1. Jé bia loone na “benya mejôô”?

“AVAL avé ô nga yeme benya mejôô?” “Ye ô nga yaé benya mejôô été?” “Den a nto mimbu tañ aya wo yeme benya mejôô?” Éko éziñe môt a siliya wo minsili mite, nge ke na womien ô siliya mie môt. Ve jé ébien bia loone na “benya mejôô”? Bia belan éfia éte na bi kobô ajô mam bia buni, fatan ékaña’a jangan, a fatan ényiñe jangan. Ba jô na môt a bili “benya mejôô” éyoñ a yeme miñye’elane ya Bible, a éyoñ a tôñe mie ényiñe jé. Môt ate a du’ubane ki a bedo’otene ya évuse ñyebe, a amu nalé, a kusa fo’o nyiñ émo Satan, a bu’ubane meva’a ényiñ.​—Jean 8:32.

2. Bela’ane Jean 13:34, 35 asu na ô liti jam e ne taté dutu môte benya mejôô.

² Jé é nga dutu wo benya mejôô? Ye mbamba ntabane Bengaa be Yéhôva? (1 P. 2:12) Ye amu ô nga yene na ba nye’e bôt? Abui bôte da yene nye’an ôte éyoñ ôsu ba tabe ésulan Aba Éjôé. Be wô’ô jô na sa ke mam be nga wôk mme me nga dañe nambe be, ve nye’ane Bengaa be nga liti be. Bi nji vembe a jam ete, amu Yésus a nga jô na nye’ane wo yené zañe jangan ñwô wo ye bo’olô na bi ne beyé’é bé. (Lañe’e Jean 13:34, 35.) Ve abim ete da yiane ki nge bia kômbô bi ngule mbunan.

3. Jé é ne kui nge mbôka’a ya mbunane wôé ô tii ve a nye’an ô ne zañe Bekristen?

³ Sa ke ve nye’an ô ne zañe Bekristen ñwô wo yiane bo mbôka’a ya mbunane wongan. Amu jé bia jô nalé? Tame ve’ele simesane na mojañ éziñ (éko éziñe mvendé nge ke nkpwa’a mefan) a sem, nge na mojañ nge sita a bo wo  jame da balé wo. E ne fe kui kui na mojañ a bo apostat, a té miñye’elane mise ya ékôane Yéhôva si. Wo ye bo aya avale biyoñ ete? Ye wo ye fo’o ke ôsu a kañe Yéhôva nga? Ye wo ye bili atek? Kôme ñhe ba’ale na, élate jôé a Yéhôva nje ja yiane bo mbôka’a ya mbunane wôé, sa ke mame bôte bevo’o ba bo; nge sa nalé mbunane wôé wo ye wu. Avale wo yene Yéhôva a bebo bisaé bé e ne fo’o volô wo na ô bi abime mbunan éziñ, ve e ne fe nya mfii na ô kôme yé’é Bible, na ô wô’ô miñye’elane ya été, a na ô tabe ndi na mame wo yé’é me ne betotyii. Womiene wo yiane kôme me’ete na mame wo yé’é Bible a lat a Yéhôva me ne été.​—Bero. 12:2.

4. Bela’ane Matthieu 13:3-6, 20, 21 na ô liti avale bôte béziñe ba bo éyoñe ba tôbane meve’ele.

⁴ Yésus a nga jô na bôte béziñe ba yebe benya mejôô “a avak,” ve mbunane wop wo viane tek éyoñe ba tôbane meve’ele. (Lañe’e Matthieu 13:3-6, 20, 21.) Éko éziñ ba kate wô’ô aval avé ñyé’é Yésus a ne tôbane minjuk. (Mt. 16:24) Nge ke na ba simesane na éyoñ ô ne ñyé’é Yésus, ényiñe jôé ja yiane bo ve nkone nkon. Ve nté bia nyiñ émo Satan ji, bia yiane kôme yeme na bia ye tôbane meve’ele. Jam e ne bia kui atemetem a zu ndaman ava’a dangan.​—Bs. 6:6; Ec. 9:11.

5. Jé ja liti na bobejañ a besita be too ndi na bi bili benya mejôô?

⁵ Abui bobejañ a besita da sôane ki na bi bili benya mejôô. Amu jé bia jô nalé? Amu ba tebe ne bip to’o Kristen éfe ja kolé be ôbak, nge ke na ja tyam atiñe Yéhôva. (Bs. 119:165) Meve’ele ba tôbane me ma te’e ke be mbunan, ve ma viane yemete wô. (Jc. 1:2-4) Jé é ne volô bia na bi bi avale mbunan ete?

