1. Tikki tadok hata “hasittongan”, aha do lapatan ni i?

“SONGON dia do hamu mandapot hasittongan?” “Sian na gelleng do hamu di hasittongan?” “Nga sadia leleng hamu di hasittongan?” Hea do ra adong na manukkun songon i tu hamu. Manang hamu pe hea do ra manukkun songon i tu halak na asing. Aha do lapatan ni hata “hasittongan” disi? Biasana, tikki tadok hata “hasittongan”, na manaringoti haporseaotta, ulaon panombaonta, dohot parngoluotta do hita disi. Akka halak na di “hasittongan” nungnga mamboto aha na diajarhon Bibel, jala diulahon nasida do akka prinsip ni Bibel di parngoluonna. Hasilna, dang diihutton nasida be ajaran ni agama palsu. Jala boi ma nasida marlas ni roha di parngoluonna nang pe mangolu di portibi ni Sibolis on.​—Joh. 8:32.

2. Hombar tu Johannes 13:34, 35, aha do na mambahen lomo roha ni sasahalak tu hasittongan?

² Aha do na mambahen lomo rohamuna tu hasittongan? Ala diida hamu do ra burju-burju naposo ni Jahowa. (1 Ptr. 2:12) Manang ala diida hamu do holong na dipatudu nasida. Godang halak na parjolo sahali ro tu parpunguan mandok, ummura do diingot nasida holong na dipatudu ni Sitindangi Ni Jahowa sian aha na diulas di parpunguan i. Dang pola longang rohatta disi. Jesus pe mandok pittor boi do ditanda halak akka siseanna ala masihaholongan nasida. (Jaha Johannes 13:34, 35.) Alai asa lam togu haporseaotta, adong do muse na ikkon taulahon.

3. Aha do na masa molo tajalo hasittongan holan alani holong na dipatudu akka dongan?

³ Dang boi togu haporseaotta molo holan alani holong na dipatudu akka donganta. Boasa? Alana nasida pe boi do mangulahon dosa, termasuk ma i akka sintua dohot perintis. Manang  olo do ra adong dongan na mambahen haccit rohamuna. Manang adong do muse na ujungna gabe murtad. Didok nasida, na taparsiajari saleleng on dang tutu i hasittongan. Molo i do na masa, gabe tartuktuk do hamu, jala dang olo be hamu manomba Jahowa? Pikkirhon ma, molo porsea hamu tu Debata holan alani parange ni halak, dang alani parale-aleonmuna tu Debata, dang boi togu haporseaonmuna i. Memang, molo tahaholongi Jahowa dohot akka donganta, boi do gabe lam togu haporseaotta. Alai dang cukup holan i. Ikkon takkas do taparsiajari Bibel, taattusi aha na taparsiajari i, jala tabahen ma riset asa lam pos rohatta tu hasittongan taringot Jahowa. Ikkon hita sandiri do na mambuktihon memang tutu do Bibel i marisi hasittongan taringot Jahowa.​—Rom 12:2.

4. Hombar tu Mateus 13:3-6, 20, 21, aha do na masa tu piga-piga halak tikki masa sitaonon?

⁴ Didok Jesus adong do piga-piga halak na manjalo hasittongan “di bagasan las ni roha”, alai ujungna gabe gale do haporseaonna tikki adong sitaonon. (Jaha Mateus 13:3-6, 20, 21.) Dang diattusi nasida ra molo halak na mangihutton Jesus ikkon mangadopi sitaonon dohot hasusaan. (Mat. 16:24) Manang dirippu nasida dang adong be sitaonon molo nungnga gabe halak Kristen, ala sai dipasiding Debata do sude sitaonon ni nasida. Alai saleleng di portibi on dope hita, sai adong do sitaonon. Boi do margatti-gatti sitaonon di parngoluotta, jala boi do i mambahen gabe dang marlas ni roha be hita.​—Ps. 6:7; Pjm. 9:11.

5. Songon dia akka donganta patuduhon na pos do roha ni nasida tu hasittongan?

⁵ Godang do akka donganta na patuduhon pos do rohana tu hasittongan. Sian dia boi taboto? Dang gabe gale nasida tikki adong dongan sahaporseaon na mambahen haccit roha ni nasida manang mangulahon dosa. (Ps. 119:165) Tikki masa pe sitaonon, lam togu do haporseaonna, dang na gabe gale. (Jak. 1:2-4) Songon dia ma asa boi songon i togu ni haporseaonmuna?

