1. As Philippians 2:3 talk, when we dey humble, how this one de make us be good friends with other people?

WE DE carry body down to obey Jehovah because we know say Jehovah know the best thing for us. (Eph. 4:22-24) When we dey humble, we know say wetin Jehovah want dey important pass wetin we want and say other people better pass us. And because of this one, we be good friends of Jehovah and our brothers and sisters.​—Read Philippians 2:3.

2. Wetin apostle Paul gree say e good to do, and wetin we go talk about for this topic?

² But people for this world wey Satan de control dey proud and de think only about theirself. * If we no dey careful, we fit start to follow their example. E be like say people for the time of the apostles face this danger, because apostle Paul write to Christians for Rome say: “I de tell everybody for there say make e no think of e self pass as e suppose think, but make e think so that e go reason well.” (Rom. 12:3) For this letter, Paul gree say e good to think about ourself. But when we dey humble, we no go think too much about ourself. This topic go talk about three areas wey to dey humble go help us make we no dey proud. This areas na (1) our marriage, (2) when they give us work for the service of Jehovah, and (3) when we de use Internet.

3. Why problems fit dey for marriage, and how some people de try to solve the problems?

³ Jehovah want make husband and wife dey happy as them de live together. But because they get sin for body, no be everytime they go de agree. Apostle Paul even write say some problems go dey for marriage. (1 Cor. 7:28) Some husband and wife de always argue and quarrel, and this one de make them think say they make mistake to marry theirself. And if them de think like people for this world, they go feel say na divorce go solve the problem. They go only de think about theirself and de think say they go dey happy if they divorce.

4. Wetin we no suppose de think about?

⁴ Make we no de think say our marriage don fail. Bible talk say the only reason why husband and wife fit divorce na when any of them put hand for sex wey God no like. (Matt. 5:32) So when we face problems for our marriage, make we no dey proud and start to ask say: ‘This marriage de give me wetin I need? I de get the love wey I suppose get? I for dey happy if to say I marry another person?’ You go notice say this questions talk only about me. This world de teach say make you follow your heart and do anything wey you fit do to make you happy, even if na to end your marriage. But Bible de teach say “no just de look for wetin go benefit only wuna self, but wetin go benefit other people.” (Phil. 2:4) Jehovah want make you stay for your marriage, e no want make you divorce. (Matt. 19:6) De think about Jehovah first, no be yourself. Na wetin Jehovah want.

5. As Ephesians 5:33 talk, how husband and wife suppose treat each other?

⁵ Make husband and wife love and respect theirself. (Read Ephesians 5:33.)  Bible talk say make we try de give, instead of only de take. (Acts 20:35) Wetin go help husband and wife to love and respect theirself? Na when them dey humble. If husband and wife dey humble, they no go de think only about wetin they go gain, instead they go think about “wetin go favor another person.”​—1 Cor. 10:24.

6. Wetin you learn from the thing wey Steven and Stephanie talk?

⁶ Plenty Christian husband and wife don dey happy for their marriage because them dey humble. For example, one husband wey e name na Steven talk say: “When husband and wife de cooperate, they go work together as one, especially when them de face problems. Instead make you de think say ‘wetin go good pass for me?’ you go think say ‘wetin go good pass for us?’” E wife wey e name na Stephanie talk the same thing, e talk say: “Nobody want live with person wey they go always de argue.” E still talk say: “When problem come, we de try to know wetin cause the problem. Then we go pray, do research, and talk how we go solve the problem. We go try solve the problem no be to quarrel with each other.” When husband and wife no de think about theirself pass as they suppose think, they go really gain.

7. Wetin brother go do if they give the brother more work for the organization?

⁷ Na big honor for us to serve Jehovah for any way wey we fit. (Ps. 27:4; 84:10) If brother dey ready to do more for the service of Jehovah, that one na good thing. Even Bible talk say: “If any man de try e best to be overseer, na fine work e want do.” (1 Tim. 3:1) But when they give the brother more work for the organization, make e no think say, now e better pass other people. (Luke 17:7-10) Make e de think of how e go carry body down and work for other people.​—2 Cor. 12:15.

8. Wetin we learn from the example of Diotrephes, Uzziah, and Absalom?

⁸ Bible get some example of people to warn us. This people be de think too much about theirself. Diotrephes na one example. E try “to be number one” for congregation. (3 John 9) Because Uzziah dey proud, e try to do work wey Jehovah no talk say make e do. (2 Chron. 26:16-21) Absalom want be king, so e pretend say e love the people so that the people go support make e be king. (2 Sam. 15:2-6) As this examples show, Jehovah no dey happy with people when they want make other people praise them. (Prov. 25:27) When people dey proud and want make other people praise them, after some time, they go enter trouble.​—Prov. 16:18.