6. Jé é mbe mbôka’a ya mbunane Bekristene ya ntete mimbu ôsu?

⁶ Miñye’elane ya Kalate Zambe a “benya mejôô ya mbamba foé” Yésus a nga ye’ele Bekristene ya ntete mimbu ôsu bi nga yemete mbunane wop. (Beg. 2:5) Benya mejôô ma fombô mam mese bia buni, ane ntañe Yésus a nga ya’an, a ñwômane wé miñwuan. Nlômane Paul ô mbe ô kañese’e na miñye’elane mite mi ne betotyii. Aval avé bia yeme de? Amu a mbe a bela’ane “mejô me ne ntilane Kalate Zambe” asu na a liti na “Krist a nga yiane jibi awu, a beta wômô soñ.” (Mam. 17:2, 3) Bekristene ya ntete mimbu ôsu be nga kañese miñye’elane mite a ja’é Yéhôva nsisime wé asu na be tu’a wô’ô Mejô mé. Be nga tu’a ke ba vun asu na be yemete ndi nleme jaba na miñye’elane mite mia so fo’o Kalate Zambe. (Mam. 17:11, 12; Beh. 5:14) Sa ke mam be mbe be wô’ôtane mme me mbe mbôka’a ya mbunane wop, be nji be be kañe’ Yéhôva fo’o ve amu ba nye’e be sulan a Bengaa bevok. Ve mbunane wop ô mbe ô tii a “[nya] ñyemane” be mbe be “yeme’ Zambe.”​—Beco. 1:9, 10.

7. Aval avé mbunane wongan wo volô bia?

⁷ Benya mejôô ya Bible be ne étyi teke tyendé. (Bs. 119:160) Benya mejôô ba tyendé ki to’o môt a bo mbia nsem nge ke kolé bia ôbak. Benya mejôô ba tyendé ki to’o bia tôbane minjuk. Ajô te, bia yiane kôme yé’é Bible akekui bia me’ete na ôwé, bia bi bili fo’o benya mejôô! Nge mbunane wongan ô yeme ane sen ékanga, teke meve’ele méziñe me ne kui na me kpwéé bia si. Aval avé ô ne tu’a tabe ndi na bia bi bili benya mejôô?

8. Bela’ane 2 Timothée 3:14, 15 na ô liti jam e nga volô Timothée na a yeme na mam a buni me ne benya mejôô.

⁸ Timothée a mbe a too ndi na mam a mbe a buni’i me mbe benya mejôô. Jé é nga volô nye na a yemelane de? (Lañe’e 2 Timothée 3:14, 15 afebe si.) * Nyia ba émvame minga jé mbe be nga ye’ele nye “mimfufube mintilan.” Ve bi ne fe jô na émien a nga nyoñ éyoñe ya yé’é mintilane mite. Ane a nga kôme me’ete na mi ne betotyii. Mvuse ya valé, Timothée, nyia wé, a émvam minga jé, be nga yé’é miñye’elane mi Krist. Éko éziñe Timothée a nga semé nye’an a mbe a yene’e zañe beyé’é be Yésus, ane jam ete e nga tindi nye na a bo Kristen a yemete nkômbane wé ya volô bobejañ a besita mfa’a ya nsisim. (Beph. 2:19, 20) Ve sa ke nye’ane bobejañe ñwô ô mbe mbôka’a ya mbunane wé, ve miñye’elane ya Bible mmie mi nga yemete ndi nleme jé na Bekristene be bili benya mejôô, a bo na a kômbô tu’a subu Yéhôva bebé. Wo fe wo yiane jeñe na ô kôme yé’é Bible a tu’a wô’ô mam a jô a lat a Yéhôva.

9. Mam melale mevé wo yiane jeñe na ô tabe me ndi?

⁹ Ô ne taté a miñye’elane milale ya mi mi ne mbôka’a ya mbunane wongan. Jam ôsu, wo yiane kañese na Yéhôva Zambe a ne Nté biôm bise. (Nk. 3:14, 15; Beh. 3:4; Nli. 4:11) Jame baa, wo yiane kañese na mejô me ne ntilane Bible ma so bia be Zambe. (2 Tim. 3:16, 17) Jame lale, wo yiane fe yeme na Bengaa be Yéhôva be ne susu’a ékôane bôte ja kañe Zambe si va, a na Krist nnye a wulu be. (És. 43:10-12; Jean 14:6; Mam. 15:14) Asu na ô tabe mam mete ndi, e nji sili na ô yeme Kalate Zambe ase nlô. Nsôñane wôé wo yiane bo na ô belane “nsisim [nge ke mfasane]” wôé asu na  ô yemete ndi nlem ô bili a lat a benya mejôô.​—Bero. 12:1.