6. Di abad na parjolo, songon dia akka sisean ni Jesus patoguhon haporseaonna?

⁶ Di abad na parjolo, dipatogu akka sisean ni Jesus do haporseaonna marhite parbinotoan na sian Bibel, dohot akka na diajarhon Jesus, i ma “hasintongan ni barita na uli”. (Gal. 2:5) Lapatan ni hasittongan i, i ma sude ajaran na dihaporseai halak Kristen, tarmasuk ma ajaran taringot Jesus na mangalehon diri gabe tobusan jala dipahehe. Pos do roha ni si Paulus na tutu do sude ajaran taringot i. Boasa? Alana diparsiajari ibana do Bibel, jala dibuktihon ibana do “marhite angka ayat, na ingkon marsitaonon Kristus i jala dipahehe sian na mate”. (Ul. 17:2, 3) Porsea do akka sisean di abad na parjolo tu ajaran i. Jala diasahon nasida do tondi parbadia asa diurupi nasida mangattusi Hata ni Debata. Nasida sandiri do na mangalului hatorangan lao mambuktihon na tutu do ajaran i sian Bibel. (Ul. 17:11, 12; Heb. 5:14) Jadi, haporseaon ni nasida tu Jahowa dang holan alani pakkilalaanna sambing, jala dang holan ala las ni rohana marsaor dohot akka dongan sahaporseaon. Alai gabe togu do haporseaon ni nasida alani ‘parbinotoan na bagas taringot tu Debata’.​—Kol. 1:9, 10.

7. Aha do labana molo pos rohatta tu ajaran ni Bibel?

⁷ Dang boi muba hasittongan na sian Bibel. (Ps. 119:160) Dang muba i tikki adong dongan sahaporseaotta na mangulahon dosa. Jala dang muba i tikki adong masa sitaonon di ngolutta. Jadi, ikkon takkas do taboto akka ajaran na adong di Bibel, jala ikkon pos do  rohatta na tutu do i hasittongan. Molo pos do rohatta tu ajaran na adong di Bibel, boi ma hita toktong marsihohot tu Jahowa tikki masa sitaonon. Jadi songon dia ma asa lam pos rohamuna tu hasittongan?

8. Songon na disurat di 2 Timoteus 3:14, 15, boasa pos roha ni si Timoteus na tutu do hasittongan na disurat di Bibel i?

⁸ Pos do roha ni si Timoteus na tutu do hasittongan na adong di Bibel i. Boasa? (Jaha 2 Timoteus 3:14, 15.) Diajari omakna dohot oppungna do ibana taringot Bibel. Jala dilehon ibana do tikki dohot gogona lao mamparsiajari i. Alani i do, gabe ‘pos rohana’ na tutu do Bibel i hasittongan. Ujungna, rap ma si Timoteus, dohot omakna, dohot oppungna mamparsiajari ajaran ni Jesus. Tottu, las do roha ni si Timoteus mangida holong na dipatudu akka sisean ni Jesus, jala las do rohana marsaor dohot akka dongan di huria. (Plp. 2:19, 20) Alai, dang gabe tubu haporseaonna holan alani las rohana mangida akka donganna. Ala pos do rohana tu ajaran sian Bibel na diparsiajari ibana saleleng on, gabe lomo ma rohana marale-ale tu Jahowa. Jadi hamu pe ikkon diparsiajari hamu do Bibel, jala ikkon takkas do diboto hamu aha na diajarhon taringot Jahowa sian i.

9. Aha do tolu ajaran sian Bibel na ikkon dihaporseai hamu?

⁹ Pinomatna adong tolu ajaran ni Bibel na ikkon dihaporseai hamu. Na parjolo, ikkon pos do rohamu Jahowa do Debata na manoppa saluhutna. (2 Mus. 3:14, 15; Heb. 3:4; Pgk. 4:11) Na paduahon, ikkon pos do rohamu molo Bibel i, i ma surat na badia na dilehon Debata tu akka jolma. (2 Tim. 3:16, 17) Jala na patoluhon, ikkon pos do rohamu dibahen Jahowa do sada organisasi na diuluhon Jesus Kristus, i ma punguan ni akka halak na manomba Jahowa. Jala digoari ma nasida Sitindangi Ni Jahowa. (Jes. 43:10-12; Joh. 14:6; Ul. 15:14) Asa boi pos rohamu tu hasittongan, dang ikkon diboto hamu sude isi ni Bibel. Na urrikkot, ikkon pos do rohamu tu hasittongan “sian nasa pingkiranmuna”.​—Rom 12:1.

