1. ¿Kasa aküjüneeka süka tü pütchikat «tü shiimainkat»?

«¿JAMAKUWAʼIPAI süpüla punoujainjachin sünain tü shiimainkat?». «¿Pütüjaatüjülia aaʼu tü shiimainkat joʼuuiwaʼaya pia?». «¿Jeʼraichi pia juya sünain pütüjain saaʼu tü shiimainkat?». Eeshijaʼa püsakinnüle sünain tia jee piale asakirüin na waneinnua. ¿Kasa aküjüneeka süka tü pütchikat «tü shiimainkat»? Shia aküjüneeka süchiki tü wanoujakalü anain, tü waaʼinrakat süpüla waʼwaajüin Maleiwa otta tü wakuwaʼipakat. Chi wayuu atüjaakai saaʼu tü shiimainkat, nütüjaa aaʼu tü sümakat tü Wiwüliakat otta naaʼinrüin tü sümakat. Sünainjee tia, taashisü nukuwaʼipa suulia tü alawaa ekirajünakalü anain otta talatüsü maʼin naaʼin mayaainjeʼe nüleʼeruʼuin tü kaainjalaakat (Juan 8:32).

2. Sünainjee tü sümakat Juan 13:34, 35, ¿kasa eeka süpüla kamalain anainjee nümüin wanee wayuu tü shiimainkat?

² ¿Kasa kamalainka atuma pümüin tü shiimainkat? Eesüjaʼa shiale sutuma piʼrüin anain maʼin nakuwaʼipa na aʼyataashiikana nümüin Jeʼwaa (1 Ped. 2:12). Jee shiale sutuma aijiraain maʼin naya. Eeshii na kamalainkana maʼin amüin tü shiimainkat sünainjee kamaneein maʼin na wawalayuukana namüin. Shia sotoka naaʼin tia suulialeʼeya tü ekirajünakalü anain soʼu tü palajatkat nakua sünain tü outkajawaakat. Nnojotsü ponuin waaʼin tia, süka jamüin, nayaawatüneenain na nikirajüinkana Jesuu sünain aijiraain maʼin naya (paashajeʼera Juan 13:34, 35). Shiapejeʼe choʼujaain maʼin wamüin icheinjatüin tü wanoulakat.

3. ¿Kaseerü alataka wamüin wanoujale neʼe sünainjee weʼrüin aijiraain na wawalayuukana?

³ Nnojoishii waya anoujain neʼe sutuma weʼrüin aijiraain maʼin na aʼyataashiikana nümüin Jeʼwaa. ¿Jamüsü watüjaaka saaʼu tia? Jülüjataa paaʼin kaainjarale wanee laülaashi jee niale wanee pürekutsoot. Aire pümüin tü naaʼinrakat wanee wawala, nikirajalaʼa nümüle sünain alawaa jee alawaale naashin tü wanoujakalü  anain, ¿kaseerü paaʼinraka sülatüle pümüin tia? ¿Ooʼulaajeeiche pia suulia aʼyatawaa nümüin Jeʼwaa? Anuu tü waaʼinrajatkat: anoujainjana waya sünainjee alin wapüla Jeʼwaa. Nnojoishii anoujainjanain neʼe waya sünainjee tü naaʼinrakat na waneinnua, maʼaka saaʼin kamalain wamüin aijiraain na wawalayuukana. Tü wanoulakat müsü aka saaʼin wanee piichi, nnojotsü wakumajüinjatüin süka wanee kasa eekai jawaʼawain. Wakumajüinjatü shia süka wanee kasa eekai ichein. Makalaka piyaawatüinjatüin saaʼu shiimain tü sümakat tü Wiwüliakat nüchiki Jeʼwaa (Roma 12:2).

4. Sünainjee tü sümakat Mateo 13:3-6, 20, 21, ¿kaseerü alataka sümüin nunoula wanee wayuu suuʼulakünüle naaʼin?

⁴ Naashin Jesuu, eejeena na aapaakana sümaa tü shiimainkat sümaa «talataa aaʼin». Eejeenapejeʼe na amalajaakana anoula suuʼulakünapa naaʼin (paashajeʼera Mateo 13:3-6, 20, 21). Eesü nnojorüle natüjaain saaʼu neʼreenain müliaa sünainjee noushikajaain nüchiirua Jesuu (Mat. 16:24). Eesü jülüjale naaʼin nnojoleerüin kasain alatüin namüin süka nanoujain. Eepejeʼe sülatalaʼa sümeerüle wanee kasa wamüin. Eesüjaʼa mojeerüle waaʼin sutuma tia (Sal. 6:6; Ecl. 9:11).

