1. Wetin “di trut” min?

“AW YU lan di tru?” “Yu mama ɛn papa na bin Jiova Witnɛs bifo dɛn bɔn yu?” “Aw lɔng yu dɔn de na di trut?” Pɔsin go mɔs dɔn aks yu dɛn kwɛstyɔn dɛn de ɔ sɔntɛm yusɛf go dɔn aks ɔda pɔsin dɛn kwɛstyɔn dɛn de. Wetin “di trut” min? Bɔku tɛm wi kin yuz dɛn wɔd dɛn de fɔ tɔk bɔt di tin dɛn we wi biliv, di we aw wi de wɔship Gɔd, ɛn di we aw wi de liv wi layf. Pipul dɛn we de “na di trut” no wetin di Baybul de tich ɛn dɛn de liv dɛn layf da we de. Dat de mek dɛn nɔ biliv di tin dɛn we dɛn de tich na lay lay rilijɔn ɛn dɛn de ɛnjɔy gladi-at na dis wɔl pan ɔl we dɛn nɔ pafɛkt.—Jɔn 8:​32.

2. Akɔdin to Jɔn 13:​34, 35, wetin na di fɔs tin we kin mek pɔsin lɛk di trut?

² Wetin na di fɔs tin we mek yu lɛk di trut? Sɔntɛm i go bi se na di fayn we aw Jiova in pipul dɛn de biev. (1 Pit. 2:​12) Ɔ sɔntɛm na di we aw dɛn de sho se dɛn lɛk ɔda pipul dɛn. Bɔku pipul dɛn kin notis da lɔv de di fɔstɛm we dɛn atɛnd mitin, ɛn dɛn kin mɛmba dat pas ɛnitin we dɛn tɔk na di mitin. Wi nɔ de sɔprayz we dis kayn tin apin bikɔs Jizɔs bin tɔk se pipul dɛn go sabi in tru tru disaypul dɛn bay di we aw dɛn de sho se dɛn lɛk dɛnsɛf. (Rid Jɔn 13:​34, 35.) Bɔt nɔto lɔv nɔmɔ go mek wi gɛt strɔng fet.

3. Wetin kin apin if di fet we wi gɛt pan Gɔd na bikɔs ɔf di lɔv we wi brɔda ɛn sista dɛn de sho?

³ Wi nid fɔ gɛt mɔ fɛt pas di lɔv we Gɔd in pipul dɛn de sho. Wetin mek? Wetin yu go du if yu kɔmpin Kristian ɔ ivin wan ɛlda ɔ payɔnia kɔmit siriɔs sin? Ɔ wetin yu go du if wan brɔda ɔ sista du yu bad? Ɔ sɔntɛm sɔmbɔdi disayd fɔ bi apɔstet, ɛn tray fɔ tɔk se wi nɔ gɛt di trut. If  dɛn kayn tin dɛn de apin, yu go alaw dat fɔ ambɔg yu fet ɛn stɔp fɔ sav Jiova? Dis na di lɛsin: If yu de tray fɔ gɛt fet pan Gɔd bikɔs ɔf wetin ɔda pipul dɛn de du yu nɔ go gɛt strɔng fet. Di we aw yu de fil bɔt Jiova ɛn in pipul dɛn go ɛp yu fɔ gɛt fet, bɔt i impɔtant bak fɔ stɔdi di Baybul gud gud wan, ɔndastand wetin yu de lan, ɛn du risach so dat yu go pruv to yusɛf se wetin yu de lan na di tru. Yu nid fɔ pruv to yusɛf se di Baybul de tich di tru tin dɛn bɔt Jiova.—Rom. 12:​2.

4. Akɔdin to Matyu 13:​3-6, 20, 21, wetin sɔm kin du we sɔntin tɛst dɛn fet?

⁴ Jizɔs bin tɔk se sɔm pipul dɛn go “gladi” fɔ kam na di trut, bɔt dɛn fet go wida we dɛn gɛt prɔblɛm dɛn. (Rid Matyu 13:​3-6, 20, 21.) Sɔntɛm dɛn nɔ bin ɔndastand se di wan dɛn we de fala Jizɔs go gɛt prɔblɛm dɛn. (Mat. 16:​24) Ɔ sɔntɛm dɛn bin tink se we pɔsin bi Kristian dat min se i nɔ go ɛva gɛt prɔblɛm dɛn igen, na blɛsin nɔmɔ i go de gɛt ɛn Gɔd go pul ɔl in prɔblɛm dɛn pan am. Bɔt insay dis wɔl we wi de so tide, wi go gɛt prɔblɛm dɛn. Sɔm tin dɛn we de apin to wi kin chenj ɛn dat kin mek wi nɔ gladi bɛtɛ.—Sam 6:​6; Ɛkl. 9:​11.

