1. “Hereva momokani” ena anina be dahaka?

“EDENA dala ai hereva momokani oi davaria?” “Hereva momokani lalonai oi tubu daekau, a?” “Lagani hida hereva momokani lalonai oi noho?” Reana haida ese oi dekenai unai bamona idia henanadai eiava oi ese haida oi nanadaia. Inai hereva “hereva momokani” ena anina be dahaka? Nega momo ita gaukaralaia iseda abidadama, tomadiho dalana, bona mauri dalana ita herevalaia totona. “Hereva momokani lalonai” idia noho taudia be Baibel ia hadibaia gaudia idia diba, bona edia mauri lalonai ena hakaua herevadia idia badinaia. Unai dainai, tomadiho koikoi edia hahediba herevadia idia rakatania, bona edia mauri idia moalelaia ena be Satani ena tanobada ai idia noho.​—Ioa. 8:32.

2. Ioane 13:34, 35 ena hereva bamona, dahaka ese ta ia veria diba hereva momokani ia abia dae totona?

² Matamanai dahaka ese oi ia veria, hereva momokani oi abia dae totona? Reana Iehova ena taunimanima edia kara namodia ese oi ia veria. (1 Pet. 2:12) Eiava reana ma haida dekenai idia hahedinaraia lalokau karana. Nega ginigunana hebou dekenai idia mai taudia momo be idia kamonai gaudia idia laloaboio, to idia mamia lalokauna idia laloaboio diba lasi. Unai kara dainai ita hoa lasi badina Iesu ia gwau, iena hahediba taudia be do idia lalokau heheni. (Ioane 13:34, 35 duahia.) To, iseda abidadama ia goada totona, ma gau haida ita karaia danu be namo.

3. Dahaka ia vara diba bema iseda abidadama be tadikaka taihu edia lalokau karana sibona dekenai ita haginia?

³ Namo lasi Dirava ena taunimanima ese idia hahedinaraia lalokau sibona ita itaia dainai hereva momokani ita abia dae. Dahaka dainai? Mani inai oi laloa: Bema tadikaka eiava taihu ta, reana elda eiava painia be kerere badana ta ia karaia be edena bamona? Eiava bema tadikaka eiava taihu ta ese oi ia hahisia be  edena bamona? Eiava bema ta be aposteit ai ia lao, bona ia gwau iseda orea dekenai hereva momokani ia noho lasi be edena bamona? Do oi manoka bona Iehova hesiai henia karana oi rakatania, a? Ita dibaia gauna be inai: Bema ma haida edia kara dainai Dirava oi abidadama henia, to oi sibona be Iehova oi tura henia lasi, emu abidadama do ia goada lasi. Iehova bona ena taunimanima oi laloa dalana ese emu abidadama ia durua diba. To, mai anina bada gauna be oi sibona ese Baibel oi stadilaia namonamo, oi dibaia gaudia oi lalopararalaia, bona pablikeisen haida dekenai tahua gaukara oi karaia, unai amo do oi abia dae momokani oi be Iehova ena hereva momokani oi dibaia noho.​—Roma 12:2.

4. Mataio 13:3-6, 20, 21 ena hereva bamona, haida be hekwakwanai idia davaria neganai, dahaka idia karaia?

⁴ Iesu ia gwau haida be “mai moale ida” hereva momokani idia abia dae, to hekwakwanai idia davaria neganai edia abidadama ia manoka. (Mataio 13:3-6, 20, 21 duahia.) Reana idia laloparara lasi Iesu murinai idia raka neganai hekwakwanai do idia davaria. (Mat. 16:24) Eiava reana idia laloa Keristani taudia be mai edia hekwakwanai lasi, to hahenamo sibona do idia davaria. To inai goevadae lasi tanobadana ai, hekwakwanai do idia vara. Iseda mauri ai gau haida idia idau diba, bona unai ese iseda moale do ia hadikaia.​—Sal. 6:6; Had. 9:11.

5. Edena dala ai iseda tadikaka taihu momo idia hamomokania idia be hereva momokani lalonai idia noho?

⁵ Iseda tadikaka taihu momo be idia abia dae momokani idia be hereva momokani lalonai idia noho. Edena dala ai? Bema tadikaka eiava taihu ta ese idia ia hahisia eiava Dirava ena taravatu ta ia utua, unai kara dainai edia abidadama ia manoka lasi. (Sal. 119:165) Hekwakwanai idia davaria negadia ta ta ai, edia abidadama ia manoka lasi, to ia goada ia lao. (Iam. 1:2-4) Edena dala ai emu abidadama be unai bamona oi hagoadaia diba?