5. ¿Kasa naaʼinraka waneinnua wawalayuu shiimainkana amüin tü nanoujakalü anain?

⁵ Wainma na wawalayuu atüjaakana saaʼu shiimain tü nanoujakalü anain. Nnojotsü amalajaain tü nanoulakat sünainjee tü kasa mojusü aainjünakat namüin jee neʼrüle kaainjalain wanee wawala (Sal. 119:165). Jamüsüjaʼa sülatüle wanee kasa mojusü namüin, nnojotsü amalajaain tü nanoulakat, akatchinraasü maʼin (Sant. 1:2-4). ¿Kasa waaʼinrajatka süpüla katchinjatüin tü wanoulakat?

6. ¿Kasa naaʼinraka na nikirajüinkana Jesuu süpüla nakatchinrüin nanoula?

⁶ Katchinsü nanoula na nikirajüinkana Jesuu sutuma nekirajaain sünain tü Ashajuushikat otta sünainjee nekirajünüin nutuma Jesuu (Gal. 2:5). Tia nikirajakalü anain Jesuu, shia süpüshuaʼa tü kasa wekirajakalü anain maʼaka saaʼin naapajiraain nikii Jesuu otta süsoʼiraain naaʼin. Nütüjaa aaʼu chi aluwataaushikai Pablo müinya tia. ¿Jamüsü watüjaaka saaʼu tia? Nüküjain sükajee tü Wiwüliakat «sünain müliainjachin [Jesuu], nuʼutünajachin aaʼin otta nüsoʼiraainjachin aaʼin süchikijee» (Aluw. 17:2, 3). Natüjaa aaʼu na nikirajüinkana Jesuu shiimain tia jee neʼitaain naaʼin sünain nayaawateerüin saaʼu tü nünüikikat Maleiwa nutuma chi naaʼinkai. Nekirajaa anainrü tia otta nayaawataka saaʼu suluʼujeejatüin shia tü Ashajuushikat (Aluw. 17:11, 12; Heb. 5:14). Nnojotsü katchin neʼe nanoula sünainjee neʼrüin aijiraain na nawalayuukana. Nnojoishii neʼe naya aʼyataain nümüin Jeʼwaa sünainjee anain namüin namaain naya na anoujashiikana. Katchinsü tü nanoulakat sünainjee tü natüjaakalü aaʼu nüchiki Maleiwa (Col. 1:9, 10).

7. ¿Jameerü tü wanoulakat shiimainre wamüin tü sümakat tü Wiwüliakat?

⁷ Tü shiimain aküjünakat suluʼu tü Wiwüliakat, matüjainsat aʼwanajawaa (Sal. 119:160). Jaʼitasü saainjünüin kasa mojusü wamüin, kaainjalain wanee wawala jee sülatüin wanee kasa mojusü wamüin, ayatüsia shia maʼakaajüle. Makalaka wekirajaainjanain maʼin sünain tü sümakat süpüla watüjaainjatüin saaʼu shiimainre shia. Shiimainre wamüin tü sümakat, icheerü wanoula soʼunnaa sülatüin kasa mojusü wamüin. Meerü aka saaʼin wanee anuwa nnojotka sülüʼüjain palaa sutuma saʼalijain shia wanee karapin. ¿Kasa waaʼinrajatka süpüla watüjaain saaʼu shiimainre tü wanoujakalü anain?

