1. Sortu rai Filipisma 2:3 e gi wi èn sortu wini wi o kisi te wi e du san a tekst e taki?

WI E saka wisrefi ondro Yehovah fu di wi sabi taki ala ten a sabi san bun gi wi (Ef. 4:22-24). Te wi abi sakafasi, dan wi no o du san wi wani, ma wi o du san Yehovah wani èn wi o si trawan moro hei leki wisrefi. Disi e meki taki wi abi wan bun matifasi nanga Yehovah èn nanga wi brada nanga sisa.​—Leisi Filipisma 2:3.

2. Fa wi musu denki fu wisrefi soleki fa na apostel Paulus ben sori èn san wi o luku na ini na artikel disi?

² Ma efu wi no luku bun, dan wi kan teki a denki abra fu den sma fu grontapu di abi heimemre èn di e denki densrefi nomo. * A sori leki son Kresten na ini Rome na ini a ten fu na apostel Paulus ben teki a denki abra fu grontapu. Dati meki Paulus ben taigi den: „Mi e taigi un alamala drape fu no denki moro fu unsrefi leki san de fanowdu. Ma ibriwan fu unu musu tyari ensrefi na wan fasi di e sori taki a de nanga krin frustan” (Rom. 12:3). Aladi wi no musu denki tumusi furu fu wisrefi, toku wi no musu denki taki wi no warti noti. Sakafasi o yepi wi fu abi wan yoisti denki fu wisrefi. Na ini na artikel disi wi o luku fa wi kan sori taki wi abi sakafasi te wi trow, te wi kisi grani na ini a gemeente èn te wi e gebroiki Internet.

3. Fu san ede trowpaar kan fruwakti taki den o kisi problema na ini den trowlibi èn fa son sma e pruberi fu lusu den problema disi?

³ Yehovah wani taki masra nanga wefi abi wan koloku trowlibi. Ma fu di den na sondusma, meki den no o agri nanga makandra ala ten. Paulus ben taki dati sma ben o kisi problema na ini den trowlibi son leisi (1 Kor. 7:28). Son trowpaar e meki trobi ala ten èn den feni taki a ben o moro bun efu den no ben trow nanga makandra. Efu den teki a denki fu grontapu abra, den kan prakseri fu broko a trow. Den o prakseri densrefi nomo èn den o feni taki den o de koloku soso efu den broko a trow.

4. San wi no musu du?

⁴ Wi no musu denki taki a moro bun fu broko a trow fu di a libi no e go. Wi musu hori na prakseri taki Bijbel e gi wan sma pasi fu brokotrow soso te a patna fu en du hurudu (Mat. 5:32). Te son sma e kisi problema na ini a trowlibi, dan kande den e aksi densrefi: ’Mi de koloku na ini a trow disi? Mi e kisi a lobi di mi musu kisi? Mi o de moro koloku efu mi trow nanga wan tra sma?’ Efu wi ben o denki so, dan wi ben o sori taki wi abi heimemre èn taki wi e prakseri wisrefi nomo. Sma fu grontapu ben o taigi yu fu du san yu ati e taki èn fu du san o meki yu de koloku, awinsi yu musu broko a trow. Ma Bijbel e taki dati yu ’no musu poti prakseri na yu eigi afersi nomo, ma yu musu poti prakseri na den afersi fu trawan tu’ (Fil. 2:4). Yehovah wani taki yu musu tan nanga yu trowpatna, a no wani taki yu brokotrow (Mat. 19:6). A wani taki yu gi yesi na en, na presi fu du san yu wani.

5. Soleki fa Efeisesma 5:33 e sori, dan fa masra nanga wefi musu libi nanga makandra?

 ⁵ Masra nanga wefi musu sori lobi nanga lespeki gi makandra. (Leisi Efeisesma 5:33.) Bijbel e leri wi taki a moro bun fu gi sani, na presi fu kisi sani (Tori 20:35). Sortu fasi trowpaar musu abi fu man sori lobi nanga lespeki gi makandra? Den musu abi sakafasi. Te masra nanga wefi abi sakafasi, dan den no o suku den eigi bun, ma den o ’suku a bun fu a trawan’.​—1 Kor. 10:24.

6. San yu e leri fu den sani di Steven nanga Stephanie taki?

⁶ Sakafasi yepi furu Kresten trowpaar fu de moro koloku na ini den trowlibi. Fu eksempre, wan masra di nen Steven e taki: „Yu nanga yu trowpatna musu wroko makandra leki wán man, spesrutu te unu e kisi problema. Na presi fu denki ’san bun gi mi?’ yu musu denki ’san bun gi wi?’” En wefi Stephanie abi a srefi denki. A e taki: „Nowan sma wani libi nanga wan sma di lobi meki trobi. Te wi no e agri nanga makandra, dan wi e pruberi fu si san na a problema. Baka dati wi e begi, wi e luku san Bijbel e taki fu a tori, dan wi e taki nanga makandra. Wi e feti nanga a problema, wi no e feti nanga wisrefi.” Masra nanga wefi o de moro koloku te den no e denki taki den prenspari moro den patna.

