1. Ki nou pe esey dir ler nou servi sa mo “laverite”?

“KI MANNYER ou’n konn laverite?” “Eski ou’n grandi dan laverite?” “Konbyen letan ou dan laverite?” Petet serten dimoun in demann ou sa bann kestyon oubyen petet ou osi ou’n demann sa bann kestyon. Ki nou pe esey dir ler nou servi sa mo “laverite”? Normalman ler nou servi sa mo “laverite,” nou pe koz lo sa ki nou krwar ladan, lafason ki nou ador Bondye e lafason ki nou viv nou lavi. Bann dimoun ki “dan laverite,” i konnen ki Labib i dir e zot aplik bann prensip Labib dan zot lavi. Zot lib parski zot nepli krwar dan lansennyman bann fo larelizyon e zot lavi i pli ere malgre zot pe viv dan lemonn Satan.​—Zan 8:32.

2. Dapre Zan 13:34, 35, kwa ki’n kapab atir en dimoun pour vin dan laverite?

² Kwa ki ti atir ou pour vin dan laverite? Petet i ti akoz bon kondwit Temwen Zeova. (1 Pyer 2:12) Oubyen, i ti sa lanmour ki zot demontre anver lezot. En kantite dimoun ki vin renyon pour premye fwa i eksperyans sa lanmour e sa in mark zot plis ki nenport keksoz ki zot in tande pandan renyon. Nou pa sirprann parski Zezi ti dir ki sa lanmour ki son bann disip i demontre anver kanmarad pou montre ki zot vreman son bann disip. (Lir Zan 13:34, 35.) I vre ki sa lanmour ki bann serviter Zeova i demontre i ed nou konnen lekel Son bann serviter, me pour nou kapab annan en lafwa for, i annan lezot keksoz nou bezwen fer.

3. Ki i kapab arive si nou lafwa dan Bondye i baze zis lo sa lanmour ki nou bann frer ek ser i demontre?

³ Nou lafwa pa devret baze zis lo lanmour ki i annan parmi pep Bondye. Akoz? Parski si nou lafwa i baze zis lo  sa lanmour, nou kapab fasilman perdi li. Par egzanp, nou kapab aret servi Zeova si en frer oubyen ser, petet menm en ansyen oubyen en pionye, i fer en fot grav. Petet osi nou kapab aret servi Zeova si en frer oubyen ser i ofans nou oubyen i vin en aposta e i dir ki sa ki nou krwar ladan, pa vre. Alor, si nou anvi annan en lafwa for, nou lafwa i devret baze lo nou bon relasyon avek Zeova. Si ou annan lafwa dan Bondye akoz sa ki lezot i fer e pa akoz ou annan en relasyon avek Zeova, ou lafwa pa pou for. Lafason ki ou santi konsernan Zeova ek son pep i kapab ed ou pour konmans devlop lafwa. Me i osi vreman enportan pour etidye Labib, konpran sa ki ou pe aprann e fer resers pour ki ou kapab asire ki ou pe aprann laverite lo Zeova. Ou bezwen asire ki Labib pe ansenny ou laverite lo Zeova.​—Rom. 12:2.

4. Dapre Matye 13:3-6, 20, 21, ki serten i fer ler zot pas dan problenm?

⁴ Zezi ti dir ki serten ti pou aksepte laverite “avek lazwa,” me ki zot lafwa ti pou afebli ler zot pas dan problenm. (Lir Matye 13:3-6, 20, 21.) Petet zot pa ti realize ki bann disip Zezi ti pou fer fas avek bann difikilte. (Mat. 16:24) Oubyen petet zot ti krwar ki ler ou vin en Kretyen, ou pou nepli annan problenm oubyen ki Bondye pou toultan rezourd ou problenm. Me dan sa lemonn, i pou annan problenm. Sirkonstans i kapab sanze e sa i kapab fer nou perdi nou lazwa pour en serten letan.​—Ps. 6:6; Ekle. 9:11, NWT.

