1. Mbehi ku turi kukoresa ekigambo “amazima” nituba nitumanyisa ki?

“NI BATA oku wamanyire amazima? Mbehi okazarirwa omu mazima? Omazire obwire oburi kwingana ki omu mazima?” Mbehi hariho owakuburize ebibuzo nk’ebyo ninga iwe hine owu wabiburize? Mbehi ku turi kukoresa ekigambo “amazima” nituba nitumanyisa ki? Nitukira kukoresa eco kigambo turi kushoborora enyikiriza zitu, okuramya kwitu, ninga shi oku turi kubaho. Abantu abari omu “mazima” nibaba bari kumanya eki Bibuli eri kwegesa kandi nibabaho bari kugendera aha misinge ya yo. Eco nikituma baruga omu dini y’ekishuba rero bagira amagara marungi n’obu bari omu nsi ya Sitaane.—Yoh 8:32.

2. Tukuratize ebiri kugambwa omuri Yohaana 13:34, 35, ni enki ekiri kukira kutuma abantu bayija omu mazima?

² Ni enki ecakuresire omu mazima? Nikibasa kuba ari emitwarize mirungi y’Abahamya ba Yehova. (1 Pet 2:12) Ninga ni aha bwa rukundo eyi bakwerekire. Abingi abari kwija omu nterane zitu aha murundi g’okubanza tibari kufa aha nyegesa ezi bari kuhurira ahari pulatifomu, ahobwe nibafa ahari rukundo eyi turi kubereka. Eco ti ecokutangaza ahabw’okuba Yesu akagambira abegi beye ku rukundo ari yo baribamanyiraho. (Shoma omuri Yohaana 13:34, 35.) Konka ekiri kukira eco tushemerire kuba twine okwikiriza kuhamire.

3. Ni enki ekiri kubasa kubaho okwikiriza kwitu kwaba kwegamire ahari rukundo ya benetata na banyanyazi kusha?

³ Okwikiriza kwitu nikuba kwegamire aha kiri kukira rukundo y’Abahamya ba Yehova. Ahabw’enki? Reka tugire ngu omukristo mugenzi witu, omuzehe ninga shi omupayoniya yakora ekibi c’amani. Ninga mwenetata ninga munyanyazi yakora ekintu cakushasha? Ninga omwe omuri itwe yahinduka omuhakani, yatandika kugamba ku tutine mazima. Mbehi ezo  mbera zabaho, okayikiriza ngu zikuteze ensibo oreke kuhereza Yehova? Eki biri kutwegesa: Yaba okwikiriza kwa we kwegamire aha ku abandi bari kukunda Ruhanga omu mwanya g’okwegamira ahari rukundo eyi ori kukunda Yehova, okwikiriza kwawe tikuriguma. Oku ori kwehurira aha biri kukwata ahari Yehova n’abahereza beye nibibasa kutuma wayongera okwikiriza kwawe; konka nambwenu ni ec’omugasho munonga kwega Bibuli okacenga ebi ori kwega kandi okacondoza kugira ngu ohamye ku ni amazima. Oshemerire kuhamiza kimwe ku Bibuli erimu amazima aha bikwatirine na Yehova.—Rom 12:2.

4. Tukuratize ebiri kugambwa omuri Matayo 13:3-6, 20, 21, ni enki eki bamwe bari kukora okwikiriza kwa bo kwagezibwa?

⁴ Yesu akagamba ku abamwe bari kwikiriza amazima bashemerirwe, konka ku bari kubugana ebigezo okwikiriza kwa bo kuhwa. (Shoma omuri Matayo 13:3-6, 20, 21.) Nibaba batari kutekateka ku kukuratira Yesu kigumire kandi ku kiri kutuma omuntu yabugana ebizibu. (Mat 16:24) Ninga nibabasa kutekateka ku kuba Omukristo kiri kumanyisa kutabugana ebizibu ku ni okutunga emigisha kusha. Konka omuri eyi nsi eyasisikire nitubugana ebizibu byingi. Embera zahinduka nizibasa kutuma okushemererwa kwitu kwacendera.—Zab 6:6; Mub 9:11.

5. Ni enki ekiri kwereka ku benetata na banyanyazi bingi bari kwikiriza kandi bakahamiza kimwe ku bari omu mazima?

⁵ Benetata na banyanyazi bingi nibahamiza kimwe ku babwine amazima. Bata shi? Okwikiriza kwa bo tikuri kuhwa n’obu Abakristo bagenzi ba bo bakubashasha ninga shi bakabatwariza kubi. (Zab 119:165) Nibakira kubugana ebizibu konka okwikiriza kwa bo nikugumizamu kweyongera, tibari kuhwa amani. (Yak 1:2-4) Ni bata oku ori kubasa kugira okwikiriza kuhamire nk’okwe?

