1. Thaum peb tham txog “qhov tseeb” yog peb tham txog dabtsi?

PUAS tau muaj neeg nug koj lossis koj puas tau nug lwm tus tias: “Koj ho los paub qhov tseeb li cas?” lossis “Koj twb paub qhov tseeb thaum twg lawm?” Niaj zaus thaum peb tham txog “qhov tseeb” mas yog peb tham txog peb txojkev ntseeg, peb txojkev teev tiam Vajtswv, thiab peb txojkev ua neej. Cov uas teev tiam Yehauvas paub qhov tseeb txog phau Vajlugkub thiab ua lawv lub neej raws li phau Vajlugkub tej hauv paus ntsiab lus. Lawv dim ntawm kev ntseeg cuav thiab txawm lawv nyob hauv Xatas lub qab ntuj los lawv ua tau lub neej kaj siab lug.​—Yauhas 8:32.

2. Raws li Yauhas 13:34, 35, vim li cas ib txhia thiaj xav los paub qhov tseeb?

² Ua cas koj thiaj xav los paub qhov tseeb? Puas yog koj pom tias Yehauvas cov neeg coj tau zoo? (1 Petus 2:12) Lossis puas yog koj pom tias lawv txawj sib hlub? Muaj ntau zaus cov uas tuaj koom kev sib txoos thawj zaug hais tias lawv tsis nco qab xyov zaj lus qhuab qhia hais txog dabtsi tiamsis lawv nco tias Yehauvas cov neeg txawj sib hlub heev. Yexus twb hais lawm tias sawvdaws yuav paub tias nws cov thwjtim yog leejtwg yog lawv ib leeg txawj hlub ib leeg. (Nyeem Yauhas 13:34, 35.) Qhov uas peb txawj sib hlub li no qhia tias peb yog Yehauvas cov neeg tiamsis yog peb xav kom peb txojkev ntseeg ruaj khov ces tseem tshuav lwm yam uas peb yuav tau ua.

3. Yuav muaj li cas yog hais tias peb tsuas ntseeg Vajtswv vim peb nyiam nrog nws cov neeg xwb?

³ Yog peb tsuas ntseeg Vajtswv vim peb nyiam nrog nws cov neeg xwb ces yuav yoojyim rau peb tso peb txojkev ntseeg tseg. Yog vim li cas? Vim tias yog muaj ib tug txwj laus lossis ib tug tho kev ua txhaum loj tej zaum yuav ua rau peb tso  Yehauvas tseg. Lossis peb yuav tso Yehauvas tseg yog tias muaj ib tug kwvtij nkauj muam ua siab peb lossis ho fav xeeb rau Yehauvas thiab hais tias peb ntseeg yuam kev lawm. Yog koj ntseeg Vajtswv vim koj nyiam tej uas Vajtswv cov neeg ua xwb es tsis yog vim koj muaj kev sib raug zoo nrog Vajtswv ces koj txojkev ntseeg yuav tsis ruaj khov. Qhov uas koj nyiam nrog Yehauvas cov neeg ua ke yeej pab tau koj txojkev ntseeg tiamsis koj yuav tsum to taub meej txog tej uas koj kawm thiab ua zoo tshawb nrhiav, koj thiaj paub tseeb tias tej uas koj kawm txog Yehauvas yeej yog qhov tseeb tiag.​—Loos 12:2.

4. Raws li Mathais 13:3-6, 20, 21, thaum ib txhia raug kev sim siab lawv ua li cas xwb?

⁴ Yexus hais tias muaj ib co neeg thaum lawv hnov qhov tseeb “lawv txaus siab hlo txais yuav tamsim ntawd” tiamsis thaum lawv raug kev sim siab lawv ho tso lawv txojkev ntseeg tseg lawm. (Nyeem Mathais 13:3-6, 20, 21.) Lawv xav tias thaum lawv los ua Yexus ib tug thwjtim lawv yuav tsis raug kev sim siab dabtsi li. (Mathais 16:24) Muaj ib txhia ho xav tias lawv yuav tsis muaj teeb meem vim Vajtswv yuav tsom kwm lawv. Tiamsis hauv lub qab ntuj no peb yuav ntsib kev nyuaj siab ntau yam vim peb lub neej yuav hloov thaum twg los peb tsis paub.​—Phau Ntawv Nkauj 6:6; Yakaunpaus 4:13, 14.

