1. ¿Ndáa consejo táxi Filipenses 2:3 ndaʼa̱yó, ta ndáaña va̱ʼa ndakiʼinyó tá ná keʼéyó ña̱ káʼa̱nña?

MIÍYÓ na̱ káchíñu nu̱ú Jehová vitá íyo iniyó ta kándíxayó ña̱ káʼa̱nra, chi kúnda̱a̱-iniyó ña̱ ndiʼi ña̱ káʼa̱nra ña̱ va̱ʼa miíyó kúúña (Efes. 4:22-24). Ña̱ vitá-ini chíndaʼáña miíyó ña̱ keʼéyó ña̱ kúni̱ra ta su̱víka ña̱ kúni̱ miíyó, ta saátu ña̱ ndakanixi̱níyó ña̱ ndáyáʼvika inkana nu̱úyó. Ta xa̱ʼa̱ ña̱yóʼo va̱ʼa kítáʼanyó xíʼin Jehová ta saátu xíʼin na̱ hermanoyó (kaʼvi Filipenses 2:3). *

2. a) ¿Ndáaña ni̱ka̱ʼa̱n ta̱ apóstol Pablo? b) ¿Ndáaña ka̱ʼa̱nyó xa̱ʼa̱ nu̱ú ña̱ artículo yóʼo?

² Tá ná va̱ása kiʼinyó kuenta, kivi kixáʼayó ni̱nuní kuniyó ta iinlá xa̱ʼa̱ miíyó kundi̱ʼi̱-iniyó, nda̱a̱ táki̱ʼva kéʼé na̱ ñuyǐví ta̱ Ndi̱va̱ʼa. * Sana táʼan ña̱yóʼo kúú ña̱ ndo̱ʼo na̱ hermano na̱ ni̱xi̱yo tá siglo nu̱ú, chi ta̱ apóstol Pablo ta̱xira consejo yóʼo ndaʼa̱ na̱ congregación ña̱ ñuu Roma, ka̱chira: “Káʼi̱n xíʼinndó ña̱ va̱ása ndakanixi̱níndó ña̱ ndáyáʼviníndó, va̱ʼaka vií ndakanixi̱níndó tasaá na̱ʼa̱ndó ña̱ vií íyo ña̱ kéʼéndó” (Rom. 12:3). Nda̱a̱ táki̱ʼva xi̱niyó, ta̱ Pablo ni̱ka̱ʼa̱nra ña̱ xíniñúʼu viíva ndakanixi̱níyó xa̱ʼa̱ miíyó. Soo tá vitá íyo iniyó kiʼinvayó kuenta xíʼin ki̱ʼva ña̱ ndákanixi̱níyó xa̱ʼa̱ miíyó. Nu̱ú ña̱ artículo yóʼo ka̱ʼa̱nyó xa̱ʼa̱ u̱ni̱ ki̱ʼva ña̱ na̱ʼa̱yó ña̱ vitá íyo iniyó, ta va̱ása ndakanixi̱níyó ña̱ ndáyáʼviníkayó nu̱ú inkana: tá kúú na̱ ti̱ndaʼa̱, na̱ kúúmií iin chiñu ti̱xin ñuu Ndióxi̱, xíʼin na̱ xíniñúʼu Internet ña̱ sándaana na̱ʼná, video á inkaka ña̱ʼa.

3. a) ¿Nda̱chun íyo tu̱ndóʼo nu̱ú na̱ ti̱ndaʼa̱? b) ¿Ndáaña kéʼé savana tá yáʼana nu̱ú tu̱ndóʼo yóʼo?