6. Mbehi okwikiriza kw’Abegi ba Yesu b’omu kinyigana c’okubanza kukaba kombekire ahari ki?

⁶ Abegi ba Yesu b’omu kinyigana c’okubanza okwikiriza kwa bo kukaba kombekire aha kumanya Ebyahandikirwe n’enyegesa za Yesu Kristo, ni okugamba amazima. (Gal 2:5) Ago mazima ni ebintu byona ebi turi kwikiriza, otwariremu ekitambo ca Yesu n’okuzoka. Entumwa Paulo akaba nayikiriza ku ezo nyegesa zabire ziri amazima. Ahabw’enki? Ahakuba akaba nakoresa Ebyahandikirwe ari ‘kuhamya ku Kristo ashemerire kubonabonesibwa n’okuzoka omu bafu.’ (Byak 17:2, 3) Abegi ba Yesu b’omu kinyigana c’okubanza bakaba nibikiriza ezo nyegesa, kandi omwika oguri kwera gukabakwasa kushoborocerwa ge Ekigambo ca Ruhanga. Bakaba nibikiririza kimwe ku ezo nyegesa zabire zegamire aha Byahandikirwe. (Byak 17:11, 12; Heb 5:14) Okwikiriza kwa bo kukaba kutombekire aha nyehurira kusha kandi bakaba batari kuhereza Yehova omu bwire burungi kusha bari hamwe n’Abakristo bagenzi ba bo. Omu mwanya gw’eco okwikiriza kwa bo kukaba kombekire aha ‘kongera kumanya Ruhanga.’—Kol 1:9, 10.

7. Okwikiriza amazima g’omuri Bibuli nikituma twakora ki?

⁷ Amazima g’omu Kigambo ca Ruhanga nigatura gari aha murembe. (Zab 119:160) Ecokureberaho: Omukristo mugenzi witu yatutwariza kubi ninga yakora ekibi c’amani ago mazima tigari kuhinduka; nangwa n’obu twakubugana ebizibu. Obwe rero tushemerire kumanya enyegesa z’omuri Bibuli kandi twikiririza kimwe ku ni amazima. Twaba twine okwikiriza kuhamire aha nyegesa z’omuri Bibuli, turyaguma turi kwesiga Yehova n’omu mbera zigumire. Mbwenu shi obwe ni bata oku ori kubasa kuhamya okwikiriza kwawe?

8. Tukuratize ebiri omuri 2 Timoseo 3:14, 15, ni enki ecatumire Timoseo yayikiriza ku ebi yayegire biri amazima?

⁸ Timoseo akaba nayesiga ku ebi ari kwikiriza biri amazima. Ahabw’enki yabire ari kubyikiriza basyoya? (Shoma omuri 2 Timoseo 3:14, 15.) Nyina na nyinenkuru ni bo b’okubanza abamwegesize enyegesa z’omu ‘Byahandikirwe ebiri kwera.’ Hatariho okubanganisa na we obweye akataho amani n’obwire ari kweyegesa ebyo Byahandikirwe. Eco kikatuma yayikiriza ku ni amazima. Bwanyima, Timoseo, nyina, na nyinenkuru bakega amazima ag’Abakristo. Hatariho okubanganisa Timoseo, rukundo eyi Abakristo bamwerekire ekamuhiga rero catuma yagira ecetengo c’okwekwatanisa na bo n’okufa ahari abo benetata na banyanyazi. (Fil 2:19, 20) Okwikiriza kweye kukaba kutombekire ah’abandi, ahobwe kukaba kombekire aha mazima agu yabire ari kumanya ahari Yehova. Obwe rero n’iwe oshemerire kutekateka aha bi wayegire omuri Bibuli ebiri kukwata ahari Yehova.

9. Ni ziha nyegesa ishatu ezi oshemerire kwikiriza?

⁹ Kugira ngu oyesige ku ezo nyegesa ziri amazima oshemerire kwikiriza ebi bintu bishatu: Ec’okubanza; oshemerire kuhamya ku Yehova Ruhanga ari we Muhangi w’ebintu byona. (Kur 3:14, 15; Heb 3:4; Kush 4:11) Eca kabiri; oshemerire kwikiririza kimwe ku Bibuli ari obutumwa oburi kuruga ahari Ruhanga. (2 Tim 3:16, 17) Eca kashatu; oshemerire kwikiriza ku Yehova ayine ekibina c’abantu abari kumuhereza bebembirwe Kristo, kandi ku eco kibina ari Abahamya ba Yehova. (Isa 43:10-12; Yoh 14:6; Byak 15:14) Waba ori kwikiriza ebyo bintu bishatu tikiri kwereka ngu nomanya buri kintu cona ekiri omu Bibuli. Ekigendererwa ca we kishemerire kuba kiri ec’okuhamira aha mazima agu wayegire.—Rom 12:1.

