1. ¿Tuku tastakyaw tekgsaw kFilipenses 2:3, chu tuku tlan nakitaxtu komo natlawayaw?

AKININ xlakskujnin Jehová taktujuyaw chu kgalhakgaxmataw xlimapakgsin, xlakata liwana katsiyaw pi xla katsi tuku tlakg tlan kimpalakatakan (Efes. 4:22-24). Tataktujut tlawa pi wa pulana natlawayaw tuku xla lakaskin nixawa tuku akinin lakaskinaw chu nalakpuwanaw pi amakgapitsin tlakg xlakaskinka litaxtukgo nixawa akinin. Chu uma lu tlan kitaxtu xlakata tlakg tlan talalinaw Jehová chu kinatalankan (kalikgalhtawakga Filipenses 2:3).

2. 1) ¿Tuku lichuwinalh apóstol Pablo? 2) ¿Tuku nalichuwinanaw kʼuma artículo?

² Komo ni kuenta natlawayaw, max natsukuyaw likatsiyaw chuna la latamanin xalak xkakilhtamaku Satanás tiku lanka kamakgkatsikan chu x’akstukan kapaxkikan. * Makgapitsin kstalaninanin Cristo xalak pulana siglo chuna xtatakgskgo, wa xlakata apóstol Pablo kamaxkilh uma tastakyaw congregación xalak Roma: «Kkawaniyan minchatunukan pi ni nalakpuwanatit pi tlakg xlakaskinka litaxtuyatit, wata kalakpuwantit chuna la nalitasiya pi tlan talakapastakni kgalhiyatit» (Rom. 12:3). Chuna la akxilhaw, Pablo lichuwinalh pi nitu wamputun akstu nakinkapaxkikanan. Pero tataktujut kinkamakgtayayan ni lanka nakinkamakgkatsikanan. Kʼuma artículo nalichuwinanaw pulaktutu la kinkamakgtayayan tataktujut xlakata ni xlakaskinka nakinkamakgkatsikanan: ktamakgaxtokgat, akxni wi tuku kinkalakgayawakanan kcongregación chu akxni maklakaskinaw redes sociales.

3. 1) ¿Tuku xlakata max lakgachunin naʼanan taʼakglhuwit ktamakgaxtokgat? 2) ¿Tuku tlawakgo makgapitsin akxni kgalhikgo taʼakglhuwit?

³ Jehová lakaskin pi xachixku chu xapuskat kapaxuwakgolh. Pero xlakata putum akinin makglakgalhinanin, namin kilhtamaku nakgalhiyaw taʼakglhuwit. Pablo lichuwinalh pi tiku natamakgaxtokgkgo nakgalhikgo taʼakglhuwit (1 Cor. 7:28). Makgapitsi natalan makgkatsikgo pi xtamakgaxtokgatkan lu tuwa xlakata ankgalhin kgalhikgo taʼakglhuwit, chu max lakpuwankgo pi nikxni tlan katilatalalinkgolh. Komo chuna lakpuwankgo la latamanin xalak kakilhtamaku, kajwatiya xʼakstukan nakalilakgaputsakan chu nalakpuwankgo pi max tlakg tlan komo nalamakgxtakgkgo.

4. ¿Tuku ni kililakpuwanatkan?

⁴ Ni kalakpuwaw pi kintamakgaxtokgatkan nialhla katilakkaxtlawaw. Katsiyaw pi kaj pulaktum tuku natlawa pi tlan nalakxtlawakan tamakgaxtokgat, wa talakgxtumit nema ni xlitatlawat (Mat. 5:32). Wa xlakata, akxni nakgalhiyaw taʼakglhuwit nema lichuwinalh Pablo, ni namastayaw talakaskin pi tatlankit nema kgalhiyaw nakinkamalakpuwaniyan: «¿Klipaxuwa kintamakgaxtokgat chuna la akit klakaskin? ¿Xlikana kimaxki tapaxkit nema akit kilakgchan? ¿Tlakg xakkgalhilh tapaxuwan komo atanu tiku xaktatamakgaxtokgli?». ¡Uma lu nitlan talakpuwan! Xliskgalala kakilhtamaku nakinkawaniyan pi wa kuenta katlawaniw kinakujkan chu pi kaputsaw kintapaxuwankan asta maski namakgxtakgaw tiku tamakgaxtokgaw. Pero tiku putsakgo nakapulalin xliskgalala Dios “ni kajwatiya kuenta tlawakgo tuku lakaskinkgo, wata nachuna tuku lakaskinkgo amakgapitsin” (Filip. 2:4). Jehová lakaskin pi kuenta katlawaw kintamakgaxtokgatkan, chu ni kalakxtlawaw (Mat. 19:6). Lakaskin pi kalilakpuwaw tuku xla kinkawaniyan, chu ni wa tuku akinin lakaskinaw.

