1. ¿Tlenon techijlia Filipenses 2:3, niman kenon techpaleuis tla tikchiuaj tlen ompa kijtoua?

AKIN tiktekichiuiliaj Jehová tiyolyemankej niman tiktlakamatij tlen technauatia. Ijkon tikchiuaj pampa tikasikamatij ika yejua nochipa kimatstika tlenon más techpaleuis (Efes. 4:22-24). Pampa tiyolyemankej, kachtopa tikchiuaj tlen toTajtsin kineki niman tiknemiliaj ika oksekimej más uejueyixtokej xken tejuamej. Yejuin kichiua kuajli matouikakan iuan Jehová niman tokniuan (xpoua Filipenses 2:3).

2. a) ¿Tlenon kasikamatiya apóstol Pablo? b) ¿Tlenon tikitaskej ipan yejuin tlamachtijli?

² Tla xtotlajpiyaj, kanaj peuas tikchiuaskej ken miyekej akin noyekanaj ken Satanás, yejuamej noueyimatij niman san intech tlanemiliaj. * Nesi ika sekimej tokniuan akin onenkej ipan kachtopa siglo yopeujkaj ijkon kichiuayaj, ika yejon, apóstol Pablo okijli tlanechikojli tlen onkatka Roma: “Yejua ika nemechijlia nochimej nemejuamej, maka sano nemejuamej xnemilikan ika más nenuejueyixtokej hasta nenteyakapanauiyaj. Yej ikan nemotlamachilis xtlanemilikan melajki ken noneki nennemiskej” (Rom. 12:3). Pablo kasikamatiya ika xtlajtlakojli tla totlasojtlaj san ken kinamiki. San ika, san uelis totlasojtlaskej ken kinamiki tla tiyolyemankej. Ipan yejuin tlamachtijli,  tikitaskej ika tla tiyolyemankej, xtiknekiskej toueyimatiskej 1) ipan tonamiktilis, 2) ijkuak tikpiyaskej se tekitl ipan ikalpan Jehová niman 3) ijkuak tikintekitiltiskej redes sociales.

3. a) ¿Tleka akin yononamiktijkej kipiyaj tlauejli? b) ¿Tlenon kichiuaj sekimej ijkuak ijkon inpan nochiua?

³ Jehová kineki ika akin yononamiktijkej mayolpakikan. San ika, pampa tinochimej titlajtlakolejkej, kemantika onias tlauejli. Pablo okijto ika akin nonamiktiaj “tlajtlamach kimpajsoloua” (1 Cor. 7:28). Sekimej tokniuan akin yononamiktijkej kimachiliaj ika nochipa nokualanijtokej, niman kanaj kinemiliaj ika xkeman uelis notlajtolnamikiskej. Tla peuaj tlanemiliaj ken akin xkitekichiuiliaj Jehová, kuakon, san intech tlanemiliskej niman kinekiskej nokauaskej.

4. ¿Tlenon xnoneki tiknemiliskej?

⁴ Maka matiknemilikan ika xkeman uelis tiyolpakiskej iuan toixnamik. Kuajli tikmatstokej ika Biblia kijtoua ika san uelis tijkauaskej toixnamik tla yejua auilnemi (Mat. 5:32). Kuakon, ijkuak tikixnamiktoskej tlen ouijtika, ijkon ken okijto Pablo, maka matoueyimatikan nion matiknemilikan: “Noixnamik xkita tlen nejua nechpoloua. Xnechtlasojtla ken nejua nechnamiki. Kanaj más niyolpakiskia iuan yakaj okse”. ¡Melak xkuajli tla ijkon titlanemiliskiaj! Akin ijkon kichiua, san itech tlanemilijtika. Akin xkitekichiuiliaj Jehová techijliskej matikchiuakan tlen kineki toyojlo niman tlen tikitaskej ika techyolpaktis. Hasta kanaj techijliskej matijkauakan toixnamik. San ika, akin noyekanaj ijkon ken toTajtsin kineki, xsan intech tlanemiliaj (Filip. 2:4). Jehová xkineki matijkauakan toixnamik, yejua kineki san sekan iuan matinemikan (Mat. 19:6). Yejua kichia matitlanemilikan ijkon ken yejua, niman maka san totech matitlanemilikan.