8. Saashin 2 Timoteo 3:14, 15, ¿kasa naaʼinraka Timoteo süpüla nütüjaain saaʼu shiimain tü nunoujakalü anain?

⁸ Jamüshijaʼa Timoteo, nütüjaa aaʼu shiimain tü nunoujakalü anain. ¿Jamüsü nütüjaaka saaʼu tia? (paashajeʼera 2 Timoteo 3:14, 15). Ekirajünüshi nia sutuma tü niikat otta sutuma tü noushukot sünain «tü karaloukta nüchikimaajatkat Maleiwa». Ekirajaapejeʼe maʼin nia nümüiwaʼa  sünain tia karaloʼutakat. Sünainjee tia, nütüjaa aaʼu shiimain tü sümakat tü Ashajuushikat. Mapa, anoujashi Timoteo sünain tü nikirajakalü anain Jesuu, müsia tü niikat sümaa tü noushukot. Ponusü maʼin naaʼin Timoteo aijiraain maʼin na nikirajüinkana Jesuu otta kotteeshi nia namaa süpüla nükaalinjain naya (Filip. 2:19, 20). Nnojotpejeʼe shiain katchin atuma nunoula tia. Katchinsü nunoula sünainjee nikirajaain sünain tü Ashajuushikat otta nütüjaa aaʼu shiimain tia. Aleeweeshi maʼin nia nümaa Jeʼwaa suluʼujee tia. Müinjanaʼaya waya, ekirajaainjana waya sünain tü Wiwüliakat otta watüjaainjatü saaʼu shiimainre tü wekirajaakalü anain.

9. Püküja süchiki tü apünüinsü kasa watüjaainjatkalü aaʼu.

⁹ Süpüla tia, choʼujaasü watüjaainjatüin saaʼu apünüinsü kasa suluʼujee tü Wiwüliakat. Tü palajatkat, watüjaainjatü saaʼu niain neʼe Jeʼwaa chi Kakumalakai tü kasakat süpüshuaʼa (Éx. 3:14, 15; Heb. 3:4, TNM; Alat. Map. 4:11). Tü piamakat, watüjaainjatü saaʼu nüshajiralain Maleiwa tü Wiwüliakat napüla na wayuukana (2 Tim. 3:16, 17). Tü apünüinkat, watüjaainjatü saaʼu kapueulosein Jeʼwaa otta niain Jesuu chi nekiipüʼükai. Tia nupueulosekat Jeʼwaa, naya na aküjaliikana pütchi nüchiki Jeʼwaa (Is. 43:10-12; Juan 14:6; Aluw. 15:14). Süpüla watüjaain saaʼu tia, nnojotsü choʼujaain watüjaainjatüin saaʼu süpüshuaʼa tü sümakat tü Wiwüliakat. Tü waaʼinrajatkat, shia wayaawatüinjatüin saaʼu shiimainre tü wekirajaakalü anain (Roma 12:1, TNM).

10. ¿Kasa maa waaʼinrajatka watüjaapa saaʼu tü shiimainkat?

¹⁰ Watüjaapa saaʼu shiimain tü wekirajaakalü anain nüchiki Maleiwa, süchiki tü Wiwüliakat otta süchiki nupueulose Maleiwa, watüjainjatü apüleerua wekirajüin na waneinnua sükajee tü sümakat tü Wiwüliakat. ¿Jamüsü waaʼinrajatka tia? Wayakana anoujashiikana, wekirajüinjana na waneinnua sünain tü wekirajaakalü anain suluʼujee tü Wiwüliakat. * (1 Tim. 4:16). Wanaa  sümaa wekirajüin na waneinnua süpüla nanoujain sünain tü sümakat tü Wiwüliakat, shiimainsü maʼin wamüin tü wanoujakalü anain.

11. ¿Jamüsü shikirajia wayuu nutuma chi aluwataaushikai Pablo?

¹¹ Wanaa sümaa nikirajüin Pablo na wayuukana «nüküjain namüin nooʼopünaa Jesús sükajee tü nüshajalakat Moisés otta na nünüikimaajanakana Maleiwa suluʼu tü karaloukta nüchikimaajatkat Maleiwa shiiʼiree nanoujeein nünain Jesús sünain niain chi Nüneekajalakai Maleiwa» (Aluw. 28:23). ¿Kasa waaʼinrajatka süpüla washatüin nukuwaʼipa Pablo wekirajapa wayuu? Nnojotsü waküjainjatüin neʼe namüin tü sümakat tü Wiwüliakat. Wekirajüinjana naya süpüla natüjaainjatüin saaʼu shiimain tü sümakat tü Wiwüliakat otta süpüla aleewain naya nümaa Jeʼwaa. Nnojoishii anoujainjanain na wekirajüinkana sünainjee wamajalain neʼe shia namüin. Natüjaainjatü aaʼu shiimain tü nekirajaakalü anain nüchiki Maleiwa.

12, 13. ¿Kasa naaʼinrüinjatka na kachonshiikana süpüla ayatüin nachonnii sünain anoujaa?

