1. Ia au i te Philipi 2:3, no te aha e piri atu â tatou ia Iehova e i to tatou mau taeae e tuahine ia faatupu tatou i te haehaa?

 MA TE haehaa, e auraro tatou i te mau ture aveia a Iehova, o ˈna hoi tei ite i te mea maitai aˈe no tatou. (Eph. 4:22-24) E turai te haehaa ia tuu i to Iehova hinaaro na mua ˈˈe i to tatou iho, e ia farii mea rahi aˈe vetahi ê ia tatou. E piri atu â ïa tatou ia Iehova e i to tatou mau taeae e tuahine i roto i te amuiraa.—A taio i te Philipi 2:3.

2. Eaha ta Paulo i ite e eaha ta tatou e hiˈopoa i roto i teie tumu parau haapiiraa?

² Ua haaatihia tatou e te feia teoteo e te haapao noa ia ratou iho, e titauhia ïa ia ara! * O te fifi ïa ta vetahi i farerei i te senekele matamua. No reira te aposetolo Paulo i papai ai i to Roma: “Te parau atu nei au i te taata tataitahi i rotopu ia outou eiaha ia manaˈo e mea maitai aˈe o ˈna, ei manaˈo au noa râ to ˈna.” (Roma 12:3) Ua ite Paulo mea faufaa te taata atoa. Tera râ, mea titauhia te haehaa no te faatupu i te manaˈo au noa. I roto i teie tumu parau haapiiraa, e hiˈopoa mai tatou e toru tuhaa e titauhia te haehaa. A tahi, i roto i te faaipoiporaa. A piti, a fanaˈo ai tatou i te hopoia i roto i te faanahonahoraa a Iehova. E a toru, a faaohipa ˈi i te reni faahoaraa aore ra natirara.

3. No te aha te feia faaipoipo e fifihia ˈi e te nafea nei vetahi?

³ Ua hinaaro Iehova ia riro te faaipoiporaa ei oaoaraa no te tane e te vahine. No te huru tia ore râ, e nehenehe te aimârôraa e tupu. No reira Paulo i parau ai e “fifihia” te feia faaipoipo. (Kor. 1, 7:28) Ia tupu pinepine te peapea i rotopu i na hoa faaipoipo, e tatarahapa paha raua i te faaipoiporaa e e puta mai te manaˈo e faataa. Ia pee raua i te huru feruriraa o teie nei ao, e faatupu iho â raua i to raua hinaaro e faataa.

4. Eaha te mau manaˈo e titauhia ia haapae?

⁴ E ere te mauruuru ore i to tatou hoa faaipoipo i te tumu papu no te faataa. Ia au i te Bibilia, hoê anaˈe tumu e nehenehe ai e faataa, oia hoi te peu taotoraa tia ore. (Mat. 5:32) Ia fifihia te feia faaipoipo, eiaha ratou e vaiiho i te teoteo ia turai atu ia manaˈo: ‘Aita vau e mauruuru ra i to mâua faaipoiporaa! Aita o ˈna e here mau ra ia ˈu! E oaoa aˈe paha vau e te tahi atu taata!’ Ua tapao anei outou ua manaˈo noa te hoa faaipoipo ia ˈna anaˈe? Te haapii nei teie nei ao ia faatupu i te hinaaro o to oe aau e ia rave i te mea e oaoa ˈi oe noa ˈtu e faataa oe i to oe hoa faaipoipo! Area te Atua, te faaue ra ïa ia imi atoa i “to vetahi ê maitai, eiaha noa râ i to outou iho.” (Phil. 2:4) Aita Iehova e hinaaro ra ia faataa orua. (Mat. 19:6) Te titau ra Iehova ia haapao oe i to ˈna hinaaro na mua, eiaha râ i to oe!