5. Ua cas peb thiaj paub tias peb cov kwvtij nkauj muam feem coob yeej ntseeg ruaj nreeg tias lawv tau qhov tseeb lawm?

⁵ Peb cov kwvtij nkauj muam feem coob yeej ntseeg ruaj nreeg tias lawv tau qhov tseeb lawm. Txawm muaj ib tug ua mob lawv siab lossis ua txhaum Yehauvas los lawv yeej tuav rawv lawv txojkev ntseeg li qub. (Phau Ntawv Nkauj 119:165) Txhua zaus lawv raug kev sim siab tsuas ua rau lawv txojkev ntseeg hajyam ruaj khov xwb. (Yakaunpaus 1:2-4) Koj yuav ua li cas koj txojkev ntseeg thiaj yuav ruaj khov li ntawd?

6. Ua li cas Yexus cov thwjtim thaum ub thiaj muaj kev ntseeg ruaj khov?

⁶ Yexus cov thwjtim thaum ub muaj kev ntseeg vim lawv paub Vajtswv Txojlus thiab “qhov tseeb uas yog txojmoo zoo” uas Yexus Khetos qhia. (Kalatias 2:5) “Qhov tseeb uas yog txojmoo zoo” yog tag nrho tej uas cov Khixatia ntseeg xws li Yexus tus nqi txhiv thiab qhov uas nws ciaj sawv rov los. Tus tubtxib Paulus yeej ntseeg li no, nws thiaj ‘muab Vajtswv Txojlus qhia hais tias, “Yeej yuav muaj neeg muab tus Mexiyas tua, thiab tom qab ntawd, nws yuav sawv hauv qhov tuag rov qab los.”’ (Tes Haujlwm 17:2, 3) Yexus cov thwjtim thaum ub txais yuav txoj xov zoo thiab cia lub hwj huam dawb huv pab lawv to taub Vajtswv Txojlus. Lawv niaj hnub kawm Vajtswv Txojlus kom lawv paub tseeb tias tej uas lawv hnov yeej muaj tiag. (Tes Haujlwm 17:11, 12; Henplais 5:14) Lawv tsis yog ntseeg vim lawv nyiam nrog Vajtswv cov neeg lossis lawv nyiam txoj xov zoo uas lawv hnov xwb, tiamsis lawv ntseeg vim lawv paub qhov tseeb txog Vajtswv.​—Kaulauxais 1:9, 10.

7. Yog peb ntseeg tuag nthi tej uas phau Vajlugkub qhia ces yuav pab tau peb li cas?

⁷ Tej uas phau Vajlugkub qhia yeej tsis hloov li. (Phau Ntawv Nkauj 119:160) Xws li phau Vajlugkub yeej tsis hloov thaum muaj ib tug ua siab peb, thaum muaj ib tug ua txhaum loj, lossis thaum peb raug sim siab li cas. Yog li ntawd peb yuav tsum paub tej uas phau Vajlugkub qhia kom zoo. Yog peb ntseeg tuag nthi tej uas phau Vajlugkub qhia ces peb yuav muab siab npuab Yehauvas thaum peb raug kev sim siab. Koj yuav ua li cas koj thiaj ntseeg ruaj nreeg tias koj tau qhov tseeb lawm?