5. Wetin sho se bɔku pan wi brɔda ɛn sista dɛn de sho se dɛn biliv gud gud wan se di tin dɛn we wi de lan na di tru?

⁵ Bɔku pan wi brɔda ɛn sista dɛn de sho se dɛn biliv gud gud wan se di tin dɛn we wi de lan na di tru. Wetin mek wi se so? Dɛn fet nɔ de shek ilɛksɛf dɛn kɔmpin Kristian du sɔntin we Kristian nɔ fɔ du ɔ dɛn du sɔntin we mek dɛn fil bad. (Sam 119:​165) Ɛnitɛm we dɛn gɛt prɔblɛm, dɛn fet nɔ de wik, bifo dat dɛn de gɛt strɔng fet. (Jems 1:​2-4) Wetin yu go du fɔ mek yu gɛt da kayn strɔng fet de?

6. Wetin bin ɛp di fɔstɛm Kristian dɛn fɔ gɛt fet?

⁶ Di fɔstɛm Kristian dɛn bin gɛt mɔ fet bay we dɛn bin de lan di tin dɛn we de na di Skripchɔ dɛn, ɛn di tin dɛn we dɛn bin de tich bɔt Jizɔs Krays, dat na “di Gud Nyuz we na tru.” (Gal. 2:​5) Dis tru, na ɔl di tin dɛn we wi biliv as Kristian dɛn, ɛn ivin di biliv we wi biliv se Jizɔs kam day fɔ wi ɛn i gɛt layf bak. Di apɔsul Pɔl bin biliv gud gud wan se dɛn tin dɛn de na tru. Wetin mek Pɔl bin biliv se na tru? Na bikɔs i bin yuz di Skripchɔ dɛn fɔ pruv se “di Mɛsaya bin gɛt fɔ sɔfa ɛn day ɛn rayz frɔm di grev.” (Akt 17: 2, 3) Di fɔstɛm Kristian dɛn bin lisin to dɛn tichin dɛn de ɛn dɛn bin abop pan di oli spirit fɔ ɛp dɛn fɔ ɔndastand Gɔd in Wɔd. Dɛn bin du risach ɛn mek shɔ se di tin dɛn we dɛn bin de tich dɛn kɔmɔt frɔm di Skripchɔ dɛn. (Akt 17:​11, 12; Ibru. 5:​14) Dɛn nɔ bin gɛt fet jɔs bikɔs ɔf aw dɛn bin de fil, ɛn dɛn nɔ bin de sav Jiova jɔs bikɔs dɛn bin de fil fayn we dɛn de wit dɛn kɔmpin Kristian dɛn. Bɔt dɛn bin gɛt fet bikɔs dɛn lan “[“di kɔrɛkt tin,” NWT] bɔt Gɔd.”—Kol. 1:​9, 10.

7. We wi gɛt fet bikɔs ɔf di tin dɛn we wi de lan na di Baybul, aw dat go bɛnifit wi?

⁷ Di tru tin dɛn na Gɔd in Wɔd nɔ de chenj. (Sam 119:​160) Fɔ ɛgzampul, dɛn nɔ de chenj if yu kɔmpin Kristian du sɔntin to yu we mek yu fil bad ɔ i kɔmit siriɔs sin. Ɛn dɛn nɔ de chenj ivin we wi gɛt prɔblɛm. So wi nid fɔ sabi di tin dɛn we di Baybul de tich gud gud wan ɛn pruv to wisɛf fɔ se di tichin dɛn na tru.  Jɔs lɛk aw ankɔ kin mek bot stɛdi we big briz de blo, na so wi fet we wi dɔn gɛt bikɔs ɔf di tin dɛn we wi dɔn lan na Baybul, go mek wi stɛdi we wi gɛt prɔblɛm. Wetin yu go du fɔ mek yu biliv gud gud wan se di tin dɛn we yu de lan na tru?

