1. Laha hentea ty Filipianina 2:3, manino ro ho soa fifandrambesa amin’olo tsika laha miambany?

MIAMBANY tsika ka maneky ty fitsipikini-Jehovah, satria azontsika antoky fa haini-Jehovah ze tena mahasoa antsika. (Efes. 4:22-24) Lafa miambany tsika, le ty raha teani-Jehovah ro ataontsika ambony fa tsy ty ahintsika, sady eritseretintsika ho mandilatsy antsika ty olo hafa. Ho soa fifandrambesa amy Jehovah noho amy mpiara-manompo reo tsika laha manao ani-zay.—Vakio Filipianina 2:3.

2. Ino ty raha nihaini-apostoly Paoly, le ino ty hodinihintsika amy lahatsoratsy toy ato?

² Fe laha tsy miamby soa tsika, le mety hitariky antsika ty olo amy tontoloni-Satana toy eto ka hahavy antsika hirengirengy noho ho tea tena. * Mety ho zay ty nahazo ani-Kristiana sisany tamy taonjato voalohany rey, kanao nanoratsy ho zao ho ani-Romanina reo apostoly Paoly hoe: “[Zay ro] mahavy ahy hivola amin’olo iaby aminareo eo hoe: Ka mieritseritsy ty vatanao mandilatsy ty tokony hieritsereta azy, fa lafa mieritseritsy iha, le ataovo raha kendrè ty ho lasa olo mandiniky soa.” (Rom. 12:3) Nihaini-Paoly hoe mila eritseretintsika ho misy dikany ty vatantsika. Fe laha miambany tsika, le hahay handanjalanja lafa mandiniky ty vatantsika. Manampy antsika tsy hieritseritsy tafahoatsy mikasiky ty vatantsika ty fiambanea.  Hodinihintsika amy lahatsoratsy toy ato ty lafiny telo ahitantsika ani-raha zay: 1) Amy ty tokantranontsika, 2) amy ty tombontsoam-panompoa ananantsika, le 3) amy ty fampiasantsika tranonkala fifandrambesa.

3. Manino ro ampoizy hoe mety tsy hifanaraky ty mpivaly, le ino ty ataon’olo sisany lafa miseho raha zay?

³ Namoro ty fanambalea Jehovah mba hahasambatsy ty mpivaly. Fe samby tsy lavorary rozy ka mety hisy ty tsy fifanaraha. Zay ro nahavy ani-Paoly hanoratsy hoe ampoizini-azy manambaly reo fa hisy fijalea hatrehin-drozy. (1 Kor. 7:28) Mialy matetiky amy valiny ty olo sisany, farany mivola hoe tsy mety amin-drozy ty mifanambaly. Laha fa voatarikini-tontolo toy rozy, le halaky hieritseritsy hoe ty fisaraha ro hampilamy raha. Mila manao ani-zay hoasany ie, satria ze hahasoa ty vatany avao ro vatan-draha marè.

4. Ino ty raha tsy tokony hoeritseretintsika?

⁴ Tokony hiezaky tsika mba tsy hieritseritsy hoe tsy ho vano mihintsy ty fanambaleantsika. Haintsika fa fijangajangà avao ro antony volanini-Soratsy Masy hoe ahafaha misaraky. (Mat. 5:32) Ka lafa tojiky fijalea niresahini-Paoly iny tsika, le tsy tokony hirengirengy ka hametsivetsy hoe: ‘Tsy avy amy ty ilàko azy fanambaleako toy. Tsy azoko iaby ndre ty fitiava tokony haseho amiko. Aleoko vasa miaraky amin’olo hafa mba hampiada ahy.’ Tsy mieritseritsy ty valiny ty olo manahaky ani-zay fa ty vatany avao ro hainy. Mety hampirisiky anao ty fahihirani-tontolo toy mba hanao ze raha irini-fonao noho mahafalifaly anao, ndre hiafara amy fisaraha aza. Fa ty fahendrea amy safà-Ndranahary ao, mananatsy anao ‘mba hieritseritsy ze hahasoa ty hafa, fa tsy ze hahasoa ty vatanao avao.’ (Fil. 2:4) Teani-Jehovah haharitsy ty fanambalea, fa tsy ho rava. (Mat. 19:6) Teany koa laha Ie tse  ro eritseretintsika voalohany, fa tsy ty vatantsika.