5. Ken kijtoua Efesios 5:33, ¿tlenon noneki kichiuaskej akin yononamiktijkej?

 ⁵ Akin yononamiktijkej noneki notlasojtlaskej niman notlakaitaskej (xpoua Efesios 5:33). Biblia techyolchikaua matokojtilikan tikinpaleuiskej oksekimej niman maka san matikchiakan matechpaleuikan (Hech. 20:35). ¿Tlenon kinpaleuis akin yononamiktijkej manotlasojtlakan niman manotlakaitakan? Noneki yolyemankej yeskej. Tla ijkon kichiuaj, nochipa kinekiskej kitejtemoskej “on tlen kuajli” niman ijkon kuajli nemiskej iuan imixnamik (1 Cor. 10:24).

6. ¿Tlenon tiuelij itech tlen kijtouaj Steven niman Stephanie?

⁶ Miyekej tokniuan akin yononamiktijkej melak yolpakij pampa nokojtiliaj yolyemankej yeskej. Matikitakan tlen okijto se tokniuj akin itoka Steven: “Tla akin yononamiktijkej san sekan nopaleuiyaj, uelis kixnamikiskej maski san katlejua tlauejli. Yejuamej xkinemiliskej ‘¿tlenon más nechyolpaktis?’, yej kinemiliskej ‘¿tlenon más techyolpaktis?’”. Isiuauj, akin itoka Stephanie, noijki ijkon tlanemilia. Yejua kijtoua: “Xakaj kuelitaskia chantis iuan yakaj akin nochipa teixnamiktok. Ijkuak tejuamej xtotlajtolnamikij, tokojtiliaj tikasikamatiskej tleka ijkon panoua. Kuakon, tikchiuaj teoyotl, tiktejtemouaj ipan Biblia tlen uelis techpaleuis niman tonojnotsaj. Xtotlauelitaj ijkuak tikpiyaj se tlauejli, yej tokojtiliaj tikyektlaliskej yejon tlauejli”. Akin yononamiktijkej uelis melak yolpakiskej tla nion se xkinemilia ika más ueyixtika xijkon ken ixnamik.

7. ¿Tlenon xnoneki kichiuas se tokniuj tla kiselia se tekitl ipan ikalpan toTajtsin?

⁷ Tejuamej melak techyolpaktia chikauak tiktekichiuiliskej Jehová (Sal. 27:4; 84:10). Melak teyolpakti ijkuak se tokniuj kineki más tlapaleuis ipan ikalpan Jehová. Biblia hasta kijtoua ika tla se kineki tekitis ken tlayekanketl ipan tlanechikojli, “sanoyej kuajli on tekitl yejuan kineki kichiuas” (1 Tim. 3:1). San ika, tla kiselia se tekitl ipan ikalpan toTajtsin, xnoneki noueyimatis (Luc. 17:7-10). Nochipa noneki kilnamikis ika kipiya ika kinpaleuis tokniuan ika yolyemanilistli (2 Cor. 12:15).

8. ¿Tlenon tiuelij itech Diótrefes, Uzías niman Absalón?

⁸ Biblia kinteneua sekimej tlakamej akin melak onoueyimatkej. Se akin ijkon okichiuj katka Diótrefes, akin noueyimatiya niman san yejua kinekiya makitlakaitakan (3 Juan 9). Uzías noijki onoueyimat pampa kinekiya kichiuas se tekitl tlen Jehová xokinauatijka (2 Crón. 26:16-21). Niman Absalón okiyejyeko kinyolpaktis israelitas pampa kinekiya makitlapejpenikan ken tekiuaj (2 Sam. 15:2-6). Tlen inpan onochiuj yejuin tlakamej techititia ika Jehová xkuelita ijkuak yakaj kineki makiueyikaitakan (Prov. 25:27). Akin noueyimatij niman miyek tlemach kitejtemouaj, xkuajli onkisaj (Prov. 16:18).

9. ¿Tlenon tiuelij itech Jesús?

