1. Ha gutadila Filiphi 2:3, luholo lutshi khadilo dia gudibulumuisa diana gutukuatesa ha gukhala nu ufuta wabonga nu athu ako?

TUANA tumagela Yehowa nu gudibulumuisa guagasue handaga, muene wana jiya muabonga ndaga jidi jia bonga mukunda nu esue. (Ef. 4:22-24) Gudibulumuisa guana gutukuatesa ha guhaga gutshigina gua Yehowa ha fundo dia thomo nu gujiya egi athu ako atubalegela. Gutshita ngenyi guana gutukuatesa ha gukhala nu ufuta wabonga nu Yehowa nu aphangi etu Aklisto.—Tanga Filiphi 2:3.

2. Ndaga jitshi mupostolo Phaula gakhalele mujiya, nu itshi tuza mumona mu longo edi?

² Gula tuatemelego, tuajiya gubua nu lulendo nu giphi * gifua enya ha mavu awa a Satana. Yajiya gukhala egi Aklisto ako a mu Siekle ya thomo alanduile makalegelo awa abola, hene mupostolo Phaula gasonegele aphangi a gu Lomo egi: ‘Ngudi gumiwambela mukut’enu agasue egi, muthu gadisunzulago muavula gubalega, uvi atangize mu luholo luabonga.’ (Lomo 12:3) Phaula wajiyile egi matangua ako esue nji tuajiya gukhala nu ndambo ya lulendo. Uvi gudibulumuisa mbagutukuatesa ha guditadila mu luholo luabonga. Mu longo edi, tuza muzuelela ndaga thathu jinyi tuajiyilego gudimona egi tuabalega athu ako. Ndaga jiene thathu jidi: (1) Ulo, (2) inemo tudi naye mu hungu, nu (3) luholo lua gukalegela Internet.

3. Mukunda natshi nguma jiana zoga mu ulo, nu desizio ditshi athu ako ana zula?

³ Yehowa wana tshigina egi yala nu mukhetu ajinge hamoshi mu gusuanguluga mu ulo. Gushigo nga muthu wakhala watagana, hene, matangua ako nguma jiajiya guzoga mu ulo. Mupostolo Phaula wasonegele egi athu adi gudizula mu ulo mbaatagana nu malamba. (1 Kol. 7:28) Athu ako ana gudisagesa mu ulo tangua diagasue, nu ajiya gutangiza egi yakhalelego mutoga egi adizule mu ulo. Gula alandula ndaga jiabola jia ha mavu awa, ajiya gukhala hehi ha guzuela egi, tudi naye gushiya ulo. Ajiya gutangiza egi ha gukhala nu gusuanguluga, adi naye gushiya ulo.

4. Ndaga itshi tushigo naye gutangiza?

⁴ Tushigo naye gutangiza egi tuabingilego mu ulo wetu. Biblia idi muzuela egi gishina gimoshi tudi naye gushiyila ulo, gidi phamba uthambi. (Mat. 5:32) Gula tuatagana nu malamba mu ulo, tuajiyilego guzuela nu lulendo egi: ‘Mulumi’ami nga mukaji’ami, gashigo mutagenesa nzala jiami. Gashigo gunguzumba luko. Gula ngahaga muthu muko ngajiya guheta gusuanguluga.’ Gula tudi muzuela ngenyi, idi mumonega egi tudi mutangiza phamba gubonga guetu, uvi guamukaji’etu nga gua mulumi’etu ndo. Ndunge jia ha mavu awa jiajiya gugutuma ha gutshita ndaga idi gugusuanguluisa, ngatshima idi mutoga egi ushiye ulo. Biblia idi muzuela egi ushigo naye ‘gukamba phamba gubonga guaye, uvi udi naye gukamba nji gubonga gua athu ako.’ (Fili. 2:4) Yehowa gashigo mutshigina egi ushiye ulo waye, uvi udi mutshigina egi uwubambe. (Mat. 19:6) Wana tshigina egi umuhage muene ha fundo dia thomo, uvi aye hakhaye ndo.

