1. ¿‘Jupajj cheqa yatichäwinak uñtʼiwa’ sasajj kamsañsa muntanjja?

 “¿KUNJAMATSA cheqa yatichäwinak uñtʼawayta?” “¿Wawatpachtti uñtʼta?” sasin jisktʼapjjpachïstuwa, jan ukajj jiwasaw yaqhanakar ukham jisktʼpachätana. Ukampis “cheqa yatichäwi” sasajj ¿kuna toqetsa parlasktanjja? Kuntï creyktan, Diosar adorañatak kuntï lurktan, kunjamsa jakastan ukanakatwa parlasktanjja. ‘Jupajj cheqa yatichäwinak uñtʼiwa’ sasin maynit sisktan ukhajja, kuntï Bibliajj yatichki uk yatiwa, respetarakiwa sañwa munasktanjja. Ukham lurasajja, jupajj janiw kʼari religionanakan yatichäwinakapar creyjjeti, Supayampi apnaqata akapachankkasas kusisitaw jakasi (Juan 8:32).

2. Juan 13:34, 35 textorjamajja, ¿kunas waljanir Diosan markapar mantañatak yanaptʼi?

² ¿Kunas Diosan markapankañatak yanaptʼawayistu? Yaqheparojja, Jehová Diosan Testigonakapajj kunjamäpjjesa uk uñjañaw yanaptʼpachïstu (1 Ped. 2:12). Yaqheparusti, Testigonakajj kunja munasirïpjjesa uk uñjañaw yanaptʼarakpachïstu. Ukaw waljanirojj Tantachasiñ Utaru nayrïr kuti sarkayätan ukhajj wal musparayistäna. Kunatï ukan yatichaskäna uk inas jan amtkstanti, ukampis kunjamsa jilat kullakanakajj wali munasiñamp katoqapjjestäna ukakwa amtaspachatäna. Cheqas cristianonakajj wali munasirïpjjewa. Jesusajja, jumanakatï wali munasirïpjjätajja, taqeniw nayan discipulonakajäpjjatam yatipjjani sasaw säna (Juan 13:34, 35 liytʼañataki). Ukampis Diosar wal confiyañatakejja, janiw aleq munasirïñasakïkiti.

3. ¿Cristianonakajj kunja munasirïpjjesa uk uñjasak Diosar confiysna ukhajj kunas pasaspa?

 ³ Janiw cristianonakajj kunja munasirïpjjesa uk uñjasaki Diosar confiyañasäkiti. ¿Kunatsa? Amuytʼañataki, mä jilatasa mä jilïr irpirisa mä precursoras jachʼa juchar purtʼasispa, chuym ustʼayistaspa, Diosan markap conträjjaspa, janiw cheq yatichapkiti sasin sistaspa ukhajja, ¿kunsa lursna? ¿Aynachtʼsnati, Diosarus janit sirvjjsna? Diosar taqe chuyma confiyañatakejja, Jehová Diosar munasiñasawa, janiw kuntï mayninakajj lurapki ukarjamak Diosar confiyañasäkiti. Diosampiru jilat kullakanakampir munasiñajj Diosar confiyañatak yanaptʼistaspawa. Ukampis taqe chuyma confiyañatakejja, Bibliat sum yatjjatañasawa, kuntï yateqtan uksa amuytʼañasawa. Cheqas Diosat kunatï cheqäki ukjja Bibliaw yatichi, ukat jan pächasiñatakejj jiwaspachpaw yatjjatañasa (Rom. 12:2).

