1. ¿Xi conseju ridxélanu lu Filipenses 2:3, ne xi zabeendunu pa gúninu ni nani?

LAANU, ca xpinni Jehová, nácanu humilde ne rúninu ni ná ca ley stibe, purtiʼ riénenu nánnabe xii nga ni jma galán para laanu (Efes. 4:22-24). Ne humildad ca racané laanu gúninu ni nabe primeru ne cadi ni rábinu ne guiníʼ íquenu jma risaca xcaadxi que laanu. Ni zabeendunu nga ziuʼnu jma gaxha de Jehová ne de ca hermanu stinu (biindaʼ Filipenses 2:3).

2. a) ¿Xi biene apóstol Pablo? b) ¿Xi zazíʼdinu lu artículo riʼ?

² Peru pa qué gápanu cuidadu, zanda gácanu orgulloso ne guyúbinu puru para laasinu casi ca binni nabeza ndaaniʼ guidxilayú stiʼ Binidxabaʼ riʼ. * Zándaca ngaca nga ni bizaaca ca xpinni Cristu de primé siglu, nga runi bidii apóstol Pablo conseju riʼ laacabe: «Cayabeʼ cada tobi de laatu cadi guiníʼ ique jma risaca que biaʼ naca, sínuque gusihuinni riníʼ ique jneza» (Rom. 12:3). Pur ni guníʼ apóstol Pablo, biénebe risaca guiráʼ binni. Peru pa humilde laanu qué zaníʼ íquenu jma risácanu que xcaadxi. Lu artículo riʼ zazíʼdinu pa gácanu humilde zacané ni laanu cadi guiníʼ íquenu jma risácanu 1) lu xquendaxheelanu, 2) ora guicaanu xiixa responsabilidad ndaaniʼ xquidxi Dios ne 3) ora iquiiñenu ca red social.

3. a) ¿Xiñee normal nga gapa ca guendaxheelaʼ ca guendanagana? b) ¿Xi riníʼ ique caadxi guendaxheelaʼ ora ridíʼdicaʼ lu guendanagana?

³ Racalaʼdxiʼ Jehová guibani ca guendaxheelaʼ ca nayecheʼ. Peru cumu binni ruchee guiranu la? normal nga gapa  ca guendaxheelaʼ ca guendanagana. Ne Pablo peʼ guníʼ zapa ca ni guichaganáʼ caadxi guendanagana (1 Cor. 7:28). Nuu xpinni Cristu nabé rapa guendanagana lu xquendaxheelaʼ, ne pur nga zándaca guiníʼ íquecaʼ mejor peʼ qué nichaganacaʼ. Pa maʼ gucuá modo riníʼ ique binni guidxilayú laacabe la? cada tobi zaníʼ ique jma de laa ne dede zaníʼ ique mejor gaca divorciar.

4. ¿Xi cadi naquiiñeʼ guiníʼ ique ca ni maʼ bichaganáʼ?

⁴ Cadi naquiiñeʼ guiníʼ ique ca ni maʼ bichaganáʼ maʼ qué zanda gaca chaahuiʼ guendaxheelaʼ sticaʼ. Nánnanu razón si ruzeeteʼ Biblia para gaca divorciar binni nga ora tobi de laacaʼ runi cometer ti pecadu sexual (Mat. 5:32). Nga runi, ora guidxaagalú ca guendaxheelaʼ ca guendanagana ni bizeeteʼ Pablo, cadi naquiiñeʼ gudiicaʼ lugar gucaa orgullo ca laacaʼ guiníʼ íquecaʼ ca pregunta riʼ: «¿Ñee napaʼ guiráʼ ni bixuiʼluaʼ lu guendaxheelaʼ stinneʼ la? ¿Ñee ricaaʼ guendarannaxhii ni runeʼ merecer la? ¿Ñee nibaneʼ jma nayecheʼ pa nichaganaʼyaʼ sti binni la?». ¡Rihuinni dxíchica binni ni riníʼ ique zacá ruyubi puru si para laa! Pa chinanda ca ni maʼ bichaganáʼ modo riníʼ ique binni guidxilayú la? zándaca gucaa ni laacaʼ gúnicaʼ ni ná ladxidoʼcaʼ ne guiníʼ íquecaʼ pa gaca divorciarcaʼ zabánicaʼ nayecheʼ. Peru ca binni ni riníʼ ique casi riníʼ ique Dios qué ruyúbicaʼ puru si ni caquiiñecaʼ, sínuque laaca rizaaláʼdxicaʼ ni caquiiñeʼ xcaadxi (Filip. 2:4). Ni racalaʼdxiʼ Jehová nga guni chaahuiʼ ca guendaxheelaʼ ca guendanagana sticaʼ ne cadi guilaacaʼ (Mat. 19:6). Ribézabe guiníʼ íquenu ni racaláʼdxibe, ne cadi ni racaláʼdxinu.