⁹ Jesús xnoueyimati ken yejuin tlakamej akin yotikinteneujkej. Biblia kijtoua ika maski onen ne iluikak iuan toTajtsin, xokinemili tla ueliskia kitekipatlas niman ueyixtos ken yejua (Filip. 2:6, TNM). Kema, Jesús xnoueyimati maski yejua ika ome akin más ueyixtika. Yejua okimijli inomachtijkauan: “On yejuan más xueixtikaj nemotsajlan, on yejua más ueyixtias” (Luc. 9:48). Melak techyolpaktia titekitiskej imiuan tokniuan precursores, tlayekankej, tlapaleuijkej, niman tlayekankej ipan circuito akin nokojtiliaj yolyemankej yeskej ijkon ken Jesús. Ijkuak tiyolyemankej, tikteititiaj yejon tlasojtlalistli tlen noneki kipiyaskej akin nemij ipan ikalpan toTajtsin (Juan 13:35).

10. ¿Tlenon noneki tikchiuaskej tla tiknemiliaj ika xitlaj nochiujtika niman ijkon noyektlalis se tlauejli tlen onka ipan tlanechikojli?

 ¹⁰ ¿Tlenon noneki tikchiuaskej tla tiknemiliaj ika xitlaj nochiujtika niman ijkon noyektlalis se tlauejli tlen onka ipan tlanechikojli? Noneki tiyolyemankej yeskej niman xtikintejteneuaskej tlayekankej, yej tikinpaleuiskej (Heb. 13:17). ¿Tlenon techpaleuis ijkon matikchiuakan? Uelis totlajtoltiskej: “¿Yemelak sajnoye ueyi yejon tlauejli tlen nikita? ¿Noneki noyektlalis amantsin? ¿Nechnamiki nejua nikyektlalis? ¿Tleka nikneki manoyektlali: pampa nikneki ika tokniuan kuajli manemikan noso pampa nikneki manechueyiteneuakan?”.

11. Ken kijtoua Efesios 4:2, 3, ¿tlenon panos tla tiyolyemankej ijkuak tiktekichiuiliaj Jehová?

¹¹ ¿Tiueltokej tikchiuaj miyek tlemach? Yejon melak kuajli, san ika, maka matikilkauakan ika Jehová más kipatiojkaita ijkuak tejuamej tiyolyemankej niman ijkuak titlapaleuiyaj ika tinochimej san sekan matinemikan. Ika yejon, matokojtilikan tiyolyemankej yeskej ijkuak tiktekichiuiliskej Jehová. Tla ijkon tikchiuaj, totlanechikol san sekan nemis (xpoua Efesios 4:2, 3). Chikauak matitenojnotsakan. Matikchiuakan tlen kuajli inpampa oksekimej. Nochimej kuajli matikinselikan, niman maka san akin kipiyaj se tekitl ipan tlanechikojli (Mat. 6:1-4; Luc. 14:12-14). Tla tikchiuaj nochi yejuin, oksekimej xsan kitaskej tlen tiuelij tikchiuaj, noijki kitaskej ika tiyolyemankej.

12. Itech tlen kijtoua Biblia, ¿kuajli tla tikinpiyaj amigos?

¹² Jehová kineki matiyolpakikan imiuan toamigos niman tochanejkauan (Sal. 133:1).  Jesús noijki okinpix iamigos (Juan 15:15). Biblia techijlia kenon techpaleuiya tla tikinpiyaj amigos (Prov. 17:17; 18:24). Noijki techijlia ika noneki tikxeloskej tiempo niman ijkon tinemiskej imiuan tokniuan (Heb. 10:24, 25). Miyekej kinemiliaj ika redes sociales tepaleuiyaj maka toselti matomachilikan pampa ompa uelis tikinnextiskej miyekej toamigos. San ika, tla tikinkuij redes sociales, noneki totlajpiyaskej.

13. ¿Tleka sekimej akin kikuij redes sociales uelis inselti nomachiliskej niman noyolajmanaskej?

¹³ Miyekej ixtlamatkej yokitakej ika akin nochipa kimitstokej tlaixkopinaltin tlen oksekimej kintlejkoltiaj noso tlen oksekimej kijkuilouaj ipan redes sociales, uelis inselti nomachiliskej niman noyolajmanaskej. ¿Tleka? Pampa miyekej kintlejkoltiaj tlaixkopinaltin kampa nesi kenon melak oyolpakej, kampa yejuamej melak kualtsin nesij, kampa nemij imiuan iminamigos niman kampa yopaxalotoj. Akin kimitaj yejon tlaixkopinaltin uelis kinemiliskej ika yejuamej xijkon yolpakij. Se tokniuj siuatl akin kipiya 19 xiuitl kijtoua: “Opeuj ninoyolajmana ijkuak onikitak kenon sekimej melak noyolpaktiayaj ipan itlamiyan semana niman nejua nochipa san nochan ninemiya”.

