1. (a) Che consìlio ghen’è in Filipensi 2:3? (b) Cossa che va suceder se metemo in pràtica questo consìlio?

LA UMILTÀ la ne giuta a far quel che Geovà el ne domanda. La umiltà la ne giuta a veder che Geovà sempre el sa quel che l’è meio par noantri. (Efe. 4:22-24) Quando noantri semo ùmili, noantri pensemo che quel che Geovà el vol l’è pi importante de quel che noantri volemo e anca pensemo che i altri i ze sempre pi importanti che noantri. Quando femo cossita, saremo ancora pi amighi de Geovà e anca dei fradei. — Ledi Filipensi 2:3. *

2. (a) Cossa che el apòstolo Paolo el savea? (b) Cossa che ndaremo imparar in questo stùdio?

² Ghemo de star atenti par no scominsiar a far e pensar come le persone egoìste e orgoliose del mondo de Sàtana. * Pol esser che questo l’era drio suceder coi cristiani nel primo sècolo. Paolo el ga dito ai romani: “Ma ve digo a tuti valtri: no sté mia pensar de valtri stessi de pi che gavé de pensar, ma gavé de esser ùmili in quel che pensé de valtri stessi.” (Rom. 12:3) Paolo el savea che l’era importante pensar in noantri, ma nò de pi de quel che l’è. La ze la umiltà che la ndarà giutarne a far questo. In questo stùdio, ndaremo imparar come che la umiltà la ndarà  giutarne a nò esser orgoliosi (1) nel matrimònio, (2) quando ricevemo privilegi nela organisassion e (3) quando doperemo le rede sossiai.

3. (a) Parché che quei che i ze maridadi i infronta problemi? (b) Cossa che fursi arquanti i fà quando i infronta problemi nel matrimònio?

³ Geovà el ga creà el matrimònio par el omo e la dona esser felici. Ma, come el omo e la dona i ze imperfeti, l’è normal vegner fora problemi. Fin Paolo el ga dito che i maridadi i gavaria dificoltà. (1 Cor. 7:28) Arquanti che i ze maridadi i vede che i ze sempre drio discutir. Alora i pensa che saria meio se no i fusse maridadi. Se lori i va drio de quel che el mondo el dise, alora lori i ndarà pensar che no ghen’è pi come viver insieme. Lori i va pensar che l’è meio el divòrsio e che la roba pi importante la ze la so pròpia felicità.

4. Ghemo de star atenti a cossa?

⁴ Ghemo de star atenti par no restar disgustadi col nostro matrimònio. Noantri savemo che el ùnico motivo che la Bìblia la dà par el divòrsio l’è la imoralità sessual. (Mat. 5:32) Alora, quando noantri ghemo de infrontar dificoltà o problemi, come Paolo el ga scrito, noantri no podemo esser orgoliosi e pensar: ‘Mi no son pi felice in questo matrimònio. Mi no ricevo el amor che mi mèrito. Fursi mi saria pi felice con nantra persona.’ Sito nicorto qual che l’è el problema de questi pensamenti? La persona che la ga questi pensamenti la mostra che la pensa sol in ela. El saver del mondo el dise che la persona la ga de scoltar el so cuor e ndar in serca de la so felicità. Ma la sabedoria de Dio la mostra che la persona la ga de importarse nò sol in quel che l’è bon par ela, ma anca par i altri. (Fil. 2:4) Geovà el vol che ti te resti maridà e che no te desisti mai del to matrimònio. (Mat. 19:6) El  pi importante l’è pensar in quel che Geovà el vol e nò in ti stesso.

5. De acordo con Efesi 5:33, cossa che el omo e la dona i ga de mostrar un al altro?

⁵ El omo e la dona i ga de mostrar amor e rispeto un al altro. (Ledi Efesi 5:33. *) La Bìblia la ne insegna che l’è pi importante dar che ricever. (Ati 20:35) Che qualità ndarà giutar el omo e la dona a mostrar amor e rispeto? La umiltà. Quando el omo e la dona i ze ùmili, lori no i va pensar sol in quel che l’è meio par lori, ma in quel che l’è bon par quelaltro. — 1 Cor. 10:24.

