1. Бис «чындык» деген сӧслӧ нени айдадыс?

СЕН чындыкты канайып уккаҥ? Чындыкта јаштаҥ ала ба? Чындыкка келгениҥ канча јыл болды? Слер мындый сурактарды кӧп уккан болороор эмезе слер бойоор до улуска мындый сурактар берген болороор. Је «чындык» деп, бис нени айдадыс? «Чындык» деп сӧсти Кудайга бӱдерис, ого иштеп турганыс ла јӱрӱп турган јӱрӱмис керегинде айдарга турзаас тузаланадыс. Чындыкта јӱрген кижи Агару Бичик неге ӱредип турганын билер ле оныҥ принциптерин тузаланып јат. Андый кижи кудай јаҥдардыҥ тӧгӱнине кирбей јат ла кинчектӱ улустыҥ ортозында эҥ јакшы јӱрӱм јӱрет (Иоанн 8:32).

2. Иоанн 13:34, 35-ле болзо, кижиге чындыктыҥ нези јараар болор?

² Слерге чындыктыҥ нези јараган? Иегованыҥ Керечилериниҥ јакшы керектери јараган болор (1 Петр 2:12). Эмезе олордыҥ сӱӱжи јараган болор. Андый сӱӱшти Каандыктыҥ Туразына баштапкы катап келген улустыҥ кӧбизи кӧргӧн. Олорды сценадаҥ айдылган сӧстӧр эмес, је шак ла бу сӱӱш тыҥ кайкаткан. Бис бого кайкабай јадыс, нениҥ учун дезе Иисустыҥ айтканыла оныҥ ӱренчиктери бой-бойын сӱӱп турганыла танылат. (Иоанн 13:31, 35 кычырыгар.) Је бӱдӱмјибис бек болзын деп турган болзоос, јӱк ле сезимдерле јӱрбес керек.

3. Иегованыҥ ишчилериниҥ јӱк ле сӱӱжин кӧрӱп, Кудайга бӱдӱп турзагар не болордоҥ айабас?

³ Слерге Кудайдыҥ ишчилериниҥ ортозындагы сӱӱш јарап турган болор. Је бӱдӱмји јӱк бого тӧзӧлӧнбӧс учурлу. Нениҥ учун андый деп сананып ийектер. Темдектезе, кандый бир ака (аксагал эмезе пионер) уур кинчек эдип ийген  болзын. Эмезе слерди јуунда кем-кем ачындырып ийген ол эмезе Кудайдаҥ јана базып, Иегованыҥ Керечилеринде чындык јок деп айдып баштаган болзын. Слер бого бӱдӱрилип, Иеговага иштебей барараар ба? Бу сурактар слерге бӱдӱмјигер бек пе деп, билип аларга болужат. Слер Кудайга јӱк ле Иегованыҥ ишчилериниҥ ортозындагы сӱӱшти кӧрӱп, бӱдӱп турган болзогор, је слерде Иеговала јуук колбулар болбозо, бӱдӱмјигер бек эмес болор. Иеговага ла оныҥ ишчилерине слердиҥ сезимдереер бӱдӱмјигерди тыҥыдарга бир эмеш те болзо болужар эмей. Је бӱдӱмјигер чыннаҥ ла бек болзын деп турган болзогор, Агару Бичикти тереҥжиде шиҥдеер керек ле оныҥ ӱредӱлерин јакшы оҥдоор керек. Анайып Агару Бичик Иегова керегинде чындыкка ӱредет деп бӱдӱмјиленип аларыгар (Рим. 12:2).

4. Матфей 13:3—6, 20, 21-ле болзо, ченелтелердеҥ улам кижиниҥ бӱдӱмјизиле не болордоҥ айабас?

