1. Embo ndi “ouatjiri” mari hee tjike?

“HAPO ove ouatjiri we u muna vi?” “Hapo ove we kurira mouatjiri?” “Hapo ove wa kara oure mbu ṱapi mouatjiri?” Mape ya varwe va rora okukupura omapuriro otja ingo, poo mape ya ove wa rora okupura varwe omapuriro otjingewo. Embo ndi “ouatjiri” mari hee tjike? Tjinene, tu ri ungurisa okukahurura ongamburiro yetu, omuano wetu womerikotameneno nomuano mbu tu hupa. Ovandu mbe ri “mouatjiri” ve tjiwa imbi Ombeibela mbi i honga, nu ve hupa otja komirari vyayo. Kunao, kave kambura momahongero wozongamburiro zoposyo nu ve hupa mondjoroka ngunda ave ri mouye wa Satan mbwi.—Joh. 8:32.

2. Otja ku Johanes 13:34, 35, otjikeṋa tji mape ya atji nanene omundu kouatjiri?

² Hapo otjikeṋa tji tje ku nanena kouatjiri? Ngahino yari omeritjindiro omawa wovahongonone va Jehova . (1 Petr. 2:12) Poo ngahino yari orusuvero ndu va raisa. Ovengi mbe ya komaworonganeno wombongo potjikando otjitenga ve muna orusuvero ndwo nu ondu ve zemburuka tjinene okukapita avihe mbya hungirwa. Ihi katjikumise mena rokutja Jesus wa tja, ovahongewa ve mave tjiukirwa korusuvero ndu ve raisa pokati kawo. (Lesa Johanes 13:34, 35.) Orusuvero ndu tu muna mokati kovandu va Mukuru ru tu vatera okutjiwa ovandu va Jehova.Posi yokutja pe noviṋa ovingi mbi matu sokutjita kutja tu kare nongamburiro yomasa.

3. Mape ya ape tjitwa tjike indu ongamburiro yetu tji ya zikamena korusuvero ndu raisiwa i ovakambure ovakwetu uriri?

³ Ongamburiro yetu ka i zikamene korusuvero rwa Kristus ndu raisiwa i ovakarere va Mukuru uriri. Ongwaye tji matu tja nao? Omena rokutja ongamburiro yetu tji ya zikamene korusuvero ndwo uriri mai pandjara tjimanga. Otjotjihorera mape ya atu isa okukarera Jehova, indu omukambure omukwetu, nangarire omunene wombongo poo omukandjira tja tjiti ouvi ounene. Eṱe wina mape ya atu isa okukarera Jehova indu omukambure omukwetu  tje tu pindikisa poo tja rire omupirukire na ṋunisa kutja ongamburiro yetu iri posyo. Kunao eṱe tji matu vanga okukara nongamburiro onḓikame mai sokuzikamena koupanga wetu na Jehova. Matu rihongo kutja, indu tji u riyameka kovandu pendje nokuriyameka ku Jehova, ongamburiro yoye kamaai zikama. Omuano mu u vara Jehova novakarere ve mau yenene okukuvatera okukurisa ongamburiro yoye ngandu pondondo kaaṋi, posi yokutja otjiṋa otjinanḓengu tjinene okurihonga Ombeibela oukoto, okuzuva nawa imbi mbi mo rihongo, nokutjita ongonḓononeno yokutja imbi mbi mo rihongo ombi ri ouatjiri ohunga na Jehova. Ove mo hepa okukambura kutja Ombeibela i ku honga ouatjiri ohunga na Jehova.—Rom. 12:2.

4. Otja ku Mateus 13:3-6, 20, 21, ovandu tjiva ve tjita vi indu tji va munu omauzeu?

⁴ Jesus wa tja tjiva mave “yakura indi embo nenyando,” posi yokutja ongamburiro yawo mape ya ai ngundipara indu tji va munu ouzeu. (Lesa Mateus 13:3-6, 20, 21.) Mape ya ave ha tjiwa kutja okukongorera Jesus ku kamburira mo omatokero nomauzeu. (Mat. 16:24) Mape ya ave munu kutja owo kamaave munu omauzeu poo ave munu kutja Mukuru ma isapo omauzeu wawo. Posi yokutja mouye mutu ri mbwi ma mu kara omatokero. Nu oviṋa mehupo vi runduruka na vi tjiti kutja atu ha kara nondjoroka.—Eps. 6:6; Omuzuv. 9:11.