4. Mateo 13:3-6, 20, 21 textorjamajja, ¿maynejj jan walinakan uñjaski ukhajj kunas Diosar confiyatapamp pasi?

⁴ Jesusajja, “kusisitaw” yaqhepajj Biblian arunakap katoqapjjani, ukampisa jan walinakajj utjkani ukhajj jankʼakiw Diosar confiyatapajj aynachtʼani sasaw säna (Mateo 13:3-6, 20, 21 liytʼañataki). Jesusar arkasajj kunayman jan walinakana, yantʼanakanwa uñjasiñäni, inas yaqhepajj ukanak jan amuyapkchiti (Mat. 16:24). Jan ukajja, ‘cristianöjjasajj jan kuna llakiniw jakasëjja’ sasin amuyapjjarakchi. Ukampis akapachanjja jan walinakajj utjakipuniniwa. Mä jan walin uñjasisajj janiw kusisit jakasjjsnati (Sal. 6:6; Ecl. 9:11).

5. Cristianonakat jilapartejja, kuntï creyktan ukajj cheqawa sasaw confiyapjje ¿kunjamsa uk uñachtʼayapjje?

⁵ Diosan servirinakapat jilapartejja, kuntï creyktan ukajj cheqäskapuniwa sasaw taqe chuyma confiyapjje. ¿Kunjamatsa uk yattanjja? Mä jilatasa jan ukajj mä kullakasa jupanakar chuym ustʼayi, jan ukajj juchachasi ukhajj janiw Diosar confiyatapajj aynachtʼkiti (Sal. 119:165). Jan walinakan uñjasisajj aynachtʼañat sipansa jukʼampiw Jehová Diosar confiyi (Sant. 1:2-4). Jehová Diosar wal confiyañatakejj ¿kun lurañas wakisi?

6. ¿Nayrïr cristianonakarojj kunas Diosar confiyañatak yanaptʼäna?

⁶ Nayrïr cristianonakajja, Qellqatanak uñtʼapjjänwa, Jesusan yatichäwinakapsa yatipjjarakïnwa, mä arunjja ‘cheqa yatichäwinakwa’ yatipjjäna, ukatwa Diosar confiyapjjäna (Gál. 2:5). Uka yatichäwinakajj kunanaktï creyktan ukanakawa. Uka yatichäwinakat mayajja, Jesusan jiwatapampi jaktatapampiwa. Apóstol Pablojj uka yatichäwinakat janiw pächaskänti. ¿Kunatsa? Pablojja “Criston tʼaqesiñapasa jiwatanak taypit jaktaniñapasa wakisipunïnwa sasaw [jaqenakarojj] Qellqatanakamp qhanañchäna, uñachtʼayarakïna” (Hech. 17:2, 3). Nayrïr cristianonakajj uka yatichäwinakar creyipjjänwa, Diosan Arup amuyañatakis espíritu santon yanaptʼapwa thaqapjjäna. Yateqapkäna ukajj Qellqatanakarjamäskiti janicha uk yatiñatakejj jupanakpachpaw yatjjatapjjäna (Hech. 17:11, 12; Heb. 5:14). Janiw Diosan markapan munasiña utjatapatak Diosar confiyapkänti, janirakiw jilat kullakanakampi sum apasipjjatap laykukis Diosar servipkänti. Antisasa, ‘Diosar sum uñtʼapjjatapatwa’ confiyapjjäna (Col. 1:9, 10).

7. ¿Kunjamsa Biblian yatichäwinakapar confiyañajj yanaptʼistani?

⁷ Biblian cheqa yatichäwinakapajj janipuniw mayjtʼkaspati (Sal. 119:160). Sañäni, mä jilatajj chuyma ustʼayistu jan ukajj mä jachʼa juchar purtʼasi ukhajja, uka yatichäwinakajj janiw mayjtʼkiti. Janirakiw jan waltʼäwin uñjasktan ukhas mayjtʼkiti. Ukhamasti Biblian  yatichäwinakap sum uñtʼañasawa, cheqätapatsa janirakiw pächasiñasäkiti. Kunjamtï jachʼa thayanak sartipan anclajj barcor katjjäskejja, ukhamarakiw Biblian yatichäwinakapar confiyañajj jan waltʼäwinakan katjjäsistani. ¿‘Biblian yatichäwinakapajj cheqäskapuniwa’ sasin jukʼamp confiyañatakejj kunsa lurañasa?