9. Which example Jesus show?

⁹ Jesus no dey like this proud people. Bible talk say “even though say e be like God, e no reason to claim power by force so that e go dey equal to God.” (Phil. 2:6) Even as na only Jehovah get power pass Jesus, Jesus no de think about e self pass how e suppose think. E tell e disciples say: “Na the humble person among all of wuna big pass.” (Luke 9:48) Na blessing for us to serve with pioneers, ministerial servants, elders, and circuit overseers because them dey humble just like Jesus! If we dey humble, we go show love for other people. And na this love de show who the true servants of God be.​—John 13:35.

10. Wetin you go do if you feel say the elders no de handle the problems well for congregation?

¹⁰ Wetin you go do if e be like say problem  dey for congregation and you feel say the elders no de handle the problem well? Instead make you de complain, dey humble and support the decision of the elders. (Heb. 13:17) This questions go help you do this one: ‘The problems wey I de see really dey serious wey they need to do something about them? Na the correct time to solve the problems? Na my work to solve the problems? To talk true, I de really try to make congregation dey as one, or I de try to make people see say I dey important?’

11. As Ephesians 4:2, 3 talk, wetin go happen if we dey humble as we de serve Jehovah?

¹¹ To dey humble and to dey as one, dey important to Jehovah pass when we know how to do something. So, try your best to dey humble as you de serve Jehovah. If you do this one, you go make the congregation dey as one. (Read Ephesians 4:2, 3.) Try your best to preach more as you fit. Think of the good things wey you fit do to help other people. De welcome and de do good to everybody for congregation even if they no get position for congregation. (Matt. 6:1-4; Luke 14:12-14) When you dey humble as you de work with the congregation, other people go see say you know your work and say you dey humble.

12. Bible de encourage us make we get friends? Explain.

¹² Jehovah want make we de enjoy as we de spend time with our family people and friends. (Ps. 133:1) Jesus be get good friends. (John 15:15) Bible tell us how we de gain when we get good friends.  (Prov. 17:17; 18:24) And e tell us say e no good make we de separate ourself from other people. (Prov. 18:1) Plenty people de think say Internet de help them get plenty friends so that they no go dey alone. But we need to dey careful when we de use Internet.

13. Why some people de feel sad and say them dey alone when them use Internet?

¹³ Research don show say when people de spend plenty time de look pictures, videos, and message wey people put for Internet, e de make them feel say them dey alone and de make them feel sad. Why e de happen like this? One reason na say, people de put pictures to show the important things wey happen for their life. They go put the best pictures of theirself, their friends and the fine-fine place wey them don go. When person see this kind pictures, e go feel say e own life no reach anything. One Christian sister wey dey 19 years talk say: “I start to jealous people when I see their pictures say them de enjoy for weekend and I just dey for house de do nothing.”

14. How the advice wey Bible give for 1 Peter 3:8 fit help us make we use Internet well?

¹⁴ Na true say you fit use Internet for good thing. For example, we fit use-am talk with our family and friends. But you don notice say some things wey people de put for Internet na to make people see say them dey important? E just be like say them de always want make people see them. Some people de even write bad things about the pictures wey them or other people put for Internet. But Bible talk say make Christians dey humble and de feel for other people, so they no go use Internet for this kind way.​—Read 1 Peter 3:8.

15. How Bible fit help us make we no de show say we dey important?

¹⁵ If you de use Internet ask yourself say: ‘The things wey I de write for Internet or the pictures and videos wey I de put for Internet de make people feel say I dey proud? I fit make other people jealous?’ Bible talk say: “Everything for this world​—wetin body want, the things wey eye like, and to de show the things wey we  get​—no be from the Father, but na from this world.” (1 John 2:16) One Bible translation write this part of the verse “to de show the things wey we get” as “to de try to show say we dey important.” Christians no need to feel say them dey important or say make other people praise them. Them de follow this Bible advice say: “Make we no de think only about ourself, de cause competition with one another, de jealous one another.” (Gal. 5:26) If we dey humble, we no go dey proud like people for this world and want make people think say we dey very important.

16. Why e no good make we dey proud?

¹⁶ Make we try to dey humble because proud people no de “reason well.” (Rom. 12:3) Proud people de cause quarrel and de only think about theirself. The way them de think and do things sometimes de cause trouble to theirself or to other people. If they no dey careful, Satan go spoil the way them de think. (2 Cor. 4:4; 11:3) But humble person de reason well. E no de think about e self pass as e suppose think, e know say other people know some things pass as e know. (Phil. 2:3) And e know say “God dey against proud people but e de show favor to people wey them de put body down.” (1 Pet. 5:5) When person de reason well, e no go want make Jehovah be e enemy.

17. Wetin we go do if we want continue to dey humble?

¹⁷ If we want continue to dey humble, we need to do this thing wey Bible talk. E say: “Remove the old character with all the things wey wuna be de do, and make wuna wear the new character like cloth.” To do this one no easy. So make we study about the example of Jesus and try our best to follow e example. (Col. 3:9, 10; 1 Pet. 2:21) But if we do like this, we go gain. When we try to dey humble, our family go dey happy, we go make congregation dey as one, and we no go use Internet for bad way. And the important thing na say Jehovah go bless us and show us favor.