8. Raws li 2 Timautes 3:14, 15, ua li cas Timautes thiaj ntseeg ruaj nreeg tias nws tau qhov tseeb?

⁸ Ua cas Timautes thiaj ntseeg tias nws tau qhov tseeb? (Nyeem 2 Timautes 3:14, 15.) Timautes niam thiab nws niam tais yog 2 tug uas qhia Vajtswv Txojlus rau nws. Tiamsis Timautes yeej rau siab ntso kawm Vajtswv Txojlus thiab. Twb yog li ntawd nws thiaj li “cia siab” thiab ntseeg tau tej uas nws kawm. Tom qab no Timautes, nws niam, thiab nws niam tais lawv mam li ntsib cov Khixatia. Timautes pom txojkev hlub uas Yexus cov thwjtim muaj thiab nws nyiam nrog lawv ua ke thiab xav pab lawv. (Filipis 2:19, 20) Txawm li ntawd los Timautes muaj kev sib raug zoo nrog Yehauvas vim nws ntseeg tuag nthi tej uas Vajtswv Txojlus qhia, tsis yog vim nws nyiam nrog Vajtswv cov neeg ua ke xwb. Koj los yuav tsum kawm phau Vajlugkub kom koj thiaj ntseeg tau tej uas koj kawm txog Yehauvas.

9. Yuav kom koj ntseeg tias koj tau qhov tseeb, koj yuav tsum ntseeg 3 yam twg?

⁹ Koj yuav tsum ntseeg tau 3 yam no: (1) Vajtswv Yehauvas yog tus tsim ib puas tsav yam. (Khiav Dim 3:14, 15; Henplais 3:4; Tshwmsim 4:11) (2) Phau Vajlugkub yog Vajtswv Txojlus uas nws tshoov neeg sau rau peb. (2 Timautes 3:16, 17) Thiab (3) Yehauvas Cov Timkhawv yog Yehauvas pab neeg thiab Khetos yog tus coj lawv. (Yaxayas 43:10-12; Yauhas 14:6; Tes Haujlwm 15:14) Tsis yog koj yuav tsum kawm txhua yam hauv phau Vajlugkub koj thiaj ntseeg tau 3 yam no tiamsis koj yuav tsum muab tej uas koj paub thiab kawm lawd coj los xav. Yog koj ua li no ces koj yuav paub tias koj tau qhov tseeb lawm tiag.​—Henplais 5:14.

10. Thaum peb paub qhov tseeb lawd peb yuav tsum ua li cas ntxiv?

¹⁰ Thaum koj ntseeg 3 yam uas peb tham tas los ces koj yuav tsum txawj siv phau Vajlugkub  los qhia 3 yam ntawd rau lwm tus thiab. Yog vim li cas? Vim peb yog Yexus Khetos cov thwjtim, peb muaj lub luag haujlwm mus qhia qhov tseeb rau cov uas xav mloog. * (1 Timautes 4:16) Thaum peb mus qhia qhov tseeb hauv phau Vajlugkub rau lwm tus los kuj txhawb tau peb txojkev ntseeg kom ruaj khov thiab.

11. (1) Tus tubtxib Paulus qhia Vajtswv Txojlus li cas? (2) Peb yuav xyaum Paulus tus qauv li cas?

¹¹ Tus tubtxib Paulus qhia Vajtswv Txojlus li cas? “Nws muab tej lus uas Mauxes thiab cov cev Vajtswv lus sau tseg lawm qhia rau lawv kom lawv los ntseeg Yexus.” (Tes Haujlwm 28:23) Peb yuav xyaum Paulus li cas? Thaum peb qhia qhov tseeb rau lwm tus, tsis yog peb tsuas qhia lawv txog tej uas phau Vajlugkub hais xwb tiamsis peb yuav tsum pab kom cov kawm Vajlugkub txawj muab tej lawv kawm coj los xav. Peb xav kom lawv los ntseeg Vajtswv vim lawv ntseeg tej lawv kawm hauv phau Vajlugkub tsis yog vim lawv muab peb saib hlob xwb.

12, 13. Cov uas ua niam ua txiv yuav ua li cas thiaj pab tau lawv cov menyuam nyob hauv qhov tseeb?

¹² Nej cov uas ua niam ua txiv, nej yeej xav kom nej cov menyuam nyob hauv qhov tseeb. Tej zaum nej yuav xav tias yog cov menyuam muaj phoojywg zoo hauv lub koom txoos ces lawv txojkev ntseeg yuav ruaj khov. Tiamsis yog nej xav kom nej cov menyuam paub qhov tseeb, lawv nyias yuav tsum muaj nyias ib txojkev sib raug zoo nrog Yehauvas thiab ntseeg ruaj nreeg tej uas phau Vajlugkub qhia.

