1. ?“Trutok” i minim wanem?

“?YU YU kasem trutok olsem wanem?” “?Yu gruap long trutok?” “?Hamas yia nao yu stap long trutok?” Ating ol narafala oli askem ol kwestin ya long yu, mo maet yu tu yu askem long ol narafala. ?Be “trutok” i minim wanem? Plante taem yumi talem tok ya blong minim bilif, wosip, mo fasin blong laef blong yumi. Ol man we oli “stap long trutok” oli save samting we Baebol i tijim mo oli folem long laef blong olgeta. Nao oli kam fri long ol tijing blong ol giaman skul mo oli gat wan gudfala laef, nating se oli sinman.—Jon 8:32.

2. Folem Jon 13:34, 35, ?wanem i pulum plante man oli kam long trutok?

² ?Wanem i pulum yu yu kam long trutok? Maet hemia gudfala fasin blong ol man blong God. (1 Pita 2:12) Maet lav we oli soemaot i pulum yu. Fastaem we ol man oli kam long miting, oli makem lav ya moa i bitim ol tok we oli harem, mo oli neva fogetem. Yumi no sapraes long samting ya, from we Jisas i talem se ol man bambae oli luksave ol disaepol blong hem from we oli lavlavem olgeta. (Ridim Jon 13:34, 35.) Be hemia nomo i no naf blong mekem bilif blong yumi i strong.

3. ?Wanem i save hapen sipos bilif blong yumi i stanap nomo long lav we ol brata mo sista oli soemaot?

³ Bilif blong yumi i no save stanap nomo long lav we ol man blong God oli soemaot. ?From wanem? Traem tingbaot sipos wan long kongregesen i mekem wan bigfala sin. Maet hem i wan elda o wan paenia. Maet wan brata o  sista i mekem yu yu harem nogud o i kam wan man blong apostasi, nao i talem se yumi no gat trutok. Sipos bilif blong yumi i dipen nomo long samting we ol narafala oli mekem, i isi blong yumi lego Jehova. Taswe, blong yumi gat strong bilif, yumi mas fren gud wetem Jehova. Bilif i olsem wan haos. Sipos ol samting we yu yusum blong wokem haos ya oli no strong, haos ya i save foldaon. Taswe, bilif blong yumi i no save stanap long ol filing nomo, be yumi mas stadi gud mo mekem risej. Yumi mas pruvum se Baebol i tijim trutok long saed blong Jehova.—Rom 12:2.

4. Folem Matiu 13:3-6, 20, 21, ?samfala oli mekem wanem taem oli kasem hadtaem?

⁴ Jisas i talem se samfala oli “glad tumas” long trutok, be taem oli kasem hadtaem, bilif blong olgeta i kam slak. (Ridim Matiu 13:3-6, 20, 21.) Maet oli no kasem save se man we i biaenem Jisas bambae i kasem hadtaem. (Mat. 16:24) Maet oli ting se ol Kristin bambae oli kasem ol blesing nomo. Be long wol tede, i gat plante trabol. Ol samting long laef blong yumi oli save jenis, nao yumi no moa glad.—Sam 6:6; Pri. 9:11.

5. ?Wanem i soemaot se bighaf blong ol brata mo sista oli bilif strong se oli gat trutok?

⁵ Bighaf blong ol brata mo sista oli bilif strong se oli gat trutok. ?From wanem yumi talem olsem? From we, nating se wan long kongregesen i mekem oli harem nogud, o i mekem wan bigfala sin, be bilif blong olgeta i stap strong. (Sam 119:165) Taem wan samting i traem olgeta, bilif blong olgeta i no kam slak, be i kam strong moa. (Jem. 1:2-4) ?Olsem wanem blong mekem bilif blong yu i strong olsem?

6. ?Bilif blong ol fas Kristin i stanap long wanem?

⁶ Bilif blong ol fas Kristin i stanap long ol save blong Baebol mo ol tijing blong Jisas Kraes, hemia “trutok we i stap long gud nius.” (Gal. 2:5) Trutok ya i minim olgeta tijing we ol Kristin oli bilif long olgeta, olsem tijing ya se Jisas i ded blong pemaot yumi mo i laef bakegen. Aposol Pol i bilif strong se ol tijing ya oli tru. ?From wanem yumi talem olsem? From we hem i ‘yusum Baebol blong eksplenem mo pruvum se Kraes i mas safa mo biaen i mas laef bakegen.’ (Wok 17:2, 3) Ol fas Kristin oli glad long ol tijing ya mo oli dipen long tabu spirit, blong i givhan long olgeta blong kasem save long Tok blong God. Oli stadigud blong pruvum se ol tijing ya oli kamaot long Baebol. (Wok 17:11, 12; Hib. 5:14) Bilif blong olgeta i no stanap nomo long ol filing blong olgeta, mo oli no wosipim Jehova nomo from we oli haremgud blong joen wetem ol narafala long kongregesen. Be bilif blong olgeta i stanap long “stret save” long God.—Kol. 1:9, 10.