¹² Jiakana kachonshiikana, watüjaa aaʼu keeʼireein jaaʼin ayateein nanoujain jüchonnii. Eesüjaʼa jülüjale jaaʼin nnojoleerüin sümalajaain nanoula jüchonnii aleewale naya namaa na wawalayuukana. Choʼujaapejeʼe namüin jüchonnii natüjaainjatüin saaʼu shiimainre namüin tü nekirajaakalü anain suluʼujee tü Wiwüliakat. Nnojoishii aleewainjanain neʼe naya namaa na wawalayuukana, aleewainjana naya nümaa Maleiwa otta natüjaainjatü saaʼu shiimain tü nekirajaakalü anain suluʼujee tü Wiwüliakat.

¹³ Jiakana kachonshiikana, jikirajüle jüchonnii sünain tü shiimainkat nüchiki Maleiwa, ekirajaainjana jia palajana. Jülüjainjatü jaaʼin tü jikirajaakalü anain süpüla jikirajüin jüchonnii. Müle shia jutuma, meeria shia natuma na jüchonniikana. Jikirajüinjana na jüchonniikana süpüla natüjainjanain achajawaa pütchi suluʼu PÜTCHIPÜLEE SULUʼUKA INTERNET sutuma Watchtower^™, suluʼu tü aplicacionkat JW Library®, suluʼu waneirua karaloʼuta otta video. Jikirajüinjana jüchonnii maʼaka jikirajüin wayuu. Müle shia jutuma, jükaaliinjeena na jüchonniikana süpüla kojutuin Jeʼwaa namüin otta süpüla kojutuinjatüin namüin tü niʼitaakat chi achepchiee oonookai otta kekiikai maʼin süpüla katchinjatüin wanoula (Mat. 24:45-47). Jiakana kachonshiikana, nnojoishii jikirajüinjanain neʼe jüchonnii sünain tü kasa mapüleesat suluʼuka tü Wiwüliakat. Jikirajüinjana naya sünain «tü kasa kapüleesü nümaʼanajeejatkat Maleiwa». Jaaʼinrüinjatü tia wanaapünaa sümaa nouyase jee tü natüjakat apüleerua (1 Cor. 2:10, TNM).

14. ¿Jamüshii wekirajaainjanaka sünain tü kasa alatajatkat saashin tü Wiwüliakat? (Paashajeʼera tü pütchikat « ¿Eesüche süpüla püküjain süchiki pütchikat tüü?»).

¹⁴ Wekirajaale süchiki tü kasa alatüinjatkat saashin tü Wiwüliakat, katchinjeerü wanoula nünain Jeʼwaa. ¿Jarat tü katchinkalü atuma punoula? Eesüjaʼa püküjale süchiki tü kasa alatajatkat «sülüʼütpa sükalia sajaʼttüinjatüin tü kasakat süpüshua» (2 Tim. 3:1-5; Mat. 24:3, 7). ¿Jarat  tü wanee kasa alatüitpakat saashin tü Wiwüliakat akatchinraka maʼin punoula? Eesü süpüla püküjain süchiki jamüin shikeraajia tü pütchi suluʼukat Daniel kapiitulo 2 otta Daniel kapiitulo 11 jee jamüin shikeraajia maaʼulu. * Watüjaale saaʼu tü kasa kapüleesü nümaʼanajeejatkat Maleiwa, katchinjeerü maʼin tü wanoulakat. Jülüjataa waaʼin tü alatakat namüin na wawalayuukana chaa Alemania soʼu müliain maʼin naya atumawaa soʼunnaa tü kanüliakat Segunda Guerra Mundial. Mayaainjeʼe nnojoluin natüjaain saaʼu süpüshuaʼa tü kasa alatajatkat sülüʼütpa sükalia süpüla sajaʼttüin kasakat süpüshuaʼa, nanouja anainrü shiimain tü sümakat tü Wiwüliakat.

15-17. ¿Jamüsü katchinka nanoula na wawalayuu müliakana natuma na kanüliakana nazi?

¹⁵ Soʼu naluwataain na kanüliakana nazi chaa Alemania, wainma maʼin na wawalayuu amaanakana otta püreesakana atumawaa. Hitler otta Heinrich Himmler, wanee niʼipajachi naʼürülashii na aküjaliikana pütchi nüchiki Jeʼwaa. Anuu nünüiki Heinrich sümüin waneirua wawalayuu saashin wanee wawala: «Chi Jeʼwaa jümakai, eeshijaʼa süpüla nuluwataain chaa iipünaa, akaajasaʼa yaa saaʼu tü mmakat, waya aluwataaka. ¿Jaraleena na achecherakana naaʼin? ¿Jiakana, wayataajeenapa wayakana?». ¿Kasa icheka atuma nanoula naya wawalayuukana?

