1. Epukururo musinke atu gwana moVafilipi 2:3, ntani uwa musinke natu gwanena mo nsene tu litura pasirugana?

OSE kulimburukwa Jehova morwa twa yi diva asi age ga diva yoyiwa po kwetu. (Efe. 4:22-24) Nsene tu kara nelinunupiko, ayo ngayi tu vatera tu ture muhowo mpango zaJehova mevango lyokurugana eyi twa hara ntani ngayi tu vatera tu tare vakwetu asi va tu pita mekuto. Nsene tu yi rugana eyi, ayo ngayi tu ninkisa tu kare nelikwatakano lyewa novapuli vakwetu mombungakriste.—Resa Vafilipi 2:3.

2. Yisinke ga tumbwire Paurusa ntani yisinke natu ka zogera mosirongwa esi?

² Nsene kapi tuna kutakamesa, kuvhura zi tu kundame nkareso zovantu womouzuni waSatana. Awo kwa hara kulinenepeka ntani awo kuligazara tupu nyamwawo. * Ayo kumoneka asi nkareso ozo kwa kundamene Vakriste wokuhova. Eyi yiyo ya ninkisire Paurusa a tjangere Varoma asi: “Tani mu korangeda one namuvenye asi, walye omu pitakanesa mokuligazara nyamweni. Nye omu heteke kugazara nawa.” (Rom. 12:3) Paurusa kwa tente asi kapi ya kara epuko kuligazara nyamwetu. Nye elinunupiko ngali tu vatera tu dire kuligazara nyamwetu kupitakanena. Mosirongwa esi tatu ka zogera omu elinunupiko nali tu vatera tu dire kulinenepeka mononkedi ntatu. Nonkedi odo kuna kara (1) mononkwara, (2) nsene twa kara nositumbukira mombunga zaJehova ntani (3) mafano nonovidiyo edi atu tura kointaneta.

3. Morwasinke valikwali ava ligwanekerere nomaudigu mononkwara ntani ngapi omu vamwe ava hetekere ko kukohonona po maudigu ogo?

³ Jehova kuna hara valikwali va kare noruhafo mononkwara dawo. Nye mokumona asi awo kapi va sikilira mo, poyiruwo yimwe kuvhura va dire kulizuvha. Paurusa kwa tente asi ava vana kukwara ngava ligwanekera nomaudigu. (1 Kol. 7:28) Vamwe kulitangwisa nkenye apa novalikwali vawo ntani awo kugazara asi awo nampo kwa kwara muntu gepuko. Nsene asi awo kwava kundama nkareso zovantu womouzuni, awo kuvhura va gazare asi nampo va hepa kulizumba. Ntani ayo ngayi va ninkisa va ligazare tupu nyamwawo nokugazara asi awo ngava kara noruhafo nsene va linyoka.

4. Yisinke twa hepa kunyokera po?

⁴ Twa hepa kunyokera po kugazara asi nonkwara detu kapi dina kugenda po nawa. Ose twa yi diva asi ruhonda yizo zelike konda va pulisira moBibeli zeyi nava lizumbira valikwali. (Mat. 5:32) Yipo nye, nsene kuna kuligwanekera nomaudigu aga ga tumbwire Paurusa, kapisi tu pulisire elinenepeko li tu ninkise tu gazare asi ‘Mulikwali gwange kapi a pakere nge mbili. Age kapi a likida nge eharo nawa-nawa. Ngano na kwere muntu gwapeke, ngano nina kara noruhafo.’ Nsene tu gazara monkedi zangoso, ose kuna kuligazara tupu nyamwetu ntani kapi tuna kugazara ko mulikwali gwetu. Vantu womouzuni kuvhura va kutantere o kwame mutjima goge, nampili o zumbe mulikwali goge. Nye Nonkango daKarunga kututantera asi: “Walye omu lipakere mbili nyamweni nyonelike, nye omu pakere hena novakweneni mbili.” (Fil. 2:4) Jehova kapi ana hara o zumbe mulikwali goge. (Mat. 19:6) Jehova ana hara o ture po matokoro kuliza nonompango dendi nye kapisi kuliza nomu ono yi harere.