10. Asing ni mamboto hasittongan, aha do na ikkon taulahon?

¹⁰ Molo pos do rohamuna tu hasittongan taringot Debata, Bibel, dohot akka naposo ni Debata, pakke hamu ma Bibel lao mambuktihon tu akka halak na tutu do hasittongan taringot na tolu i. Boasa? Alana halak Kristen do hita, jadi adong do tanggung jawabta lao mangajarhon hasittongan na taparsiajari i tu halak na asing. * (1 Tim. 4:16) Jala molo taurupi akka halak asa porsea tu hasittongan ni Bibel, gabe lam pos ma rohatta tu hasittongan i.

11. Songon dia do si Paulus mangajari akka halak, jala aha do na boi tatiru sian ibana?

¹¹ Tikki diajari si Paulus akka halak, “dipatorang ibana ma sian Patik ni si Musa dohot na Sinurat ni Angka Panurirang asa porsea nasida tu Jesus”. (Ul. 28:23) Songon dia hita maniru si Paulus tikki mangajarhon hasittongan tu halak na asing? Dang cukup holan tapaboa aha na diajarhon Bibel. Ikkon taurupi do parsiajar Bibelta asa mangarimangi aha na diparsiajari nasida sian Bibel, asa lam jonok nasida tu Jahowa. Lomo do rohatta asa dijalo nasida hasittongan i, dang holan ala diargai nasida hita. Alai ala nasida sandiri do na mambuktihon, na tutu do aha na diparsiajari nasida saleleng on taringot Debata Jahowa.

12-13. Songon dia natua-tua boi mangurupi ianakkonna asa toktong di hasittongan?

¹² Akka natua-tua, tottu lomo do rohamuna molo toktong ianakkonmuna di hasittongan. Dirippu hamu do ra, molo marale-ale nasida dohot akka dongan di huria, gabe togu ma haporseaon ni nasida. Alai asa pos roha ni nasida tu hasittongan, dang cukup holan marale-ale dohot akka dongan di huria. Ikkon marale-ale do nasida tu Debata, jala ikkon pos do roha ni nasida tu hasittongan na adong di Bibel.

¹³ Asa boi natua-tua mangajarhon hasittongan taringot Debata tu ianakkonna, nasida pe ikkon ringgas do mamparsiajari Bibel, asa nasida ma na gabe sitiruon di ianakkonna. Ikkon dilehon nasida do tikki lao mangarimangi aha na diparsiajari nasida. Dung i, boi ma diajari nasida ianakkonna lao mangulahon na sarupa. Ikkon diajari natua-tua do ianakkonna lao mamakke akka alat lao mangariset, songon tikki nasida mangajari parsiajar Bibel ni nasida. Molo diulahon nasida i, gabe diurupi ma akka ianakkonna asa makkaholongi Jahowa. Jala mangurupi ianakkonna asa porsea na dipakke Jahowa do “naposo haposan jala na marbisuk” lao mangajari akka naposona. (Mat. 24:45-47) Akka natua-tua, unang ma holan ajaran dasar sian Bibel na diajarhon hamu tu ianakkonmuna. Urupi hamu ma nasida patoguhon haporseaonna. Ajari ma nasida taringot “angka na  buni di bagasan diri ni Debata”. Jala sesuaihon ma caramuna hombar tu umur dohot kemampuan ni nasida.​—1 Kor. 2:10.

14. Boasa hita ikkon marsiajar taringot surirang na adong di Bibel? (Ida ma kotak “ Boi do Dipatorang Hamu Akka Surirang on?”)

