1. Aʼoh éʼétʼée dooígi éí Philippians 2:3 haitʼéego hazhóʼó kʼé hwiindzin doo ní?

AʼOHGO áʼdííníilzingo Jiihóvah bibee óʼoolʼįįłjí nihá yáʼátʼééh lágo baa ákoniidzin. (Eph. 4:​22-24) Nihí íiniidzinii biláahdi Jiihóvah íiníziniijígo índa náánáłaʼ nihiláahdi ádaatʼéego baa nitsíikeesgo éí aʼohgo ániitʼé. Áko Jiihóvah índa bił yaa anéijahígíí baa nihił hózhǫ́ǫgo bił kʼéʼahidiiʼníi doo.—Philippians 2:3 yíníłtaʼ.

2. Yilʼaadii Paul éí haʼátʼíí nihiłní, áádóó haʼátʼíí baa nídadíitʼįįł?

² Doo baa áhwiilyą́ą́góó bił kééhwiitʼíinii ayóó ádaa dahaʼniih índa tʼáá shí tʼéí danízinii beʼiilʼı̨́ diidleełgoda átʼé. * First century C.E. yę́ędą́ą́ʼ, díí łaʼ nidabiníłtłʼa ńtʼééʼ. Áko yilʼaadii Paul éí Rome dineʼé yichʼįʼ íʼiilaago ání: “Nihitahgóó tʼááłáʼí nootínígo tʼáadoo aláahgo ádaa nitsídaahkeesí doo, nidi . . . hazhóʼó ádaa nitsídaahkees doo.” (Rom. 12:3) Díí éí hazhóʼó ádaa siitiʼ doogo ááhyiłní. Aʼohgo éʼétʼé binahjįʼ ayáhígo ádaa nitsíikees doogo yee nihíká análwoʼ. Tááʼ hazʼą́ągo éí tʼáadoo ayóó ádaa nitsíikeesí dooleełgi baa nídadíitʼįįł. Éí (1) ahéʼéskéegi, (2) Jiihóvah bá neiilʼaʼgi, dóó (3) social media choolʼı̨́įgi ádaatʼéii.

3. Ahéʼéskéegi haʼátʼíí biniyé saad náhádleeh doo, áádóó łaʼ éí haitʼéego ádaʼaleʼ?

³ Jiihóvah éí ahastiin índa eʼasdzą́ą́ ałhaa bił hózhǫ́ǫ doo nízin. Tʼáá áníiltso ndaʼayiilzííh, áko saad náhádleeh dooleełgo tʼáá bikʼíhwiilzhíish doo. Yilʼaadii Paul éí daʼohéehii nihichʼįʼ nidahwiiʼnáa dooleeł níigo áʼiilaa. (1 Cor. 7:28) Ahéskéhígíí łaʼ áłahjįʼ ałchʼįʼ saad hólǫ́ǫgo haʼátʼíí lá biniyé ahidiitʼáázh nízin łeh. Tʼáá shí tʼéí shił hózhǫ́ǫ doo nízingo nitsékeesii éí diné nitsídaakeesígi átʼéego tʼóó ałtsʼáádiitʼashjí nihá yáʼátʼééh nízin doo.

4. Haʼátʼíí tʼáadoo niidziní doo?

⁴ Ahísiilkéegi doo nihá bohónéedzą́ą da silı̨́ı̨́ʼ tʼáadoo niidziní doo. Diyin Bizaad áníigo éí tʼóó baaʼihígi átʼéego ałhaa naʼadá ádaatʼéii tʼéiyá biniinaa ałtsʼáʼdootʼash. (Matt. 5:​32, New World Translation) Áko Paul achʼįʼ nahwiiʼnáa doo níigo chʼíiníʼánę́ę bee nihikʼíhoolzhiizhgo éí ádaa hwiiʼniihgo tʼáadoo kótʼéego nitsíikeesí doo: ‘Shichʼooní doo shaa áhályą́ą da, índa doo ayóóʼáshóʼníi da. Náánáłaʼda daatsʼí shił hóshǫ́ǫ doo.’ Kótʼéego nitsíikeesgo éí tʼáá nihí tʼéí ádaa nitsíikees. Éí azhą́ ahéʼéskéegi nidootʼih ndi, diné nitsídaakeesgo éí tʼáá ni nił hóshǫ́ǫ dooleełígíí biʼílééh daaníi łeh. Diyin Bizaad ání: ‘Tʼáá ádíighahígo tʼáadoo leʼé tʼáadoo ádá baa nitsídaahkeesí, ndi náánáłaʼ ałdóʼ baa nitsídaahkees.’ (Phil. 2:4) Jiihóvah éí tʼáá ahísółkée doo nízin, ałtsʼáʼátʼash éí ndagaʼ. (Matt. 19:6) Bíjí áłtsé baa tsídidííkos nízin, ní éí akééʼdóó.