5. Chuna la wan Efesios 5:33, ¿la nalalikatsinikgo xachixku chu xapuskat?

 ⁵ Talakaskin pi xachixku chu xapuskat nalalimasiyanikgo tapaxkit chu nalamaxkikgo kakni (kalikgalhtawakga Efesios 5:33). Biblia kinkamasiyaniyan pi tlakg talakaskin nalilakgaputsayaw nakamaxkiyaw tuku maklakaskinkgo amakgapitsin nixawa tuku akinin maklakaskinaw (Hech. 20:35). Xlakata nalalimasiyayanikgo tapaxkit chu kakni, talakaskin xchatiykan nataktujukgo. Uma nakamakgtaya ni kaj xʼakstukan nakalilakgaputsakan, wata wa tuku maklakaskin achatum (1 Cor. 10:24).

6. ¿Tuku kinkamasiyaniyan tuku lichuwinankgo Steven chu Stephanie?

⁶ Lhuwa tamakgaxtokgat xatapaxuwan wilakgolh xlakata taktujukgo. Akgtum liʼakxilhtit, chatum tala tiku wanikan Steven lichuwinan: «Komo xchatiykan xtachuna nalaʼakxilhkgo la komo tiku akxtum tapakgsikgo, nalamakgtayakgo xchatunukan, liwaka akxni nakgalhikgo taʼakglhuwit. Chuna ni katilakpuwankgolh “¿tuku tlakg tlan kimpalakata?” wata nalakpuwankgo “¿tuku tlakg tlan kimpalakatakan?”». Xpuskat, Stephanie, nachuna lakpuwan. Xla lichuwinan: «Niti lakgati akxtum natatawila tiku talatlawa. Akxni ni akxtum tuku klakpuwanaw, ktsukuyaw lilakpuwanaw tuku xlakata. Ktlawayaw oración, kputsayaw tamakgtay klikgalhtawakga chu klatachuwinanaw. Kinchatiykan klakkaxtlawayaw taʼakglhuwit chu ni kaj klakilhniyaw». Tamakgaxtokgat tlakg tapaxuwan natawila komo niti tlakg lanka namakgkatsikan.

7. ¿Tuku tayat xlikgalhit chatum tala komo nalakgayawakan akgtum taskujut kcongregación?

⁷ Akgtum lanka talakgalhaman kimpalakatakan xatapaxuwan naskujnaniyaw Jehová (Sal. 27:4; 84:10). Lu tlan pi chatum tala tlakg naskujnaniputun Jehová. Biblia lichuwinan: «Komo chatum chixku liskujma xlakata kgolotsin nawan, xla tlawaputun akgtum tlan taskujut» (1 Tim. 3:1). Pero komo namaxkikan akgtum taskujut kcongregación, ni lanka nalimakgkatsikan (Luc. 17:7-10). Tuku liwana xlilakpuwanat wa pi xataktujun nakaskujnani amakgapitsin (2 Cor. 12:15).

8. ¿Tuku kinkamasiyaniyan xliʼakxilhtitkan Diótrefes, Uzías chu Absalón?

⁸ Biblia kalichuwinan latamanin tiku lanka xkamakgkatsikan. Akgtum liʼakxilhtit, Diótrefes ankgalhin xlakpuwan pi putum tlan xtlawa chu xlakaskinka xmakgkatsikan kcongregación (3 Juan 9). Uzías limasiyalh pi lanka xmakgkatsikan akxni xtlawaputun akgtum taskujut nema ni xlakgchan (2 Crón. 26:16-21). Absalón limaklakaskilh xliskgalala xlakata kachikin tlan xʼakxilhkgolh xlakata mapakgsina xwamputun (2 Sam. 15:2-6). Umakgolh liʼakxilhtit xalak Biblia liwana masiyakgo pi Jehová nitlan kaʼakxilha latamanin tiku lanka kamakgkatsikan (Prov. 25:27). Tiku mastakgo talakaskin pi lanka nakamakgkatsikan chu lhuwa tuku nakgalhiputunkgo nitlan kakitaxtuni (Prov. 16:18).

9. ¿Tuku liʼakxilhtit kinkawilinin Jesús?

⁹ Jesús kinkawilinin lu tlan liʼakxilhtit. Biblia lichuwinan pi «maski la Dios xwanit, nikxni lakpuwa namakglhti tuku lakgchan Dios chu xtachuna xlitaxtuputulh» (Filip. 2:6). Xla wa xlichatiy tiku tlakg tliwakga xlikalanka kakilhtamaku. Maski chuna, ni kaj xʼakstu lilakgaputsakan. Kawanilh kstalaninanin: «Tiku ni lanka makgkatsikan kmilakgstipankan, wa tiku tlakg xlakaskinka litaxtu» (Luc. 9:48). Lu lipaxuwayaw akxtum kataskujaw precursores, siervos ministeriales, lakgkgolotsin chu superintendentes de circuito tiku nachuna taktujukgo chuna la Jesús. Akxni xlakskujnin Jehová taktujuyaw, limasiyayaw tapaxkit nema litalakgapasa xkachikin Dios (Juan 13:35).

