1. Sumala ha Filipos 2:3, kay ano nga an aton pagin mapainubsanon nagriresulta hin maopay nga relasyon ha iba?

MAPAINUBSANON nga nasunod kita kan Jehova kay nasasabtan naton nga maaram pirme hiya kon ano an pinakamaopay para ha aton. (Efe. 4:22-24) Kon mapainubsanon kita, gin-uuna naton an kaburut-on ni Jehova ngan ginhuhunahuna naton an iba nga labaw kay ha aton. An resulta, nagigin maopay an aton relasyon kan Jehova ngan ha kabugtoan.​—Basaha an Filipos 2:3.

2. Ano an iginpapakita ni apostol Pablo ha iya ginsiring, ngan ano an aton hihisgotan hini nga artikulo?

² Kinahanglan maghirot kita kay kon diri, mahimo kita maimpluwensyahan han mga tawo ha kalibotan ni Satanas nga mapahitas-on ngan makikalugaringon. * Baga hin ito an nahitabo ha pipira ha siyahan nga siglo C.E., kay hi apostol Pablo nagsurat ha mga taga-Roma: “Ginsusumatan ko an kada tagsa dida ha iyo nga diri maghunahuna mahitungod ha iya kalugaringon hin labaw kay ha angay niya hunahunaon, lugod ipakita niyo nga may-ada kamo maopay nga panhunahuna.” (Roma 12:3) Iginpapakita ni Pablo nga kinahanglan magkaada kita respeto ha kalugaringon, pero an pagkamapainubsanon mabulig ha aton nga magkaada balanse nga panhunahuna ha aton kalugaringon. Hihisgotan hini nga artikulo kon paonan-o an pagkamapainubsanon mabulig ha aton nga diri maghunahuna hin sobra ha aton kalugaringon ha tulo nga aspekto:  (1) ha pag-asawa, (2) ha mga pribilehiyo ha pag-alagad, ngan (3) ha paggamit han social media.

3. Kay ano nga posible mahitabo an diri pagkauyon han mag-asawa, ngan paonan-o ito ginsusulbad han iba?

³ Gindisenyo ni Jehova an pag-asawa basi maghatag hin kalipay ha mag-asawa. Pero tungod han pagin diri perpekto, posible nga diri hira magkauyon ha pipira nga butang. Ngani, nagsurat hi Pablo nga adton mga nag-aasawa magkakaada mga problema. (1 Cor. 7:28) An iba nga mag-asawa pirme nag-aaway, ngan bangin maghunahuna hira nga diri hira para ha usa kag usa. Kon naimpluwensyahan hira han kalibotan, huhunahunaon dayon nira nga an pagdiborsyo an solusyon. Para ha ira, an pinakaimportante amo an ira personal la nga kaopayan.

4. Ano an kinahanglan naton likyan?

⁴ Kinahanglan likyan naton nga magin diri kontento ha aton pag-asawa. Maaram kita nga an seksuwal nga imoralidad la an Kasuratanhon nga basihan han pagdiborsyo. (Mat. 5:32) Salit kon nagkakaada mga problema an aton pag-asawa, diri kita angay magpahitaas ngan maghunahuna: ‘Ini ba nga pag-asawa nakakaghatag han akon mga panginahanglan? Nakukuha ko ba an gugma nga angay ko makarawat? Magigin mas malipayon ba ako kon iba an akon asawa?’ Mapapansin naton nga ini nga mga pakiana nakapokus la ha pankalugaringon nga mga interes. An kinaadman han kalibotan nagtututdo nga sundon mo an imo kasingkasing ngan buhaton kon ano an nakakapalipay ha imo, bisan kon nangangahulogan ito hin pakigbulag. An kinaadman tikang ha Dios nasiring nga kinahanglan mo ‘panginanoon diri la an imo kalugaringon nga kaopayan kondi pati liwat an kaopayan han iba.’ (Fil. 2:4) Karuyag ni Jehova nga ipadayon niyo an iyo pag-asawa ngan diri ito tapuson. (Mat. 19:6) Karuyag niya nga mas hunahunaon mo hiya imbes nga an imo kalugaringon.