5. Ephesians 5:33 éí ahastiin dóó eʼasdzą́ą́ haitʼéego ałhaa nitsíjíkees doo ní?

⁵ Ahastiin dóó eʼasdzą́ą́ ayóóʼáhijóʼní  índa ahił jídlı̨́į doo. (Ephesians 5:33 yíníłtaʼ.) Diyin Bizaad éí tʼáadoo leʼé azhʼníláii éí haa yílyáii biláahdi átʼé níigo naʼnitin. (Acts 20:35) Ahíjískéhígíí éí haʼátʼíí bee ájítʼéego ayóóʼóʼóʼní índa ahił ídlı̨́ yee háká análwoʼ doo? Éí aʼohgo éʼétʼé. Ákójítʼéego éí tʼáá hó há yáʼátʼéeh dooleełii doo bee ádaa nitsíjíkees da, ndi ‘náánáłaʼ bá baa nitsídzíkees.’—1 Cor. 10:24.

6. Steven dóó Stephanie áníigi haʼátʼíí bitsʼą́ą́dóó bíhooʼaah?

⁶ Aʼohgo éʼétʼéii binahjįʼ Oodlání ahínaaskéhígíí bił dahózhǫ́ǫgo bá áyósin. Ahastiin Steven joolyéego ájíní: “Tʼááłaʼ jílı̨́įgo éí ahił nijilnish doo, anáhóótʼiʼ haleehgo íiyisíí. ‘Haʼátʼíí lá shá yáʼátʼééh?’ tʼáadoo nínízinígo, ‘Haʼátʼíí lá nihá yáʼátʼééh?’ nínízin.” Beʼasdzą́ą́ Stephanie tʼáá ákótʼéego nitsékeesgo ání: “Biniinaa saad haleehii hazhóʼó baa néitʼįįh. Áádóó sodiilzįįh, bídadéétʼiʼii neilkah, áádóó baa yéiltih. Saad hólǫ́ǫgo tʼáágééd éí anáhóótʼiʼ áʼiilaaígíí hashtʼeilʼįįh.” Shíyeeʼ alááh áníshtʼé tʼáadoo jinízinígo éí tʼáá ájíłah hoł hózhǫ́.

7. Brother łaʼ Jiihóvah bá naʼaʼaʼgi naanish haa ditʼáahgo haitʼéego baa nitsíjíkees doo?

⁷ Jiihóvah bá neiilʼaʼgo éí ílíinii átʼéego baa nitsíikees. (Ps. 27:4; 84:10) Brother łaʼ Jiihóvah hózhǫ́ yéigo bá naashʼaʼ doo nízingo éí yáʼátʼéehii átʼé. Diyin Bizaad ání: “Diné łaʼ oodlání yá sizíinii deeshłeeł jinízingo, naanish tʼáá íiyisí yáʼátʼéehii jinízingo átʼé.” (1 Tim. 3:1) Ákondi naanish haa ditʼáahgo, kʼad diné ílíinii nishłı̨́ doo jinízin da doo. (Luke 17:​7-10) Aʼohgo ájítʼéego nijilʼaʼgi biniyé ájítʼı̨́į doo.—2 Cor. 12:15.

