1. Aha do artini istilah “hasintongan”?

“SONAHA ham mananda hasintongan?” “Humbani dakdanak do ham ibagas hasintongan?” “Domma sadiha dokah ham ibagas hasintongan?” Ra do ongga isungkun halak sonai bamu. Atap ham na manungkun sonai bani halak. Tapi aha do artini istilah “hasintongan” ai? Somalni, sanggah ihatahon hita hasintongan, hita sihol patugahkon pasal haporsayaonta, sonaha hita manombah Naibata, pakon sonaha hita marparlahou. Na ihatahon “ibagas hasintongan” ai ma halak na domma mamparlajari Bibel, janah mandalankon podahni ibagas goluhni. Hasilni, ipaluah ma sidea humbani ajaran ni ugama palsu. Janah boi ma sidea totap marmalas ni uhur hassi pe bahat halak na jahat.​—Joh. 8:32.

2. Domu bani Johannes 13:34, 35, aha do mungkahni na mambahen ham marosuh bani hasintongan?

² Aha do mungkahni na mambahen ham marosuh bani hasintongan? Ra do halani ididah ham bujur-bujur Saksi Jahowa. (1 Ptr. 2:12) Atap, ra do ididah ham marsihaholongan sidea. Bahat do halak na mangkatahon sanggah parlobei sahali sidea roh hu partumpuan, holong na ipatuduh Saksi ai do na idingat sidea marimbangkon aha na iparlajari ijai. Lang tarsonggot hita halani ihatahon Jesus do homa mintor itanda halak do ise susianni halani marsihaholongan sidea. (Basa Johannes 13:34, 35.) Tapi dong ope na porlu ibahen ham laho patoguhkon haporsayaonmu.

3. Anggo porsaya ham bani Naibata pitah halani mangidah holong na ipatuduh sanina botou, aha do ra na boi masa?

³ Tongon, gabe porsaya do hita bani Naibata dob mangidah parlahou ni juakjuak-Ni na marsihaholongan. Tapi lang sungkup pitah ai. Mase? Halani anggo adong tantangan,  ra do gabe galek haporsayaonmu. Umpamani, anggo ididah ham dong sanina botou, songon sintua atap parintis na mangkorjahon dousa na banggal, ra do mintor itadingkon ham Jahowa. Atap anggo dong sanina botou na mambahen borit uhurmu atap pe dong halak na murtad na mangkatahon lepak do na iparlajari ham ai, ra do gabe itadingkon ham hasintongan. Anggo ham porsaya bani Naibata halani mangidah parlahou ni halak dassa, lape toguh haporsayaonmu. Jadi maningon iparlajari ham do homa Bibel ase toguh parhasomananmu pakon Jahowa. Marusaha ma mangarusi isini, janah buktihon ma mase porsaya ham bani Jahowa.​—Rom 12:2.

4. Domu bani Mateus 13:3-6, 20, 21, aha do na manguji haporsayaonta?

⁴ Jesus mangkatahon bahat do halak na ‘malas uhurni manjalo’ hasintongan. Tapi sanggah dong ujian, mintor galek ma haporsayaon ni sidea. (Basa Mateus 13:3-6, 20, 21.) Ra, lang isangka sidea bahat do hape tantangan halani mangirikkon Jesus. (Mat. 16:24) Atap ra do nini uhurni anggo iihutkon sidea Jesus, pasu-pasu dassa na ijalo, sedo hasunsahan. Tapi anggo i dunia on, sai adong do parsoalan. Ra, halani mubah situasi, gabe lang be marmalas ni uhur hita.​—Ps. 6:7; Par. 9:11.

5. Sonaha bahat sanina botou mambuktihon anggo sidea porsaya bani hasintongan?

⁵ Bahatan do sanina botounta na mambuktihon anggo sidea porsaya bani hasintongan na dob iparlajarisi. Mase ihatahon hita sonai? Lang galek haporsayaon ni sidea sanggah dong na mambahen borit uhurni, atap pe dong na marparlahou na sambor. (Ps. 119:165) Sanggah dong parsoalan, lambin toguh do haporsayaonni, sedo lambin galek. (Jak. 1:2-4) Jadi, sonaha ase boi toguh haporsayaonmu?