10. ¿Tuku kilitlawatkan komo lakpuwanaw pi taʼakglhuwit xalak congregación nichuna la lakkaxtlawamaka?

 ¹⁰ ¿Tuku kilitlawatkan komo akxilhaw pi anan taʼakglhuwit kcongregación chu lakpuwanaw pi ni liwana la lakkaxtlawamaka? Ni kalichuwinaw tuku lama, wata kataktujuw chu kakamakgtayaw tiku kinkapulalinkgoyan (Heb. 13:17). ¿Tuku nakinkamakgtayayan chuna natlawayaw? Kalilakpuwaw: «¿Xlikana lu laklanka taʼakglhuwit nema kakxilha? Komo talakaskin nalakkaxtlawakan, ¿wa uma kilhtamaku lakgchan tlan nalakkaxtlawakan? ¿Akit kilakgchan naklakkaxtlawa? Pero tuku ktlawaputun, ¿xlikana klakaskin pi congregación makxtum natawila o kaj akit klakaskin pi tlan nakiʼakxilhkan?».

11. Chuna la wan Efesios 4:2, 3, ¿tuku nala komo nataktujuyaw akxni naskujnaniyaw Jehová?

¹¹ Jehová tlakg xlakaskinka akxilha nataktujuyaw chu makxtum natawilayaw nixawa kiliskgalalakan. Wa xlakata, kaliskujwi nataktujuyaw akxni naskujnaniyaw Jehová. Chuna makxtum natawilayaw kcongregación (kalikgalhtawakga Efesios 4:2, 3). Ankgalhin kalichuwinaw xtachuwin Dios. Kakaskujnaniw amakgapitsin. Putum tlan kakamakgamakglhtinaw, chu ni kajwatiya tiku lakgayakgo akgtum taskujut kxkachikin Jehová (Mat. 6:1-4; Luc. 14:12-14). Komo chuna natlawayaw, amakgapitsin ni kajwatiya naʼakxilhkgo tuku tlan tlawayaw na naʼakxilhkgo pi taktujuyaw.

12. ¿Tuku wan Biblia xlakata nakgalhiyaw amigos?

¹² Jehová lakaskin pi ankgalhin tlan kakatatawilaw kiʼamigoskan chu kifamiliajkan (Sal. 133:1). Jesús kgalhilh laktlan amigos (Juan 15:15). Biblia nachuna lichuwinan pi lu tlan kitaxtu nakgalhiyaw xaxlikana amigos (Prov. 17:17; 18:24). Nachuna kinkawaniyan pi ni natamakgatliyaw  (Prov. 18:1). Lhuwa tiku lakpuwankgo pi maklakaskinkan redes sociales makgtayanan nakgalhiyaw lhuwa amigos chu ni miʼakstu namakgkatsikana. Pero, kuenta kilitlawatkan akxni maklakaskinaw.

13. ¿Tuku xlakata makgapitsin tiku maklakaskinkgo redes sociales xʼakstukan kamakgkatsikan chu lipuwankgo?

¹³ Chuna la lakputsanankanit, makgapitsi wankgo pi tiku lhuwa kilhtamaku limaxtukgo xlakata naʼakxilhkgo fotos chu tuku wankgo amakgapitsin anta kredes sociales tlawa pi xʼakstukan kamakgkatsikan chu lipuwankgo. ¿Tuku xlakata? Pulaktum tuku xlakata chuna la, wa pi lhuwa latamanin wilikgo xfotoskan akxni wi tuku xlakaskinka titaxtukgo kxlatamatkan: niku tlakg tlan tasiyakgo, niku katawilakgolh xʼamigoskan chu anta niku paxialhnamakgo. Tiku akxilhkgo umakgolh fotos max lakpuwankgo pi ni lu tlan xlatamatkan chu nitu lipaxuwakgo. Chatum tala tsumat tiku kgalhi 19 kata wan: «Nitlan xakmakgkatsi akxni xakakxilha pi amakgapitsin lu xlipaxuwakgo tuku xtlawakgo akxni ksputa semana chu akit xaktamakgxtakga kkinchik chu nitu xaklipaxuwa».

14. ¿La kinkamakgtayayan 1 Pedro 3:8 xlakata tlan namaklakaskinaw redes sociales?

