1. Weh wi meen wen wi seh “di chroot”?

“HOW yoo mi geh fi noa di chroot?” “Yu mi groa op eena di chroot?” “How lang yu deh eena di chroot?” Maybi yu aks peepl kweschanz laik dehndeh bifoa. Er maybi ada peepl aks yoo. Bot weh wi meen wen wi seh “di chroot”? Yoozhwali, wen wi seh “di chroot,” wi di taak bowt weh wi bileev, di way how wi wership, ahn di way how wi liv wi laif. Peepl weh deh “eena di chroot” noa weh di Baibl teech, ahn dehn fala Baibl prinsiplz eena dehn laif. Sayka dat, dehn stap bileev di lai dehn weh faals rilijan teech, ahn dehn liv di bes laif pasabl wail dehn di liv eena Saytan werl.—Jan 8:32.

2. Akaadn tu Jan 13:34, 35, weh mait bee di fers ting weh mek wahn persn inchrestid eena di chroot?

² Weh mi fers mek yoo inchrestid eena di chroot? Maybi da mi di way how Jehoava peepl bihayv. (1 Peet. 2:12) Er maybi da mi di lov weh dehn shoa tu ada peepl. Wahn lata peepl mi feel da lov da di fers meetin weh dehn mi gaan. Lata taim dehn memba dat moa dan eniting weh dehn mi hyaa fahn di platfaam. Dis noh sopraiz wi bikaaz Jeezas mi seh dat di lov weh fi hihn disaipl dehn shoa fi wan anada wuda proov dat dehn da fi hihn disaipl dehn fi chroo. (Reed Jan 13:34, 35) Di lov weh wi si monks Gaad peepl help wi fi noa hoo reeli da Jehoava peepl. Bot wi need moa dan dat fi ga schrang fayt.

3. Weh mait hapm if wi fayt eena Gaad bays onli pahn di Kristyan lov weh wi bradaz ahn sistaz shoa?

³ Wi fayt haftu bays pahn moa dan jos di Kristyan lov weh Gaad peepl shoa. Wai? Bikaaz if wi fayt bays onli pahn da lov, den ih wahn bee eezi fi looz wi fayt. Fi egzampl, wi mait stap serv Jehoava if wahn brada er wahn sista, maybi eevn  wahn elda er wahn painyaa, komit wahn seeryos sin. Er wi mait stap serv Jehoava if wahn brada er wahn sista opset wi er ton apastayt ahn tel wi dat weh wee bileev rang. Dis da di lesn: If wi waahn ga schrang fayt, ih haftu bays pahn wahn schrang rilayshanship wid Jehoava. If yu bil yu fayt eena Gaad onli pahn weh ada peepl du ahn noh pahn yu oan rilayshanship wid Hihn, da laik yu di bil yu hows pahn sombadi els lan, ahn yu fayt noh wahn bee schrang. Di way how yu feel bowt Jehoava ahn fi hihn peepl ku help yu fi bil yu fayt, bot yu need moa dan dat. Ih veri impoatant dat yu stodi di Baibl, andastan weh yu di laan, ahn du risaach soh dat yu ku bee shoar dat weh yu di laan da di chroot bowt Jehoava. Yu haftu proov tu yuself dat di Baibl gat een di chroot bowt Jehoava.—Roam. 12:2.

4. Akaadn tu Machyu 13:3-6, 20, 21, weh som peepl du wen dehn fayt geh tes?

⁴ Jeezas mi seh dat som peepl wahn ‘onli tu hapiʼ fi aksep di chroot, bot dehn fayt wuda geh week wen dehn ga prablemz. (Reed Machyu 13:3-6, 20, 21) Maybi dehn noh andastan dat enibadi weh fala Jeezas wuda fays prablemz. (Mach. 16:24) Er maybi dehn tink dat if dehn ton Kristyan dehn noh wahn ga nohmoh prablemz er dat Gaad wuda tek weh aala dehn prablemz. Bot eena dis werl weh wi di liv eena, wi wahn ga prablemz. Sohntaim, tingz chaynj eena wi laif ahn dat ku kaaz wi fi looz wi jai.—Ps. 6:6; Eccl. 9:11.

5. Weh shoa wi dat moas a wi bradaz ahn sistaz shoar dat dehn ga di chroot?

⁵ Moas a wi bradaz ahn sistaz proov dat dehn shoar dehn ga di chroot. Wai wi ku seh dat? Dehn fayt noh geh shayki eevn if wahn brada er sista hert dehn er du sohnting weh wahn Kristyan noh fi du. (Ps. 119:165) Evri taim dehn fayt geh tes ih geh schranga, noh weeka. (Jay. 1:2-4) How yoo ku mek yu fayt geh schrang laik dat?