5. Ia au i te Ephesia 5:33, eaha te titauhia i te tane e te vahine faaipoipo?

⁵ Mea titauhia ia here e ia faatura te  tane e te vahine te tahi i te tahi. (A taio i te Ephesia 5:33.) Te faaitoito ra te Bibilia ia rahi aˈe tatou i te horoa ˈtu na vetahi ê. (Ohi. 20:35) Eaha te tauturu i te feia faaipoipo ia here e ia faatura te tahi i te tahi? O te faatupuraa ïa i te haehaa. Eita te hoa faaipoipo haehaa e imi i to ˈna iho maitai, i “to vetahi ê” râ.—Kor. 1, 10:24.

6. Eaha te haapii mai i te mau parau a Steven raua Stephanie?

⁶ A faatupu ai i te haehaa, e rave rahi Kerisetiano tei oaoa i roto i to ratou faaipoiporaa. Te parau ra Steven, te hoê tane faaipoipohia: “Mea titauhia ia haa amui a tupu ai te fifi. Eiaha e manaˈo, ‘Eaha te mea maitai aˈe no ˈu?’ A parau râ, ‘Eaha te mea maitai aˈe no mâua?’” Te tu atoa ra te manaˈo o ta ˈna vahine ra o Stephanie. Te na ô ra oia: “Aita e haapaoraa ia ora e te hoê taata e mârô noa. Ia tupu te fifi, e imi mâua eaha te tumu. Ia oti, e pure, e rave i te maimiraa a paraparau atu ai e nafea mâua ia faatitiaifaro i te reira. E faaafaro mâua i te fifi, eita râ e imi o vai tei rahi aˈe!” E faufaa-mau-hia te mau tane e vahine ia ore ratou e manaˈo mea maitai aˈe ratou i to ratou hoa faaipoipo.

7. Ia fanaˈo te hoê taeae i te tahi hopoia, eaha to ˈna huru e tia ˈi?

⁷ E fanaˈoraa ia tavini ia Iehova. (Sal. 27:4; 84:10) Ia farii te hoê taeae i te tahi hopoia taa ê, e nehenehe o ˈna e haapopouhia! Te na ô ra hoi te Bibilia: “Ia titau te hoê tane i te hopoia tiaau, te hinaaro ra oia i te hoê ohipa maitai.” (Tim. 1, 3:1) Eiaha râ teie taeae ia manaˈo mea faufaa aˈe o ˈna ia vetahi ê. (Luka 17:7-10) Ia ineine râ oia i te tavini ia vetahi ê ma te haehaa.—Kor. 2, 12:15.

8. Eaha te haapiiraa e huti mai i te hiˈoraa o Dioterephe, Uzia e Abasaloma?

⁸ Te horoa ra te Bibilia i te hiˈoraa o te tahi mau taata tei manaˈo mea faufaa aˈe ratou ia vetahi ê. Aita Dioterephe i faaite i te haehaa, i titau na hoi oia i “te parahiraa matamua” i roto i te amuiraa. (Ioa. 3, 9) Ma te teoteo, ua rave Uzia i te hoê ohipa o tei ore e faatiahia ia ˈna ia rave. (Par. 2, 26:16-21) Ma te haavarevare, ua imi Abasaloma i te turu a te nunaa no te riro mai ei arii. (Sam. 2, 15:2-6) Te faaite maitai ra teie mau hiˈoraa eita Iehova e mauruuru i te feia e imi i to ratou iho hanahana. (Mas. 25:27) E aratai te teoteo e te aau faateitei i te ati!—Mas. 16:18.

