1. Кова совет аменге дендо ко Филипјаните 2:3, хем сар шај те користинел аменге?

АМЕН понизно прифатинаја е Јеховаскере мерилија адалеске со сием свесна кај ов секогаш џанела сој аменге најшукар (Еф. 4:22-24). И понизност поттикнинела амен те чхива е Девлескири волја англедер амари хем те дикха ко јавера сар пошукар амендар. Адалеске, сием шукар амала е Јеховаја хем амаре пхраленцар хем пхењенцар. (Читин Филипјаните 2:3.)

2. Со признајнѓа о апостол Павле, хем со ка дикха ки акаја статија?

² Ама, ако на пазинаја, шај те влијајнен аменге о мануша таро е Сатанаскоро свето кола сој горда хем себична. * Изгледа ки асавки опасност сине хем несаве таро прво веко а.е., соске о апостол Павле пишинѓа е христијаненге ко Рим: „Вакерава секаске тумендар те на мислинел баши песте повише таро адава со ваљани те мислинел, него те мислинел баши песте разумно“ (Рим. 12:3). Акате о Павле признајнѓа кај секова јекх амендар ваљани џи ки несави мера те овел ле шукар мислење баши песке. Сепак, и понизност ка поможинел аменге те дикха урамнотежено ки аменде. Ки акаја статија ка дикха трин подрачја таро живото коте со и понизност ка поможинел аменге те на ова горда: 1) ко амаро брако, 2) ко амаре одговорностија ки е Јеховаскири организација, хем 3) ко начин сар користинаја о социјална мреже.

3. Соске шај те авел џи ко проблемија ко брако, хем сар несаве пробинена те решинен лен?

³ О Јехова мангела о ром хем и ромни те овен бахтале ко брако. Ама, адалеске со никој нане совршено, сигурно ка авел џи ко несогласувања. Уствари, о Павле пишинѓа кај окола со ка кхувен ко брако ка овен лен проблемија (1. Кор. 7:28). Несаве брачна парија кола со цело време распрајнена пе, ко крајо шај те мислинен кај нане јекх јекхеске. Ако дозволинена о свето те влијајнел упри ленде, бут локхе шај те дикхен ко развод сар решение башо ленгере проблемија. Наместо те мислинен сој тано најшукар е солдујенге, ола мислинена кај ништо јавер нане поважно таро ленгоро лично бахталипе.

4. Со на смејнаја те мислина?

⁴ На смејнаја те разочарина амен таро брако хем те мислина аменге кај нане те успејнел. Џанаја кај и единствено библиско причина башо развод тано о сексуално неморал (Мат. 5:32). Адалеске, кеда ка овен тут о неволје коленге со пишинѓа о Павле, на ваљани те ове гордо хем те почмине те пуче тут: „Дали мло брако керела ман задоволно хем бахтало? Дали добинава о мангипе со заслужинава? Дали ка овел манге пошукар јавереа?“ Ако размислинеа аѓаар, тегани мислинеа само туке, а на е јавереске. О свето вакерела те шуне тло вило хем те дикхе ту те ове бахтало, чак ако адава значинела те разведине тут. Ама, о Јехова вакерела ма те грижина амен само аменге, него исто аѓаар хем е јаверенге (Фил. 2:4). Ов мангела те аракхе тло брако, а на те чхиве леске крајо (Мат. 19:6). О Јехова мангела прво те мислине ки лесте хем ко лескере начелија, а на ки туте хем ко тле желбе.

5. Спрема Ефешаните 5:33, сар ваљани о ром хем и ромни те постапинен јекх јекхеа?

⁵ О ром хем и ромни ваљани те постапинен  мангипаја јекх јекхеа хем те поштујнен пе. (Читин Ефешаните 5:33.) И Библија сикавела кај ваљани те мислина ко адава со шај те да, а на ко адава со шај те добина (Дела 20:35). Која особина шај те поможинел е брачна паренге те сикавен песке мангипе хем поштовање? И понизност. О ром хем и ромни сој понизна нане те роден пли корист, него и „корист е јаверескири“ (1. Кор. 10:24).

6. Со сикљовеа таро адава со вакерѓе о Стивен хем и Стефани?

⁶ И понизност поможинѓа буте христијанска брачна паренге те овен побахтале. На пример, јекх ром со викинела пе Стивен вакерела: „Ако сиен тими, ка соработинен, посебно кеда иси проблемија. Наместо те мислине туке ’сој тано најшукар манге?‘, ка мислине ’сој тано најшукар аменге?‘“ Лескири ромни, и Стефани, мислинела о исто. Ој вакерела: „Никој на мангела те живинел противникоја. Кеда ка авел џи ко несогласување, трудинаја амен те дикха со анѓа џи ко адава. Пало адава молинаја амен, истражинаја хем кераја лафи башо адава сар те решина ле. Наместо те нападина јекх јекхе, амен нападинаја о проблеми“. Хем о ром хем и ромни ка овен побахтале ако на мислинена кај тане пошукар е јаверестар.