7. ?Olsem wanem bilif long ol trutok blong Baebol i halpem yumi?

⁷ Ol trutok long Baebol oli no save jenis. (Sam 119:160) Taem wan Kristin i mekem i nogud long yumi o i mekem wan bigfala sin, ol trutok ya oli no jenis. Mo oli no jenis taem yumi kasem trabol tu. Taswe, yumi mas save gud ol tijing blong Baebol mo bilif strong se oli tru. Bilif we yumi gat long ol trutok ya bambae i halpem yumi, blong yumi stanap strong taem yumi kasem trabol, olsem wan angka we i holem bot taem solwota i raf.  ?Olsem wanem blong bilif strong se yu gat trutok?

8. Folem 2 Timoti 3:14, 15, ?from wanem Timoti i bilif strong se samting we hem i lanem i tru?

⁸ Timoti i bilif strong se samting we hem i lanem i tru. ?From wanem? (Ridim 2 Timoti 3:14, 15.) Fastaem, mama mo bubu woman blong hem oli tijim hem long “ol tabu tok blong Baebol.” Be yumi sua se hem tu i yusum taem mo paoa blong hem blong i stadi long ol tok ya. From samting ya, hem i “bilif long olgeta.” Biaen, Timoti, mama blong hem, mo bubu woman blong hem, oli lanem ol tijing blong ol Kristin. Ating Timoti i glad tumas blong luk lav we ol disaepol blong Jisas oli soemaot, mo hem i wantem joen wetem olgeta mo givhan long ol brata mo sista long kongregesen. (Fil. 2:19, 20) Nating se i olsem, bilif blong hem i no stanap long filing we hem i gat long ol narafala, be long ol tijing blong Baebol we oli mekem hem i kam klosap moa long Jehova. Yu tu yu mas stadi long Baebol blong pruvum se samting we yu lanem long saed blong Jehova i tru.

9. ?Wanem tri stamba tijing we yu mas pruvum se oli tru?

⁹ I gat tri stamba tijing we yu mas stadi long olgeta blong pruvum se oli tru. Faswan, yu mas bilif strong se Jehova God i wokem olgeta samting. (Eks. 3:14, 15; Hib. 3:4; Rev. 4:11) Nambatu, yu mas pruvum se God nao i givim Baebol long ol man. (2 Tim. 3:16, 17) Mo namba tri, yu mas sua se Jehova i gat wan ogenaesesen we Jisas i stap lidim, mo se ogenaesesen ya hemia ol Witnes blong Jehova. (Aes. 43:10-12; Jon 14:6; Wok 15:14) Yu no nid blong save evri samting long Baebol, blong pruvum se ol stamba tijing ya oli tru. Be yu mas traehad blong “yusum gud tingting” blong yu, blong yu bilif strong long trutok.—Rom 12:1.

10. Afta we yumi save trutok, ?yumi mas mekem wanem?

¹⁰ Afta we yu sua se trifala stamba tijing ya long saed blong God, Baebol, mo oganaesesen blong God oli tru, yu mas naf blong pruvum ol trutok ya long ol narafala. ?From wanem? From we yumi ol Kristin yumi gat wok ya blong tijim ol man long trutok. * (1 Tim. 4:16) Mo taem yumi pruvum ol trutok ya blong Baebol long narafala, bilif blong yumi tu i kam strong moa.

11. ?Olsem wanem yumi save folem eksampol blong aposol Pol?

¹¹ Taem aposol Pol i tijim ol man, hem i “yusum Loa blong Moses mo ol tok blong ol profet, blong traem pulum olgeta blong oli bilif long Jisas.” (Wok 28:23) ?Olsem wanem yumi save folem eksampol blong Pol taem yumi tijim ol narafala long trutok? Taem oli stap kam klosap long Jehova, i no naf blong talem nomo ol tijing blong Baebol, be yumi mas halpem olgeta blong oli yusum tingting blong olgeta tu. Yumi wantem se oli kam long trutok from we oli pruvum se samting we oli lanem i tru, be i no from we oli laekem yumi.

12-13. ?Olsem wanem ol papa mo mama oli save halpem ol pikinini blong oli stap long trutok?

¹² Ol papa mo mama, i sua se yufala i wantem we ol pikinini blong yufala oli stap long trutok. Maet yu ting se sipos oli gat ol gudfala fren long kongregesen, bambae oli gohed gud. Be hemia i no naf blong oli bilif strong. Oli mas frengud wetem God mo pruvum se ol tijing blong Baebol oli tru.

¹³ Sipos ol papa mo mama oli wantem tijim ol pikinini blong olgeta long trutok, oli mas soemaot gudfala eksampol. Oli mas stadigud long Baebol mo tekem taem blong tingting dip long samting we oli lanem. Nao bambae oli naf blong tijim ol pikinini blong olgeta tu blong oli mekem sem mak. Oli mas tijim ol pikinini olsem wanem blong mekem risej long ol buk blong yumi, olsem we oli tijim ol Baebol stadi. Nao bambae oli luksave se Jehova i stap yusum gudfala slef we i waes blong tijim yumi. (Mat. 24:45-47) Ol papa mo mama, i no naf blong tijim ol pikinini blong yufala long ol stamba trutok blong Baebol nomo. Yufala i mas tijim olgeta long ol dip “save blong God,” folem yia blong olgeta, nao oli save gat strong bilif.—1 Kor. 2:10.

