1. a) ¿Filipenses 2:3-pica imatataj yachachin? b) ¿Cai versocunapi nishcacunata pajtachishpaca ima beneficiocunatataj charishun?

JEHOVÁ DIOSCA ñucanchijpaj ima alli cashcataca allimi yachan. Chaimantami paipaj mandashcacunataca mana jatun tucushpa cazunchij (Efesios 4:22-24). Humilde cashpaca Diospaj munai tucuimanta yalli valishca cashcatami yachashun. Shujtajcunapish ñucanchijta yalli cashcatami yuyashun. Chaita rurashpaca Jehová Dioshuanpish huauqui panicunahuanpish allimi apanacushun (Filipenses 2:3-ta liyipai).

2. a) ¿Apóstol Pablo nishca shinaca imatataj yuyana canchij? b) ¿Cai yachaipica imacunallatataj yachashun?

² Diosta mana sirvijcunaca jatun tucushpami paicunallapi yuyancuna. Ñucanchijpish mana cuidarishpaca paicuna shinami yuyai tucunchij. * Apostolcuna causan punllacunapipish maijan huauqui panicunaca chashnallatajmi yuyai callarishcangacuna. Chaimantami apóstol Pabloca Romapi causaj huauqui panicunaman cai consejota curca. Paica: ‘Cancunapurapica caishujta yalli cashcataca ama yuyaichijchu. Ashtahuanpish canca ima shina cashcata alli yuyaringui’ nircami (Romanos 12:3). Pablo nishca shinaca ñucanchijllataj valishca cashcata yuyanaca allimi can. Pero humilde cashpaca shujtajcunata yalli cashcataca mana yuyashunchu. Cai yachaipica cazarashcacuna cashpa, Diospaj organizacionpi ima mingashcacunata charishpa, redes socialescunata utilizashpaca humilde canatami yachashun.

3. a) ¿Cazarashcacunaca huaquinpica imamantataj mana de acuerdo can? b) ¿Cashna problemata charishpaca huaquincunaca imatataj yuyancuna?

³ Jehová Diosca cusandij huarmindij cushilla causachunmi munan. Pero tucuicuna juchayuj cashcamantami huaquinpica imapipish mana de acuerdo canchij. Apóstol Pabloca ‘maijancuna cazarashpaca paicunapaj causaipimi llaquicunata charinga’ nircami (1 Corintios 7:28). Huaquinpica Diosta sirvijcunapish matrimonio ucupi pꞌiñanacushpa causashpami: “Ñucanchijca deganami cazarashcanchij” nishpa yuyancuna. Cai mundopaj yuyaicunata catishpa, paicunallapi yuyashpaca divorciarinatami yuyangacuna.

4. ¿Cazarashcacunaca imatataj mana yuyana can?

⁴ Cazarashcacunaca “ñucanchij matrimonioca mana valinchu” nishpaca mana yuyanachu can. Bibliapica cusa huarmi huainayajllapimi chꞌicanyari tucun ninmi (Mateo 5:32). Matrimonio ucupi problemacunata charishpaca cai tapuicunataca mana ruranachu canchij: “¿Ñuca huarmi o ñuca cusaca tucui ñuca munashcacunatachu pajtachin? ¿Ñuca munashca shinachu cꞌuyaita ricuchin? ¿Shujtajhuan cazarashpaca ashtahuan cushillachu sintiriman?”. Chashna yuyashpaca llaquimi canman. Diosta mana sirvijcuna shina yuyai callarishpaca ñucanchij shungu munashcatami rurashun. Tal vez “cushilla causangapajca divorciarinami cani” nishpami yuyai tucushun. Pero Diospaj yuyaita catijcunaca: “Quiquinpajlla alli canata ama mashcaichijchu. Ashtahuanpish caishujcunapaj alli canata mashcaichij” nishcatami pajtachincuna (Filipenses 2:4). Jehová Diosca ama chꞌicanyarichunmi munan (Mateo 19:6). Shinallataj ñucanchijllapi yuyanapaj randica pai mandashca shina causachunmi munan.

