1. Filip­pimiut 2:3 naaper­torlugu maniguun­neq at­taveqaqatigiil­luar­nis­samut qanoq iluaqutaava?

JEHOVAP najoq­qutas­siai maniguul­luta naalap­pavut, ilisimagatsigu Jehovap suna uagutsin­nut ajun­ngin­ner­paajusoq nalun­ngik­kaa. (Ef 4:22-24) Maniguuk­kat­ta Jehovap piumasaa uagut piumasatsin­nit sal­liul­lugulu inuit al­lat uagutsin­nit pingaar­nerusutut isigaavut. Taamaat­tumik Jehovamut up­peqatitsin­nul­lu nuan­nersumik at­taveqaqatigiip­pugut. – Filippimiut 2:3 atuaruk.

2. Apustili Paulusi qanoq al­lan­ngila, al­laaserisamilu matumani suut sam­mis­savavut?

² Mianersun­ngik­kut­tali inuit pingaakujul­lutil­lu nam­minis­sarsior­tut Saatanip silarsuaaniit­tut sun­nersin­naavaatigut. * Kristumiut siul­liit nalaan­ni taman­na ajor­nar­torsiutaar­pasip­poq, apustilimi Paulusi Romamiunut ima al­lap­poq: “Tamas­si im­mik­kut ima oqarfiginiar­pas­si: Im­mis­sin­nik pingaar­teqinasi pisariaqar­tumit an­nerusumik, silaqas­susersili sianisuumik atorsiuk.” (Rom 12:3) Paulusi al­lan­ngilaq im­minut pingaar­tin­ngil­luin­nas­sasugut. Maniguuk­kut­ta im­minut isigin­nit­taatsitsin­nut tun­ngatil­lugu oqimaaqatigiis­saaris­saagut. Al­laaserisami matumani im­minut pingaar­tip­pal­laalin­ngin­nis­samut maniguun­nerup pingasutigut iluaqutaanera sam­mis­savar­put. Taak­ku pingasut tas­saap­put (1) aap­pariin­nermi, (2) Jehovamut  kif­far­tor­nermi akisus­saaf­feqar­nermi aam­ma (3) inter­netik­kut at­taveqaqatigiit­tarfin­nik atuinitsin­ni.

3. Sooq aap­pariin­nermi ajor­nar­torsior­toqarsin­naava, ilaal­lu qanoq aaq­qiiniar­tar­pat?

³ Jehovap aap­pariin­neq pilersip­paa uiusoq nuliaasorlu pil­luar­nias­sam­mata. Kinaluun­niil­li naam­mal­luin­nar­tuun­ngim­mat ajor­nar­torsiuteqar­tarsin­naavoq. Paulusimi al­lap­poq aap­pariilersut ajor­nar­torsiorumaar­tut. (1 Kor 7:28) Aap­pariil­li ilaat misigip­put akerleriit­tuaan­naavil­lutik, isumaqalersin­naap­pul­lu aap­pariit­tus­saan­ngik­kaluarlutik. Silarsuarmit sun­ner­neqarsimagunik im­minuin­naq eq­qarsaatigis­sap­put isumaqarlutil­lu aatsaat avik­kunik pil­lualersin­naal­lutik.

