1. Ninga munawogela Filipenses 2:3, ethu baani enaanikavihere okanna wandana wapama naathu amodha?

WIYEVIHA winonikavihera orumedha dholaga dha Yehova. Ekalelo ela enonikavihera wonelamo wi Mulugu ohunona ethu nnahowelihu. (Efé. 4:22-24) Wiyeviha winonithukulela werana efunelo ya Yehova ohiya efunelo yehu, ni wawona amodha ninga anddimuwa onipitha iyo. Marelihoya fukanna wandana wapama ni Yehova vamodha ni addibila. — Omwileri Filipenses 2:3.

2. Murumiwi Pawulo arumedha ddi, ki muwari mwa yohudhera ela nnaasuze ddi?

² Mbwenye nahikala pasope, nnowitaganyihedha ni athu a elabo ela ya saddana enithukulela ni eniidhivela yekiwa. * Siyeyo yapadduwa ni makiristawu amodha a nsaka nooroma. Nnone wi yoopadduwa, mwaha ele murumiwi Pawulo alebeliiye akudda roma egi: ‘ginawoga ni kadda muthu wa nyu wi kamwiyonelegemo okala athu a thima wapitha amodha, mbwenye mwiyonelegemo ni makalelo enoneyiha opama.’ (Rom. 12:3) Pawulo ahinona wi sapama wivaha thima, mbwenye niivahege thima ni makalelo apama, ethu enaanikavihere werana eyo fuwiyeviha. Muwari mwa yohudhera ela, nnere osuza makalelo wiyeviha winanikaviheriwa ohukala athu owithukulela mwa dhipaddi tharu (1) vamuralani, (2) nakanna mutholo mmabasani oomwene (3) ni nathapanyaga mwinterneti.

3. Mwahaya bwaddi vamuralani vikalaga magudhulano, kivano yapadduwa ndo athu amodha enubuwela avi?

³ Yehova apadduse matelo wi mulobwana ni mwihiyana ekalege ohagalalene. Mbwenye kavo alogomane; bumwahaya ale etelane ekannaga magudhulano. Siyeyo emuthukulele Pawulo oleba wi ale yaatele obe yaateliwe yerege ofwanyiwa magudhulano. (1 Cor. 7:28) Athu amodha enowona wi enakala ewanagave ni mamune obe ni mwariye. Mwaha wa yeyo aliwa wambela woona wi otela obe oteliwa kahiyo ethu yapama. Athu ala yaahiya mubuwelo wa elabo wavolowela, aliwa enere ofiyedha wubuwela wi nikule omwalanavo baahi. Aliwa enubuwelege wi ethu yathimaya futhamagela ohagalala wa kadda muthu baahi.

4. Ethu baani nnafunihu okala pasope?

⁴ Enohoweleya okala pasope wi nihiidde matelo ehu. Iyo nihinona wi muselu onarumedhiwa ni Bibliya wi athu abili etelane emwalane bi mararuwo. (Mat. 5:32) Bumwahaya yakumelela magudhulano ewogiwe ni Pawulo, kanubuwelege wi: “Matelo ala kinagakwana, kaginavahiwa odhivela winaginafwanela, podi wera ginere okala ohagalala ganfwanya muthu mmodha.” Mubuwelo ola onadhela waani? Onadhela mwaha widhivela kadda muthu yeka. Enonelo yelabo enawoga wi oharege murima wawo ni othamagele ohagalala wawo. Teto enonelo ya Mulugu enawoga wi ‘kusayelege opama wawo baahi, mbwenye osayelege opama waathu amodha.’(Fil. 2:4) Yehova anafuna wi waparele matelo awo ni onahiye. (Mat. 19:6) Sathima voobajha omubuwela Yehova ohiya wiyubuwela wamwinyo.

