1. Unfa di sakafasi di woo abi o mbei u ku wotowan dë gaan mati, te u luku Filipi 2:3?

U TA saka useei a Jehovah basu, u di u sabi taa hii juu a ta sabi andi möön bunu da u (Ef. 4:22-24). Ee u abi sakafasi, nöö woo ta tei taa dee soni di Jehovah kë, dë fanöudu möön dee useei kë, söseei woo ta si wotowan hei möön u. Di soni aki o mbei u ku Jehovah dë gaan mati, söseei u ku dee baaa ku dee sisa u di kemeente o dë gaan mati tu.​—Lesi Filipi 2:3.

2. Andi apösutu Paulosu bi taki, nöö andi woo luku a di woto aki?

² Ee wa ta köni, nöö u sa ko dë kuma dee sëmbë u di goonliba aki dee abi gaanfasi, söseei dee ta pakisei deseei nöö. * A kan taa di soni aki bi ta miti dee fesiten Keesitu sëmbë, möönmöön te u luku di soni di apösutu Paulosu bi sikifi da dee Keesitu sëmbë u Loomë. A bi taki taa: „Mi ta fan ku hiniwan fuunu taa ja musu luku i seei hei möön fa i dë e. Ma i musu ta wegi i seei ku bumbuu pakisei” (Lom. 12:3). Paulosu an bi kë taki taa wa musu ta lesipeki useei. Ma sakafasi o heepi u fu wa si useei möön fa a dë fanöudu. A di woto aki woo taki unfa u sa lei taa u abi sakafasi te u tööu, te de da u faantiwöutu a di ölganisaasi u Jehovah, söseei te u ta wooko ku Internet.

3. Faandi mbei bookohedi ta dë a wan tööu libi, nöö unfa so sëmbë ta suku u puu dee bookohedi dë?

³ Jehovah seti di tööu libi a sö wan fasi taa womi ku mujëë di tööu sa ta piizii makandi. Ma u di de da zöndu libisëmbë, mbei a kan taa na hii juu de o ta kai a wan. Paulosu bi sikifi taa dee sëmbë dee tööu, o abi bookohedi (1 Kol. 7:28). So sëmbë sa ta feni taa de ku de manu nasö de mujëë ta kisi toobi hii juu, nöö de ta si kuma de an bi musu tööu ku deseei. Wë ee de bi ko ta pakisei kumafa dee sëmbë u di goonliba aki ta pakisei, nöö de o sa si kuma a möön bunu u de booko tööu. De o pakisei deseei nöö, nöö de o si kuma di wan kodo fasi fa de sa dë waiwai baka, hën da te de booko di tööu.

4. Ku un soni u musu ta köni?

⁴ Wa musu mbei a ko pasa taa wa dë tifeedi ku di tööu libi fuu möön. U ta fusutan taa di wan kodo fasi fa Bëibel ta da sëmbë pasi u de booko tööu, hën da te wan u de waka da di wotowan (Mat. 5:32). Fëën mbei te u abi bookohedi a di tööu libi fuu kumafa Paulosu bi taki, nöö gaanfasi an musu mbei u ko ta hakisi useei taa: ’Di tööu libi aki ta mbei mi feni dee soni dee mi abi fanöudu ö? Mi ta feni di lobi di mi fiti u feni ö? Mi o ta möön piizii ee mi tööu ku wan woto sëmbë u?’ Ee sö u ta pakisei, nöö hën da u ta pakisei useei nöö, ma na di sëmbë di u ku ën tööu. Di köni u di goonliba aki o lei i taa i musu haika di hati fii, nöö i musu du di soni di ta mbei i dë waiwai, aluwasi ee i musu booko di tööu fii. Di köni di Gadu ta da sëmbë ta taki taa ’ja musu ta mëni fii wanwan soni nöö a kaba, ma i musu ta mëni soni u di wotowan fii tu’ (Fil. 2:4). Jehovah an kë fii booko di tööu fii, ma a kë fii dë a di tööu libi go dou (Mat. 19:6). Jehovah kë fii pakisei ën fosu, ma ja musu pakisei iseei fosu.