5. Kuliza noVaefeso 5:33, ngapi nava litekura valikwali?

 ⁵ Valikwali va hepa kulitekura neharo ntani nefumadeko. (Resa Vaefeso 5:33.) Bibeli kutukorangeda tu demenene kokugava mevango lyokudemenena kokutambura. (Yirug. 20:35) Sikara musinke nasi vatera valikwali yipo va litekure neharo ntani nefumadeko? Aso kuna kara elinunupiko. Valikwali ava va linunupika kapi ngava kondjera uwa wavene, nye awo ngava kondjera uwa “wamukwawo.”—1 Kol. 10:24.

6. Yisinke ono lirongere ko kweyi ga uyunga Steven naStephanie?

⁶ Elinunupiko kwa vatera Vakriste wovanzi wovalikwali yipo va kare noruhafo momapata gawo. Pasihonena, koneka eyi ga uyunga nturagumbo gedina Steven. Age kwa tanta asi: “Wa hepa kuruganena kumwe nomulikwali goge, unene po nsene kuna kuligwanekera nomaudigu. Mevango lyokuligazara nyamoge, gazara kuhamena omu nayi mu kundama nomulikwali goge.” Mukadendi Stephanie kwa tanta asi: “Kwato ogu ga hara kutunga nomuntu ogu ga hara kutanguna nkenye apa. Yipo nye, apa atu dili kulizuvha moyuma yongandi, ose kuhetekera ko kudiva eyi yina retesa po udigu owo. Ose kukanderera nokurugana epaparo ntani nokuzogera omu natu gusa po udigu owo. Ose kuhetekera ko kukohonona po udigu owo mevango lyokulitangwisa.” Yosili, valikwali ngava kara noruhafo nsene va dira kulizuvha asi awo mulyo kupitakana mukwawo.

7. Nkareso musinke ga hepa kukara nazo munazinyetu gomugara nsene ana gwana situmbukira mombunga zaJehova?

⁷ Yikare asi yisinke eyi tuna kuruganena Jehova, natuvenye kulizuvha mfumwa kweyi atu mu karere. (Epis. 27:4; 84:10) Nsene munazinyetu gomugara ana hara kurugana yirugana yoyinzi mombunga zaJehova, aso kuna kara sininke sosiwa. Bibeli kutanta asi: “Muntu nsene a hara kukara mupitisili gombungakriste, kuna tokomene sirugana sombeyo.” (1 Tim. 3:1) Nye nampili ngoso, nsene munazinyetu gomugara ana gwana situmbukira mombunga zaJehova, age kapisi a lizuvhe asi age mulyo. (Ruk. 17:7-10) Sitambo sendi sa hepa kukara sokuruganena kumwe novanavazinyetu nelinunupiko.—2 Kol. 12:15.

8. Yisinke natu lirongera ko kosihonena saDiwoterefesi, Usiya ntani naAbisaromo?

⁸ MoBibeli kwa kara mo yihonena yoyidona yovantu ava va linenepekere. Gumwe kuna kara Diwoterefesi, ogu ga dilire kulinunupika. Age kwa here “kulitura mwene komeho” mombungakriste. (3 Joh. 9) Ano gumwe kuna kara Usiya, ogu ga hetekerere ko kurugana yininke eyi ga dilire kumupa Jehova. (2 Hist. 26:16-21) Ntani gumwe kuna kara Abisaromo ogu ga here kukara hompa. Age kwa here vantu vamukwatese ko, yipo nye age kwa ninkisire vantu va gazare asi age kwa va hara. (2 Sam. 15:2-6) Eyi ya horokerere vagara owo kulikida asi Jehova kapi a hafere vantu ava ava lipaparere vene mfumwa. (Yis. 25:27) Vantu ava ava linenepeke nokulipaparera vene mfumwa, konyima kuyaligwanekera nomaudigu.—Yis. 16:18.