7. San wan brada musu hori na prakseri efu a kisi frantwortu na ini na organisâsi fu Yehovah?

⁷ Wi e si en leki wan grani fu wroko gi Yehovah (Ps. 27:4; 84:10). Efu wan brada de klariklari fu du moro gi Yehovah, dan dati na wan bun sani. Bijbel e taki: „Efu wan man e suku fu tron wan sma di e teki fesi na ini a gemeente, dan a e suku fu du wan tumusi bun wroko” (1 Tim. 3:1). Ma te wan brada kisi wan frantwortu, a no musu bigin denki furu fu ensrefi (Luk. 17:7-10). A musu hori na prakseri taki a frantwortu di a kisi, na fu dini tra sma. Dati meki a musu abi sakafasi.​—2 Kor. 12:15.

8. San wi e leri fu na eksempre fu Diotrefes, Usia nanga Absalom?

⁸ Bijbel abi eksempre fu sma di ben e denki tumusi furu fu densrefi. Diotrefes no ben abi sakafasi èn dati meki a ben wani teki „a fosi presi” na ini a gemeente (3 Yoh. 9). Usia ben wani du wan wroko di Yehovah no ben gi en fu du (2 Kron. 26:16-21). Absalom ben wani tron kownu. Dati meki a ben du neleki a ben lobi a pipel, so taki den ben o horibaka gi en (2 Sam. 15:2-6). Den eksempre disi e sori taki Yehovah no lobi sma di e suku den eigi glori (Odo 25:27). Te fu kaba sma di abi heimemre èn di e suku biginen e kon na ini problema.​—Odo 16:18.

9. Sortu eksempre Yesus gi wi?

⁹ Yesus ben de heri tra fasi leki den man disi. Bijbel e taki: „Aladi a ben de leki fa Gado de, toku a no prakseri fu teki a makti fu en abra nanga tranga fu kan de a srefi leki Gado” (Fil. 2:6). Aladi Yesus na a moro makti sma baka Yehovah, toku a no e denki tumusi furu fu ensrefi. A ben taigi den disipel fu en: „A sma di e tyari ensrefi leki a moro lagiwan fu un alamala, na a sma dati bigi” (Luk. 9:48). A de wan bigi blesi fu wroko makandra nanga pionier, dinari ini a diniwroko, owruman nanga kring-opziener di abi sakafasi neleki Yesus! Efu wi abi sakafasi, dan wi o sori moro lobi gi tra sma. Yesus taki dati tru anbegiman fu Yehovah ben o sori lobi gi makandra.​—Yoh. 13:35.

10. San yu musu du efu yu feni taki den owruman no e du noti fu lusu son problema na ini a gemeente?

 ¹⁰ San yu musu du efu problema de na ini a gemeente èn efu yu feni taki den owruman no e du noti? Na presi fu krutukrutu, yu musu horibaka gi den brada di e teki fesi. Na so yu e sori sakafasi (Hebr. 13:17). A bun fu aksi yusrefi: ’A de so taki den problema di mi e si bigi so te taki den owruman musu du wan sani? Disi na a yoisti ten fu du wan sani? Na mi abi a frantwortu fu lusu a problema? Mi wani tyari wánfasi kon na ini a gemeente, noso mi wani sori sma taki mi man du sani moro bun?’

11. Soleki fa Efeisesma 4:2, 3 e sori, dan sortu wini a o tyari gi a gemeente te wi abi sakafasi?

¹¹ Awinsi wi man du son sani bun, toku sakafasi nanga wánfasi moro prenspari gi Yehovah. Fu dati ede du ala san yu man fu dini Yehovah nanga sakafasi. Te yu e du dati, dan yu o meki wánfasi de na ini a gemeente. (Leisi Efeisesma 4:2, 3.) Fa wi kan sori taki wi abi sakafasi? Du furu na ini a preikiwroko. Pruberi fu du bun gi tra sma. Kari sma kon na yu oso. No kari soso den wan di abi frantwortu na ini a gemeente (Mat. 6:1-4; Luk. 14:12-14). Te yu abi sakafasi èn te yu e wroko makandra nanga yu brada nanga sisa, dan den no o si nomo taki yu e du yu wroko bun, ma den o si tu taki yu abi sakafasi.

12. San Bijbel e taki fu mati?

¹² Yehovah wani taki wi e prisiri makandra nanga mati nanga famiri (Ps. 133:1).  Yesus ben abi bun mati (Yoh. 15:15). Bijbel e sori fu san ede a bun fu abi bun mati (Odo 17:17; 18:24). A e sori wi tu fu san ede a no bun te wi no e moksi nanga tra sma (Odo 18:1). Furu sma feni taki den kan feni furu mati tapu Internet èn taki a kan yepi den fu no de den wawan. Ma wi musu luku bun fa wi e gebroiki website noso app pe wi kan taki nanga sma èn pe wi kan seni fowtow nanga felem gi den.

