹ ka. (Luk. 17:7-10) Ang ọlẹ kọ ka hu kụ ịlahị ri ọ-ka họ ụkụrwọ ha angịkịla la ịlọmwụ ọ-kpa keji.—2 Kọr. 12:15.

8. Ẹlịyẹ ahị tị́ jẹ́ bwu ẹga nya ịDayọtirifisi, Usiya bala Abụsalọm?

⁸ ỊBayịbụụ ya ẹla u-uhye nya angịhyẹ ịlẹ kị me irya ju ịlaa kpoye-kpoye. ỊDayọtirifisi á kpịlọmwụ keji ka. Ọ kaa maga nyọka “hu ịlọmwụ kụ ịlahị” ọọjịra-jịra. (3 Jọn. 9) Usiya hu ịlọmwụ hwaa du kọ maga nyọka họ ụkụrwọ ọlẹ ká iJihova ya họọ nyị họ ka. (2 Ego. 26:16-21) Abụsalọm kpa ijẹẹhị maga nyọka gbile angịnyị ba ịlọmwụ chajị ọ tịtọ kọ ka ri adịrahụ. (2 Sam. 15:2-6) Oja ịlẹpwụ nya ịBayịbụụ ịwẹ mẹjẹ nyori, ẹla nya angịlẹ kị tịtọ nya ogbo nyịlaa á kaa kpụ iJihova ịpyọ ka. (Etu 25:27) Kori kọ nọ chẹẹ, angịlẹ kị kaa hu ịlaa hwaa bala ọ-tịtọ nyọka kụ ịlahị kaa la akama.—Etu 16:18.

9. Ọgụ-ẹpẹtẹ oyina iJisọsị à tị́ ya deeji?

⁹ IJisọsị ọwa datị gbanggbang hi angị hu ịlaa hwaa ịwẹ. ỊBayịbụụ ya nyori, ịnọ nyị “ju abwụma nya ọhịhị nya Ohe Oluhye. Ma, ịKịrayịsị ayịdang á tị myị hu ịlọmwụ hwaa kaka ta Ohe Oluhye meme ẹ-ẹpwụ nya ịngịngịhyẹ nyamwụ kpong-kpong ka.” (Filip. 2:6) Nanana nyori iJisọsị à ri ọngọlẹ kọ la ọngịrị ba Ohe Oluhye ba lẹ, ọ́ kaa kụ irya ju ịlọmwụ kpoye kpong-kpong ka. O byi angịjụgbẹyị nyamwụ yẹkẹẹ, ọngọlẹ kọ hu ịlọmwụ nya ọngọ “byẹhị lala ochiku ẹ-ẹpwarịrị nyanụ wuu . . . ọngọọwa a ka ri ọtụka lala inyi ị-ịlahị nya Ohe Oluhye lẹlẹ.” (Luk. 9:48) O ri ahị ọwawa ọtụka-ọtụka nyọlẹ kahị jam gbịgba ha iJihova bala angị ye ịlahị nya ụgbẹyị, angị myị ẹrụ, angịgbahị nya ọjịra-jịra, bala angị kpẹhị rịrị isekut ịlẹ kị kaa kpịlaa keji lala iJisọsị! Kori kahị kpịlọhị keji, ahị kaa mẹ ọháha jẹ angịkịla gụ olene. IJisọsị tị ya nyori ọháha nya-à ri ang ẹjẹẹ ọlẹ kọ kaa mẹ anchẹ nya Ohe Oluhye nyịlẹhị jẹ lẹ.—Jọn. 13:35.

10. Ányị a tị́ ka họ kori ká me irya nyori angịgbahị nya ọjịra-jịra á jẹ́ họ ẹla u-uhye nya akama ịla ọjịra-jịra ka?