9. Sihonena musinke ga tulire po Jesus?

⁹ Mokulisiga novagara owo, koneka eyi natu lirongera ko kosihonena saJesus. Bibeli kutanta asi: “Nampili ngomu ga kere moukaro waKarunga, kapi ga sininikire mononkondo asi a hetakane naKarunga.” (Fil. 2:6) Kugusa ko Jehova, Jesus yige muntu gwauvali ogu ga kara nononkondo dononene mouzuni mudima. Nampili ngoso, age kapi a linenepeke ndi a gazare asi age mulyo. Age kwa tanterere varongwa vendi asi: “Yeeyi mununu po pwanamuvenye, yige nga kara munene.” (Ruk. 9:48) Ayo kutuhafesa apa atu ruganene  kumwe novazuvhisi wokukarerera, vakwafimbunga, vakuronambunga ntani novatareli wonombunga ava va linunupika ngwendi Jesus. Nsene tu linunupika, ose ngatu likida eharo kovakwetu. Ano Jesus kwa tente asi nsene tu lilikida eharo, vantu ngava dimburura asi ose varongwa vendi.—Joh. 13:35.

10. Yisinke no rugana nsene kuna kulizuvha asi vakuronambunga kapi vana kukohonona po maudigu gomombungakriste monkedi omu ya wapera?

¹⁰ Yisinke no rugana nsene kuna kulizuvha asi vakuronambunga kapi vana kukohonona po maudigu gomombungakriste monkedi omu ya wapera? Mevango lyokusivana, likida elinunupiko pokukwatesa ko ava ava pitisire. (Heb. 13:17) Lipura nyamoge asi: ‘Maudigu aga nina kumona gana kara nohepero zonene mokugakohonona po ndi? Esi yiso siruwo sokuwapera mokugakohonona po ndi? Nyame ya tumbukira mokugakohonona po ndi? Ame kuna hara mbungakriste zi kare mouumwe ndi ame kuna kupapara tupu mfumwa?’

11. Kuliza noVaefeso 4:2, 3, uwa musinke ngatu gwanena mo nsene tu karera Jehova nelinunupiko?

¹¹ Jehova kwa hara kuruganesa vantu ava va kara nelinunupiko, kupitakana ava va kara noudivi. Ntani age kwa hara vantu ava ava rugana kumwe mouumwe, kupitakana ava ava rugana unene. Yipo nye, tokomena kukarera Jehova nelinunupiko. Nsene o yi rugana, ove ngo gwederera kouumwe womombungakriste zeni. (Resa Vaefeso 4:2, 3.) Litura mo unene mokuzuvhisa ntani ruganena vakweni yininke yoyiwa. Zigida vapuli vakweni kembo lyoge kukwatera mo nava va dira kukara noyitumbukira mombungakriste. (Mat. 6:1-4; Ruk. 14:12-14) Nsene o twikira kukara nelinunupiko nokuruganena kumwe novanavazinyetu, awo ngava dimburura asi wa kara  noudivi ntani somulyo po awo ngava dimburura asi ove kwa linunupika.

12. Bibeli kutukorangeda tu kare novakaume ndi? Faturura.

¹² Jehova ana hara tu hafe ngomu tuna kukara kumwe nepata lyetu ntani novakaume vetu. (Epis. 133:1) Jesus kwa kere novakaume wovawa. (Joh. 15:15) Bibeli kwa tumbura mauwa aga ngatu gwanena mo nsene tu kara novakaume wovawa. (Yis. 17:17; 18:24) Azo kutukorangeda tu dire kuligusa ko kovakwetu. (Yis. 18:1) Vantu wovanzi kugazara asi intaneta kutuvatera tu kare novakaume wovanzi ntani kutuvatera tu dire kulizuvha mukuma. Nye nampili ngoso, twa hepa kutakamesa monkedi omu atu zi ruganesa.

13. Yisinke ayi ninkisa vantu ava ava ruganesa intaneta va lizuvhe mukuma ntani nokuguva-guva?

¹³ Valirongi kwa tanta asi vantu ava va hara kutara mafano govakwawo noyininke eyi ava tura vakwawo kointaneta, konyima kulizuvha mukuma ntani kuguva-guva. Morwasinke ya karera ngoso? Konda zimwe kuna kara asi morwa vantu kuhorowora nawa mafano gomawa po aga nava tura kointaneta govakaume vawo ntani nomavango gomawa aga vana ka dingura. Muntu ogu ana kutara mafano ogo kuvhura a lizuvhe asi age kapi ana kuhafera eparu lyendi ngwendi vakwawo. Pasihonena, munazinyetu gomukadona gonomvhura 19 kwa tanta asi: “Mokumona asi ame ngani kara pembo moyikondovike, ame kwa guvire apa namwene vakwetu kuna kuhafera yininke yoyinzi mosikondovike.”