⁴ Кезик улус чындыкты сӱӱнип алынар, је кӱчтерге туштаза, олордыҥ бӱдери уйадай берер деп, Иисус айткан. (Матфей 13:3—6, 20, 21 кычырыгар.) Андый улус Иисустыҥ ӱренчиктери болуп калза, олордо кӱчтер ле ченелтелер болор деп оҥдобогон болор (Матф. 16:24). Эмезе олор христиандар болуп калза, олордо качан да кӱчтер болбос ол эмезе Кудай олордыҥ бастыра кӱчтерин јоголтып салар деп сананган болор. Је бу телекейде кӱчтер јаантайын болор. Оныҥ учун бистиҥ айалгалар солынардаҥ айабас, мынаҥ улам сӱӱнчис јылыйар (Сар. 6:6; Эккл. 9:11).

5. Ака-эјелердиҥ кӧп сабазы бӱдӱп турган немези чын деп алаҥзыбай турганын канайып кӧргӱзет?

⁵ Бистиҥ ака-эјелердиҥ кӧбизи бӱдӱп турган немези чын деп алаҥзыбай јат. Нениҥ учун мынайып айдарга јараар? Нениҥ учун дезе јуунда олорды кем-кем ачындырып турза эмезе христиан принциптерди бузуп турза, олордыҥ бӱдери уйадабай јат (Сар. 119:165). Кӱчтерге туштаган сайын, олордыҥ бӱдери уйадабай, карын там ла тыҥып јат (Иак. 1:2—4). Је бӱдӱмјини тыҥыдарга нени эдер керек?

6. Баштапкы чактагы христиандардыҥ бӱдӱмјизи неге тӧзӧлӧнгӧн?

⁶ Баштапкы чактагы христиандардыҥ бӱдӱмјизи Агару Бичиктиҥ билгирлерине ле Иисус Христостыҥ ӱредӱлерине, ӧскӧртӧ айтса «Сӱӱнчилӱ Јардыҥ чындыгына» тӧзӧлӧнгӧн (Гал. 2:5). Бу чындыкка христиан ончо ӱредӱлер, ол тоодо Иисустыҥ толынты тайылгазы ла оныҥ тирилгени керегинде билгирлер кирет. Апостол Павел бу ӱредӱлерди чын деп бӱткен. Бис мыны кайдаҥ билерис? Павел дезе, «Христос кыйналар ла тирилер учурлу болгон» деп кӧргӱзерге, Агару Бичимелди тузаланган (Ап. ижи 17:2, 3). Христостыҥ ӱренчиктери бу ӱредӱлерди алынып, агару тын олорго Кудайдыҥ Сӧзин оҥдоорго болужар деп бӱдӱмјилӱ болгон. Олор бу ӱредӱлерди Агару Бичимелге тӧзӧлӧнип турган деп бӱдӱмјиленип алгандар (Ап. ижи 17:11, 12; Евр. 5:14). Олордыҥ бӱткени јӱк ле сезимдерге ле эмоцияларга тӧзӧлӧнбӧгӧн. Анайда ок олор Иеговага јӱк ле ака-эјелердиҥ ортозында болорго јарап турганы учун иштеген эмес, је олордыҥ бӱткени Кудай керегинде чике билгирлерге тӧзӧлӧнгӧн (Кол. 1:9, 10).

7. Агару Бичиктиҥ ӱредӱлерине алаҥзыбай бӱдӱп турганыс биске канайып болужар?

⁷ Кудайдыҥ Сӧзиндеги чындыктар качан да солынбай јат (Сар. 119:160). Бу чындыктар јуунда бисти кем-кем ачындырып та ийзе эмезе уур кинчек те эдип ийзе, анайда ок јӱрӱмисте кӱчтер де болуп турза, солынбай јат. Оныҥ учун биске Агару Бичиктиҥ  ӱредӱлерин сӱрекей јакшы билер керек ле бу ӱредӱлер чын деп бӱдӱмјилӱ болор керек. Агару Бичиктиҥ чындыктарына тӧзӧлӧнгӧн бек бӱдӱмји, бисте талайдагы јоткондый кӱчтер болуп турза, якорь чылап болужын јетирер. Је бӱдӱп турган немегиске бӱдӱмјилӱ болорго нени эдер керек?