4. Qanoq isumaqar­naveersaar­tariaqar­pugut?

⁴ Isumaqar­naveersaar­tariaqar­pugut aap­pariin­ner­put iluatsis­sin­naan­ngitsoq. Nalun­ngilar­put Biibili tun­ngavigalugu kinguaas­siuutitigut inuunerlun­neq avis­sutis­satuaasoq. (Matt 5:32) Taamaat­tumik ajor­nar­torsiuleraangat­ta pingaakujulerluta ima eq­qarsalis­san­ngilagut: ‘Uanga pisariaqar­titak­ka aap­pariin­nitsin­ni matus­suser­neqar­pat? Asaneqar­tariaqar­nit­tut asaneqar­punga? Al­la aap­par­taariguk­ku pil­luar­nerus­saanga?’ Apeq­qutini taak­kunani nam­minis­sarsior­palun­neq malugiuk. Silarsuarmi matumani oqar­toqar­tar­poq uum­matit malis­sagit aam­ma illit pil­lualis­sutigisat­tut ilius­sasutit, al­laat avit­tariaqas­sagaluaruit. Biibilimili ima al­las­simavoq: “Im­mik­kut nam­mineq iluaqutis­sarsi pin­nagu inoqatis­sis­saaq iluaqutis­saat isumagisiuk.” (Fil 2:4) Jehovap kis­saatigaa avin­nasi aap­pariit­tuas­sasusi. (Matt 19:6) Kis­saatigaa nam­minis­sarsiorasi taas­suma piumasaa pingaar­tis­sagis­si.

5. Efesosimiut 5:33 naaper­torlugu uiusoq nuliaasorlu im­min­nut qanoq pis­suseqarfigis­sap­pat?

 ⁵ Uiusoq nuliaasorlu asaqatigiil­lutil­lu ataq­qeqatigiit­tus­saap­put. (Efesosimiut 5:33 atuaruk). Biibilimi ilin­niar­tin­neqar­pugut tunisineq tigusinermit pingaar­tin­nerus­sagip­put. (ApS 20:35) Aap­pariit asaqatigiin­nis­samut ataq­qeqatigiin­nis­samul­lu maniguun­neq iluaqutigis­savaat. Uiusup nuliaasul­lu maniguut­tuusut nam­min­neq iluaqutis­sar­tik pin­nagu aap­parmin­nut ‘pitsaaner­paaq noq­qaas­sutiginias­savaat’. – 1 Kor 10:24.

6. Stevenip Stephaniel­lu oqaasii qanoq ilin­niarfigaagit?

⁶ Maniguun­neq aap­pariit kristumior­pas­suit aap­pariin­nermin­ni pil­luar­nerunis­samin­nut iluaqutigisimavaat. As­sersuutigalugu uiusoq Stevenimik atilik ima oqar­poq: “Aap­pal­lu suleqatigiit­tariaqar­pusi, ingam­mik ajor­nar­torsiuteqaraangat. Ima eq­qarsar­nak: ‘Uannut suna pitsaaner­paava?’ Ima eq­qarsas­saatit: ‘Uagutsinnut suna pitsaaner­paava?’” Nulia Stephanie aam­ma taamatut misigisoq ima oqar­poq: “Kinaluun­niit akerleriif­fiujuar­tumi inoorusun­ngilaq. Akerleriileraangat­ta ajor­nar­torsiutaasoq paasiniar­tar­par­put. Taava qinusar­pugut, misis­suisar­pugut ajor­nar­torsiul­lu oqaloqatigiis­sutigalugu. Im­mitsin­nut saas­sun­nata ajor­nar­torsiut aaq­qin­niar­tar­par­put.” Uiusoq nuliaasorlu pil­luar­nerus­sap­put aap­parmin­nit pingaar­nerusorin­ngik­kunik.

7. Qatan­ngut angut im­mik­kut pisin­naatitaaf­feqaleruni qanoq isigin­nit­taaseqas­sava?

⁷ Qanorluun­niit it­tumik Jehova kif­far­torfigigutsigu taman­na ataq­qinaatitut isigaar­put. (Tuss 27:4; 84:11) Qatan­ngut angut im­mik­kut it­tumik pisin­naatitaaf­feqalerusup­pat taman­na nersor­nar­poq. Biibilimimi ima al­las­simavoq: “Angum­mik nak­kutil­liisun­ngor­nis­samik sulis­sutigin­nit­toqar­pat, taas­suma suliaq ajun­ngitsoq kis­saatigaa.” (1 Tim 3:1, NW) Sulias­sin­neqarunili im­minut pingaar­tip­pal­laalis­san­ngilaq. (Luk 17:7-10) Maniguul­luni al­lat pil­lugit kif­far­torusut­tariaqar­poq. – 2 Kor 12:15.

