1. ¿Chem am tati rüf dungu?

PU POYEKEFILU ta Jewba fentren rupa ramtuwkeiñ: “¿Chumngechi kimfimi tati rüf dungu? ¿Chumül kimfimi tati rüf dungu? ¿Pichikalu eymi? ¿Tunten tripantu kimkeymi tati rüf dungu?”. Welu, ¿chem anta feytachi rüf dungu? Feyta kom taiñ feyentukeel, chumngechi taiñ poyekefiel ta Jewba ka chumngechi yeniekeiñ taiñ mongen. Feymu pu kimkefilu tati rüf dungu kimkey Biblia tañi kimeltukeel ka inaniekey tañi ngülam. Lifrelekeyngün koylake kimeltun mu, fey doy ayüwkületuyngün (Juan 8:⁠32).

2. Ñi feypin Juan 13:⁠34, 35, ¿chem doy inaduamkey pu che we amulu taiñ trawün mu?

² Petu taiñ kon-non Jewba tañi trokiñche mu, kiñeke iñchiñ ngüneduamiyiñ fente ñi küme chengen pu poyekefilu ta Jewba, feymu peno küpa koniyiñ tañi trokiñche mu (1 Ped. 2:⁠12). Fentren che we amulu taiñ trawün mu, doy inaduamfi fente ñi piwkeyechefe ngen taiñ pu peñi ka pu lamngen. Femngechi femtripakey ñi feypikünuel ta Jesus, kidu feypi ñi kimfaluwal pu rüf cristiano tañi piwkeyewün mu (papeltunge Juan 13:⁠34, 35). Welu taiñ rüf feyentual Jewba mu, fillke dungu müley taiñ femal.

3. ¿Chumngelu serfikelafiyiñ ta Jewba re taiñ piwkeyefiel müten taiñ pu peñi ka pu lamngen?

³ Iñchiñ piwkeyefiyiñ taiñ pu peñi ka pu lamngen, welu feychi dungu mew müten serfikelafiyiñ ta Jewba. ¿Chumngelu  am? Kom iñchiñ ta culpafe chengeiñ, feymu iney rume trawünche mu welulkarumeafuy. Rakiduamnge tüfachi dungu: kiñe longkolelu, kiñe wünelekelu amuldungun mu kam iney rume weda duamelafeiñmu, fütra culpayafuy kam apostata ngerpuafuy. Femngechi dungu rupale, fey küme weniyenofiliyiñ ta Jewba, iñchiñ famtripayafuiñ kidu mu. Feymu taiñ rüf feyentual Jewba mu, rume falin-ngey taiñ küme weniyeafiel. Falin-ngey taiñ piwkeyeafiel ta Jewba ka taiñ pu peñi ka pu lamngen, welu ka femngechi rume falin-ngey taiñ küme ngüneduamafiel tati Biblia, femngechi rüf maneluwafuiñ ñi rüfngen taiñ kimürpun (Rom. 12:⁠2).

4. Ñi feypin Matew 13:⁠3-6, 20, 21, ¿chumkey kiñeke che rupan mu wedake dungu mu?

⁴ Jesus feypi kiñeke che ayüwünkechi llowkefi tati rüf dungu, welu kontupaelieyew wedake dungu famtripakeyngün Jewba mu (papeltunge Matew 13:⁠3-6, 20, 21). Kiñeke che feypikey küdawngelay ñi serfiafiel ta Jewba. Ka kiñeke che rakiduamkey re kümeke dungu rupakey pu serfikefilu ta Jewba (Mar. 8:⁠34). Welu cristiano ngefuliyiñ rume, kom rupakeiñ wedake dungu mu. Femngechi rupaliyiñ, ayüwkülewetulayafuiñ (Sal. 6:⁠6; Ecl. 9:⁠11).

5. ¿Chumngechi pengelkeiñ taiñ rüf feyentulen Jewba mu?

⁵ Epe kom iñchiñ pengelkeiñ taiñ rüf feyentulen Jewba mu. ¿Chumngelu feypiafuiñ? Wedake dungu femfule rume taiñ pu peñi ka pu lamngen, fentekünukelaiñ taiñ poyeafiel ta Jewba (Sal. 119:⁠165). Wedake dungu mu rupafuliyiñ rume, doy newentuleaiñ taiñ feyentulen ta Jewba mu (Sant. 1:⁠2-4). ¿Chumngechi newentuleafuiñ taiñ feyentuel ta Jewba mu? Inaduamaiñ.

