1. I buk ini le “maliga” i nkobla le kii?

“LELAA u bi yi maliga?” “Baa u bi néñél maliga?” “Nano a yé nwii nwañen le u yé maliga?” Bebek ba ma bat we mambadga mana, tole wemede u ma bat mo bôt bape. I buk ini le “maliga” i nkobla le kii? Di mbéna gwélél i buk i inyu pôdôl mam di nhémle, bibégés di nti Djob, ni bihiumul gwés. I bôt ba yé “maliga” ba gwé yi i Bibel, ba niñ ki inoñnaga ni matiñ ma Bibel. Inyu hala nyen ba ta ha bé i mok mi biniigana bi kwéha base, ba gwé ki niñ i nlôôha ilam kwéha mut i nla bana.​—Yôhanes 8:32.

2. Inoñnaga ni kaat Yôhanes 13:34, 35, jam li bisu li nla ôt mut maliga li yé kii?

² Jam li bisu li bi ôt we maliga li bé kii? Bebek bihiumul bilam bi bagwélél ba Yéhôva. (1 Pétrô 2:12) Tole gwéha u bi tehe ipôla yap. Ngandak bôt i nyimbe i gwéha i, ngéda ba nlo i likoda inyu ngélé yap bisu, bebek ba nok bé bañga jam mu minkwel mi ntina i hikôma, ndi i gwéha ba ntehe, ba nhôya bé yo. Hala a nhélés bé bés inyule Yésu a kal le, ba ga yil banigil bé inyu gwéha i yé ipôla yap. (Añ Yôhanes 13:34, 35.) Ndi di nlama boñ iloo ha, ibale di nsômbôl bana hémle i ngui.

3. Kii y’a bôña ibale hémle yés i umne ndik i gwéha i yé ipôla bagwélél ba Djob?

³ Hémle yés i nlama ndik bé ba i umne i gwéha i yé ipôla bagwélél ba Djob. Inyuki? Hégda le, mankéé  wada, bebek mañ tole nsañal, a nkwo i béba ikeñi. Tole w’a boñ lelaa ibale mankéé nu muda tole nu munlôm a ñunbaha we? W’a boñ lelaa ibale mankéé wada a nyila ntjañgbene maliga, a kahal kal le Mbôgi Yéhôva i gwé bé maliga? Ibale u ntehe i nya mam i, baa w’a baage, u waa gwélél Yéhôva? Yi le, ibale hémle yoñ i umne i mam u ntehe bôt bape ba mboñ, he bé i maada moñ ni Yéhôva, w’a bana bé hémle i ngui. Inyu bana hémle i ngui, u nlama ndik bé gwés Yéhôva ni bagwélél bé, u nlama ki bana njôôñ yigil Bibel, u boñok nyiña inyu ba nkwoog nkaa le u yé maliga. U nlama kwés wemede nkaa le i mam Bibel i niiga inyu Yéhôva, ma yé maliga.​—Rôma 12:2.

4. Inoñnaga ni Matéô 13:3-6, 20, 21, lelaa mandutu ma ntis ngim bôt?

⁴ Yésu a bi kal le bôt bahogi ba bé lama neebe maliga “ni maséé,” ndi i ngéda ndééñga i nlo, ba mbaage. (Añ Matéô 13:3-6, 20, 21.) Bebek ba bé yi bé le ba ga boma ngandak mandutu mu kii ba bi yoñ makidik i noñ Yésu. (Matéô 16:24) Tole ba bé hoñol le niñ i kristen i yé niñ i mbomboo, nyonok ni bisai, ngi ndutu yo ki yo. Ndi mut a nla bé keñgle mandutu munu i nkoñ ‘isi unu. Mam ma nla héñha mu niñ yés, ma tômbôs bés, di nimis ki maséé més.​—Tjémbi 6:7; Ñañal 9:11.

5. Lelaa libim li lôk kéé i bôda ni i bôlôm li ñunda le li yé nkwoog nkaa le li yé maliga?

⁵ Libim li lôk kéé i bôda ni i bôlôm li yé nkwoog nkaa le li yé maliga. Lelaa ba ñunda hala? I ngéda mankéé a ñunbaha bo, tole a mboñ béba ikeñi hala a ntômbôs bé hémle yap. (Tjémbi 119:165) Hiki ndutu ba mboma, i nti bo pôla i lédés hémle yap. (Yakôbô 1:2-4) Lelaa di nla boñ inyu bana i nya hémle i ngui i?