9. Eaha te haapiiraa e huti mai i te hiˈoraa o Iesu?

⁹ Ua faaite mai Iesu i te hiˈoraa maitai. “Noa ˈtu e i ora na oia mai te Atua ra te huru, aita oia i manaˈo noa ˈˈe e haru i te tiaraa o te Atua, oia hoi ia aifaito ia ˈna.” (Phil. 2:6) E mana rahi to Iesu, aita râ o ˈna i manaˈo mea faufaa aˈe o ˈna. No reira Iesu i parau ai i ta ˈna mau pǐpǐ: “Te taata hoi o te faahaehaa ia ˈna i rotopu ia outou pauroa, o ˈna ïa tei rahi.” (Luka 9:48) Mea au mau ia tavini ia Iehova e te mau pionie, tavini tauturu, matahiapo e tiaau haaati o te pee ra i to Iesu haehaa! E turai te haehaa ia faaite i te here o te haapapu e tavini mau tatou na Iehova.—Ioa. 13:35.

10. Ia manaˈo outou aita te hoê fifi i roto i te amuiraa i faaafarohia ma te tano, ia nafea outou e tia ˈi?

¹⁰ Ia manaˈo oe aita te hoê fifi i roto i te amuiraa i faaafarohia ma te tano, ia  nafea oe e tia ˈi? Eiaha e faahapahapa, a faaite râ i te haehaa ma te turu i te mau matahiapo. (Heb. 13:17) A ui ia oe iho: ‘E fifi mau anei tera o te titauhia ia tuu i mua i te mau matahiapo? Tera anei te taime tano no te faaafaro i te fifi? Na ˈu anei te hopoia e faaafaro i te reira? Ma te ore e haavare ia ˈu iho, te haa mau ra anei au ia hoê te amuiraa, aore ra te imi ra vau i to ˈu maitai?’

11. Ia au i te Ephesia 4:2, 3, eaha te mau maitai e itehia ia tavini tatou ia Iehova ma te haehaa?

¹¹ No Iehova mea faufaa aˈe te haehaa i te aravihi, te auhoêraa i te ohipa. No reira, a imi i te mau ravea atoa no te tavini ia Iehova ma te haehaa e no te faatupu i te hau i roto i te amuiraa. (A taio i te Ephesia 4:2, 3.) A tamau i te poro. A imi e nafea ia tavini ia vetahi ê ma te rave i te mau ohipa maitatai. A farii maitai i te taata atoa, oia atoa i te feia aita ta ratou e hopoia taa ê. (Mat. 6:1-4; Luka 14:12-14) A haa ˈi ma te haehaa i roto i te amuiraa, e ite te taata eiaha noa i to oe aravihi, i to oe atoa râ haehaa.

12. Eaha ta te Bibilia e parau ra no nia i te faahoaraa? A faataa.

¹² Ua hamani Iehova ia tatou e te hinaaro e amuimui e te mau mero utuafare e te hoa. (Sal. 133:1) E hoa piri atoa to Iesu. (Ioa. 15:15) Te faaite ra te Bibilia i te mau maitai ia fanaˈo i te hoa mau. (Mas. 17:17; 18:24) E te parau atoa ra, e ere i te mea maitai ia faaea noa o tatou anaˈe. (Mas. 18:1) Mea rahi te manaˈo  ra o te reni faahoaraa te ravea maitai roa ˈˈe no te fanaˈo i te hoa. Tera râ, e titauhia ia ara i ta tatou huru faaohiparaa i tera ravea apî.

13. No te aha vetahi e nehenehe ai e moˈemoˈe e e hepohepo a haere ai i nia i te reni faahoaraa?

¹³ Ia au i te tahi mau titorotororaa, e nehenehe te taata e moˈemoˈe e e hepohepo a haere ai i nia i te reni faahoaraa. No te aha? Te tahi tumu, e tuu te taata i te tahi mau hohoˈa o to ratou oraraa, hoa e te mau vahi au mau ta ratou i haere. E nehenehe te taata o te mataitai i taua mau hohoˈa ra e manaˈo mea haumani to ˈna oraraa. Te na ô ra te tahi tuahine 19 matahiti: “A ite ai i ta te taata e rave i te mau hopea hebedoma, manaˈo atura vau mea haumani to ˈu oraraa, haamata ˈtura vau i te faahinaaro i to vetahi ê oraraa.”