6. Tati pu wünenke cristiano, ¿chumkefuyngün ñi feyentual Chaw Dios mu?

⁶ Tati rüf dungu mu koneltuley kom ñi feyentukeel pu cristiano, ñi lapan ta Jesus ka ñi wiñomongetun. Kuyfi mu, tati pu wünenke cristiano kimürpufingün tati Wirin Chillka ka ñi kimeltuel ta Jesus, feymu rüf feyentukefuyngün Jewba mu (Gal. 2:⁠5). Apostol Pablo maneluwkefuy ñi rüfngen kom tañi feyentun, ¿chumngelu feypiafuiñ? Kidu tati Wirin Chillka mu, “kimelelfi ti pu che tati Kristo felerkefuy ñi layal, fey ka rupan lale, felerkefuy tañi wiñomongetual” (Hecho 17:⁠2, 3). Tati pu wünenke cristiano feyenturpuyngün feytachi kimeltun mu, fey eluwingün ñi kelluaetew Chaw Dios tañi newen ñi küme adümal feytachi küme dungu. Feytachi pu cristiano ngüneduamkefuyngün Ngünechen tañi Wirin Dungu, femngechi tañi kimal ñi rüfngen ñi kimeltuel ta Pablo (Hecho 17:⁠11, 12; Eb. 5:⁠14). Feytachi pu che ayükefuyngün Pablo ñi kimeltuel ka ayükefuyngün ñi trawüluwal tati pu cristiano engün. Welu feytachi dungu mew müten poyekelafuyngün ta Jewba, doy may tañi küme kimfiel mu ta Jewba (Kol. 1:⁠9, 10).

7. Feyentuliyiñ Biblia ñi kimeltukeel mu, ¿chumaiñ?

⁷ Ñi kimeltukeel ta Biblia felekey müten (Sal. 119:⁠160). Kiñeke mu weda duamelafeiñmu kiñe peñi kam kiñe lamngen, ka fütra culpayafuy kiñe cristiano, ka konturumeafeiñmu wedake dungu. Welu chem rume rupafule, Biblia ñi kimeltukeel felekey müten. Feymu küme kimafiyiñ Biblia ñi kimeltukeel ka maneluwaiñ ñi rüfngen kom tañi feypiel. Feymu rüf feyentuliyiñ Biblia ñi kimeltukeel mu, rüf maneluwküleaiñ Jewba mu chem dungu rume  rupafuliyiñ. ¿Chumafuiñ taiñ doy maneluwal ñi rüfngen taiñ feyentukeel? Inaduamafiyiñ.

8. Ñi feypin 2 Timotew 3:⁠14, 15, ¿chumngechi kimürpuy Timotew ñi rüfngen tañi feyentukeel?

⁸ Timotew maneluwkefuy ñi rüfngen tañi feyentukeel, ¿chumngelu am? (Papeltunge 2 Timotew 3:⁠14, 15). Tañi ñuke ka tañi chuchu wünelu mu kimeltueyew Chaw Ngünechen tañi küme dungu. Welu Timotew kidu yafüluwi ñi ngüneduamafiel Ngünechen tañi küme dungu, femngechi kidu feyenturpuy ñi nien tati rüf dungu. Rupachi antü mu, Timotew, tañi ñuke ka tañi chuchu kimürpuyngün feytachi kümeke dungu ñi kimeltuel ti pu cristiano. Timotew afmatulewepelay pefiel mu fente ñi piwkeyewün pu cristiano ka ayüniepelafuy ñi trawüluwal kidu engün mu (Filip. 2:⁠19, 20). Welu feychi dungu mew müten serfirpulafi ta Jewba. Doy may Timotew maneluwkefuy Chaw Dios tañi küme dungu mu, feymu eluwi tañi weniyeafiel. Ka femngechi iñchiñ müley taiñ ngüneduamafiel ta Biblia ka küme rakiduamal chem kimeltukey Jewba mu.

9. ¿Chem küla falin dungu müley taiñ rüf feyentual?

⁹ Kiduke iñchiñ müley taiñ rüf feyentual küla falin dungu mew: Kiñe, Jewba ñi dewmafiel kom tati mülelu (Éx. 3:⁠14, 15; Eb. 3:⁠4; Apok. 4:⁠11). Epu, Biblia feypiley chem ayüniey Jewba taiñ kimal (2 Tim. 3:⁠16, 17). Küla, Jewba niey kiñe trokiñche tañi poyekeetew, tati pu Dungukelu Iney Ngen Jewba, Kristo adniekeeyew engün (Is. 43:⁠10-12; Juan 14:⁠6; Hecho 15:⁠14). Taiñ rüf feyentual feytachi küla dungu mu duamfalngelay taiñ kimafiel kom tati Biblia. Doy may küme rakiduamaiñ chem taiñ feyentukeel, femngechi maneluwaiñ ñi rüfngen (Rom. 12:⁠1).