6. Weh di erli Kristyan dehn mi bil dehn fayt pan?

⁶ Di erli Kristyan dehn mi bil dehn fayt pahn weh dehn mi laan fahn di Skripchaz ahn di teechinz a Jeezas Krais, weh da “di chroot a di gud nyooz.” (Gal. 2:5) Dis chroot da evriting weh wi bileev az Kristyanz, inkloodin evriting weh wi noa bowt Jeezas ransom sakrifais ahn rezorekshan. Wai di apasl Paal mi shoar dat dehnya teechinz da di chroot? Bikaaz hihn mi “eksplayn di Skripcha tu di peepl dehn ahn shoa dehn proof seh dat di Krais hafu sofa, ahn den ih wahn rayz op bak fahn di ded.” (Aks 17:3) Di erli Kristyan dehn mi aksep dehndeh teechinz ahn dehn mi pen pahn di hoali spirit fi help dehn andastan Gaad Werd. Dehn mi proov tu dehnself dat dehnya teechinz bays pahn di Skripchaz. (Aks 17:11, 12; Heeb. 5:14) Dehn neva bays dehn fayt onli pahn how dehn feel bowt Jehoava ahn fi hihn peepl. Ahn dehn neva serv Jehoava jos bikaaz dehn mi hapi wen dehn spen taim wid dehn bradaz ahn sistaz needa. Insteda dat, dehn mi “groa fi noa Gaad beta ahn beta” ahn bil dehn fayt pahn weh dehn mi laan.—Kol. 1:9, 10.

7. How fayt eena Baibl chroot ku help wi?

⁷ Di chroot eena di Baibl noh chaynj. (Ps. 119:160) Fi egzampl, Baibl chroot noh chaynj if wahn brada er sista opset wi er komit wahn seeryos sin. An ih noh chaynj wen wi goh chroo prablemz. Soh wi haftu noa weh di Baibl teech ahn wi haftu bee shoar dat da di chroot. Jos laik how wahn anka ku kip wahn boat stedi joorin  wahn bad staam, schrang fayt eena Baibl chroot ku kip wi stedi wen wi di goh chroo prablemz. How yu ku schrentn fi yoo fayt ahn bee shoar dat yu ga di chroot?

8. How 2 Timoti 3:14, 15 help wi fi andastan wai Timoti kuda mi bee shoar dat hihn ga di chroot?

⁸ Timoti mi shoar dat hihn mi ga di chroot. How hihn mi noa dat? (Reed 2 Timoti 3:14, 15) Fi hihn ma ahn grani da-mi di fers peepl fi teech ahn “weh mi rait dong eena di Hoali Skripcha.” Bot hihn mi stodi di Skripchaz fi ihself tu. Sayka dat, hihn mi ‘laan ahn bileevʼ dat da mi di chroot. Laytaraan, Timoti, ih ma, an ih grani mi laan bowt Kristyan teechinz. Fi shoar, di lov weh Jeezas falowaz shoa fi wan anada mi impres Timoti wahn lat. Hihn mi reeli waahn spen taim wid bradaz ahn sistaz eena di kangrigayshan ahn help dehn owt. (Fil. 2:19, 20) Bot Timoti neva bil op fi hihn fayt pahn di lov weh ih mi ga fi peepl. Hihn mi bil ih fayt pahn teechinz fahn di Baibl weh hihn mi bileev fi bee chroo ahn weh mi mek ih waahn bee Jehoava fren. Yoo haftu stodi di Baibl fi yuself tu, ahn bee shoar dat weh ih teech bowt Jehoava da di chroot.

9. Weh chree impoatant teechinz yu need fi proov tu yuself?

⁹ Wen yu staat tu laan di chroot, yu need fi proov at lees chree impoatant teechinz tu yuself. Fers, yu haftu proov tu yuself dat Jehoava Gaad da di Wan weh mek evriting. (Ex. 3:14, 15; Heeb. 3:4; Rev. 4:11) Sekant, yu haftu noa wai yu bileev dat di Baibl da Gaad mesij tu hyoomanz. (2 Tim. 3:16, 17) Ahn terd, yu need fi bee shoar dat Jehoava ga wahn groop a peepl weh di wership hihn anda Krais dairekshan ahn da groop da Jehoava Witnisiz. (Isa. 43:10-12; Jan 14:6; Aks 15:14) Yu noh haftu noa evriting bowt di Baibl fi proov dehnya impoatant teechinz tu yuself. Yu goal shuda bee fi tek di taim fi tink bowt weh yu laan, ahn dat wahn schrentn yu fayt dat yu ga di chroot.—Roam. 12:1.