5. Ino ty tokony hataoni-lahilahy noho ampela manambaly, laha hentea ty Efesianina 5:33?

⁵ Tokony hifankatea noho hifanaja ty mpivaly. (Vakio Efesianina 5:33.) Mampianatsy antsika ty Baiboly mba hifantoky amy ty raha azontsika amea fa tsy amy ty raha ho azontsika. (Asa. 20:35) Ino ty toetsy hanampy ty mpivaly hifankatea noho hifanaja? Ty fiambanea. Laha miambany ty lahilahy noho ampela manambaly, le tsy hila ze hahasoa ty vatany avao fa “ze hahasoa ty hafa.”—1 Kor. 10:24.

6. Ino ty azontsika ianara baka amy raha nivolanini-Steven noho Stephanie?

⁶ Mpivaly kristiana maro ro niambany, ka nihasambatsy ty tokantranon-drozy. Zao, ohatsy, ty raha nivolanini-lahilahy raiky manambaly atao hoe Steven: “Laha ekipy raiky nareo, le hiaraky miasa, sirtò lafa misy ty problemo. Aleo mieritseritsy hoe ‘ino ty tena hahasoa anay?’, tozay hanao ho zao hoe ‘ino ty tena hahasoa ahy?’ ” Ho zay koa ty tsapani-Stephanie valiny. “Tsy misy olo ta hiaraky mipetraky amy fahavalony zao”, hoasany. “Ka lafa tsy mifanaraky zahay, le ataonay ze hahaiza hoe baka aia raha manahira iny. Bakeo zahay mivavaky, manao fikaroha, le mifampiresaky. Resenay problemo iny fa tsy zahay roe ro mialy.” Mihasoa vatany ty fiainani-mpivaly laha samby tsy mieritseritsy ty vatany ho mandilatsy ani-valiny rozy.

7. Ino ty toe-tsay tokony hananani-rahalahy raiky lafa mahazo tombontsoam-panompoa?

⁷ Tombontsoa ho antsika ty hoe afaky manompo ani-Jehovah araky ze azontsika atao. (Sal. 27:4; 84:10) Laha misy rahalahy parè hanao raha ho ani-fandaminani-Jehovah, le tena derà ie. Mivola aza ty Baiboly hoe: “Laha misy olo miezaky ho lasa mpiandraikitsy, le maniry asa soa ie.” (1 Tim. 3:1) Fe lafa mahazo andraikitsy ie, le tsy tokony hieritseritsy ty vatany ho anabo. (Lioka 17:7-10) Tokony hiezaky avao ie mba hiambany ka hanompo ty hafa.—2 Kor. 12:15.

8. Ino ty ianarantsika baka amy ty raha nataoni-Diotrefa, Ozia noho Absaloma?

⁸ Misy tantaran’olo sisany nieritseritsy marè mikasiky ty vatany amy Baiboly ao. Tsy niambany, ohatsy, Diotrefa. Niezaky “ho voalohany” amy fiangona eo ie. (3 Jaona 9) Nanambony tena koa Ozia, ka nanao andraikitsy tsy nampanaovini-Jehovah azy. (2 Tan. 26:16-21) Le Absaloma, nanao tetiky mba hahavy ty olo hanoha azy satria ta ho mpanjaka ie. (2 Sam. 15:2-6) Hita mazava soa amy tantara amy Baiboly ao reo fa tsy teani-Jehovah ty olo mila voninahitsy ho ahi-ty vatany. (Ohab. 25:27) Sady raty avao ty vokany lafa ty olo raiky manambony tena noho mirengirengy.—Ohab. 16:18.