¹⁰ Ányị a tị́ ka họ kori ká me irya nyori akama juwa ọọjịra-jịra, ma angịgbahị á jẹ́ họ ẹla u-uhye nyamwụ ka? Ọkọkọ nyọka mwọ ala ya, à  ka jẹ́-ẹ kpịlọng keji bwula ọ-chẹkpẹ ju angịlẹ kị wẹẹ kpịlahị. (Hib. 13:17) Nyọka jẹ́-ẹ họ ịnyị, tịlọng ịtọ ẹla ịlẹ wẹẹ: ‘Ẹla ịlẹ kam yẹ ju apyobwuna lụmẹ kpụ ị baba nya ọ-nwụ rịrị? Ụka ọlẹ à pwoku nyọka nwaa rịrị lẹ? Ụkụrwọ nyam o ri nyọka nwaa rịrị lẹ? M̀ tịtọ ká ọjịra-jịra ka yẹjula awụlẹ ịnyịlẹhị ịnyị lee ịlọm m tị́ wẹẹ tịtọ nyọka hu hwaa?’

11. Jaabwọ ká ụpwụ nya Ala Efesọsị 4:2, 3 mẹjẹ, ányị ọjịra-jịra nyahị à tị́ ka ye apyobwuna kori kahị kpa ịlọhị keji?

¹¹ Ịlọhị ọ-kpa keji ju iJihova apyobwuna gụ ang myị́ ang ọlẹ kahị jẹ́-ẹ họ. Ọ-yẹjula awụlẹ tị jwoo apyobwuna gụ ang ọ-họ lụmẹ-lụmẹ la agaga. Lẹ, maga ká gbịgba ha iJihova ẹ-ẹpwụ nya ịlọng ọ-kpa keji. Kori ká họ ịnyị, à ka ju ọ-yẹjula awụlẹ ọla ọjịra-jịra ila gụ ọwọwa. (Wa Ala Efesọsị 4:2, 3.) A-agbẹyị iyina ahị tị́ ka mẹ ịlọhị ọ-kpa keji jẹ? Kpa ẹrụ ọnyịịla pyẹ la ọngịrị nyang wuu. Mwahị nya agbẹyị ịlẹ ká ka jẹ́-ẹ họ ụkụrwọ ha angịkịla bwula ọ-haa ọnahị. Họ ọng myị́ ọng ụga, tụ́ angịlẹ kị la ụkụrwọ ọhẹ ọọjịra-jịra ka. (Mat. 6:1-4; Luk. 14:12-14) Kori ká kpịlọng keji bala ọ-họ ụkụrwọ bala aanang, ị́ ka yẹ ang ịlẹ ká kaa jụ họ kem ka, ma ị ka yẹ jaabwọ ká kpịlọng keji kaka ba.

12. Ẹlịyẹ ịBayịbụụ à tị́ ya u-uhye nya igu oriri?

¹² IJihova tịtọ kahị ka yẹjula aligu bala alugbiyegu nyahị ẹ-ẹpwụ nya ọkẹkẹnị. (Eje. 133:1) IJisọsị la aligu ịnyịịla ịnyịnyị. (Jọn. 15:15) ỊBayịbụụ ya ẹla u-uhye nya apyobwuna ọlẹ kahị kaa ye kori kahị la aligu ịnyịịla. (Etu 17:17; 18:24) Ọ myịmyị ya jehi nyori nyị́ há nyọka chị ịlọhị ebwo hi angịkịla ka. (Etu 18:1) Angịnyị lụmẹ-lụmẹ me irya nyori intanẹtị ị-kpa joja nyị ri ụgbẹyị ọhẹ ọlẹ kị ka bwu la aligu lụmẹ-lụmẹ bala ọ-ka họ kị ka la ịlaa nwee ka. Ma, ahị  ka dụmwọ-dụmwọ ụka kahị juwa kpa intanẹtị joja.

13. Ịyẹ tị́ du ká angịhyẹ ịlẹ kị kaa kpa intanẹtị joja kaa lịlaa nwee bala ọ-la ọkịlẹtụ ọ-kpụ enyi?

