1. “Kukwe metre” yebätä blitata ngwane, ¿drebätä blitata metrere?

“¿ÑOKÄNTI kukwe metre namani gare mäi?”. “¿Mä därebare kukwebätä ya?”. “¿Kä kwäbe te mätä kukwebätä?”. Nitre tärä kukwe ye erere ngwentari mäi, o mä tärä kukwe ye erere ngwentari ni madai, ¿ñan ererea? Akwa “kukwe metre” yebätä kukwe ngwantarita nie ngwane, ¿drebätä blitata metrere? Ye abokän nita kukwe meden mike täte, nita dre nuainne Ngöbö mikakäre täte, nita ja ngwen ño o nita nüne ño yebätä blitata. Nitre tä “kukwe metre” mike täte o tä kukwebätä nieta ngwane, kukwe metre Bibliabätä gare kwin ietre aune kukwe ja jie ngwankäre tä tikanibätä ye tätre mike ütiäte jai meden gärätä. Ye köböire, niaratre ñan niena klabore kukwe ngwarbe kisete, ñakare aune tätre nüne bäri kwin (Juan 8:32).

2. Juan 13:34, 35 tä niere erere, ¿kukwe meden tä nitre töi mike bäri kukwe metre mike gare jai?

² ¿Ñobätä mä tö namani kukwe metre mikai gare jai? Ñobätä ñan aune nitre testiko Jehovakwe nämä ja ngwen kwin mä okwäbiti raba ruin nuen aune ye namani tuin kwin mäi (1 Ped. 2:12). O nämänentre ja tarere metre jutuabare mäi. Ja mräkätre tä ja tarere ño ye kukwe kena köböire nitre kwati tä ja töi mike kukwe metre mike gare jai aune ye tä törö bäri ietre janamane kena gätäbätä ye ngwane. Ja tareta metre ye köböire nitre kwati tö rabai kukwe metre mikai gare jai ye ñaka ni töi mikai niä ñobätä ñan aune ni kristiano metre rabai gare ja tarebätä kwärikwäri niebare Jesukwe (ñäkädre Juan 13:34, 35 yebätä). Akwa tödeka nikwe tädre dite yekäre kukwe mada tä nuaindre nie.

3. Nikwe ja mräkätre taredi jerekäbe ngwane, ¿dre raba nemen bare?

³ Nikwe ja taredre kwärikwäri ye ñan aibe nikwe nuaindre ne  kwe tödeka nikwe tädre dite. ¿Ñobätä nita ye niere? Ñobätä ñan aune nita ja mräkätre tarere akwa ni ñaka ja kete kwin Jehovabe ngwane ja mräkätre käkwe dre nuaindi ye köböite tödeka raba nente nikän. Ñodre, ja mräkä iti, ni umbre ji ngwanka o prekursor iti ja mikadre ngite krubäte ngwane, nikwe ñaka Jehová mikai täte jankunu. O kukwe tare nuaindre kwe nibätä o trö kwitadre kwe kukwe metre ie aune nita kukwe ngwarbe mike täte niedre kwe nie ngwane, ni raba kämikekä Jehovabätä. Ye tä mike gare, nikwe ja ketadre kwin Jehovabe ye ütiäte krubäte ne kwe tödeka nikwe tädre dite. Nita sribire Jehová kräke aune nita ja mräkätre ngätäite ye raba tödeka nikwe mike nirien, akwa ja tötikadre nguseta Bibliabätä ye ütiäte krubäte tödeka nikwe mikakäre dite. Ni rabadre kukwe mike gare kwin jai, nikwe kukwe känändre bäri ne kwe nita kukwe mike gare jai Jehovabätä ye metre rabadre gare nie. Biblia tä kukwe metre driere rabadre tuin nie (Rom. 12:2, TNM).

