1. Guya khu Vafilipi 2:3, gudzinogisa gu nga hi phasa kharini gu pwana ni vambe?

KHU gudzinogisa, hi ngu engisa matshina nya milayo ya Jehovha kholu hi ngu pwisisa gu khethu tepo yatshavbo uye a ngu siti esi si gu sadi gwathu. (Efes. 4:22-24) Gudzinogisa gu na hi kutsa gu thangisa gugola ga Jehovha guvbanyani gwathu hi bwe ni wona vambe na vari ni lisima guvbindra ethu. Ho gira isoso, hi na dzi buza khu wupari nya wadi ni Jehovha ni vandriyathu gambe.— Leri Vafilipi 2:3.

2. Ginani egi mupostoli Pawulo a nga ba a giti nigu ginani hi na ganeyago khigyo avba nya ndrima yeyi?

² Ha gu mba dzi woneya hi na pheya gu pimedzeya vathu nyo dzi khusedze nya mafu yaya ya Sathane. * So wonegisa gu khatshi khiso si nga dugeleya maKristo ya lizana-myaga nyo pheye. Khu kharato, mupostoli Pawulo lovede vaRoma khuye: “Nyi ngu laya moyo ni moyo wanu gukheni mu nga dzi sayeli guvbindra fanelo. Aholu dzi sodziseni muthu ni muthu a dzi vega vbawulangatunu gwaye.” (Rom. 12:3) Pawulo kha nga ba a vbweta gu khuye hi nga dzi ningi lisima. Ganiolu, gudzinogisa gu na hi phasa gu ninganiseya mawonelo yathu khethu vamune. Avba nya ndrima yeyi hi na bhula khu sipandre siraru omu gudzinogisa gu nga hi phasago gu mba dzi khusedza. Sipandre sakona khesi: 1) pangoni gwathu, 2) tepo hi ningwago malungelo hengeledzanoni ya Jehovha ni 3) mathumiselo yathu nya dzisayiti nya mabhulo.

3. Khu ginani gu tshukago gu dugeleya sigaradzo pangoni nigu ginani va girago vambe tepo si dugeleyago?

³ Jehovha giride lipango gasi gu mwama ni ngadzi va vbanya na va tsakide. Ganiolu khu gu ba ha sa vbeleya gu ngu tshuka gu dugeleya sigaradzo. Khu gighelo gyogyo, Pawulo lovide gu khuye oyu a tshadhago a na tshangana ni sigaradzo. (1 Kor. 7:28) Vambe va ngu khaleya gu dwanisana pangoni nyo bwe va pimisa gu khavo kha va nga ba va yede gu tshadha vatshavbo. Va gu dzumeya gu kutsedzedwa khu mawonelo nya litigo leli va na tutumeya gu pimisa gu khavo rendre wakone gu tshula mutshadho. Moyo ni moyo wawe a nga pimisa gu khuye gu tshula mutshadho khiso si na mu phasago gu manega ni gutsaka.

4. Ginani hi si yeligo gu gira?

⁴ Kha hi yeli gu pimisa gu khethu wugadzi wathu kha wu phasi gilo. Hi ngu dziti gu khethu Bhibhiliya yari khiyo gighelo nyo pwale nyo tshule mutshadho wubhayi basi. (Mat. 5:32) Khu kharato, ha gu tshangana ni sigaradzo si nga thudwa khu Pawulo, kha hi yeli gu dzi khusedza hi pimisa esi: ‘Ina wugadzi wowu wu ngu tadzisa esi nyi nga ba nyi si vireya?’ Ina nyi ngu haladzwa furi? Ina nyi di hadzi tsaka nari khatshi nyi di tshadhide ni mumbe muthu? Ha gu ba hi dzi gira siwudziso sesi ho yeyedza gu khethu ho pimisa khethu vamune basi nigu kha hi theyi kota khu pari yathu nya wugadzi. Guti nya litigo leli ga gu kutsa gu gira esi monyo wago wu si vbwetago ni esi si gu tsakisago ambari so ba si thula gu tshula mutshadho. Bhibhiliya yari khiyo: “Muthu ni muthu a nga dwaneli basi gu sayisa esi si gu saye, aholu, a na dzi garadze gambe khu sile si gu sa vangana.” (Filp. 2:4) Jehovha o vbweta gu khuye u sayisa lipango lago na siri gu tshula mutshadho. (Mat. 19:6) Uye o vbweta gu khuye u thangisa esi mwangadzi wago mwendro mwama wago a si vbwetago guvbindra esi sago.