13. Fu san ede furu sma di e go tapu Internet noso tapu son app fu luku sani fu tra sma, no de koloku?

¹³ Ondrosuku sori taki te sma e gebroiki furu ten fu luku sortu fowtow sma poti tapu den sortu website disi noso san den skrifi, dan dati e meki den firi lasi-ati èn den e firi leki den no abi mati. Fu san ede? Wan reide na taki nofo tron sma e poti fowtow fu den span sani di den e du. Sma e sori soso den moi fowtow fu densrefi, fu den mati fu den èn fu den moi presi pe den e go. Te wan sma e luku den fowtow dati, dan a kan abi a firi leki en eigi libi soi. Wan sisa di abi 19 yari e taki: „Te mi ben si fa tra sma ben e meki prisiri tapu satra nanga sonde aladi mi ben de na oso e du noti, dan mi ben dyarusu na den tapu.”

14. Fa a rai na ini 1 Petrus 3:8 kan yepi wi fu gebroiki Internet na wan bun fasi?

¹⁴ A tru taki wi kan gebroiki den sortu website disi na wan bun fasi. Fu eksempre, wi kan gebroiki den fu taki nanga famiri nanga mati. Ma yu no si taki son fowtow nanga felem di sma e poti tapu Internet na fu meki bigi? A gersi leki den e taki „Luku mi”. Son sma e skrifi morsu sani na den eigi fowtow noso na den fowtow fu tra sma, noso den e skrifi sani di e sori taki den no abi lespeki gi trawan. Wan Kresten no ben o sori sakafasi nanga lobi te a ben o du den sortu sani disi.​—Leisi 1 Petrus 3:8.

15. Fa Bijbel kan yepi wi fu no meki bigi?

¹⁵ Efu yu e poti sani tapu Internet, dan aksi yusrefi: ’Den sani di mi e skrifi èn den fowtow noso felem di mi e poti e gi tra sma a firi taki mi e meki bigi? Den sani disi kan meki sma dyarusu na mi tapu?’ Bijbel e taki: „Ala den sani di de fu  grontapu, sobun a lostu fu a skin, a lostu fu den ai èn a prodo di wan sma e prodo nanga den gudu di a abi, no e kon fu a Tata, ma den sani disi e kon fu grontapu” (1 Yoh. 2:16). Na ini wan tra Bijbel a pisi „a prodo di wan sma e prodo nanga den gudu di a abi” vertaal nanga „sani di sma e du fu meki trawan denki taki den prenspari”. Kresten no abi fu meki bigi. Den e gi yesi na a Bijbel rai disi: ’Wi no musu denki tumusi furu fu wisrefi, so taki wi e strei nanga makandra èn so taki wi e dyarusu na tapu makandra’ (Gal. 5:26). Efu wi abi sakafasi, dan wi no o de leki den sma fu a grontapu disi di abi heimemre èn di e meki bigi.

16. Fu san ede wi no musu abi heimemre?

¹⁶ Wi musu meki muiti fu abi sakafasi fu di sma di abi heimemre no de nanga „krin frustan” (Rom. 12:3). Sma di abi heimemre lobi strei nanga trawan èn den feni taki den prenspari moro ala tra sma. A fasi fa den e tyari densrefi kan tyari takru bakapisi kon gi densrefi èn gi tra sma. Efu den no kenki den denki, dan Satan kan pori a denki fu den moro (2 Kor. 4:4; 11:3). Ma wan sma di abi sakafasi de nanga krin frustan. A no e denki tumusi furu fu ensrefi èn a sabi taki furu sani de di tra sma man du moro bun leki en (Fil. 2:3). A sabi tu taki „Gado e kakafutu gi den wan di abi heimemre, ma a e sori bun-ati gi den sma di abi sakafasi” (1 Petr. 5:5). Sma di de nanga krin frustan no wani Yehovah leki den feanti.

17. San wi musu du fu tan abi sakafasi?

¹⁷ Efu wi wani tan abi sakafasi, dan wi musu ’kenki a fasi fa wi ben de fosi èn wi musu tapu nanga den sani di wi ben e du. Wi musu tron nyun sma di kisi nyun fasi.’ Wi musu meki muiti fu man tron nyun sma. Wi musu studeri na eksempre fu Yesus èn wi musu pruberi fu waka soifri na en baka (Kol. 3:9, 10; 1 Petr. 2:21). Efu wi e du dati, dan wi o kisi furu wini. Te wi abi sakafasi, dan wi o abi wan koloku trowlibi, wi o sorgu taki wánfasi de na ini a gemeente èn wi no o gebroiki Internet fu meki bigi. San moro prenspari, na taki Yehovah o breiti nanga wi èn a o blesi wi.