1. «Һәгигәт» дејәндә нә нәзәрдә тутуруг?

«ҺӘГИГӘТИ неҹә өјрәнмисән?» «Һәгигәтдә бөјүмүсән?» «Нечә илдир һәгигәтдәсән?» Јәгин ки, сизә белә суаллар верибләр, ја да сиз кимәсә белә суаллар вермисиниз. «Һәгигәт» дејәндә нә нәзәрдә тутуруг? Адәтән биз етигадымызы, ибадәт тәрзимизи вә һәјат јолумузу тәсвир етмәк үчүн бу сөздән истифадә едирик. «Һәгигәтдә» олан инсанлар Мүгәддәс Китабдакы тәлимләри билир вә орада јазыланлара ујғун давраныр. Беләҹә, онлар јалан дини тәлимләрдән азад олур вә бу дүнјада гејри-камил инсанын сүрә биләҹәји ән ҝөзәл һәјаты сүрүр (Јәһ. 8:32).

2. Јәһја 13:34, 35 ајәләринә әсасән, инсаны һәгигәтә илк дәфә нә ҹәлб едә биләр?

² Сизи һәгигәтә илк нә ҹәлб едиб? Ола билсин, Јеһованын халгынын ҝөзәл давранышы (1 Бут. 2:12). Јахуд да онларда олан мәһәббәт. Чохлары илк дәфә ибадәт ҝөрүшүнә ҝәләндә онлара сәһнәдән дејиләнләрдән чох, мәһз бу мәһәббәт тәсир едиб. Бу, тәәҹҹүблү дејил, чүнки Иса Мәсиһ шаҝирдләринин бир-биринә олан мәһәббәтдән танынаҹагларыны демишди. (Јәһја 13:34, 35 ајәләрини охујун.) Амма мөһкәм иман саһиби олмағымыз үчүн бу, кифајәт дејил.

3. Иманымыз јалныз диндашларымызын мәһәббәтинә әсасланса, нә баш верә биләр?

³ Иманымыз јалныз Аллаһын халгынын тәзаһүр етдирдији мәсиһи мәһәббәтинә әсасланмамалыдыр. Нәјә ҝөрә? Тәсәввүр един ки, диндашыныз, бәлкә дә, ағсаггал вә ја өнҹүл ҹидди ҝүнаһ ишләјир. Јахуд һансыса баҹы вә ја гардаш сизин хәтринизә дәјир. Ја да кимсә дөнүк чыхыр, јолумузун  һәгигәт олмадығыны иддиа едир. Белә шејләр баш версә, сиз бүдрәјиб, Јеһоваја хидмәти дајандыраҹагсыныз? Мәғз будур: әҝәр иманыныз Јеһова илә мүнасибәтләриниз әсасында јох, сырф башгаларынын давранышы үзәриндә гурулубса, мөһкәм олмајаҹаг. Тикдијиниз ев, башга сөзлә, иманыныз јумшаг материаллардан, јәни тәкҹә һиссләрдән, емосијалардан ибарәт олмамалыдыр, әсаслы дәлил вә ҝүҹлү мәнтиг кими мөһкәм материаллардан да олмалыдыр. Сиз өзүнүз әмин олмалысыныз ки, Мүгәддәс Китабда Јеһова һаггында һәгигәт јазылыб (Ром. 12:2).

4. Мәтта 13:3—6, 20, 21 ајәләринә әсасән, бәзиләри иманлары сынан заман нә едиб?

⁴ Иса Мәсиһ демишди ки, бәзиләри һәгигәти севинҹлә гәбул едәҹәк, амма чәтинликләрлә үзләшәндә иманлары зәифләјәҹәк. (Мәтта 13:3—6, 20, 21 ајәләрини охујун.) Ола билсин, онлар Мәсиһин ардынҹа ҝедәнләрин чәтинликләрлә үзләшәҹәјини дәрк етмирдиләр (Мәт. 16:24). Јахуд елә дүшүнүрдүләр ки, мәсиһи олмагла дәрди-сәрсиз, немәтләрлә долу, шад-хүррәм өмүр сүрәҹәкләр. Амма јашадығымыз бу дүнјада проблемләрин олмамасы мүмкүн дејил. Истәнилән ан вәзијјәт дәјишә биләр вә севинҹимизи итирә биләрик (Зәб. 6:6; Ваиз 9:11).