10. Kimnielu iñchiñ Biblia ñi kimeltukeel, ¿chem müley taiñ femal?

¹⁰ Re kimlayaiñ müten feytachi falinke dungu, ka femngechi müley taiñ kimeltulelafiel  ta che Biblia mu. Iñchiñ taiñ pu cristiano ngen, müley taiñ kimeltulafiel ta che taiñ kimürpukeel (1 Tim. 4:⁠16).⁠ * Femngechi femliyiñ, doy maneluwküleaiñ ñi rüfngen Biblia ñi kimeltukeel.

11. Kimeltucheliyiñ, ¿chumngechi inayentuafuiñ ta Pablo?

¹¹ Pablo kimeltukefuy ta che ñi feypiel ta Moyse ka tati pu profeta, femngechi ñi feyentual engün Jesus mu (Hecho 28:⁠23). ¿Iñchiñ kay? Kimeltucheliyiñ, ¿chumngechi inayentuafuiñ ta Pablo? Feypilayaiñ müten ta che Biblia ñi kimeltukeel. Doy may kelluafiyiñ engün ñi rakiduamal tañi kimürpun mu, fey ñi konal tañi piwke mu, femngechi doy fülkonay Jewba mu. Ayükelaiñ pu che ñi konal ti rüf dungu mu iñchiñ taiñ sakietew mu. Doy may ayükeiñ tati pu che ñi kimal ñi rüfngen kom tañi kimürpun Jewba mu, femngechi ñi konal tañi trokiñche mu.

12, 13. Pu chaw, pu ñuke, ¿chumngechi kelluafuy tañi pu yall ñi serfinieafiel ta Jewba?

¹² Eymün pu chaw, pu ñuke, ayüniepelaymün tamün pu yall ñi serfinieafiel ta Jewba. Eymün ta feypiafuymün chi: “Kümeke weni niele engün trawünche mu, küme weniyerpuafingün ta Jewba” piafuymün. Welu fey ka müten duamfalngelay. Tamün pu yall ka tamün pu püñeñ müley tañi küme weniyeafiel ta Jewba ka maneluwal ñi rüf feypiken tati Biblia.

¹³ Pu chaw, pu ñuke müley ñi küme ngüneduamafiel tati Biblia, femngechi tamün pu yall, tamün pu püñeñ tamün inayentuaetew, fey küme kimürpuafuyngün ta Jewba. Elantükünuaymün tamün rakiduamal chem tamün chillkatukeel, femngechi kimeltulelafimün tamün pu yall ñi ka femngechi femal. Kimeltulelafimün tamün pu yall, tamün pu püñeñ ñi adümafiel ti pagina INTERNET MÜLEYECHI LIFRU Watchtower^™, JW Library^® ka fillke lifru ka video ñi kelluaetew tañi doy küme kimafiel ta Biblia. Femngechi tamün pu yall, tamün pu püñeñ piwkeyerpuafuyngün ta Jewba ka maneluwafuyngün Jewba ñi adniekefiel ti “kim manelfal kona”, esclavo fiel y prudente pingey wingka dungun mu. Femngechi Jewba kimeltukeeiñmu kom taiñ duamnieel (Mat. 24:⁠45-47, TNM). Kimeltuafimün tamün pu yall, tamün pu püñeñ ti doy duamfalngechi kimeltun Biblia mu mülelu. Welu fey ka müten no, ka femngechi kelluafimün ñi ngüneduamal kakelu fütrake kimeltun mülelu Biblia mu. Tami femngechi femal, longkontukunieaymi tunten tripantu  ñi nieel tami pu yall ka tunte ñi adümuwün-ngen (1 Kor. 2:⁠10).

14. ¿Chumngelu müley taiñ ngüneduamafiel tati profecia Biblia mew mülelu? (Inaduamnge ti wichulechi dungu “ ¿Kimfalkünupeafuymi may feytachi profecia?”).

