1. ¿Bin tojobtesel ya jtatik ta Filipenses 2:3 sok bin lek ya xlokʼ kuʼuntik-a teme ya jchʼuuntik spasele?

TE J-ABATOTIK yuʼun Jehová pekʼel koʼtantik sok ya jchʼuunbeytik te mantaliletik yuʼune, melel jnaʼojtik te jaʼ ya snaʼ te bin lek ta jtojoltike (Efes. 4:22-24). Te spekʼelil koʼtantik jaʼ ya skoltayotik yuʼun jaʼ ya jpasbeytik te skʼanojel yoʼtane, ma jaʼuk te kuʼuntike. Jaʼnix jich ya skoltayotik yuʼun jaʼ toyolxan skʼoplal ya kiltik te yantik te bitʼil te joʼotike. Teme jich ya jpastik-abi, lek ya kil jbatik sok te Jehová sok te kermanotaktike (kʼopona Filipenses 2:3).

2. 1) ¿Bin la yal te jpuk-kʼop Pabloe? 2) ¿Bin ya jnoptik ta artikulo ini?

² Pero teme maba ya jtsajtay jbatike, ya xjuʼ ya jkʼayinbeytik te stoybail yoʼtan sok te sbikʼtal yoʼtan te balumilal yuʼun te Satanase. * Jichniwan kʼan kʼotuk ta pasel ta stojol te jchʼuunjeletik ta sbabial siglo, jaʼ yuʼun te jpuk-kʼop Pablo la yakʼbey te tojobtesel ini te kongregasion ta Roma: «Ya calbeyex ta apisilic te ma me cʼax hich mucʼ yac acuy abahic a te bin utʼil ya scʼane, yichʼojuc me scuentahil te yac apʼis abahic» (Rom. 12:3). Jich bitʼil la yal te Pabloe, ya skʼan te ayuknix jkʼoplal ya kaʼiy jbatike. Pero te spekʼelil koʼtantik ya skoltayotik yuʼun maba kʼax mukʼ jkʼoplal ya kaʼiy jbatik. Ta artikulo ini ya jnoptik oxchajp te banti ya skoltayotik te spekʼelil koʼtantik yuʼun maba kʼax mukʼ jkʼoplal ya kaʼiy jbatik: ta nujpunel kuʼuntik, ta kaʼteltik ta organisasion sok ta redes sosiales.

3. 1) ¿Bin yuʼun stalelnanix-a te ya xjajch kʼop yuʼunik te machʼatik nujpunemike? 2) ¿Bin-a te ay ya spasik te machʼatik nujpunemike?

³ Te Jehová ya skʼan te tseʼeluk yoʼtanik te winik sok te ants te nujpunemike. Pero ta swenta te jmulawilotike, stalelnanix-a te ya xjajch kʼope. Te Pablo la yal te machʼatik ya xnujpunik ya xkʼax wokol ta skuxlejalik (1 Cor. 7:28). Ay ermanoetik te jich ya yaʼiyik te jujun kʼajkʼal ya xjajch kʼop yuʼunik sok yaniwan snopik te maba snujpʼ sbaike. Teme jaʼ la snopbeyikix yoʼtan te ants winiketik ta balumilale, jaʼnax ya snopik te bin ya skʼan yoʼtan ta jujuntule sok yaniwan skuyik te jaʼ lek te yakuk slajinbeyik skʼoplal te nujpunel yuʼunike.

4. ¿Bin-a te ma skʼan ya jnoptike?