5. Ninga munawogela Efésios 5:33 Mulobwana ni mwihiyana etelane yeddihanege ni makalelo baani?

⁵ Mulobwana ni mwihiyana etelane enofwanela edhivelanege ni erihanege mmodha nimukwaye. (Omwileri Efésios 5:33.) Bibliya ononihudhiha wi sapama ovaha ohiya wakela.  (Atos 20:35) Wiyeviha onere wakavihera ale etelane odhivelana ni orihana. Mulobwana owiyeviha atenle, obe mwihiyana owiyeviha ateliwe kanaveda werana efunelo yaye baahi, mbwenye ‘ya muthu mmodha.’ — 1 Cor. 10:24.

6. Ohudhere ddi ni ele awogile Steven ni Stephanie?

⁶ Wiyeviha winowakavihera makiristawu etelane okanna ohagalala winlubale vamuralani. Motajhiha, mulobwana mmodha atenle anithaniwa Steven anawoga egi: “Nyu abili mwakala ninga nikuru munaalabege vamodha, thabwathabwa yapadduwa magudhulano. Ohiya wubuwelaga: “ethu ‘yathimaya wa miyo sivi?’” We onubuwelege: ‘yathimaya wa iyo sivi?’” Stephanie, mwadha Steven onubuwela emodhave. Oliye onowoga egi: “Kavo anafuna okala ni muthu ahinarumedha ele awogile mukwaye. Bumwahaya navanyihanaga wodhela ethu, iyo nnowilibihedha onona muladduya buvi. Nerana ndo, nnolobela, iyo osayela mmalivuruni mwehu, namala othapanyedha wodhela muselu yole. Vano nerana ndo, nnosayela makalelo ogonjhiha muladduya, ohiya okangana mmodha ni mukwaye.” Mohanganyedha mulobwana atenle ni mwihiyana ateliwe anasayela opama wa muthu mmodha, aliwa enakala ohagalala vanlubale.

7. Ddibila onaakela mutholo wa mabasa avayekiwa oomwene, akannege mubuwelo baani?

⁷ Iyo nnodhiveliwa omulabela Yehova naarive nihinna mutholo mmulogoni. (Sal. 27:4; 84:10) Akala ddibila onowivelela wi aapare mabasa avayekiwa oomwene, oliye onotamaleliwa. Bumwahaya, Bibliya agawogaga egi: ‘Akala muthu onowilibihera wihina akale namaholela, mabasa anafuniye bapama.’ (1 Tim. 3:1) Mbwenye ddibila onaakela mutholo, oliye kiyonelegemo okala muthu athima wapitha amodha. (Luc. 17:7-10) Efunelo yaye ekalege walabela addibila ni wiyeviha. — 2 Cor. 12:15.

8. Nnahudheravo ddi ni Yotajhiha ya Diótrefes, Uziyas ni Abisalawu?

⁸ Bibliya onovaha dhotajhiha dhaathu yiyonelamo okala athu athima wapitha amodha. Diótrefes kaali owiyeviha ni afunesa ‘okala mburo woroma’ mmulogoni. (3 João 9) Uziyas ahihiya withukula omugonjhiha ofiyedha wapara mabasa Yehova athomeliye anamakutha baahi. (2 Cró. 26:16-21) Abisalawu ahixixa ni makalelo opipireyiha wiiya murima wa nlogo wihina emukavihere okala mwene. (2 Sam. 15:2-6) Dhopadduwa nda dhinowoniha wi Yehova kannadhivela athu enaveda nthithimiho newa. (Pro. 25:27) Withukula ni okala muthu okalela murogo dhithu dhaanya, onodhana makathamiho. — Pro. 16:18

9. Yotajhiha baani ahiyile Yesu?

⁹ Ohiya dhotajhiha ndha dhabure, Yesu ohuhiya yotajhiha yapama. Bibliya anawoga wi: ‘Naari agakanlewo ninga Mulugu, newene kubuwele okala vamburoni va Mulugu.’ (Fil. 2:6) Yehova doroma okala namathonga munlubale, ooharela di Yesu. Podi dhigari ndo, oliye kaniyonelamo ninga muthu athimaya. Oliye ahiwoga ni anamahara aye egi: ‘Ole anakala ninga mwana vaari venyu, oyo dinaakale munlubale.’ (Luc. 9:48) Sohagalaliha onona wi nnalaba ni addibilihu eli mapiyonero, adhari okavihera, anamaholela Mulogo ni anameeddela Mulogo owiyeviha ninga Yesu! Wiyeviha onna adhari a Yehova onodhana odhivela mmulogoni, teto fudhivela wewula onanitonyihedha ninga nikuru na Mulugu. — João 13:35.