10. Éyoñ bi maneya yem benya mejôô, jam avé bia yiane fe kui na bi bo?

¹⁰ Éyoñ ô maneya kañese benya mejôô melal bi ndeme mane yene yôbe le, wo yiane fe bo ngule ya belane Kalate Zambe asu na ô volô bôte bevo’o na be’e fe be kañese me. Amu jé? Amu beyé’é be Krist be be’e mbe’e ya ye’ele bôte bevo’o benya mejôô. * (1 Tim. 4:16) Éyoñ bia jeñe na bi volô bôte bevo’o na be kañese benya mejôô ya Bible, bia yemete ndi nleme jangan biabebien a lat a benya mejôô bete.

11. Aval avé Paul a mbe a ye’ele’e bôt, bi ne vu nye aya?

¹¹ Éyoñ Paul a mbe a ye’ele bôt, a mbe a va’a ngule na a “dutu be be buni ajô Yésus . . .  [e mbe] ntilane kalate metiñe me Moïse a bekulu mejô.” (Mam. 28:23) Aval avé bi ne vu Paul éyoñ bia ye’ele bôt benya mejôô? Bi nji yiane su’u ve na bia kate be jôme Bible a jô. Bia yiane fe volô be na be yé’é, a tu’a fas mam ba lañ Kalate Zambe, ndemben élate ba be Yéhôva ja ye yem. Bi nji yi na be kañese benya mejôô fo’o ve amu ba semé bia, ve amu bebien ba kôme kañese na mam ba yé’é a lat a Ésaa wongane ya nye’an me ne betotyii.

12-13. Aval avé bebiaé be ne volô bone baba na be tabe benya mejôô été?

¹² A bebiaé, bia yeme na mia yi na bone benan be tabe benya mejôô été. Sa nalé? Ajô te mi ne simesane na asu na be yaé nsisim, ba yiane bi mbamba bemvôé akônda. Ve abim ete e nji yian asu na mone wônan a kañese na mam a yé’é me ne benya mejôô. Asu na a tu’a buni mam Bible a ye’ele, da sili fe na émien a bi ngul élat a Yéhôva.

¹³ Asu na bebiaé be kôme ye’ele bone bap benya mejôô a lat a Yéhôva, bebiene ba yiane taté bo benya beyé’é Bible. Ba yiane nyoñ éyoñe ya kôme bindi mam ba yé’é. Nalé a ye bo na be liti bone baba mbamba éve’ela. Ba yiane liti bone bab avale ba belane bikpwelé asu ñye’elan, fo’o ve avale ba bo a beyé’é Bible ya nseñ. Éyoñ ba bo nalé, ba volô bone baba na be tu’a semé Yéhôva a mam mese a bo asu na a ve be bidi ya nsisim a zene ya ôlo ô ne mewôk a fek. (Mt. 24:45-47) A bebiaé, te mia su’u ve na mia ye’ele bone benan mbôka’a ya miñye’elane ya Bible. Mia yiane fe be  ye’ele “bido’o bi mame ya Zambe” asu na be bi ngule mbunan; ve nté mia bo de, kata’ané be ve abime mam be ne ngule ya ba’ale.​—1 Bec. 2:10.

14. Amu jé bia yiane yé’é minkulane mejô ya Bible? (Fombô’ô fe nka’ale ô ne nlô ajô na: “ Ye ô ne timine minkulane mejô mi?”)

¹⁴ Minkulane mejô fe mi ne mfi nge bia kômbô bi ngule mbunan. Minkulane mejô mivé mi nga yemete mbunane wôé? Éko éziñe wo simesane mi mia kobô ajô ya ‘melu ya asu’ulan.’ (2 Tim. 3:1-5; Mt. 24:3, 7) Ve abui minkulane mejô afe da tôébane den, a mi ne fe yemete ndi nleme jôé na mam mese Bible a jô me ne été. Ye ô ne fo’o ngule ya timine môt avale nkulan ajô ya kalate Daniel kabetôlô 2 a 11 ô nga tôébane melu mvus, a avale wo tôébane den? * Éyoñ Mejô me Zambe mme me ne mbôka’a ya mbunane wôé, teke jôm é ne vaa wo wô. Éve’ela bobejañe be nga tôbane ngul étibela’a si Jaman éyoñe ya Beta bita II ja yemete jam ete. To’o be nji be be tu’a wô’ô mam mese a lat a melu ya asu’ulan, mbunane wop ô mbe ô yeme ne zeñ!