5. Баҹы-гардашларымызын әксәријјәтинин һәгигәтдә олдугларына әминлији нәдән ҝөрүнүр?

⁵ Баҹы-гардашларымызын бөјүк әксәријјәти сүбут едир ки, һәгигәтдә олдугларына там әминдирләр. Чүнки диндашлары онларын хәтринә дәјәндә, јахуд мәсиһијә јарашмајан һәрәкәт едәндә иманлары сарсылмыр (Зәб. 119:165). Әксинә, һәр дәфә сынагла үзләшәндә онларын иманы даһа да мөһкәмләнир (Јаг. 1:2—4). Сиз белә мөһкәм имана неҹә саһиб ола биләрсиниз?

6. Биринҹи әсрдә јашајан мәсиһиләрин иманы нәјә әсасланырды?

⁶ Биринҹи әсрдә јашајан мәсиһиләрин иманы Мүгәддәс Јазылардан алдыглары биликләрә вә Иса Мәсиһин тәлимләринә, башга сөзлә, мүждәнин һәгигәтинә әсасланырды (Гал. 2:5). Бу һәгигәтә бүтүн мәсиһи тәлимләри, о ҹүмләдән Исанын фидјә гурбанлығы вә дирилмәси илә бағлы дәлилләр дахилдир. Һәвари Булус бу тәлимләрин һәгигәт олдуғуна там әмин иди. Буну һарадан билирик? Чүнки о, «Мүгәддәс Јазылардан дәлил-сүбут ҝәтирәрәк Мәсиһин әзијјәт чәкмәсинин, өлүб дирилмәсинин лазым олдуғуну» изаһ едирди (Һәв. 17:2, 3). Биринҹи әсрдә јашајан мәсиһиләр бу тәлимләри гәбул едирдиләр вә Аллаһын Кәламыны баша дүшмәк үчүн мүгәддәс руһун көмәјинә ҝүвәнирдиләр. Онлар бу тәлимләрин Мүгәддәс Јазылара әсасландығына шәхсән арашдырыб әмин олмушдулар (Һәв. 17:11, 12; Ибр. 5:14). Онларын иманы јалныз һиссләрә вә емосијалара әсасланмырды. Диндашлары илә вахт кечирмәк онлара хош олса да, Јеһоваја ибадәт етмәләринә сәбәб тәкҹә бу дејилди. Онлар «Аллаһы јахындан таныјараг» иманларыны мөһкәмләндирирдиләр (Кол. 1:9, 10).

7. Мүгәддәс Китаб һәгигәтләринә иманымыз нәјә гадирдир?

⁷ Аллаһын Кәламындакы һәгигәтләр дәјишмәздир (Зәб. 119:160). Бу һәгигәтләр диндашымыз хәтримизә дәјәндә вә ја ҹидди ҝүнаһ ишләјәндә дә дәјишмир. Биз чәтинликләрлә үзләшәндә дә бу һәгигәтләр дәјишмир. Она ҝөрә дә Мүгәддәс Китабдакы тәлимләрә јахшы бәләд олмалы вә онларын доғрулуғуна әмин олмалыјыг. Ҝәмини фыртына заманы мөһкәм сахлајан лөвбәр кими, бу һәгигәтләрә ҝүҹлү иманымыз  да бизә сынагларла үзләшәндә мөһкәм галмаға көмәк едәҹәк. Бәс һәгигәтдә олдуғунуза әминлијинизи неҹә мөһкәмләндирә биләрсиниз?

8. 2 Тимутијә 3:14, 15 ајәләринә әсасән, Тимути һәгигәтдә олдуғуна неҹә әмин олмушду?