¹⁴ Biblia mu müley fentren profecia. Fey tüfa kellukeeiñmu taiñ doy maneluwal Jewba mu. Kiñeke profecia feypiley chem rupayafuy afaelchi antü mu, fey tüfa kellukeeiñmu taiñ doy maneluwal Jewba mu (Mat. 24:⁠3, 7; 2 Tim. 3:⁠1-5). Ka femngechi kakelu profecia Biblia mew mülelu femtripay, fey tüfa ka kelluafeiñmu taiñ doy maneluwal Jewba mu. Kiñeke tüfachi profecia müley ta Daniel capitulo 2 ka Daniel capitulo 11.⁠ * ¿Eymi kay? ¿Adümkefimi feytachi profecia? ¿Kimeltulelafuymi kay ta kakelu che? Küme ngüneduamliyiñ kom ñi feypin ta Biblia, rüf feyentuleaiñ Jewba mu chem weda dungu rume rupafuliyiñ. Ngüneduamaiñ chem ñi rupan taiñ pu peñi ka pu lamngen Alemania mapu mu. Puwlu tati Segunda Guerra Mundial, kidu engün rume kayñetungeyngün. Kidu engün küme adümkelafuyngün kom tati profecia, welu maneluwkefuyngün Biblia ñi feypin mu.

15-17. Taiñ pu peñi ka pu lamngen kayñetungelu Alemania mapu mu, ¿chem kellueyew ñi newentukuwküleal engün?

¹⁵ Feychi ngünenielu pu nazi Alemania mapu mu, fentren taiñ pu peñi ka pu lamngen carceltukungey. Hitler ka kiñe longkolechi soltau Heinrich Himmler pingelu, üdekefuyngu tati pu poyekefilu ta Jewba. Ti longkolechi soltau feypifi piam ta kiñeke lamngen carcelkonkülelu: “Tamün Jewba ngüneniepe wenu mu, welu nag Mapu mew iñchiñ taiñ pu nazi ngen ngüneniekeiñ. Iñchiñ mülekayaiñ, welu eymün mülewepeafuymün chi. ¡Peaymün tati!”. ¿Chem kellueyew taiñ pu peñi ka pu lamngen ñi famentunoafiel ta Jewba?

 ¹⁶ Feychi antü mu, pu poyekefilu ta Jewba kimniefuy 1914 tripantu mu ngünenierpuy Chaw Dios tañi Gobierno. Kidu engün kimniefuy ñi feypin ta Biblia, feymu kayñetungelu engün afmatulayngün. Kidu engün kimniefuy chem gobierno no rume katrütulayafuy ta Jewba ñi femal tañi ayükeel. Kidu engün kimniefuy Hitler ñi apümkanoafiel kom pu poyekefilu ta Jewba, tañi gobierno turpu wewlayafuy Chaw Dios tañi Gobierno. Taiñ pu peñi, taiñ pu lamngen rüf maneluwkefuy ñi afal Hitler tañi gobierno.

¹⁷ Pichi rupalu, pu nazi wewngeyngün. Fey ti longkolechi soltau lefmawi. Petu lefmawkiyawlu, kimrumetufi kiñe peñi presulefulu Lübke pingey. Kidu kimniefuy taiñ peñi ñi serfikefiel ta Jewba, fey weñangkülen feypifi: “Fewla kay, ¿chumlerputuaiñ?”. Taiñ peñi feypieyew: “Pu poyekefilu ta Jewba kimniefuy tañi wewngeal pu nazi ka kimniefuy tañi lifreletual engün”. Ti longkolechi soltau, allkütulu tüfa ñüküfkülewey. Rupachi antü mu, langümuwi. ¿Chem kimeltueiñmu ñi femün tüfachi pu peñi ka pu lamngen? Müley taiñ küme ngüneduamafiel tati profecia ka kom ñi feypilen tati Biblia, femngechi rüf feyentuleaiñ Jewba mu chem dungu rume rupafuliyiñ (2 Ped. 1:⁠19-21).

18. Ñi feypin Juan 6:⁠67, 68, ¿chumngelu müley taiñ küme adümafiel Ngünechen ñi küme dungu?

¹⁸ Iñchiñ taiñ rüf cristiano ngen, müley taiñ welukonkechi piwkeyewal, welu ka femngechi müley taiñ nieal fentren kimün ka taiñ doy adümal Ngünechen ñi küme dungu (Filip. 1:⁠9). Femnoliyiñ, welulkayafeiñmu pu apostata ka fillke koylake kimeltun (Efes. 4:⁠14). Mülepalu Jesus Mapu mu, fentren che elkünutueyew. Welu Pedro feypieyew: “Eymi tami dungun ta rumel mongen dungun” (papeltunge Juan 6:⁠67, 68). Pedro küme adümkelafuy kom ñi feypin ta Jesus, welu kimniefuy tañi Kristo ngen, feymu elkünutulafi. Ka femngechi iñchiñ maneluwküleliyiñ Biblia mu, doy feyentuleaiñ Jewba mu wedake dungu rume rupafuliyiñ ka kelluafiyiñ ta che ñi ka femngechi femal (2 Juan 1, 2).