6. Keristani taudia ginigunadia be dahaka dekenai edia abidadama idia haginia?

⁶ Keristani taudia ginigunadia be Toretore Helagadia amo idia dibaia gaudia, bona Iesu Keriso ena hahediba herevadia idia abidadama henia, unai be “sivarai namona ena hereva momokani.” (Gal. 2:5) Unai hereva momokani be Keristani taudia ese idia abia dae hahediba herevadia ibounai, hegeregere Iesu ena mauri davalaia boubouna bona ena toreisi lou ena sivarai. Aposetolo Paulo ia abia dae unai hahediba herevadia be momokani. Dahaka dainai? Badina ia ese Toretore Helagadia amo “ia hamomokania, Keriso be hisihisi ia abia be namo bona mase amo ia toreisi lou.” (Kara 17:2, 3) Keristani taudia ginigunadia be unai hahediba herevadia idia abia dae, bona lauma helaga ena heduru dekenai idia tabekau Dirava ena Hereva idia lalopararalaia totona. Idia sibona ese idia hamomokania unai hahediba herevadia be Toretore Helagadia lalonai idia noho. (Kara 17:11, 12; Heb. 5:14) Edia abidadama be tadikaka taihu edia lalokau karana dekenai idia haginia lasi, bona idia bamodia neganai idia mamia moalena dainai Iehova ena hesiai taudia ai idia lao lasi. To, edia abidadama be Dirava ena “diba maoromaoro” dekenai idia haginia.​—Kol. 1:9, 10.

7. Baibel ena hereva momokani ita abidadama henidia karana ese edena dala ai ita do ia durua?

⁷ Baibel lalonai idia noho hereva momokani be idia idau lasi. (Sal. 119:160) Hegeregere, ena be tadikaka eiava taihu ta ese ma ta ia hahisia eiava kerere badana ta ia karaia, to hereva momokani be ia idau lasi. Bona, hekwakwanai ita davaria negadiai danu idia idau lasi. Unai dainai, namona be Baibel ena hahediba herevadia ita lalopararalaia namonamo, bona ita abia dae idia be hereva momokani. Baibel ena hereva momokani ita abidadama henidia  neganai hahetoho negadiai do ita gini goada diba, unai be hegeregere lai bona hurehure idia bada neganai dogo ese bouti ia dogoatao auka bamona. Edena dala ai hereva momokani oi abidadama henia karana oi hagoadaia diba?

8. Timoteo Iharuana 3:14, 15 ena hereva bamona, edena dala ai Timoteo ia abia dae momokani ia be hereva momokani ia davaria?

⁸ Timoteo ia abia dae momokani ia be hereva momokani ia davaria. Edena dala ai unai ia diba? (2 Timoteo 3:14, 15 duahia.) Iena sinana bona tubuna hahinena ese ia dekenai “Toretore Helagadia” idia hadibaia. To, ia sibona danu ena nega bona goada ia henia unai toretore ia stadilaidia totona. Unai amo ia abia dae, ia “dibaia gaudia” be hereva momokani. Gabeai, Timoteo, ena sinana, bona ena tubuna hahinena be Keristani hahediba herevadia idia dibaia. Momokani, Timoteo be Iesu ena murinai idia raka taudia ese idia hahedinaraia lalokau karana ia moalelaia, bona ia ura bada ena tadikaka bona taihu ia bamodia bona ia durudia. (Fili. 2:19, 20) To, iena abidadama be taunimanima ia lalokau henidia karana dekenai ia haginia lasi, to Baibel amo ia dibaia hahediba herevadia dekenai ia haginia, unai dainai Iehova ena turana ai ia lao. Namona be oi danu, Baibel oi stadilaia neganai Iehova dekenai oi dibaia gaudia oi lalohadailaia namonamo.

9. Oi sibona ese do oi hamomokania hahediba herevadia toi be dahaka?

⁹ Unai oi karaia totona, namona be oi hamomokania inai hahediba herevadia toi be momokani. Namba 1 be, do oi abia dae Iehova Dirava be gau ibounai ia Havaraia Tauna. (Eso. 3:14, 15; Heb. 3:4; Apok. 4:11) Namba 2 be, do oi hamomokania Dirava ese Baibel be taunimanima dekenai ia henia. (2 Tim. 3:16, 17) Namba 3 be, namona be do oi hamomokania Iehova be mai ena orea ta bona Keriso ena gunalaia henunai Ia idia tomadiho henia noho, bona unai orea be Iehova ena Witnes taudia. (Isa. 43:10-12; Ioa. 14:6; Kara 15:14) Unai hereva momokanidia oi hamomokania karana ese ia hahedinaraia lasi, oi be Baibel ese ia herevalaia gaudia ibounai oi diba. Emu tahua gauna be  emu “darana” do oi gaukaralaia unai amo oi hamomokania, oi be hereva momokani oi davaria.​—Roma 12:1.