5. Unfa wan womi ku wan mujëë di tööu musu ta libi ku deseei, te u luku Efeise 5:33?

 ⁵ Wan womi ku wan mujëë di tööu, musu ta lobi deseei, söseei de musu ta lesipeki deseei. (Lesi Efeise 5:33.) Di Bëibel ta lei u taa u musu ta buta pakisei a di da di u musu ta da wotowan soni, möön di fa u ta buta pakisei a di feni di u musu ta feni (Tjab. 20:35). Andi o heepi wan womi ku wan mujëë di tööu u de sa ta lobi deseei ta lesipeki deseei? Wë sakafasi hën o heepi de. Wan womi ku wan mujëë di tööu di abi sakafasi, an o pakisei fëën wanwan soni nöö a kaba, ma a o buta pakisei möön gaanfa a di wotowan fëën.​—1 Kol. 10:24.

6. Andi i ta lei a di soni di Steven ku Stephanie bi taki?

⁶ Sakafasi bi heepi sömëni Keesitu sëmbë di tööu, u de sa ko ta möön dë waiwai a di tööu libi u de. Wan baaa di tööu de kai Steven, bi taki taa: „I ku di sëmbë di i ku ën tööu musu ta du soni makandi, möönmöön te bookohedi ko. Ka fii pakisei taa ’Andi möön bunu da mi?’, nöö i musu ta pakisei taa ‘Andi möön bunu da u tu sëmbë?’” Di mujëë u di baaa aki de kai Stephanie, nöö a bi taki sö wan pei soni tu. A bi taki taa: „Na wan sëmbë kë libi ku wan sëmbë di ta kisi toobi ku ën hii juu. Te wa kai a wan a wan soni, nöö u ta mbei möiti fuu ko sabi unfa a du waka. U ta begi Jehovah, u ta öndösuku soni, nöö u ta taki unfa u sa seeka di bookohedi dë. U ta feti u puu di bookohedi, ma wa ta feti ku useei.” Womi ku mujëë di tööu o ta möön dë waiwai te de an ta pakisei taa de hei möön di wotowan u de.

7. Andi wan baaa musu du te de dëën wan faantiwöutu a di ölganisaasi u Jehovah?

⁷ Wan gaandi u feni fuu sa ta dini Jehovah a hiniwan fasi di u sa dini ën (Ps. 27:4; 84:10). Ee wan baaa kë du möön soni a di ölganisaasi u Jehovah, nöö a dë wan gaan bunu soni seei. Di Bëibel seei ta taki taa: „Ee wan sëmbë kë di wooko dë, nöö gaan bumbuu wooko a kë” (1 Tim. 3:1). Ma tökuseei ee de dëën wan faantiwöutu, nöö an musu pakisei taa a hei möön wotowan (Luk. 17:7-10). Di baaa aki musu ta kë heepi wotowan ku sakafasi.​—2 Kol. 12:15.

8. Andi u ta lei a di woto u Dioteefesi, Usia, ku Absalöm?

⁸ Di Bëibel ta konda woto da u u sëmbë di bi ta pakisei deseei tumisi. Dioteefesi an bi abi sakafasi. A bi ta suku u „dë fesima” a di kemeente (3 Joh. 9). Usia bi suku u du wan wooko di Jehovah an bi dëën faa du (2 Klon. 26:16-21). Absalöm bi suku fasi faa sa toon könu. Fëën mbei a bi du kuma a bi lobi dee sëmbë, sö taa de bi sa butëën ko könu (2 Sam. 15:2-6). Dee woto u Bëibel aki ta lei u gbelingbelin taa Jehovah an lobi te sëmbë ta suku u wotowan gafa de (Nöng. 25:27). Te u kaba fëën, dee sëmbë dee abi gaanfasi nasö dee ta suku u sëmbë ta buta pakisei a de hii juu, o ta abi bookohedi.​—Nöng. 16:18.

9. Unfa Jesosi bi du soni, nöö unfa u sa waka nëën baka?

⁹ Jesosi an bi dë kuma dee womi dee u taki u de dë. Hii fa Jesosi „bi dë kuma Gadu, tökuseei an pena pakisei u tei di hei fëën ku taanga faa bi sa dë kuma Gadu” (Fil. 2:6, NW). Hii fa Jehovah wanwan hei möön Jesosi, tökuseei Jesosi an ta si hënseei hei möön fa a dë fanöudu. A bi piki dee bakama fëën taa: ’Di sëmbë di a’ sakafasi te a ta buta hënseei a hii dee otowan fëën basu, nöö hën da di möön hei sëmbë a Masa Gadu wojo’ (Luk. 9:48). A dë wan piizii soni seei u wooko makandi ku sëmbë di ta djeesi Jesosi a di sakafasi di a abi! Dee sëmbë aki sa dë sëmbë di ta du di pioniliwooko, dinai, gaanwomi, nasö sëmbë di ta du di keling-gaanwomi wooko. Ee u abi sakafasi, nöö woo sa möön lei wotowan taa u lobi de. Jesosi bi taki taa dee tuutuu dinima u Gadu, bi o ta lei taa de lobi de na de.​—Joh. 13:35.