5. Efesios 5:33-pi nishca shinaca ¿cusandij huarmindij ima shinataj tratana can?

⁵ Cusandij huarmindij cꞌuyanacushpa respetohuanmi tratana can (Efesios 5:33-ta  liyipai). Bibliapica: “Imatapish cujmi, cushcata japijta yalli cushicun” ninmi (Hechos 20:35). Cꞌuyaita, respetota ricuchingapajca ishquindijpurami humilde cana can. Humilde cashpaca cada unomi mana paicunapaj allipajlla mashcangacuna. Ashtahuanpish caishujpaj allitami mashcangacuna (1 Corintios 10:24).

6. ¿Estiven, Estefani cusa huarmimantaca imatataj yachanchij?

⁶ Humilde cusa huarmicunaca cushillami causancuna. Por ejemplo, Estiven shuti huauquica: “Ñuca huarmihuan shujlla shina trabajashpaca problemacuna ricurijpipish ñucanchijpurami ayudanacunchij. Caimi ñucapajca alli can nishpa yuyanapaj randica caimi ñucanchijpajca alli can nishpami yuyanchij” ninmi. Shinallataj paipaj huarmi Estefanica: “Pꞌiñanacushpalla causajhuanca pi mana causanata munanchu. Ñucanchijca ima problemata charishpapish chai problema imamanta tiyashcatami ricunchij. Chai qꞌuipaca Jehová Diostami mañanchij. Publicacioncunapimi huaquin informacioncunatapish mashcanchij. Chashnami ishquindijpura pꞌiñanacunapaj randica problemacunata allichinchij” ninmi. Cusapish huarmipish caishujmanta chaishujmanta preocuparishpaca cushillami causangacuna.

7. ¿Shuj huauquica Dios mingashcacunata chasquishpaca imatataj mana yuyana can?

⁷ Ñucanchijpajca Jehová Diosta sirvinami tucuimanta yalli valishca can (Salmo 27:4; 84:10). Shuj huauqui, Jehová Diosta ashtahuan sirvisha nishpaca allitami ruracun. Bibliapica: ‘Maijanpish crijcunata michij casha nishpaca, allita ruranatami munan’ ninmi (1 Timoteo 3:1, NWT ). Pero Dios mingashcacunata chasquishpaca shujtajcunata yallimi cani nishpaca mana yuyanachu can (Lucas 17:7-10). Ashtahuanpish shujtajcunata ayudana yuyaillami cana can (2 Corintios 12:15).

8. ¿Diotrefesmanta, Uziasmanta, Absalonmantaca imatataj yachanchij?

⁸ Bibliapica huaquin runacuna jatun tucushcatami parlan. Por ejemplo, Diotrefesca jatun tucushpa congregacionpi pai mandaj canatami munarca (3 Juan 9). Uziaspish Dios mana mingashca trabajota rurashcamantami jatun tucushcata ricuchirca (2 Crónicas 26:16-21). Absalonpish rey tucusha nishpami gentecunataca nij tucushpalla cꞌuyarca (2 Samuel 15:2-6). Cai versocunapi ricushca shinaca Jehová Diosca jatun tucushcacunataca manataj ricunachinchu (Proverbios 25:27). Jatun tucushcacuna, paicunata alabachun munajcunaca llaquipimi urmancuna (Proverbios 16:18).

9. ¿Jesusca ñucanchijmanca ima ejemplotataj curca?

⁹ Jesusca alli ejemplotami ñucanchijmanca curca. Bibliapica: ‘Jesusca Taita Dios ima shina cashca shinallataj cashpapish, pai shinallatajmi cani ninataca mana munarcachu’ ninmi (Filipenses 2:6, QC, 1989). Jehová Diospaj huashaca Jesusmi achca poderta charin. Chashna cashpapish Yaya Diosta yalli cashcataca mana yuyanchu. Paipaj discipulocunamanca: ‘Cancunapurapi maijanpish tucuimanta yalli uchilla cajmi, tucuicunata yalli jatun canga’ nircami (Lucas 9:48). Precursorcuna, siervo ministerialcuna, ancianocuna, superintendentecunaca Jesús shinami humilde can. Paicunahuan tandalla sirvishpaca cushillami sintirinchij. Humildecuna cashpaca cꞌuyaj cashcata, Diosta sirvijcuna cashcatami ricuchishun (Juan 13:35).