4. Mateo 13:3-6, 20, 21 tä niere erere, ¿nitre nuateta ngwane dreta nemen bare tödeka kwetre yebätä?

⁴ Nitre ruäre rabai kukwe metre mike gare jai kä jutobiti niebare Jesukwe, akwa ngwain “ja tare nike” ngwane tödeka riaite kän (ñäkädre Mateo 13:3-6, 20, 21 yebätä). Nikwe ja tuai kukwe ruäre ben nänbätä Jesús jiebiti ye ñan nüke gare ietre raba ruin nie (Mat. 16:24). O kukwe tare ñaka nemen jire ni kristiano jiete tä nemen ruin ietre. Akwa ye ñaka metre. Kä käme te nita nüne ye köböite kukwe tare raba nakainkä nibätä. Batibe kukwe raba nemen ni kisete käkwe kä juto diainkä nikän (Sal. 6:6; Ecl. 9:11).

5. ¿Ja mräkätre kwati tä dre nuainne bämikakäre kukwe metre tä kwetre?

⁵ Ja mräkätre kwati tä bämike kukwe metre tä kwetre. Ye gare nie ñobätä ñan aune ni mada tä ja ngwen käme o tä kukwe tare nuainne bätätre ngwane, tödeka kwetre ye ñaka tä nekä (Sal. 119:165). Kukwe keteitire keteitire ben tätre ja tuin ye ñaka tä tödeka kwetre ngwen di nekä, ñakare aune tä nemen bäri dite (Sant. 1:2-4). ¿Mäkwe dre nuaindre tödekakäre ye erere?

6. ¿Dre nämäne tödeka nitre kristiano siklo kena yekwe mike dite?

⁶ Nitre kristiano siklo kena nämäne tödeke Ngöbö Kukweibätä aune kukwe driebare Jesukwe yebätä, “kukwe kwin metre” yebätä nämänentre tödeke (Gál. 2:5, NGT). “Kukwe kwin metre” ye abokän kukwe jökrä ni kristiano tä mike era jai meden gärätä, ye ngätäite Jesús ja nire biani ni ütiäre aune mikaninta nire ye drieta. “Kukwe kwin metre” ye apóstol Pablo nämäne mike era jai. Ye gare nie ñobätä ñan aune ja tötikani kwin kwe Ngöbö Kukweibätä aune Kristo murie ketadre biti mikadreta nire ye driebare kwe Ngöbö Kukwei yebiti (Hech. 17:2, 3). “Kukwe kwin metre” ye nitre kristiano siklo kena käkwe kani ngäbiti. Üai deme käräbare kwetre ne kwe Ngöbö Kukwei rükadre gare kwin ietre. “Kukwe kwin metre” ye nämäne Ngöbö Kukweibätä o ñakare ye tö namanintre gai, yebätä ja tötikani kwin kwetre (Hech. 17:11, 12; Heb. 5:14). Ja nämäne ruin kwin ietre ja mräkätre mada ngätäite aune Jehová mikabätä täte, akwa ye ñan ai nämäne tödeka kwetre mike dite, ñakare aune Ngöbö nämäne gare metre ietre ye nämäne tödeka kwetre mike dite (Col. 1:9, 10).

7. ¿Ñobätä ni rabadre tödeka nikwe mike dite kukwe metre Bibliabätä yebiti?

⁷ Jondron ñaka raba kukwe metre Ngöbö Kukweibätä ye kwite jire (Sal. 119:160). Ñodre, ja mräkä iti kukwe tare nuaindre nibätä o ja mikadre ngite kwe akwa kukwe metre täi jankunu. Kukwe ben nikwe ja tuadre ye ñaka kukwe  metre kwitai jene. Yebätä nikwe kukwe metre Bibliabätä mikadre gare kwin jai aune rabadre tuin metre nie. Hierro doboko kitata ñöte ne kwe rabadre ru mrente ketete murie dite ñübe minimini yebätä, ye erere ni rabadre tödeka nikwe mike dite kukwe metre Bibliabätä yebiti ne kwe ni dimikadre kwe nünenkä dite jabätä kukwe tare näire. Kukwe metre tä nikwe, ¿ye ñokänti raba nemen bäri metre ni kräke?