14. ?From wanem yumi mas stadi long ol profet tok blong Baebol? (Luk bokis ya “ ?Yu Save Eksplenem Ol Profet Tok Ya?”)

¹⁴ Ol profet tok blong Baebol oli impoten from we oli givhan long yumi blong bilif strong long Jehova. ?Wanem ol profet tok we oli mekem bilif blong yu i strong? Maet yu tingbaot profet tok long saed blong “ol las dei.” (2 Tim. 3:1-5; Mat. 24:3, 7) ?Be wanem sam narafala profet tok we oli kamtru finis, mo oli save mekem bilif blong yu i strong moa? ?Yu save eksplenem olsem wanem ol profet tok long Daniel japta 2 mo 11 oli kamtru finis, mo olsem wanem bambae oli kamtru long fiuja? * Taem bilif blong yu i stanap long Baebol, i no gat wan samting i save spolem. Traem tingbaot stori blong ol brata long Jemani we ol man oli ronem mo kilim olgeta long Wol Wo Tu. Nating se oli no kasem save gud yet long ol profet tok blong ol las dei, oli bilif strong long Tok blong God.

15-17. Taem ol Nasi oli agensem ol brata, ?wanem i givhan long olgeta blong oli stanap strong?

¹⁵ Taem gavman blong ol Nasi i rulum Jemani, oli sakem plante taosen brata mo sista long ol rabis kalabus. Hitler mo wan haeman long gavman blong hem, Henrik Himla, tufala i no laekem nating ol Witnes blong Jehova. Wan sista i tokbaot samting we Himla i talem long sam sista long wan rabis kalabus, i se: “!Maet God blong yufala Jehova i rul long heven, be long wol ya mifala nao i rul! !Bambae yufala i luk se hu i win, yufala o mifala!” ?Wanem i givhan long ol man blong Jehova blong oli stanap strong?

¹⁶ Ol Baebol Studen ya oli save se Kingdom blong God i stat blong rul long 1914. Taswe oli no sapraes we ol man oli agensem olgeta bigwan. Ol man blong Jehova oli bilif strong se ol gavman blong man oli no naf blong blokem samting we God  i wantem. Hitler i no naf blong finisim tru wosip mo stanemap wan gavman we i save winim Kingdom blong God. Ol brata ya oli sua se bambae rul blong Hitler i finis.

¹⁷ Samting we ol brata mo sista ya oli bilif strong long hem i kamtru. Sam yia biaen, gavman blong ol Nasi i lusum paoa, nao Henrik Himla we i bin talem se “long wol ya mifala nao i rul,” i mas ronwe blong i no ded. Taem hem i stap ronwe, hem i mitim Brata Lubke, mo i luksave se bifo brata ya i stap long kalabus. Tingting blong Himla i foldaon olgeta, nao hem i askem long Brata Lubke se: “Baebol Studen, ?wanem bambae i hapen naoia?” Brata Lubke i eksplenem se ol Witnes blong Jehova oli save longtaem finis we gavman blong ol Nasi bambae i lusum paoa, mo bambae oli fri. Himla, we fastaem i talem plante rabis tok agensem ol Witnes, i no moa gat samting blong talem. Smoltaem biaen, hem i kilim hem wan i ded. ?Yumi lanem wanem? Taem yumi stadi long Baebol mo ol profet tok, bilif blong yumi long God i kam strong, nao yumi naf blong stanap strong long ol trabol.—2 Pita 1:19-21.

18. ?Olsem wanem Jon 6:67, 68 i soemaot se yumi mas gat ‘stret save mo luksave ol samting,’ olsem Pol i talem?

¹⁸ Yumi evriwan i mas soemaot lav ya we i makemaot ol trufala Kristin. Be i impoten tu blong yumi gat ‘stret save mo luksave ol samting.’ (Fil. 1:9) Sipos no, i isi nomo blong yumi “folem ol giaman tijing blong ol man blong trik,” olsem ol man blong apostasi. (Efes. 4:14) Taem plante disaepol oli lego Jisas, aposol Pita i talem wetem strong bilif se Jisas nomo i gat “ol tok blong laef ya we i no save finis.” (Ridim Jon 6:67, 68.) Pita i no kasemsave long evri samting we Jisas i tijim, be hem i no lego Jisas from we hem i luksave se God i sanem hem. Yu tu yu save mekem bilif blong yu i strong moa long samting we Baebol i tijim. Nao bambae i no gat wan samting we i save spolem bilif ya, mo bambae yu save givhan long ol narafala, blong olgeta tu oli gat strong bilif.—2 Jon 1, 2.