5. Sumala ha Efeso 5:33, ano an kinahanglan nga magin pagtratar han mag-asawa ha usa kag usa?

 ⁵ Kinahanglan trataron han mag-asawa an usa kag usa nga may gugma ngan respeto. (Basaha an Efeso 5:33.) An Biblia nagtututdo ha aton nga magpokus ha paghatag imbes nga ha pagkarawat. (Buh. 20:35) Ano nga kalidad an mabulig ha mag-asawa nga maipakita an gugma ngan respeto? An baton, pagkamapainubsanon. An mag-asawa nga mapainubsanon mangangalimbasog nga unahon, diri an ira kalugaringon nga kaopayan, kondi an kaopayan han ira asawa.​—1 Cor. 10:24.

6. Ano an imo nahibaroan ha ginsiring nira Steven ngan Stephanie?

⁶ An pagkamapainubsanon nakabulig ha damu nga Kristiano nga mag-asawa nga magin mas malipayon. Pananglitan, an inasaw-an nga hi Steven nagsiring: “Kon usa kamo nga team, magbibinuligay kamo, labi na kon may mga problema. Imbes nga maghunahuna, ‘Ano an makakaopay ha akon?’ huhunahunaon mo ‘Ano an makakaopay ha amon?’” Sugad liwat hito an inaabat han iya asawa nga hi Stephanie. Hiya nagsiring: “Waray naruruyag makig-upod ha usa nga pirme nakikigdiskusyon ha imo. Kon may-ada kami diri ginkakauyonan, nangangalimbasog kami nga mahibaroan an hinungdan. Katapos, nag-aampo kami, nagsasaliksik, ngan gin-iistoryahan ito. Nangangalimbasog kami nga sulbaron an problema, imbes nga mag-away.” Nagigin mas malipayon an mag-asawa kon diri nira ginhuhunahuna nga mas importante hira kay ha ira asawa.

7. Ano an angay buhaton han usa nga brother kon may nakakarawat hiya nga pribilehiyo ha pag-alagad?

⁷ Para ha aton, pribilehiyo an pag-alagad kan Jehova ha bisan ano nga paagi nga aton mahihimo. (Sal. 27:4; 84:10) Kon an usa nga brother andam magpagamit para ha espesyal nga pribilehiyo ha pag-alagad, maopay gud ito. Ngani, an Biblia nasiring: “Kon an usa nga lalaki nagtatalinguha pagkab-ot nga magin usa nga paramangno, maopay nga buhat an iya ginhihingyap.” (1 Tim. 3:1) Pero kon may nakakarawat hiya nga toka, diri hiya angay maghunahuna nga importante na hiya nga tawo. (Luc. 17:7-10) Kinahanglan an iya tumong amo an mapainubsanon nga pagserbi ha iba.​—2 Cor. 12:15.

8. Ano an aton nahibaroan ha ehemplo nira Diotrepes, Uzias, ngan Absalom?

⁸ An Biblia naghihisgot hin mga tawo nga naghunahuna hin sobra mahitungod ha ira kalugaringon. Hi Diotrepes diri mapainubsanon kay nangalimbasog hiya nga “manguna” ha kongregasyon. (3 Juan 9) Hi Uzias mapahitas-on kay nangalimbasog hiya nga himoon an usa nga buruhaton nga waray itoka ha iya ni Jehova. (2 Cron. 26:16-21) Hi Absalom karuyag magin hadi, salit nagpakunokuno hiya nga hinigugma niya an mga tawo basi makuha an ira suporta. (2 Sam. 15:2-6) Klaro nga iginpapakita hini nga mga ehemplo nga hi Jehova diri nalilipay ha mga tawo nga naghihingyap hin kalugaringon nga kadayawan. (Prob. 25:27) Ha urhi, an pagpahitaas ngan pag-ambisyon magriresulta la ha mga problema.​—Prob. 16:18.

9. Ano nga susbaranan an ginpakita ni Jesus?

⁹ Kabaliktaran gud hi Jesus hiton mapahitas-on nga mga tawo. An Biblia nasiring nga “bisan kon ineksister hiya pariho ha dagway han Dios, waray hiya maghunahuna nga man-agaw, karuyag sidngon, nga magin katupong hiya han Dios.” (Fil. 2:6) An awtoridad ni Jesus ikaduha kan Jehova, pero waray hiya maghunahuna hin labaw mahitungod ha iya kalugaringon. Hiya nagsiring ha iya mga disipulo: “Hiya nga nagawi sugad nga ubos ha iyo ngatanan amo an labaw.” (Luc. 9:48) Bendisyon gud nga mag-alagad kaupod han mga payunir, ministeryal nga mga surugoon, tigurang, ngan paramangno han sirkito nga mapainubsanon pariho kan Jesus! Kon mapainubsanon kita, mas maipapakita naton an gugma ha iba, nga amo an ginsiring ni Jesus nga  pangirilal-an han tinuod nga mga surugoon han Dios.​—Juan 13:35.

