1. Ia Philipi 2:3, akapeea to tatou tu akaaka me akatupu i te pirianga meitaki ki tetai ke?

KA ARU akaaka tatou i te au turanga o Iehova, ma te āriki e kua kite a Iehova i tei tau no tatou. (Ephe. 4:22-24) Ma te tu akaaka ka tuku tatou i to Iehova anoano na mua e kia akamanako maata atu i tetai ke. Ka rekareka i reira tatou i te pirianga meitaki kia Iehova e te au taeake.—E tatau ia Philipi 2:3.

2. Eaa ta te apotetoro ko Paulo i karanga, e eaa ta tatou ka uriuri i teia atikara?

² Me kare tatou e matakite, ka akanauruia tatou e te aronga ngakau parau e te akatietie i roto i ta Satani akatereanga. * Kua tupu te kino i te anere mataiti mua T.N., e kua tata te apotetoro ko Paulo ki to Roma: “Teia taku tuatua kia kotou katoatoa . . . eiaa e maata te manako iaia uaorai, i tei tau iaia kia manako ra.” (Roma 12:3) Karanga a Paulo e ka tau rai kia manako meitaki tatou ia tatou uaorai. Inara, ka anoanoia te tu akaaka kia rauka ia tatou te manako tau. Ka uriuri teia atikara e toru ngai ka tauturu te akaaka ia tatou kia kore e akamanako maata ia tatou uaorai. Teia au ngai (1) to tatou oraanga  akaipoipo, (2) ta tatou angaanga na Iehova, e te (3) me taangaanga tatou i te social media.

3. Eaa i tupu ei te taumāro i roto i te akaipoipo, e eaa ta tetai pae i rave?

³ Na Iehova i akamata i te akaipoipo ei mataora anga no te tane e te vaine. Kare okotai ia tatou e apa kore ana, ka tupu rai te taumāro. Tata a Paulo e ka tupu rai te pekapeka ki te aronga akaipoipo. (1 Kori. 7:28) Te pekapeka ua ra tetai pae ki to ratou tokorua, e ka manako kare ratou e tau ana ei tokorua no tetai e tetai. Me kua akanauruia ratou e teianei ao, penei ka viviki ratou i te tatara. Ka manako ratou e ko te mea puapinga, e akono ratou ia ratou uaorai.

4. Eaa ta tatou ka kopae?

⁴ Ka kopae tatou i te manako e e puapinga kore to tatou akaipoipo. Kite tatou te karanga ra te Pipiria e ko te akaturi te ravenga e tatara ai. (Mata. 5:32) Me tupu te pekapeka, mei ta Paulo i tata, kare tatou e ngakau parau ma te akamanako e: ‘Te akatupu ainei teia akaipoipo i toku au anoano? Te inangaroia maira ainei au? Ka mataora atu ainei au ki te tokorua ou?’ Akara ana i te manako o tetai uaorai i roto i teia au uianga. Ka akakeu te pakari o teianei ao kia aru koe i toou uaorai ngakau, e rave i toou anoano kia mataora koe, noatu e ka ope toou akaipoipo. Karanga te pakari o te Atua e, “auraka te tangata e akono i tona anake uaorai au mea, e akono katoa ra i to etai ke ra au mea.” (Phili. 2:4) Inangaro a Iehova ia koe kia akono i toou akaipoipo, eiaa e akaope i te reira. (Mata. 19:6) Inangaro aia ia koe kia akamanako iaia na mua, eiaa ia koe uaorai.

5. Ia Ephesia 5:33, akapeea te tane e te vaine me akono i tetai e tetai?

 ⁵ Ka aroa e ka akangateitei te tane e te vaine ia raua uaorai. (E tatau ia Ephesia 5:33.) Apii mai te Pipiria e e mea meitaki i te oronga atu i te rave mai. (Anga. 20:35) Eaa te ka tauturu i te nga tokorua akaipoipo kia aroa e te akangateitei ia raua? Ko te tu akaaka. Ka aruaru te au tane e te au vaine akaaka i te “kimi ra . . . i to etai ke ra” meitaki.—1 Kori. 10:24.

6. Eaa taau i apii mai mei te au tuatua a Steven e Stephanie?

⁶ Ka mataora te au tokorua akaipoipo Kerititiano me tupu te akaaka i roto i te akaipoipo. Ei akaraanga, karanga tetai tane ko Steven e: “Me taokotai korua, ka angaanga kapiti korua, me tupu ake te manamanata. Eiaa e manako ‘eaa te mea meitaki noku?’ ka manako ra koe ‘eaa te mea meitaki no maua?’” Aiteite rai te manako o tana vaine ko Stephanie. “Kare tatou e inangaro i te noo ki tetai tokorua taumāro,” i nana ai. “Me tupu te taumāro ka kimi maua eaa te manamanata. Ka pure maua, ka kimikimi, e ka uriuri manako. Ka kimi maua eaa te manamanata, kare e kaitamaki i tetai e tetai.” Ka puapingaia te au tane e te au vaine eiaa e manako maata roa ia ratou uaorai.