8. 2 Тимофейге 3:14, 15-ле болзо, Тимофей бӱдӱп турган немези чын деп канайып бӱдӱмјиленген?

⁸ Тимофей чындыкты билип алганына бир де алаҥзыбаган. Нениҥ учун? (2 Тимофейге 3:14, 15 кычырыгар.) Оны Агару Бичимелле энези ле карган энези таныштырган. Је ол Агару Бичимелди ӱренерге бойы да ӧй лӧ ийде-кӱч табып туратан. Оныҥ учун бу чындык деп, бир де алаҥзыбаган. Кийнинде, Тимофей, оныҥ энези ле карган энези христиан ӱредӱлерле танышкан. Тимофейди Иисустыҥ ӱренчиктериниҥ ортозындагы сӱӱш тыҥ кайкаткан болор. Оныҥ учун ол јуундагы ака-эјелерле куучындажарга ла олорго болужарга кӱӱнзеген (Флп. 2:19, 20). Је оныҥ бӱдӱмјизи јӱк ле мындый сезимдерге тӧзӧлӧнгӧн эмес, је чике сезимдерге тӧзӧлӧнгӧн. Мындый билгирлер ого Иегованыҥ јуук најызы болорго болушкан. Слерге де Агару Бичиктеҥ Иегова керегинде билип алган билгирлерди тереҥ шӱӱп сананар керек.

9. Кандый тӧс чындыктарда бӱдӱмјиленип алар керек?

⁹ Озо баштап слерге ӱч тӧс чындыкка бӱдӱмјиленип алар керек: 1) Ӱзе немени Иегова јайаган (Чыг. 3:14, 15; Евр. 3:4; Ачыл. 4:11). 2) Агару Бичик — Кудайдыҥ улуска бичиген самаразы (2 Тим. 3:16, 17). 3) Иеговада Христостыҥ башкарузыла јӱрген албаты бар. Бу албаты — Иегованыҥ Керечилери болот (Иса. 43:10—12; Иоанн 14:6; Ап. ижи 15:14). Бу чындыктарга бир де алаҥзыбай бӱдерге, Агару Бичикти бӱдӱнге билер керек деп некелбей јат. Слердиҥ амадугар — «јакшыны јаманнаҥ ылгаштыр[ып]», чындыкты таап алганаар деп бӱдӱмјиленери (Евр. 5:14).

10. Агару Бичиктиҥ ӱредӱлеринде бӱдӱмјиленип алала, биске неге ӱренип алар керек?

¹⁰ Кудай, Агару Бичик ле Кудайдыҥ албатызы керегинде тӧс чындыктарда бӱдӱмјиленип алган кийнинде, биске Агару Бичикле тузаланарга ӱренип алар керек. Анайып слер улуска чындыкта бӱдӱмјиленип аларга болужараар. Је Агару Бичикти тузаланарга нениҥ учун ӱренип алар керек? Нениҥ учун дезе бисте, христиан улуста, бисти угуп турган улустарды бу чындыктарга ӱредетен молју бар (1 Тим. 4:16) *. Бис улуска Агару Бичиктиҥ ӱредӱлериниҥ керелерин канча ла кире јартап турзаас, бойыс ончо ло кире чындыкта бӱдӱмјиленип јадыс.

11. Апостол Павел биске кандый тем кӧргӱскен?

¹¹ Апостол Павел улусты ӱредип турза, «Моисейдиҥ Јасагынаҥ ла јарлыкчылардыҥ бичигенинеҥ Иисус керегинде олорды бӱдӱндирип тур[атан]» (Ап. ижи 28:23). Улусты чындыкка ӱредеринде Павелдеҥ кандый тем алар керек? Биске улуска Агару Бичикте не айдылып турганын јӱк ле куучындап берер керек эмес, је Кудайдыҥ Сӧзинеҥ билип алган билгирлерди шӱӱп сананып турарына ӱредер керек. Анайып олор Иеговага јууктап калар. Олор чындыкты бисле куучындажарга јакшызынып турганынаҥ улам эмес, је Агару Бичиктеҥ Иегова — сӱӱштӱ Кудай деп билип алганынаҥ алынзын деп кӱӱнзейдис.