6. Kii i bé hikuu hi hémle i bikristen bi hiai hi bisu?

⁶ Hémle i banigil ba hiai hi bisu i bé i umne i Bitilna ni biniigana bi Yésu Kristô, hala wee “maliga ma ñañ nlam.” (Galatia 2:5) Mu maliga ma, di gwé biniigana gwobisôna bikristen bi nkôs, kiki bo sesema i Yésu ni bitugne gwé. Ñôma Paul a bé nkwoog nkaa le biniigana bi, bi yé maliga. Inyuki? Inyule a bé unda “ni njel Bitilna le i bé nseñ le Kristô a nok ndutu, a tuge ki ikété bawoga.” (Minson mi baôma 17:2, 3) Bikristen bi hiai hi bisu bi bi neebe biniigana bi, bi bé yéñ ki mahôla ma mbuu mpubi inyu nok Bañga i Djob. Ba bé boñ nyiña inyu ba nkwoog nkaa le i yom ba bé nigil i yé maliga. (Minson mi baôma 17:11, 12; Lôk Héber 5:14) Hémle yap i bé ndik bé i umne i gwéha inyu Yéhôva, to mu maséé ba bé nôgda i ngéda ba bé kodba ni lôk kéé yap, ndi i “bañga yi i Nyambe.”​—Kôlôsé 1:9, 10.

7. Ibale maliga mon ma yé hikuu hi hémle yés, hala a ga lona kii bés?

⁷ Maliga ma Bañga i Djob ma nhéñha bé. (Tjémbi 119:160) Kiki hihéga, ibale mankéé a ñunbaha bés tole a mboñ béba ikeñi, hala a nhéñha bé maliga. Ma nhéñha bé ki to i ngéda di mboma mandutu. Jon di nlama  tibil nigil Bibel, di kwés ki bésbomede nkaa le i mpot maliga. Ibale maliga mon ma yé hikuu hi hémle yés, di ga piñgla bé i ngéda manoodana, ndik kiki lipidô li mboñ le môñgô u pôgha bañ ngéda mbuk mbebi a nhôñ. Lelaa u nla kwés wemede nkaa le u yé maliga?

8. Kiki kaat 2 Timôtéô 3:14, 15 i ñunda, kii i bi kwés Timôtéô nkaa le i mam a bé nigil ma bé maliga?

⁸ Timôtéô a bé nkwoog nkaa le a bé maliga. Inyuki? (Añ 2 Timôtéô 3:14, 15.) Nyañ bo mbômbô yé ba bi niiga nye “Bitilna bipubi.” Ndi yak nyemede a bi boñ biliya bi ngui i nigil. Jon a bé ‘nkwoog nkaa’ le maliga ma. I mbus ngéda, Timôtéô bo nyañ ni mbômbô yé ba bi yila bikristen. Ibabé pééna, gwéha i i bé ipôla banigil ba Yésu i bi tihba Timôtéô, a bé ki maséé i kodba ni lôk kéé yé i bôda ni i bôlôm ni i hôla bo. (Filipi 2:19, 20) Ndi hémle yé i bé bé i umne mu gwéha a bééna inyu lôk kéé yé, i maliga a bi nigil, a hémle ki, ma bi hôla nye i ba liwanda li Yéhôva. Yak we u nla yoñ ngéda i hek pék mu mam u nigil inyu Yéhôva, ngéda u ñañ Bibel.