7. Eaa te tu o te taeake me e akameitakianga tana no te tavini?

⁷ E akameitakianga tikai i te tavini ia Iehova. (Sala. 27:4; 84:10) Me e akameitakianga ta te taeake no te tavini, e mea tau te reira. Akakite te Pipiria: “Kia inangaro tetai tangata i te taoonga episekopo ra, kua inangaro aia i te angaanga meitaki.” (1 Timo. 3:1) Inara, me rauka tana tuanga angaanga, kare aia e manako maata atu iaia uaorai. (Luka 17:7-10) Tona akakoro anga kia tavini i tetai ke ma te akaaka.—2 Kori. 12:15.

8. Eaa ta tatou ka apii mai mei te akaraanga o Dioterepe, Uzia, e Abasaloma?

⁸ Tei roto i te Pipiria te au akaraanga akamatakiteanga no te aronga tei manako maata ia ratou uaorai. Ko Dioterepe tetai, “tei akateitei iaia uaorai” i roto i te putuputuanga. (3 Ioa. 9) Kua rave ngakau parau a Uzia i te angaanga kare a Iehova i oronga ana kiaia. (2 Para. 26:16-21) Aruaru kikite a Abasaloma kia peke iaia te inangaro o te tangata kia riro ei ariki. (2 Samu. 15:2-6) Mei ta te Pipiria e akakite ra, kare a Iehova e mareka ana i te aronga tei kimi i to ratou uaorai kaka. (Mase. 25:27) Ka tupu te kino ki te aronga ngakau parau e te kimi taoonga.—Mase. 16:18.

9. Eaa te akaraanga ta Iesu i akanoo?

⁹ Me akaaiteia teia au akaraanga akamatakiteanga kia Iesu, “ko te tu ïa aia no te Atua, e kare aia i manako e, e apinga āru kia aite katoa aia i te Atua ra.” (Phili. 2:6) Tei raro ake a Iesu ia Iehova, kare aia i manako maata ana iaia uaorai. Akakite aia ki tana au pipi: “E tei mea ngiti rava i roto ia kotou na, ko te ka maata ïa.” (Luka 9:48) Mei teaa atura te akameitakianga no te tavini ei painia, tavini tauturu, aronga pakari, e ei kotinga akaaere, no te aru i to Iesu tu akaaka! Ka akameitaki atu te au tavini akaaka o Iehova i te vaerua aroa i roto i te akaaerenga a te Atua.—Ioa. 13:35.

10. Eaa taau ka rave, me kare te manamanata i roto i te putuputuanga i akatikatikaia?

¹⁰ Akapeea me e manamanata to roto i te putuputuanga e kua manako koe kare  te reira i akatikatikaia? Eiaa e akaapa, e akaari i te tu akaaka, na te turu anga i te aronga e akaaere ra. (Ebe. 13:17) Ei tauturu ia koe, e ui kia koe uaorai, ‘E manamanata kino ainei te reira e ka anoanoia kia akatikatikaia? E taime tau ainei teia no te akatikatika i te reira? Naku ainei teia apainga kia akatikatika i te reira? Te tauta tikai ainei au kia taokotai te putuputuanga, me te tauta nei au i te akamaata iaku uaorai?’

11. Ia Ephesia 4:2, 3, eaa te au tupuanga me tavini tatou ia Iehova ma te akaaka?

¹¹ Akaperepere atu a Iehova i te tu akaaka i te tu karape e te mareka atura aia i te tu taokotai i te tu mako. No reira, e tauta i te tavini ia Iehova ma te tu akaaka. Me pera koe, ka akamaata koe i te tu taokotai i roto i te putuputuanga. (E tatau ia Ephesia 4:2, 3.) E rave maroiroi i te angaanga tutu aere. E kimi ravenga no te tavini i tetai ke ma te takinga meitaki. Akaari i te tu oronga ua ki te katoatoa, pera katoa te aronga kare e taoonga e kare e apainga. (Mata. 6:1-4; Luka 14:12-14) Ia koe e angaanga ra ki te putuputuanga ma te akaaka, ka kite tetai pae i toou tu akaaka e toou tu karape.

12. Akamaroiroi ainei te Pipiria ia tatou kia rauka te au oa? Akamārama mai.

¹² Anga a Iehova ia tatou kia rekareka i te pirianga meitaki ki te au taeake e te ngutuare. (Sala. 133:1) E au taeake meitaki to Iesu. (Ioa. 15:15) Akakite te Pipiria i te puapinga me rauka te au oa  mou. (Mase. 17:17; 18:24) Kare i te mea meitaki kia akatakake ia tatou uaorai. (Mase. 18:1) E maata te karanga ra e no te social media i rauka ai to ratou au oa e kare ratou e maromaroa ana. Inara, kia matakite tatou i te taangaanga i teia ravenga karangaranga.