¹⁶ Naya wawalayuukana, natüjaa aaʼu süikaleʼennüin Nuluwataaya Maleiwa soʼu tü juyakat 1914. Müsüjeseʼe nnojoluin ponuin naaʼin müliain naya atumawaa. Natüjaa aaʼu nnojoleechin eein wane wayuu ataʼüleechikai sukuwaʼipa nikeraajüin Maleiwa tü keeʼireekat naaʼin. Jamüshijaʼa Hitler, nnojotsü süpüla nuuntuin nüikaleʼerüin wane aluwataaya alanaʼaleeinjatka suulia Nuluwataaya Maleiwa. Natüjaa aaʼu na wawalayuukana sajaʼttajatüin tü nuluwataayakat Hitler.

¹⁷ Shiimain tia namakat na wawalayuukana, ekeraajüsü tia mapa. Ajaʼlajaasü naluwataaya na kanüliakana nazi. Jamüshijaʼa Heinrich Himmler «akaajasaʼa yaa saaʼu tü Mmakat waya aluwataaka» chi wayuu makai paala, apantajaashi nia shiiʼiree kateein noʼu. Wanaa sümaa nüpantajaain, antiraashi nia nümaa chi wawalakai Lübke, wanee wawala nüpüreesajitkai paala. «Ajaa, piakai ekirajaaikai sünain Wiwülia, ¿kaseetka joo  alatüin wamüin?», müshi Heinrich süka nükanajuuichipain. Nüküjaka chi wawalakai nümüin Heinrich natüjaain saaʼu na aküjaliikana pütchi nüchiki Jeʼwaa sajaʼttajatüin naluwataaya na kanüliakana nazi otta taashinjanain naya noulia. Mayaapejeʼe airütpuʼuin nünüiki Heinrich nachiki na aküjaliikana pütchi, koʼutaʼalüichipa nia, oʼuniraashi nia naaʼin mapa. ¿Kasa watüjaka sünainjee tü naaʼinrakat naya wawalayuukana? Wekirajaale süchiki tü kasa alatajatkat saashin tü Wiwüliakat, katchinjeerü wanoula nünain Maleiwa otta weʼitaajeerü waaʼin nünain soʼunnaa müliain waya atumawaa (2 Ped. 1:19-21).

18. Saashin Juan 6:67, 68, ¿jamüsü watüjaainjatka saaʼu tü nüchekakat Maleiwa wapüleerua otta wayaawatüinjatüin saaʼu tü waaʼinrakat maʼaka nüküjain shia Pablo?

¹⁸ Aijiraainjana waya süpüla shiyaawatüinjatüin saaʼu wayuu nikirajanain waya Jesuu. Choʼujaapejeʼe wamüin watüjaainjatüin saaʼu tü nüchekakat Maleiwa wapüleerua sümaa wayaawatüinjatüin saaʼu tü waaʼinrakat müleka anale jee müleka mojule (Filip. 1:9). Nnojorüle waaʼinrüin tia, joojeena waya «süpüla eʼikeʼennaa süka alawaa sütüma tü anoujayaasükalüirua» (Éf. 4:14). Wanaa sümaa nooʼulaain suulia oʼunaa nüchiirua Jesuu waneinnua nikirajüin, anuu nünüiki chi aluwataaushikai Pedro: «Senyotkalee, nnojotsü wayuu eekai müin aka pia woʼunüinjachikai anainmüin, süka shiimüin sünain shiiʼiranajaaitpain waaʼin sütüma pünüiki süpüla eeinjanain waya waneepia nümaa Maleiwa» (paashajeʼera Juan 6:67, 68). Mayaainjeʼe eein tü kasa nnojotkat niyaawatüin aaʼu Pedro sünainjee tü nümakat Jesuu, waneepiashi nia nümaa, süka jamüin, niyaawatüin saaʼu niain Jesuu chi Kürisütokai. Wanoujale sünain shiimain tü sümakat tü Wiwüliakat, katchinjeerü wanoula soʼunnaa weʼrüin müliaa otta wakaalinjeena na waneinnua süpüla katchinjatüin nanoula (2 Juan 1, 2).