1. Base ed Filipos 2:3, akin et maong so relasyon tayo ed arum no mapaabeba tayo?

MAPAABEBA tayon uunoren si Jehova ta amta tayon sikato so makaamta no antoy sankaabigan parad sikatayo. (Efe. 4:22-24) No mapaabeba tayo, iyuna tayoy panlabayan nen Jehova aliwan say panlabayan tayo, tan isipen tayon mas atagey so arum nen say sikatayo. Kanian maong so relasyon tayo ed si Jehova tan ed saray agagi.​—Basaen so Filipos 2:3.

2. Antoy bilin nen apostol Pablo, tan antoy aralen tayo ed sayan artikulo?

² No agtayo manalwar, ompan naalig tayo ray totoo ed mundo ya mapaatagey tan makasarili. * Ontan so nagmaliw ya problema na saray inmuunan Kristiano, kanian sinulatan nen Pablo iray agagi ed Roma: “Ibagak ed balang sakey ed sikayo ditan ya agkayo maniisip na alabas ed sarili yo nen say manepeg yon isipen, noagta kada sakey et manisip diad paraan a pakapatnagan na limpion kanonotan.” (Roma 12:3) Bibidbiren nen Pablo ya kaukolan tayo met ya isipen so sarili tayo, balet nepeg ya mapaabeba itayo pian agtayo manisip na alabas ed sarili tayo. Pantongtongan tayod sayan artikulo so taloran kabiangay bilay tayo ya makatulong so inkamapaabeba: (1) bilay na sanasawa, (2) saray pribilehyo ed organisasyon nen Jehova, tan (3) diad social media.

3. Akin et walan walay onlesan agpantatalosan na sanasawa, tan antoy iisipen na arum ya solusyon ed satan?

³ Labay nen Jehova ya maliket so sanasawa. Balet lapud anggapoy perpekton too, walan walay onlesan agpantatalosan na sanasawa. Diad tua, imbaga nen Pablo ya saramay mangasawa tan miasawa et nawalaan iray problema. (1 Cor. 7:28) No say sanasawa et lanang iran mankokolkol, ompan isipen da ya talagan aliwa ran parad sakey tan sakey. No aligen da ray totoo ed mundo, ompan ibaga ran mas maong lay mandiborsyo odino mansian. Lapud sankanonot day sarili da, irason da ya mas maliket ira no mansian la ra.

4. Antoy agtayo nepeg ya isipen?

⁴ No walay problema na sanasawa, agtayo nepeg ya isipen ya say solusyon et say pansian. Amta tayo ya say iyaabuloy labat na Kasulatan ya rason parad pandiborsyo odino pansian et say seksual ya imoralidad. (Mat. 5:32) Kanian no naproblema so sanasawa ya singa samay insulat nen apostol Pablo, agnepeg ya manpaatagey so sakey tan ibaga ton: ‘Agak la maliket ed relasyon mi. Agko naliliknay tuan panangaro. Ompan mas maliket ak no mananap ak lay arum.’ No ontan so irason tayo, sarili tayo labat so iisipen tayo. Ibabaga na totoo ed mundo ya unor mo no antoy ididikta na pusom tan gawam no antoy mamaliket ed sika, kanian isian mo la kunoy asawam no agka la maliket ed sikato. Balet bibilinen itayo na Dios ya isipen tayoy ‘pankaabigan na arum, aliwan say pankaabigan tayo labat.’ (Fil. 2:4) Tandaan mon say labay nen Jehova et maniba kayo nen asawam legay bilay, agto labay ya mansian kayo. (Mat. 19:6) Labay to ya ibasem iray desisyon mo ed saray prinsipyo na Biblia, aliwan diad naliliknam labat.

5. Base ed Efeso 5:33, panon so dugan pantrato na sanasawa ed sakey tan sakey?

 ⁵ Nepeg ya aroen tan respetoen na sanasawa so sakey tan sakey. (Basaen so Efeso 5:33.) Bibilinen itayo na Biblia ya mas isipen tayo no antoy niiter tayo, aliwan no antoy naawat tayo. (Gawa 20:35) Antoy makatulong ed sanasawa pian nipanengneng day panangaro tan respeto ed sakey tan sakey? Importante ya manpaabeba ra. Say asawan laki tan asawan bii ya mapaabeba et aliwan puro sarili to labat so iisipen to, noag say pankaabigan na asawa to.​—1 Cor. 10:24.

6. Antoy naaralan mo ed imbaga nen Steven tan Stephanie?

⁶ Apaneknekan na dakel ya sanasawan Tasi ya nagmaliw ya mas maliket so relasyon da lapud pansasagpotan day manpaabeba. Singa bilang, oniay imbaga na asawan laki ya si Steven: “Isip yo ya saniba kayo ed sakey a team, kanian mantulongan kayon dua, lalo la no wala ray problema. Imbes ya say isipen mo et ‘anto kasi mamaliket ed siak?’ say isipen mo et, ‘anto kasi mamaliket ed sikamin dua?’” Ontan met so imbaga nen asawa to ya si Stephanie. “Aliwliway liknaan no lanang mon kakolkol so asawam,” so kuan to. “Kanian no walay agmi pantalosan nen asawak, aamtaen mi no anton talagay sengegan na problema mi. Insan kami manpikasi, man-research, tan pantongtongan mi no panon min naayos itan. Say pupuntiryaen mi et amay problema, aliwan say sakey tan sakey.” Talagan mas maliket so sanasawa no say sankanonot na balang sakey et say pankaabigan na asawa to, aliwan say sarili to.