5. Guya khu Vaefeso 5:33, patwa wu yede gu khathaleyana kharini?

 ⁵ Mwama ni ngadzi va yede gu haladzana ni gu yeyedzana githawo. (Leri Vaefeso 5:33.) Bhibhiliya yo hi hevbudza gu dzi garadzeya gu ninga guvbindra gu hakha. (Mith. 20:35) Ina ka, likhalelo muni li na phasago patwa gu yeyedzana lihaladzo ni githawo? Gudzinogisa. Mwama ni ngadzi va dzi nogisago kha va dwaneyi basi gu dzi tsakisa avo vamune ganiolu va ngu dzi garadzeya gambe gu tsakisa dzipari dzawe nya wugadzi.— 1 Kor. 10:24.

6. Ginani u gi hevbulago ga esi si ganedwego khu Steven ni Stephanie?

⁶ Gudzinogisa gu phaside mipatwa nya yingi nya maKristo gu mana gutsaka pangoni gwawe. Khu giyeyedzo, mwama moyo nyo pwani khu Steven, wari khuye: “Mo ba mu pwana mu na thuma gumogo ngudzungudzu go ba guri ni sigaradzo. Wulangani nyo pimise khuwe: ‘Ginani gi gu gyadi gwangu?’ u na pimisa khuwe: ‘Ginani gi gu gyadi gwathu?’” Mwangadzi wa Steven, anuye o dzipwa khu ndziya yamweyo. Wari khuye: “Mwalo a dzinago gu vbanya ni nala. Go dugeleya gigaradzo nyo khaguri ho bhula khigyo. Hwane nya isoso, ho gombeya, hi gira wugevisisi hi bwe hi bhula khedzi hi nga gi palago khidzo. Ho dwana ni gigaradzo, kha hi dwani khu gyathu.” Patwa wu ngu mana gutsaka tepo moyo ni moyo wawe a si dzi ningigo lisima guvbindra pimo.

7. Ginani egi ndriyathu a yedego gu gira tepo a ningwago malungelo hengeledzanoni ya Jehovha?

⁷ Lithomo nya likhongolo gu thumeya Jehovha khedzi hi si kodzago khidzo. (Ndzi. 27:4; 84:10) Ndriyathu nyo khaguri a gu si kodza gu gira thumo nyo hathege, isoso si ngu zundzega. Bhibhiliya yari khiyo: “Muthu a gu dogorela gu phara thumo nya guthangele libandla, hathide thumo nya wadi.” (1 Tim. 3:1) Ganiolu tepo hi ningwago malungelo kha hi yeli gu dzi wona na hiri va lisima guvbindra vambe. (Luka 17:7-10) Gu vbwetega hi dzi emiseya gu thumeya vambe khu gudzinogisa. — 2 Kor. 12:15.

8. Ginani hi gi hevbulago ga giyeyedzo gya Dhiyotrefe, Uziya ni Abhisalamo?

⁸ Bhibhiliya yi ngu ganeya khu vathu va nga ba va dzi wona na vari va lisima guvbindra vambe. Dhiyotrefe a di gu dzi khusedza kholu a di “gu gola gu guruma” vbakari nya libandla. (3 Joh. 9) Uziya a di zama gu gira thumo owu Jehovha a nga ba a sa mu dzumeleya gu gira. (2 Dzik. 26:16-21) Abhisalamo a di gu vbweta gu khala pfhumu, khu kharato, a di gira gu khatshi a ngu khathala khu vathu gasi va kodza gu mu seketeya. (2 Sam. 15:2-6) Kha nga edzi ma yeyedzago khidzo matimo yaya nya Bhibhiliya, Jehovha kha tsakiswi khu vale va dzi vbweteyago wuzundzo. (Mav. 25:27) Khu guhegisa, vathu va dzi khusedzago va na manega ni sigaradzo. — Mav. 16:18.

9. Giyeyedzo muni hi vegedwego khu Jesu?

⁹ Jesu kha nga ba a fana ni vathu nyo dzi khusedze. Bhibhiliya yari khiyo ambari olu Jesu a nga ba ari ni makhalelo nga ya Nungungulu kha nga ba a pimisa gu khuye yede gu fana ni Nungungulu. (Filp. 2:6, NM) Ambari olu Jesu a gu uye muthu nya wuvili nya tshivba ngudzu uye kha dzi khusedzi. Embede vapostoli vaye khuye: “Wule a dzi sodzisago ngudzu vbakari gwanu, uyoyo khuye a gu khongolo.” (Luka 9:48) Si ngu tsakisa ngudzu gu thuma ni vapiyonero, vaphasedzeyi nya libandla, madhota ni vawoneleyi nya gipandre va pimedzeyago gudzinogisa ga Jesu! Ho ba hi dzi nogisa hi na haladza ngudzu vandriyathu. Nigu Jesu ganede gu khuye sithumi nya lisine sa Nungungulu si na haladzana. — Joh. 13:35.