15-17. Aval avé ayé’é Bible é nga yemete mbunane bobejañe be nga tôban étibela’a éyoñ Benazi?

¹⁵ Benazi be nga fete betoyini be bobejañ a besita becamp de concentration. Hitler ba beta mone bezimbi wé be mbe be loone na Heinrich Himmler be mbe be vini’ Bengaa évini awu. Sita éziñ a jô na Himmler ate a nga kobô besita béziñe ya camp de concentration ébaé é fan asôñ, a nga jô be na: “Mba’ate Yéhôva wônan a jôé yôp, ve yemané na bia bi nee si nyi! Bia zu kôme yene za a ye kaa tek, nge bia nge mia!” Jé é nga volô Bengaa be Yéhôva na be ba’ale mbunane wop?

¹⁶ Be mbe be yeme’e na Éjôé Zambe é nga tebe yôp mbu 1914. Jôm ete nje be nji yé’an éyoñe be nga tôban étibela’a éte.  Be mbe be too ndi na teke jam e ne kamane na nkômbane Yéhôva ô jaléban. Hitler a nji be ngule ya tyame nya ékaña’a, nge ke telé éjôé é too ngul adañe ji Yéhôva. Jôm ete nje bobejañe ya éyoñ éte be mbe be yeme’e na, be bete be sisi, éjôé Hitler ja ye ke kui vôm.

¹⁷ Ñyenane mame wop ô mbe mvo’é. Mvuse mon éyoñ, éjôé Benazi é nga ku, ane Himmler a nga tup. Nga mi ngenane mi simesa’ane môt ate? Nnye a nga jô na ‘mbe be nee si nyô!’ Nté a mbe a tubu’u ñhe, a nga tôbane Mojañ Lübke, nde a nga yeme nye asu, amu a mbe mone mimbôk éjôé Benazi. Ôson ane é wu, Himmler a nga sili Mojañ Lübke na: “A Ñyé’é Bible, jé ja zu boban éyoñe ji?” Nde mojañ a nga yalane nye na Bengaa be Yéhôva be mbe be yeme’e na éjôé Benazi é ne ve ayôñ mimbop, a na ba ye su’ulane kui mimbôk. Ane Himmler, nya Himmler, môt a nga jaé kpwe’ele Bengaa, a nga li’i ve éyaé ya yôp a ji ya si! Mvuse mon éyoñ, nye ve wôé émien. Jé nkañete ôte wo ye’ele bia? Nge bia yé’é Bible a minkulane mejô ya été, nalé a ne volô bia na bi bi ngule mbunan a na bi tebe ne bip éyoñe ya meve’ele.​—2 P. 1:19-21.

18. Bela’ane Jean 6:67, 68 na ô liti amu jé bia yiane bi ‘nya ñyeman a fe’e meyen ése’ avale Paul a jô kalate Bephilippien 1:9.

¹⁸ Bia bese bia yiane bi nye’an, amu ô ne ndeme ja liti na bi ne benya Bekristen. Ve bia yiane fe bi ‘nya ñyemane a fe’e meyen ése.’ (Beph. 1:9) Nge sa nalé, bi ne du’uban a “évuñulu ése ya [évuse] ñye’elan,” to’o ñye’elane b’apostat. (Beép. 4:14) Éyoñ abui beyé’é é nga lume Yésus mvuse ntete mimbu ôsu, Pierre a nga jô na a too ndi na Yésus a bili “mejô ya ényiñe ya melu mese.” (Lañe’e Jean 6:67, 68.) To’o Pierre a nji tu’a wô’ô ñye’elane Yésus éyoñ éte, a nga ke ôsu a kabetane nye amu a mbe a yeme’e na Yésus a ne Messie. Wo fe ô ne yemete ndi nleme jôé na mame Bible a ye’ele me ne betotyii. Nge ô bo de, wônaa teke jam éziñe da ye bo na mbunane wôé ô feñelan, a wo ye fe volô bôte bevo’o na be bi ngule mbunan.​—2 Jean 1, 2.