9. U nlama ba nkwoog nkaa ni mambe mam maa?

⁹ Inyu bôdôl, u nlama ba nkwoog nkaa ni mana mam maa. Li bisu, u nlama ba nkwoog nkaa le Yéhôva Nyambe nyen a yé Nhek mam momasôna. (Manyodi 3:14, 15; Lôk Héber 3:4; Masoola 4:11) Li nyônôs iba, u nlama kwés wemede nkaa le ni ngui i Djob nyen Bibel i bi tilba inyu bôt ba binam. (2 Timôtéô 3:16, 17) Li nyônôs aa, u nlama ba nkwoog nkaa le Yéhôva a gwé ngim ntôñ i i ngwélél nye hana ’isi, le Kristô nyen a ñéga wo, ni le won u yé ntôñ u Mbôgi Yéhôva. (Yésaya 43:10-12; Yôhanes 14:6; Minson  mi baôma 15:14) U gwé bé ngôñ i nigil Bibel yosôna inyu ba nkwoog nkaa ni i mam maa di ntip sima. U nlama gwélél ‘ngap yoñ i hek pék’ inyu kwés wemede nkaa le u yé maliga.​—Rôma 12:1.

10. I ngéda di nyi maliga, kii ipe di nlama boñ?

¹⁰ I ngéda u mal yi maliga inyu Djob, u yi Bibel ni ntôñ u Djob, u nlama gwélél Bitilna inyu kwés bôt bape nkaa le i mam u nigil ma yé maliga. Inyuki? Inyule bikristen bi nlama niiga i bôt ba yé bebee i emble bo maliga. * (1 Timôtéô 4:16) Kiki di nke ni bisu i kwés bo nkaa le Bibel i mpot maliga, hala nyen bésbomede di ga kônde lédés hémle yés.

11. Imbe ndémbél ñôma Paul a bi yigle bés?

¹¹ I ngéda ñôma Paul a bé niiga bôt, a bé tinde bo “i hémle Yésu, a gwéélak mbén Môsi ni bitilna bi Bapôdôl.” (Minson mi baôma 28:23) Lelaa di nla nigle Paul i ngéda di niiga bôt bape maliga? Di nlama ndik bé kal bo i mam Bibel i niiga. Ndi di nlama hôla bo i ôt pék mu Bitilna inyu ke ni bisu i kôôge Yéhôva bebee. Njômbi yés i yé le ba neebe maliga, he inyu bé le ba nti bés lipém, ndi inyule ba yé nkwoog nkaa le i mam ba nigil inyu Djob ma yé maliga.

12-13. Lelaa bagwal ba nla hôla bon bap i yén maliga?

¹² A bagwal, ibabé pééna ni ngwés le bon banan ba yén maliga. Bebek ni nhoñol le ibale ba gwé bañga mawanda ikété ntôñ, ba ga hol i pes mbuu. Ndi ibale ni nsômbôl le bon banan ba ba nkwoog nkaa le i yom ba nigil i yé maliga, ni nlama ndigi bé yiñil bo bañga mawanda. Ba nlama bana maada ma bas bas ni Djob, ba nlama ki ba nkwoog nkaa le Bibel i mpot maliga.

¹³ Ibale bagwal ba nsômbôl niiga bon bap maliga, bomede ba nlama bana lem i nigil Bibel, bañga liniglak. Ba nlama yoñ ngéda i ôt pék mu mam ba nigil. Ibale ba mboñ hala, ba ga hôla yak bon bap i nigil kiki bo. Ba nlama hôla bon bap i gwélél bisélél inyu boñ nyiña, nlélém kiki ba nhôla banigil Bibel. Ha nyen ba ga pam i hôla bon bap i gwés Yéhôva, ni i neebe le a ngwélél nkol u maliga ni u  pék inyu ti bés bijek bi mbuu. (Matéô 24:45-47) A bagwal, ni nlama ndik bé niiga bon banan biniigana bi bisu bi Bibel. Ni hôla bo i bana hémle i ngui mu kiki ni niiga bo “ndip mam i Nyambe” inoñnaga ni nwii nwap, ni ngap yap.​—1 Korintô 2:10.

14. Inyuki di nlama nigil mbañ i Bibel? (Béñge minkéñék mi matila le “ Baa u yé le u toñol i mbañ ini?”)

¹⁴ Mbañ i Bibel i yé nseñ ngandak inyu lédés hémle yés. Imbe mbañ i ma lédés hémle yoñ? U yé le u sima mbañ i mpôdôl “dilo di nsôk.” (2 Timôtéô 3:1-5; Matéô 24:3, 7 ) Ndi imbe mbañ ipe i i bi yon i nla lédés hémle yoñ? Kiki hihéga, baa u yé le u toñle mut lelaa mbañ i i yé i kaat Daniel pes 2 tole i i yé kaat Daniel pes 11 i bi bôdôl yon ni lelaa i nke ni bisu i yon? * Ibale hémle yoñ i umne i Bibel, y’a piñgla bé kekikel. Di yoñ hihéga hi lôk kéé yés i i bi hônba ndééñga i loñ Jaman i Gwét bi Ntôla II. To hala kiki ba bi tibil bé nok mbañ inyu dilo di nsôk, ba bééna hémle i ngui.