5. Hagutadila Efeso 5:33, luholo lutshi yala nu mukhetu adi naye gudikalegela ndaga?

⁵ Yala nu mukhetu adi naye gudizumba nu gudinemesa. (Tanga Efeso 5:33.) Biblia yana  gutulongesa ha gumonesa muavula khadilo dia guhana, gubalega gutambula. (Makal. 20:35) Itshi yajiya gukuatesa yala nu mukhetu ha gudizumba nu gudinemesa? Idi khadilo dia gudibulumuisa. Mala nu akhetu agudibulumuisa, ajiyilego gukamba phamba gubonga guawo, uvi ‘adi naye nji gukamba gubonga gua athu ako.’—1 Kol. 10:24.

6. Longo ditshi wazula mu lumene lua phangi Steven nu Stephanie?

⁶ Khadilo dia gudibulumuisa diana kuatesa Aklisto adizudile gale mu ulo, ha gukhala nu gusuanguluga mu ulo wawo. Phangi mumoshi mu jina dia Steven udi muzuela egi: “Gula mudi gudivua mbimbi, mbamutshita mudimo hamoshi ngatshima milonga yazoga. Hafundo dia guzuela egi, ‘itshi yajiya gungusuanguluisa ame?’ tuajiya guzuela egi, itshi yajiya gutusuanguluisa?” Mukaj’enji Stephanie watangijile nji luholo lumoshi. Udi muzuela egi: “Gushigo nga muthu wajiya gutshigina gujinga hamoshi nu mbalagaji. Gula mulonga wazoga, tuana kamba gujiya gishina gia mulonga wene. Tuana samba, tuana tshita ba recherche nu tuana zuelela nji mulonga wene. Tuana kamba gumanesela mulonga wene, uvi tuana zolago nguma.” Mala nu akhetu mbaakhala nu gusuanguluga gula ashigo mutangiza egi, ene abalega alumi’awo nga akaji’awo ndando.

7. Khadilo ditshi phangi wa yala gadi naye gumonesa gula waheta ginemo mu ulondegi wa Yehowa?

⁷ Tuana khala nu luendu lua gukalegela Yehowa mu maluholo agasue. (Ngi. 27:4; 84:10) Idi ndaga yabonga gula phangi mumoshi watshigina gutshita muavula mudimo mu ulondegi wa Yehowa. Biblia idi muzuela egi: ‘Gula muthu watshigina gubua mutuameji, watomba diago gukalagala mudimo wabonga.’ (1 Tim. 3:1) Uvi gula waheta ginemo mu hungu, gajiyilego gutangiza egi wabalega athu ako ndando. (Luka 17:7-10) Felela dienji didi naye gukhala dia gukuatesa athu ako nu gudibulumuisa.—2 Kol. 12:15.

8. Longo ditshi tuajiya guzula mu gifezegeselo gia Diotrefese, Oziase, nu Abasaloma?

⁸ Biblia idi nu ifezegeselo yana gututemesa, ya athu akhalele nu khadilo dia gudisunzula. Diotrefese gakhalelego nu khadilo dia gudibulumuisa, wakhalele mukamba gukhala “ha fundo dia thomo” mu hungu. (3 Yone 9) Oziase, wakambele gutshita nu lulendo luagasue mudimo udi Yehowa gamutogelego ndo ha gutshita. (2 Gudi. 26:16-21) Abasaloma wakhalele mutshigina gubua fumu, hene gakhalele mumonesa gifua wana tshigina athu hagula amuzumbe. (2 Sam. 15:2-6) Luholo Biblia idi guyimonesa, Yehowa gana suanguluga ndo nu athu anyi ana kamba lutumbu luawo hakhawo. (Ish. 25:27) Enya lulendo, nu athu ana kamba lutumbu, anatagana nu malamba.—Ish. 16:18.

9. Gifezegeselo gitshi Yesu gatubembele?

⁹ Yesu gakhalelego gifua enya lulendo awa tuatanga. Biblia idi muzuela egi: “Muene wakhalele muho ungoshi nu Nzambi diago, uvi ganyongenego ha guditelesa nenji.” (Fili. 2:6) Yesu wakhala muthu wa mbadi gungima dia Yehowa, uvi gana tangizago nga hazonda egi, udi nu ndando yavula gubalega. Wawambelele alandudi enji egi: ‘Muthu udi gudi tuameza gifua mona wazonda, muene udi wabalega gukoma.’ (Luka 9:48) Yakhala luendu luakoma gutshita mudimo wa muvundi wa njila, gukhala mukuateshi wa mudimo, gukhala mukulu nga mutadi muwendji wa gudibulumuisa gifua Yesu! Gula tudi nu khadilo dia gudibumuisa mbatuzumba nji athu ako. Yesu wazuelele egi: Akombeledi a Nzambi a giamatshidia mbaajiyiwa mukunda nu guzumba mbaamosa mukatshi diawo.—Yone 13:35.