8. 2 Timoteo 3:14, 15 tä niere erere, ¿kukwe metre nämäne Timoteokwe ye ñobätä nämäne gare ie?

⁸ Kukwe metre nämäne Timoteokwe ye nämäne gare ie. ¿Ñobätä ye nämäne gare ie? (Ñäkädre 2 Timoteo 3:14, 15 yebätä). Timoteo meye aune mölöi käkwe “Ngöbö Kukwei deme” driebare ie. Akwa niarakwe kä dianinkä jai ja tötikakärebätä, ja di ngwani kwe mikakäre gare jai aune ye köböire kukwe ye metre nükani gare ie. Ye bitikäre, kukwe metre nitre kristianokwe ye niara, meye kwe aune mölöi kwe käkwe mikani gare jai. Nitre ja tötikaka Jesukwe nämäne ja tarere metre yekwe Timoteo töi mikani ñan krütare aune niara tö nämäne ja ketai ja mräkätre ben aune tö nämäne dimikai ye gare nie (Filip. 2:19, 20). Akwa niara nämäne ja mräkätre tarere ye ñan ai nämäne tödeka kwe mike dite, ñakare aune kukwe metre Bibliabätä ye nämäne tödeka kwe mike dite, kukwe metre ye nämäne era kräke aune töi mikani ja kete Jehovabe. Ye erere mäkwe nuaindre arato, Biblia tä dre driere Jehovabätä yebätä mäkwe ja tötikadre kwin, mäkwe töbikadretaribätä ne kwe kukwe ye metre rükadre gare mäi.

9. ¿Kukwe meden ketamä nikwe ja di ngwandre mike gare metre jai?

⁹ Kukwe metre ketamä nikwe ja di ngwandre mike gare käne jai. Kena, Jehová ye jondron jökrä sribekä rabadre tuin metre nie (Éx. 3:14, 15; Heb. 3:4; Apoc. 4:11). Ketebukäre, Biblia ye Ngöbö kukwei ni kräke rabadre tuin metre nie (2 Tim. 3:16, 17). Ketamäkäre, Jehovakwe juta kwe ükaninte kwin aune Kristo kädekani kwe jie ngwankäre ye tädre gare metre nie. Juta ye abokän nitre testiko Jehovakwe  (Is. 43:10-12; Juan 14:6; Hech. 15:14). Biblia rabadre gare täte nie ye ñan ribeta kukwe ketamä ne mikakäre tuin metre jai. Ñakare aune, ni töi mikani yebiti nikwe ja di ngwandre kukwe metre ye mike era jai (Rom. 12:1).

10. Kukwe metre rükadre gare nie ye bitikäre, ¿nikwe dre nuaindre?

¹⁰ Kukwe metre Jehovabätä, Bibliabätä aune nitre testiko Jehovakwe yebätä ye rabadre gare metre nie ye bitikäre ni raba mike gare ño ni madai Bibliabiti ye nikwe mikadre nüke gare jai. ¿Ñobätä? Ñobätä ñan aune kukwe metre tä nemen gare nie ye ni rabadre mike gare nitre tä ni kukwe nuin yei (1 Tim. 4:16). * Nita nitre mada dimike kukwe Bibliakwe ye mike tuin metre jai ngwane, nita nemen tödeke bäri kukwe metre yei arato.

11. ¿Pablokwe kukwe meden kwin bämikani nie dirikäre ni madai?

¹¹ Apóstol Pablo nämäne dirire ni madai ngwane, ja di ngwani kwe ne kwe “Moisés käkwe dre niebare Jesubtä amne nitre Ngöbö kukwei niekä kirakira käkwe dre tikani Jesubtä” ye rabadre era nitre israelita kräke (Hech. 28:23). ¿Ni raba kukwe metre Bibliakwe ye driere ño ni madai niara erere? Nikwe ñaka kukwe mikadre jerekäbe ni ja tötikaka ye töite, ñakare aune, nikwe dimikadre töbiketari kukwebätä tä ja tötike yebätä ñobätä ñan aune ye köböire ja ketai kwe Jehovabe. Ni tuin töbätä ie yebätä kukwe metre kadre ngäbiti kwe yei ni ñan tö, ñakare aune, niara tä kukwe metre Ngöböbätä mike gare jai yebätä ja tötika kadre ngäbiti kwe ie ni tö.