6. Bani abad na parlobei, sonaha susian ni Jesus patoguhkon haporsayaonni?

⁶ Bani abad na parlobei, ipatoguh susian ni Jesus do haporsayaon ni sidea marhitei mamparlajari Na Tarsurat, ampa “hasintongan ni ambilan na madear in”. (Gal. 2:5) Hasintongan na imaksud ai ma ganup na iajarhon Jesus, tarmasuk ma pasal tobusan ampa parpuhoonni. Porsaya do homa apostel Paulus sintong do hasintongan na iparlajarisi. Mase? Igunahon ia do Na Tarsurat in laho mambuktihon “maningon marsitaronon anjaha puho do use Kristus in humbani na matei”. (Lah. 17:2, 3) Porsaya do susian ni Jesus bani ajaran ai halani iurupi tonduy na pansing do sidea mangarusi Hata ni Naibata. Marusaha do sidea mambuktihon anggo ajaran ai maronjolan bani Hata ni Naibata. (Lah. 17:11, 12; Heb. 5:14) Jadi, gabe lambin toguh do haporsayaon ni sidea halani domma mandapot habotohon pasal Naibata.​—Kol. 1:9, 10.

7. Aha do gunani anggo hita porsaya bani hasintongan na ibagas Bibel?

⁷ Lang ongga mubah-ubah hasintongan na ibagas Bibel. (Ps. 119:160) Age pe dong na mambahen borit uhurta, dong na mangkorjahon na sambor, atap dong sitarononta, totap do hasintongan na ibagas Bibel ai. Halani ai, maningon iarusi hita ma ajaranni, anjaha porsaya sintong do isini. Anggo toguh haporsayaonta bani Bibel, boi ma hita totap setia bani Naibata age pe bahat sitaronon. Dos do ai songon jangkar na mambahen kapal seng mayub-ayub age pe dong gilumbang na banggal. Tapi sonaha carani ase toguh haporsayaonta bani hasintongan?

8. Songon na ihatahon bani 2 Timoteus 3:14, 15, sonaha si Timoteus boi porsaya bani hasintongan?

⁸ Porsaya do si Timoteus hasintongan do na iparlajarisi. Mase? (Basa 2 Timoteus 3:14, 15.) Inangni pakon ompungni do na parlobei sahali mangajarhon “surat na pansing” hu bani. Tapi, pos uhurta iparlajari ia sandiri do homa Surat na Pansing ai. Ujungni, ‘porsaya’ ma ia sintong do na iparlajarisi. Dob ai, roh ma si Timoteus, ompungni, pakon inangni hu partumpuan ni halak Kristen. Halani holong na ipatuduh susian ni Jesus, on ma na mambahen si Timoteus ra marsaor pakon sidea. (Pil. 2:19, 20) Haporsayaon ni si Timoteus boi toguh lang pitah halani marsaor pakon hasoman. Tapi halani domma iparlajarisi Surat na Pansing gabe porsaya ma ia ai do hasintongan. Gabe lambin orot ma ia bani Jahowa. Maningon iparlajari hita do homa Bibel ase porsaya hita sintong do isini.

9. Tolu ajaran aha do na maningon ihaporsayai hita?

⁹ Siotikanni, dong tolu ajaran na maningon ihaporsayai hita. Na parlobei, maningon ibotoh hita mase pitah Jahowa dassa na ihatahon Panompa. (2 Mus. 3:14, 15; Heb. 3:4; Pangk. 4:11) Na paduahon, mase hita porsaya sinahapkon ni Naibata do Bibel. (2 Tim. 3:16, 17) Na patoluhon, mase hita porsaya dong organisasi ni Jahowa i tanoh on na igoran Saksi-Saksi Jahowa, janah Jesus do na mambobahon sidea. (Jes. 43:10-12; Joh. 14:6; Lah. 15:14) Ase boi ihaporsayai hita tolu ajaran ai, lang maningon ibotoh hita ganup isi ni Bibel. Tapi tujuanta, maningon ‘iparuhurhon’ hita ma mase hita porsaya anggo na iparlajari hita ai hasintongan.​—Rom 12:1.