6. Cossa che te ghè imparà de quel che Steven e Stephanie i ga dito?

⁶ Quando i servi de Geovà che i ze maridadi i mostra umiltà, lori i ze pi felici nel matrimònio. Par esémpio, un sposo ciamà Steven el dise: “Se valtri sì una echipe, sarà pròpio meio laorar insieme par infrontar i problemi. Invesse de pensar: ‘Cossa che l’è meio par mi?’,  ti te vè pensar: ‘Cossa che l’è meio par noantri?’”  Anca Stephanie, che la ze sposa de Steven, la pensa cossita. Ela la dise: “Nissun vol star insieme de un nemigo. Quando no semo mia intesi, noantri volemo catar fora el problema. Alora, noantri preghemo, femo peschise e parlemo sora questo. Noantri volemo finir col problema, e nò un colaltro.” L’è sicuro che el omo e la dona che i ze ùmili i ze pi contenti.

7. Cossa che un fradel che el riceve una responsabilità nela organisassion el ga de far?

⁷ Par noantri, el pi grando privilègio l’è servir a Geovà. (Sal. 27:4; 84:10) L’è bon quando un fradel el se mete a disposission par far de pi nela organisassion de Geovà. La Bìblia la dise: “Se un omo l’è drio sforsarse par esser un superintendente, el vol una roba tanto bona.” (1 Tim. 3:1) Ma un fradel che el riceve una responsabilità nela organisassion de Geovà no’l ga de pensar che l’è meio che i altri. (Luc. 17:7-10) El so ogetivo l’è servir ai altri con umiltà. — 2 Cor. 12:15.

8. Cossa che imparemo dei esempi de Diòtrefe, Uzia, e Absalon?

⁸ Nela Bìblia, ghen’è esempi de persone che le ze state orgoliose. Diòtrefe no l’era mia ùmile, alora el volea gaver “el primo posto” nela congregassion. (3 Gio. 9) Par causa del so orgòlio, Uzia el ga fato un laoro che sol i sasserdoti i podea far. (2 Cró. 26:16-21) Absalon el ga fato finta voler ben el pòpolo par el pòpolo darghe apoio a lu par deventar rè. (2 Sam. 15:2-6) Questi esempi i ne mostra che Geovà no’l ghe piase mia de persone che le vol farse veder. (Pro. 25:27) Alora, persone che le ze orgoliose e che le vol farse veder le gavarà problemi. — Pro. 16:18.

9. Che esémpio Gesù el ne ga dato?

⁹ Ma adesso, ndemo veder el esémpio de Gesù. La Bìblia la dise che, “ancora che Gesù el fusse come un Dio, lu no’l ga volesto esser compagno a Dio”. (Fil. 2:6) Gesù l’è la seconda persona pi importante che ghen’è, ma ancora cossita lu l’è ùmile. Lu el ga dito ai so dissìpoli: “Quel che l’è ùmile intrà de valtri l’è el pi grando.” (Luc. 9:48) L’è pròpio bel servir insieme con pionieri, servi ministeriai, ansiani e superintendenti de sircuito ùmili compagno a Gesù. — Gioani 13:35.

10. Cossa che ghemo de far se pensemo che i ansiani no i ze drio tender ben dei problemi dela congregassion?

¹⁰ Pol esser che ghen’è qualche problema nela to congregassion e fursi no te piase mia dela maniera che i ansiani i ze drio tender del problema. Pitosto de sbrontolar, sìpia ùmile e  daghe apoio ai ansiani. (Ebr. 13:17) Pensar in queste domande ndarà giutarte: ‘Sarà che questi problemi i ze pròpio bruti che i ga bisogno de una solussion? Sarà che la responsabilità de risolver la ze mia? Quando mi penso nela me motivassion, mi vui unir la congregassion o mi vui farme veder?’

11. De acordo con Efesi 4:2, 3, come che ndaremo giutar la congregassion se semo ùmili?

¹¹ Geovà el dà de pi valor ala umiltà de che ala abilità. El dà pi valor ala union de che far tante robe al medèsimo tempo. Alora, sfòrsate par servir a Geovà con umiltà. Cossita, te vè giutar a mantegner la union dela congregassion. (Ledi Efesi 4:2, 3. *) Ma come che podemo mostrar che semo persone ùmile? Va ala predicassion sempre che te pol. Va in serca de oportunità par far quel che l’è bon par i altri. Mostra ospitalità a tuti, anca a quei che no i ga privilegi nela congregassion. (Mat. 6:1-4; Luc. 14:12-14) Quando te sì una persona ùmile e te servi insieme dei to fradei e sorele, lori i va veder le to abilità ma anca la to umiltà.