8. Akɔdin to 2 Timoti 3:​14, 15, wetin bin ɛp Timoti fɔ biliv gud gud wan se di tin dɛn we i de lan na di tru?

⁸ Timoti bin biliv gud gud wan se di tin dɛn we i dɔn lan na di tru. Aw i no dat? (Rid 2 Timoti 3:​14, 15.) Na in mama ɛn in grani fɔs bigin fɔ tich am di tin dɛn we de na “Gɔd in Buk.” Bɔt insɛf sɛf bin de spɛn tɛm fɔ stɔdi di tin dɛn we de na Gɔd in buk. Ɛn dat bin mek i “biliv gud wan” fɔ se di tin dɛn we de insay de na di tru. Leta, Timoti, in mama, ɛn in grani bin kam fɔ bi Kristian dɛn. Timoti go mɔs dɔn kɔle di we aw Jizɔs in disaypul dɛn bin de sho lɔv to dɛnsɛf ɛn i bin rili want fɔ kɔntinyu fɔ de spɛn tɛm wit in brɔda ɛn sista dɛn ɛn ɛp dɛn. (Fil. 2:​19, 20) Bɔt Timoti nɔ jɔs gɛt fet bikɔs i bin lɛk pipul dɛn, bɔt na bikɔs i bin lan tru tin dɛn we mek i go nia Jiova. Yusɛf fɔ tek tɛm tink gud wan bɔt wetin di Baybul de tich bɔt Jiova.

9. Wetin na di tri tin dɛn we wi nid fɔ biliv?

⁹ Fɔ bigin, yu nid fɔ biliv dɛn tri tin dɛn ya. Fɔs, yu nid fɔ biliv se na Jiova Gɔd Mek ɔltin. (Ɛks. 3:​14, 15; Ibru. 3:​4; Rɛv. 4:​11) Sɛkɔn, yu fɔ pruv to yusɛf fɔ se na Gɔd in wɔd de insay di Baybul. (2 Tim. 3:​16, 17) Ɛn tɔd, yu fɔ biliv se Jiova gɛt pipul dɛn we Krays de dayrɛkt fɔ sav am; ɛn dɛn pipul dɛn de na Jiova Witnɛs dɛn. (Ayz. 43:​10-12; Jɔn 14:​6; Akt 15:​14) Yu nɔ nid fɔ no ɔl wetin de insay di Baybul fɔ mek yu biliv dɛn tin dɛn de gud gud wan. Di men tin we yu fɔ du na fɔ “tink” so dat yu go biliv gud gud wan fɔ se di tin dɛn we yu de lan na di tru.—Rom. 12:​1, NWT.

10. We wi dɔn lan di tru tin dɛn na di Baybul, wetin bak wi fɔ ebul fɔ du?

¹⁰ We yu shɔ fɔ se di tin dɛn we wi dɔn tɔk bɔt Gɔd, di Baybul, ɛn Gɔd in pipul dɛn na tru, yusɛf nid fɔ yuz di Skripchɔ dɛn fɔ pruv to ɔda pipul dɛn se dɛn tin de na tru. Wetin mek wi fɔ du dat? Na bikɔs as Kristian dɛn, wi gɛt di wok fɔ tich di tru tin dɛn we wi dɔn lan to pipul dɛn we go lisin to wi. * (1 Tim. 4:​16) Ɛn as wi de tray fɔ ɛp ɔda pipul dɛn fɔ biliv se wetin di Baybul de tich na tru, wisɛf de gɛt strɔng fet pan dɛn tru tin dɛn de.

11. Us ɛgzampul di apɔsul Pɔl bin sɛt we i de tich?

¹¹ We Pɔl bin de tich pipul dɛn, i “tray fɔ sho dɛn . . . di Lɔ we Gɔd bin gi Mozis ɛn dɛn tin we dɛn prɔfɛt bin rayt, fɔ mek di pipul dɛn go biliv pan Jizɔs.” (Akt 28:​23) Aw wi go falamakata Pɔl we wi de tich ɔda pipul dɛn di tru? Wi nɔ fɔ jɔs tɛl dɛn wetin di Baybul se. Wi fɔ ɛp wi Baybul studɛnt dɛn fɔ tink bɔt di Skripchɔ dɛn as dɛn de go nia Jiova. Wi nɔ jɔs want mek dɛn kam na di trut bikɔs dɛn de kɔle wi, bɔt na bikɔs dɛn dɔn stɔdi fɔ dɛnsɛf ɛn dɛn dɔn kam fɔ si se di tin dɛn we dɛn de lan bɔt Gɔd na di tru.

12-13. Aw mama ɛn papa dɛn go ɛp dɛn pikin dɛn fɔ kɔntinyu fɔ de na di trut?

