1. Olsem Philippi 2:3 storyim, hao nao wei for hambol savve mekem iumi fren gud witim olketa narawan?

IUMI hambol for obeyim olketa standard blo Jehovah bikos iumi luksavve Jehovah evritaem savve lo wanem nao best for iumi. (Eph. 4:22-24) Taem iumi hambol bae iumi tingim wanem Jehovah laekem firstaem winim wanem iumiseleva laekem, and iumi ting lo olketa narawan olsem olketa gud winim iumi. Datwan bae mekem iumi for fren gud witim Jehovah and olketa brata and sista lo kongregeson.—Readim Philippi 2:3.

2. Wat nao aposol Paul storyim, and wanem nao iumi bae storyim lo disfala study?

² Sapos iumi no careful, wei blo pipol lo world blo Satan wea praod and selfish bae affectim iumi. * Luk olsem, datwan kasem samfala lo first century C.E., so aposol Paul mas raet lo olketa lo Rome: “Mi talem iufala evriwan for no tinghae tumas long iufala seleva, bat garem gudfala tingting.” (Rome 12:3) Paul luksavve hao iumi need for tingim iumiseleva tu. Bat wei for hambol bae helpem iumi for balance. Disfala study bae storyim hao wei for hambol bae helpem iumi for stap klia lo wei for tingim iumiseleva tumas. Bae iumi storyim thrifala taem wea iumi need for careful lo diswan: (1) Lo marit blo iumi, (2) taem iumi kasem privilege lo organization, and (3) taem iumi iusim social media.

3. Why nao raoa savve kamap insaed marit, and from datwan, wanem nao samfala duim?

³ Jehovah laekem hasband and waef for hapi lo marit blo olketa. Bat bikos iumi no perfect, raoa savve kamap. Paul hem sei olketa wea marit bae kasem samfala hard taem lo marit blo olketa. (1 Cor. 7:28) Samfala savve raoa olowe witim marit partner, and maet olketa tingse tufala shud no maritim each other nomoa. Sapos olketa letem tingting blo world for affectim olketa, bae olketa kwiktaem for sei dat divorce nomoa hem only wei for stretem datwan. Olketa tingse samting wea important nao hem for mekem olketa seleva hapi.

4. Wanem nao iumi mas stap klia lo hem?

⁴ Iumi mas stap klia lo wei for tingse marit blo iumi hem nating gud nomoa. Iumi luksavve Bible hem sei man savve divorce only sapos wanfala lo tufala hem durong. (Matt. 5:32) So taem iumi kasem olketa problem lo marit blo iumi, olsem wanem Paul storyim, iumi shud no praod and ting olsem: ‘Mi nating kasem wanem mi expectim lo marit blo mi. Mi nating kasem love wea mi shud kasem. Ating sapos mi faendem narawan bae mi hapi.’ Olketa kaen tingting olsem hem showimaot man hem tingim hemseleva nomoa. Wisdom blo world hem sei, ‘Iu followim heart blo iu and duim samting wea bae mekem iuseleva hapi, nomata sapos datwan minim marit blo iu mas finis.’ Wisdom blo God sei iu shud ‘evritaem tingim olketa narawan and no tingim iuseleva nomoa.’ (Phil. 2:4) Jehovah laekem iu for no finisim marit blo iu bat for keepim gud. (Matt. 19:6) Hem laekem iu for tingim hem firstaem, and no tingim iuseleva.

5. Olsem Ephesus 5:33 storyim, hao nao wanfala hasband and waef shud treatim each other?

⁵ Wanfala hasband and waef shud treatim each other witim love and respect. (Readim Ephesus 5:33.) Bible teachim iumi hao hem  important for givim samting winim wei for kasem samting. (Acts 20:35) Wanem fasin nao bae helpem wanfala couple for showimaot love and respect? Hambol fasin. Olketa hasband and waef wea hambol bae no tingim olketa seleva bat bae olketa tingim narawan.—1 Cor. 10:24.

6. Wat nao iu lanem from wanem Steven and Stephanie talem?

⁶ Wei for hambol helpem staka Christian couple for barava hapi. Olsem example, wanfala hasband wea nem blo hem Steven sei: “Hem important for waka tugeta olsem wanfala team, especially lo taem wea problem hem kamap. Winim wei for ting: ‘Wat nao bae gud for mi?’ Iu bae ting olsem ‘Wat nao bae gud for mitufala evriwan?’” Waef blo hem Stephanie tu feel olsem, hem sei: “No eniwan laek for stap witim wanfala enemy.” Hem sei tu: “Taem wanfala problem kamap, mitufala mas trae for faendem wat nao kosim datwan. Mitufala prea, duim research, and story raonem. Mitufala attakim datfala problem, bat no each other.” Olketa hasband and waef savve barava kasem gud samting taem olketa tingim each other and no tingim seleva.