8. Diotrefesi, Uzzija Absalomilu qanoq ilin­niarfigaavut?

⁸ Biibilimi inuit im­minut pingaar­tip­pal­laarlutik maligas­siuinerlut­tut oqalut­tuarineqar­put. Diotrefesi pingaakujul­luni ilagiin­ni ‘sal­liujumasar­poq’. (3 Joh 9) Uzzijap makital­luni im­minut Jehovamit sulias­siis­sutaan­ngitsoq suliariniarsaraa. (2 Nal 26:16-21) Absalomi kun­ngin­ngorusuk­kami peq­quserlul­luni inun­nit iluareq­qusaar­poq. (2 Sam 15:2-6) Biibilimi oqalut­tuanit taak­kunan­nga ersersin­neqar­tutut Jehovap inuit im­minut ataq­qinaaser­niar­tut iluarin­ngilai. (Uss 25:27) Pingaakujut­tut ataq­qineqarusut­tul­lu ajor­nar­torsiuteqaleriaan­naap­put. – Uss 16:18.

9. Jiisusi qanoq maligas­saal­luar­pa?

⁹ Maligas­siuinerlut­tunit taak­kunan­nga al­laanerul­luin­narluni Jiisusi, im­minut Guutimut nal­lersuutin­ngitsoq, eq­qarsaatigiuk. (Fil 2:6) Jiisusi, oqar­tus­saaner­paamut Jehovamut tul­lersor­taasoq, im­minut pingaar­tip­pal­laan­ngilaq. Ajoqersuk­kani ima oqarfigai: ‘Ilis­sin­ni min­ner­paajusoq taan­na angisuujuvoq.’ (Luk 9:48) Pionerit, ilagiin­ni kif­far­tor­tut, utoq­qaaner­tat ilagiin­nil­lu nak­kutil­liisut Jiisusitut maniguut­tut kif­far­toqatigineri nuan­nersuuvoq! Maniguuk­kut­ta asan­nin­nerus­saagut – Biibilimilu al­las­simavoq Guutip kif­fai ilumoor­tut asaqatigiin­neq ilisar­naatigis­sagaat. – Joh 13:35.

10. Iluamik aaq­qin­neqan­ngitsumik ilagiin­ni ajor­nar­torsiuteqarsoriguk­ku qanoq ilius­savit?

¹⁰ Taavami ilagiin­ni ajor­nar­torsiuteqar­pat misigiguil­lu iluamik aaq­qin­neqan­ngitsut? Naam­magit­taal­lior­nak ilagiin­ni siut­tuusut  maniguul­lutit tapersersorsin­naavatit. (Hebr 13:17) Taamaaliorsin­naajumal­lutit im­minut ima aperigit: ‘Ajor­nar­torsiuterujus­suup­pat aaq­qin­neqar­tariaqar­tut? Aaq­qiinis­samut pif­fis­saal­luar­pa? Aaq­qin­nis­saan­nut uanga akisus­saavunga? Un­neq­qaril­lunga oqarsin­naavunga ataasioqatigiin­neq siuarsar­niarlugu, imaluun­niit pingaar­tin­neqarusuk­kama taamaalior­punga?’

11. Efesosimiut 4:2, 3-lu naaper­torlugit maniguul­luta Jehova kif­far­torfigigutsigu qanoq kinguneqas­sava?

¹¹ Jehovap maniguun­neq pigin­naasanit pingaar­tin­neruaa, aam­ma angusaqarluar­taraluar­tugut ataasioqatigiin­neq pingaar­tin­neruaa. Taamaat­tumik sapin­ngisan­nik maniguul­lutit Jehovamut kif­far­torit. Taamaalioruit ilagiin­ni ataasioqatigiin­nerulersitsis­saatit. (Efesosimiut 4:2, 3 atuakkit). Sapin­ngisan­nik oqaluus­sisarit. Kif­far­tor­nin­ni ajun­ngisaarfigisin­naasatit eq­qumaf­figik­kit. Tamanut inoroorsaar­tuugit, aam­ma ilagiin­ni im­mik­kut it­tumik akisus­saaf­feqan­ngitsunut. (Matt 6:1-4; Luk 14:12-14) Maniguul­lutit ilagiit suleqatigisaruk­kit pisin­naasatit malugineqaan­naratik aam­ma maniguun­nerit malugineqas­saaq.