⁴ Mame skʼan ya jnoptik te maba lek lokʼ te nujpunel kuʼuntike. Jnaʼojtik te Biblia ya yal te jaʼnax ya xjuʼ ya jlajinbeytik skʼoplal te nujpunel teme ay machʼa yal ta mulile (Mat. 5:32). Jaʼ yuʼun teme ay jich ya jtatik wokol te bitʼil la yal te Pabloe, mame kakʼtik te stoybail koʼtantik ya yakʼ jnoptik ini: «¿Yabal yakʼbon spisil te bin ya skʼan koʼtan te jmamalal o te kiname? ¿Yabal yakʼbon te kuxul oʼtanil te bitʼil snujpʼ ya kichʼ akʼbeyele? ¿Jaʼbal tseʼelxan koʼtan-a teme ya jle yane?» Te machʼa jich ya snope, jaʼnax ya sle te bin ya skʼan yoʼtane. Te snopojibal yuʼun te ants winiketik ta balumilal jaʼ te jaʼuk ya kaʼiytik te bin ya yalbotik te koʼtantike sok te jaʼuk ya jletik te stseʼelil koʼtantik manchukme ya skʼan ya jlajinbeytik skʼoplal te nujpunel kuʼuntike. Pero te machʼatik jaʼ ya yakʼ sbaik ta tojobtesel yuʼun te spʼijil te Diose, ma jaʼuknax ya sle te slekilike, jaʼnix jich ya slebey slekilal te yantike (Filip. 2:4). Te Jehová ya skʼan te ya jkanantaytik te nujpunel kuʼuntike, ma jaʼuk te ya jlajinbeytik skʼoplale (Mat. 19:6). Jaʼ ya skʼan te yakuk jnoptik te bin ya skʼan yoʼtane, ma jaʼuk te bin ya skʼan te koʼtantike.

5. Jich bitʼil ya yal Efesios 5:33, ¿bin talelil ya skʼan ya yakʼbey sba yilik te mamalalil sok te inamile?

 ⁵ Te mamalalil sok te inamil ya skʼan te kʼux ya yaʼiy sbaik sok te ya yichʼ sbaik ta mukʼ (kʼopona Efesios 5:33). Te Biblia ya yakʼ jnoptik te jaʼuk mukʼxan skʼoplal ta koʼtantik te ay bin ya kakʼtik ma jaʼuk te ay bin ya kichʼtike (Hech. 20:35). Swenta kʼux ya yaʼiy sbaik sok ya yichʼ sbaik ta mukʼ, ya skʼan te ayuk spekʼelil yoʼtanike. Jaʼme ya xkoltayot yuʼun ma jaʼuk ya sle te bin ya skʼan yoʼtane, jaʼ ya sle te bin lek ta stojol te yane (1 Cor. 10:24).

6. ¿Bin ya jnoptik ta swenta te bin la yalik te Steven sok Stephanie?

⁶ Ta swenta te spekʼelil yoʼtanik bayal ermanoetik te nujpunemik ay stseʼelil yoʼtanik. Jun ejemplo jaʼ te bin la yal te ermano Steven: «Teme jun ayike, pajal ya skoltay sbaik, kʼaxtoxan-a te kʼalal ya xjajch kʼop yuʼunike. Jich ya snopik, ‹¿bin lekilal ya jtatik ta jchebaltik?› Maba ya snopik ‹¿bin-a te lek ya jta te joʼone?›». Te Stephanie te jaʼ yiname, jich ya snop-euk: «Maʼyuk machʼa ya skʼan te jun sna sok te skontrae. Te kʼalal ay banti ma akuerdo ayotike, ya kiltik te bin yuʼune. Ya jpastik orasion, ya jletik informasion sok ya kalbeytik skʼoplal. Jaʼ ya jtsaltik te kʼope, ma jaʼuk te ya xjajch jtsal jbatik ta jchebaltike». Jaʼme ayxan stseʼelil yoʼtanik te machʼatik nujpunemik teme maba kʼax mukʼ ya skuy sbaik ta stojol te yane.

7. ¿Bin talelil ya skʼan ya yakʼ ta ilel jtul ermano teme ya yichʼ yaʼtel ta organisasione?

⁷ Jaʼ mukʼul majtanil ya kiltik te ya x-abatinotik ta stojol te Jehová te bitʼil lekxan ya xjuʼ kuʼuntik spasele (Sal. 27:4; 84:10). Lek teme ay jtul ermano ya skʼan bayal ya x-aʼtejxan ta organisasion yuʼun te Jehová, melel jich ya yal te Biblia: «Teme ay machʼa yoʼtanuc ya yichʼ yaʼtel ta anciano, buen lec aʼtel te ya scʼane» (1 Tim. 3:1). Pero teme ay la yichʼ akʼbeyel yaʼtele, mame skʼan ya stoy sba yuʼun (Luc. 17:7-10). Te bin ya skʼan ayuk ta yoʼtan spasele, jaʼ te ya x-aʼtej ta stojol te yantik sok spekʼelil yoʼtan (2 Cor. 12:15).