15-17. Lelaa yigil i Bibel i bi lédés bilôk bikéé i ngéda Nazi i bé tééñga bo?

¹⁵ Isi énél i Nazi i loñ Jaman, ba bi om dikôô di bilôk bikéé bi bôlôm ni bi bôda i mok mi mbanda. Hitler ni ngomin yé yada ikeñi le Heinrich Himmler ba bé oo Mbôgi Yéhôva. Sita yada i bi kal le Himmler a bi kal ngim bisita i mok mi mbanda le: “Yéhôva nan, a ñane nyoo i ngii, ndi hana ’isi bés bon di nkom! Di ga tehe i bet ba ga hoo waa ipôla bés ni bé!” Kii i bi hôla bagwélél ba Yéhôva i téñbe?

¹⁶ Banigil Bibel ba, ba bé yi le Ane Djob i bi bôdôl énél i nwii 1914. I ngolba ikeñi ba bé boma i bé hélés bé bo. Ndi bagwélél ba Yéhôva ba bé yi le énél i bôt ba binam yo ki yo i nla bé  sôña Djob i yônôs sômbôl yé. Hitler a bé bé le a mélés bibégés bipubi hana ’isi, to téé ngim ane i i bé le i bana ngui iloo Ane Djob. Lôk kéé yés i bé yi ntiik le, to kii leñek, énél i Hitler i ga mal.

¹⁷ I jam bilôk bikéé bini bi bé hémle i bé toi maliga. I mbus ndék ngéda, énél i Nazi i bi kwo, Heinrich Himmler nu a bi kal le “hana ’isi bés bon di nkom” a bi so. Mu kiki a bé ke ngwéé, a bi boma mankéé Lübke, a yimbe nye. Himmler a bi lôôha wo nyuu, a bat mankéé Lübke le: “A Nnigil Bibel, kii y’a boña nano?” Mankéé Lübke a bi kal Himmler le Mbôgi Yéhôva i bé yi ntiik le énél i Hitler i ga kwo, ni le bagwélél ba Yéhôva ba ga pam i mok mi mbanda. Himmler nu a bi lôôha ndegle Mbôgi Yéhôva a bi yila mbuk. Ndék ngéda i mbus, a nitba. Kii hala a niiga bés? Ibale di nigil Bibel, yak mbañ yé, hémle yés i ga piñgla bé, di ga bôdôl Djob ñem to ikété njiiha.​—2 Pétrô 1:19-21.

18. Kiki kaat Yôhanes 6:67, 68 i ñunda, inyuki di nlama bana “bañga yi ni nogna i yôni” Paul a bi pôdôl?

¹⁸ Hiki wada wés a nlama unda gwéha, i i yé yimbne i bañga bikristen. Ndi di nlama ki bana “bañga yi ni nogna i yôni.” (Filipi 1:9) Ibale hala bé, i ga ba ntombok jam le ‘hiki mbebi biniigana i kena bés bahoma bahoma ni njel mandon ma bôt ba binam,’ yak ni batjañgbene maliga. (Éfésô 4:14) I hiai hi bisu, ngéda ngandak banigil ba bi waa noñ Yésu, ñôma Pétrô a bi unda le a gwé hémle i ngui i ngéda a kal Yésu le “u gwé bibañga bi niñ boga.” (Añ Yôhanes 6:67, 68.) To hala kiki Pétrô a bi nok bé mam momasôna mu bibañga bi Yésu, a bi téñbe ni nye inyule a bé yi le maliga ma. Yak we u nla kwés wemede nkaa le i yom u nigil i yé maliga. Ibale u mboñ hala, w’a piñgla bé i ngéda manoodana, w’a hôla ki bôt bape i bana hémle i ngui.​—2 Yôhanes 1, 2.