¹³ Yog cov niam cov txiv xav qhia qhov tseeb rau lawv cov menyuam, cov menyuam yuav tsum pom tias lawv niam lawv txiv yeej rau siab kawm Vajlugkub tiag. Cov niam cov txiv yuav tsum ua zoo xav txog tej lawv kawm lawv thiaj paub coj kom lawv cov menyuam ua li lawv ua. Lawv yuav tau qhia lawv cov menyuam ib yam li qhia cov uas lawv qhia Vajlugkub rau kom txawj siv peb cov twj kawm Vajlugkub xws li Watchtower LUB VEJ XAIJ TSHAWB NRHIAV VAJLUGKUB. Yog cov niam cov txiv ua li no ces lawv yuav pab tau lawv cov menyuam los hlub Yehauvas thiab yuav pab tau cov menyuam ntseeg tias “tus tubtxib uas ncaj thiab muaj tswvyim” lossis tus qhev ncaj thiab ntse yog tus Yehauvas siv los pab peb to taub phau Vajlugkub. (Mathais 24:45-47) Nej cov uas ua niam ua txiv, thaum nej qhia nej cov menyuam, ua zoo qhia lawv raws li lawv muaj peevxwm kawm tau xwb. Tiamsis tsis yog nej qhia tej yam uas yooj yoojyim hauv phau Vajlugkub xwb, nej yuav tsum qhia kom lawv paub Vajtswv lub laj lim tswvyim thiab. (1 Kauleethaus 2:10, NWT ) Yog nej qhia li no ces nej cov menyuam txojkev ntseeg yuav ruaj khov.

14. Vim li cas peb yuav tsum kawm txog cov lus faj lem hauv phau Vajlugkub? (Saib lub ntsiab me “ Koj Piav Puas Tau Cov Lus Faj Lem No?”)

¹⁴ Phau Vajlugkub muaj cov lus faj lem ntau heev uas txhawb tau peb txojkev ntseeg kom ruaj khov. Zaj lus faj lem twg txhawb tau koj txojkev ntseeg? Tej zaum koj nyiam zaj lus faj lem txog lub sijhawm kawg. (2 Timautes 3:1-5; Mathais 24:3, 7) Tiamsis puas muaj lwm zaj lus faj lem uas txhawb tau koj txojkev ntseeg thiab? Koj puas paub piav rau lwm tus txog cov lus faj lem hauv Daniyees tshooj 2 lossis tshooj 11 uas twb muaj tshwm sim lawm lossis tseem tabtom muaj tshwm sim? * Yog koj muaj kev ntseeg vim rau qhov koj to taub phau Vajlugkub zoo ces yuav tsis muaj ib yam dabtsi ua rau koj tso koj txojkev ntseeg tseg. Xws li cov kwvtij hauv tebchaws Ntsaws Mes Nis uas raug kev tsim txom ntau heev thaum muaj Ntsuj Rog Thoob Qab Ntuj Zaum 2. Txawm lawv tsis to taub cov lus faj lem hauv phau Vajlugkub txog lub sijhawm kawg zoo los lawv yeej ntseeg Vajtswv Txojlus tuag nthi.

15-17. Ua cas peb cov kwvtij nkauj muam ho ua tau siab ntev thev thaum cov Natxi tsim txom lawv?

¹⁵ Thaum cov Natxi kav tebchaws Ntsaws Mes Nis, lawv xa peb cov kwvtij nkauj muam coob tus mus rau cov yeej kaw neeg. Hilawj (Hitler) thiab nws ib tug thawj coj hu ua Hailees Heelawm (Heinrich Himmler) ntxub Yehauvas Cov Timkhawv heev. Ib tug muam hais tias Hailees hais rau ib co muam uas raug kaw tias: “Nej tus Vajtswv Yehauvas kav saum ntuj ceeb tsheej tiamsis nyob hauv ntiajteb no peb yog cov kav! Cia seb leejtwg yuav nyob ntev dua, Yehauvas Cov Timkhawv lossis cov Natxi!” Yehauvas cov neeg tau ua li cas lawv thiaj tsis tso lawv txojkev ntseeg tseg?