10. Wans wi noa di chroot, wat els wi haftu du?

¹⁰ Wans yu shoar dat weh wi jos menshan bowt Gaad, di Baibl, ahn Gaad peepl da chroo, yu haftu noa how fi yooz di Skripchaz fi proov dehndeh teechinz tu adaz. Wai? Bikaaz az Kristyanz, wi rispansabl fi teech di chroot weh wee laan tu enibadi weh wilin fi lisn tu wi. * (1 Tim. 4:16) Ahn wen wi chrai fi help ada peepl bileev dat weh di Baibl teech da di chroot, wi aalso schrentn wi oan fayt eena dehndeh teechinz.

11. Weh egzampl di apasl Paal mi set wen ih mi teech peepl, ahn how wee ku kapi fi hihn egzampl?

¹¹ Wen di apasl Paal mi teech peepl, ih mi “kanvins dehn bowt Jeezas az ih koat fahn Moaziz Laa ahn di prafit dehn.” (Aks 28:23) How wee ku fala Paal egzampl wen wi di teech adaz di chroot? Wi noh fi jos tel dehn weh di Baibl teech. Wi need fi help wi Baibl styoodent dehn fi stodi ahn tink bowt weh dehn laan fahn di Baibl. Wi noh waahn dehn aksep di chroot jos bikaaz dehn laik wi. Wi waahn dehn aksep di chroot bikaaz dehn proov tu dehnself dat weh dehn di laan da di chroot bowt wi lovin Gaad.

12-13. How payrents ku help dehn chiljren fi stay eena di chroot?

¹² Unu weh da payrents, wi noa dat unu waahn unu chiljren stay eena di chroot. Unu mait tink dat fi unu chiljren fayt wahn groa schrang if dehn ga gud frenz eena di kangrigayshan. Bot unu chiljren wahn need moa dan dat if unu waahn dehn bee shoar dat weh di Baibl teech da di chroot. Dehn need fi ga dehn oan rilayshanship wid Gaad, ahn dehn need fi proov tu dehnself ahn bee shoar dat weh di Baibl teech da chroo.

¹³ If payrents waahn teech dehn chiljren di chroot bowt Gaad, dehn haftu set wahn gud egzampl ahn stodi di Baibl dehnself. Dehn haftu tek taim fi tink bowt weh dehn laan. Den dehn wahn ku teech dehn chiljren fi du di saym ting. Dehn need fi teech dehn chiljren fi yooz evriting weh di aaganaizayshan gi wi fi help wi stodi di Baibl, jos laik how dehn wuda teech wan a dehn Baibl styoodents. If dehn du dat, dehn wahn help dehn chiljren fi lov Jehoava ahn fi chros dat hihn di yooz di faytful ahn waiz slayv fi help wi andastan di Baibl. (Mach. 24:45-47) Payrents, unu noh fi jos teech unu chiljren baysik Baibl chroot. Unu ku help dehn fi schrentn dehn fayt wen unu teech dehn az moch az dehn ku andastan bowt “aal di seekrit ting dehn  bowt Gaad.” (1 Kor. 2:10) Eech wan a unu chiljren difrent, soh unu haftu noa humoch eech wan a dehn ku handl bays pahn dehn ayj.

14. Wai wi shuda stodi Baibl prafesi? (Si di baks ““ Yoo Ku Eksplayn Dehnya Prafesi?”)

¹⁴ Baibl prafesi da wahn impoatant paat a Gaad Werd weh help wi fi bil schrang fayt eena Jehoava. Tink bowt som a di prafesi dehn weh help yoo fi ga schrang fayt. Yu mait tink bowt di prafesi dehn weh taak bowt “di laas dayz.” (Mach. 24:3, 7; 2 Tim. 3:1-5) Bot weh ada prafesi weh don kohn chroo ku schrentn fi yoo fayt? Fi egzampl, yoo ku eksplayn how di prafesi dehn da Daniel chapta 2 ahn Daniel chapta 11 kohn chroo eena di paas ahn stil di kohn chroo tudeh? * Wen yu bil op yu fayt schrang pahn weh di Baibl seh, den notn wahn ku brok yu fayt. Kansida di egzampl a wi bradaz weh mi sofa lata persikyooshan da Germany joorin Werl Waar II. Eevn doa dehn neva andastan evriting eena di Baibl prafesi dehn bowt di laas dayz, dehn mi ga schrang fayt eena Gaad Werd.