³ Jehová kúni̱ra ña̱ si̱íní ná koo na̱ xa̱a̱ ti̱ndaʼa̱. Soo xa̱ʼa̱ ña̱ kúúyó na̱ yiví ku̱a̱chi, sava yichi̱ va̱ása inkáchi ndákanixi̱níyó. Ta̱ Pablo ni̱ka̱ʼa̱nra ña̱ koo tu̱ndóʼo nu̱ú na̱ ti̱ndaʼa̱ (1 Cor. 7:28). Ku̱a̱ʼání na̱ hermano na̱ xa̱ʼa̱ ti̱ndaʼa̱, túvina ña̱ nina na̱ kánitáʼan kúúna xíʼin na̱ ti̱ndaʼa̱ xíʼinna, ta nda̱a̱ xáa̱na ndákanixi̱nína ña̱ su̱ví na̱yóʼo níxiniñúʼu tindaʼa̱ xíʼinna. Tá ná ndakanixi̱nína nda̱a̱ táki̱ʼva ndákanixi̱ní na̱ ñuyǐví yóʼo, iinlá xa̱ʼa̱ miína kundi̱ʼi̱-inina ta ndakanixi̱nína ña̱ va̱ʼaka tá ná sandákootáʼanna.

4. ¿Ndáaña va̱ása xíniñúʼu ndakanixi̱níyó?

⁴ Ná va̱ása ndakanixi̱níyó ña̱ xa̱a̱ ndi̱ʼi-xa̱ʼa̱ ña̱ ti̱ndaʼa̱yó. Kúnda̱a̱-iniyó ña̱ káʼa̱n ña̱ Biblia ña̱ kivi sandákootáʼan na̱ ti̱ndaʼa̱ tá iin na̱yóʼo ke̱ʼéna ña̱ kini xíʼin inkana (Mat. 5:32). Ña̱kán, tá ná ya̱ʼayó nu̱ú tu̱ndóʼo ña̱ ni̱ka̱ʼa̱n ta̱ Pablo xa̱ʼa̱, ná va̱ása ni̱nuní kuniyó ta ndakanixi̱níyó ña̱yóʼo: “¿Á táxi na̱ ti̱ndaʼa̱ xíʼi̱n ndiʼi ña̱ xíniñúʼi̱? ¿Á kúʼvi̱-inina xínina yi̱ʼi̱ nda̱a̱ táki̱ʼva kúni̱ miíi̱? ¿Á kusi̱íka-inii̱ tá ná koi̱ xíʼin inkana?”. Tá saá ná ndakanixi̱níyó, náʼa̱yó ña̱ iinlá miíyó ndíʼi̱-iniyó xa̱ʼa̱. Tá ná ndakanixi̱níyó nda̱a̱ táki̱ʼva ndákanixi̱ní na̱ ñuyǐví yóʼo, kuni̱yó keʼéyó ña̱ káʼa̱n níma̱yó ta ndukúyó ña̱ʼa ña̱ sákusi̱í-iniyó, ta xa̱ʼa̱ ña̱yóʼo kuni̱yó sandákooyó na̱ ti̱ndaʼa̱ xíʼinyó. Soo na̱ ndíku̱n ña̱ káʼa̱n Ndióxi̱, va̱ása ndíʼi̱-inina xa̱ʼa̱ iinlá miína chi saátu ndíʼi̱-inina xa̱ʼa̱ inkana (Filip. 2:4). Jehová kúni̱ra ña̱ ná kundaayó ña̱ ti̱ndaʼa̱yó, ta va̱ása sandíʼi-xa̱ʼa̱yóña (Mat. 19:6). Kúni̱ra ña̱ ná ndakanixi̱níyó xa̱ʼa̱ ña̱ sákusi̱í-inira, ta su̱ví xa̱ʼa̱ ña̱ sákusi̱í-ini miíyó.