14. Ngapi omu epukururo eli lya kara mwa-1 Peturusa 3:8, nali tu vatera nsene kuna kuruganesa intaneta?

¹⁴ Intaneta kuna kara siruganeso sosiwa. Pasihonena, kuvhura tu ruganese intaneta mokuzogera kumwe novanekoro ntani novakaume vetu. Nye vantu vamwe kulipaparera mfumwa kupitira moyininke eyi ava tura kointaneta. Ayo kumoneka asi awo kwa hara kulimonekesa kovakwawo. Vamwe kutjanga nonkango donondona komafano aga ava tura kointaneta ndi aga ava tura ko vakwawo. Nye Bibeli kukorangeda Vakriste va kare nelinunupiko  ntani nonkenda. Yipo nye, awo kapi tava vhuru kuruganesa intaneta monkedi zangoso.—Resa 1 Peturusa 3:8.

15. Ngapi omu Bibeli nazi tu vatera tu nyokere po kulipaparera mfumwa?

¹⁵ Nsene asi ove kuruganesa intaneta, lipura nyamoge asi: ‘Yininke eyi ani tjanga ko, nomafano, nonovidiyo edi ani tura ko, kuninkisa wopeke va gazare asi ame kuna kulimonekesa ndi? Kuvhura ni ninkise wopeke va zuvhire nge mfudu ndi?’ Bibeli kutanta asi: “Nayinye eyi ya kara mouzuni, ngwendi edowo lyorutu nedowo lyomeho nomalitumbadekero gemona, kapi ayi tundu kwaGuhyetu, mouzuni ayi tundu.” (1 Joh. 2:16) Bibeli zimwe kwa toroka nkango “malitumbadekero gemona” asi “kuhara kumoneka asi ove mulyo.” Vakriste kapi ava lizuvhu asi awo mulyo ntani kapi ava lipaparere mfumwa. Awo kukwama epukururo lyomoBibeli eli ali tanta asi: “Walye atu papareni efumano lyoyimpempa ndi tu kare nousindidi ndi nomfudu.” (Gar. 5:26) Nsene tu linunupika, ose kapi ngatu kara ngwendi vantu womouzuni ava ava linenepeke ntani ava va hara vakwawo vava mone asi awo mulyo.

16. Morwasinke natu dilira kulinenepeka?

¹⁶ Ya kara nomulyo tu linunupike morwa vantu ava ava linenepeke kapi ava ‘gazara nawa.’ (Rom. 12:3) Awo kwa hara kurumbasana ntani awo kwa hara kupapara efumano lyavene. Eyi ava gazara neyi ava rugana, konyima kuyaninkisa vakwawo ntani vene va ligwanekere nomaudigu. Nsene kapi vana kutakamesa, awo ngava twikira kulinenepeka ntani Satana nga zonagura nondunge dawo. (2 Kol. 4:4; 11:3) Nye muntu gokulinunupika, age kugazara nawa. Age kapi a litara asi age mulyo, morwa ga yi diva asi vakwawo va mu pita mekuto mononkedi dimwe. (Fil. 2:3) Ntani age ga diva asi “Karunga kwa nyenga valinenepeki, nye valinunupiki age kuvafira nkenda.” (1 Pet. 5:5) Vantu ava ava gazara nawa kapi va hara Karunga a va nyenge.

17. Yisinke twa hepa kurugana yipo tu twikire kukara nelinunupiko?

¹⁷ Nsene tuna hara kutwikira kukara nelinunupiko, twa hepa kukwama epukururo lyomoBibeli. Azo kututantera tu ‘lihuture muntu gomukuru-kuru noyikara yendi eyi ga yika, nokudwara muntu gomupe.’ Nye mokuyirugana oyo, twa hepa kukondja unene. Twa hepa kulironga sihonena saJesus nokuhetekera ko kumuhonena. (Koros. 3:9, 10; 1 Pet. 2:21) Nsene tu yi rugana, ose ngatu limonena yitundwamo yoyiwa. Nsene tu kara nelinunupiko, mapata getu ngaga kara noruhafo, ose ngatu gwederera kouumwe womombungakriste ntani ose ngatu ruganesa intaneta monkedi zongwa. Nye unene po, ose ngatu hafesa Jehova ntani age nga tu tungika.