7. Wanem kaen tingting nao wanfala brata shud garem taem hem kasem wanfala responsibility lo organization blo Jehovah?

⁷ Eni samting wea Jehovah laekem iumi for duim, iumi ting lo datwan olsem wanfala privilege. (Sams 27:4; 84:10) Sapos wanfala brata hem willing for duim wanfala responsibility insaed organization blo Jehovah, datwan hem gud samting. Bible sei: “Sapos man hem laek for elder, gud samting nao hem laek for duim.” (1 Tim. 3:1) Bat taem hem kasem wanfala assignment, hem shud no ting lo hemseleva olsem hem important winim olketa narawan. (Luke 17:7-10) Goal blo hem nao hem for hambol and helpem olketa narawan.—2 Cor. 12:15.

8. Wat nao iumi lanem from example blo Diotrephes, Uzziah, and Absalom?

⁸ Bible garem olketa warning example blo olketa pipol wea tinghae tumas lo olketa seleva. Diotrephes hem no hambol, hem laek for kamap leader insaed kongregeson. (3 John 9) Uzziah hem praod tumas and laek for duim waka wea Jehovah no markem hem for duim. (Mektu Kronikols 26:16-21) Absalom trae switim pipol for sapotim hem bikos hem laek for kamap king. (Mektu Samuel 15:2-6) Olsem olketa story hia showimaot, Jehovah no hapi witim olketa kaen pipol wea laek for haem olketa seleva. (Provebs 25:27) So olketa wea praod and wea laekem pipol for tinghae lo olketa bae kasem problem.—Provebs 16:18.

9. Wanem example nao Jesus showimaot?

⁹ Bat Jesus hem barava difren from olketa example wea iumi bin storyim, “Nomata hem wanfala spirit olsem God, no enitaem hem ting for trae tekem position bilong God for mekem hem semsem witim God.” (Phil. 2:6) Nomata Jesus garem hae position and hem second lo Jehovah, hem no tinghae lo hemseleva. Hem talem olketa disaepol blo hem olsem: “Eni man long iufala wea hambol, hem nao man wea important.” (Luke 9:48) Hem wanfala blessing for waka witim olketa pioneer, ministerial servant, elder, and olketa circuit overseer wea followim example blo Jesus for showimaot wei for hambol! Sapos iumi hambol, bae iumi showimaot love lo olketa narawan, wea datwan nao hem mark blo pipol blo Jehovah.—John 13:35.

10. Wat nao bae iu duim sapos iu tingse wanfala problem kamap lo kongregeson and iu feel dat olketa no deal witim lo stret wei?

¹⁰ Hao sapos iu tingse samfala problem hem kamap lo kongregeson and iu feel dat olketa no  deal witim lo stret wei? Winim wei for komplen, iu savve showimaot iu hambol taem iu sapotim olketa wea lead. (Heb. 13:17) For helpem iu duim datwan, askem iuseleva: ‘Waswe, olketa problem hia wea kamap hem big tumas, so olketa need for stretem? Waswe, distaem nao raet taem for stretem datwan? Waswe, hem responsibility blo mi for stretem? Waswe, mi really trae for mekem kongregeson garem wan mind, or mi laek for mekhae lo miseleva nomoa?’

11. Olsem Ephesus 4:2, 3 storyim, wanem gud samting nao bae kamap taem iumi hambol and worshipim Jehovah?

¹¹ Jehovah laekem wei for hambol winim wei for garem staka savve, and hem laekem wei for wan mind winim wei for duim staka waka kwiktaem. So traem best blo iu for hambol taem iu worshipim Jehovah. Wei for duim olsem bae mekem kongregeson garem wan mind. (Readim Ephesus 4:2, 3.) Mas strong for duim ministry. Lukaotem chance for kaen lo olketa narawan. Welkamim evriwan, insaed diswan hem olketa wea no garem eni big responsibility lo kongregeson tu. (Matt. 6:1-4; Luke 14:12-14) Taem iu hambol for waka witim kongregeson, olketa narawan bae no just lukim nomoa olketa gudfala wei blo iu bat olketa lukim tu wei wea iu hambol.

12. Waswe, Bible encouragem iumi for garem olketa frens? Explainim.

¹² Jehovah laekem iumi for enjoyim wei for associate witim olketa frens and famili. (Sams 133:1) Jesus garem tu olketa gud frens. (John 15:15) Bible storyim gud samting wea savve kamaot from wei for garem olketa gud frens. (Provebs 17:17; 18:24) And hem talem tu  hao hem nogud for man stap seleva tumas. (Provebs 18:1) Staka tingse social media hem wanfala wei for garem staka frens and bae iu feel olsem iu no stap seleva. Bat iumi mas careful taem iumi iusim social media.