8. ¿Bin ya jnoptik ta swenta te bin la spasik te Diótrefes, Uzías sok Absalón?

⁸ Te Biblia ya yalbey skʼoplal ants winiketik te kʼax mukʼ skʼoplal la skuy sbaike. Jich bitʼil te Diótrefes maʼyuk spekʼelil yoʼtan sok «ya smulan te nahil ya xcʼoht» ta yolil te kongregasion (3 Juan 9). Te Uzías la yakʼ ta ilel te ya stoy sba kʼalal ay bin kʼan spas ta stojol Jehová te ma jaʼuk ay ta swenta spasele (2 Crón. 26:16-21). Te Absalón la sloʼlaybey yoʼtan te lum yuʼun ya skʼan ya x-och ta ajwalil (2 Sam. 15:2-6). Jich bitʼil ya yakʼ kiltik te Biblia, te Jehová maba lek ya yil te machʼatik jaʼnax ya sle te yutsilalike (Prov. 25:27). Te machʼatik ya yakʼ sbaik ta tsalel yuʼun te stoybail yoʼtanik sok te sbikʼtal yoʼtanike, maba lek ya xkʼotik ta lokʼel (Prov. 16:18).

9. ¿Bin ejemplo la yakʼ kiltik te Jesuse?

⁹ Te Jesús la yakʼ kiltik kʼax lekik ejemplo stukel. Te Biblia ya yal te «manchukme jich yilel bitʼil te Diose, maba la snop te ya spojbey yaʼtel te Dios sok te pajal ya xkʼot soke» (Filip. 2:6, TNM). Manchukme bayal yuʼel te Jesuse, maba kʼax mukʼ skʼoplal ya yaʼiy sba. Jich la yalbey te jnopojeletik yuʼune: «Como te machʼa peqʼuel ay awuʼunic ta apisilic, ha me mucʼ stuquel» (Luc. 9:48). Kʼax tseʼel koʼtantik yuʼun te ya jokintik ta aʼtel te prekursoretik, sierbo ministerialetik, ansianoetik sok superintendenteetik yuʼun sirkuito te ya snopbeyik te spekʼelil yoʼtan te Jesuse (Juan 13:35). Teme pekʼel koʼtantike, ya kakʼtik ta ilel skʼuxul koʼtantik ta stojol yantik, jich ya xchiknaj ta ilel te kʼuxul oʼtanil te ay ta lum yuʼun te Diose (Juan 13:35).

10. ¿Bin ya skʼan ya jpastik teme jich ya kiltik te ay bin maba lek yak ta chajpanel ta kongregasione?

 ¹⁰ ¿Bin ya skʼan ya jpastik teme ya kiltik o ya jnoptik te ay bin maba lek yak ta chajpanel ta kongregasione? Mame xjajchotik ta wulwulkʼop yuʼun, ayuk spekʼelil koʼtantik sok jkoltaytik te machʼatik ya skanantayik te kongregasione (Heb. 13:17). ¿Bin-utʼil ya xjuʼ kuʼuntik spasel? Jnop kaʼiytik ini: «¿Yuʼun-nixbal kʼax mukʼ-a te kʼope? ¿Yorailixbal ta chajpanel? ¿Joʼonbal ay ta jwenta schajpanel? ¿Bin-a te yakon ta sleele, jaʼbal te jun-nax ay te kongregasion o jaʼbal te kutsilale?».

11. Jich bitʼil ya yal Efesios 4:2, 3, ¿bin lek ya xkʼot ta pasel teme ya x-abatinotik ta stojol Jehová sok spekʼelil koʼtantik?