10. Ginani u yedego gu gira wo wona sigaradzo libandlani si girago khatshi kha sa khathaledwa gwadi?

¹⁰ Ahati wo ba u wona sigaradzo nyo khaguri libandlani si wonegisago gu khatshi kha sa khathaledwa gwadi khu madhota. U na rini? Wulangani  nyo nguranguri, u nga yeyedza gu khuwe u ngu dzi nogisa khu gu seketeya ava va thangeyago. (Hebh. 13:17) Khu kharato, dzi wudzise gu khuwe: ‘Ina sigaradzo nyi si wonidego sikhongolo ngudzu nyo bwe si vbweta gu lulamiswa? Ina eyi khiyo tepo nya yadi nyo si lulamise? Ina si ngu nyi lumba? Khu lisinesine, nyo vbweta gu andrisa gu pwanana libandlani mwendro nyo vbweta gu wonwa na nyiri ni lisima?’

11. Guya khu Vaefeso 4:2, 3, hi na wuyedwa khu ginani ho thumeya Jehovha khu gudzinogisa?

¹¹ Jehovha a ngu ninga ngudzu lisima gudzinogisa ni gupwanana guvbindra makodzelo yathu nyo gire silo. Khu kharato, thumeya Jehovha khu gudzinogisa. Wo gira isoso u na andrisa gupwanana libandlani. (Leri Vaefeso 4:2, 3.) Tshumayela khu sighingi. Vbwetedzeya dzindziya nyo thumeye vambe khu gu va gireya silo nya sadi. Hakha vatshavbo ndrangani gwago gupata ni vale va gu mwalo malungelo libandlani. (Mat. 6:1-4; Luka 14:12-14) Tepo u thumago khu gudzinogisa libandlani, vandriyathu va na si wona gu khavo u na ni makodzelo nyo gire gwadi silo ganiolu nya lisima ngudzu va na wona gu khavo u ngu dzi nogisa.

12. Ina Bhibhiliya yi ngu hi kutsa gu manega ni dzipari? Tshamuseya.

¹² Jehovha o vbweta gu khuye hi tsaka ni valongo vathu ni dzipari dzathu. (Ndzi. 133:1) Jesu nuye a diri ni dzipari nya dzadi. (Joh. 15:15) Bhibhiliya yi ngu ganeya khedzi hi phasegago khidzo khu gu manega ni dzipari nya lisine. (Mav. 17:17; 18:24) Nigu yi ngu hi kutsa gu mba dzi hambanisa ni vakhwathu. (Mav. 18:1) Vathu nya vangi va gu pimisa gu khavo dzisayiti nya mabhulo dzi ngu hi tuleya ndziya nyo manege ni  dzipari nya dzingi gasi hi si khali wutundzu. Ganiolu, gu vbwetega hi dzi woneya tepo hi thumisago dzisayiti nya mabhulo.

13. Khu ginani vambe va thumisago dzisayiti nya mabhulo va dzipwago wutundzu mwendro gu mba tsaka?

¹³ Wugevisisi nyo khaguri wu tugude gu khuwo vathu va talago gu vbedza tepo na va gu khedziseya dzifoto ni mahungu nya vambe vathu omu nya dzisayiti nya mabhulo va nga hegisa khu gu khala wutundzu va bwe va si tsaki. Khu ginani? Gighelo gyakone khu gu gutala nya dzitepo vathu vo oloveya gu thedzeya dzifoto dzile nyo mbure mwendro nya dzadi, dzifoto dzi yeyedzago matshigu nya lisima va manegidego nawo, dzifoto nya dzipari dzawe ni dzifoto dzi yeyedzago malanga nyo mbure va vbindridego khayo. Muthu a khedziseyago dzifoto dzodzo a nga vbisega tepo a zamago gu fananisa womi waye ni owu wa vale ava wonago omu nya dzifoto kholu a na pimisa gu khuye waye kha wu tsakisi. Ndriyathu nya nyamayi nyo pwani khu Christian a gu ni 19 myaga wari khuye: “Nyi di pheya gu vbeledwa khu gutsaka tepo nyi nga ba nyi wona vambe na va gu manega ni guvbeya nya semana nyo tsakise narigu eni nyi womo gaya nyenga.”

14. Wusingalagadzi wu gomogo omu ga 1 Pedro 3:8, wu nga hi phasa kharini gu dzi woneya tepo hi thumisago dzisayiti nya mabhulo?