12, 13. ¿Nitre rüne raba monsotre kwetre dimike ño kukwe metre mike täte jankunu?

¹² Nitre rüne, mun tö monsotre munkwe tuai kukwe metre mike täte jankunu, ¿ñan ererea? Ja ketamuko kwin konkrekasionte raba tödeka kwetre mike bäri dite ruin munye. Akwa niaratre ñan tä ja ketamuko kwin aibe ribere jai, kukwe metre tä kwetre ye rabadre era kräketre yekäre, ütiäte krubäte niaratre rabadre ja kete akwle Jehovabe aune kukwe Bibliabätä ye metre mikadre gare kwetre jai.

¹³ Nitre rüne, mun tö kukwe metre Ngöböbätä driei monsotre munkwe ie ngwane, mun tädre ja tötike kwin Bibliabätä kukwe kwin bämikakäre monsotre käne. Kukwebätä munta ja tötike yebätä munkwe kä dianka jai töbikatarikäre. Biti ye erere munkwe drie monsotre munkwe ie. JW Library, Biblioteca Watchtower Internete o Tärä ni testiko Jehovakwe jie ngwankäre ja tötike ye raba monsotre dimike ño ja tötike ye munkwe drie ietre, munta dirire ni ja tötikaka munkwe ie ye erere. Yebiti munkwe monsotre dimikai Jehová tarere aune tö ngwen nitre kädekani kwe ni  bukakäre ja üairebiti ie (Mat. 24:45-47, TNM). Nitre rüne, munkwe ñaka kukwe bäri ütiäte Bibliabätä ye aibe drie monsotre munkwe ie. Monso töi ngitiekä nuäi aune kä kwäbebiti ye ererebätä munkwe dimika “kukwe kaibe tiebe Ngöbökwe” ye mike gare jai aune tödeka kwetre rabai dite (1 Cor. 2:10).

14. ¿Ñobätä nikwe ja tötikadre profecía Bibliabätä yebätä? (Recuadro “ ¿Profecía ne dre gärätä ye mä raba mike gare?” ye mikadre ñärärä).

¹⁴ Profecía ye kukwe ütiäte tä Ngöbö Kukweibätä ni dimikakäre tödeke kwatibe Jehovai. ¿Profecía meden ni dimikanina tödeke bäri? Ni raba töbike profecía tä blite kä krüte näire yebätä (2 Tim. 3:1-5; Mat. 24:3, 7). Akwa profecía namanina bare ye raba ni dimike tödeke bäri arato. Ñodre, profecía Daniel kapitulo 2 aune 11, ¿ye ruäre namanina bare ño aune mada abokän tä nemen bare ño nengwane ye mä raba mike gare? * Kukwe metre Bibliabätä ye ai tä tödeka nikwe mike dite ngwane, ñaka juain ngwarbe jire chi. Rübare kri bobukäre ye ngwane ja mräkätre rüe nakaninkä Alemania yebätä ani töbike. Profecía kä krüte yebätä ye ñaka nämäne gare jökrä ietre, akwa dre nämäne gare ietre Bibliabätä yei nämänentre tödeke metre.

15-17. Nitre nazi ja mikani ja mräkätre rüere ngwane, ¿ja tötika Bibliabätä yekwe ja mräkätre die mikani ño?