14. ¿Kenon techpaleuiya 1 Pedro 3:8 kuajli matikintekitiltikan redes sociales?

¹⁴ Yemelak, redes sociales uelis techpaleuiskej matitlajtokan imiuan tochanejkauan niman toamigos. San ika ¿yotikitakej ika miyekej itlaj kitlejkoltiaj ipan redes sociales san pampa kinekij noueyimatiskej? Yejuamej kentla kijtojtoskiaj: “Xnechitakan”. Niman sekimej san tlemach kijkuilouaj itech intlaixkopinaluan noso intech intlaixkopinaluan oksekimej. Akin kichiuaj yejuin, xkichiujtokej ken toTajtsin techititia, yejua techijlia matiyolyemankej niman matiteasikamatikan (xpoua 1 Pedro 3:8).

15. ¿Kenon techpaleuiya Biblia maka matoueyimatikan?

¹⁵ Tla tikintekitiltiaj redes sociales, matotlajtoltikan: “¿Kuajli niknemilia tlenon nikijkuilos niman tlen tlaixkopinaltin niman videos nikintlejkoltis? ¿Uelis kinemiliskej oksekimej ika ninoueyimati? ¿Kichiuas manechnexikolitakan?”. Biblia kijtoua: “On xkuajli eleuilistli yejuan tonakayo kipiya, niman on tlen xkuajli yejuan tikixpakaitaj, niman nochi  on tlajtlamach tlen tikpiyaj yejuan kichiua para yejua ika ma titoueyimatikan, xkisa itech toTajtsin, yej kisa ipan in tlaltikpaktli” (1 Juan 2:16). Akin tiktekichiuiliaj Jehová xtiknekij ika oksekimej matechueyiteneuakan. Tejuamej tiknekij tikchiuaskej tlen techijlia Biblia, kampa kijtoua: “Maka ma titoueyimatikan. Maka ma titokualanikan inuan oksekimej, nion maka ma titonexikolitakan inuan oksekimej” (Gál. 5:26). Tla tiyolyemankej, xtiknekiskej toueyimatiskej ken miyekej akin xkiueyichiuaj Jehová.

16. ¿Tleka xtiknekij toueyimatiskej?

¹⁶ Melak noneki matiyolyemankej pampa akin noueyimatij xtlanemiliaj “ken noneki” (Rom. 12:3). Yejuamej kichiuaj maonia tlauejli niman san intech tlanemiliaj. Ipampa ken tlanemiliaj niman ipampa tlen kichiuaj, san no yejuamej noijtlakouaj niman noijki kimijtlakouaj oksekimej. Tla xkipatlaj ken tlanemiliaj, Satanás kuajli kintlamachilispolos (2 Cor. 4:4; 11:3). San ika, akin yolyemankej xijkon kichiuaj, yejuamej tlanemiliaj ken noneki. Yejuamej noitaj san ken kinamiki niman kasikamatij ika oksekimej más uejueyixtokej (Filip. 2:3). Noijki kimatstokej ika “Dios xkinselia on yejuan noueyimatkej, pero yejua kimpaleuiya ikan iteiknelilis on yejuan yolyemankej” (1 Ped. 5:5). Akin tlanemiliaj ken noneki, xkuelitaskiaj ika toTajtsin maka makinseli.

17. ¿Tlenon noneki tikchiuaskej tla tiknekij nochipa tiyolyemankej yeskej?

¹⁷ Tla tiknekij nochipa tiyolyemankej yeskej, noneki tijkauaskej tlen achto tikchiuayaj niman tikseliskej “yenkuik nemilistli”. Ijkon techijlia Biblia. Noneki tokojtiliskej tla tiknekij tikchiuaskej yejuin, pampa nonekis tomachtiskej itech Jesús niman tikchiuaskej ken yejua okichiuj (Col. 3:9, 10; 1 Ped. 2:21). San ika, melak kuajli tinemiskej tla ijkon tikchiuaj. Tla tokojtiliaj tiyolyemankej yeskej, tochanejkauan yolpakiskej, tlanechikojli san sekan nemis niman kuajli tikintekitiltiskej redes sociales. Niman, tlen más ueyi kijtosneki, tikyolpaktiskej Jehová niman tikseliskej itlateochiualis.