10. Onere ddi woona wi makathamiho amulogo wawo kinasamaleliwa pama?

¹⁰ Podi wera mmulogoni mwawo ehikalamo  makathamiho, vano we wubuwela wi anamaholela mulogo kinawedha wagonjhiha makathamiho yala. Onere ddi? Ohiya owogaga obure, okale owiyeviha ni wakavihere anamaholela mulogo osamalela makathamihoya. (Heb. 13:17) Ethu enuukavihere fuwikoha: ‘Makathamiho ala enapadduwa mmulogoni enohoweleya ogonjhihiwa mowaguva? Ola bumudhidhiya wowagonjhiha? Anna mutholo wowagonjhiha makathamiho ala dimiyo? Ginoveda makalelo wokavihera mulogo waaga okala wowiwanana, obe ginaveda makalelo owithukulela?

11. Ninga munawogela Efésios 4:2, 3, Omulabela Yehova ni makalelo owiyeviha onnadhana mareeliho baani?

¹¹ Yehova onovaha thima wiyeviha opitha ele nnandihu werana, wiwanana wehu ethu yathima opitha ovaha dhowima. Mowindo, wilibihere wihina omulabelege Yehova mowiyeviha. Werana ndo, mulogo wawo onere okala wowiwanana. (Omwileri Efésios 4:2, 3.) Wilibiherege mmalaleyelo. Ovede makalelo owalabela amodha ni wawonihe opama. Wawakelege atene vaade vawo, naaleya ehinna mutholo wavayekiwa mmulogoni. (Mat. 6:1-4; Luc. 14:12-14) Walabaga mmulogoni ni makalelo owiyeviha, amodha enowutamalela wodhela ethu onandiwe werana ni makalelo awo owiyeviha.

12. Bibliya onawoga ddi wodhela wandana?

¹² Yehova anafuna wi nikanne ohagalala nakala ni amudhihu obe naakwihu. (Sal. 133:1) Yesu ahikanna akwaye apama. (João 15:15) Bibliya onawoga dhorela dhinadha mwaha wandana webaribari. (Pro. 17:17; 18:24)  Bibliya onawoga wi kahiyo ethu yapama warabela amodha. (Pro. 18:1) Athu owinjhiva enubuwela wi othapanya mwinternetini, makalelo okanna akwawo owinjhiva. Mbwenye enohoweleya okala pasope walabihedhaga makalelo ala othapanya mwinternetini.

13. Mwahaya bwaddi athu enajha mudhidhi egali mwinternetini yoonaga fotu enakala ookwerebeyene ni enubuwela wi kinna akwiwa owaredhana?

¹³ Athu enasuza mwa makalelo otiba, enawoga wi: ale enajha mudhidhi yonaga fotu ni balume mwinternetini, enakala ookwerebeyene ni enubuwela wi kinna akwiwa owaredhana. Mwahaya bwaddi? Mwahaya bowi, athu eneekamo fotu mwinternetini, enawoga wodhela egumiwa. Aliwa enasakulesa fotu dhewa dhathima, dha akwiwa ni mburo eviriliwamo. Vano, muthuya onoona fotu, wambela wiliganiha naliwa, mowindo wubuwelaga wi egumi yaye kinna thima, newene kahiyo elobwene. Murogola anna yaka 19 onorumedha egi: “Miyo gahambela okanna ajhe mwaha wawona athu atene yaredhaga omagomihero wa sumana, miyo ngali vaade gihaparaga mabasa.”