10. Hereva momokani ita dibaia sibona lasi, to dahaka ita karaia danu be gau badana?

¹⁰ Inai hahediba herevadia toi, Dirava, Baibel, bona Dirava ena taunimanima oi hamomokania murinai, namona be Baibel oi gaukaralaia ma haida dekenai unai hereva momokani oi hahedinaraia totona. Dahaka dainai? Badina ita be Keristani taudia dainai iseda maduna be idia ura kamonai taudia dekenai ita dibaia hereva momokanidia ita hadibaia. * (1 Tim. 4:16) Bona ma haida dekenai Baibel ena hereva momokani ita herevalaia bona idia abia dae neganai, iseda abidadama hereva momokani dekenai do ia hagoadaia.

11. Aposetolo Paulo ese taunimanima be edena dala ai ia hadibadia?

¹¹ Aposetolo Paulo be taunimanima ia hadibaia neganai, ia ese “lalona veria dalanai, Mose ena taravatu bona Peroveta Taudia edia toretore amo, Iesu ia herevalaia.” (Kara 28:23) Ma haida dekenai hereva momokani ita hadibaia neganai, edena dala ai Paulo ita tohotohoa diba? Baibel ena hereva sibona ita gwauraia be hegeregere lasi. Namona be iseda Baibel stiuden ita durudia Baibel amo idia dibaia gaudia idia laloa dobu, bona Iehova kahirakahira idia lao. Ita ura lasi idia ese hereva momokani idia abia dae badina ita idia matauraia, to namona be edia stadi karana amo idia hamomokania, iseda lalokau Diravana dekenai idia dibaia gaudia be hereva momokani.

12-13. Edena dala ai tama sina ese natudia idia durua hereva momokani lalonai idia noho totona?

¹² Tama sina e, emui ura gauna be emui natudia be hereva momokani lalonai do idia noho. Reana umui laloa bema kongrigeisen lalonai tura namodia idia bamoa neganai, edia abidadama do ia goada. To, emui natudia ese hereva momokani idia abia dae momokani totona, tura namodia idia bamoa sibona be hegeregere lasi. Namona be idia sibona ese Dirava idia tura henia bona idia abia dae momokani Baibel ena hereva be momokani.

¹³ Bema tama sina idia ura edia natudia dekenai Dirava idia hadibaia, namona be idia sibona ese Baibel idia stadilaia bona haheitalai namona idia hahedinaraia. Namona be nega idia atoa idia dibaia gaudia idia laloa dobu totona. Unai amo edia natudia dekenai unai dala tamona idia hadibaia diba. Edia Baibel stiuden idia durua hegeregerena, namona be edia natudia idia durua Baibel stadi tulu idauidau idia gaukaralaia totona. Unai bamona idia karaia neganai, edia natudia do idia hadibaia Iehova bona hereva momokani ia halasia oreana idia laloa  bada totona. Unai orea be “igui hesiai tauna mai ena kamonai bona mai ena kara maoromaoro.” (Mat. 24:45-47) Tama sina e, emui natudia dekenai Baibel ena hahediba hereva badadia sibona umui hadibaia be hegeregere lasi. Namona be edia mauri lagani bona laloparara hegeregerena idia dekenai “Dirava ena dobu gaudia” umui hadibaia, unai amo edia abidadama do ia goada.​—1 Kor. 2:10.

14. Dahaka dainai Baibel ena peroveta herevadia ita stadilaidia be namo? (Maua itaia: “ Inai Peroveta Herevadia Oi Herevalaia Diba, A?”)

¹⁴ Baibel ena peroveta herevadia be mai anina bada badina ita idia durua Iehova ita abidadama henia totona. Edena peroveta herevadia ese emu abidadama idia hagoadaia? Reana “dina gabediai” idia guguru noho peroveta herevadia do oi gwauraia. (2 Tim. 3:1-5; Mat. 24:3, 7) To, edena peroveta herevadia ma haida ese emu abidadama idia hagoadaia diba? Hegeregere, Daniela karoa 2 eiava Daniela karoa 11 edia peroveta hereva be idaunegai bona hari idia guguru dalana oi herevalaia diba, a? * Bema emu abidadama be Baibel dekenai oi haginia, gau ta ese emu abidadama do ia hadikaia lasi. Tanobada Tuarina Iharuana ai, Germany dekenai iseda tadikaka ese dagedage bada idia haheaukalaia karana mani oi laloa. Ena be idia ese dina gabedia edia peroveta herevadia idia lalopararalaia namonamo lasi, to Baibel idia abidadama henia momokani.