10. Itshi wajiya gutshita gula udi mumona egi, gudi nu milonga iko mu hungu akulu ashigo guyihatesa ndo?

 ¹⁰ Itshi wajiya gutshita gula udi mumona egi, gudi nu milonga iko mu hungu akulu ashigo guyihatesa ndo? Hafundo dia guboguta, monesa khadilo dia gudibulumuisa, nu tumagela athu adi gututuameza. (Heb. 13:17) Ha guyitshita dihule egi: Milonga yene idi diago yakoma, nu idi mutoga egi ilondewe ba? Didi tangua dia bonga dia guyilonda ba? Ame ngudi nu ginemo gia gulondega milonga yene ba? Mu guzuela guabonga, ngudi mutshigina egi hungu dikhale hamoshi, inyi ngudi mutshigina egi athu angumone egi ngudi nu ndando?’

11. Ha gutadila Efeso 4:2, 3, gubonga gutshi mbatuheta gula tudi mukalegela Yehowa nu gudibulumuisa guagasue?

¹¹ Mukunda nu Yehowa gima gia gubalega ndando gidi: gudibulumuisa, uvi ishigo ndunge jia gutshita midimo. Gujinga hamoshi gudi nu ndando yavula gubalega gutshita mudimo muabonga. Hene, Tshita yagasue ha gukombelela Yehowa nu gudibulumuisa guagasue. Gula watshita ngenyi, mbawubamba guhuima mu hungu. (Tanga Efeso 4:2, 3.) Khala nu ngolo mu mudimo wa gulongesa. Kalegela athu ako ndaga nu gisemo giagasue. Khala muyamba athu agasue, nu ene anyi ashigo nu inemo mu hungu. (Mat. 6:1-4; Luka 14:12-14) Gula udi mutshita mudimo wa mu hungu nu gudibulumuisa guagasue, aphangi mbaamonyigo phamba ndunge jiaye, uvi mbaajiya diago egi udi muthu wa gudibulumuisa.

12. Biblia yana gutuhana gikhesa ha gukuata mafuta ba? Kotelesa.

¹² Yehowa wana tshigina egi tukhale mubalegesa tangua hamoshi nu mafuta etu nu  aphangi etu a mu fami. (Ngi. 133:1) Yesu wakhalele nu mafuta abonga. (Yone 15:15) Biblia idi mumonesa gubonga mbatuheta gula tudi nu mafuta a giamatshidia. (Ish. 17:17; 18:24) Idi nji gutuwambela egi, gudisombola gushigo ndaga yabonga. (Ish. 18:1) Athu avula ana tangiza egi Internet yana guaakuatesa ha gukuata mafuta avula hagula akhadigo hakhawo. Uvi, tudi naye gumonesa gutema tangua tudi mukalegela Internet.

13. Mukunda natshi athu ana kalegela Internet ana gudivua hakhawo, nu ana gudisagesa mu matangi?

¹³ Enya ndunge ana zuela egi athu anyi ana balegesa tangua diavula mugutala jifoto nu ndaga jiana sonega athu mu Internet, ana gudivua hakhawo, nu ana gudisagesa mu matangi. Mukunda natshi? Handaga mu Internet, athu ana guhaga phamba foto jiabonga jidi mumonesa mafundo awaha ana jinga ene, nu mafuta awo, nu mafundo a lutumbu adi muwenda ene. Muthu udi mutala ifuanesa yene, wajiya gutangiza egi lujingu luenji lushigo luabonga. Phangi mumoshi wa mukhetu wa ivo 19 udi muzuela egi: “Ngakhalelego musuanguluga tangua ngakhalele mumona akuetu gudikenesa, gu suga ya phoso yagasue, uvi ame ngakhalele gami mulaba gukhala guembo.”