¹¹ Te Jehová jaʼ mukʼxan skʼoplal ya yil te ayuk spekʼelil koʼtantike, ma jaʼuk te ay bin ya jnaʼtik spasele sok jaʼ mukʼxan skʼoplal ya yil te jun ayotik sok te yantike, ma jaʼuk te bayal bin ya jpastike. Jaʼ yuʼun jpastik tulan yuʼun pekʼeluk koʼtantik ta abatinel ta stojol te Jehová, jichme ya xkoltaywanotik yuʼun jun-nax ayotik ta kongregasion (kʼopona Efesios 4:2, 3). Jcholtik spisil-ora te skʼop Diose sok jletik bitʼil ya jpastik te bin lek ta stojol te yantike. Kikʼtik ta weʼel uchʼel ta jnatik te ermanoetike, pero mame jaʼuknax ya kikʼtik te machʼatik ay yaʼtelik ta kongregasion (Mat. 6:1-4; Luc. 14:12-14). Teme ya jpastik spisil-abi mame jaʼuknax ya yilik te bin ya jnaʼtik spasele, jaʼnix jich ya yilik te spekʼelil koʼtantike.

12. ¿Bin ya yal te Biblia ta swenta te ayuk kamigotaktike?

¹² Te Jehová ya skʼan te yakuk jmulantik sjokinel te jfamiliatik sok te kamigotaktike (Sal. 133:1). Te Jesús jaʼnix jich la sta lekil yamigotak (Juan 15:15). Te Biblia ya yal te  ya jtatik lekilal teme ay lekil kamigotaktike (Prov. 17:17; 18:24). Soknix ya yal te manchuk ya jtukeltay jbatike (Prov. 18:1). Ay bayal machʼatik ya snopik te ya jtatik bayal kamigotaktik ta redes sosiales swenta ma jtukel ya kaʼiy jbatik-a. Pero teme ya jtuuntestike, akʼame jnaʼtik stsajtayel jbatik.

13. ¿Bin yuʼun ya xjuʼ stukel ya yaʼiy sbaik sok ya smel yoʼtanik te machʼatik ya stuuntesik te redes sosiales?

¹³ Ay pasbil inbestigar te stukel ya yaʼiy sbaik sok ya smel yoʼtanik te machʼatik ya skʼasesik bayal tiempo ta skʼoponel te komentarioetik sok fotoetik te ya smoesik te yantik ta redes sosiales. ¿Bin yuʼun te jich ya yaʼiy sbaike? Jun-niwan swentail jaʼ te ya yil te bin ya smoesik te yantik, jich bitʼil fotoetik te banti tʼujbil lokʼik, te banti sjokinej yamigotakik sok lugaretik te banti kʼotike. Te machʼatik ya yilik te fotoetik-abi, yaniwan snopik te maʼyuk lek swentail te skuxlejalike sok te maʼyuk stseʼelil yoʼtanike. Jtul ermana te 19 yaʼbilal jich ya yal: «Kʼalal ya kil te ta slajibal semana bayal bin la spasik te yantik sok tseʼelnax yoʼtanik yuʼune, ya jmel koʼtan yuʼun, melel maʼyuk jich la jpas jtukel».

14. ¿Bin-utʼil ya skoltayotik te 1 Pedro 3:8 yuʼun ya jnaʼtik stuuntesel te redes sosiales?

¹⁴ Melelnix-a te ya xtuun kuʼuntik te redes sosialese, jich bitʼil yuʼun ya jkʼopontik te jfamiliatik sok te kamigotaktike. Pero ¿aybal ataoj ta ilel te jteb ma spisiluk te bin ya smoesik te ants winiketik ta redes sosiales jich ya spasik yuʼun mukʼ skʼoplal ya yichʼik ilel? Jich yilel te jaʼ ya skʼanik te spisil machʼatik ya x-ilotik yuʼune. Ay machʼatik ya stsʼibayik chopolkʼop o bolkʼop ta swenta te sfotoik o ta sfoto te yantike. Te bin ya spasike, jkʼaxel ma stsak sba sok te talelil ya skʼan ya kakʼtik ta ilel te j-abatotik yuʼun Diose, jich bitʼil te pekʼel-oʼtanil sok te ya kichʼtik ta wenta te bin yaʼiyel ya yaʼiy sbaik te yantike (kʼopona 1 Pedro 3:8).