7. Antoy nepeg ya isipen na sakey a brother no makaawat na pribilehyo ed organisasyon?

⁷ Pribilehyo so manlingkor ed si Jehova ed anggan anton paraan ya sarag tayo. (Sal. 27:4; 84:10) Kanian nakomendaan so sakey ya brother no sikatoy mabulos ya pausar ed organisasyon nen Jehova. Diad tua, ibabaga na Biblia: “No walay sakey a laki a dadampoten toy magmaliw a manangasikaso, maabig a kimey so pipirawaten to.” (1 Tim. 3:1) Balet no makaawat la na pribilehyo, agto nepeg ya isipen a sikatoy mas maong odino mas importante nen say arum. (Luc. 17:7-10) Nepeg ya say isipen to et no panon ton napanserbian so arum.​—2 Cor. 12:15.

8. Antoy naaralan tayo ed nansumpalan nen Diotrefes, Uzias, tan Absalom?

⁸ Nabasa ed Biblia iray totoo ya alablabas so pakanengneng dad sarili da. Si Diotrefes et “labalabay toy magmaliw a manunaan” ed kongregasyon. (3 Juan 9) Si Uzias et sinali toy mamool na insenso anta saray saserdote labat so tinuro nen Jehova ya manggawa ed satan. (2 Awa. 26:16-21) Si Absalom et inambisyon toy magmaliw ya ari, kanian nilarogan to ray totoo pian naala toy suporta ra. (2 Sam. 15:2-6) Nanengneng ed sarayan salaysay ed Biblia ya kabusol nen Jehova iramay labalabay da ya idayew ira na totoo. (Pro. 25:27) Say inkamapaatagey tan ambisyon da et nansumpal ed kadederal.​—Pro. 16:18.

9. Akin et maong ya alimbawa si Jesus?

⁹ Duma balet si Jesus, “ya anggaman kaparpara toy Dios, agto ninonot so manamsam, salanti, pian naparaan toy Dios.” (Fil. 2:6) Diad tua, si Jesus so onkokomadua ed si Jehova, balet sikatoy mapaabeba. Imbaga tod saray disipulo to: “Say mapaabeba ed sikayon amin, sikato so manunaan.” (Luc. 9:48) Talagan bendisyon iray payunir, ministeryal a lingkor, elder, tan manangasikaso na sirkito ya aaligen day inkamapaabeba nen Jesus! No  mapaabeba tayo, ontutulong tayo pian onelet so aroan ed organisasyon nen Jehova.​—Juan 13:35.

10. Antoy gawaen mo no wala ray problema ed kongregasyon ya say pakaliknam et ag-aasikasoen na saray elder?

¹⁰ Panon to no wala ray problema ed kongregasyon ya say pakaliknam et ag-aasikasoen na saray elder? Imbes ya manreklamo ka, ipanengneng moy inkamapaabeba tan suportaan mo iray mangidadaulo. (Heb. 13:17) Pian nagawaan mo itan, tepetan moy sarilim: ‘Kasin seryoso iyan problema tan kaukolan ya ayosen a tampol? Kasin aya so dugan panaon pian ayosen itan? Kasin responsabilidad kon ayosen itan? Anton talagay labay kon nagawa​—kasin labay ko ya mansiansiay pankakasakey ed kongregasyon odino ipipilit ko labat so labay ko?’

11. Base ed Efeso 4:2, 3, antoy maong ya resulta no mapaabeba tayon manlilingkor ed si Jehova?

¹¹ Mas importante ed si Jehova so inkamapaabeba nen say abilidad na sakey ya too, tan mas importante met ed sikato so pankakasakey na kongregasyon nen say karakel na kimey ya nasusumpal tayo. Kanian gawam so anggaay nayarian mo ya mapaabeban manlingkor ed si Jehova. No ontan, makakatulong ka pian mansiansiay pankakasakey ed kongregasyon. (Basaen so Efeso 4:2, 3.) Mankuli ka ed panagpulong. Mannonot kay paraan no panon mon natulongan so arum. Magmaliw kan maparawes ed saray agagi, anggan saramay anggapoy pribilehyo da ed kongregasyon. (Mat. 6:1-4; Luc. 14:12-14) No mapaabeba kan manlilingkor ed kongregasyon, aliwan say abilidad mo labat so naimano na arum, noag pati say inkamapaabebam.