5. Casi ná Efesios 5:33, ¿xi naquiiñeʼ guni ca ni maʼ bichaganáʼ?

⁵ Caquiiñeʼ gannaxhii binni xheelaʼ ne guni tratar laabe né respetu (biindaʼ  Efesios 5:33). Rusiidiʼ Biblia laanu jma nga guyúbinu gudiʼnu que cuézanu gudiicabe laanu (Hech. 20:35). Para chuʼ guendarannaxhii ne respetu lu ti guendaxheelaʼ la? caquiiñeʼ gaca guirópacabe humilde. Ndiʼ zacané laacabe cadi guyúbicabe puru si para laacabe, sínuque guyúbicabe gacanesaacabe (1 Cor. 10:24).

6. ¿Xi rizíʼdinu de ni guníʼ Steven ne Stephanie?

⁶ Stale guendaxheelaʼ nabánicaʼ nayecheʼ purtiʼ nácacaʼ humilde. Sicaríʼ guníʼ ti hermanu láʼ Steven: «Pa riníʼ ique ca guendaxheelaʼ ca nácacaʼ casi ti equipu la? zacanesaacaʼ, jmaruʼ si ora gápacaʼ guendanagana. Ne lugar de guiníʼ íquecaʼ “¿xii nga ni jma galán para naa?”, zaníʼ íquecaʼ, “¿xii nga ni jma galán para laadu?”». Ne laaca zacaca riníʼ ique Stephanie, xheelabe. Sicaríʼ guniʼbe: «Guirutiʼ qué riuulaʼdxiʼ gapa ti enemigu ra lidxi. Ora rápadu ti guendanagana la? rúnidu stipa gánnadu xiñee nápadu ni. De racá runi orardu, ruyúbidu información ne rinidu de laani. Guirópadu rudxíʼludu guendanagana ca, lugar de tindesaadu». Zabani ti guendaxheelaʼ nayecheʼ pa nin tobi de laacaʼ qué riníʼ ique jma risaca que xheelaʼ.

7. ¿Xi naquiiñeʼ guni ti hermanu ni maʼ gucuaa ti responsabilidad?

⁷ Para laanu la? ti privilegiu nga gúninu ni ná Jehová de guidubi ladxidoʼno (Sal. 27:4; 84:10). Galán ora riguixhe ique ti hermanu guni jma ndaaniʼ xquidxi Jehová. Ne Biblia peʼ ná: «Pa cayuni ti hermanu stipa para gaca superintendente, jneza ni cá ique guni» (1 Tim. 3:1). Peru pa maʼ gucuaabe ti responsabilidad la? cadi naquiiñeʼ gudxiibabe laca laabe (Luc. 17:7-10). Ni jma naquiiñeʼ guicá íquebe nga gacanebe xcaadxi ne gácabe humilde ora gúnibe ni (2 Cor. 12:15).

8. ¿Xi rizíʼdinu de ni biʼniʼ Diótrefes, Uzías ne Absalón?

⁸ Biblia ruzeeteʼ de binni ni guníʼ ique jma risaca que xcaadxi. Guzéʼtenu caadxi de laacabe. Guca nagana para Diótrefes gudii cuenta nuu cosa ni qué zanda guni ne «riuulaʼdxiʼ gaca xaíque lade ca hermanu» (3 Juan 9). Bisihuinni Uzías naca orgulloso ora gucalaʼdxiʼ ñuni ti dxiiñaʼ ni qué ñuni mandar Jehová laa guni (2 Crón. 26:16-21). Cumu guizáʼ nexhená Absalón la? guyuu ñuni ganar cariñu stiʼ guidxi que purtiʼ nuu gaca rey (2 Sam. 15:2-6). Casi rihuinni lu ca relatu riʼ, qué riuulaʼdxiʼ Jehová ora ruyubi binni gusisácacabe laacaʼ (Prov. 25:27). Ca binni orgulloso ne ca ni rachelú gapa jma la? qué ribeenducaʼ ni galán (Prov. 16:18).

9. ¿Xi ejemplu galán bisaana Jesús?