¹⁵ Nitre nazi gobranbare Alemania ngwane, ja mräkätre kwati kitani ngite ngwankäre ja tare nike. Hitler aune Heinrich Himmler ni sribikä ütiäte gobran kräke ye brukwä nämäne nitre testiko Jehovakwe kräke. Meri testiko iti käkwe mikani gare, bati, Himmler kukwe ne niebare meritre testiko braibe ie: “Jehová Ngöbö munkwe raba gobrane kä kwinbätä. Akwa kä tibien nete nun nazi tä gobrane. Nitre testiko o nitre nazi ye meden ie kä rükai ye munkwe gai”. ¿Dre käkwe ja mräkätre dimikani ja ngwen metre jankunu?

¹⁶ Kä 1914 Gobran Ngöbökwe jatani gobrane ye nämäne gare ja mräkätre yei. Yebätä niaratre rüe rakaikä nämäne gare ietre. Akwa gobran kä tibienbätä ñaka Jehová ketaibätä jire  ja töi nuainkäre ye nämäne gare ietre. Hitler ñaka raba juta Ngöbökwe gainte aune ñaka raba gobran ükete Gobran Ngöbökwe ye täte, ñakare aune gobran Hitlerkwe ye mikai krüte täte yei ja mräkätre nämäne tö ngwen.

¹⁷ Kukwe ie nämänentre tö ngwen ye namani bare metre. Kä braibe te, gobran nazi kitani timo. Nitre nazi nämäne kä tibien gobraine ye Heinrich Himmler käkwe niebare, akwa ye ngwane jerekäbe ngitiani aune gätäbare kwe ja mräkä Lübke yebe. Ja mräkä ye nükani gare ie ñobätä ñan aune ja mräkä ye kitani ngite. Ja ñan namanina nuaindre Himmler ie ngwane niebare kwe ja mräkä yei: “Ni ja tötikaka Bibliabätä, ¿se drebike nemen bare?”. Nitre nazi juain tibien aune nitre testiko mikai kwäre nämäne gare ietre ye ja mräkäkwe niebare ie. Himmler käkwe kukwe bätäkä ngwarbe niebare nitre testiko Jehovakwe rüere, akwa ye ngwane kukwe ñaka kwani ie niekäre. Ye bätäräbe ja krärä ketani kwe. ¿Kukwe ne tä dre driere nie? Nikwe ja tötikadre Bibliabätä aune profecía yebätä ne kwe tödeka nikwe tädre dite, ye ni dimikai tö ngwen Ngöböi kukwe tare näire (2 Ped. 1:19-21).

18. Juan 6:67, 68 tä niere erere, ¿‘Ngöbö rükadre gare bäri nie aune dre abokän kwin Ngöbö ngwärekri rükadre gare bäri metre nie’ niebare Pablokwe ye ñobätä nita ribere jai?

¹⁸ Nikwe ja taredre kwärikwäri ye ütiäte krubäte bämikakäre ni abokän kristiano erametre. Akwa ‘Ngöbö rükadre gare bäri nie aune dre abokän kwin Ngöbö ngwärekri rükadre gare bäri metre nie’ ye nita ribere jai arato (Filip. 1:9). Nikwe ñaka nuaindi ngwane, “ru mrenbti juankata nebe mürekwe nekwäre sekwäre” ye erere nitre ja mikaka kukwe metre rüere ye raba ni töi “nikwite jötrö kukwe mda mda ye jiebti” ni ngökakäre (Efes. 4:14). Siklo kena yete, nitre kwati ja tötikaka Jesukwe kämikaninkäbätä ngwane, Jesús kukwei abokän “kukwe ni mikakrä nire kärekäre” apóstol Pedro käkwe niebare (ñäkädre Juan 6:67, 68 yebätä). Kä ye ngwane Jesús kukwei ye ñan nämäne nüke gare jökrä Pedro ie akwa Jesús abokän Kristo nämäne gare ie yebätä ja ngwani metre kwe ie. Kukwe Bibliabätä ye metre nita mike nüke gare bäri kwin jai ngwane, tödeka nikwe täi dite kukwe tare näire aune nikwe ni madai dimikai tödeke bäri arato (2 Juan 1, 2).