8. ¿Kunas 2 Timoteo 3:14, 15 textorjamajj cheqa yatichäwinkatapat jan pächasiñatak Timoteor yanaptʼäna?

⁸ Timoteojj cheqa yatichäwinkatapat janiw pächaskänti. ¿Kunas jan pächasiñatak yanaptʼäna? (2 Timoteo 3:14, 15 liytʼañataki). Mamitapampi awichapampiw “sagrado qellqatanak” nayraqat yatichapjjäna. Ukampis jupaw yatjjatañatak tiempo apsusïna, wal chʼamachasirakïna. Ukatwa qellqatanakar ‘taqe chuym creyïna’. Qhepatjja, Timoteompi mamitapampi awichapampejj Criston yatichäwinakapwa yateqjjapjjäna. Cheqas Jesusan discipulonakapajj kunja munasirïpjjänsa uk uñjasajj walpun musparäna. Ukaw jilat kullakanakat jan jitheqtañataki, jupanakar yanaptʼañatak yanaptʼäna (Filip. 2:19, 20). Ukampis janiw jilat kullakanakar wal munasitap laykukejj Diosar confiykänti, jan ukasti Bibliat yatjjatatapatwa Diosar confiyäna, ukaw Diosan amigopäñatak yanaptʼarakïna. Jiwasajj ukhamarakiw kuntï Bibliajj Diosat yatichki ukanak yatjjatañasa, jan pächasiñatakis kuntï yatjjatktan ukanakat amuytʼañasa.

9. ¿Kuna kimsa cheqa yatichäwinakatsa jan pächasiñasäki?

⁹ Aka kimsa yatichäwinakat janiw pächasiñasäkiti. Maya, Jehová Diosaw taqe kuns luri (Éx. 3:14, 15; Heb. 3:4; Apoc. 4:11). Paya, Biblian yatichäwinakapajj Diosatwa juti (2 Tim. 3:16, 17). Kimsa, Diosajj mä suma organistʼat markaniwa, Jesucristompi pʼeqtʼatarakiwa, uka markajj Jehová Diosan Testigonakapawa (Is. 43:10-12; Juan 14:6; Hech. 15:14). Uka yatichäwinakat jan pächasiñatakejja, janiw Bibliat taqpachpun yatiñajj wakiskiti. Antisas ‘suma amuytʼirïñasawa’ ukhamatwa cheqa yatichäwinakat jan pächaskañäniti (Rom. 12:1).

10. Cheqa yatichäwinak yatisajj ¿kunsa lurañasa?

¹⁰ Jehová Diosata, Bibliata, Diosan markapat kunatï cheqäki ukanak qhan amuyjjasajja, Qellqatanakampiw ukanak jaqenakar qhanañchtʼañasa. ¿Kunatsa? Cristianonakajj kunatï cheqäki ukanak jaqenakar yatichañasapuniwa (1 Tim. 4:16). * Biblian yatichäwinakapat jan pächasipjjañapatak yaqhanakar yanaptʼtan ukhajja, jukʼampiw Diosar confiytanjja.

11. ¿Kunjamsa mayninakaru Bibliat yatichkasajj Pablot yateqassna?

¹¹ Pablojj jaqenakar yatichkäna ukhajja, “Jesusar creyipjjañapatakejj Moisesan Leyiparjama Profetanakan Qellqatanakaparjamaw jupanakar amuytʼayañatak chʼamachasïna” (Hech. 28:23). Bibliat maynir yatichkasajj ¿kunjamsa Pablot yateqassna? Janiw kuntï Bibliajj yatichki ukak sañasäkiti. Jan ukasti kuntï yateqki ukat amuytʼañapatakiw yanaptʼañasa, ukhamatwa Diosar jakʼachasini. Janiw jiwasar respetatap laykuki cheqa yatichäwinak yateqañap munktanti, jan ukasti kuntï Jehová Diosat yateqki ukar taqe chuyma creyitapat yateqaspa ukwa muntanjja.