10. Anggo domma ibotoh hita hasintongan, aha ope na porlu ibahen hita?

¹⁰ Anggo domma ibotoh hita hasintongan pasal Naibata, Bibel, pakon juakjuak-Ni,  maningon ibotoh hita do homa ayat-ayat ni Bibel laho patorangkon pasal ai bani na legan. Mase sonai? Halani susian ni Jesus do hita, maningon iajarhon hita hasintongan bani halak na legan. * (1 Tim. 4:16) Anggo iurupi hita halak na legan porsaya bani hasintongan ni Bibel, lambin toguh ma haporsayaonta bani hasintongan ai.

11. Sitiruon aha do na ibahen si Paulus, anjaha sonaha hita maniru ia?

¹¹ Sanggah si Paulus mangajari na legan, ipatorang ia ma humbani “titah ni si Musa ampa nabi-nabi” ase porsaya sidea hu bani Jesus. (Lah. 28:23) Sonaha hita boi songon si Paulus sanggah mangajarhon hasintongan bani halak? Ulang ma pitah patugahkon ajaran ni Bibel. Tapi urupi ma sidea manrimangi aha do na iajarhon Bibel ase lambin orot sidea bani Jahowa. Tontu lang ra hita ijalo sidea hasintongan halani sihol pasonangkon uhurta. Tapi marosuh do hita anggo ia manjalo hasintongan halani domma ibuktihon ia ai do hasintongan.

12-13. Sonaha namatoras boi mangajarhon hasintongan hubani niombahni?

¹² Tontu marosuh do namatoras anggo dakdanakni totap ibagas hasintongan. Ra pangahapmu anggo niombahmu domma marsaor pakon na legan boi ma lambin toguh haporsayaonni. Tapi lang sungkup ai ase boi toguh sidea ibagas hasintongan. Maningon ipatoguh sidea do parhasomananni pakon Naibata, anjaha maningon ibuktihon sidea ajaran ni Bibel ai do na sintong.

¹³ Nasiam namatoras, anggo sihol nasiam mangajarhon hasintongan hubani niombahmu, nasiam sandiri ma lobei na mamparlajari isi ni Bibel. Rimangi ma na iparlajari nasiam. Dob ai pe boi iajari nasiam niombahmu laho mangkorjahon na sarupa. Songon na ibahen ham bani parlajar Bibelmu, ajari ma homa niombahmu manggunahon alat-alat riset na ibahen organisasi. Anggo sonai ibahen nasiam, gabe porsaya ma niombahmu “juakjuak na bujur anjaha na maruhur” do na igunahon Jahowa laho mambere pangajarion hubanta. (Mat. 24:45-47) Ulang ma pitah mangajarhon ajaran dasar humbani Bibel. Ase toguh haporsayaon ni sidea maningon iurupi nasiam ma sidea marlajar “ronsi na ibagas uhur ni Naibata”. Janah pasosok ma parlajaranni domu hubani umur ni sidea.​—1 Kor. 2:10.

14. Mase maningon iparlajari hita panjahaion na dong bani Bibel? (Tonggor ma kotak “ Ai Boi do Ipatorang Nasiam pasal Panjahaion On?”)

¹⁴ Panjahaion na dong bani Bibel boi patoguhkon haporsayaonta. Ai dong do ibotoh ham panjahaion bani Bibel na domma patoguhkon haporsayaonmu? Ra do ihatahon ham panjahaion pasal “panorang parpudi”. (2 Tim. 3:1-5; Mat. 24:3, 7) Tapi, ai dong ope panjahaion na legan na boi patoguhkon haporsayaonmu? Umpamani, ai boi do ipatorang ham sonaha panjahaion bani Daniel bindu 2 atap 11 domma saud hinan, janah sonaha ai ipasaud use? * Anggo porsaya ham bani isi ni Bibel, gabe toguh ma haporsayaonmu. Idah hita ma contohni humbani sanina botounta na iparburu hinan i Jerman sadokah Porang Dunia II. Hassi pe lape iarusi sidea haganup panjahaion pasal ari parpudi, tapi totap do toguh haporsayaonni bani Hata ni Naibata.