⁹ Maʼ gadxé si guca Jesús, purtiʼ laa bisaana ti ejemplu nabé galán. Biblia ná «neca de espíritu laabe casi Dios, qué niníʼ íquebe ñuube lugar stiʼ, ne ñácabe biaʼca laa» (Filip. 2:6). Laabe nga binni ni jma napa poder despué de Jehová. Peru neca zacá, qué riníʼ íquebe jma risácabe que biaʼ nácabe. Sicaríʼ gúdxibe ca discípulo stibe: «Ni gaca casi tobi de ca ni jma nahuiiniʼ ládetu la? nga nga ni jma risaca» (Luc. 9:48). Nabé galán nga gúninu dxiiñaʼ né ca precursor, ca siervu ministerial, ancianu ne ca superintendente de circuito purtiʼ laaca humilde laacaʼ casi Jesús. Ora humilde laanu la? rusihuínninu dxandíʼ xpinni Cristu laanu purtiʼ nadxiisaanu (Juan 13:35).

10. ¿Xi caquiiñeʼ gúninu pa ruluíʼ cadi jneza modo cayaca tender ca guendanagana nuu ndaaniʼ congregación?

¹⁰ ¿Xi caquiiñeʼ gúninu pa ruluíʼ nuu  guendanagana ndaaniʼ congregación ne riníʼ íquenu cadi jneza modo cayuni tendércabe ni? Lugar de gaca quejarnu, gácanu humilde ne gacanenu ca ni runi dirigir laanu (Heb. 13:17). ¿Xi zacané laanu gúninu ni yaʼ? Guiníʼ íquenu ndiʼ: «¿Ñee naroʼbaʼ peʼ guendanagana ni cayuuyaʼ la? Pa caquiiñeʼ gaca chaahuiʼ ni, ¿ñee yanna nga caquiiñeʼ gaca ni la? ¿Ñee naa nga caquiiñeʼ guneʼ chaahueʼ ni la? Peru ¿ñee dxandíʼ racalaʼdxeʼ chuʼ congregación tobi si la? o gusisaca xcaadxi naa?».

11. Casi ná Efesios 4:2, 3, ¿xi zazaaca pa humilde laanu ora gúninu ni ná Jehová?

¹¹ Para Jehová la? jma risaca nga gácanu humilde que gápanu stale habilidad ne jma risaca chuʼnu tobi si que gúninu jma lu xhiiñabe. Nga runi, gúninu stipa para gácanu humilde ora gúninu ni ná Jehová. Zacá zúninu stipa chuʼ congregación tobi si (biindaʼ Efesios 4:2, 3). Cadi gusaana de guni predicarnu. Gacanenu xcaadxi ora gúninu cosa galán pur laacaʼ. Gácanu hospitalariu né guiráʼ hermanu, ne cadi ca ni napa si ti responsabilidad risaca (Mat. 6:1-4; Luc. 14:12-14). Pa gúninu guiráʼ ni bizéʼtenu riʼ, qué zuuyasícabe ca habilidad nápanu, sínuque laaca zuuyacabe humilde laanu.

12. ¿Xi ruzeeteʼ Biblia ora caníʼ gapa binni xhamigu?

¹² Riuulaʼdxiʼ Jehová chúʼnenu familia ne ca xhamígunu ti ratu nayecheʼ (Sal. 133:1). Jesús peʼ gupa xhamigu (Juan 15:15). Laaca ruzeeteʼ Biblia ribeendú binni ni galán pa gapa ti buen amigu (Prov. 17:17; 18:24). Ne laaca rabi ni laanu cadi guixélenu de ca  hermanu stinu (Prov. 18:1). Stale binni riníʼ ique riquiiñeʼ ca red social ca para gapa stale amigu ne para cadi guni sentir stubi. Peru, pa riquiiñenu ni la? caquiiñeʼ gápanu stale cuidadu.

13. ¿Xiñee nuu de ca binni ni riquiiñeʼ ca red social ca zanda guni sentircaʼ stúbicaʼ ne gaca deprimircaʼ?

¹³ Según ca estudiu ni huayaca, ca binni ni ruuyaʼ ca comentariu ne ca foto ni rudxiibaʼ xcaadxi lu ca red social la? zándaca guni sentircaʼ stúbicaʼ ne dede gaca deprimircaʼ. ¿Xiñee yaʼ? Zándaca purtiʼ jma stale binni rudxiibaʼ ca foto ni jma riuuláʼdxicaʼ: ca foto ra rihuínnicaʼ jma galán, ra rihuinni ca xhamígucaʼ ne ca lugar ra yezacaʼ. Ca binni ni guʼyaʼ ca foto ni rudxiibacabe, zándaca guchaagacaʼ modo nabánicaʼ né modo nabánicabe ne guni sentircaʼ qué risaca xquendanabánicaʼ ne triste modo nuucaʼ. Sicaríʼ guníʼ ti hermana ni napa 19 iza: «Riuaaʼ triste ora ruuyaʼ modo raca divertir xcaadxi ca fin de semana, mientra que naa nuaaʼ ra lidxeʼ cayacaʼ aburrir».

14. ¿Ximodo racané 1 Pedro 3:8 laanu iquiiñenu ca red social ca jneza?