5. Nda̱a̱ táki̱ʼva káchi Efesios 5:33, ¿ndáa ki̱ʼva xíniñúʼu keʼé na̱ ti̱ndaʼa̱ xíʼin táʼanna?

⁵ Na̱ xa̱a̱ ti̱ndaʼa̱ xíniñúʼu kuʼvi̱-inina kunitáʼanna ta ixato̱ʼó táʼanna (kaʼvi Efesios  5:33). * Ña̱ Biblia sánáʼa̱ña miíyó ña̱ taxiyó ña̱ʼa ndaʼa̱ inkana nu̱úka ña̱ kuni̱yó taxina ña̱ʼa ndaʼa̱ miíyó (Hech. 20:35). Ta ña̱ va̱ʼa na̱ʼa̱na ña̱ kúʼvi̱-inina xínitáʼanna ta íxato̱ʼó táʼanna, u̱vi̱ saána xíniñúʼu vitá koo inina. Ña̱yóʼo chindeétáʼan xíʼinna ña̱ va̱ása kundi̱ʼi̱-inina xa̱ʼa̱ iinlá miína, chi saátu kundi̱ʼi̱-inina xa̱ʼa̱ na̱ ti̱ndaʼa̱ xíʼinna (1 Cor. 10:24).

6. ¿Ndáaña sákuaʼayó xíʼin ña̱ káʼa̱n ta̱ Steven xíʼin ñá Stephanie?

⁶ Ku̱a̱ʼání na̱ hermano na̱ xa̱a̱ ti̱ndaʼa̱ si̱íní íyona, xa̱ʼa̱ ña̱ vitá íyo inina. Iin ta̱ hermano ta̱ naní Steven káchira: “Tá vií kítáʼanna, chindeétáʼanna xíʼin táʼanna tá yáʼana nu̱ú tu̱ndóʼo. Va̱ása ndakanixi̱nína xa̱ʼa̱ ña̱yóʼo, ‘¿ndáaña kúú ña̱ xíniñúʼu keʼíi̱?, chi ndakanixi̱nína ¿ndáaña kúú ña̱ xíniñúʼu keʼéndi̱?ʼ”. Ta ki̱ʼva saátu íyo ña̱ ndákanixi̱ní ñá síʼira ñá Stephanie. Ñáyóʼo káchiñá: “Nda̱a̱ ni iinna va̱ása kútóona koona xíʼin na̱ kánitáʼan xíʼinna. Tá va̱ása inkáchi íyo ña̱ ndákanixi̱níndi̱, nándukúndi̱ nda̱chun kúu ña̱yóʼo. Tasaá káʼa̱nndi̱ xíʼin Ndióxi̱, nándukúndi̱ tutu ña̱ káʼa̱n xa̱ʼa̱ ña̱yóʼo ta nátúʼunndi̱ xa̱ʼa̱ña. Ta va̱ása kánitáʼanndi̱ chi chíka̱a̱ndi̱ ndee̱ ña̱ u̱vi̱ saándi̱ ndasaviíndi̱ ku̱a̱chi”. Si̱íníka koo na̱ ti̱ndaʼa̱ tá ná va̱ása ndakanixi̱nína ña̱ ndáyáʼviníkana nu̱ú na̱ inka.

7. ¿Ndáaña xíniñúʼu keʼé iin na̱ hermano tá nda̱kiʼinna iin chiñu?

⁷ Nu̱ú miíyó ndáyáʼviní ña̱ vií kachíñuyó nu̱ú Jehová (Sal. 27:4; 84:10). Tá iin na̱ hermano kúni̱na keʼéna ku̱a̱ʼáka chiñu ti̱xin ñuu Jehová iin ña̱ va̱ʼava kúú ña̱yóʼo. Ña̱ Biblia káchiña: “Tá iin ta̱a chíka̱a̱ra ndee̱ ña̱ xa̱a̱ra koora superintendente, iin chiñu ña̱ va̱ʼa kúú ña̱ kúni̱ra keʼéra” (1 Tim. 3:1). Soo tá nda̱kiʼinna iin chiñu, va̱ása xíniñúʼu ni̱nuní kunina xa̱ʼa̱ ña̱yóʼo (Luc. 17:7-10). Chi ña̱ xíniñúʼu keʼéna kúú ña̱ vitá koo inina ta kachíñuna nu̱ú inkana (2 Cor. 12:15).