5. Otjikeṋa tji tji raisa kutja otjingi tjovakambure ovakwetu ve kambura kutja imbi mbi ve rihonga ombi ri ouatjiri?

⁵ Otjingi tjovakambure ovakwetu ve raisa kutja ve nongamburiro yokutja imbi mbi ve rihonga ombi ri ouatjiri. Ongwaye tji matu yenene okutja nao? Omena rokutja ongamburiro yawo ka i teratera nandarire omukambure omukwao tje ve hihamisa poo tja kara norupa mozongaro nḓe ha yakurwa i Ovakriste. (Eps. 119:165) Otja pu mave rorwa ongamburiro yawo opuikurira ko, nu ka i ngundipara. (Jak. 1:2-4) Ove mokurisa vi ongamburiro onamasa ndjo?

6. Ovakriste veserewondo etenga va zikamisire ongamburiro yawo ku ye?

⁶ Ovakriste veserewondo etenga va zikamisire ongamburiro yawo kOmatjangwa na komahongero wa Jesus Kristus, nge ri “ouatjiri wOmbuze Ombwa.” (Gal. 2:5) Ouatjiri mbwi wa zikamena koviṋa avihe mbi tu kambura mo otjOvakriste nu mau kamburire mo otjisuta tja Jesus tjonguturiro nombendukiro ye. Omuapostele Paulus wa ri nongamburiro yokutja omahongero ngo ouatjiri. Ongwaye Paulus tjaa kambura momahongero ngo? Omena rokutja eye aa ungurisa Omatjangwa okuṋunisa “kutja Kristus wa sere okuṱa nu wa sere okupenduka movakoke.” (Oviung. 17:2, 3) Ovahongewa veserewondo etenga va yakurire omahongero ngo nu ve riyamekere kombepo ondjapuke okuvevatera okuzuva nawa Embo ra Mukuru. Owo va tjita omakonḓononeno okutjiwa nawa kutja omahongero ngo ya zikamena kOmatjangwa. (Oviung. 17:11, 12; Hebr. 5:14) Owo kave zikamisire ongamburiro yawo koumune wawo uriri nu wina kaave karere Jehova mena rondjoroka ndjaave munu tji veri pu novakambure ovakwao. Nungwari ongamburiro yawo ‘ye kura mokutjiwa Ndjambi.’—Kol. 1:9, 10.

7. Ongamburiro yetu mouatjiri wOmbeibela mai tu vatere vi?

⁷ Ouatjiri wEmbo ra Mukuru ka u runduruka. (Eps. 119:160) Otjotjihorera, owo ka u runduruka indu omukambure omukwetu tje tu hihamisa poo tja tjiti ouvi ounene. Wina owo ka u runduruka tji wa munu omauzeu. Kunao matu hepa okutjiwa omahongero wOmbeibela nawa nokukara nongamburiro yokutja omahongero ngo ouatjiri. Tjimuna ongoze ndji kuta oskepi potjikuturiro tji i yenena okutjevera oskepi kotjivepo otjizeu, ongamburiro yetu ndja zikamena kOmbeibela mai yenene okututjevera tji turi momauzeu wina. Ove mo yenene vi okukurisa ongamburiro onamasa yokutja imbi mbi u rihonga ombi ri ouatjiri?

8. Otja pu pa raisiwa mu 2 Timoteus 3:14, 15, peya vi Timoteus ma kare nongamburiro yokutja imbi mbyee rihongo ombi ri ouatjiri?