10. Andi i musu du ee i ta si kuma dee gaanwomi an ta seeka soni a di kemeente kumafa a fiti?

 ¹⁰ Andi i musu du ee i si kuma wan soni an nango bunu a di kemeente, nöö i ta si kuma dee gaanwomi an ta seekëën kumafa a fiti? Ka fii dë ta kuutu, nöö i sa lei taa i abi sakafasi, u di i ta wooko makandi ku dee gaanwomi (Heb. 13:17). Fii sa du di soni aki, nöö i musu hakisi iseei dee soni aki: ’Dee soni aki dë gaan soni sö tee taa de musu seeka de u? Nöunöu da di bunu ten u dee soni dë musu seeka u? Mi hën abi di faantiwöutu u seeka de u? Dee sëmbë u di kemeente mi kë heepi u de ko ta möön libi fiifii ku deseei ö, naa mi kë lei wotowan taa mi sa’ u du soni möön bunu?’

11. Andi o pasa te u ta lei taa u abi sakafasi a di dini di u ta dini Jehovah, te u luku Efeise 4:2, 3?

¹¹ Aluwasi u sa’ u du so soni bunu tee, tökuseei Jehovah ta möön lobi te u abi sakafasi, söseei te u ta suku u libi fiifii ku wotowan. Fëën mbei i musu mbei hii möiti fii sa ta dini Jehovah ku sakafasi. Te u ta du sö, nöö u ta da u na u taanga fuu sa ta libi fiifii ku useei. (Lesi Efeise 4:2, 3.) Mbei hii möiti fii sa ta dë a di peleikiwooko. Suku fasi fii ta du soni da wotowan. Tei wotowan ku wai a i pisi, aluwasi ee de an dë sëmbë di abi faantiwöutu a di kemeente (Mat. 6:1-4; Luk. 14:12-14). Ee i ta mbei möiti fii abi sakafasi, söseei ee i ta wooko makandi ku dee baaa ku dee sisa fii, nöö de o si taa i sa’ u du soni, ma de o si tu taa i abi sakafasi.

12. Di Bëibel ta da u taanga fuu abi mati ö?

¹² Jehovah lobi te u ta piizii makandi ku dee famii fuu, söseei ku dee mati fuu (Ps. 133:1). Jesosi bi abi bunu mati (Joh. 15:15). Di Bëibel seei ta taki u dee wini dee i ta feni te i abi bunu mati (Nöng. 17:17; 18:24). Söseei di Bëibel ta  piki u taa an bunu fuu ta dë u wanwan, nöö wa ta hulu wotowan (Nöng. 18:1). Sömëni sëmbë ta feni taa dee peipei fasi fa i sa ta fan ku sëmbë a Internet ta mbei i ko abi hia mati, söseei de ta heepi i fu ja ta fii taa i dë i wanwan. Ma tökuseei u musu ta köni ku di fasi fa u ta wooko ku de.

13. Faandi mbei so sëmbë di lo’ u luku soni di wotowan ta buta a Internet, ta fii bookosaka nasö de ta fii kuma de dë de wanwan?

¹³ Öndösukuma ko si taa dee sëmbë dee ta tei sömëni ten ta luku dee soni di sëmbë buta a Internet, sa ko ta fii taa de dë de wanwan, te u kaba fëën. Söseei de sa fii bookosaka gaanfa seei. Faandi mbei di soni aki sa dë sö? Wë sëmbë lo’ u buta footoo a Internet di ta lei unfa di libi u de dë bunu tjika, nasö u lei unfa deseei dë, nasö dee mati u de, nasö u lei dee waitiwaiti kamian ka de bi go. Ma te wan sëmbë ta luku dee footoo aki, nöö a sa ko ta maaka di libi fëën ku wotowan. A sa fii taa di libi fëën an dë wan apaiti, nasö taa an dë na wan hojo soni. Wan sisa di abi 19 jaa bi taki taa: „An bi ta suti da mi seei te mi bi ta si unfa wotowan ta piizii a sata ku sonde, nöö mi mi bi ta dë a wosu ta fuufei.”

