1. Te ŋ soliŋ pɛ diomndo hoo “tonyaa” kpeku, yɛɛ naŋ yiyaŋ yɛ?

“VƐƐ ŋ looku yɛ hunɔɔ o tonyaa niŋ?” “Baa o tonyaa niŋ nda manda num ni?” “Vɛɛ kpɛ ