TLAMACHTIL 27
Amo ma timoueyinekikan
“Nomechilia ayik xikmolikah nomejwah okachi nonkualteh ke oksikimeh, yej ximoyejyekokah ijkó kemi Dios onomechmajmák nomotlaneltokalis” (ROM. 12:3).
TLAKUIKALI 130 Ma titetlapojpoluikan
XIKILNAMIKTO *
1. ¿Tlen kijtoua Filipenses 2:3 uan ken techpaleuia?
TIITEKIPANOJKAUAN Jehová tiyolyamankej uan tiktlakamatij porque ye kineki kuali ma tiyetokan (Efes. 4:22-24). Tiyolyamankej porque okachi tikpatioitaj tiktekichiuiliskej Jehová uan tikinmitaj “oksikimeh kemi okachi weyijkatitokeh”. Non techpaleuia kuali ma timouikakan iuan Jehová uan noijki iuan tokniuan (xiktlajtolti Filipenses 2:3).
2. ¿Tlen okijto Pablo uan tlen timomachtiskej?
2 Timoueyinekiskej uan titlaixnekiskej ken oksekimej tla amo timomaluiaj. * Nesi sekimej tokniuan tlen okatkaj achto siglo ijkon okinpanok. Ik non, tlatitlanil Pablo okintlajkuilili tokniuan tlen ochantiayaj Roma: “Nomechilia ayik xikmolikah nomejwah okachi nonkualteh ke oksikimeh, yej ximoyejyekokah ijkó kemi Dios onomechmajmák nomotlaneltokalis” (Rom. 12:3). Pablo okijto moneki timotlasojtlaskej pero tla tiyolyamankej amo timoueyinekiskej. Axkan timomachtiskej eyi tlamantli tlen techititia keman moneki tiyetoskej tiyolyamankej. Akinmej yomonamiktijkej, akinmej okachi tlapaleuiaj itech ialtepe Jehová uan ijkuak itlaj tiktlaliaj itech Internet.
MA YETOKAN YOLYAMANKEJ AKINMEJ YOMONAMIKTIJKEJ
3. (1) ¿Tleka kipiaj ouijkayotl akinmej yomonamiktijkej? (2) ¿Tlen kimachiliaj sekimej tokniuan tlen kipiaj ouijkayotl?
3 Jehová kineki ma yolpakikan akinmej yomonamiktijkej. Pero ualeua kipiaj ouijkayotl porque tlajtlakolejkej. Pablo okijto akinmej monamiktiaj kipiaj ouijkayotl (1 Cor. 7:28). Sekimej tokniuan tlen yomonamiktijkej kimachiliaj san mokualanijtokej uan kijtouaj ayakmo moajsikamatij. Tla amo momaluiskej, san kintekipachos tlen kinekij uan mokajkauaskej inmixpan tekiuajkej.
4. ¿Tlen amo ma motlajtlanikan akinmej yomonamiktijkej?
4 Akinmej yomonamiktijkej amo ma mokuayejyekokan ayakmo uelis itlaj kichiuaskej. Ma kilnamiktokan Biblia kijtoua san uelis mokajkauaskej ixpan tekiuajkej tla se auilnemis (Mat. 5:32). Amo ma moueyinekikan ijkuak kipiaskej ouijkayotl nion ma motlajtlanikan: “¿Kuali onikpejpenki akin iuan onimonamikti? ¿Nechtlasojtla ken moneki? ¿Okachi niyolpakiskia tla nimonamiktiskia ikaj iuan okse?”. Amo kuali akinmej ijkon mokuayejyekouaj. Akinmej amo momachtiaj Biblia kijtouaj ma tikchiuakan tlen toyolo kineki uan ma timoyolpaktikan maski tikkauaskej tonamik. Pero akinmej kitlakamatij toTajtsin Dios amo ‘kimotemoliah san tlan ye kinpalewia, yej kimotemoliah tlan ika weletis kimpalewiskeh oksikimeh’ (Filip. 2:4). Jehová amo kineki ma mokajkauakan akinmej yomonamiktijkej (Mat. 19:6). Ye kineki ma tikchiuakan tlen techiluia.
5. Ijkon ken kijtoua Efesios 5:33, ¿tlen moneki kichiuaskej akinmej yomonamiktijkej?
5 Akinmej yomonamiktijkej moneki ma motlasojtlakan uan ma motlakaitakan (xiktlajtolti Efesios 5:33). Biblia techiluia ma tikinpaleuikan oksekimej (Hech. 20:35). Tla yolyamankej akinmej yomonamiktijkej, motlasojtlaskej uan motlakaitaskej. Ijkon kiteititiskej kintekipachoua tlen kinpanoua innamik (1 Cor. 10:24).
Tla yolyamankej akinmej yomonamiktijkej, amo mokokoliskej uan mopaleuiskej ijkuak kipiaskej ouijkayotl. (Xikita párrafo 6).
6. ¿Tlen techmachtia tlen okijto Steven uan Stephanie?
6 Miakej tokniuan tlen yomonamiktijkej yolpakij porque yolyamankej. Se tokni tlen itoka Steven, okijto: “Tla kuali mouikaj akinmej yomonamiktijkej, mopaleuiskej ijkuak kipiaskej ouijkayotl. Amo kijtoskej ‘¿tlen nechpaleuis?’. Kijtoskej ‘¿tlen techpaleuis?’”. Isiua tokni tlen itoka Stephanie noijki ijkon mokuayejyekoua. Ye okijto: “Amikaj kineki yetos iuan akin kikokolia. Ijkuak tikpiaj ouijkayotl tikitaj tleka ijkon techpanoua. Timotlatlaujtiaj, timomachtiaj uan timotlapouiaj. Ijkon tikyektlaliaj ouijkayotl”. Okachi yolpakij akinmej yomonamiktijkej tla amo moueyinekij.
MA TIYETOKAN TIYOLYAMANKEJ IJKUAK TIKTEKICHIUILIAJ JEHOVÁ
7. ¿Tlen amo moneki kichiuas se tokni ijkuak okachi tlapaleuis itech tlanechikol?
7 Se ueyi tlateochiualistli tiktekichiuiliaj Jehová (Sal. 27:4; 84:10). Kuali tla se tokni okachi kineki kitekichiuilis Jehová. Biblia kijtoua: “Tla aka kineki kinyakanas n tokniwah non kineltokah Cristo Jesús, kuali tekitl kineki kichiwas” (1 Tim. 3:1). Pero amo ma moueyineki ijkuak kiluiskej okachi ma tlapaleui itech tlanechikol (Luc. 17:7-10). Moneki ma yeto yolyamanki ijkuak kinpaleuis tokniuan (2 Cor. 12:15).
8. ¿Tlen techmachtia tlen okipanok Diótrefes, Uzías uan Absalón?
8 Biblia kijtoua yiuejkika sekimej omoueyinekiayaj. Diótrefes amo okatka yolyamanki uan san okinekiaya tlanauatijtos (3 Juan 9). Uzías okiteititi omoueyinekiaya ijkuak okichi itlaj tlen Jehová amo okinauati (2 Crón. 26:16-21). Absalón san okijtouaya okintlasojtlaya oksekimej porque okinekiaya tlanauatis (2 Sam. 15:2-6). Nochi nin kiteititia Jehová amo kinselia akinmej moueyinekij (Prov. 25:27). Tlajyouiaj akinmej moueyinekij uan tlaixnekij (Prov. 16:18).
9. ¿Ken okipiaya iyelis Jesús?
9 Jesús amo omoueyinekiaya. Biblia kijtoua: “Maski Cristo okatka kemi Dios, [amo] okinekki omoteititi kemi Dios” (Filip. 2:6, Itlajtol Totajtzin Dios, [NSU]). Jesús ueyititok pero okachi ueyititok Jehová. Pero Jesús yolyamanki. Ye okinmilui imachtijkauan: “Akin amitla ipati nomonawak, ye akin okachi weyixtos” (Luc. 9:48). Tiyolpakij ijkuak tikatej iuan tokniuan precursores, siervos ministeriales, tlayekankej uan tlayekankej itech circuito tlen noijki yolyamankej ken Jesús. Ijkuak timotlasojtlaj oksekimej kitaj tiyolyamankej (Juan 13:35).
10. ¿Tlen tikchiuaskej tla tikitaj onka ouijkayotl itech tlanechikol uan amo kiyektlaliaj?
10 ¿Tlen tikchiuaskej tla tikitaj onka ouijkayotl itech tlanechikol uan amo kiyektlaliaj? Amo ma tikkualanikan, ma tiyetokan tiyolyamankej uan ma tikinpaleuikan tlayekankej (Heb. 13:17). ¿Tlen techpaleuis? Ma timotlajtlanikan: “¿Sapanoua oui ouijkayotl tlen tikixnamikij? ¿San niman moneki tikyektlaliskej? ¿Moneki ne nikyektlalis? ¿Nikneki san sekan ma yetokan tokniuan noso san nimoueyineki?”.
Tokniuan tlayekankej yolyamankej uan amo san kinmixmatij porque kimatij kichiuaskej miak tlamantli. (Xikita párrafo 11). *
11. Ijkon ken kijtoua Efesios 4:2, 3, ¿tlen panos tla tiyolyamankej ijkuak tiktekichiuiliaj Jehová?
11 Jehová amo kitlajtlachialtia tla tiixtlamatkej. Ye okachi kipatioita ma tiyetokan tiyolyamankej uan ma timouikakan iuan tokniuan. Ik non, ma tiyetokan tiyolyamankej ijkuak tiktekichiuiliaj Jehová. Ijkon titlapaleuiskej kuali ma mouikakan nochtin tokniuan (xiktlajtolti Efesios 4:2, 3). Nochipa ma titetlapouikan. Ma tikinpaleuikan oksekimej. Ma tikinselikan nochtin tokniuan uan amo san akinmej okachi kitekichiuiliaj Jehová (Mat. 6:1-4; Luc. 14:12-14). Ijkon oksekimej kitaskej tiyolyamankej uan amo san kitaskej tlen tikmatij tikchiuaj.
AMO MA TIMOUEYINEKIKAN IJKUAK ITLAJ TIKTLALIAJ ITECH INTERNET
12. ¿Kijtoua Biblia ma tikinpiakan toyolikniuan?
12 Jehová kineki ma tiyolpakikan iuan tofamiliares uan toyolikniuan (Sal. 133:1). Jesús noijki okinpiaya iyolikniuan (Juan 15:15). Biblia kijtoua toyolikniuan techpaleuiaj (Prov. 17:17; 18:24). Noijki kijtoua amo san toselti ma tiyetokan (Prov. 18:1). Sekimej kijtouaj itech Internet tikinmajsiskej miakej toyolikniuan uan ijkon amo toselti timomachiliskej. Pero ma timomaluikan ijkuak tiktekitiltiaj Internet.
13. ¿Tleka sekimej inselti momachiliaj uan moyolkokouaj ijkuak kitaj tlen oksekimej kitlaliaj itech Internet?
13 Ixtlamatkej kijtouaj inselti momachiliaj uan moyolkokouaj akinmej san kinmitaj fotos tlen kintlaliaj oksekimej itech Internet uan tlen kijkuilouaj. ¿Tleka? Porque kintlaliaj fotos kanin kualtsin motaj, katej iuan inyolikniuan uan kanin yopaxialotoj. Akinmej kinmitaj nonmej fotos xamo mokuayejyekouaj yejuan amitlaj kichiuaj. Se tokni tlen kipia 19 xiuitl, okijto: “Opejki nimoyolkokoua ijkuak onikitak oksekimej omoyolpaktiayaj itlamian semana uan ne san nokalijtik onimokauaya”.
14. ¿Ken techpaleuia 1 Pedro 3:8 kuali ma tiktekitiltikan Internet?
14 Internet techpaleuia ma timotlapouikan iuan tofamilia uan toyolikniuan. Pero miakej moueyinekij uan kitekitiltiaj para kintlajtlachialtiskej oksekimej. San kinekij ma kinmixmatikan. Sekimej tlauijuikaltiaj ijkuak itlaj kijkuilouaj itech Internet uan kinyolkokouaj oksekimej. Tejuan amo ijkon tikchiuaj. Moneki ma tiyetokan tiyolyamankej uan ma tikinmajsikamatikan oksekimej (xiktlajtolti 1 Pedro 3:8).
¿Kiteititia tiyolyamankej tlen tiktlaliaj itech Internet noso timoueyinekij? (Xikita párrafo 15).
15. ¿Ken techpaleuia Biblia amo ma timoueyinekikan?
15 Tla tiktlaliaj itlaj itech Internet, ma timotlajtlanikan: “¿Tlen kiteititia tlen nikijkuiloua, fotos tlen ompa nikintlalia uan videos? ¿Kiteititia nimoueyineki? ¿Kichiuas oksekimej ma tlaixnekikan?”. Biblia kijtoua: “Nochi tlan onka itech nin tlaltíkpaktli tokuerpo kelewia, toixtololowah noiwa kelewiah tlan kita, iwa tikneki[j] matechweyilikah, nochi noni amo wits de Dios, yej san itech nin tlaltíkpaktli” (1 Juan 2:16). Se amatlajkuilol tlen tlajtoua itech Biblia, kijtoua tlajtolmej “tikneki[j] matechweyilikah” kijtosneki “tiknekij okachi ma techpatioitakan”. Akinmej tikchiuaj ken Cristo amo tiknekij oksekimej ma techitakan okachi topati. Biblia kijtoua: “Amo matimoweyilikah, nion matimoxijxikokah iwan totlaneltokaikniwah” (Gál. 5:26). Tla tiyolyamankej, amo timoueyinekiskej ken kichiuaj akinmej amo kitekichiuiliaj Jehová.
MA TIMOKUAYEJYEKOKAN KEN TOTAJTSIN DIOS KINEKI
16. ¿Tleka amo tiknekij timoueyinekiskej?
16 Moneki ma tiyetokan tiyolyamankej porque akinmej moueyinekij amo mokuayejyekouaj ken toTajtsin Dios kineki (Rom. 12:3). Yejuan san mokualaniaj iuan oksekimej uan san kintekipachoua tlen yejuan kinekij. Tlen mokuayejyekouaj uan tlen kichiuaj kinmijtlakoua uan noijki oksekimej. Kinmijtlakos Satanás tla amo kipatlaskej inyelis (2 Cor. 4:4; 11:3). Pero kuali mokuayejyekouaj akinmej yolyamankej. Amo moueyinekij uan kinmitaj oksekimej okachi ueyititokej (Filip. 2:3). Kimatij toTajtsin Dios “kinmixnamiki non moweyijkatlaliah, pero kintiochiwa non moiknomatih inawak” (1 Ped. 5:5). Akinmej yolyamankej amo kinekij ma kinmixnamiki toTajtsin Dios.
17. ¿Tlen moneki tikchiuaskej tla tiknekij tiyetoskej tiyolyamankej?
17 Tla tiknekij tiyetoskej tiyolyamankej, moneki tikchiuaskej tlen kijtoua Biblia: “Ayakmó ximokajkayawakah, porke nomejwah yononkikajkeh tlan achto onomechyolijtlakoaya iwa yononmoyankuilijkeh”. Moneki timochijchikauaskej timomachtiskej tla tiknekij tikchiuaskej ken Jesús (Col. 3:9, 10; 1 Ped. 2:21). Sapanoua techpaleuis tla ijkon tikchiuaskej. Tla tiyolyamankej, yolpakiskej akinmej inmiuan tichantij, nochtin tokniuan kuali mouikaskej uan kuali tiktekitiltiskej Internet. Ijkon toTajtsin Dios techteochiuas uan techselis.
TLAKUIKALI 117 Ma tikchiuakan tlen kuali
^ párr. 5 Axkan miakej moueyinekij uan tlaixnekij, ik non, moneki ma timomaluikan para amo ijkon tikpiaskej toyelis. Itech nin tlamachtil tikitaskej eyi tlamantli tlen techititia keman moneki tiyetoskej tiyolyamankej.
^ párr. 2 TLEN OKACHI IPATI: Akin moueyineki san kitekipachoua tlen kineki kipias uan amo kitekipachoua tlen kinpanoua oksekimej. Pero akin yolyamanki amo moueyineki nion tlaixneki uan kitekipachoua tlen kinpanoua oksekimej.
^ párr. 56 FOTOS: Se tlayekanki tlamachtia itech se ueyi nechikol, kinpaleuia tokniuan ma tekipanokan, kinyekana tokniuan tlen tetlapouitiuij uan noijki tlachipaua kanin timonechikouaj.