12. Ikin­nguteqar­nis­sar­put Biibilimi kajumis­saarutigineqar­pa? Nas­suiaruk.

¹² Jehovap ilaqut­tanik ikin­ngutinil­lu peqateqar­nermik nuan­naarutigin­nit­tus­satut pin­ngor­tip­paatigut. (Tuss 133:1) Jiisusi ikin­ngutin­naaqar­poq. (Joh 15:15) Aam­ma qanimut ikin­nguteqar­nerup iluaqutaanera Biibilimi al­laatigineqar­poq. (Uss 17:17; 18:24) Al­las­simavor­taaq inoqatinit im­mik­koor­niar­neq peq­qin­nangitsuusoq. (Uss 18:1) Inup­pas­suit  misigip­put inter­netik­kut at­taveqaqatigiit­tarfiit ikin­nguter­pas­suaqar­nis­samut kisimiit­tutul­lu misigin­ngin­nis­samut iluaqutigalugit. At­taveqaqatigiif­fiil­li taamaat­tut ator­nerini mianersorfis­saqar­poq.

13. Sooq inter­netik­kut at­taveqaqatigiit­tarfin­nik atuisar­tut ilaat kiserliulerlutil­lu nikal­lor­tar­pat?

¹³ Misis­sueq­qis­saar­ner­ni paasineqarsimavoq inuit pif­fis­sarujus­suaq atorlugu inter­netik­kut at­taveqaqatigiit­tarfin­nik isigin­naar­tar­tut kiserliulerlutil­lu nikal­lor­tar­tut. Sooq? Imaas­sin­naavoq inuit inuunermin­ni nuan­naarutiginer­paak­kamin­nik ersersitsisunik – soorlu as­simin­nik, angalatil­lutik as­simin­nik ikin­ngutimil­luun­niit as­singinik torran­ner­paanik – inter­netik­kut at­taveqaqatigiit­tarfin­nut ik­kus­sisar­nerat pis­sutaasoq. Inuk tamak­kunin­nga isigin­naar­tar­toq isumaqalersin­naavoq as­silitit­tunut naleq­qiul­luni nam­mineq inuunini pik­kunaatsuusoq. Qatan­ngut ar­naq kristumiu 19-inik ukiulik ima nas­suer­poq: “Angerlarsimaan­narsimal­lunga al­lat weekendimi nuan­nisarsimasut takugaangak­kit sin­ngaler­tar­punga.”

14. Inter­netik­kut at­taveqaqatigiit­tarfin­nik atuinitsin­ni Petrusip al­lagai siul­liit 3:8-mi siun­nersuut qanoq iluaqutigisin­naavar­put?

¹⁴ Soorunami inter­netik­kut at­taveqaqatigiit­tarfiit ajun­ngitsumik ator­neqarsin­naap­put – as­sersuutigalugu ilaqut­tanik ikin­ngutinil­lu at­taveqaqatigiin­nermut. Malugisimaviul­li inuit ilaan­nik­kut al­lanit nuan­naar­torineqarumal­lutik ik­kus­sisar­tut? Soorlu ima oqar­niar­tut: “Takun­nga.” Ilaasalu as­sitik al­lal­lu as­sii nikanarsaasumik kan­ngunar­tumil­lu oqaaseqaateqarfigisar­paat. Kristumiut taamatut inter­netik­kut at­taveqaqatigiit­tarfiit ator­navian­ngilaat, kajumis­saar­neqar­pum­mi maniguun­neq misigin­neqatigin­nin­nerlu ineriar­tor­tis­sagaat. – 1 Petrusi 3:8 atuaruk.