5. Kwa ki montre ki laplipar nou bann frer ek ser i asire ki zot dan laverite?

⁵ Laplipar nou bann frer ek ser i montre ki zot asire ki zot dan laverite. Akoz nou dir sa? Zot lafwa pa afeblir menm ler en frer oubyen ser i bles zot ouswa zot fer en fot grav. (Ps. 119:165, NWT) Sak fwa ki zot pas dan problenm, zot lafwa pa afebli, o kontrer i vin pli for. (Zak 1:2-4) Ki mannyer ou kapab devlop sa kalite lafwa for?

6. Lo kwa ki lafwa bann disip dan premye syek ti baze?

⁶ Lafwa bann disip dan premye syek ti baze lo sa ki zot ti konnen lo Labib e sa ki Zezi Kri ti ansennyen, setadir “laverite sa bon nouvel.” (Gal. 2:5) Sa laverite i tou sa ki nou krwar ladan konman Kretyen e sa i enkli laverite konsernan sakrifis Zezi ek son rezireksyon. Zapot Pol ti asire ki sa bann lansennyman ti vre. Akoz nou dir sa? Parski i ti servi “Lekritir pour prouve ki Kris ti bezwen soufer e ganny resisite.” (Akt 17:2, 3) Bann disip dan premye syek ti aksepte sa bann lansennyman e zot ti depan lo lespri sen pour ed zot konpran Parol Bondye. Zot ti fer resers pour ki zot menm zot fer sir ki sa bann lansennyman i sorti dan Lekritir. (Akt 17:11, 12; Ebr. 5:14) Zot lafwa pa ti baze zis lo bann santiman e zot pa ti servi Zeova zis akoz zot ti ere ler zot ti asosye avek lezot frer ek ser. O kontrer, zot lafwa ti baze lo “konnesans egzakt lo Bondye.”​—Kol. 1:9, 10.

7. Ki byenfe nou gannyen ler nou annan lafwa dan bann lansennyman Labib?

⁷ Bann laverite dan Labib pa sanze. (Ps. 119:160) Par egzanp, bann laverite dan Labib pa sanze si en frer oubyen en ser i ofans nou ouswa i fer en pese grav. Osi, sa bann laverite pa sanze ler nou pas dan problenm. Alor, nou bezwen konn  byen bann lansennyman Labib e fer sir ki sa bann lansennyman i vre. Zis parey en lank i anpes en bato drive dan movetan, nou lafwa for ki baze lo sa ki Labib i dir, pou ed nou reste fidel ler nou pas dan problenm. Ki mannyer ou kapab ranforsi ou lafwa dan laverite?

8. Dapre 2 Timote 3:14, 15, kwa ki ti fer Timote asire ki i ti dan laverite?

⁸ Timote ti asire ki i ti dan laverite. Ki mannyer i ti konn sa? (Lir 2 Timote 3:14, 15.) Son manman ek son granmanman ti premye pour ansenny li “lekritir sen.” San dout, i ti osi pas letan e fer bokou zefor lo li menm, pour etidye Parol Bondye. Akoz sa, i ti ganny “persyade pour krwar” ki sa ki i ti pe aprann ti laverite. Pli tar, Timote, son manman ek son granmanman ti aprann bann lansennyman Zezi. San dout, Timote ti enpresyonnen par lanmour ki bann disip Zezi ti demontre. I ti vreman anvi pas letan avek bann frer ek ser dan kongregasyon e i ti osi anvi ed zot. (Fili. 2:19, 20) Par kont, son lafwa pa ti baze lo santiman ki i ti annan pour lezot dimoun me i ti baze lo sa lansennyman ki sorti dan Parol Bondye, ki ti fer li vin pli pros avek Zeova. Ou osi ou devret etidye Labib e asire ki Labib i ansenny ou laverite lo Zeova.