12, 13. Ада-энелер балдарына чындыкта јӱрерге канайып болужар аргалу?

¹² Ада-энелер, слер балдараарды чындыкта јӱрзин деп кӱӱнзеп турган эмейигер. Балдараарда јуунда јакшы најылар болзо, олор кӧгӱс јанынаҥ ӧзӧр деп сананып турган болороор. Је балдараар чындык јӱк ле најылардыҥ болужыла, чындык Агару Бичикте деп бӱдӱмјиленип болбос. Олорго Иеговала бойыныҥ колбуларын ӧскӱрер керек ле библиялык ӱредӱлер чын деп бӱдӱмјиленер керек.

¹³ Ада-энелер балдарын Кудай керегинде чындыкка ӱредерге турган болзо, олор Агару Бичикти тереҥ шиҥдееринде тем болор керек. Анайда ок билип алганын тереҥ шӱӱп сананар керек. Анайып олор балдарын Агару Бичикти шиҥдеерине ле тереҥ шӱӱп сананарына ӱредип салар. Бого ло коштой ада-энелер канайып улусты Агару Бичикти шиҥдейтен јепселдерди тузаланарга ӱредип турган, анайып ла балдарын ӱредип салар учурлу. Анайып балдар Иегованы сӱӱр ле Иегова кӧгӱс курсакты керсӱ ле бӱдӱмјилӱ кул ажыра берип турган деп бӱдер (Матф. 24:45—47). Ада-энелер, слер балдараарды библиялык тӧс чындыктарга ӱредип салганаарла болорзынбагар. Балагардыҥ  јажын ла ӱренетен аргазын ајаруга алып, «Кудайдыҥ јажыдыныҥ тереҥин» оҥдоорго болужыгар. Ол тушта олордыҥ бӱдӱмјизи бек болор (1 Кор. 2:10).

14. Агару Бичиктиҥ судурларын нениҥ учун шиҥдеер керек? (« Бу судурларды јартап болороор бо?» деген рамканы база кӧрӱгер.)

¹⁴ Судурлар — Кудайдыҥ Сӧзиниҥ јаан учурлу бӧлӱги. Олордыҥ болужыла Иеговага бӱткенис тыҥыйт. Слердиҥ бӱдӱмјигерди кандый судурлар тыҥыткан? «Калганчы кӱндер» керегинде айдып турган судурлар болор (2 Тим. 3:1—5; Матф. 24:3, 7). Слердиҥ бӱдӱмјигерди база кандый судурлар тыҥыткан? Темдектезе, слер Даниилдиҥ 2-чи ле 11-чи бажалыктарындагы судурларды јартап болороор бо? * Слердиҥ бӱдӱмји Агару Бичимелге тӧзӧлӧнгӧн болзо, оны кем де, не де бузып болбос. Экинчи телекейлик јуу-согушта Германияда кыйнаткан ака-эјелеристиҥ темин сананып ийзегер. Ол ӧйдӧ калганчы кӱндер керегинде судурлардыҥ учуры јарт ачылгалак та болордо, акалар бар билгирлерине тыҥ бӱдӱп турган болгон.

15—17. Нацисттерге истеткен ака-эјелерге Агару Бичикти шиҥдегени канайып болушкан?