8. ¿Ndáaña sákuaʼayó xíʼin ña̱ ke̱ʼé ta̱ Diótrefes, ta̱ Uzías xíʼin ta̱ Absalón?

⁸ Ña̱ Biblia káʼa̱nña xa̱ʼa̱ na̱ yiví na̱ nda̱kanixi̱ní ña̱ ndáyáʼvinína. Tá kúú, ta̱ Diótrefes xi̱ndakanixi̱níra ña̱ xíni̱ra keʼéra ndiʼi ña̱ʼa, ta xi̱kuni̱ra kundayáʼvikara nu̱ú na̱ congregación (3 Juan 9). Ta̱ Uzías ni̱na̱ʼa̱ra ña̱ va̱ása vitá íyo inira tá xi̱kuni̱ra keʼéra iin chiñu ña̱ va̱ása nítaxi Jehová ndaʼa̱ra (2 Crón. 26:16-21). Xa̱ʼa̱ ña̱ xi̱kuni̱ ta̱ Absalón koora rey, viíní xi̱keʼéra xíʼin na̱ ñuu ña̱ va̱ʼa sandáʼvirana (2 Sam. 15:2-6). Nda̱a̱ táki̱ʼva káchi ña̱ relato yóʼo, Jehová kúndasíra xínira na̱ yiví na̱ kúni̱ ndukáʼnu (Prov. 25:27). Na̱ ni̱nuní kúni á na̱ kúni̱ ndukáʼnu nu̱ú inkana, kǒo ña̱ va̱ʼa ndákiʼinna (Prov. 16:18).

9. ¿Ndáa yichi̱ sa̱ndákoo ta̱ Jesús nu̱úyó?

⁹ Síínní ni̱xi̱yo ña̱ ke̱ʼé ta̱ Jesús. Ña̱ Biblia káchiña: “Ni ni̱xi̱yora nda̱a̱ táki̱ʼva íyo Ndióxi̱, va̱ása níndakanixi̱níra ña̱ kindaara chiñu ña̱ kúúmií Ndióxi̱, ta koora nda̱a̱ táki̱ʼva íyo ta̱yóʼo” (Filip. 2:6). Ta̱ Jesús íyoní ndee̱ra. Soo ni saá, va̱ása ndákanixi̱níra ña̱ ndáyáʼviníra. Ni̱ka̱ʼa̱nra ña̱yóʼo xíʼin na̱ discípulora: “Saáchi na̱ vitá íyo ini nu̱ú ndiʼi ndóʼó, na̱kán kúú na̱ ndáyáʼvika” (Luc. 9:48). Kúsi̱íní-iniyó tá káchíñuyó xíʼin na̱ precursor, na̱ siervo ministerial, na̱ anciano xíʼin na̱ superintendente ña̱ circuito na̱ vitá íyo ini nda̱a̱ táki̱ʼva ni̱xi̱yo ta̱ Jesús. Tá vitá íyo ini miíyó na̱ ndásakáʼnu Jehová, náʼa̱yó ña̱ kúúyó na̱ ñuura chi kúʼvi̱-iniyó xínitáʼanyó (Juan 13:35).

10. ¿Ndáaña xíniñúʼu keʼéyó tá túviyó ña̱ va̱ása va̱ʼa ndásaviína ku̱a̱chi ña̱ íyo ti̱xin congregación?

¹⁰ ¿Ndáaña xíniñúʼu keʼéyó tá túviyó ña̱ íyo  iin ku̱a̱chi ti̱xin congregación, ta ndákanixi̱níyó ña̱ va̱ása va̱ʼa ndásaviína ña̱yóʼo? Va̱ása xíniñúʼu ka̱ʼa̱n kúáchiyó, va̱ʼaka vitá ná koo iniyó ta ná chindeétáʼanyó xíʼin na̱ níʼi yichi̱ nu̱úyó (Heb. 13:17). ¿Ndáaña kivi chindeétáʼan xíʼinyó ña̱ keʼéyó ña̱yóʼo? Ná ndakanixi̱níyó xa̱ʼa̱ ña̱yóʼo: “¿Á mií ña̱ nda̱a̱ ndeéní ku̱a̱chi yóʼo? Tá xíniñúʼu ndasaviína ku̱a̱chi yóʼo, ¿á vitin kúú ña̱ xíniñúʼu keʼénaña? ¿Á yi̱ʼi̱ kúú na̱ xíniñúʼu ndasavií ña̱yóʼo? Soo mií ña̱ nda̱a̱, ¿ndáaña kúú ña̱ kúni̱i̱: ña̱ kutáʼan vií na̱ congregación á ña̱ ndukáʼnu iinlá miíi̱?”.

11. Nda̱a̱ táki̱ʼva káchi Efesios 4:2, 3, ¿ndáaña kuu tá vitá ná koo iniyó kachíñuyó nu̱ú Jehová?

¹¹ Nu̱ú Jehová ndáyáʼviní ña̱ vitá ná koo iniyó ta su̱ví ña̱ kuxini̱yó keʼéyó ku̱a̱ʼá ña̱ʼa, ta saátu ndáyáʼviní ña̱ vií kutáʼanyó ta su̱ví ña̱ vií ná kana iin chiñu. Xa̱ʼa̱ ña̱yóʼo, tá ná chika̱a̱níyó ndee̱ ña̱ vitá koo iniyó kachíñuyó nu̱ú Jehová. Saá kúú ña̱ chindeétáʼanyó xíʼin na̱ congregación ña̱ vií kutáʼanna (kaʼvi Efesios 4:2, 3). * Ta ná chika̱a̱níyó ndee̱ ña̱ ku̱ʼu̱nyó natúʼunyó xíʼin na̱ yiví xa̱ʼa̱ Ndióxi̱, ta saátu ná chindeétáʼanyó xíʼin inkana. Va̱ʼa ná koo iniyó xíʼin ndiʼina, ta su̱ví kuití xíʼin na̱ kúúmií chiñu ña̱ ndáyáʼvi ti̱xin congregación (Mat. 6:1-4; Luc. 14:12-14). Tá ná keʼéyó ndiʼi ña̱yóʼo, inkana kiʼinna kuenta ndáaña kúú ña̱ xíni̱yó keʼéyó, ta saátu kiʼinna kuenta ña̱ vitá íyo iniyó.

12. ¿Ndáaña káʼa̱n Biblia xa̱ʼa̱ ña̱ koo na̱ migoyó?

¹² Jehová kúni̱ra ña̱ si̱í ná kitáʼanyó xíʼin na̱ migoyó ta saátu xíʼin na̱ veʼeyó (Sal. 133:1). Ta̱  Jesús ni̱xi̱yo na̱ va̱ʼaní xi̱kuu migora (Juan 15:15). Ña̱ Biblia káʼa̱nña ndáaña va̱ʼa ndákiʼinyó tá íyo na̱ migoyó (Prov. 17:17; 18:24). Ta saátu, káʼa̱nña xíʼinyó ña̱ va̱ása xíniñúʼu kuxíkayó nu̱ú inkana (Prov. 18:1). Ku̱a̱ʼánína túvina ña̱ kivi kuniñúʼuna Internet ña̱ va̱ʼa ku̱a̱ʼá koo na̱ migona ta va̱ása kuni mitúʼunna. Soo ná kiʼinyó kuenta tá xíniñúʼuyó ña̱yóʼo.

13. ¿Nda̱chun sava na̱ yiví na̱ xíniñúʼu Internet kúni mitúʼunna ta ndákava-inina?