⁸ Timoteus wa ri nongamburiro yokutja imbi mbyee rihongo ombi ri ouatjiri. Eye aa tjiwa vi? (Lesa 2 Timoteus 3:14, 15.) Ina na ina omukurukaze ombe mu honga “Omatjangwa omayapuke.” Posi yokutja eye omuini wina wa ungurisa oruveze nomasa we okukonḓonona omatjangwa ngo. Kunao eye wa ‘paima na kambura’ kutja omburi ouatjiri. Kombunda Timoteus, puna ina na ina omukurukaze ve rihonga omahongero wOukriste. Timoteus tjiri aa tjaterwa i yorusuvero ovakongorere va Jesus ndwaave raisa, nu wari nonḓero onene okukara pu novakambure ovakwao mombongo nokuvevatera. (Fil. 2:19, 20) Nungwari ongamburiro ye ka i zikamenene korusuvero rovakambure ovakwao uriri, posi yokutja ya zikamenene komahongero wOmbeibela eye maa kambura kutja ongeri ouatjiri nu iho otji tje mu hinga okuvanga okurira epanga ra Jehova. Ove wina mo sokurihonga Ombeibela kutja u kare nongamburiro mu imbi mbi we rihongo ohunga na Jehova.

9. Omapu yeṋe yetatu ngu mo hepa okukonḓonona ngu maye kurisa ongamburiro yoye yokutja imbi mbi u rihonga ombi ri ouatjiri?

⁹ Rutenga pe nomapu yetatu ngu mo sokukambura mo. Epu etenga, mo hepa okukara nongamburiro yokutja Jehova Mukuru onguri Omuute woviṋa avihe. (Eks. 3:14, 15; Hebr. 3:4; Omavan. 4:11) Epu oritjavari, mo sokutjiwa omapu ngu ma ye kurisa ongamburiro yoye yokutja Ombeibela ombuze ya Mukuru ndja tjanga kovandu. (2 Tim. 3:16, 17) Nu oritjatatu, ove mo sokukonḓonona nokukambura kutja Jehova we ri woronganisira otjimbumba tjovandu mbe rikotamena kuye kehi ya Kristus otjomunane nokutja Ovahongonone va Jehova omberi otjimbumba ho. (Jes. 43:10-12; Joh. 14:6; Oviung. 15:14) Tji wa kara nongamburiro mouatjiri mbwo kape na ku undjirwa kove okutjiwa oviṋa avihe ohunga nOmbeibela. Ungurisa ‘ozondunge’ poo ounongo woye nawa kutja u kurise ongamburiro yoye yokutja imbi mbi u rihonga ombi ri ouatjiri.—Rom. 12:1, EEP.

10. Matu hepa okutjita tjike kokutja tu kurise ondjiviro ndji tuna yo mouatjiri?

¹⁰ Tji wa zu nokukara nongamburiro momapu  yetatu inga ngu twa hungirire ko ohunga na Mukuru kutja onguri omuute waavihe, Ombeibela kutja ombuze ya Mukuru kovandu nokutja Mukuru we ritoororera otjimbumba kombanda yehi, ove mo hepa okuungurisa Omatjangwa okuraisira varwe ouatjiri mbwo. Omena ra ye? Omena rokutja otjOvakriste tu nomerizirira okuhonga varwe mbu mave puratene kweṱe ouatjiri mbu twe rihonga. * (1 Tim. 4:16) Nu tji matu kondjo okuvatera varwe okukambura kutja imbi Ombeibela mbi i honga ouatjiri, eṱe wina matu pamisa ongamburiro yetu mouatjiri mbwo.

11. Omuapostele Paulus wa raisa otjihorera tjiṋe indu tjaa hongo ovandu nu eṱe matu yenene vi okuhorera ku ye?

¹¹ Omuapostele Paulus wa honga ovandu ouatjiri “na roro okuvetanaurira ku Jesus ama tamuna omambo mOmatwako wa Moses na momatjangwa wovaprofete.” (Oviung. 28:23) Matu horere vi ku Paulus indu tji matu hongo varwe ouatjiri? Eṱe atu ve raere imbi Omatjangwa mbi ye honga uriri nungwari ngatu tare komapu warwe ngu maye ṋunisa Omatjangwa. Otja ovahongwa vetu tji mave tumbuka popezu na Jehova, eṱe tu sokuvevatera okukonḓonona nokuripurira ko oukoto ohunga na imbi mbi mave rihongo okuza mOmbeibela. Matu vanga kutja ve yakure ouatjiri, mena rokutja va konḓonona Ombeibela nu ave kambura kutja imbi mbi mave rihongo ohunga na Mukuru wetu worusuvero ombi ri ouatjiri nungwari aha rire mena rondengero ndji ve nayo kweṱe.