¹⁶ Cov Tub Kawm Vajlugkub paub tias Vajtswv lub Nceeg Vaj twb pib kav xyoo 1914 lawm. Lawv paub tias yog vim li cas lawv thiaj raug kev tawm tsam. Yehauvas cov neeg  ntseeg tuag nthi tias yeej tsis muaj ib lub tseem fwv hauv ntiajteb no yuav txwv tau Yehauvas. Lawv kuj ntseeg tias Hilawj yeej rhuav tsis tau txojkev ntseeg tseeb thiab nws lub tseem fwv yeej kov tsis yeej Vajtswv lub Nceeg Vaj. Peb cov kwvtij paub tias Hilawj yuav tsis kav ntev.

¹⁷ Yeej muaj raws li cov kwvtij nkauj muam ntseeg ntawd. Tsis ntev xwb lub tseem fwv Natxi twb poob lawm. Txawm Hailees Heelawm yog tus hais tias cov Natxi yog cov kav hauv ntiajteb no los nimno nws yuav tau khiav kom dim nws txojsia. Thaum nws tabtom khiav ntawd nws mus ntsib Kwvtij Lukhes (Lübke). Nws paub tias Kwvtij Lukhes yog Yehauvas ib tug Timkhawv uas raug kaw thaum cov Natxi kav. Hailees nug Kwvtij Lukhes tias: “Tub Kawm Vajlugkub, qhia kuv seb yuav muaj li cas ntxiv.” Kwvtij Lukhes hais rau Hailees tias Yehauvas Cov Timkhawv yeej ib txwm paub tias cov Natxi yuav kav tsis ntev thiab Vajtswv yuav cawm nws cov neeg dim. Hailees ib txwm thuam Yehauvas Cov Timkhawv tiamsis nimno nws hais tsis tau dabtsi li. Tsis ntev tom qab ntawd Hailees tua nws tus kheej tuag lawm. Peb kawm tau li cas xwb? Thaum peb kawm Vajlugkub thiab to taub cov lus faj lem zoo ces peb txojkev ntseeg yuav ruaj khov thiab peb yuav ua tau siab ntev thev kev tsim txom.​—2 Petus 1:19-21.

18. Paulus hais tias peb yuav tsum paub qhov tseeb zoo “thiab totaub txhua yam huv tibsi.” Raws li Yauhas 6:67, 68, vim li cas peb yuav tsum ua li Paulus hais ntawd?

¹⁸ Peb sawvdaws yuav tsum txawj hlub peb cov kwvtij nkauj muam peb thiaj yog cov tseem Khixatia. Thiab peb yuav tsum paub qhov tseeb zoo “thiab totaub txhua yam huv tibsi” hauv phau Vajlugkub. (Filipis 1:9) Tsis li ntawd ces Xatas lub qab ntuj thiab cov fav xeeb rau Yehauvas yuav dag ntxias tau peb yuam kev. (Efexus 4:14) Thaum Yexus cov thwjtim coob tus tso nws tseg, tus tubtxib Petus hais rau Yexus tias: “Tsuas yog koj tib leeg tej lus xwb, thiaj pub tau txojsia ibtxhis rau neeg.” (Nyeem Yauhas 6:67, 68.) Txawm thaum ntawd Petus tsis to taub txhua yam uas Yexus hais los nws muab siab npuab Yexus vim nws paub tseeb tias Yexus yog tus Khetos. Yog koj kawm phau Vajlugkub ces yuav pab tau koj txojkev ntseeg kom ruaj khov. Txawm muaj dabtsi los raug koj los koj yuav tsis tso koj txojkev ntseeg tseg thiab koj yuav pab tau lwm tus kom lawv txojkev ntseeg nyob ruaj khov thiab.​—2 Yauhas 1, 2.