1. Kwesekeja naAfwilipi 2:3, kudizoza kwatukwashaña ñahi kwikala nawubwambu wawuwahi nawakwetu?

TWOVWAHILAÑA nshimbi jaYehova muloña tweluka netu Yehova diyi weluka yuma yinateli kutuwahila. (Efwe. 4:22-24) Kudizoza kwatukwashaña kulemesha yuma yakeñañayi Yehova kubadika yitwakeñaña nikumona akwetu netu atubadika. Chafumañamu, twekalaña nawubwambu wawuwahi naYehova ninawakwetu akwakwitiya.—Tañenu Afwilipi 2:3.

2. Kapostolu Pawulu welukili chumanyi, nawa tukuhanjekadi muchinu chibaaba?

² Neyi kusoñama nehi, anateli kutuluwañesha kudi antu amukaayi kaSatana adivwimba nawa adikeña awenawu. * Chinamwekani neyi akwaKristu amakwawu mumafuku awapostolu ayiluwañesheleña, muloña kapostolu Pawulu wayisonekeleli Aroma nindi: “Inakuleja muntu-himuntu hakachi kenu nami, bayi yatoñojoka nindi walema kubadika chekalayiku, ilaña muntu-himuntu yatoñojokeña kwesekeja nachekalayi.” (Rom. 12:3) Pawulu welukili nindi twatela kudilemesha etu aweni. Hela chochu, kudizoza kukutukwasha kubula kusweja kudilemesha etu aweni. Achinu chibaaba chikuhosha hayuma yisatu mutwatela kubula kutoñojoka netu twalema kubadika chitwekala. Yumanyi yeniyi?; (1) Muwulu wetu,  (2) kukooleka kutukweti mukuloñesha (3) nihakuzatisha njila yakuhanjekelamu yahaintaneti.

3. Muloñadi muwulu chimunateli kwikalila kukala, nawa amakwawu elaña ñahi naniku kukala?

³ Yehova washiliku wulu kulonda eyala namumbanda ekaleña namuzañalu. Hela chochu, kwosi muntu wawaninaku, dichi muwulu munateli kwikala kukala. Kafwampi, Pawulu wasonekeli nindi antu akusumbula hela akusumbuka akumonaña yihuñu. (1 Kor. 7:28) Antu amakwawu abobolaña mpinji yejima nawenikwawu nawa anateli kukunkulula nawu aditelela wanyi. Neyi ayiluwañesha kudi kaayi, anateli kushikena dakutoñojoka nawu kudiseña dikunateli kumanisha kukala. Anateli kutoñojoka nawu chuma chalema hikuditiyisha awenawu kuwaha.

4. Chumanyi chitwatela kutondolwela?

⁴ Bayi tutoñojokaña netu wulu wetu watamaku. Tweluka netu chuma cheteja hohu Bayibolu kudiseñelahu, hiwuvumbi. (Mat. 5:32) Dichi neyi tumona yihuñu yashimwiniyi Pawulu, bayi twikala adivwimba nakutoñojoka netu: ‘Mwini kwami wañakamenaña wanyi. Hanakummwekeshela kukeñaku. Hadaha nateli kwikala namuzañalu namuntu wacheñi.’ Neyi tutoñojokaña muniyi njila, dikwila nawu tunakukeña kuditiyisha hohu etu aweni kuwaha bayi mwinikwetuku. Maana amukaayi anateli kuyileja nawu mulondeli munakuyileja muchima wenu nakwila chuma chikuyitiyisha kuwaha, hela tuhu kudiseña. Maana aNzambi ahoshaña nawu mwatela “[kufwila] yuma bayi yayitiyishaña kuwaha enu aweni hohuku, chiña yuma yatiyishaña kuwaha niakwenu.” (Fwi. 2:4) Yehova nakukeña nindi muhembi wulu wenu bayi kuwumanishaku.  (Mat. 19:6) Nakukeña nindi mutoñojokeña yuma yakumutiyisha yena kuwaha bayi yenu enu aweniku.