9. Ino ty modely nengani-Jesosy?

⁹ Tsy nitovy amy zay mihintsy Jesosy. “Ndre fanahy manahaky a-Ndranahary aza ie, le tsy nieritseritsy handrava fahefà mihintsy, na hoe hitovy amy Ndranahary.” (Fil. 2:6) Jehovah avao ro mana fahefà anaboni-Jesosy, fe tsy nieritseritsy ty vatany ho anabo marè ie. Hoy ty asany tamy mpianatsiny reo: “Ze manday ty vatany sahala amy kelikely marè aminareo iaby le ie ro ho be.” (Lioka 9:48) Miambany manahaky ani-Jesosy ty mpisava lala, mpanampy amy fanompoa, anti-panahy noho mpiandraikitsini-faritsy reo. Tena tombontsoa ty miaraky manompo amin-drozy! Lafa miambany ty mpanomponi-Jehovah, le vomaiky hita hoe mifankatea vatany ty olo amy fandamina-Ndranahary ao.—Jaona 13:35.

10. Ino ty tokony hataonao laha mahatsapa iha hoe tsy voalamy soa ty raha manahira sisany amy fiangona eo?

 ¹⁰ Manao akory laha mahatsapa iha hoe tsy voalamy soa ty raha manahira sisany amy fiangona eo? Aleo miambany noho manoha ani-azy mitariky reo tozay himenimeny. (Heb. 13:17) Mba hahavitanao ani-zay, le eritsereto zao: ‘Tena bevata va problemo io ka tsy maintsy alamy? Zao va ty fotoa mety mba handamina azy? Andraikitsiko va ty mandamy azy? Tena ta hampiharo raiky ty fiangona vatany va aho, sa ta handrengy vata?’

11. Laha hentea ty Efesianina 4:2, 3, ino ty vokany laha tsika miambany lafa manompo ani-Jehovah?

¹¹ Ndre manam-pahaiza noho mahavita raha aza tsika, le mbo lafovily marè mandilatsy ani-zay ty fahitani-Jehovah antsika lafa miambany noho miharo raiky. Ka anovo ze azonao atao mba hiambany lafa manompo ani-Jehovah. Lafa manao ani-zay iha, le hampiharo raiky ty fiangona. (Vakio Efesianina 4:2, 3.) Mazotoa manompo. Milà fomba hanompoa ty hafa ka manaova raha soa ho azy. Miezaha ho tea mandramby vahiny ka asao ty olo iaby, anatini-zay azy tsy mana andraikitsy amy fiangona eo rey. (Mat. 6:1-4; Lioka 14:12-14) Laha miambany iha ka miaraky miasa amy fiangona, le ho hitan-drozy ty fahaizanao, fe tsy zay avao fa ty fiambaneanao koa.

12. Mampirisiky antsika hana nama va ty Baiboly? Hazavao.

¹² Teani-Jehovah ho falifaly tsika lafa miaraky amy ty longontsika noho ty namantsika. (Sal. 133:1) Nana nama soa Jesosy. (Jaona 15:15) Resahini-Baiboly hoe ino ty soa ho azontsika lafa mana ty tena nama tsika. (Ohab. 17:17; 18:24) Le volaniny amintsika koa hoe  tsy soa ty mitokatoka. (Ohab. 18:1) Maro ty mieritseritsy hoe fomba ahazoa nama maro ty tranonkala fifandrambesa sady mahavy ty olo tsy hangiky. Fe mila mitandrina tsika lafa mampiasa tranonkala fifandrambesa.

13. Manino ty olo sisany mampiasa tranonkala fifandrambesa ro mahatiaro mangiky noho kivy?

¹³ Hitani-mpikaroky fa lafa mandany fotoa maro mandefandefa sary noho video amy tranonkala fifandrambesa ao ty olo raiky, le mety vomaiky hangiky noho ho kivy. Ino ty antony? Matetiky ty olo lafa mandefa sary amy Internet ao, le mampiseho ty raha niavaky tamy fiainany, fa filifiliny soa koa raha rey ka ze teateany amy ty sariny na sarini-namany, na pilasy soasoa nandehanany rey avao ro ataony ao. Lafa manenty ani-sary rey amy zay ty olo hafa, le mety hampitaha amy ty azy ka hanao ho zao hoe tsy soa ty fiainany, na mahaentsaky mihintsy aza. Nieky ani-zay ranabavy raiky 19 tao toy. Hoy ty asany: “Nanjary tsy falifaly aho lafa nahita hoe manala azy ty olo hafa lafa farani-herinandro. Nimorimoritsy aho tan-trano ao.”