14. Ia au i te Petero 1, 3:8, e nafea tatou ia faaohipa i te reni faahoaraa ma te paari?

¹⁴ E faufaaraa to te reni faahoaraa, e nehenehe hoi e ite eaha te huru o te mau fetii e te hoa. Tera râ, ua tapao anei outou e faatietie vetahi ia ratou i nia i te reni faahoaraa? Mai te huru ra te parau ra ratou: “O vau teie!” E papai roa ˈtu vetahi i to ratou manaˈo ma te faahiti i te mau parau ino e faufau. Aita roa ˈtu te reira e faaitoito ra ia faaite i te haehaa e i te here i te mau taeae e tuahine.—A taio i te Petero 1, 3:8.

15. E nafea te Bibilia e tauturu mai ai ia ore e faatietie ia tatou?

¹⁵ Te faaohipa ra anei oe i te reni faahoaraa? Mai te peu e e, a ui ia oe iho: ‘Ia ite te taata i ta ˈu mau parau, hohoˈa e video, eita anei vetahi e manaˈo e taata faaoru vau? E nehenehe anei te tahi atu e pohehae mai?’ Te parau ra te Bibilia: “Te mau mea atoa hoi a teie nei ao, oia hoi te hinaaro tia ore o te tino e te hinaaro tia ore o te mata e te faaiteiteraa ahaaha i ta ˈna mau faufaa, e ere ïa no ǒ mai i te Metua ra, no ǒ mai râ i teie nei ao.” (Ioa. 1, 2:16) I roto i te tahi huriraa Bibilia, ua hurihia te mau parau “faaiteiteraa  ahaaha i ta ˈna mau faufaa” ei “hinaaroraa e faaite mea faufaa o ˈna.” Eita te mau tavini o te Atua e faatietie ia ratou! Te pee ra hoi ratou i te aˈoraa Bibilia: “Eiaha tatou e faateitei noa, e tataˈu e e feii te tahi i te tahi.” (Gal. 5:26) E tauturu te haehaa ia tatou ia ore e riro mai te feia faaoru e te teoteo o teie nei ao!

16. No te aha eiaha tatou ia riro ei taata teoteo?

¹⁶ E titauhia ia faaite i te haehaa no te faatupu i te “manaˈo au noa.” (Roma 12:3) E imi hara e e faateitei te taata teoteo. Pinepine to ratou manaˈo e ta ratou mau ohipa i te haamauiui ia ratou e ia vetahi ê atoa. Ia ore ratou e taui, e haapoiri Satani i to ratou feruriraa. (Kor. 2, 4:4; 11:3) Area te taata haehaa, e manaˈo au noa ïa to ˈna no nia ia ˈna iho e e farii atoa oia mea hau aˈe vetahi ê ia ˈna. (Phil. 2:3) Ua ite atoa te taata haehaa “e patoi te Atua i te feia teoteo, e hamani maitai rahi râ oia i te feia haehaa.” (Pet. 1, 5:5) Eita te taata manaˈo au noa e hinaaro e riro ei enemi no Iehova!

17. No te faaite noa i te haehaa, eaha te titauhia ia rave?

¹⁷ No te faaite noa i te haehaa, mea titauhia ia “tatara i te huru taata tahito e ta ˈna ra mau peu, e [ia] ahu mai i te huru taata apî.” E titauhia ia tutava rahi no te haapii i te hiˈoraa o Iesu e no te pee maite i to ˈna mau taahiraa avae. (Kol. 3:9, 10; Pet. 1, 2:21) E maitai rahi râ ta tatou e fanaˈo! Ia faaite tatou i te haehaa, e oaoa to tatou utuafare, e tahoê te amuiraa e e faaohipa tatou i te reni faahoaraa ma te paari. Te mea faufaa roa ˈtu â, e mauruuru e e haamaitai Iehova ia tatou!