10. Ni enki eki tushemerire kukora twamara kumanya amazima?

¹⁰ Wamara kwikiriza amazima agari kukwata ahari Ruhanga, Bibuli, n’aha bahereza  beye noba oshemerire kukoresa Ebyahandikirwe ori kukwasa abandi kugikiriza. Ahabw’enki? Ahakuba Abakristo twine omurimo g’okwegesa amazima abari kuba betegwire kutuhurira. * (1 Tim 4:16) Kandi twaba turi kukwasa abandi kwikiriza amazima g’omuri Bibuli n’itwe nikituma twakizaho kugesiga.

11. Ni kiha cokureberaho eki Paulo yatuterireho eki tushemerire kutoreza?

¹¹ Obu entumwa Paulo yabire ari kwegesa abantu akaba ‘nateraho kubikiririsa ebya Yesu, nayiha omu Biragiro bya Musa n’omu’ by’abahanuzi. (Byak 28:23) Ni bata oku turi kubasa kutoreza Paulo twaba turi kwegesa abandi amazima? Nituba tushemerire kukora ekirengire aha kubegesa amazima kusha. Tushemerire kukwasa abegi ba Bibuli kutekateka aha Byahandikirwe kugira ngu bakizeho kuhika hihi ya Yehova. Nitwenda ngu bikirize amazima bekundire, atari okugira ngu batuhe ekitinisa, ahabw’okuba nibamanya ku ebi bayegire ahari Ruhanga biri amazima.

12-13. Ni bata oku abazire bari kubasa kukwasa abana ba bo kuguma omu mazima?

¹² Abazire nibaba bari kwenda ngu abana ba bo bagume bahamire omu mazima. Nobasa kutekateka ngu baba bari kukoringana ge n’abo omu kibina, nikituma bagira entunguka omu by’omwika. Konka omwana wa we yayikiriza ku ebi yayegire biri amazima, naba ashemerire kutunga ekiri kukira aha banywani barungi. Naba ashemerire kugira obunywani na Ruhanga kandi ayikiririza kimwe ku ebi Bibuli eri kukwegesa biri amazima.

¹³ Omuzire yaba ari kwegesa omwana weye amazima agari kukwata ahari Ruhanga, ashemerire kumuteraho ecokureberaho kirungi kugira ngu na we abe omwegi murungi. Abazire nibaba bashemerire kukwata obwire bakatekateka aha bi bari kwega. Eco nikituma bahiga abana ba bo kuta omu nkora ebi bari kwega. Nibaba bashemerire kwegesa abana ba bo kukoresa ebikoreso ebi turi kwegesezamu abantu Bibuli, kugira ngu na bo bije kubikorese bari kwegesa abandi. Abazire bakikora basyoya, nibaba bakwasa abana ba bo kwereka ku nibasima Yehova n’‘omwambari w’omwesigwa kandi ow’omunyabwenge’ owu ari kukoresa kugira ngu atukwase kushoborocerwa Bibuli. (Mat 24:45-47) Abazire bashemerire kukora ekirengire aha kwegesa abana ba bo amazima. Bashemerire kubakwasa kugira okwikiriza kugumire bari kubegesa ebintu ‘ebitari kumanywa bya Ruhanga,’ bari kwihirira aha myaka n’aha bushoborozi bw’omwana.—1 Kor 2:10.

14. Ahabw’enki tushemerire kushwijuma obuhanuzi bw’omuri Bibuli? (Nambwenu reba akashanduku akari kugira ngu: “ Mbehi nobasa kushoborora obu buhanuzi?”)

¹⁴ Obuhanuzi bw’omuri Bibuli ni ekicweka c’omugasho c’Ekigambo ca Ruhanga ekiri kutukwasa kugira okwikiriza kugumire. Ni buha buhanuzi obwatumire okwikiriza kwa we kwakizaho kuguma? Nobasa kugamba ngu ni obuhanuzi obukwatirine n’‘ebiro by’emperu.’ (2 Tim 3:1-5; Mat 24:3, 7) Konka shi ni buha buhanuzi obwahikirire oburi kugumya okwikiriza kwa we? Ecokureberaho: Mbehi nobasa kushoborora oku obuhanuzi bw’omuri Danieli ekicweka ca 2 ninga omuri Danieli ekicweka ca 11 oku bwahikirire omu bwire bwa kare n’oku buri kuhikirira? * Okwikiriza kwa we ku kurabe kwegamire aha mazima g’omuri Bibuli, mazima tikurihwa! Yetegereze ecokureberaho ca mwenetata w’omuri Jamani owahiganisibwe munonga omu rutaro rwa kabiri rw’ensi yona. N’obu yabire atari kumanya ge obuhanuzi oburi kugamba aha biro by’emperu akaba nayesigira kimwe Ekigambo ca Ruhanga.