⁸ Тимути һәгигәтдә олдуғуна әмин иди. Бәс о, бу гәнаәтә неҹә ҝәлмишди? (2 Тимутијә 3:14, 15 ајәләрини охујун.) Она Мүгәддәс Јазылары илк дәфә нәнәси вә анасы өјрәтмишди. Амма сөзсүз ки, о өзү дә Кәламы мүталиә етмәк үчүн вахт вә ҝүҹ сәрф едирди. Беләҹә, орада јазыланларын һәгигәт олдуғуна әмин олмушду. Сонралар Тимути, анасы вә нәнәси мәсиһи һәгигәтләрини өјрәндиләр. Шүбһә јохдур ки, Исанын давамчыларынын ҝөстәрдији мәһәббәт Тимутијә дәрин тәсир бағышламышды, иман баҹы-гардашлары илә вахт кечирмәк, онлара дәстәк олмаг она чох хош иди (Филип. 2:19, 20). Бунунла белә, о, иманынын тәмәлини инсанлара олан бағлылыг үзәриндә јох, «доғрулуғуна әмин олдуғу» вә ону Јеһоваја јахынлашдыран һәгигәтләр үзәриндә гурмушду. Сиз дә Мүгәддәс Китабы мүталиә едәрәк орада Јеһова һаггында јазыланларла бағлы мәнтиги нәтиҹәјә ҝәлмәлисиниз.

9. Һансы үч тәмәл һәгигәтин доғрулуғуна әмин олмалысыныз?

⁹ Бунун үчүн әввәлҹә ән азы үч тәмәл һәгигәтин доғрулуғуна әмин олмалысыныз. Биринҹиси, Јеһова Аллаһын һәр шејин Јараданы олдуғуна (Чых. 3:14, 15; Ибр. 3:4; Вәһј 4:11). Икинҹиси, Мүгәддәс Китабын Аллаһын бәшәријјәтә бәхш етдији Кәлам олдуғуна (2 Тим. 3:16, 17). Үчүнҹүсү, Јеһованын Она ибадәт етмәк үчүн Мәсиһин башчылығы алтында бир халг сечдијинә вә Јеһованын Шаһидләринин һәмин халг олдуғуна (Әшј. 43:10—12; Јәһ. 14:6; Һәв. 15:14). Бу тәмәл һәгигәтләрә әмин олмаг үчүн Мүгәддәс Китабы беш бармағыныз кими билмәјә еһтијаҹ јохдур. Мәгсәдиниз ағлынызы ишә салыб, һәгигәтдә олдуғунуза  әминлијинизи мөһкәмләндирмәк олмалыдыр (Ром. 12:1).

10. Һәгигәтләри билмәклә јанашы, нәји баҹармалыјыг?

¹⁰ Аллаһ, Мүгәддәс Китаб вә Аллаһын халгы илә бағлы һәгигәтләрә әмин олдугдан сонра сиз Мүгәддәс Китаб васитәсилә бу тәлимләри башгаларына өјрәтмәји баҹармалысыныз. Чүнки мәсиһиләр билдикләри һәгигәтләри онлара гулаг асанлара өјрәтмәк мәсулијјәти дашыјыр * (1 Тим. 4:16). Башгаларыны Кәламдакы һәгигәтләрә әмин етмәјә чалышаркән ејни заманда өзүмүзүн дә әминлијини артырмыш олуруг.

11. Һәвари Булус бир мүәллим кими бизә һансы нүмунәни гојуб?

¹¹ Һәвари Булус инсанлары өјрәдәркән «һәм Мусанын Төвратындан, һәм Пејғәмбәрләрин китабындан Иса һаггында данылмаз сүбутлар» ҝәтирирди (Һәв. 28:23). Биз һәвари Булусун нүмунәсини неҹә изләјә биләрик? Шаҝирдә садәҹә Мүгәддәс Китабда нә јазылдығыны демәк кифајәт дејил. Јеһова илә сых мүнасибәт гурмасы үчүн она көмәк етмәлијик ки, Мүгәддәс Китабдан өјрәндикләринин дәринлијинә варсын. Биз истәмирик, онлар һәгигәти бизим хәтримизә гәбул етсинләр. Әксинә, истәјирик ки, өјрәндикләринин Јеһова һаггында һәгигәт олдуғуну шәхсән арашдырыб дәрк етсинләр.