12-13. Ovanene mave yenene vi okuvatera ovanatje vawo kutja ve kare mouatjiri?

¹² Otjiperi kutja eṋe otjovanene mu vanga ovanatje veṋu ve kare mouatjiri. Mape ya omunu kutja tji ve nomapanga omawa mombongo, mave kurisa ongamburiro yawo. Posi yokutja tji mo vanga ovanatje woye ve kare nouatjiri mu imbi Ombeibela mbi i honga owo mave hepa ovingi pendje nokukara nomapanga omawa uriri. Owo mave hepa okutunga oupanga wawo oveni kuna Jehova nokukambura kutja imbi Ombeibela mbi i honga ouatjiri.

¹³ Ovanene mave sokuraisa otjihorera otjiwa otjovahongwa wOmbeibela indu tji mave vanga okuhonga ovanatje vawo ouatjiri ohunga na Mukuru. Owo mave sokutwapo oruveze okuripurira ko oukoto ku imbi mbi mave rihongo. Kunao owo otji mave yenene okuhonga ovanatje vawo okuhorera kuwo. Owo mave hepa okuhonga ovanatje vawo okuungurisa oviungurisiwa vyetu vyokuhonga tjimuna tji ve honga varwe. Tji mave tjiti nao, mave vatere ovanatje vawo okuraisa ondangi ku Jehova na komirari eye mbye ungurisa okuyandja ovikurya oviyapuke okupitira ‘momukarare omuṱakame nomunazondunge.’ (Mat. 24:45-47) Vanene, amu hongo ovanatje veṋu omahongero omatenga wOmbeibela uriri, nungwari ma mu hepa okuvehonga oviṋa ovikoto vyOmbeibela wina. Ve vatereye okukurisa ongamburiro yawo mokuvehonga “oviundikwa  ovikoto tjinene vya Ndjambi” otja kozombura nounongo wawo.—1 Kor. 2:10.

14. Ongwaye tji matu sokukonḓonona omaprofetero wOmbeibela? (Wina lesa okaongo nga, “ Mo yenene okukahurura omaprofetero nga?”)

¹⁴ Omaprofetero wOmbeibela orupa orunanḓengu rwEmbo ra Mukuru ndu tu vatera okukurisa ongamburiro yetu mu Jehova. Omaprofetero yeṋe nge kurisa ongamburiro yoye? Ove mape ya otamuna omaprofetero ohunga ‘nomayuva omasenina.’ (2 Tim. 3:1-5; Mat. 24:3, 7) Nu hapo omaprofetero yeṋe nga yenenisiwa ngu maye yenene okukurisa ongamburiro yoye? Otjotjihorera mape ya okahurura omuano omaprofetero nge ri mu Daniel ekondwa 2 poo mu Daniel ekondwa 11 mu ya yenenisiwa poo mu ye yenenisiwa? * Ongamburiro yoye tji ya zikamena kOmbeibela kamaai teratera ko. Tara kotjihorera tjovakambure ovakwetu mba tatumisiwa moGermany mOvita ovitjavari vyOuye. Nandarire kutja kaave zuu nawa omaprofetero wOmbeibela nge notjiṋa nomayuva omasenina, owo va ri nongamburiro onamasa mEmbo ra Mukuru.

15-17. Omakonḓononeno wOmbeibela ye kurisa vi ongamburiro ya imba mbaave tatumisiwa i yo Nazi?