12, 13. ¿Kunsa awk taykanakajj wawanakapan cheqa thakit jan jitheqtapjjañapatak lurapjjaspa?

¹² Awk taykanaka, wawanakamajj cheqa thakit jan jitheqtapjjaspa ukwa munapjjpachätajja. ‘Congregacionan suma amigonakanïpjjani ukhajj jukʼampiw Diosar confiyapjjani’ sasin inas amuyapjjsta. Ukampis Biblian yatichäwinakapat jan pächasipjjañapatakejja, janiw suma amigonakanïpjjañapakejj wakiskiti. Jan ukasti Jehová Diosan suma amigopäpjjañapawa, kuntï Bibliajj yatichki ukarus taqe chuymaw confiyapjjañapa.

¹³ Wawanakamar Diosat yatichañ munapjjsta ukhajja, jumanakaw Bibliat suma yatjjatirïpjjañama. Kuntï yateqapkta ukanakat amuytʼañatakejj tiempo apstʼasipjjañama. Ukhamatwa wawanakamarojj uka kikpa lurapjjañapatak yatichapjjäta. Kunjamtï Bibliat yateqerinakar yatichapktajja, ukhamarakiw wawanakamarojj Bibliat yatjjatañataki yanaptʼanakajj utjki ukanakampejj kunjamsa yatjjatapjjaspa uk yatichapjjañama. Ukham lurasaw Diosar munasipjjañapataki, suma phoqeri amuyasir esclavor confiyapjjañapatak yanaptʼapjjäta, jupanakaw qellqatanak manqʼäkaspas ukham churistu (Mat. 24:45-47). Janiw Biblian fácil yatichäwinakapak yatichapjjañamäkiti. Jan ukasti qhawqha maranisa, qhawqsa yateqaspa ukarjamaw “Diosan imantat  yatiñapsa” qhanañchapjjañama, ukhamatwa Diosar wal confiyapjjani (1 Cor. 2:10).

14. ¿Kunatsa Biblian profecianakapat yatjjatañasa? (“ ¿Biblian aka profecianakap qhanañchtʼasmati?” sat recuadro uñjjattʼäta).

¹⁴ Bibliankir profecianakajj wali importanterakiwa, Jehová Diosar jukʼamp confiyañatakiw yanaptʼistu. ¿Kawknïr profecias Diosar jukʼamp confiyañatak yanaptʼawayistu? Inas ‘qhepa urunakata’ parlki uka profecianakat lupʼstan (2 Tim. 3:1-5; Mat. 24:3, 7). Phoqasjje uka profecianakajj Diosar jukʼamp confiyañatak yanaptʼarakistaspawa. Sañäni, Daniel 2 y 11 capitulonakan qellqata profecianakajj ¿kunjamsa phoqasiwayi kunjamsa phoqasiskaraki uk qhanañchtʼsnati? * Biblian yatichäwinakaparjam Diosar confiystan ukhajja, jan walinakan uñjasisajj janiw aynachtʼkañäniti. Segunda Guerra Mundialan kunjamsa jilat kullakanakajj Alemaniampi jan waltʼayatäsajj aguantapjjäna uk uñjañäni. Uka tiempon qhepa urunakat parlir profecianakajj janis sum amuyaskchïnjja, jilat kullakanakajj taqe chuymaw Diosan Arupar confiyapjjäna.

15-17. Nazi partidomp arknaqatäpkäna uka jilat kullakanakarojja, ¿kunjamsa Bibliat yatjjatañajj yanaptʼäna?

¹⁵ Nazi partidonkirinakajj Alemanian wali chʼamanïpkäna ukhajja, walja waranqa jilat kullakanakaruw campos de concentración ukanakar apayapjjäna. Hitler chachampi, Heinrich Himmler sat jilïr oficialampejja, Testigonakar wal uñisipjjäna. Mä kullakajj akham sänwa: “Himmler chachajj akham sasaw campos de concentración ukankir mä qhawqha kullakanakar säna: ‘¡Jumanakatï munapjjstajja, Jehová Diosamajj alajjpachan gobernaskaspawa, ukampis aka oraqenjja nanakaw gobernapjjta! ¡Jumanakati jan ukajj nanakacha jukʼamp tiempo utjapjjä ukajj yatisiniwa!’ sasa”. ¿Kunas Diosan servirinakaparojj Jupat jan jitheqtapjjañapatak yanaptʼäna?