15-17. Ni bata oku kweyegesa Bibuli byakwasize benetata kuguma bahamire obu ekibina ca Nazi cabire kiri kubahiganisa?

¹⁵ Obu Jamani yabire eyebembirwe ekibina ca Nazi, benetata na banyanyazi bingi bakatebwa omu bihome. Hitler na Heinrich Himmler bakaba nibangira kimwe Abahamya ba Yehova. Munyanyazi omwe akagira ngu: Himmler akagambira abanyanyazi abu twabire tusibirwe hamwe ngu: “Yehova wanyu nategeka omu iguru konka hanuya omu nsi n’itwe turi kuhategeka! Nitwija kureba abarabugane ebizibu yaba ari itwe ninga shi imwe!” Ni enki ecakwasize abahereza ba Yehova kuguma bine okwikiriza kugumire?

¹⁶ Abo Begi ba Bibuli bakaba bari kumanya ku Obukama bwa Ruhanga bwatandikire kutegeka omuri 1914. Obwe rero tikirabatangarize ahabw’okuhiganisibwa oku babugine. Abahereza ba Yehova nibahamiza kimwe ku hatariho obutegeki bw’omu nsi oburi kubasa kwemereza Ruhanga ngu atahikiriza ekigendererwa ceye. Hitler tarabasize kwihaho  okuramya kw’amazima ninga ngu ateho gavumenti eri kubasa kwemereza Obukama bwa Ruhanga. Benetata bakaba nibamanya ge ku obutegeki bwa Hitler ninga shi obundi burirugaho.

¹⁷ Okwikiriza kw’abo benetata na banyanyazi kukaba kugumire mazima. Ku hahwireho emyaka mice, ekibina ca Nazi kikashenyuka kandi Heinrich Himmler owagambire ngu: “Omu nsi n’itwe turi kuhategeka” na we akahunga. Obu yabire ari kuhunga akabugana mwenetata ori kwetwa Lübke owabire asibirwe. Ahabw’obwoba bwingi, akabuza mwenetata Lübke ngu: “Abegi ba Bibuli bari bata shi?” Mwenetata Lübke akamushobororera ku Abahamya ba Yehova babire bari kumanya batari kubanganisa ku ekibina ca Nazi kirishenyuka kandi ku baricungurwa. Himmler owabire nakunda kugamba ebigambo bibi by’okunyiza Abahamya ba Yehova, obwo bwire taragarukire kugamba. Ku hahwireho obwire buce akeyita. Ebyo nibitwegesa ki? Twayeyegesa Bibuli otwariremu obuhanuzi, nitugira okwikiriza kugumire kandi nikituma twayesiga ku turije kuguma tuhamire omu bwire bw’ebigezo.—2 Pet 1:19-21.

18. Nk’oku biri kugambwa omuri Yohaana 6:67, 68, ahabw’enki tushemerire ‘kweyongera kukanya omu kumanya n’okwetegereza kona’ nk’oku Paulo yakihandikire?

¹⁸ Twena tushemerire kwereka rukundo, ahakuba ni yo eri kwereka ku turi Abakristo b’amazima. Konka nambwenu tushemerire ‘kweyongera kukanya omu kumanya n’okwetegereza kona.’ (Fil 1:9) Kandi tushemerire kwerinda ‘kutwarwa buri muyaga gw’enyegesa n’oburyarya bw’abantu,’ harimu n’abahakani. (Efe 4:14) Obu abegi bingi b’omu kinyigana c’okubanza bayemerize kukuratira Yesu, entumwa Petero akereka ku yabire ari kwikiriza ebi Yesu yagambire aha “magara agatahwaho.” (Shoma omuri Yohaana 6:67, 68.) N’obu Petero omuri obwo bwire yabire atashoborokirwe ge ebikwatirine n’ebyo bigambo, akaguma ari omwesigwa ahakuba akaba ari kumanya Kristo by’amazima. N’iwe nobasa kukizaho kwikiriza enyegesa z’omuri Bibuli. Ku orakikore basyoya okwikiriza kwa we kuryaguma kuhamire omu bwire bw’ebigezo kandi noyija kukwasa abandi kombeka okwikiriza kwa bo.—2 Yoh 1, 2.