¹⁵ Indu o Germany tji yari kehi yomananeno wohoromende yo Nazi, ovakambure ovakwetu ovengi va kamburwa nave paterwa mozokamba zovakamburwa. Hitler nomunane wotjira tjovita SS Chief Heinrich Himmler va tondere Ovahongonone va Jehova. Omukazendu omukambure umwe wa tja, Himmler wa raera otjimbumba tjovakazendu ovakambure mba ri mokamba imwe yovakamburwa kutja, “Jehova weṋu mape ya u honaparera meyuru, posi yokutja imba kombanda yehi oweṱe mbu tu honapara! Matu mu raisire kutja ouṋe ngu nomasa, Ovahongonone va Jehova poo o Nazi!” Otjikeṋa tji tja vatera ovakarere va Jehova okupanḓera pouṱakame?

¹⁶ Ovakonḓonone vOmbeibela mbo aave tjiwa kutja Ouhona wa Mukuru wa uta okuhonapara mombura ndji 1914. Owo kave himisirwe i yondatumisire onene ndji va muna. Nungwari, ovakarere va Jehova va ri nongamburiro yokutja ka ku nohoromende yovandu ndji mai yenene okukuramena ondando ya Mukuru momurungu. Hitler  kena pa yenena okuyandeka omerikotameneno watjiri poo okuzika ohoromende ndja ri nomasa kombanda yOuhona wa Mukuru. Ovakambure ovakwetu va ri nongamburiro yokutja ouvara wa Hitler mau yanda momuano umwe poo omukwao.

¹⁷ Ovakambure ovakwetu mbo kave teraterere mongamburiro. Kombunda yoruveze orusupi ouvara wohoromende yo Nazi wa wa, nu Heinrich Himmler ngwa tjere, “imba kombanda yehi oweṱe mbu matu honapara,” wa taurisa omuinyo we. Ngunda e ri mokutaura wa hakaena na mbuti Lübke, ngwa ri omukamburwa ne mu zemburuka otja umwe wovahongonone va Jehova. Eye ngunda eri kehi yombameno, Himmler wa pura mbuti Lübke na tja: “Ae, mukonḓonone wOmbeibela mape kayenda ye nambano?” Mbuti Lübke wa raera Himmler kutja, Ovahongonone va Jehova aave tjiwa nawa kutja ouvara wo Nazi mau ya komaandero nokutja owo mave kuturwa. Himmler ngwaa yamburura Ovahongonone va Jehova, kaa tjiwa kutja nga tje vi moruveze ndwo. Kombunda yoruveze orusupi, eye we ri zepa omuini. Matu rihongere ko tjike? Omakonḓononeno wetu wOmbeibela ngu maye kamburire mo omaprofetero maye yenene okukurisa ongamburiro onḓikame mu Mukuru, naye tupe okuṱakama moruveze rwomarorero.—2 Petr. 1:19-21.

18. Otja tji pa raisiwa mu Johanes 6:67, 68, ongwaye tji ma tu hepa okukura “mozondunge na mondjiviro aihe” otja Paulus pa tjanga?

¹⁸ Eṱe matu hepa okuraisa orusuvero ndu maru tu tjiukisa otja Ovakriste vatjiri. Posi yokutja wina matu hepa okukura “mozondunge na mondjiviro aihe.” (Fil. 1:9, EEP.) Nu tji tu ha tjitire nao, eṱe matu yenene okupukisiwa i yovapirukire ‘nokuhingwa i ombepo ngamwa aihe yomahongero omapukise yovahonge voposyo.’ (Ef. 4:14) Indu ovahongewa va Jesus tji va isa okumukongorera, omuapostele Petrus wa raisa ongamburiro onḓikame yokutja, Jesus “u nomambo womuinyo waaruhe.” (Lesa Johanes 6: 67, 68.) Nandarire kutja Petrus moruveze ndwo kaa zuu nawa omambo aehe nga hungirwa, eye wa kara nouṱakame mena rokutja aa tjiwa ouatjiri ohunga na Kristus. Ove wina mo yenene okukurisa ongamburiro yoye mu imbi Ombeibela mbi i honga. Indu tji wa tjiti nao, ongamburiro yoye ma i zikama nu mo tuurunga omarorero aehe novatere varwe okutunga ongamburiro yomasa.—2 Joh. 1, 2.