¹³ Angị kụ ẹhị yẹ ẹla kpori-kpori wẹ ka jẹ́ nyori angịlẹ kị kaa bịrị ụka kpoye ẹ-ẹpwụ nya intanẹtị juwa yẹ ifoto bala ẹla ịlẹ ká angịnyị da juwa, nyị kaa lịlaa nwee bala ọ-la ọkịlẹtụ ọ-kpụ enyi. Ịyẹ tị́ du? Ịngịhyẹ ọlẹ kọ ka du myị́ ri, ifoto ịlẹ ká angịnyị kaa ya juwa ẹ-ẹpwụ nya intanẹtị ri ịnya ụka ọlẹ kọ kpịpyọ yẹẹyẹẹ ọ-ọhịhị nyaa, ifoto ịlẹ kị há gụ wuu bwu ẹpwụ nya ịlẹ kịịwa bala aligu nyaa hwo, bala ẹga ịnyịịla ịlẹ kị ka. Ọngọlẹ kọ yẹ ifoto ịlịnyị ka ya myị́ nyori ọhịhị nyọwa nyị́ há lala ịnya ọngọ ọlaanyị ka, nyị dọmwụ chaga. Ọọnahị ọnyang ọhẹ ọlẹ kọ gu ẹka 19 yẹkẹẹ, “Ụka kam yẹ jaabwọ ká angịnyị á juwa kpehe ka ri ọhịhị la ọmyịmyị nya epwihi, káam tị hwaam ẹ-ẹpwa ododu, ọ kaa lam ijiiji.”

14. Ányị ẹla ọmẹjẹ ọlụpwụ nya 1 iPita 3:8 à tị́ ka dahị ụbwọ nyọka kpa intanẹtị ị-kpa joja họ ụkụrwọ ụ-ụgbẹyị ọnyịịla?

¹⁴ Ahị ka jẹ́-ẹ kpa intanẹtị ị-kpa joja họ ang ụ-ụgbẹyị ọnyịịla myị́, lala o-ya ẹla ta alugbiyegu bala aligu nyahị. Ma, a tị ka yẹ nyori iru nya angịnyị kaa ya ang juwa ẹ-ẹpwụ nya intanẹtị chajị ká angịnyị ka hwaa ka uhye ngana-ngana. Ọ lala o-ri i juwa byi angịnyị yẹkẹẹ, “Anụ yẹm-m̀ wee.” Angịhyẹ dọmwụ kaa ya ẹla lido-lido lee o-ya ẹla opwoku-ka u-uhye nya ifoto nyịlaa lee ịnya angịkịla. Angịnyị nya ịKịrayịsị tị chịla kị ka kpịlaa keji bala ọ-la olegu nya ahyẹẹrwẹrwa ẹ-ẹga nya awụlẹ lẹ, ị́ ka kpa intanẹtị ị-kpa joja họ ụkụrwọ ụ-ụgbẹyị ọlịịwẹ ka.—Wa 1 iPita 3:8.

15. Ányị ịBayịbụụ à tị́ ka dahị ụbwọ nyọka cheji ba hi o-hu ịlọhị nya angị ịtụka?

¹⁵ Kori ká kaa kpa intanẹtị joja, à tịlọng wo: ‘Ọ chịkpẹẹ ká ẹla ọlẹ kam kaa da, ifoto bala ifim ịlẹ kam kaa ya juwa, ka kpa angịnyị me irya nyori m̀ juwa hu ịlọm hwaa? Ọ ka du ká angịkịla ka yẹ ijiiji nyam?’ ỊBayịbụụ yẹkẹẹ: “Ụma nya ang ịlẹ kị jam ẹ-ẹpwụ nya odehe ri ang ịlẹ ká imyi nya ịnyịrọ nya ọngịnyị ehe kaa mama bala ang ịlẹ ká ẹhị nya ọngịnyị ehe kaa mama bala ang ịlẹ kị kaa hu ọbọọchẹ nya ọhịhị ha ọngịnyị ehe. Ọhẹ-lọhẹ lẹpwụ nya ang ịwẹ wuu á bwu ẹga nya Ohe Oluhye Adịda kpong-kpong ka. Ma, ịwa wuu ri ịnya odehe ọlẹ kem.” (1 Jọn. 2:16) ỊBayịbụụ ọhẹ yẹ ụpa ọlẹ kọ yẹkẹẹ, “ang  ịlẹ kị kaa hu ọbọọchẹ nya ọhịhị ha ọngịnyị ehe,” da ịịlẹ, “ọ-họ ká angịnyị ka yẹng lala ọngọ ọtụka.” Angịnyị nya ịKịrayịsị á baba nyọka hu ịlaa nya angị ịtụka lee ọ-họ ká angịnyị ka hwaa ka uhye ka. Ị kaa ba ẹla ọmẹjẹ nya ịBayịbụụ ọlẹ jẹ: “Anụ myị kahị myịmyị juwa hi ọbọọchẹ ẹ-ẹpwụ nya ịlọhị kaka lee o-juwa du agbama ju awụlẹ kaka lee o-juwa la ijiiji onyobyi ẹ-ẹga nya awụlẹ kpong-kpong kaka ịnyịnyị.” (Gal. 5:26) Kori kahị kpịlọhị keji, áhị ka lala angịnyị ilodehe ịlẹ kị kaa hi ọbọọchẹ bala ọ-tịtọ ká angịnyị ka hwaa nya angị ịtụka ka.