¹² Mama ɛn papa dɛn, wan dawt nɔ de fɔ se una want mek una pikin dɛn kɔntinyu fɔ de na di trut. Una go de tink se if una pikin dɛn gɛt gud padi dɛn na di kɔngrigeshɔn, dat go mek dɛn gɛt strɔng fet. Bɔt nɔto gud padi dɛn nɔmɔ una pikin dɛn go nid fɔ mek dɛn biliv se wetin di Baybul de tich na tru. Dɛn nid fɔ gɛt tayt padi biznɛs wit Jiova fɔ dɛnsɛf ɛn dɛn nid fɔ pruv to dɛnsɛf fɔ se wetin di Baybul de tich na tru.

¹³ Fɔ mek mama ɛn papa dɛn go tich dɛn pikin dɛn di tru bɔt Gɔd, dɛnsɛf sɛf fɔ sɛt di ɛgzampul bay we dɛn de stɔdi di Baybul gud gud wan. Dɛn fɔ tek tɛm tink gud wan bɔt wetin dɛn de lan. We dɛn du dat, dɛn go ebul fɔ tich dɛn pikin dɛn fɔ du di sem tin. Dɛn nid fɔ tich dɛn pikin dɛn aw fɔ yuz di tin dɛn we wi de yuz fɔ du risach, jɔs lɛk aw dɛn kin tich dɛn Baybul studɛnt dɛn. We dɛn du dat, dɛn go ɛp dɛn pikin dɛn fɔ lɛk Jiova ɛn abop pan “di slev we fetful ɛn gɛt sɛns.” we Jiova de yuz fɔ gi wi spirichwal it. (Mat. 24:​45-47, NWT) Mama ɛn papa, una nɔ jɔs tich una pikin dɛn di smɔl smɔl tin dɛn frɔm di Baybul. Una ɛp dɛn fɔ gɛt strɔng fet bay we una  de tich dɛn “di dip tin dɛn bɔt Gɔd,” ɛn una fɔ du dat akɔdin to di pikin in ej ɛn aw i de ɔndastand.—1 Kɔr. 2:​10, NWT.

14. Wetin mek wi fɔ stɔdi Baybul prɔfɛsi? (Luk di bɔks we gɛt di taytul “ Yu Ebul Ɛksplen Dɛn Prɔfɛsi dɛn Ya?”)

¹⁴ Baybul prɔfɛsi na impɔtant tin insay Gɔd in Wɔd we de ɛp wi fɔ gɛt strɔng fet pan Jiova. Us prɔfɛsi dɛn dɔn ɛp yu fɔ gɛt strɔng fet? Sɔntɛm yu go se di prɔfɛsi dɛn bɔt di “las dez.” (2 Tim. 3:​1-5, NWT; Mat. 24:​3, 7) Bɔt us ɔda prɔfɛsi dɛn we dɔn kam tru we go mek yu gɛt fet mɔ ɛn mɔ? Fɔ ɛgzampul, yu go ebul fɔ ɛksplen aw di prɔfɛsi dɛn we de na Daniɛl chapta 2 ɔ Daniɛl chapta 11 dɔn kam tru trade ɛn dɛn stil de kam tru insay wi yon tɛm? * We yu gɛt strɔng fet bikɔs ɔf di tin dɛn we yu dɔn lan na di Baybul, natin nɔ go mek yu lɛf fɔ gɛt fet. Lɛ wi tɔk bɔt wi brɔda dɛn we bin sɔfa bɔku tin dɛn na Jamani insay Wɔl Wɔ II. Pan ɔl we dɛn nɔ bin ɔndastand ɔl di Baybul in prɔfɛsi dɛn bɔt di las dez, dɛn bin stil gɛt strɔng fet pan Gɔd in Wɔd.

15-17. We wi brɔda dɛn bin de stɔdi di Baybul, aw dat bin ɛp dɛn we di Nazi gɔvmɛnt bin de mek dɛn sɔfa?

¹⁵ Di tɛm we di Nazi gɔvmɛnt bin de rul na Jamani, dɛn bin sɛn bɔku pan wi brɔda ɛn sista dɛn na kɔnsɛntreshɔn kamp dɛn. Itla ɛn SS Chif we nem Aynrich Imla, bin et Jiova Witnɛs dɛn. Wan sista bin tɔk se: Imla bin tɛl sɔm sista dɛn we bin de na wan kɔnsɛntreshɔn kamp se: “Una Jiova de rul na ɛvin, bɔt na wi de rul na dis wɔl! Wi go si udat go kɔntinyu fɔ de; una Jiova Witnɛs dɛn, ɔ wi di Nazi gɔvmɛnt!” Wetin bin ɛp Jiova in pipul dɛn fɔ kɔntinyu fɔ fetful?