10. ¿Congregacionpi tiyaj problemacunata ancianocuna mana utca allichijta shina ricushpaca imatataj rurana canchij?

¹⁰ Congregacionpi tiyaj problemacunata ancianocuna mana utca allichijta shina ricushpaca  ¿imatataj rurana canchij? Ñucanchijpura quejarinapaj randica humildes cashpaca ñaupajman pushajcunatami apoyana canchij (Hebreos 13:17). Chaipajca cashna tapurishunchij: “¿Ñuca ricushca problemacunaca jatunchu can? ¿Cai problemacunata allichina horaschu can? ¿Cai problemacunata allichinaca ñuca responsabilidadchu can? ¿Congregacionpi tandalla cachunchu ayudasha nini? O ¿shujtajcuna ñuca valishca cashcata ricuchunllachu munani?”.

11. Efesios 4:2, 3-pi nishca shinaca ¿humildecuna cashpaca ima shinataj Diosta sirvishun?

¹¹ Imata rurangapaj yachaj cajpipish Jehová Diosca humilde cachunmi munan. Ashtahuanpish imatapish tandalla rurachunmi munan. Chaimanta ama jatun tucushpa Diosta sirvingapaj esforzarishunchij. Chashnami congregacionpica shujlla shina Diosta sirvishun (Efesios 4:2, 3-ta liyipai). Huillanapi, shujtajcunata ayudanapi ocuparishunchij. Congregacionpi mingashcata pajtachijcunata, shujtaj huauqui panicunatapish ñucanchij huasiman invitashunchij (Mateo 6:1-4; Lucas 14:12-14). Caicunata pajtachijpica shujtajcunaca ñucanchij rurashcacunallataca mana ricungacunachu. Ashtahuanpish humilde cajtami ricungacuna.

12. ¿Bibliapica alli amigocunata charinamantaca imatataj nin?

¹² Jehová Diosca familiacunahuan, amigocunahuan tandalla, cushilla pasachunmi munan (Salmo 133:1). Jesuspish alli amigocunatami charirca (Juan 15:15). Bibliapica alli amigocunata charishpaca achca bendicioncunatami charishun ninmi (Proverbios 17:17; 18:24). Ashtahuanpish shujtajcunamantaca  mana caruyanachu canchij (Hebreos 10:24, 25). Achca gentecunami “ama ñucanchijlla sintiringapajca redes socialespimi alli amigocunata charina canchij” nincuna. Pero caicunata utilizashpapish cuidarinami canchij.

13. ¿Huaquincunaca redes socialesta utilizashpaca imamantataj sololla, llaquilla sintirincuna?

¹³ Huaquincunaca redes socialesmanta parlashpaca ‘fotocunata, comentariocunata achca tiempota ricushpalla pasajcunaca huaquinpica sololla, llaquillami sintirincuna’ nincunami. ¿Imamantataj chashna sintirincuna? Achca gentecunami redes socialespica paicuna sumajta pasashcata, paicunapaj alaja fotocunata churancuna. Shinallataj paicunapaj amigocunahuan cashcata, alaja lugarcunapi cashcatami churancuna. Chaicunata ricujcunaca mana cushilla causacushcatami yuyancuna. 19 huatata charij shuj panica: “Shujtajcunapaj fotocunata ricushpaca paicuna fin de semanapi cushilla cainashcatami ricurcani. Cutin ñucaca huasipi pasashcamanta paicuna shina mana divirtiri tucushcamantami llaquilla sintirircani” ninmi.

14. 1 Pedro 3:8-pi nishca shinaca ¿redes socialestaca ima shinataj alli utilizana canchij?