12, 13. Валидејнләр өвладларынын һәгигәтдә галмасына неҹә көмәк едә биләр?

¹² Әзиз валидејнләр, сөзсүз ки, сиз ушагларынызын һәгигәтдә галмасыны истәјирсиниз. Бәлкә дә, дүшүнүрсүнүз ки, ушагларынызын јығынҹагда јахшы достлары олса, иманлары мөһкәмләнәҹәк. Амма бу, кифајәт дејил. Онларын Јеһова илә фәрди мүнасибәти олмалыдыр вә Мүгәддәс Китабдакы тәлимләрин доғрулуғуна шәхсән әмин олмалыдырлар.

¹³ Валидејнләр ушагларына Аллаһ һаггында һәгигәтләри өјрәтмәк истәјирсә, Мүгәддәс Китабы јахшы мүталиә етмәкдә илк нөвбәдә өзләри нүмунә гојмалыдыр. Онлар өјрәндији һәгигәтләр һагда дәриндән дүшүнмәлидир. Сонра бунлары етмәји ушагларына да өјрәдә биләҹәкләр. Валидејнләр башгаларына өјрәтдикләри кими, ушагларына да мүталиә үчүн вәсаитләрдән истифадә етмәји өјрәтмәлидир. Беләҹә, өвладлары Јеһованы севәҹәк вә Онун бизә тәлим вермәк үчүн истифадә етдији садиг вә ағыллы нөкәрә етибар едәҹәк (Мәт. 24:45—47). Әзиз валидејнләр, ушагларыныза јалныз әсас тәлимләри өјрәтмәк јетәрли дејил. Ҝүҹлү имана саһиб олмалары үчүн онлара јашларына вә габилијјәтләринә  ујғун олараг «Аллаһын дәрин сирләрини» өјрәдин (1 Кор. 2:10).

14. Нәјә ҝөрә пејғәмбәрликләри арашдырмалыјыг? (« Бу пејғәмбәрликләри изаһ едә биләрсиниз?» адлы чәрчивәјә бахын.)

¹⁴ Пејғәмбәрликләр Мүгәддәс Китабын әсас мөвзуларындандыр вә Јеһоваја иманымызы мөһкәмләндирмәјә көмәк едир. Һансы пејғәмбәрликләр иманынызы мөһкәмләндириб? Ола билсин, ахырзаманла бағлы пејғәмбәрликләр (2 Тим. 3:1—5; Мәт. 24:3, 7). Бәс башга һансы? Мәсәлән, Дәнјал 2-ҹи вә ја 11-ҹи фәсилдәки пејғәмбәрликләрин кечмишдә вә инди неҹә јеринә јетдијини изаһ едә биләрсиниз? * Иманыныз тамамилә Мүгәддәс Китаба әсасланса, сарсылмаз олаҹаг. Ҝәлин Икинҹи Дүнја мүһарибәси заманы Алманијада олмазын тәгибләрә мәруз галан диндашларымызын нүмунәсинә бахаг. Һәмин вахт ахырзаманла бағлы пејғәмбәрликләр һәлә там ајдын олмаса да, онларын Аллаһын Кәламындан өјрәндикләринә ҝүҹлү иманы вар иди.

15—17. Насист режими заманы баҹы-гардашлара дөзмәјә нә көмәк етмишди?