10. Ano an angay mo buhaton kon inaabat mo nga diri gin-aasikaso an mga problema ha kongregasyon?

¹⁰ Ano man kon may mga problema ha kongregasyon ngan inaabat mo nga baga hin diri ito gin-aasikaso han mga tigurang? Imbes nga magreklamo, maipapakita mo an pagkamapainubsanon pinaagi ha pagsuporta ha mga nangunguna. (Heb. 13:17) Basi mabuligan ka nga mabuhat ito, pakianhi an imo kalugaringon: ‘Seryoso gud ba an mga problema nga kinahanglan ito tadungon? Ini ba an husto nga panahon para tadungon ito? Ako ba an may responsabilidad ha pagtadong hito? Nangangalimbasog gud ba ako nga magkaurosa an kongregasyon, o nagpapaimportante ako?’

11. Sumala ha Efeso 4:2, 3, ano an mga resulta kon mapainubsanon nga nag-aalagad kita kan Jehova?

¹¹ Mas importante kan Jehova an aton pagin mapainubsanon kay han aton pagin maabilidad ngan mas importante ha iya an aton pagkaurosa kay han aton pagin epektibo. Salit himoa an imo pinakamaopay nga mag-alagad hin mapainubsanon kan Jehova. Ha pagbuhat hito, makakabulig ka nga mas magkaurosa an kongregasyon. (Basaha an Efeso 4:2, 3.) Magin maduruto ha ministeryo. Pamiling hin mga paagi ha pagserbi ha iba pinaagi ha pagbuhat hin maopay ha ira. Magin maabiabihon ha ngatanan, pati na hadton waray pribilehiyo ha kongregasyon. (Mat. 6:1-4; Luc. 14:12-14) Kon mapainubsanon nga nagbubuhat ka kaupod han kabugtoan, makikita nira diri la an imo abilidad kondi pati liwat an imo pagkamapainubsanon.

12. Gin-aaghat ba kita han Biblia nga magkaada kasangkayan? Isaysay.

¹² Karuyag ni Jehova nga mag-enjoy kita kaupod an aton kasangkayan ngan mga kapamilya.  (Sal. 133:1) Hi Jesus may maopay nga kasangkayan. (Juan 15:15) Iginsasaysay han Biblia an mga benepisyo han pagkaada tinuod nga kasangkayan. (Prob. 17:17; 18:24) Ngan nagsusumat ito ha aton nga diri maopay nga igbulag naton an aton kalugaringon. (Prob. 18:1) Damu an naghuhunahuna nga an social media usa nga paagi basi magkaada damu nga kasangkayan ngan malikyan an pag-abat hin pagin nag-uusahan. Pero kinahanglan kita maghirot kon nagamit kita han social media.

13. Kay ano nga an iba nga nagamit hin social media nasusubo ngan nadidepres?

¹³ Sumala ha mga pag-aram, an mga tawo nga nagasto hin daku nga panahon ha pagkinita hin mga post ha social media mahimo lugod masubo ngan madepres. Kay ano? Usa nga posible nga rason kay an mga tawo kaurogan na nga nagpu-post hin mga piktyur han importante nga panhitabo ha ira kinabuhi; ira la iginpu-post an mag-opay nga piktyur nira, han ira kasangkayan, ngan han mag-opay nga lugar nga ira ginkadtoan. Bangin hunahunaon han nagkikinita hito nga mga piktyur nga an iya kinabuhi ordinaryo la, o boring pa ngani kon ikompara ha ira. “Nagtikang ako maawa han nakita ko nga an iba nag-enjoy ha ira weekend, ngan ako adto la ha balay,” siring han 19 anyos nga sister.