¹⁶ Dɛn Baybul Studɛnt dɛn de bin no se Gɔd in Kiŋdɔm bin dɔn bigin rul frɔm 1914. So dɛn nɔ sɔprayz we dɛn bin de  mek dɛn sɔfa bad bad wan. Bɔt Jiova in pipul dɛn bin biliv gud gud wan fɔ se no mɔtalman gɔvmɛnt nɔ go ebul fɔ stɔp Gɔd fɔ mek wetin i want nɔ bi. Itla nɔ go ebul fɔ mek pipul dɛn lɛf fɔ wɔship Gɔd di rayt we ɔ mek gɔvmɛnt we go strɔng pas Gɔd in Kiŋdɔm. Wi brɔda dɛn bin shɔ fɔ se ilɛk wetin apin, Itla in gɔvmɛnt go dɔn.

¹⁷ Ɔl wetin dɛn brɔda ɛn sista dɛn biliv na tru. I nɔ te, di Nazi gɔvmɛnt bin kɔmɔt na pawa ɛn Aynrich Imla we bin se “na wi de rul na dis wɔl,” bin de rɔn fɔ in layf. We i bin de rɔn, i mitɔp Brɔda Lübke we na bin prizina ɛn Aynrich mɛmba am. Imla bin shem we i de aks Brɔda Lübke se: “Wɛl, Baybul Studɛnt, wetin go apin naw?” Brɔda Lübke tɛl Imla se, frɔm tɛm Jiova Witnɛs dɛn bin no se di Nazi gɔvmɛnt nɔ go de fɔ lɔng ɛn dɛn go fri. Imla bin dɔn tɔk bɔku bad tin dɛn bɔt Jiova Witnɛs dɛn, bɔt da tɛm de, i nɔ bin gɛt natin fɔ tɔk. I nɔ tu te afta dat, i bin kil insɛf. Wetin na di lɛsin? We wi de stɔdi di Baybul ɛn di prɔfɛsi dɛn we de insay de, dat go mek wi nɔ lɛf fɔ gɛt fet pan Gɔd ɛn wi go gɛt kɔnfidɛns we wi gɛt tin dɛn we de mek wi sɔfa.—2 Pit. 1:​19-21.

18. Akɔdin to Jɔn 6:​67, 68, wetin mek wi nid fɔ “no bɔt Gɔd mɔ ɛn mɔ ɛn sabi mɔ ɛn mɔ wetin gud ɛn wetin bad” lɛk aw Pɔl bin se?

¹⁸ Wi ɔl nid fɔ sho lɔv fɔ mek wi go pruv se wi na tru Kristian dɛn. Bɔt wi nid fɔ “no bɔt Gɔd mɔ ɛn mɔ, ɛn sabi mɔ ɛn mɔ wetin gud ɛn wetin bad.” (Fil. 1:​9) If nɔto dat, wi go tan “lɛkɛ pikin we kin chenj wetin dɛn biliv wɛn dɛn yɛri nyu tin, ɔ wɛn pɔsin mek dɛn ful” ivin di wan dɛn we dɔn lɛf fɔ wɔship Jiova. (Ɛfi. 4:​14) We bɔku disaypul dɛn bin lɛf fɔ fala Jizɔs, di apɔsul Pita bin gɛt kɔnfidɛns fɔ tɔk se Jizɔs “de tɔk dɛn wɔd we de gi pɔsin layf we go de sote go.” (Rid Jɔn 6:​67, 68.) Pan ɔl we Pita nɔ bin ɔndastand di minin bɔt ɔl wetin i dɔn tɔk, i bin kɔntinyu fɔ de biɛn Jizɔs bikɔs i bin dɔn ɔndastand di tru bɔt Krays. Yusɛf go ebul fɔ gɛt strɔng fet fɔ se wetin di Baybul de tich na tru. If yu du dat, yu go kɔntinyu fɔ gɛt strɔng fet ilɛk wetin apin ɛn yu go ɛp ɔda pipul dɛn fɔ gɛt strɔng fet.—2 Jɔn 1, 2.