8. Daiyátrifiiz, Azáíyah, dóó Ábsalam haʼátʼíí bitsʼą́ą́dóó bídahwiilʼaah?

⁸ Diyin Bizaad éí diné łaʼ ayóó átʼéego ádaa nitsídaakees ńtʼéeʼii yaa halneʼ. Daiyátrifiiz éí doo aʼohgo ádólzingóó Oodlání áłah nádleehgi “aląąjįʼ naʼídíltʼeʼgo” bił yáʼátʼééh. (3 John 9) Azáíyah ádaa haʼniihgo Jiihóvah éí naanish doo haidiníʼáanii ájiilaa. (2 Chron. 26:​16-21) Ábsalam éí naatʼáanii deeshłeeł nízingo diné nídahodidoołtééł biniyé tʼóó áhodilʼı̨́įgo ayóóʼáyóʼníí ńtʼééʼ. (2 Sam. 15:​2-6) Díí baa dahaneʼgo Jiihóvah éí diné ayóó átʼéego ádaa nitsídaakeesii doo bił yáʼátʼéeh dago ííshjání ííłʼı̨́. (Prov. 25:27) Ádaa hodzódlíii índa ádaa haʼniihii éí ádihodiiltʼih.—Prov. 16:18.

9. Jesus éí haitʼéego nihinááł áʼiilaa?

⁹ Ndi Jesus baa nitsíníkees, éí “Diyin God bináłtʼéii jílı̨́, ndi Diyin God tsʼídá bił ahijíłtʼée dooleełgi tʼáadoo baa tsízdeezkéez da.” (Phil. 2:​6, NW) Jiihóvah éí halááh ábóodziilgo doo bilááh ájítʼéego nitsíjíkees da. Bídahoołʼaahii ííłní: “Nihitahgóó tʼáá háiida tʼáá aʼohgo ájítʼéhígíí, éí ayóó átʼéii jílı̨́.” (Luke 9:48) Pioneers, ministerial servants, elders, índa circuit overseers éí Jesus nahalingo aʼoh ádaʼdólzingo bił deíníilníishgo bee akʼihojidlí! Aʼohgo ániitʼéego éí ayóóʼóóʼní bee ííshją́ą́ ádííníilzin. Jesus áníigo éí Diyin bá ndaalʼaʼí ayóóʼádaʼahijóʼníi doo.—John 13:35.

10. Congregationgi anáhóótʼiʼ índa elders doo hazhóʼó yaa nídaatʼı̨́į dago haa díínííł?

¹⁰ Congregationgi anáhóótʼiʼ índa elders doo hazhóʼó yaa nídaatʼı̨́į da nahalingoshąʼ? Tʼáadoo saad honíłónígo tʼóó aʼoh ánítʼéego aląąjįʼ naazíinii bikʼeh ánítʼé. (Heb. 13:17) Ákóniitʼée dooleełgo díí baa nitsíníkees: ‘Anídahaztʼiʼgi  éí yéigo átʼéegoósh biniinaa tsı̨́įłgo hashtʼedoolnííł? Kʼadísh hashtʼedooníiłgo bíighah? Hashtʼedoolníiłgi éísh shí shąąh silá? Congregationgi łáʼí ídlı̨́į doogo doodaiiʼ tʼáá shí ádá ashtʼı̨́?’

11. Ephesians 4:​2, 3 éí Jiihóvah bá neiilʼaʼgo aʼoh éʼétʼéego haitʼéego áká adoolwoł ní?

¹¹ Aʼohgo éʼétʼé éí deiichįįhii biláahdi áádóó tʼááłaʼí ídlı̨́ éí tsı̨́įłgo łaʼ daalneʼjí biláahdi Jiihóvah ílı̨́įgo yaa nitsíkees. Aʼohgo ánítʼéego tʼáá bíninilʼánígi Jiihóvah bá nanilʼaʼ. Kónítʼı̨́įgo congregationgi łáʼí ídlı̨́įgo kʼé bee daʼahííníitąʼ doo. (Ephesians 4:​2, 3 yíníłtaʼ.) Dahootahgóó tʼáá ahą́ą́h nahólneʼ. Yáʼádaatʼéehii bee áká anánílwoʼ. Tʼáá ałtso bichʼįʼ nił hadleeʼ, congregationgi naanish doo bąąh naazláii ałdóʼ. (Matt. 6:​1-4; Luke 14:​12-14) Aʼoh éʼétʼéego brothers índa sisters bił nanilnishgo yinichįįhii índa aʼohgo ánítʼéegi yee naa ákodanízin doo.