16. Ịyẹ tị́ du kahị ka hi ọbọọchẹ ka?

¹⁶ Ahị baba nyọka kpịlọhị keji chajị angịlẹ kị kaa hi ọbọọchẹ á kaa ‘kpa ẹla ọjẹ́jẹ me irya ju ịlaa meme labwọ’ ka. (Rom. 12:3) Angị hi ọbọọchẹ kaa ju ọmwụ nya arụ bala o-me irya nyori ịwa nyị ju apyobwuna gụ angịkịla. Kori kị yẹ irya ọkụkụ nyaa da ka, Olegu Onyobyi ka kpụ ọkịlẹtụ nyaa idu bala ọ-chọọ ịrị. (2 Kọr. 4:4; 11:3) Ọngọlẹ kọ kpịlọmwụ keji tị kaa kụ irya meme labwọ. Ọ́ kaa hu ịlọmwụ hwaa lụmẹ ka chajị ọ jẹ́ nyori angịkịla nyị gụ ọwa a-agbẹyị lụmẹ-lụmẹ. (Filip. 2:3) Ọ myịmyị jẹ́ yẹkẹẹ, “Ohe Oluhye kaa tụ alọbọọchẹ pyịpyị. Ma, Ohe Oluhye tị kaa họ angị dụmwọ ọnahị lụmẹ.” (1 Pit. 5:5) Angịlẹ kị la irya ọkpakpa lee omeme labwọ á ka tịtọ ká iJihova ka ri oluji nyaa ka.

17. Ịyẹ ahị tị́ ka họ chajị kahị ka kịnyaa la ọ-kpịlọhị keji?

¹⁷ Kori kahị ka kpịlọhị keji kịnyaa kịlahị tụbwọ aalẹ, ahị ka kpa ẹla ọlẹ ká ịBayịbụụ ya họ ụkụrwọ nyọka “pwọ ọngịnyị onyogo nya ọhọbịrị ọhọhọ ọlẹpwụ [nyahị] deeji bala abwẹla inyibyi ịhọhọ nyamwụ wuu [bala ọ-ka] hu ọngịnyị onyeewe ọlẹpwụ nya ịKịrayịsị dakụrụ.” O ju ụkụrwọ ẹ-ẹpwụ. Ahị baba nyọka jẹ́ ang u-uhye nya ọgụ-ẹpẹtẹ nya iJisọsị bala ọ-maga nyọka bọọ jẹ rige-rige jaabwọ kọ chịkpẹẹ kaka ba. (Kol. 3:9, 10; 1 Pit. 2:21) Kori kahị họ ịnyị, ahị ka ye apyobwuna yẹẹyẹẹ. Kori kahị la abwụma nya ịlọhị ọ-kpa keji, ugbiyegu nyahị ka chị ọkẹkẹnị gụ ọwọwa, ọjịra-jịra ka yẹjula awụlẹ gụ ọwọwa, ahị ka myịmyị-ị̀ jẹ́ jaabwọ kahị ka bwu kpa intanẹtị ị-kpa joja họ ụkụrwọ ụ-ụgbẹyị o-pwoku. Ọlẹ kọ tị gụgụ wuu ri, ẹla nyahị ka kpụ iJihova ịpyọ, ọ tị ka wahị kụrụụhị ịnyịnyị.