14. Paonan-o makakabulig ha aton an sagdon ha 1 Pedro 3:8 may kalabotan ha paggamit han social media?

¹⁴ Syempre, an social media mahimo magamit ha maopay nga katuyoan​—pananglitan, basi makigkomunikar ha kapamilya ngan kasangkayan. Pero naobserbaran mo ba nga an iba nagpu-post ha social media basi magpaimpres ha mga tawo? “Kitaa ako”; baga hin ini an mensahe nga karuyag nira ipasabot. An iba nagku-comment pa ngani hin negatibo ngan malaw-ay ha ira kalugaringon nga mga piktyur o ha mga piktyur nga igin-post han iba. Ini liwat diri nagpapakita hin pagkamapainubsanon ngan simpatiya nga igin-aaghat ha mga Kristiano nga kultibaron.​—Basaha an 1 Pedro 3:8.

15. Paonan-o makakabulig ha aton an Biblia basi malikyan naton nga ipahitaas an aton kalugaringon?

¹⁵ Kon nagamit ka hin social media, pakianhi an imo kalugaringon: ‘An mga comment, piktyur, o video ba nga akon iginpu-post naghahatag hin impresyon ha iba nga naghahambog ako? Mahimo ba ito magin hinungdan nga maawa an iba?’ An Biblia nasiring: “An ngatanan nga aada ha kalibotan​—an hingyap han unod ngan an hingyap  han mga mata ngan an pagparayaw ha mga gintatag-iya han usa—​diri tikang ha Amay, kondi tikang ha kalibotan.” (1 Juan 2:16) An mga pulong nga “an pagparayaw ha mga gintatag-iya han usa” iginhubad han usa nga bersyon han Biblia sugad nga “karuyag magin importante pagkit-on.” Diri karuyag han mga Kristiano nga ipahitaas an ira kalugaringon. Ginsusunod nira an sagdon han Biblia: “Diri kita magpaimportante ha kalugaringon, nag-aaghat hin pakigkompetensya ha usa kag usa, naaawa ha usa kag usa.” (Gal. 5:26) Kon mapainubsanon kita, diri kita magigin pariho ha mga tawo ha kalibotan nga mapahitas-on ngan karuyag nga hunahunaon hira han iba nga importante gud hira.

16. Kay ano nga diri kita angay magpahitaas?

¹⁶ Kinahanglan naton kultibaron an pagkamapainubsanon kay an mga tawo nga mapahitas-on waray “maopay nga panhunahuna.” (Roma 12:3) An mga mapahitas-on mahilig makigdiskusyon ngan magpaimportante ha kalugaringon. An ira panhunahuna ngan buhat kaurogan nga nakakasakit ha ira kalugaringon ngan ha iba. Kon diri nira babag-uhon an ira paagi han paghunahuna, bubutahon ngan dadauton ni Satanas an ira hunahuna. (2 Cor. 4:4; 11:3) Ha luyo nga bahin, an mapainubsanon nga tawo may maopay nga panhunahuna. May balanse hiya nga pagkita ha iya kalugaringon; iya ginkukonsiderar an iba nga labaw ha iya ha damu nga paagi. (Fil. 2:3) Ngan maaram hiya nga “an Dios nakontra ha mga mapahitas-on, pero nahatag hiya hin diri matupngan nga pagkabuotan ha mga mapainubsanon.” (1 Ped. 5:5) Diri karuyag hadton may maopay nga panhunahuna nga magin kaaway nira hi Jehova.

17. Ano an kinahanglan naton buhaton basi magin mapainubsanon pirme?

¹⁷ Basi magin mapainubsanon pirme, kinahanglan iaplikar naton an sagdon han Biblia nga ‘hukason an daan nga personalidad pati an mga buhat hito, ngan igsul-ot an bag-o nga personalidad.’ Nagkikinahanglan ito hin pangalimbasog. Kinahanglan naton pag-adman an susbaranan ni Jesus ngan subaron hiya hin maopay tubtob nga posible. (Col. 3:9, 10; 1 Ped. 2:21) Pero bawi gud an pangalimbasog. Kon kukultibaron naton an pagkamapainubsanon, magigin mas malipayon an aton pamilya, makakabulig kita nga mas magkaurosa an kongregasyon, ngan diri naton gagamiton an social media basi magpaimpres ha iba. Labaw ha ngatanan, bibendisyonan ngan uuyonan kita ni Jehova.