14. Unfa dee soni dee sikifi a 1 Petuisi 3:8, ta heepi u fuu wooko ku Internet a wan köni fasi?

¹⁴ A dë sö tuu taa i sa wooko ku Internet a wan bunu fasi. I sa wooko ku ën u fan ku dee famii fii ku dee mati fii. Ma ja buta mëni taa so sëmbë ta sikifi soni buta a Internet nasö taa de ta buta footoo ku fëlön a Internet u sëmbë musu buta pakisei a de u? A ta djei kuma de ta piki sëmbë taa: „Un luku mi nö!” So sëmbë ta sikifi goofu soni buta a dee footoo di de ta buta a Internet, nasö a dee footoo di wotowan ta buta. Di Bëibel ta da u dee Keesitu sëmbë taanga fuu abi sakafasi, söseei fuu ta fii da wotowan. Fëën mbei wa o wooko ku Internet a dee lö fasi dë.​—Lesi 1 Petuisi 3:8.

15. Unfa di Bëibel sa heepi u fu wa du soni, u mbei a djei kuma u hei möön wotowan?

¹⁵ Ee i ta wooko ku Internet u fan ku wotowan, nöö hakisi iseei dee soni aki: ’Dee soni dee mi ta sikifi, nasö dee footoo ku dee fëlön dee mi ta buta a Internet, ta da wotowan di pakisei kuma mi ta fii miseei ö? Mi sa mbei wotowan ko ta haun ku mi ö?’ Di Bëibel ta taki taa: „Dee taku kë u libisëmbë hati ku langawojo ku gaan fasi, nöö dee lö soni dë dë soni  u goonliba. De an dë fuu Tata Masa Gadu” (1 Joh. 2:16). Wan Bëibel puu di pisi „gaan fasi”, ko „di kë di sëmbë ta kë u sëmbë si de hei möön fa de dë”. An dë fanöudu u dee Keesitu sëmbë ta hei deseei. De ta wooko ku di soni di sikifi a di Bëibel di ta taki taa: „Wan musu ta suku hei ku në, biga dee soni dë ta tja haun ku toobi ko” (Gal. 5:26). Sakafasi o heepi u fu wa ko dë kuma dee sëmbë u di goonliba aki dee abi gaanfasi, söseei dee ta kë u wotowan si de hei.

16. Faandi mbei wa musu abi gaanfasi?

¹⁶ U musu mbei möiti fuu ko abi sakafasi, u di sëmbë di abi gaanfasi an ta wegi deseei ku „bumbuu pakisei” (Lom. 12:3). Sëmbë di abi gaanfasi, lo’ u kisi toobi ku wotowan, söseei de ta pakisei deseei nöö. Di fasi fa de ta pakisei, ku dee soni di de ta du, ta mbei de ku wotowan tuu fii pen bakaten. Ee de an tooka di fasi fa de ta pakisei, nöö Saatan o kisi de ganjan (2 Kol. 4:4; 11:3). Wan sëmbë di abi sakafasi, da wan sëmbë di abi „bumbuu pakisei”. An ta si hënseei kumafa an dë fanöudu, söseei a ta sabi taa wotowan sa du sömëni soni di hën an sa du (Fil. 2:3). A ta sabi taa „Gadu dë felantima u dee sëmbë dee abi gaan fasi, ma dee sakafasi sëmbë a ta heepi ku ën bunuhati” (1 Pet. 5:5). Dee sëmbë dee abi wan bumbuu pakisei, an o kë hopo fia ku Jehovah.

17. Andi u musu ta du hii juu fuu sa ta lei taa u abi sakafasi?

¹⁷ Ee u kë ta lei hii juu taa u abi sakafasi, nöö u musu ’tooka dee fasi dee u bi abi fosu, nöö u kaba ku dee soni dee u bi ta du. U musu ko dë njunjun sëmbë di abi njunjun fasi’. U musu mbei taanga möiti fuu sa du di soni aki. U musu lei soni u Jesosi, söseei u musu mbei möiti fuu djeesi ën ka u sa djeesi ën dou (Kol. 3:9, 10; 1 Pet. 2:21). Ee u du ën, woo feni wini fëën. Te u ta mbei möiti fuu ko abi sakafasi, dee sëmbë fuu wosudendu o ko ta möön dë waiwai, woo ta libi fiifii ku useei a di kemeente, söseei wa o ta buta soni a Internet u sëmbë buta pakisei a u, nasö u de si kuma u hei möön de. Ma di möön fanöudu soni, hën da Jehovah o mbei u feni gaan bunu, söseei a o wai ku u.