¹⁴ Akka surirang na adong di Bibel pe boi do patoguhon haporseaotta tu Jahowa. Surirang taringot aha do na patoguhon haporseaonmuna? Diingot hamu do ra surirang taringot “ari parpudi”. (2 Tim. 3:1-5; Mat. 24:3, 7) Alai songon dia akka surirang na asing naung digohi boi patoguhon haporseaonmuna? Misalna, boi do dipatorang hamu songon dia surirang di Daniel 2 dohot 11 naung digohi? * Boi do gabe togu haporseaonmuna molo hombar do i tu aha na diparsiajari hamu sian Bibel. Parrohahon ma pengalaman ni akka donganta na hea dianiaya di Jerman tikki Porang Dunia II. Nang pe dang takkas dope pangattusion ni nasida tu surirang ni Bibel taringot ari parpudi, alai togu do haporseaon ni nasida taringot Hata ni Debata.

15-17. Songon dia do akka donganta na dianiaya Nazi boi toktong togu ala mamparsiajari Bibel?

¹⁵ Tikki Nazi na mangarajai Jerman najolo, adong marribu donganta bawa dohot borua na dipenjarahon di kamp konsentrasi. Sogo do roha ni si Hitler dohot Komandan SS si Heinrich Himmler tu Sitindangi Ni Jahowa. Menurut sahalak donganta borua, tikki di kamp konsentrasi hea do didokkon si Himmler tu akka donganta borua na disi: “Jahowamuna i do na mangarajai surgo, alai hami do na mangarajai portibi on! Tabereng ma annon ise na monang, hamu do, manang hami!” Aha do na mangurupi akka naposo ni Jahowa di tikki i asa toktong setia?

¹⁶ Diboto akka parsiajar Bibel i do, nungnga mamaretta be Harajaon ni Debata taon 1914. Dang pola songgot roha ni nasida tikki dianiaya nasida. Alai pos do roha ni nasida, dang adong pamarettaon ni jolma na boi mangambatti sakkap ni Debata. Dang boi si Hitler mangaripasson  sude naposo ni Debata, manang mambahen pamarettaon na umgogo sian Harajaon ni Debata. Pos do roha ni akka donganta i na lao hancur do pamarettaon ni si Hitler.

¹⁷ Toho do hape aha na dihaporseai akka donganta i. Ujungna, hancur do pamarettaon ni Nazi, jala lari ma si Heinrich Himmler. Hape ibana do najolo na mandok, “Hami do na mangarajai portibi on!” Di sada tikki, pajumpang ma ibana dohot donganta si Lübke. Nungnga ditanda ibana donganta on tikki dipenjara. Ala nga marsak hian si Himmler, disukkun ibana ma tu donganta si Lübke: “E parsiajar Bibel, aha do na masa saonari?” Dipatorang donganta si Lübke ma, nungnga diboto Sitindangi Ni Jahowa na lao hancur do pamarettaon ni Nazi jala lao dipalua do nasida. Pittor sip ma si Himmler. Hape najolo ibana do na sai paroa-roahon Sitindangi Ni Jahowa. Dang leleng dukkon i, bunu diri ma ibana. Aha ma parsiajaranna? Molo taparsiajari Bibel termasuk ma akka surirangna, boi do i mambahen lam togu haporseaotta tu Debata jala toktong ma hita setia tikki dianiaya.​—2 Ptr. 1:19-21.

18. Songon na disurat di Johannes 6:67, 68, boasa porlu tadapot ‘parbinotoan dohot pangantusion na bagas’?

¹⁸ Sude hita ikkon patuduhon holong, alana i do tanda ni halak Kristen. Alai porlu do muse tadapot ‘parbinotoan dohot pangantusion na bagas’. (Plp. 1:9) Molo dang taulahon i, boi do gabe taihutton “ajaran ni angka halak na manipu marhite mangoto-otoi”, tarmasuk ma halak na murtad. (Eps. 4:14) Nang pe godang akka sisean di abad na parjolo na so olo be mangihutton Jesus, alai toktong do apostel Petrus setia. Pos do rohana, “hata hangoluan na saleleng ni lelengna” do sude na diajarhon Jesus. (Jaha Johannes 6:67, 68.) Nang pe di tikki i, dang diattusi si Petrus sude na dihatahon Jesus, alai toktong do ibana setia ala diattusi ibana do hasittongan taringot Kristus. Jadi hamu pe, boi do dipatogu hamu haporseaonmuna tu akka na diajarhon Bibel. Molo diulahon hamu i, gabe toktong ma togu haporseaonmuna manang aha pe na masa. Jala boi ma diurupi hamu halak na asing lao patoguhon haporseaon ni nasida.​—2 Joh. 1, 2.