12. Antoy ibabaga na Biblia nipaakar ed pikakaaro?

¹² Labay nen Jehova ya panliketan tayon nakaiba iray kapamilya tan kakaaro tayo. (Sal. 133:1) Si Jesus et wala ray kakaaro to. (Juan 15:15) Diad tua, ibabaga na Biblia ya maong so nawalaan na tuan kakaaro. (Pro. 17:17; 18:24) Ibabaga met na Biblia ya agtayo nepeg ya isian so sarili tayo. (Pro. 18:1) Iisipen na arum ya makatulong so social media pian nawalaan iray dakel ya kakaaro tan agda naliknan bukbukor da. Balet kaukolan tayoy manalwar sano manguusar tayoy social media.

13. Akin ya nadi-depress iramay nengneng lan nengneng ed saray post ed social media?

¹³ Base ed impan-research, saray totoo ya nengneng lan nengneng ed ipo-post na arum ed social media et nadi-depress laingen. Akin? On ta kaslakan ya ipo-post da et saray balibali labat ya nagagawad bilay da, saray marakdakep ya litrato da kaibay kakaaro da, tan saray napapasyaran da. Kanian no nanengneng itan na arum, ompan makaibeg ira tan isipen dan pakaskasi bilay da. “Makakaibeg ak kada no nanengneng ko ray arum ya malikeliket ira no weekend, siak balet nabo-boring ak ed abung,” so inamin na 19 años ya sister.

14. Panon ya makatulong so bilin na Biblia diad 1 Pedro 3:8 ed panguusar tayoy social media?

¹⁴ Siempre, wala met so maong ya usar na social media. Singa bilang, pian nakontak tayo iray kapamilya tan kakaaro tayo. Balet seguro naiimanom ya manpo-post so arum pian manpasikat tan idayew ira na totoo. Singa da ibabagan, “Nengneng yo yay litratok, ni.” Say arum balet et bastos tan makapabaing iray comment da ed sarili dan litrato odino ed litrato ya im-post na arum. Agtayo iratan gagawaen ta nabibilin itayo ya ipanengneng so inkamapaabeba tan pililikna.​—Basaen so 1 Pedro 3:8.

15. Anto ray bilin na Biblia ya unoren tayo pian agtayo magmaliw ya pa-importante?

¹⁵ No walay account mo ed social media, tepetan moy sarilim: ‘Kasin no nanengneng na arum iray comment, litrato, odino video ya ipo-post ko et isipen da ya manpapangta ak? Kasin lapud satan et makaibeg ira?’ Ibabaga  na Biblia: “Amin a bengatlan walad mundo​—say pilalek na laman tan say pilalek na mata tan say panangipangta na sakey ed saray kaykayarian to—​et agmanlalapud Ama, noagta manlalapud mundo.” (1 Juan 2:16) Ibabaga na sakey ya reperensya ya samay abitla dia ya “panangipangta na sakey ed saray kaykayarian to” et ontutukoy ed too ya “labay toy manpa-importante.” Saray Kristiano et aliwan pa-importante ta uunoren da iyan bilin na Biblia: “Ag-itayo komon magmaliw a mapaatagey, a mangilalagyat na panlalaslasan tan paniibegan.” (Gal. 5:26) No mapaabeba tayo, agtayo aligen iray totoo ed mundo ya pasikat tan pa-importante.

16. Akin et agtayo labay so magmaliw ya mapaatagey?

¹⁶ Nepeg ya ipanengneng tayoy inkamapaabeba ta saray totoon mapaatagey et aliwan limpioy panagnonot da. (Roma 12:3) Makolkol tan malastog ira, kanian nasasakitan day arum pati sarili da. No ag-ira manguman, mainomay iran naimpluensyaan nen Satanas. (2 Cor. 4:4; 11:3) Balet no say sakey a too et mapaabeba, limpio so panagnonot to. Aliwan atagtagey so pakanengneng tod sarili to. Imbes, ipapasen to ya mas atagey so arum. (Fil. 2:3) Tan amta to ya “say Dios et sumpad saray mapaatagey, balet iiter toy agnaparaan a kaabigan ed saray mapaabeba.” (1 Ped. 5:5) No limpioy panagnonot tayo, agtayo labay ya magmaliw itayon kabusol nen Jehova.

17. Antoy gawaen tayo pian lanang itayon mapaabeba?

¹⁷ Pian lanang itayon mapaabeba, nepeg tayon unoren iyan bilin na Biblia: “Lakseb yoy daan a personalidad pati saray kagagawa na satan, tan isulong yoy balon personalidad.” Siempre kaukolan tayoy mansagpot pian nagawaan tayo itan. Kaukolan tayon aralen so alimbawa nen Jesus, tan gawaen tayoy anggaay nayarian tayon aligen so ugali to. (Col. 3:9, 10; 1 Ped. 2:21) Balet sulit so pansagpot tayo. Akin ey? On, ta no lanang tayon mapaabeba, mas maliket so pamilya tayo, makatulong tayo pian mansiansiay pankakasakey ed kongregasyon, tan nasegurado tayo ya duga so panguusar tayo ed social media. Manuna ed amin, bendisyonan itayo nen Jehova tan mansiansia tayon maapit ed sikato.