7. Саво стави ваљани те овел е пхрален ако добинена одговорно задача?

⁷ Аменге тани чест те служина е Јеховаске ко секова начин со шај (Пс. 27:4; 84:10). Ако несаво пхрал тано спремно те керел несави посебно задача, ов заслужинела пофалба. Коркори и Библија вакерела: „Ако некој мангела те служинел сар надгледнико, ов мангела бут шужи бути“ (1. Тим. 3:1). Ама, кеда ка добинел несави одговорност, на ваљани те мислинел кај тано нешто посебно хем кај тано поважно е јаверендар (Лука 17:7-10). Лескири главно цел ваљани те овел понизно те служинел е јаверенге (2. Кор. 12:15).

8. Со сикљоваја таро адава со керѓе о Диотреф, о Озија хем о Авесалом?

⁸ Ки Библија иси предупредувачка примерија таро несаве мануша кола со мислинена сине кај тане поважна таро јавера. На пример, о Диотреф ни хари на сине скромно хем мангела сине „те овел прво“ ко собрание (3. Јов. 9). О Озија сикавѓа кај тано гордо аѓаар со пробинѓа те керел задача која со о Јехова на денѓа ла леске (2. Лет. 26:16-21). О Авесалом керѓа пе кај мангела е манушен те шај те поддржинен ле соске мангља те овел цари (2. Сам. 15:2-6). Таро акала библиска извештаија јасно дикхела пе кај о Јехова на мангела околен со родена чест баши песке (Изр. 25:27). Сар со накхела о време, и гордост хем и амбиција анена џи ко катастрофална последице (Изр. 16:18).

9. Саво пример денѓа амен о Исус?

⁹ Бут појавер таро акала мануша, размислин башо Исус, каске со и Библија вакерела: „Иако сине сар о Девел, ов никогаш на мислинѓа те лел е Девлескоро тхан хем те овел јекх леа“ (Фил. 2:6). Иако само е Јехова иси ле побари власт лестар, о Исус на мислинела кај тано најважно. Ов вакерѓа пле учениконге: „Окова со машкар сариненде туменде понашинела пе сар потикно, ов тано баро“ (Лука 9:48). Чаче тано баро берекети те служина заедно е пионеренцар, е слуга помошниконцар, е старешиненцар хем е покраинско надгледниконцар кола со сикавена понизност исто сар со сикавѓа о Исус! Е Девлескере понизна слуге керена ки е Јеховаскири организација те овел мангипе — особина пали која со пенџарена пе о чачутне христијања (Јован 13:35).

10. Со ваљани те кере ако мислинеа туке кај несаве проблемија ко собрание на решинена пе сар со ваљани?

 ¹⁰ Со ако мислинеа туке кај иси проблемија ко собрание хем кај на решинена пе сар со ваљани? Наместо те жалине тут, шукар тано те сикаве понизност аѓаар со ка поддржине околен со предводинена (Евр. 13:17). Со ка поможинел туке ко адава? Пуч тут: „Дали о проблемија со дикхава чаче тане добором баре со ваљани те овен решиме? Дали акана тано време те решинен пе? Дали ме сиум адава со ваљани те решинел лен? Хем, те овав искрено, дали чаче мангава те аракхав о јекхипе ко собрание или те истакнинав ман?“

11. Спрема Ефешаните 4:2, 3, саво тано о резултати кеда понизно служинаја е Јеховаске?

¹¹ Е Јеховаске бут поважно тано некој те овел понизно него те овел способно. Освен адава, поважно леске о јекхипе него са те завршинел пе сигате хем ефикасно. Адалеске, де тутар тло најшукар те шај те служине леске „секогаш понизно“. Аѓаар ка кере те овел позорало о јекхипе ко собрание. (Читин Ефешаните 4:2, 3.) Кер са со шај ки служба. Трудин тут те аракхе начинија те служине е јаверенге аѓаар со ка кере ленге шукарипе. Ов гостопримливо спрема сарине, а на само спрема окола со иси лен посебна одговорностија ко собрание (Мат. 6:1-4; Лука 14:12-14). Џикоте понизно соработинеа е пхраленцар хем е пхењенцар, о јавера ка дикхен на само тли способност него хем тли понизност.

12. Со вакерела и Библија башо амалипе?

¹² О Јехова мангела те накхава време е амаленцар хем е фамилијаја, хем те уживина ко асавко дружибе (Пс. 133:1). Е Исусе сине  ле шукар амала (Јован 15:15). И Библија вакерела кај тано важно те овел амен чачутне амала (Изр. 17:17; 18:24). Освен адава, ој вакерела кај нане шукар те цида амен е јаверендар (Изр. 18:1). Бут џене мислинена кај преку о социјална мреже шај те овен лен бут амала хем те на осетинен пе коркори. Сепак, мора те пазина сар користинаја лен.