12. Che consìlio la Bìblia la dà sora le amicìssie?

¹² Geovà el vol che restemo contenti de esser insieme dela nostra fameia e dei nostri amighi. (Sal. 133:1) Gesù el gavea boni amighi. (Gioani 15:15) La Bìblia la mostra che l’è tanto bon gaver veri amighi. (Pro. 17:17; 18:24) La Bìblia anca la mostra che no l’è mia bon restar sempre soli. (Pro. 18:1) Ma tante  persone le pensa che le ze nele rede sossiai che lore le gavarà boni amighi e che la ze una maniera de esser mia sole. Ma tuti noantri ghemo de star pròpio atenti quando doperemo le rede sossiai.

13. Parché che arquanti che i dopera le rede sossiai i pol sentirse soli e deprimidi?

¹³ Le peschise le mostra che tante persone le dopera tanto tempo vardando foto e quel che le persone le mete nele rede sossiai. Queste persone le se sente cada volta pi sole e deprimide. Parché? Fursi parché le persone le mete nela internet sol i bei momenti dela so vita. Lore le scòlie le so meio foto, i so amighi e i posti pi bei che i ze ndati. Alora, la persona la varda questi ritrati, la scomìnsia a compararse e la pensa che la so vita no la ze mia bona cossita. Una sorela de 19 ani la dise: “Mi go scominsià a sentir invìdia dei altri parché mi vedea che tuti i era drio divertirse e mi era casa sensa far gnente.”

14. Come el consìlio de 1 Piero 3:8 el ne giuta a doperar le rede sossiai?

¹⁴ Le rede sossiai le pol esser tanto bone, parché podemo parlar cola nostra fameia e amighi. Ma gheto belche visto che tante persone le dopera le rede sossiai sol par farse veder? El ogetivo de questa persona l’è che tuti i la varde, e arquanti, quando i scrive qualcossa sora i so ritrati o dei altri i dopera parole sporche e brute. Quando una persona la fà questo, no la ze drio far quel che la Bìblia la dise, parché no la ze ùmile e gnanca no la se mete nel posto dei altri. — Ledi 1 Piero 3:8. *

15. Che consili dela Bìblia i ne giuta a no voler farse veder?

¹⁵ Se te doperi le rede sossiai, domàndate: ‘Sarà che i ritrati, i vìdei e quel che mi parlo nele rede sossiai i mostra che mi vui farme veder? Podaria far i altri sentir invìdia?’ La Bìblia la dise: “Parché tuto quel che ghen’è nel mondo — la voia dela carne, la voia dei oci e sprosiarse dele robe che se ga — no’l vien del Pare ma el vien del mondo.” (1 Gio. 2:16) Nantra Bìblia la traduse la spression “sprosiarse dele robe che se ga” come “voler mostrarse importante”. Invesse dei servi de  Geovà voler farse veder, lori i seghe el consìlio: “No pensemo sol in quel che l’è meio par noantri e gnanca femo gnente con competission, un contra colaltro, con invìdia un dei altri.” (Gàl. 5:26) Se noantri volemo star distanti del spìrito de orgòlio del mondo, noantri ghemo de esser ùmili.

16. Parché che no ghemo de esser orgoliosi?

¹⁶ Ghemo de esser ùmili parché i orgoliosi i pensa sol in lori stessi. (Rom. 12:3) La persona orgoliosa la ghe piase de discussion e la pensa che la ze tanto importante. Ela la pensa e la fà le robe che le fà mal a ela e anca ai altri. Se questa persona no la càmbia, Sàtana el va doperar questo par continuar a influensiarla a pensar in robe sbaliade. (2 Cor. 4:4; 11:3) Ma la persona ùmile no la pensa che la ze meio che i altri. Invesse, la ga pròpio in mente che le altre persone le ze meio che ela in tante robe. (Fil. 2:3) E questa la sa che “Dio l’è contra le persone arogante, ma el dà la bontà imèrita ai ùmili”. (1 Pie. 5:5) Una persona che la ze ùmile no la vol gaver Geovà contra ela.

17. Cossa che ghemo de far par continuar ùmili?

¹⁷ Se noantri volemo continuar a esser persone ùmile, noantri ghemo de aplicar el consìlio de “cavar via la vècia personalità cole so pràtiche e vestir la nova personalità”. Far questo ghe vol tanto sforso. Noantri ghemo de studiar el esémpio de Gesù e sforsarse par far compagno a lu. (Col. 3:9, 10; 1 Pie. 2:21) Gavaremo tanti boni resultadi se femo questo. Quando femo sforso de esser persone ùmile, la nostra fameia la ze pi felice. Anca ndemo giutar la congregassion a gaver union e no ndemo doperar le rede sossiai par farse veder. Pi importante ancora, riceveremo le benedission de Geovà e lo assaremo pròpio contento.