5. Kwesekeja naAefwesesa 5:33, yumanyi yatela kwilawu eyala namumbanda?

⁵ Eyala namumbanda atela kudikeña nikudilemesha. (Tañenu Aefwesesa 5:33.) Bayibolu yatulejaña kuhana bayi kukumina hohu dakutambwilaku. (Yilw. 20:35) Chilwilwinyi chinateli kukwasha adisumbula kudikeña nikudilemesha? Hikudizoza. Amayala niambanda adizoza hiyafwilaña hohu yuma yakuditiyisha aweni kuwahaku, ilaña “chiña yuma yakutiyisha mukwawu kuwaha.”—1 Kor. 10:24.

6. Yumanyi yimunadiziliku kumazu ahosheliwu aSteven naStephanie?

⁶ Kudizoza kunakwashi akwaKristu adisumbula amavulu kwikala namuzañalu muwulu wawu. Chakutalilahu, Manakwetu Steven wasumbula wahosheli nindi: “Adisumbula neyi anakukeña kwikala namuzañalu, atela kuzatila hamu sweje-e neyi kudi kukala. Chatela nitoñojokeña hohu ‘yuma yikuntiyisha ami kuwaha’ natela kutoñojoka yuma yatela kututiyisha wejima wetu’ kuwaha.” Ñodindi Stephanie, niyena dichatoñojokañayi. Wahosheli nindi: “Kwosi muntu wakeñaña kushakama namuntu wabulaña kutiyañanayi nindi. Neyi tunamoni kukala, twafwilaña kwiluka chuma chinaleteshi. Nkumininaku twalombaña, kusandujola nikuhanjeka chitunateli kukumanisha. Twafwilaña kumanisha kukala bayi kuzuñaku.” Adisumbula anateli kwikala namuzañalu neyi abulaña kutoñojokaña nawu asweja kulema kubadika mukwawu.

7. Chumanyi chatela kwilayi manakwetu neyi anamwinki kukoleka?

⁷ Hikukooleka chikupu kumukalakela Yehova hakumina ñovu jetu. (Mas. 27:4; 84:10) Neyi manakwetu nakufwila kuzataku nyidimu yayivulu mukuloñesha kwaYehova, hichuma chachiwahi. Kafwampi, Bayibolu yahosha nawu: “Neyi iyala nakukeña kwikala kalama, dikwila nawu nakufwila mudimu wawuwahi.” (1 Tim. 3:1) Hela chochu, neyi anamwinki kukooleka, bayi yatoñojoka nindi walema kubadika chekalayiku. (Luka 17:7-10) Watela kufwilaña kukalakela akwawu mukudizoza.—2 Kor. 12:15.

8. Yumanyi yitunadizili kudi Diyotefwesi, Uziya niAbisalomi?

⁸ MuBayibolu mwekala yakutalilahu yatusoñamishaña yawantu atoñojokeleña nawu asweja kulema. Diyotefwesi hadiña wadizozaku wakeñeleña “kwikala watachi” muchipompelu. (3 Yow 9) Muloña wakudivwimba, Uziya wazatili mudimu wabulili kumwinkawu kudi Yehova. (2 Kushi. 26:16-21) Abisalomi wafwilileña kwikala mwanta, dichi watwambili kuyikeña antu kulonda ekala kukabadi kindi. (2 Sam. 15:2-6) Neyi chinamwekeshi iyi nsañu, Yehova hatiyaña kuwaha antu akeñaña kutumbakanaku. (Yish. 25:27) Mukuhita kwampinji, antu adivwimba nawa akeñaña nawu ayilemesheña ekalaña mukukala.—Yish. 16:18.

9. Yesu wamwekesheli chakutalilahu chamuchidinyi?

⁹ Kwambukaku nanawa antu, Yesu “hela chakwila wadiña muchifwanisha chaNzambi, hadiña nayitoñojoka yakwila nindi kwesekana naNzambi dichuma chakeñeleñayi nankashiku.” (Fwi. 2:6) Hela chakwila Yehova hohu diyi wamubadika, Yesu hatoñojokaña nindi walema kubadika chekalayiku. Wayilejeli apostolu indi nindi: “Muntu wukudikehesha hakachi kanenu ejima, diyi muneni.” (Luka 9:48) Hikukooleka nankashi kuzatila hamu nawapayiniya, ankoñi akuzatila, akulumpi niankoñi añinza amwekeshaña kudizoza neyi Yesu. Neyi twadizoza tukuyimwekeshelaña akwetu kukeña. Nawa Yesu wahosheli nindi  ambuña aNzambi akadikeña wumu namukwawu.—Yow. 13:35.