¹³ Na̱ káʼvi va̱ʼa xa̱ʼa̱ ña̱yóʼo káchina, ña̱ na̱ xíniñúʼu ku̱a̱ʼání tiempo ña̱ kotona comentario á na̱ʼná ña̱ sándaa inkana nu̱ú Internet, kúni mitúʼunna ta ndákava-inina. ¿Nda̱chun? Ku̱a̱ʼání na̱ yiví sándaana nu̱ú Internet na̱ʼná ña̱ ndáyáʼvi va̱ʼaka nu̱úna: tá kúú na̱ʼná miína ña̱ va̱ʼaní ka̱na, na̱ʼná na̱ migona, xíʼin na̱ʼná lugar ña̱ liviní nu̱ú xáʼa̱nna. Na̱ xíto na̱ʼná yóʼo kivi xa̱a̱na ndakanixi̱nína ña̱ va̱ása si̱í íyo ña̱ táku miína. Iin ñá hermana ñá kúúmií 19 ku̱i̱ya̱ káchiñá: “Tá xi̱xitoi̱ ña̱ ku̱a̱ʼá ña̱ʼa xi̱keʼé inkana tá ndíʼi semana ta xi̱kusi̱íní-inina, va̱ása va̱ʼa níxikunii̱ saáchi yi̱ʼi̱ íyo miíi̱ veʼi̱ ta kǒo nda̱a̱ ni iin ña̱ʼa níxikeʼíi̱”.

14. ¿Ndáa ki̱ʼva chíndeétáʼan ña̱ káʼa̱n 1 Pedro 3:8 xíʼinyó ña̱ vií kuniñúʼuyó Internet?

¹⁴ Ña̱ nda̱a̱ kúú ña̱ kivi vií kuniñúʼuyó Internet, tá kúú ña̱ ka̱ʼa̱nyó xíʼin na̱ veʼeyó á na̱ migoyó. Soo, ¿á xa̱a̱ ki̱ʼinyó kuenta ña̱ ku̱a̱ʼání ña̱ʼa ña̱ sándaa na̱ yiví nu̱ú Internet, kéʼénaña xa̱ʼa̱ ña̱ kúni̱na ña̱ ná ndakanda̱-ini inkana xíʼin ña̱yóʼo? Ña̱ kúni̱na kúú ña̱ ná koto inkana ndáaña kúú ña̱ kéʼéna. Savana sándaana comentario ña̱ kininí káʼa̱n xa̱ʼa̱ na̱ʼná miína á xa̱ʼa̱ na̱ʼná inkana. Nda̱a̱ ni iin ña̱yóʼo va̱ása kítáʼan xíʼin ña̱ va̱ʼa ña̱ xíniñúʼu kuumií na̱ ndásakáʼnu Ndióxi̱, tá kúú ña̱ vitá koo inina ta kundi̱ʼi̱-inina xa̱ʼa̱ inkana (kaʼvi 1 Pedro 3:8). *

15. ¿Ndáa ki̱ʼva chíndeétáʼan Biblia xíʼinyó ña̱ va̱ása kundi̱ʼi̱ní-iniyó xa̱ʼa̱ iinlá miíyó?

¹⁵ Tá xíniñúʼuyó Internet, ná ndakanixi̱níyó xa̱ʼa̱ ña̱yóʼo: “¿Ndáa ki̱ʼva íyo na̱ʼná, video xíʼin comentario ña̱ sándai̱ nu̱ú Internet? ¿Á kivi ndakanixi̱ní inkana ña̱ ni̱nuní kúnii̱ xa̱ʼa̱ ña̱yóʼo? ¿Á kivi sa̱a̱-ini inkana kunina yi̱ʼi̱ xa̱ʼa̱ ña̱yóʼo?”.  Ña̱ Biblia káchiña: “Ndiʼi ña̱ íyo ñuyǐví yóʼo, tá kúú ña̱ kútóo ku̱ñuyó, ña̱ xítoyó xíʼin ña̱ ni̱nu kúniyó xa̱ʼa̱ ña̱ kúúmiíyó, su̱ví yiváyó táxiña, chi kuenta ñuyǐví yóʼo kúúña” (1 Juan 2:16). Iin comentario ña̱ káʼa̱n xa̱ʼa̱ Biblia káʼa̱nña xa̱ʼa̱ ña̱ tu̱ʼun yóʼo “ña̱ ni̱nu kúniyó xa̱ʼa̱ ña̱ kúúmiíyó” káʼa̱nña xa̱ʼa̱ “na̱ kúni̱ kundayáʼviníka”. Miíyó na̱ ndásakáʼnu Ndióxi̱ va̱ása kúni̱yó kundayáʼvikayó nu̱ú inkana. Chi ndíku̱nyó consejo ña̱ va̱xi nu̱ú Biblia: “Ná va̱ása kundi̱ʼi̱-iniyó xa̱ʼa̱ iinlá miíyó, ta ná va̱ása keetáʼanyó xíʼin inkana ta ni ná va̱ása sa̱a̱-iniyó kuniyó inkana xa̱ʼa̱ ña̱ kúúmiína” (Gál. 5:26). Tá vitá íyo iniyó, va̱ása keʼéyó nda̱a̱ táki̱ʼva kéʼé na̱ ñuyǐví yóʼo ña̱ iinlá miíyó kundi̱ʼi̱-iniyó xa̱ʼa̱.