15-17. Sonaha parlajaran Bibel boi mangurupi hasomanta totap toguh hassi pe sidea iparburu Nazi?

¹⁵ Sanggah pamarentahan Nazi manrajai i Jerman, dong marribu Saksi Jahowa na iboan hu kamp konsentrasi. Sogam tumang uhur ni si Hitler pakon si Heinrich Himmler, pejabatni mangidah Saksi. Sada botou mangkatahon ongga do ihatahon si Himmler hubani sanina botounta na i kamp konsentrasi sonon, “Tongon, Jahowamu do na manrajai i surga. Tapi anggo i tanoh on, hanami do raja. Tonggor hita ma, ise do holi na totap adong, hanima Saksi-Saksi Jahowa, atap hanami!” Jadi aha ma na boi mangurupi sanina botounta ijia ase boi totap toguh haporsayaonni?

¹⁶ Domma ibotoh Siswa-Siswa Alkitab hinan anggo Harajaon ni Naibata domma mamarentah i surga humbani tahun 1914. Jadi domma ibotoh sidea bahat do holi sitaronon na iahapkon sidea. Hassi pe sonai, porsaya do sidea lang dong pamarentahan ni jolma na boi manlanglangi Naibata laho pasaudkon harosuh-Ni. Porsaya  do homa sidea anggo si Hitler lang boi mamboiskon juakjuak ni Naibata. Anjaha pamarentahan ni Jahowa do na sigogohan marimbangkon pamarentahan ni si Hitler. Porsaya do sidea marujung do holi pamarentahan ni si Hitler ai.

¹⁷ Tongon do na ihaporsayai sanina botounta ai. Lang piga dokah, marujung ma pamarentahan ni si Hitler, anjaha lintun ma si Himmler. Bani sada ari pajumpah ma si Himmler ai pakon Sanina Lübke. Ibotoh si Himmler ai ma anggo Sanina Lübke ai Siswa-Siswa Alkitab na ongga ipenjarahon. Songon na pusok do bohini si Himmler janah isungkun ia bani sanina ai, “Sonaha do barita ni Siswa-Siswa Alkitab sonari?” Jadi ihatahon sanina ai ma domma dokah ibotoh sidea marujung do holi pamarentahan ni si Hitler janah ipaluah do Siswa-Siswa Alkitab. Mintor sip ma si Himmler janah laho ma ia. Lang piga dokah, bunuh diri ma ia. Aha ma parlajaranni? Maningon iparlajari hita ma Bibel, tarmasuk panjahaionni. Anggo ibahen hita sonai, gabe toguh ma haporsayaonta bani Naibata, janah gabe boi ma hita totap setia lang soal aha pe na masa.​—2 Ptr. 1:19-21.

18. Songon na ipatugah bani Johannes 6:67, 68, mase hita porlu mandapot “habotohon ampa pangarusion na gok”?

¹⁸ Tongon, maningon marsihaholongan do hita halani ai do tandani hita susian ni Jesus. Tapi, porlu do homa hita mandapot “habotohon ampa pangarusion na gok”. (Pil. 1:9) Janah maningon jaga ma hita ase lang iihutkon hita “akal-akal ni jolma, marhitei sipaoto-oto”, tarmasuk ma homa halak na murtad. (Ep. 4:14) Bani abad na parlobei, bahat do halak ujungni lang ra mangihutkon Jesus. Tapi anggo si Petrus porsaya do ia hata ni Jesus ai do “hata hagoluhan sisadokah ni dokahni”. (Basa Johannes 6:67, 68.) Hassi pe lape iarusi si Petrus ganup pasal ajaran ni Jesus, tapi boi do ia totap setia halani domma iarusi ia hasintongan pasal Kristus. Hita pe maningon patoguh hita ma haporsayaonta bani ajaran ni Bibel. Ai do na mangurupi hita ase totap toguh haporsayaonta lang soal aha pe na masa. Anjaha gabe boi ma homa iurupi hita na legan ase toguh haporsayaon ni sidea.​—2 Joh. 1, 2.