9. Ki sa trwa laverite de baz ki ou bezwen fer sir lo ou menm?

⁹ Pour konmanse, ou bezwen lo ou menm fer sir ki ou konn omwen trwa laverite de baz. Premyerman, ou bezwen asire ki Zeova ki’n kree tou keksoz. (Egz. 3:14, 15, NWT; Ebr. 3:4; Rev. 4:11) Dezyenmman, ou bezwen asire ki Labib i mesaz Bondye pour bann imen. (2 Tim. 3:16, 17) Trwazyenmman, ou bezwen asire ki Temwen Zeova i sa group dimoun ki pe ador Zeova e Kris i zot sef. (Iza. 43:10-12; Zan 14:6; Akt 15:14) I vre ki ou bezwen konn sa trwa laverite de baz me sa pa vedir ki ou bezwen konn tou sa ki dan Labib. Ou lobzektif i devret pour servi  ou “abilite pour reflesir” pour ou fer sir ki ou dan laverite.​—Rom. 12:1.

10. Apard ki konn laverite, ki nou bezwen fer?

¹⁰ Apre ki ou menm ou’n asire ki sa ki Labib i dir konsernan Bondye, Labib e pep Bondye i vre, ou bezwen servi Labib pour konvenk lezot konsernan sa bann laverite. Akoz? Parski nou bann disip Kris e nou annan sa responsabilite pour ansenny laverite ki nou’n aprann avek bann ki ekout nou. * (1 Tim. 4:16) Anmezir ki nou esey ed lezot pour krwar ki sa ki Labib i dir i vre, nou osi ranforsi nou lafwa dan sa bann laverite.

11. Ki Pol ti fer ler i ti ansenny dimoun e ki mannyer nou kapab swiv son legzanp?

¹¹ Ler zapot Pol ti ansenny dimoun, i ti “servi Lalwa Moiz ek liv bann Profet pour persyad zot pour krwar dan Zezi.” (Akt 28:23) Ki mannyer nou kapab swiv legzanp Pol ler nou ansenny lezot laverite? Nou pa devret zis dir zot sa ki Labib i dir. Nou devret ed nou bann etidyan Labib pour etidye e reflesir byen lo sa ki zot aprann dan Labib. Nou pa anvi zot aksepte laverite zis akoz zot annan respe pour nou me akoz zot in etidye pour zot menm e zot in realize ki sa ki zot pe aprann i laverite konsernan nou Bondye ki kontan nou.

12-13. Ki mannyer paran i kapab ed zot zanfan reste dan laverite?

¹² Paran, nou asire ki ou anvi ou zanfan i reste dan laverite. Ou kapab krwar ki si zot annan bann bon zanmi dan kongregasyon, zot pou devlop en lafwa for e progrese spirityelman. Par kont, si ou anvi ki ou zanfan i asire ki sa ki i pe aprann dan Labib i laverite, zot bezwen plis ki sa. Zot bezwen annan zot prop lanmitye avek Bondye e asire ki sa ki Labib i dir i vre.

¹³ Pour bann paran kapab ansenny zot zanfan laverite lo Bondye, zot bezwen montre zot zanfan ki zot osi zot etidye Labib. Zot bezwen pran letan pour reflesir lo sa ki zot in aprann. Koumsa zot pou kapab ansenny zot zanfan pour fer parey. Zis parey zot pou ansenny zot etidyan Labib pour servi tou bann zouti pour etidye Labib, zot bezwen ansenny zot zanfan menm parey. Si zot fer sa, zot pou ed zot zanfan pour kontan Zeova e osi pour annan konfyans ki Zeova pe servi “sa lesklav fidel e pridan” pour ed nou konpran sa ki Labib i dir. (Mat. 24:45-47) Paran, pa zis ansenny ou zanfan  bann laverite de baz. Ansenny zot bann “keksoz profon konsernan Bondye” dapre zot laz ek abilite. Sa pou ed zot devlop en lafwa for.​—1 Kor. 2:10.

14. Akoz nou devret etidye profesi Labib? (Vwar bwat “ Eski ou kapab eksplik sa bann profesi?”)

¹⁴ Bann profesi Labib i vreman enportan parski i ed nou devlop lafwa for dan Zeova. Ki profesi ki’n ranforsi ou lafwa? Petet ou pou mansyonn bann profesi konsernan “bann dernyen zour.” (2 Tim. 3:1-5; Mat. 24:3, 7) Me ki lezot profesi ki’n akonpli ki kapab ranforsi ou lafwa plis ankor? Par egzanp, eski ou kapab eksplike ki mannyer bann profesi dan Danyel sapit 2 ek Danyel sapit 11, in ganny akonplir dan lepase e ki mannyer i pe kontinyen ganny akonplir ozordi? * Ler ou lafwa i baze lo bann laverite ki dan Labib, ou lafwa pou solid. Annou vwar legzanp nou bann frer Lalmanny ki ti fer fas avek persekisyon pandan Dezyenm Lager Mondyal. Menm si zot pa ti konpran tou bann profesi Labib konsernan bann dernyen zour, zot ti annan lafwa for dan Parol Bondye.