13. Eaa tetai pae tei taangaanga i te social media i maromaroa ei e i taitaia ei?

¹³ Kitea mai te kimikimi anga e me akapou maata te tangata i te taime ki runga i te social media no te akara i te au karere e te au tutu penei ka tupu te maromaroa e te taitaia kia ratou? Eaa te tumu? No te mea te tuku ra tetai pae i te au tutu ki runga i te social media, to ratou uaorai au tutu, to te au oa, e te au ngai i teretere ana ratou. Me akaaite tetai tangata i te reira au tutu ki tona uaorai, penei e oraanga popoa tona—e te puapinga kore. “Taitaia au, te kite anga i tetai pae e mataora ra i te openga epetoma e tei te kainga au e maromaroa ra” i karanga ai te tuaine Kerititiano e 19 ona mataiti.

14. Akapeea te ako Pipiria ia 1 Petero 3:8 me tauturu ia tatou kia taangaanga meitaki i te social media?

¹⁴ E tika, ka rauka te social media i te taangaanga meitakiia—no te karangaranga atu ki te kopu tangata e te au taeake. Te kite ra ainei koe i te aronga e tuku karere ra ki runga i te social media, te akaari ra ratou ia ratou uaorai? “Akara mai iaku” ko te karere teia ta ratou e tuku ra. Kua tuku karere katoa tetai pae i te au tuatua viivii ki runga i to ratou tutu e to tetai ke. Kare teia i te mea tau mei te mea te akamaroiroiia ra te au Kerititiano kia akaaka e kia aroa ua i te au taeake.—E tatau ia 1 Petero 3:8.

15. Akapeea te Pipiria me tauturu ia tatou kia kore e akamaata ia tatou uaorai?

¹⁵ Me taangaanga koe i te social media, e ui kia koe uaorai: ‘Te akapaapaa ra ainei taku karere, au tutu, e te au vitio, iaku uaorai? Penei ka akakeu au i tetai pae kia vareae?’ Karanga te Pipiria: “Ko te au mea ravarai oki o teianei ao, ko te anoano tika kore o te kopapa nei, e te  anoano tika kore o te mata nei, e te akatietie o te ora anga nei, kare ïa i to ko mai i te Metua ra, no teianei ao anake ïa.” (1 Ioa. 2:16) Te aiteanga a tetai urianga Pipiria no teia tuatua “te akatietie o te ora anga nei,” ko “te akariari ma te akatangata.” Kare te au Kerititiano e akamaata ana ia ratou uaorai. Ka aru ratou i te ako Pipiria: “Eiaa tatou e akateitei puapinga kore ua, i te akaongoongo anga tetai ki tetai, e te vareae anga tetai ki tetai.” (Gala. 5:26) Ka tauturu te tu akaaka ia tatou kia kore e akaari i te vaerua akatietie o teianei ao.

16. Eaa tatou ka kopae ei i te tu ngakau parau?

¹⁶ Ka taangaanga tatou i te tu akaaka no te mea kare o te aronga ngakau parau tu “manako tau.” (Roma 12:3) E aronga taumāro e te akatietie te aronga ngakau parau. No to ratou manako e ta ratou e rave ra, ka tamamae ratou ia ratou uaorai e tetai pae. Me kare ratou e taui, ka akapoiri e ka takino a Satani i to ratou manako. (2 Kori. 4:4; 11:3) E manako tau to te tangata akaaka. E manako tau tona iaia uaorai, te irinaki anga e e meitaki atu tetai iaia. (Phili. 2:3) Kite aia “e patoi te Atua i tei nengonengo, e oronga mai i te meitaki no tei akaaka.” (1 Pete. 5:5) Kare te aronga manako tau e inangaro i te akaenemi ia Iehova.

17. Eaa ta tatou ka rave kia vai akaaka ua?

¹⁷ Kia vai akaaka, ka taangaanga tatou i te ako Pipiria e “kopae oki [tatou] i te tangata taito ra e tana katoa au ravenga. E [ka] akatangata ou.” Ka angaanga pakari tatou. Ka anoanoia tatou kia apii i to Iesu akaraanga e ka tauta i te aru meitaki iaia. (Kolo. 3:9, 10; 1 Pete. 2:21) Ka pauna rai te taime. Me akaaka tatou, ka meitaki atu to tatou oraanga ngutuare, ka taokotai te putuputuanga, e ka kite tatou akapeea me taangaanga meitaki i te social media. Tei puapinga rava atu, ka mareka a Iehova ma te akameitaki mai ia tatou.