14. Luholo lutshi longo didi mu 1 Phetelo 3:8 diajiya gutukuatesa gu ndaga yatadila gukadigila Internet?

¹⁴ Internet yajiya gutukuatesa mu luholo luabonga gifua: Guta maga nu enya fami yetu, nu mafut’etu. Jiyenu egi, athu ako ana sonega ima mu Internet, ana haga photo nu video, hagula athu ako a ashimane. Ana tshita ngenyi hagula athu “Aasunzule.” Ako ana sonega ndaga jia musonyi gu foto jiawo, nga gu foto jia athu ako. Aklisto adi naye gumonesa khadilo dia gudibulumuisa nu gudihaga ha fundo dia athu ako. Hene, ashigo naye gukalagala ndaga jia luholo elu, tangua adi mukalegela Internet.—Tanga 1 Phetelo 3:8.

15. Luholo lutshi Biblia yajiya gutukuatesa ha gutuna khadilo dia gudisunzula?

¹⁵ Gula wana kalegela Internet dihule egi: ‘Ndaga ngana sonega, nu foto jiami, nu video ngana haga mu Internet, jiana tuma athu ako ha gudihula egi ngudi nu lulendo ba? Jiana tuma athu ako ha gunguvuila giphi ba?’ Biblia idi muzuela egi: “Milonga yagasue idi ha mavu  gifua, ngina jia muila, ngina ya meso, nu gudihala gua uthu, ishigo muza gudi Tata, uvi idi ya ha mavu.” (1 Yone 2:16) Biblia jiko jiana zuela egi: “Gumonesa haphelo ima ya gujingila” ha “gudimonesa egi adi nu ndando yavula gu meso a athu.” Aklisto ashigo naye gudimona egi adi nu ndando, nga gukamba egi athu a asunzule. Ana landula longo dia Biblia didi muzuela egi: “Tukhadigo enya lulendo, tutune khadilo dia gudithesa nu athu ako, nu tukhadigo nji enya giphi.” (Gal. 5:26) Gudibulumuisa guana gutukuatesa ha gutuna gukhala nu khadilo dia enya lulendo a ha mavu awa, anyi ana mona egi abalega athu ako.

16. Mukunda natshi tudi naye gutuna khadilo dia lulendo?

¹⁶ Tudi naye gukhala nu khadilo dia gudibulumuisa handaga enya lulendo ana tangiza ndo mu ‘luholo luabonga.’ (Lomo 12:3) Enya lulendo akhala abala nguma, akhala nji enya giphi. Ndaga ana tangiza ene nu makalegelo awo, yana guahana lamba, yana sagesa nji athu ako. Gula atemelego, matangi awo mbakhala mutuamezewa gudi Satana. (2 Kol. 4:4; 11:3) Uvi muthu wagudibulumuisa wana tangiza mu luholo luabonga. Wana tangiza muabonga, nu wana jiya egi athu ako amubalega. (Fili. 2:3) Wana jiya egi: “Nzambi udi mutuna adi mudihala, uvi udi muhua adi mudibulumuisa ngasa yenji.” (1 Phet. 5:5) Athu adi nu matangi abonga, ana tshiginago egi Yehowa akhale mbalagaji wawo.

17. Itshi tudi naye gutshita ha gusala athu agudibulumuisa?

¹⁷ Ha gusala athu agudibulumuisa tudi naye gulandula longo dia Biblia didi muzuela egi: ‘Vululenu umuthu ukulu nu makalegelo enji, sudigienu umuthu uhe-uhe.’ Yana toga diago ngolo jiavula. Tulongugenu muabonga gifezegeselo gia Yesu, nu tumulandulenu muabonga. (Kol. 3:9, 10; 1 Phet. 2:21) Gula tuatshita ngenyi mbatuheta ishimbigo. Gula tuakudisa khadilo dia gudibulumuisa, fami yetu mbayikhala nu gusuanguluga, mbatujinga nji mu guhuima mu hungu, nu mbatushigo mukalegela Internet mu luholo luabola. Ndaga yabalega ndando idi egi, mbatuheta ishimbigo gudi Yehowa.