13. Соске несаве со користинена социјална мреже осетинена пе коркори хем разочариме?

¹³ О истражувања сикавена кај о мануша со трошинена бут време те дикхен слике хем коментарија кола со о јавера чхивена лен ко социјална мреже, ко крајо шај уствари те осетинен пе коркори хем разочариме. Соске? Јекх причина шај те овел адава со ко социјална мреже о мануша најчесто чхивена слике само таро пле најшукар моментија ко живото. На пример, чхивена бириме слике пестар, пле амалендар хем таро интересна тхана коленде со сине. Кеда некој дикхела адала слике, шај те мислинел песке кај лескоро живото нане интересно, па чак кај тано бут досадно. Јекх пхен со иси ла 19 берш, вакерела: „Осетинава ман сине разочарими кеда дикхава сине сар о јавера забавинена пе ко викендија, а ме досадинава ман кхере“.

14. Сар шај те поможинел аменге о библиско совет таро 1. Петрово 3:8 башо адава сар те користина о социјална мреже?

¹⁴ Џанѓола пе, о социјална мреже шај те овен корисна. На пример, преку ленде шај те ова ко контакт е фамилијаја хем е амаленцар. Ама, дали приметинѓан кај о мануша чхивена несаве буќа ко социјална мреже те шај те истакнинен коркори песте? Сар те пхене мангена те вакерен: „Дикх ман, дикх ман!“ Несаве чак чхивена непристојна хем безобразна коментарија ко пле слике или ко слике со чхивена о јавера. Акава тано спротивно тари понизност хем таро сочувство коленде со поттикнинела амен и Библија. (Читин 1. Петрово 3:8.)

15. Сар и Библија поможинела амен те на мислина кај сием бут важна?

¹⁵ Ако користинеа социјална мреже, пуч тут: „Дали таро мле коментарија, слике или видеоклипија о јавера шај те мислинен кај фалинава ман? Дали башо адава несаве шај те овен љубоморна?“ И Библија вакерела: „Са сој ко свето — и желба е телоскири хем  и желба е јакхенгири хем те фалина амен е буќенцар со иси амен — на авела таро Дад, него авела таро свето“ (1. Јов. 2:16). Ко јекх библиско превод, о лафи „те фалина амен е буќенцар со иси амен“ тано преведимо сар „мангела те керел пе важно“. Е христијанен нане лен потреба те керен пе важна, а ни палем о јавера те дикхен лен сар бут важна. Ола тане послушна ко библиско совет: „Те на ова чалмџие, ма те натпреварина амен јекх јекхеа, те на завидина јекх јекхеске“ (Гал. 5:26). И понизност ка поможинел амен те на ова сар о мануша ко свето кола сој тане горда хем мангена те овен некој хем нешто ко е јаверенгере јакхја.

16. Соске на ваљани те ова горда?

¹⁶ Ваљани те трудина амен те ова понизна соске окола сој тане горда на дикхена ки песте разумно (Рим. 12:3). О горда мануша тане себична хем секогаш тане спремна те акошен пе. Ленгоро начин сар размислинена хем сар постапинена бут пути дукхавела е јаверен, а исто аѓаар керела штета ленге да. Ако на менинена пло начин сар размислинена, о Сатана ка корјакерел ленгири годи хем ка руминел ленгере мисле (2. Кор. 4:4; 11:3). Тари јавер страна, е понизно мануше иси ле разумно мислење баши песке. Ов дикхела реално хем урамнотежено ки песте, хем признајнела кај ко бут буќа о јавера тане пошукар лестар (Фил. 2:3). Освен адава, џанела кај „о Девел противинела пе околенге сој горда, а околенге сој понизна сикавела шукарипе со на заслужинена ле“ (1. Пет. 5:5). Окола со дикхена разумно ки песте на мангена о Јехова те овел ленге душмани.

17. Со мора те кера те шај те ачхова понизна?

¹⁷ Те шај те ачхова понизна, мора те применина акава совет тари Библија: „Хуљавен и пурани личност хем лакере постапке, а уравен тумен и неви личност“. Акава родела амендар те трудина амен бут. Ваљани те проучина е Исусескоро пример хем те да амендар са те шај те џа пали лесте (Кол. 3:9, 10; 1. Пет. 2:21). Ама, врединела те трудина амен те кера адава. Ако сикаваја понизност, ка овел амен бахтали фамилија, ка кера те овел јекхипе ко собрание хем ка џана сар те користина о социјална мреже ко исправно начин. Ама, најважно таро са, ка овел амен е Јеховаскири милост хем лескоро берекети.