10. Chumanyi chimwatela kwila neyi mutoñojoka nenu muchipompelu mudi kukala kuyanakubula kuzatilahu chiwahi?

¹⁰ Mukwila ñahi neyi muchipompelu mudi kukala nawa munakutoñojoka nenu anazatilihu chiwahi wanyi? Chatela mutoobeña, munateli kumwekesha kudizoza kuhitila mukwovwahila anakulombola. (Heb. 13:17) Hakwila mwili mwenimu dihulenu nenu: ‘Komana kukala kwinakumona mwamweni kunasweji chakwila atela kuzatilahu? Iyi diyi mpinji yatelela kuzatilahu? Yami natela kuzatilahu? Komana inakufwila kuleta kunuñañana muchipompelu tahindi inakufwila kuya mpuhu?’

11. Kwesekeja naAefwesesa 4:2, 3, yumanyi yikufumamu neyi mwikala adizoza chimunakumukalakela Yehova?

¹¹ Yehova walemesha antu adizoza kubadika kwiluka yuma nawa walemesha kunuñañana kubadika kudikita. Dichi, Mukalakelenuña Yehova nakudizoza. Neyi mwikala adizoza, mukuleta kuwunda muchipompelu. (Tañenu Aefwesesa 4:2, 3.) Dikitenuña mumudimu wakushimwina. Yikalakelenuña akwenu kuhitila mukuyilila yuma yayiwahi. Ikalenu nachisambu kudi ejima, kushilahu niantu abula nyidimu muchipompelu. (Mat. 6:1-4; Luka 14:12-14) Neyi mwikala adizoza chimunakukalakala nyidimu muchipompelu, amanakwenu niahela akumonaña kudizoza kwenu nichimwadikitaña.

12. Komana Bayibolu yatukoleshaña kwikala nawamabwambu? Lumbululenu.

¹² Yehova wakeñaña nindi twikaleña nampinji yakuzañalela hamu nawamabwambu niyisaka yetu. (Mas. 133:1) Yesu wadiña  nawamabwambu amawahi. (Yow. 15:15) Bayibolu yalumbulula yuma yayiwahi yafumaña mukwikala nawamabwambu alala. (Yish. 17:17; 18:24) Nawa yatulejaña nawu bayi tudambuleña nawakwetuku. (Yish. 18:1) Antu amavulu atoñojokaña nawu njila yakuhanjekelamu yahaintaneti diyi njila yakwikalilamu nawamabwambu amavulu hela kubula kwikala nachineñi. Hela chochu, twatela kwikala asoñama neyi tunakuzatisha iyi njila.

13. Muloñadi antu azatishaña njila yakuhanjekelamu yahaintaneti chatiyilañawu wudi nichineñi?

¹³ Kusandujola kumu kunawani nawu, antu ombaña mpinji yeneni nakutala nsañu ninyevulu yinombiliwu akwawu haintaneti enzaña nakutiya wudi nichineñi. Muloñadi? Muloña wumu wudi wakwila nawu antu ombilaña haintaneti nyevulu yamwekeshaña yuma yadiluñishañawu muchihandilu chawu, ashañahu nyevulu yawu yayiwahi, amabwambu jawu nikumaluña amawahi kwendeleliwu. Muntu wunakubanjila iyi nyevulu nateli kukunkulula nindi chihandilu chawakwawu chachiwahi kubadika chindi. Muhela wudi nayaaka 19 wahosheli nindi: “Natachikili kutiya kutama chinamweni akwetu anakudiluñisha kunsa yanyilungu, ilaña ami natiyileña wudi hetala.