12. Diyin Bizaadísh éí nihikʼis hólǫ́ǫgi nihá yáʼátʼééh nihiłní? Łaʼ baa hólneʼ.

¹² Jiihóvah éí nihighan hazʼą́ą́dóó bił ahee nídaʼdiildįįł nihá yinízin. (Ps. 133:1) Jesus éí bikʼis yáʼátʼéehii hólǫ́ǫ́ ńtʼééʼ. (John 15:15) Diyin Bizaad éí áhánígo kʼé hóʼníinii hólǫ́ǫgo háká adoolwoł níigo yaa halneʼ. (Prov. 17:17; 18:24) Áádóó ałdóʼ áníigo tʼáá sahdii naʼázhdiiltéego doo há yáʼátʼéeh da. (Prov. 18:1) Social media beego éí shikʼis tʼóó ahayóí hólǫ́ índa doo tʼáá shí tʼéiyá danízingo nitsídaakees da. Ákondi social media chooʼı̨́įgi bee ádaa áhwiilyą́ą doo.

13. Social media chodayoołʼínígíí haʼátʼíí biniinaa doo bił dahatsʼíid da nidahaleeh índa bąąh nidahwiiłkaad?

 ¹³ Nideiłkaahgo diné tʼáá áłahjįʼ social media dabikáaʼii dóó adahaskid deinéłʼínígíí éí doo bił dahatsʼíid da nidahaleeh índa bąąh nidahwiiłkaad. Haʼátʼíí biniinaa? Social media biiʼjįʼ éí diné baa bił dahózhóonii, bił nilı̨́įgo adabiʼdiiskidii, bikʼis danilíinii, dóó baa honeenigóó tádadookaii nideiłkid łeh. Łaʼda kódaatʼéhígíí yinéłʼı̨́įgo, shígaʼ éí sheʼiinaʼ doo bóhoneedlı̨́į da dínóozįįł. Nihisister łaʼ 19 binááhaigo ání: “Néshʼı̨́įgo łaʼ honeeni yaa ndaakaigo áádóó tʼóó doo shił hatsʼíídgóó ánáshiilʼįįh.”

14. 1 Peter 3:8 éí social media chooʼı̨́įgi haitʼéego yee nihíká análwoʼ?

¹⁴ Social media éí yáʼátʼéehgo chooʼı̨́į doogo átʼé. Éí binahjįʼ haneʼ ałchʼįʼ íilʼı̨́į łeh. Ákótʼée ndi, baa ákoninizı̨́ı̨́ʼ shı̨́ı̨́, social media biiʼjįʼ łaʼda éí yáʼátʼéehgo bidiʼnélʼı̨́į doo biniyé yikʼi nideinil. “Shoo dashinółʼı̨́” daaní nahalin. Łaʼ éí adabiʼdiiskidígíí saad doo yáʼátʼéehii yikʼi nideinil doodaiiʼ náánáłaʼda doo yáʼátʼééhgóó yá hadahadziih. Oodlání danilíinii éí aʼohgo ahaa nitsídaakees índa ahaa aʼááh danohsin dabidiʼní, áko doo yáʼádaatʼéehii éí social media doo bee choizhdoołʼįįł da.—1 Peter 3:8 yíníłtaʼ.