15-17. Edena dala ai Baibel stadilaia karana ese tadikaka taihu ia durua Nazi taudia edia dagedage karana idia haheaukalaia totona?

¹⁵ Nazi Germany edia gavamani henunai, iseda tadikaka taihu tausen momo be dibura kamepadia dekenai idia siaia. Hitler bona dagi bada tauna ta Heinrich Himmler, ese Iehova ena Witnes taudia idia inai henia. Taihu ta ia gwau, Himmler be dibura kamepa ai taihu ma haida dekenai ia gwau: “Emui Iehova be guba dekenai ia lohia, to ai be tanobada dekenai ai lohia! Do ita itaia umui Iehova ena Witnes taudia eiava ai Nazi taudia do ai kwalimu!” Dahaka ese Iehova ena taunimanima ia durua idia gini goada totona?

 ¹⁶ Unai Bible Student taudia idia diba Dirava ena Basileia be lagani 1914 ai ia lohia matamaia. Unai dainai idia dekenai dagedage idia vara neganai idia hoa lasi. To, Iehova ena taunimanima idia abia dae momokani gavamani ta ese Dirava ena ura ia guguru karana ia koua diba lasi. Hitler ese tomadiho momokanina ia haorea lasi eiava gavamani ta ia haginia lasi Dirava ena Basileia ia halusia totona. Iseda tadikaka taihu idia abia dae Hitler ena lohia negana be do ia daudau lasi.

¹⁷ Unai tadikaka taihu ese idia abia dae gaudia be momokani. Badina daudau lasi, Nazi oreana ia moru, bona Heinrich Himmler, guna ia gwau “ai be inai tanobada dekenai ai lohia,” be ena mauri totona ia heau. Ia heau noho lalonai, Tadikaka Lübke ida ia hedavari, ia be guna dibura ruma ai ia noho. Himmler be mai lalohisihisi ida Tadikaka Lübke ia nanadaia: “Bible Student, hari dahaka do ia vara?” Tadikaka Lübke ese Himmler ia hadibaia Iehova ena Witnes taudia be idia diba momokani, Nazi oreana be do ia moru bona Witnes taudia be dibura amo do idia ruhaia. Himmler be guna Iehova ena Witnes taudia dekenai hereva dikadia momo ia gwauraia, to hari ia diba lasi dahaka do ia hereva. Gabeai, ia be sibona ia hamasea. Dahaka ita dibaia? Baibel bona ena peroveta herevadia ita stadilaia karana ese iseda abidadama Dirava dekenai do ia hagoadaia bona dagedage negadiai ita gini goada diba.​—2 Pet. 1:19-21.

18. Dahaka dainai Paulo ese Ioane 6:67, 68 ai ia gwauraia ‘diba maoromaoro bona laloa kehoa’ ita abia be namo?

¹⁸ Ita ta ta ese lalokau ita hahedinaraia be namo​—unai be Keristani taudia korikoridia edia kara. To, ‘diba maoromaoro bona laloa kehoa’ ita abia danu be namo. (Fili. 1:9) Bema lasi, ita be “kara koikoi idia badinaia taudia edia hereva” do ita kamonai, aposteit taudia danu. (Efe. 4:14) Keristani taudia ginigunadia edia negai, hahediba taudia momo be Iesu idia rakatania neganai, aposetolo Petero be ena abidadama ia hahedinaraia, ia gwau “mauri hanaihanai herevadia” be Iesu dekenai idia noho. (Ioane 6:67, 68 duahia.) Ena be unai negai Petero ese unai “mauri hanaihanai herevadia” edia anina ibounai ia lalopararalaia lasi, to Iesu ia badinaia badina ia ese Keriso idia herevalaia hereva momokanidia ia lalopararalaia. Oi ese Baibel ena hahediba herevadia dekenai emu abidadama oi hagoadaia diba. Bema unai bamona oi karaia, herevana dahaka ia vara emu abidadama do ia goada noho bona ma haida do oi durua edia abidadama idia hagoadaia totona.​—2 Ioa. 1, 2.