15. Malugeq­qusaan­ngin­nis­samut Biibili qanoq iluaqutigisin­naavar­put?

¹⁵ Inter­netik­kut at­taveqaqatigiit­tarfiit ator­taruk­kit im­minut ima aperigit: ‘Oqaaseqaatit, as­sit filmil­luun­niit uanga ik­kut­tak­kak­ka isumaqalersitsisin­naap­pat malugeq­qusaar­tunga? Al­lat sin­ngatilersin­naavak­ka?’ Biibilimi ima al­las­simavoq: ‘Silarsuarmiit­tut tamarmik – uin­ngup pilerigisai, isit pilerigisaat  nunal­lu piinik usorsisimaaruteqar­neq – Ataatamit pisuun­ngil­lat, silarsuarmit pisuup­put.’ (1 Joh 2:16) Biibilimik nutsik­kami al­lami oqaatsit ‘nunap piinik usorsisimaaruteqar­neq’ ima nutsersimavaat: “Pingaaruteqarusun­neq.” Kristumiut misigin­ngil­lat al­lanit nuan­naar­torineqar­tariaqarlutik. Biibilimi siun­nersuut una maleruar­paat: “Im­mitsin­nut angisuusoreqinata, kamas­saaqinata sin­ngaateqinatalu.” (Gal 5:26) Maniguuk­kut­ta silarsuarmi inuit malugeq­qusaar­tut ilaalis­san­ngilavut.

16. Sooq pingaakujut­tuunaveersaar­tariaqar­pugut?

¹⁶ Maniguun­neq ineriar­tor­tit­tariaqar­par­put, inuim­mi pingaakujut­tut ‘silaqas­suser­tik sianisuumik’ ator­neq ajor­paat. (Rom 12:3) Inuit makitasuut as­sor­tuiumatuul­lutil­lu nam­minis­sarsior­tuup­put. Inuk taamaat­toq im­minut ajoquserlunilu al­lanut ajoqutaasar­poq. Eq­qarsar­taatsini al­lan­ngor­tin­ngik­kuniuk isum­mamigut Saatanimit tap­piil­lisin­neqarlunilu ajor­tumik sun­ner­neqas­saaq. (2 Kor 4:4; 11:3) Inuk maniguut­toq al­laanerul­luin­narluni ajun­ngitsumik eq­qarsar­taaseqar­poq. Im­minut isigin­nit­taatsimini oqimaaqatigiis­saarisuuvoq, nalun­ngilaalu inoqatini arlalip­pas­suar­tigut im­minit pik­korin­nerusut. (Fil 2:3) Aam­ma nalun­ngilaa ‘Guutip makitasuut akerar­torai, qanilaar­tul­li saam­maat­tarai’. (1 Petr 5:5) Ajun­ngitsumik eq­qarsar­taaseqar­tut Jehovamut akeraaler­nis­sar­tik kis­saatigin­ngilaat.

17. Maniguut­tuujuarumal­luta susariaqar­pugut?

¹⁷ Maniguut­tuujuas­sagut­ta Biibilimi siun­nersuut una maleruar­tariaqar­par­put: ‘Inutoqaq iperarsiuk iliuusai ilan­ngul­lugit, atisiul­lu inuk nutaaq.’ Taamaalior­neq ilungersunar­poq. Jiisusip maligas­siaa misis­sor­tariaqar­par­put sapin­ngisamil­lu malin­niarsaralugu. (Kol 3:9, 10; 1 Petr 2:21) Taamaaliorut­ta iluaqutigingaas­savar­put. Maniguun­nerujar­tor­til­luta ilaqutariit­tut ingerlal­luar­nerulis­saagut, ilagiin­ni ataasioqatigiin­nerulis­saagut inter­netik­kul­lu at­taveqaqatigiit­tarfiit ajoqutaasumik ator­naveersaas­sal­lugit. Pingaar­ner­paamil­lu Jehovamit pil­luaq­qusaal­lutalu iluarineqas­saagut.