15-17. How wahn stodi a di Baibl mi help wi bradaz fi ga schrang fayt wen di Nazi govament mi-di persikyoot dehn?

¹⁵ Wen di Nazi govament mi-di rool da Germany, dehn mi put towznz a wi bradaz ahn sistaz eena difrent kansenchrayshan kyamp. Hitler ahn wahn impoatant ofishal, Heinrich Himmler, mi hayt Jehoava Witnisiz. Akaadn tu wahn sista, dis da weh Himmler mi tel wahn groop a sistaz weh mi deh eena wahn kansenchrayshan kyamp: “Fi unu Jehoava mait di rool da hevn, bot dong ya pahn di ert da wee di rool! Wee wahn shoa unu wich wan a wi wahn laas langa!” Da weh mi help Jehoava peepl fi stay faytful?

¹⁶ Dehndeh Baibl Styoodent mi noa dat Gaad Kingdom mi staat tu rool eena 1914.  Dehn neva sopraiz dat dehn mi-di fays lata persikyooshan. Bot Jehoava peepl mi shoar dat no hyooman govament kuda eva stap Gaad fahn mek fi hihn perpos kohn chroo. Hitler mi kyaahn geh rid a chroo wership an ih mi kyaahn set op wahn govament weh schranga dan Gaad Kingdom. Wi bradaz mi noa dat soona er layta Hitler govament mi wahn kohn tu wahn en.

¹⁷ Weh dehn bradaz ahn sistaz mi bileev da-mi chroo. Afta wahn fyoo yaaz, di Nazi govament mi kohn tu wahn en. Ahn Heinrich Himmler mi haftu ron fi ih laif eevn doa da hihn saym wan mi seh “dong ya pahn di ert da wee di rool.” Wail hihn mi-di ron weh, ih mi bok op tu Brada Lübke, hoo yoostu bee wahn prizna weh Himmler mi noa da wan a Jehoava Witnisiz. Himmler mi feel veri dipres, an ih aks Brada Lübke: “Wel, Baibl Styoodent, weh wahn hapm now?” Brada Lübke mi eksplayn tu Himmler dat Jehoava Witnisiz mi don noa dat di Nazi govament mi wahn kohn tu wahn en ahn dat Jehoava peepl mi wahn geh dehn freedom. Himmler yoostu seh lata bad tingz bowt Jehoava Witnisiz bifoa. Bot rait den wen hihn mi-di taak tu Brada Lübke, hihn neva ga notn fi seh. Noh lang afta dat, hihn mi kil ihself. Weh wi ku laan? If wi stodi di Baibl, inkloodin di prafesi dehn weh ih gat een, ih wahn help wi fi ga schrang fayt eena Gaad ahn fi noh giv een wen wi fays persikyooshan.—2 Peet. 1:19-21.

18. Laik weh wi reed da Jan 6:67, 68, wai wi need fi moa andastan di chroot ahn noa how fi joj rait fahn rang laik weh Paal mi rait da Filipiyanz 1:9?

¹⁸ Wi need fi shoa lov fi proov dat wee da chroo chroo Kristyan. Bot wi aalso need fi “moa andastan di chroot, ahn . . . noa how fi joj rait fahn rang.” (Fil. 1:9) Adawaiz, wi ku faal fi di chriks a ada peepl, inkloodin apastayts, weh ku afek wi saym laik how di breez ku afek wahn boat. (Ifee. 4:14) Wen lata Jeezas disaipl dehn mi stap fala ahn, di apasl Peeta mi seh hihn reeli bileev dat Jeezas ga “di werd dehn weh gi laif weh wahn neva en.” (Reed Jan 6:67, 68) Eevn doa Peeta neva andastan evriting weh Jeezas mi teech dehn, hihn mi stay laayal bikaaz ih mi andastan di chroot bowt Krais. Yoo ku schrentn yu fayt eena weh di Baibl teech tu. If yu du dat, yu fayt wahn stay schrang noh mata weh hapm, ahn yu wahn help adaz fi mek dehn ga schrang fayt tu.—2 Jan 1, 2.