¹⁵ Алманијада насист режими заманы минләрлә баҹы-гардашымыз һәбс дүшәрҝәләринә сүрҝүн олунмушду. Һитлер вә СС рејхсфүрери Һенрих Һиммлер Јеһованын Шаһидләринә нифрәт едирди. Бир баҹы гејд едир ки, Һиммлер һәбс дүшәрҝәсиндәки бир груп баҹыја белә демишди: «Ола билсин, сизин Јеһова ҝөјдә идарә едир, амма бурада, јердә биз идарә едирик! Сизә ҝөстәрәҹәјик, ким галаҹаг, сиз, јохса биз!» Јеһованын халгы нәјин сајәсиндә садиг гала билди?

¹⁶ Онлар билирдиләр ки, Аллаһын Падшаһлығы 1914-ҹү илдән идарә етмәјә башлајыб. Үзләшдикләри сәрт тәгибләр онлар үчүн ҝөзләнилмәз дејилди. Амма Јеһованын халгы әмин иди ки, һеч бир инсан һөкумәти Аллаһын нијјәтинин һәјата кечмәсинин гаршысыны ала билмәз. Һитлер пак ибадәтин көкүнү кәсә билмәзди, нә дә ки Аллаһын Падшаһлығындан  гүдрәтли һөкумәт гура билмәзди. Гардашларымыз әмин идиләр ки, ҝеҹ-тез Һитлерин һакимијјәти девриләҹәк.

¹⁷ Баҹы-гардашларымызын әминлији әбәс дејилди. Чох кечмәмиш насист режими дағылды, «бурада, јердә биз идарә едирик» сөзләрини дејән Һенрих Һиммлер исә ҹаныны гуртармаг үчүн гачды. Һәмин вахт о, кечмиш мәһбусла, Јеһованын Шаһиди олдуғуну билдији Лүбке гардашла гаршылашды. Һиммлер мәнән чөкмүш һалда гардашдан сорушду: «Һә, Мүгәддәс Китаб Тәдгигатчысы, нә баш верир?» Лүбке гардаш Һиммлерә изаһ етди ки, Јеһованын Шаһидләри там әмин идиләр ки, насист режими дағылаҹаг вә онлар гуртулаҹаг. Бир заманлар Јеһованын Шаһидләринин әлејһинә данышан Һиммлерин инди нитги гурумушду. Гыса мүддәт сонра о өзүнә гәсд етди. Бүтүн бунлардан һансы гәнаәтә ҝәлирик? Мүгәддәс Китабы, һәмчинин орадакы пејғәмбәрликләри арашдырмаг сарсылмаз имана саһиб олмағымыза вә сынаглар заманы мөһкәм галмағымыза көмәк едә биләр (2 Бут. 1:19—21).

18. Јәһја 6:67, 68 ајәләринә әсасән, нә үчүн биз дәгиг билијә вә там дәрракәјә јијәләнмәлијик?

¹⁸ Һәр биримиздә һәгиги мәсиһиләри таныдан мәһәббәт хүсусијјәти олмалыдыр. Амма биз һәмчинин дәгиг билијә вә там дәрракәјә дә јијәләнмәлијик (Филип. 1:9). Әкс һалда, инсанларын, о ҹүмләдән дөнүкләрин «фырылдағындан... доған һәр ҹүр тәлим, күләк кими, бизи ора-бура» апараҹаг (Ефес. 4:14). Ерамызын биринҹи әсриндә Исанын бир чох давамчысы онун ардынҹа ҝетмәјә сон гојанда һәвари Бутрус әминликлә Исаја деди ки, «әбәди һәјатын сөзләри сәндәдир». (Јәһја 6:67, 68 ајәләрини охујун.) Һәмин вахт Бутрус Исанын өјрәтдији һәр шеји ахыра гәдәр баша дүшмәсә дә, садиг галды, чүнки Исанын вәд олунмуш Мәсиһ олдуғуну дәрк етмишди. Сиз дә Мүгәддәс Китаб тәлимләринә әминлијинизи мөһкәмләндирсәниз, сынаглар заманы иманыныз сарсылмајаҹаг, һәмчинин башгаларына да мөһкәм иман саһиби олмаға көмәк едәҹәксиниз (2 Јәһ. 1, 2).