¹⁴ Redes socialesca familiacunahuan, amigocunahuan parlangapajmi alli can. Pero maijancunaca redes socialespi fotocunata churashpa, escribishpaca shujtajcunapaj ñaupajpi alli ricuringapajllami churancuna. ¿Canpish chaita ricushcanguichu? Cutin shujtajcunaca paicunapaj fotocunamanta shujtajcunapaj fotocunamantaca mana allicunatami comentancuna o mapa shimicunatami quillcancuna. Diosta sirvijcunaca caicunataca mana ruranchu. Ashtahuanpish paicunaca humildecunami cana can. Shujtajcunamantapish sustarishcatami ricuchina can (1 Pedro 3:8-ta liyipai).

15. ¿Ñucanchijllapi ama yalli yuyangapajca Bibliaca ima shinataj ayudan?

¹⁵ Redes socialesta utilizacushpaca cashna nishpa tapurishunchij: “¿Ñuca churashca fotocuna, videocuna, comentariocunaca ima shinataj can? ¿Ñuca ima shina causashcata, ñuca imalla charishca cosascunata ricuchunchu munani? ¿Caicunata ricushpaca shujtajcunaca envidiai callaringachu?”. Bibliapica: ‘Aicha munaicuna, ñahui ricushpa  munanacuna, charinacunahuan jatun tucuna cai pachapi ima tiyajcunaca, mana Diosmantachu, cai pachamantami shamun’ ninmi (1 Juan 2:16). Diosta sirvijcunaca shujtajcuna jatunyachichunca mana munanchijchu. Gálatas 5:26-pi ima nishcatapishmi catina canchij. Chaipica: “Caishuj chaishuj pꞌiñachinacushpa, caishuj chaishuj envidianacushpa yanga jatunyarinataca, ama mashcashunchij” ninmi. Humildecuna cashpaca, cai mundopaj yuyaicunahuanca mana chagrurishunchu.

16. ¿Imamantataj mana jatun tucushca cana canchij?

¹⁶ Jatun tucushcacunaca alli yuyaita charishcataca mana ricuchincunachu. Pero Diosta sirvijcunaca humildesmi cana canchij (Romanos 12:3). Jatun tucushcacunaca pꞌiñanacushpa, paicunallapi yuyashpami causancuna. Ashtahuancarin paicuna yuyashcahuan, rurashcahuanca paicunallatajmi llaquipi urmancuna. Shinallataj shujtajcunatapishmi llaquichincuna. Paicunapaj yuyaita mana cambiajpica Diabloca paicunatami jahualla pandachinga (2 Corintios 4:4; 11:3). Pero humilde gentecunaca alli yuyayuj cashcatami ricuchincuna. Chaimantami paicunaca shujtajcuna paicunata yalli cashcata yuyancuna (Filipenses 2:3). 1 Pedro 5:5-pica, “jatun tucushcacunataca, Diosca mana ricunachinchu. Mana jatun tucushcacunamanca paipaj mana cꞌuyaipajta cꞌuyaj canatami cun” ninmi. Caita yuyarishpami alli yuyaita charijcunaca Diospaj ñaupajpi alli ricuringapaj esforzarincuna.

17. ¿Humildes cangapajca imatataj rurana canchij?

¹⁷ Humilde cangapajca Colosenses 3:9, 10-pi ima nishcatami pajtachina canchij. Chaipica: ‘Cancunapaj mauca causaitaca, rurashcacunandij anchuchishpa, mushuj runata rurashca caichij’ ninmi. Caita pajtachinaca mana facilchu can. Chaipajca Jesusmanta yachashpa paipaj ejemplota catingapajmi esforzarina canchij (1 Pedro 2:21). Humilde cangapaj esforzarishpaca cusa huarmica cushillami causangacuna. Shinallataj congregacionpica tandallami Diosta sirvishun. Redes socialestapish alli utilizanatami yachashun. Chashnami Jehová Diosta cushichishun, paipaj bendiciontapish chasquishun.