14. Kufumba kwekala ha1 Petulu 3:8 kunateli kutukwasha ñahi kuzatisha chiwahi njila yakuhanjekelamu haintaneti?

¹⁴ Hela chochu, njila yakuhanjekelamu haintaneti anateli kuyizatisha munjila yayiwahi, chidi neyi kuhanjeka nachisaka niamabwambu. Neyi mutala nsañu, nyevulu mavidiyo ombilañawu antu haintaneti ekala hohu akuditumbakesha awenawu. Chinamwekani neyi ahoshaña nawu “Nshishikenu ami.” Amakwawu ombilañahu mazu atama hanyevulu yawu hela hanyevulu yawakwawu. Chumichi chinambukiku nayilwilu yatela kwikala nawakwaKristu yakudizoza nikudakamena.—Tañenu 1 Petulu 3:8.

15. Bayibolu yinateli kutukwasha ñahi kubula kufwila kwikala asweja kulema?

¹⁵ Neyi mwazatishaña njila yakuhanjekelamu haintaneti, dihulenu nenu: ‘Mazu, nyevulu nimavidiyo inombilañahu amwekeshaña nawu inakuditumbakesha? Yaleteshaña antu amakwawu kutiya ichima?’ Bayibolu yahoshaña nawu: “Yuma yejima yidi mukaayi, dikwila  nawu yuma yafwilaña mujimba, yuma yafwilaña mesu nikudisamba nayuma yikwetiyi muntu, hiyafumaña kudi Tataku, ilaña yafumaña mukanu kaayi.” (1 Yow. 2:16) Bayibolu yikwawu yazatisha mukuku wakwila nawu “kudisamba nayuma yikwetiyi muntu” nawu “kudimwekesha nawu walema.” AkwaKristu hiyatela kufwilaña kutumbakanaku. Alondelaña kufumba kwamuBayibolu kwakwila nawu: “Bayi twikalaña akwakudivwimba kwamukunkulwayi, kusañumuna kudibecha wumu namukwawu nikuditiyila lwisu wumu namukwawuku.” (Ñal. 5:26) Neyi twikala adizoza hitukwikala neyi antu amukaayi adivwimba akeñaña kwikala alema kubadika akwawuku.

16. Muloñadi chitwatela kutondolwela kudivwimba?

¹⁶ Twatela kwikala adizoza muloña antu adivwimba ‘hiyatoñojokaña kwesekeja nachekalawuku.’ (Rom. 12:3) Antu adivwimba ekala nantaadi nawa ekala nakudivwimba kwamukunkulwayi. Yitoñojoka yawu niyilwilu yawu yayiletelaña aweni kukala hela akwawu. Neyi kuhimpa yitoñojoka yawu nehi, yitoñojoka yawu yikuputa nawa akuyiluwañesha kudi Satana. (2 Kor. 4:4; 11:3) Kwambukaku, muntu wadizoza watoñojokaña kwesekeja nachekalayi. Hadimonaña nindi wasweja kulemaku, weluka nindi akwawu amubadika. (Fwi. 2:3) Nawa weluka nindi “Nzambi wadikañaña nawakwakudivwimba, ilaña akwakudizoza wayitiyilaña luwi lwasweja.” (1 Pet. 5:5) Antu atoñojokaña kwesekeja nachekalawu hiyadikañaña naYehovaku.

17. Yumanyi yitwatela kwila hakwila nawu twikali adizoza?

¹⁷ Hakwila twikali adizoza twatela kuzatisha kufumba kwamuBayibolu kwakwila nawu, “vuulenu wuntu wenu wawukulu niyilwilu yawu, nawa [tuvwali] wuntu wawuha.” Chakeñekaña kuzata nañovu. Twatela kudizila kuyakutalilahu yaYesu nikweseka kumwimbujola chikupu. (Kol. 3:9, 10; 1 Pet. 2:21) Neyi tuzata nañovu tukuhetelamu. Neyi twikala adizoza, chisaka chetu chikwikala namuzañalu, tukuleta kunuñañana muchipompelu nawa tukwiluka chakuzatisha chiwahi njila yakuhanjekelamu haintaneti. Chuma chabadika, tukwikala nankisu niwuselewa waYehova.