15. Diyin Bizaad éí ádaa haʼniih bitsʼąą éʼétʼée dooleełgi haitʼéego nihíká análwoʼ?

¹⁵ Social media choiníłʼı̨́ı̨́ ládą́ą́ʼ díí baa nitsíníkees: ‘Saad ádaashłeʼgo, adahaskidígíí doodaiiʼ videos bikʼi neheeshníiłgo, tʼóósh bee ádaa hashʼniih nahalin? Náánáłaʼda daatsʼí yaa łeʼ danízingo nitsídaakees?’ Diyin Bizaad ání: “Háálá nihokááʼ bił nidahaztʼiʼii tʼáá ałtso, atsʼíís yidánoolníinii, áádóó anááʼ yidánoolníinii áádóó iiná bee ádaa hodzódlíii éí doo aTaaʼ bitsʼą́ą́dę́ę́ʼ ádaatʼée da, nidi nihokááʼdóó ádaatʼé.” (1 John 2:16) “Iiná bee ádaa hodzódlíii” bikáʼígi “ílíinii jílı̨́įgo bee hodiʼnélʼı̨́” ní Diyin Bizaad nideizoígíí łaʼ. Oodlání danilíinii éí yáʼátʼéehgo shidiʼnélʼı̨́ doo danízin da. Éí Diyin Bizaad biiʼdóó, “Haaʼíshąʼ tʼáadoo doo ádadiilkóhí doo, tʼáadoo ałkʼee dadiniiʼniihí  doo, índa tʼáadoo daʼahiilchʼı̨́dí doo,” nínígíí yikʼehgóó deíkááh. (Gal. 5:26) Aʼohgo ániitʼéego éí diné ádaa dahaʼniihgo yáʼátʼéehii bee shidiʼnélʼı̨́ danízinii doo beʼiilʼı̨́į da doo.

16. Haʼátʼíí biniyé ádaa hodzódlí bitsʼąą ániitʼée doo?

¹⁶ Aʼohgo ániitʼéego bineilnish doo. Ádaa dahaʼniihii doo “hazhóʼó ádaa nitsídaahkees” da. (Rom. 12:3) Diné ádaa dahaʼniihii éí ałchʼą́ą́h nidaaʼnaʼ dóó ádaa dadzódlí. Díí binahjįʼ nitsídaakeesgi índa ádaatʼįįłgi, tʼáá bí dóó náánáłaʼ yee yidahodiiłtʼih. Doo ádaa áhojilyą́ą́góó éí ádaa haʼniih ntsáhákees bee Séítan hániʼ yidínóołtłʼah. (2 Cor. 4:4; 11:3) Diné aʼohgo áʼdólzinii éí hazhóʼó nitsíkees łeh. Hazhóʼó ádaa ákonídzingo náánáłaʼ biláahdi ádaatʼéego ádaa nitsékees łeh. (Phil. 2:3) Bił bééhózingo “Diyin God éí ádaa dahaʼniihii yikʼijįʼ nilı̨́, nidi bibee ajoobaʼ éí aʼohgo ádaa nitsídaakeesii yee yaa joobaʼ.” (1 Pet. 5:5) Hazhóʼó ádaa nitsídaakeesii éí Jiihóvah bikʼijįʼ nilı̨́į dooleełgo doo deinízin da.

17. Haitʼéego aʼohgo áʼdííníilzin doo?

¹⁷ Aʼohgo áʼdííníilzingo éí Diyin Bizaad díí yínaʼniłtinii beʼiilʼı̨́į doo: “Átséédą́ą́ʼ ádanohtʼé yę́ę índa éí bee ádaotʼįįdii biiʼ hahisoohkai, áko iiná ániidíii biih dahisoohkai.” Díí éí yéigo binaʼanishii átʼé. Jesus nihá áátʼįįdígíí baa íhwiilʼaahgo bikʼehgo bikééʼ dayíníikáah doo nihóʼní. (Col. 3:​9, 10; 1 Pet. 2:21) Ákwíidzaago éí yéigo nihíká adoolwoł. Aʼohgo éʼétʼéii tʼáá bíhwiilʼaahgo, nihighan hazʼą́ągi bił dahózhǫ́ǫ doo, áłah néidleehgi łáʼí dah yiikahgi bee áká anéiilwoʼ doo, índa social media doo yáʼátʼééhgóó chooʼı̨́įgi bitsʼąą ániitʼée doo. Aláahdi éí Jiihóvah bił niidlı̨́ índa nihikʼijidlíi doo.