15. ¿Bin-utʼil ya skoltayotik te Biblia yuʼun maba ya jtoy jbatik?

¹⁵ Teme ya jtuuntestik te redes sosiales jnop kaʼiytik: «¿Bin yilel te bin ya jtsʼibay, te fotoetik sok te bideoetik te ya jmoese? ¿Yabal yakʼ ta ilel te ya jtoy jbae? ¿Yabal xjuʼ ya yakʼbey sbikʼtal yoʼtan te yantike?». Te Biblia jich ya yal: «Como spisil bintic ay ta bahlumilal, ha  te bin ya smulan te baqʼuet scuenta mulil, te bin ya smulan yilel te jsitic, soc te toybahil, ma ba talem ta stojol te Tatil, ha talem ta stojol te bahlumilale» (1 Juan 2:16). Te j-abatotik yuʼun Dios ma jkʼantik te jkʼaxel mukʼ jkʼoplal ya yilotik te yantike. Jaʼ ya jchʼuuntik te tojobtesel ini: «Ma me jtoy jbahtic, ma me cutsʼin jbahtic soc ma me talel cʼaxeluc ya jtiʼtiʼoʼtantay jbahtic» (Gál. 5:26). Teme pekʼel koʼtantik maba ya jnopbeytik stoybail yoʼtan te balumilale.

16. ¿Bin yuʼun maba ya jkʼan ya jtoy jbatik?

¹⁶ Yame skʼan ya jchʼites ta koʼtantik te pekʼel-oʼtanile, melel te jtoybaetik ma xyakʼik ta ilel spʼijil yoʼtanik (Rom. 12:3). Ya sjachik kʼop sok kʼax mukʼ skʼoplal ya skuy sbaik. Ya sta swokolik yuʼun te bin ya snopik sok te bin ya spasik sok ya yakʼbeyik swokol te yantike. Teme maba ya sjeltay te stalelike, yame xjinbot spensarik yuʼun te Satanase (2 Cor. 4:4; 11:3). Yan stukel te machʼatik pekʼel yoʼtanike, ya yakʼik ta ilel spʼijil yoʼtanik. Pʼisbil sok tsajtaybilnax te bitʼil ya yil sbaike sok ya snaʼik te ay yantik te jaʼxan ay bin ya snaʼik spasele (Filip. 2:3). Jaʼnix jich snaʼojik te «Dios ya scontrahin te jtoybahetic, pero ya scʼuxultay te machʼatic peqʼuel yoʼtanic» (1 Ped. 5:5). Te machʼatik ay spʼijil yoʼtanik, ma skʼanik te ya xkontrainotik yuʼun te Diose.

17. ¿Bin ya skʼan ya jpastik teme ya jkʼantik te spisil-ora pekʼel koʼtantike?

¹⁷ Teme ya jkʼantik te spisil-ora pekʼel koʼtantike, ya skʼan ya jchʼuuntik te tojobtesel ini: «Ijqʼuitaya me te apocol acuxlejalique soc spisil te bila cʼaemex ta spasel ta swentae. Cʼuʼinaic me te yachʼil acuxlejalic». Pero maba kʼun ta pasel, melel ya skʼan ya jnopbeytik skʼoplal te ejemplo yuʼun Jesús sok te ya jtʼunbeytik stalel te ban kʼalal ya xjuʼ kuʼuntike (Col. 3:9, 10, TZOXCH; 1 Ped. 2:21). Teme jich ya jpastike, ay bin lek ya xlokʼ kuʼuntik-a. Teme ya jpastik tulan te pekʼel koʼtantike, te jfamiliatik ayme stseʼelil yoʼtan, te kongregasion jun-naxme ay sok yame jtsajtay jbatik ta stuuntesel te redes sosiales. Pero te bin tulanxan skʼoplale, jaʼ te ya yakʼbotik bendision te Jehová sok te lek ya yilotike.