16. ¿Nda̱chun va̱ása kúni̱yó ni̱nu koo iniyó?

¹⁶ Xíniñúʼu vitá koo iniyó, saáchi na̱ ni̱nu kúni náʼa̱na ña̱ va̱ása vií íyo ña̱ ndákanixi̱nína (Rom. 12:3). Ku̱a̱chiní-inina ta iinlá xa̱ʼa̱ miína ndíʼi̱-inina. Ta ña̱ ndákanixi̱nína xíʼin ña̱ kéʼéna sáxo̱ʼvi̱ña miína ta saátu inka na̱ yiví. Tá va̱ása násamana ki̱ʼva ña̱ ndákanixi̱nína, ta̱ Ndi̱va̱ʼa ndakundeéra nasamara ña̱ ndákanixi̱nína (2 Cor. 4:4; 11:3). Soo na̱ yiví na̱ vitá íyo ini, vií íyo ña̱ ndákanixi̱nína. Vií xítona miína, ta kúnda̱a̱-inina ña̱ ndáyáʼvika inkana nu̱úna (Filip. 2:3). Saátu kúnda̱a̱-inina, ña̱ va̱ása kúni̱ Ndióxi̱ xínira na̱ ni̱nu kúni, soo va̱ʼa íyo inira xíʼin na̱ vitá-ini (1 Ped. 5:5). Na̱ vií íyo ña̱ ndákanixi̱ní va̱ása kúni̱na ña̱ ná kundasí Ndióxi̱ kunirana.

17. ¿Ndáaña xíniñúʼu keʼéyó tá kúni̱yó vitá koo iniyó?

¹⁷ Tá kúni̱yó vitáka koo iniyó, xíniñúʼu keʼéyó ña̱ káʼa̱n consejo yóʼo: “Sandákoondó ndiʼi ña̱ xi̱keʼéndó tá ya̱chi̱, ta vitin keʼéndó ña̱ va̱ʼa”. Soo xíniñúʼu chika̱a̱níyó ndee̱ ña̱ va̱ʼa keʼéyó ña̱yóʼo, chi xíniñúʼu kaʼviyó ña̱ káʼa̱n xa̱ʼa̱ ta̱ Jesús ta kundiku̱nyó yichi̱ra (Col. 3:9, 10; 1 Ped. 2:21). Soo ku̱a̱ʼání ña̱ va̱ʼa ndakiʼinyó tá ná keʼéyó ña̱yóʼo. Tá ná chika̱a̱yó ndee̱ ña̱ vitá koo iniyó, si̱íníka koo na̱ veʼeyó, va̱ʼaníka kutáʼan na̱ congregación ta viíníka kuniñúʼuyó Internet. Ta ña̱ ndáyáʼviníka kúú ña̱ taxi Jehová bendición ndaʼa̱yó ta kusi̱í-inira xíʼin ña̱ kéʼéyó.