¹⁵ Германияда нацисттердиҥ ӧйинде муҥдар тоолу ака-эјелер концентрационный лагерьлерге аткарылган. Гитлер ле СС-тиҥ Генрих Гиммлер деп рейхсфюрери Иегованыҥ Керечилерин кӧрӧр кӱӱндери јок болгон. Бир эјениҥ сӧстӧриле болзо, бир катап Гиммлер концлагерьде отурган бистиҥ эјелерге мынайып айткан: «Слердиҥ Иегова теҥериде башкарзын, а мында, јерде, бис башкарарыс! Бис слерге кӧргӱзерис, кем-кемди јеҥип алар!» Мындый айалгада чындык артарга, Иегованыҥ ишчилерине не болушкан?

¹⁶ Ака-эјелер Кудайдыҥ Каандыгы 1914 јылда башкарып баштаган деп билер болгон. Оныҥ учун коркышту кӱч истежӱлер башталарда, олор кайкабаган. Кудайдыҥ амадузын кижиниҥ кандый да башкарузы токтодып болбос деп, олор бӱдӱмјилӱ болгон. Гитлер  чын кудай јаҥды јоголтып болбогон, ол эмезе Кудайдыҥ Каандыгынаҥ кӱчтӱ башкару тургузып болбогон. Бистиҥ ака-эјелер Гитлердиҥ башкарузы качан-бирде јоголып калар деп бӱткен.

¹⁷ Бистиҥ ака-эјелердиҥ бӱдӱмјизи бек тӧзӧлгӧлӱ болгон. Јаан удабай, нацисттердиҥ јаҥы аҥтарылып калган. «А мында, јерде, бис башкарарыс!» — деп айткан Генрих Гиммлерге качарга келишкен. Ол тушта ол концлагерьде отурган Любке деп акага туштаган. Гиммлер оны танып ийеле: «Је, Агару Бичиктиҥ Шиҥдеечизи, оноҥ ары не болор?» — деп, ал-санаага тӱжӱп сураган. Любке ака Иегованыҥ ишчилери нацисттердиҥ јаҥы аҥтарылар, а олор аргадалар деп билер болгонын јартап берген. Иегованыҥ Керечилерине маказырап турган Гиммлер бу ӧйдӧ айдар сӧс таппаган. Мынаҥ јаан удабай, ол бойына колын салынып койгон. Бу учуралдаҥ бис неге ӱренедис? Агару Бичикти, ол тоодо анда бичилген судурларды шиҥдезеес, Кудайга бӱдерис бек болор ло ченелтелердиҥ ӧйинде чындык артарыс (2 Петр 1:19—21).

18. Иоанн 6:67, 68-ле болзо, биске нениҥ учун Павелдиҥ айтканыла чике билгирлер алар керек ле чындыкта бӱдӱмјиленер керек?

¹⁸ Биске ончобыска чындык христиандардыҥ аҥылу кылык-јаҥын — сӱӱшти кӧргӱзер керек. Је анайда ок биске чике билгирлер алар керек ле чындыкта бӱдӱмјиленер керек (Флп. 1:9). Оноҥ ӧскӧ бисти тӧгӱнчи улустыҥ, ол тоодо Кудайдаҥ јана баскандардыҥ «салкындый кубулчаҥ не ле ӱредӱзи» туура апарып салардаҥ айабас (Еф. 4:14). Баштапкы чакта Христосты кӧп ӱренчиктер артыргызып саларда, апостол Петр: «Сенде ӱргӱлји јӱрӱмниҥ сӧстӧри бар» — деп алаҥзыбай айткан. (Иоанн 6:67, 68 кычырыгар.) Ол тушта Петр Иисустыҥ ӱредӱлерин јетире аайлабай да турган болзо, бойыныҥ Ӱредӱчизине чындык арткан. Нениҥ учун дезе Иисус — ол Христос деп бӱткен. Слер де Агару Бичиктиҥ ӱредӱлерине бойыгардыҥ бӱдӱмјигерди тыҥыдар аргалу. Ол тушта слердиҥ бӱдӱмјигер бек болзо, слер кандый ла кӱчтерди ӧдӱп чыгараар ла улуска да бӱдӱмјизин тыҥыдып аларга болужып беререер (2 Иоанн 1, 2).