15-17. Ler bann Nazi ti persekit nou bann frer, kwa ki ti ed nou bann frer andire?

¹⁵ Ler bann Nazi ti o pouvwar Lalmanny, plizyer milye nou bann frer ek ser ti ganny anvoye dan bann kan konsantrasyon. Hitler ek SS Chief Heinrich Himmler ti ay Temwen Zeova. Dapre enn nou ser ki ti dan kan konsantrasyon, Himmler ti dir avek en group zot: “I kapab ki zot Zeova pe rennyen dan lesyel, me isi lo later, nou ki la! Nou a montre zot lekel ki pou andir pli lontan, zot oubyen nou!” Kwa ki ti ed pep Zeova pour reste fidel?

¹⁶ Bann Etidyan Labib ti konnen ki Rwayonm Bondye ti konmans dirize an 1914. Alor, zot pa ti sirprann ki zot ti pe ganny persekite sa kantite. Me pep  Zeova ti asire ki i ti napa okenn gouvernman imen ki ti pou anpes Zeova fer son lavolonte. Hitler pa ti kapab elimin vre ladorasyon oubyen fer en gouvernman ki ti pou pli for ki Rwayonm Bondye. Nou bann frer ti asire ki dan en fason ou en lot, dominasyon Hitler ti pou fini.

¹⁷ Sa ki sa bann frer ek ser ti krwar ladan ti vre. Pa bokou letan apre, gouvernman Nazi ti perdi pouvwar e Heinrich Himmler, sa zonm ki ti dir “isi lo later, nou ki la,” ti pe esey sove pour li pa ganny atrape. Pandan ki i ti pe sove, i ti zwenn Frer Lübke, en frer ki ti dan prizon. Himmler ti konnen ki Frer Lübke ti en Temwen Zeova. Byen dekouraze, Himmler ti demann Frer Lübke: “Etidyan Labib, be ki arive aprezan?” Frer Lübke ti eksplik Himmler ki Temwen Zeova ti konnen ki gouvernman Nazi pa ti pou dire e ki zot ti pou ganny libere. Himmler ti’n dir en kantite keksoz lo Temwen Zeova, me safwasi i pa ti konnen ki pour dir. Pa bokou letan apre sa, Himmler ti swiside. Ki nou aprann? Ler nou etidye Labib, ensi ki bann profesi, sa i kapab ed nou annan en lafwa for dan Bondye e ed nou fer fas avek bann persekisyon.​—2 Pyer 1:19-21.

18. Dapre Zan 6:67, 68, akoz nou bezwen konnesans egzakt e vreman annan en bon zizman, parey Pol ti dir dan Filipyen 1:9?

¹⁸ Pour nou montre ki nou bann vre Kretyen, nou bezwen demontre lanmour. Nou osi bezwen “konnesans egzakt e . . . vreman annan en bon zizman.” (Fili. 1:9) Si non, nou kapab ganny enfliyanse “avek tou sort kalite lansennyman, trik ek riz” e osi avek bann aposta. (Efe. 4:14) Ler serten disip ti aret swiv Zezi, zapot Pyer ti montre ki i ti asire ki Zezi ti annan “parol lavi eternel.” (Lir Zan 6:67, 68.) Menm si sa letan Pyer pa ti konpran tou sa ki Zezi ti ansennyen, i ti reste fidel parski i ti konpran laverite konsernan Kris. Ou osi ou kapab ranforsi ou lafwa dan sa ki Labib i dir. Si ou fer sa, ou lafwa pou reste for malgre nenport kwa ki arive e ou pou ed lezot pour devlop lafwa zot osi.​—2 Zan 1, 2.