13. Why nao samfala wea iusim social media savve lonely and sorre?

¹³ Staka research faendaot hao pipol wea spendem staka taem for scroll thru lo olketa post lo social media, maet end ap olketa feel lonely and sorre. Why nao olsem? Maet wanfala reason hem bikos staka taem pipol postim nomoa olketa best photo blo olketa, olsem best photo blo olketa seleva, olketa frens blo olketa, and olketa naes ples wea olketa go lo hem. Samwan wea lukim olketa post hia maet ting dat laef blo hem no interesting and gud olsem laef blo olketa hia. Wanfala sista wea 19 years old, hem sei: “Mi start for jealous taem mi lukim olketa narawan enjoyim weekend blo olketa and mi stay boring nomoa lo haos.”

14. Hao nao kaonsel lo 1 Peter 3:8 savve helpem iumi saed lo wei for iusim social media?

¹⁴ Hem tru, social media hem garem olketa gud saed tu. Olsem example, iumi savve contactim olketa famili and olketa frens. Bat waswe, iu lukim hao samfala pipol postim photo, koment, and video wea haem olketa seleva? Luk olsem olketa laek for sei, “Mi nao ia.” Samfala savve postim koment abaotem photo blo olketa seleva or photo wea narawan postim, and talem toktok wea here nogud and wea mekem olketa narawan garem rong tingting. Bat diswan hem opposite lo wei wea olketa Christian shud garem, wea hem nao for hambol and for tingim feeling blo olketa narawan.—Readim 1 Peter 3:8.

15. Hao nao Bible savve helpem iumi for stap klia from wei for haem seleva?

¹⁵ Sapos iu iusim social media, askem iuseleva: ‘Waswe, olketa koment, photo, or video wea mi postim hem mekem olketa narawan for ting dat mi haem miseleva? Waswe, bae mi mekem olketa narawan jealous?’ Bible sei: “Wei bilong man for laekem nogud samting wea body and eye bilong hem laekem, witim tu wei for man show-off witim samting wea hem garem, hem wei bilong pipol long disfala world. Olketa samting hia no kam from  Dadi long heven bat hem kam from pipol long world.” (1 John 2:16) Disfala toktok, “Show-off witim samting wea [man] garem,” samfala Bible transleitim olsem, “Laek for luk important.” Olketa Christian no needim olketa narawan for mekem olketa feel olsem olketa important. Bat olketa followim datfala kaonsel lo Bible wea sei: “Iumi mas no praod, no trae for winim narawan, and no jealous long narawan.” (Gal. 5:26) Sapos iumi hambol datwan bae helpem iumi for no garem disfala wei blo world for haem seleva.

16. Why nao iumi shud stap klia from wei for praod?

¹⁶ Iumi need for mekem grow hambol fasin bikos olketa wea praod olketa no “garem gudfala tingting.” (Rome 12:3) Pipol wea praod savve laek raoa tumas and olketa laek for winim olketa narawan. Tingting blo olketa and wanem olketa duim savve mekem olketa seleva and narawan for feel nogud. Sapos olketa no changem tingting blo olketa, bae Satan blindim mind blo olketa. (2 Cor. 4:4; 11:3) Bat man wea hambol hem garem gudfala tingting. Hem bae garem balance tingting abaotem hemseleva and hem bae luksavve dat olketa narawan gud winim hem lo staka difren samting. (Phil. 2:3) And hem savve “God hem againstim olketa wea praod tumas, bat hem kaen tumas long olketa wea hambol.” (1 Pet. 5:5) Olketa wea garem gudfala tingting olketa no laek for kamap enemy blo Jehovah.

17. Wanem nao iumi mas duim for iumi gohed hambol?

¹⁷ For gohed hambol, iumi mas followim disfala kaonsel lo Bible for ‘lusim old wei blo iumi and iumi mas garem niufala wei wea God hem givim.’ Iumi need for waka hard. Iumi need for study abaotem example blo Jesus and trae for barava followim datwan. (Col. 3:9, 10; 1 Pet. 2:21) Sapos iumi duim olsem, bae iumi kasem gud samting. Taem iumi mekem grow hambol fasin, laef blo famili blo iumi bae moabeta, iumi bae help for mekem wan mind kamap insaed kongregeson, and iumi bae no iusim social media lo wei wea no fitim. Winim evri samting hia, iumi bae kasem blessing from Jehovah and hem bae hapi lo iumi.