14. Nikongomedho nnafwanyeya mBibliyani va 1 Pedro 3:8 nnanikavihera addi olabihedha interneti ni enonelo?

¹⁴ Mwebaribarene othapanya mwinternetini podi olabihedhiwa wi dhisasanyiwena dhithu dhapama. Motajhiha, we podi othapanya ni amudhawo obe akwawo mwinternetini. Ohona wi athu eneeka fotu mwinternetini, efunelo yewa sowivuwiha? Aliwa yekamo fotu enakala ninga enawoga wi: ‘Kagisugweni!’ Amodha yaafunaga okomentari wodhela fotu dhewa obe dhaakwiwa enawoga ni owali obe enawoga dhithu dhonyakavala. Eyo enohiyana ni nikongomedho enavahiwa makiristawu mBibliyani, okala muthu owiyeviha ni waweddela thagaraga amodha. — Omwileri 1 Pedro 3:8.

15. Dholaga dhili mBibliyani dhinanikavihera addi ohikala athu owivuwiha?

¹⁵ Akala onolabihedha interneti wihina othapanye naamodha, Wikohe: ‘Fotu, vidiyu ni balume ginekimi mwinternetini, dhinoniha wi ginowivuwiha? Kaginaatotele ajhe amodha? Bibliya onawoga: ‘Dhithu dhatedhene dhiri mwilaboni: dhofuna dha mwiili, dhofuna dha mento ni withukula mwaha wa dhokanna,  kadhinadhela wa Mulugu, mbwenye dhinadhela mwilaboni.’ (1 João 2:16) Bibliya mmodha madhu ala owi ‘withukula mwaha wa dhokanna’ etapuleliwe ayi “querer parecer importante.” Makiristawu kinahowela wivuwiha. Aliwa enohara yolaga eli mBibliyani enawoga yegi: ‘Kanikale athu owithukulela, nitetedhaga mapoka mmodha ni mukwaye, nikalelagana nrima mmodha ni mukwaye.’ (Gál. 5:26) Okala athu owiyeviha winonikavihera ohitaganyihedha ni athu owithukulela a elabo ela.

16. Withukulela kahiyo ethu yapama mwahaya bwaddi?

¹⁶ Enohoweleya okala owiyeviha mwaha wi okala owithukulela ‘kinoneyiha opama.’ (Rom. 12:3) Muthu owithukulela onodhiveliwa okangana, wiwoniha ninga muthu athima. Malabo owinjhiva, oliye onubuwela ni onowerana dhithu dhinamutotela goyi oliye ni athu amodha. Enohoweleya muthu yoyo osaddula mubuwelo waaye, mwaha wi saddana onere onfuga mento ni ovunganyedha mubuwelo waaye. (2 Cor. 4:4; 11:3) Mbwenye muthu owiyeviha dapama, ni onowiyonelamo ni makalelo apama. (Fil. 2:3) Ohunona wi ‘Mulugu onowawidda ale enithukulela, mbwenye onowavaha opama wohinifwanelela athu owiyeviha.’ (1 Ped. 5:5) Muthu apama kaniddana ni Yehova.

17. Ethu baani nnahowelihu werana wihina nikalegeve owiyeviha?

¹⁷ Wihina nikalegeve owiyeviha, nnohowela olabihedha yolaga eli mBibliyani enawoga wi ‘muuguule emuthu yakale ni dhoweradhiwa’. Wihina werena ndo, enohowela wilibihera vanlubale. Nnohowela ohudhera ni ohariha mowaguva tajhiha ya Yesu. (Col. 3:9, 10; 1 Ped. 2:21) Wilibihera wula fwapama. Iyo nahudhera okala athu owiyeviha, nnokanna ohagalala vamuralani, nnokavihera mulogo wehu okala wowiwanana ni nnolabihedha interneti ni makalelo apama. Ohiya eyenove, nnere wawakela mareeliho a Yehova.