¹⁴ Zanda iquiiñenu ca red social ca jneza, casi ora iquiiñenu ni para guinínenu ca familia stinu ne ca xhamígunu. Peru ¿ñee huadiʼnu cuenta stale binni rudxiibaʼ stale cosa lu ca red social ca ne rúnicaʼ ni para guidxagayaa binni laacaʼ la? Ne zándaca rúnicaʼ ni para guʼyaʼ xcaadxi binni laacaʼ. Dede nuu tu laa riquiiñeʼ diidxaʼ guidxa ora rudxiibaʼ foto stiʼ ne ora runi comentar lu foto stiʼ xcaadxi. Peru cadi nga diʼ nga ni cabeza Jehová de ca xpinni, ni racaláʼdxibe nga gácanu humilde ne guni sentirnu ni runi sentir stobi (biindaʼ 1 Pedro 3:8).

15. ¿Ximodo racané Biblia laanu para cadi guyúbinu guisácanu jma que xcaadxi?

¹⁵ Pa riquiiñenu ca red social guiníʼ íquenu ca pregunta riʼ: «¿Ximodo ca foto, ca videu ne ca comentariu ni rudxiibaʼ? ¿Ñee rucaani xcaadxi guiníʼ ique cayuneʼ presumir la? ¿Ñee rucaani xcaadxi gapa envidia naa la?». Biblia ná: «Guiráʼ ni nuu ndaaniʼ guidxilayú —deseu de guni binni guiráʼ ni riuulaʼdxiʼ, deseu de guni binni guiráʼ  ni guʼyaʼ ne guni presumir binni guiráʼ ni napa — cadi zeeda ni de Bixhózenu, sínuque zeeda ni de guidxilayú» (1 Juan 2:16). Ti libru ni rusiene de Biblia ná, ca diidxaʼ «guni presumir binni guiráʼ ni napa» caniʼni de tuuxa ni «ruyubi guisaca jma de biaʼ naca». Nga runi, laanu ca xpinni Cristu, cadi naquiiñeʼ gusisaca xcaadxi binni laanu. Ne naquiiñeʼ chinándanu conseju riʼ: «Cadi gácanu orgulloso, cadi maʼ cayuni competirnu entre laanu ne cadi chuʼ envidia ládenu» (Gál. 5:26). Pa humilde laanu la? qué zuyúbinu guisácanu jma que xcaadxi cásica runi binni guidxilayú ni.

16. ¿Xiñee qué racaláʼdxinu gácanu orgulloso?

¹⁶ Caquiiñeʼ gácanu humilde, purtiʼ ca binni orgulloso rusihuínnicaʼ cadi jneza modo riníʼ íquecaʼ (Rom. 12:3). Nabé ruyúbicaʼ tíndecaʼ ne rudxiibacaʼ laca laacaʼ. Ne modo riníʼ íquecabe ne ni rúnicabe stale biaje runiná ni laacabe ne laaca runiná ni xcaadxi. Pa qué guchaacabe modo riníʼ íquecabe la? zusicahui ne zaguite Binidxabaʼ xquendabiaanicabe (2 Cor. 4:4; 11:3). Peru ca binni humilde la? jneza modo riníʼ íquecaʼ. Qué ruuyacaʼ laacaʼ casi tuuxa ni jma risaca, ne riénecaʼ nuu tu laa jma risaca que laacaʼ (Filip. 2:3). Ne laaca nánnacaʼ «rudxiideche Dios ca binni orgulloso, peru rácabe nachaʼhuiʼ né ca binni humilde» (1 Ped. 5:5). Nga runi, ca binni ni riníʼ ique jneza, qué racaláʼdxicaʼ gudxiideche Dios laacaʼ.

17. ¿Xi caquiiñeʼ gúninu para cadi gusaana de gácanu humilde?

¹⁷ Para cadi gusaana de gácanu humilde la? caquiiñeʼ gúninu ni ná conseju riʼ: «Lagusaana modo gúcatu dxiqué ne ca cosa ni bíʼnitu ne laguibani modo cusiidiʼ Dios laatu». Ne para ganda gúninu ni ná conseju riʼ la? caquiiñeʼ gúninu stale stipa para guizíʼdinu jma de Jesús ne chinándanu ejemplu stiʼ biaʼ ra gándatiʼ (Col. 3:9, 10; 1 Ped. 2:21). Peru nabé risaca gúninu stipa ca. Nga runi, pa gácanu humilde, zabaninenu familia stinu jma nayecheʼ, ziuu congregación tobi si ne zaquiiñenu ca red social ca jma jneza. Ne ni jma risaca nga ziuulaʼdxiʼ Jehová ni gúninu ne zaguube ndaayaʼ laanu.