¹⁴ Xlikana, redes sociales kinkamakgtayayan pero talakaskin liwana namaklakaskinaw, akgtum liʼakxilhtit, kinkamakgtayayan xlakata tlan nakatachuwinanaw kifamiliajkan chu kiʼamigoskan. Pero ¿akxilhnitaw pi lhuwa latamanin tiku wi tuku wilikgo kredes sociales chuna tlawakgo kaj xlakata xlakaskinka nakaliʼakxilhkan? Tuku lakaskinkgo wa pi latamanin naʼakxilhkgo tuku tlawakgo. Makgapitsi wilikgo laklixkajni tachuwin chu kawanikgo tuku xalixkajnit amakgapitsin xlakata xfotoskan. Putum uma tuku tlawakgo ni tatalakxtumi tayat nema kilikgalhitkan kstalaninanin Cristo, chuna la tataktujut chu makgkatsikan tuku makgkatsikgo amakgapitsin (kalikgalhtawakga 1 Pedro 3:8).

15. ¿La kinkamakgtayayan Biblia ni xlakaskinka nakinkamakgkatsikanan?

¹⁵ Komo namaklakaskinaw redes sociales, kalilakpuwaw: «¿La tasiyakgo fotos, videos chu tuku ktsokgwili anta kredes sociales? ¿Klimasiya pi kaj lanka kilimakgkatsikan? ¿Xlilakpuwankgolh amakgapitsin pi nachuna nakgalhiputunkgo  tuku akit kkgalhi?». Biblia wan: «Xlakata putum tuku wi kkakilhtamaku, tuku tlawaputun kimaknikan chu tuku akxilhputun kilakgastapukan, lhuwa masiyakan tuku kgalhikan klatamat, ni wa xaTlat masta, wata wa tuku malaknu kakilhtamaku» (1 Juan 2:16). Tiku lakputsanani Biblia wan pi tachuwin «lhuwa masiyakan tuku kgalhikan klatamat» kilhchanima tiku «xlakaskinka litaxtuputun». Akinin kstalaninanin Cristo ni lakaskinaw pi amakgapitsin xlakaskinka nakinkaʼakxilhkgoyan. Stalaniyaw uma tastakyaw xalak Biblia: «Ni xlakaskinka kakinkamakgkatsikan, ni nalatalatlajayaw chu ni nalalakgsitsilakanaw chatunu akinin» (Gál. 5:26). Komo taktujuyaw, ni katikgalhiw tayat nema kgalhi uma kakilhtamaku.

16. ¿Tuku xlakata ni xlakaskinka litaxtuputunaw?

¹⁶ Talakaskin nakgalhiyaw tataktujut, xlakata tiku lanka kamakgkatsikan ni limasiyakgo pi kgalhikgo «tlan talakapastakni» (Rom. 12:3). Kaj taʼakglhuwikgo chu kaj xlakaskinka litaxtuputunkgo. Nachuna, tuku lakpuwankgo chu tuku tlawakgo xʼakstukan nitlan kakitaxtuni chu nitlan kamamakgkatsinikgo amakgapitsin. Komo ni nalakgpalikgo la lakpuwankgo, Satanás nakamalaktlawi xtalakapastaknikan (2 Cor. 4:4; 11:3). Pero latamanin tiku taktujukgo kgalhikgo tlan talakapastakni. Ni malakatsalikgo la lakpuwankgo xpalakatakan, chu lakpuwankgo pi tlakg xlakaskinka litaxtukgo amakgapitsin (Filip. 2:3). Nachuna katsikgo pi «Dios kalakgmakgan tiku lanka kamakgkatsikan, pero kalimasiyani talakgalhaman nema nitu xtachuna tiku taktujukgo» (1 Ped. 5:5). Tiku kgalhikgo tlan talakapastakni ni lakaskinkgo pi Dios nakalakgmakgan.

17. ¿Tuku talakaskin natlawayaw komo lakaskinaw pi chuntiya nataktujuyaw?

¹⁷ Komo lakaskinaw pi chuntiya nataktujuyaw, talakaskin pi namakgantaxtiyaw uma tastakyaw xalak Biblia: «Katapuxtutit xamakgan mintayatkan chu xtatlaw. Chu kalilhakganantit xasasti tayat». Uma kilhchanima pi lu naliskujaw, xlakata talakaskin nalakputsananiyaw xliʼakxilhtit Jesús chu natlawayaw chuna la xla tlawalh (Col. 3:9, 10; 1 Ped. 2:21). Pero tlan kitaxtu komo chuna natlawayaw. Komo naliskujaw xlakata nataktujuyaw, kifamiliajkan tlakg napaxuwa, congregación tlakg makxtum natawila chu nakatsiyaw la tlan nalimaklakaskinaw redes sociales. Chu, tuku tlakg xlakaskinka, nakgalhiyaw xtasikulunalin Jehová chu tlan nakinkamakgamakglhtinanan.