¹⁴ Ganiolu, dzisayiti nya mabhulo dzi nga thumiswa gasi gu gira silo si phasago. Khu giyeyedzo hi nga dzi thumiseya gu bhula ni dzipari gumogo ni valongo vathu. Ina u ngu si wona gu khuwe vathu nyo khaguri va gu thedzeya dzifoto, va lova mahungu ni gu thedzeya dzivhidhiyu omu nya dzisayiti nya mabhulo gasi va dzi yeyedza? Ina avo khandri vo zama gu ganeya gu khavo “nga nyi wona?” Vambe va gu theya dzifoto va vbedza khu vbavbatshi gakona va lova mahungu nyo valeye ni dzitshamba. Mwendro gu lova mahungu yoyo ga dzifoto dzi nga thedwa khu vambe. Gu gira isoso so yeyedza gu khiso kha hi dzi nogisi nigu kha hi khathali khu vambe a gu silo si vivbidego ga maKristo. — Leri 1 Pedro 3:8.

15. Bhibhiliya yo hi phasa kharini gu hi si dzi woni na hiri ni lisima guvbindra vambe?

¹⁵ Wo ba u thumisa dzisayiti nya mabhulo dzi wudzise gu khuwe: ‘Ina mahungu nyi lovago, dzifoto ni dzivhidhiyu nyi thedzeyago khandri so yeyedza gu khiso nyo ghwira? Ina kha nyi na nga gira vambe va nyi pweya lidiwo?’ Bhibhiliya  yari khiyo: “Satshavbo si guromo mafuni: Gudogorela nya givili, ni gudogorela nya maho, ni gu dzi gugumugisa khu kotani nya silo nya mafu, satshavbo sesi kha siti khu ga Babe, aholu, sa guta khu mafuni momu.” (1 Joh. 2:16) Bhibhiliya nyo khaguri yi vbindrugedzede malito “gu dzi gugumugisa khu kotani nya silo nya mafu” kha nga “gu vbweta gu wonwa na wuri wa lisima.” Makristo kha ma yeli gu dzi wona na mari ya lisima ngudzu mwendro gu vbweta gu ningwa lisima khu vambe. Avo vo landreya wusingalagadzi nya Bhibhiliya wu gu khuwo: “Hi nga khali vathu nya matshandza, hi wugelana ni gu girelana lidiwo.” (Gal. 5:26) Gudzinogisa gu na hi gira hi hambana ni vathu nyo dzi khusedze nya litigo leli va vbwetago gu khavo vambe va va ninga lisima.

16. Khu ginani hi si yeligo gu dzi khusedza?

¹⁶ Gu vbwetega hi haguleya gudzinogisa kholu vale va dzi khusedzago kha va dzi ‘vegi vbawulangatunu gwawe.’ (Rom. 12:3) Vathu nyo dzi khusedze vo khaleya mayunga nigu vo dzi wona na vari vbatshani ngudzu guvbindra vambe. Gu tala nya dzitepo esi va si pimisago ni esi va girago si ngu va vbisisa monyo si bwe si vbisisa monyo ya vambe. Vo mba vbindrugedza mavbanyelo yaya, mapimo yawe ma na fumedwa khu Sathane khu guvbeleya. (2 Kor. 4:4; 11:3) Ganiolu, muthu nya gu dzi nogise a nguti gu dzi vega vbawulangatunu gwaye. Uye kha dzi ningi lisima guvbindra pimo nigu a ngu dziti gu khuye singi esi vambe va si kodzago uye a gu mba si kodza. (Filp. 2:3) A ngu dziti gambe gu khuye “Nungungulu a ngu vengana ni va nya gu dzi khusedza, aholu a ngu khusedza va nya gu dzi nogisa.” (1 Ped. 5:5) Vale va dzi nogisago khavo va gu dzipari dza Jehovha.

17. Ginani hi yedego gu gira gasi hi simama gu dzi nogisa?

¹⁷ Gasi hi simama gu dzi nogisa, gu vbwetega hi landreya wusingalagadzi nya Bhibhiliya nyo ‘tshule muthu wa gale ni mavbanyelo yaye, hi ambale muthu muphya.’ Isoso so vbweta gu dzi garadza. Hi yede gu hevbula khu giyeyedzo gya Jesu hi bwe hi zama gu gi pimedzeya khavba hi si kodzago khavbo. (Kol. 3:9, 10; 1 Ped. 2:21) Ho gira isoso hi na phasega khu silo nya singi. Tepo hi haguleyago gudzinogisa, ndranga yathu yi na khala na yi tsakide, hi na andrisa gupwanana libandlani hi bwe hi kodza gu thumisa dzisayiti nya mabhulo khu ndziya nya yadi. Nigu nya lisima ga satshavbo, Jehovha a na hi tsakeya a bwe a hi kategisa.