14. Manino ty torohevitsini-Baiboly amy 1 Petera 3:8 ao ro manampy antsika hahay hampiasa ty tranonkala fifandrambesa?

¹⁴ Azo ampiasà amy fomba soa ty tranonkala fifandrambesa, ohatsy hoe hifampiresaha amy fianakavia noho nama. Fe ambinao va fa ataon’olo handrengea ty vatany ty sisany amy raha apetrakin-drozy amy internet ao rey? Ho raha ta hanao ho zao rozy hoe “henteo aho.” Ty olo sisany aza manao safà maloto na mahamenatsy mihintsy, lafa manoratsy mikasiky ty sariny na ty sarin’olo hafa. Tsy tokony hanao manahaky ani-zay ty Kristiana, satria ampirisihy tsika mba hiambany noho hieritseritsy ty fihetseham-pon’olo.—Vakio 1 Petera 3:8.

15. Akory ty anampeani-Baiboly antsika tsy hirengirengy?

¹⁵ Eritsereto zao lafa mampiasa tranonkala fifandrambesa iha: ‘Manao akory ty fahitan’olo ahy lafa manenty ty hafatsy noho sary, na video alefako? Mizesta va ty fahitan-drozy ahy? Mety hahavy an-drozy hialona va ty raha ataoko?’ Mivola ty Baiboly hoe: “Ty raha iaby amy zao tontolo zao eo, zany hoe ty faniriani-nofotsy  noho ty faniriani-maso voho ty fampizelazelà hanana, le tsy baka amy Baba fa baka amy zao tontolo zao.” (1 Jaona 2:16) Nadikani-Baiboly raiky hoe “ta hampiseho ty vatany ho anabo” ty safà hoe “fampizelazelà hanana.” Tsy maniry horengerengè ty Kristiana. Orihin-drozy torohevitsini-Baiboly toy hoe: “Soa tsika laha tsy mirengirengy ka hampisy kapindry noho fialona.” (Gal. 5:26) Hanampy antsika hanalavitsy ty toe-tsay feno fitiavan-tena amy tontolo toy eto ty fiambanea.

16. Manino tsika ro tsy tokony hanambony tena?

¹⁶ Mila miambany tsika satria tsy “mandiniky soa” ze olo manambony tena. (Rom. 12:3) Tea manao kapindry noho tea tena ty olo manambony tena. Ty raha eritseretiny noho ataony avao matetiky ro mahavoa ty vatany noho ty olo hafa. Laha tsy manova ty eritseritsiny ie, le hanjiky noho hanimba ty sainy Satana. (2 Kor. 4:4; 11:3) Tsy ho zay ty olo miambany, fa mandiniky soa. Mahay mandanjalanja ie lafa mandiniky ty vatany, satria ekeny fa maro ty raha mahavy ty hafa ho anabo mandilatsy azy. (Fil. 2:3) Sady hainy hoe “Ndranahary manohitsy ty manambony tena, fa mampiseho hasoam-panahy tsy manam-paharoe amy ty olo miambany.” (1 Pet. 5:5) Tsy tean’olo mandiniky soa ty hanjary fahavaloni-Jehovah.

17. Mila manao ino tsika laha ta hiambany avao?

¹⁷ Laha ta hahavita hiambany avao tsika, le mila manoriky ty torohevitsini-Baiboly hoe: “Ario any ty toetsy taloha, miaraky amy ty fomba iaby niaraky taminy, le sikino ty toetsy vaovao.” Tsy maintsy miezaky mafy tsika. Mila mianatsy ty modelini-Jesosy tsika sady miezaky hanahaky azy araky ze azontsika atao. (Kol. 3:9, 10; 1 Pet. 2:21) Fe tsy ho matiantoky tsika. Laha mana fiambanea tsika, le hihasoa ty fiainam-pianakaviantsika, hampisy fiharoa raiky amy fiangona eo tsika, sady hahay hampiasa soa ty tranonkala fifandrambesa. Fa ty vatan-draha marè, le hoe hotahini-Jehovah tsika sady hahazo hatò aminy.