¹⁶ Bibliat Yatjjatirinakajja, Diosan Reinopajj 1914 maran apnaqañ qalltatap yatipjjänwa. Jan waltʼayatäsajj janiw sustjasipkänti. Janiw mä gobiernos Diosan munañap phoqasiñap  jarkʼkaspati, Diosan markapajj uk sum yatïna. Hitler chachajj janiw cheqa religionar tukjkaspänti, janirakiw Diosan Reinop lantejj yaqha gobierno uttʼayañ puedkaspänti. Hitler chachan gobiernopajj tukjat uñjasikipuniniwa sasaw jilat kullakanakajj confiyapjjäna.

¹⁷ Kunarutï uka jilat kullakanakajj confiyapkäna ukajj ukhamapuniw phoqasïna. Mä qhawqha tiempot nazi partidojj tukjataw uñjasïna, Heinrich Himmler chachajj “aka oraqenjja nanakaw gobernapjjta” siskchïnsa escapjjänwa. Escapaskäna ukhajja Lübke sat apellidoni jilatampiw jikisïna, uka jilatajj nayrajj carcelan llawintatänwa ukatwa jupar uñtʼäna. Himmler chachajj qʼala aynachtʼatäsajj akham sasaw jilatar säna: “Bibliat Yatjjatir jaqe, ¿kunas jichhajj pasani?” sasa. Jilatasti akham sarakïnwa: “Jehová Diosan Testigonakapajj nayratpachaw nazi partidon chhaqtañapsa, nanakan libre jakasipjjañajsa yatipjjayäta” sasa. Himmler chachajj jan walinaksa Testigonakat parlkchïnjja, uka horasajj janiw kamsirjamäkänsa. Uka qhepatjja jupa pachpaw jiwayasïna. ¿Kunsa ukajj yatichistu? Bibliampita profecianakapampit yatjjatañajja, Jehová Diosar taqe chuyma confiyañatakiw yanaptʼistani. Jan walinakan uñjaskañäni ukhas Jehová Diosat janipun jitheqtañatakiw yanaptʼistani (2 Ped. 1:19-21).

18. Juan 6:67, 68 textorjamajja, ¿kunatsa ‘Diosan munañap sum uñtʼañasa, sum amuytʼañasa’ wali wakiskiri?

¹⁸ Taqeniruw munasiñampi uñjañasa, ukhamatwa cheqpach cristianötas uñachtʼayañäni. Ukatjja, ‘Diosan munañap sum uñtʼaña, sum amuytʼañaw’ wakisiraki (Filip. 1:9). Ukanak jan lurksna ukhajja, ‘jaqenakan kʼari yatichäwinakapampi, jan wali amtanakapampiw engañjayassna’, jupanakat yaqhepajj apostatanakawa (Efes. 4:14). Nayrïr patak maranakan discipulonakapat waljanejj Jesusar jaytanukupkäna ukhajja, apóstol Pedrojj jan pächasisaw Jesusar akham säna: “Jumaw wiñay jakañar apiri arunakanïtajja” sasa (Juan 6:67, 68 liytʼañataki). Pedrojj janis uka horasajj Jesusan arunakap sum amuykchïnjja, Cristot kunatï cheqäkäna taqe ukanakwa amuyäna, ukatwa jan jaytanukkänti. ‘Kuntï Bibliajj yatichki ukajj cheqäskapuniwa’ sasin taqe chuym confiyañäni ukhajja, jan walinakan uñjaskasas Jehová Diosar confiyaskakiñäniwa, yaqhanakarus ukham confiyapjjañapatakiw yanaptʼarakiñäni (2 Juan 1, 2).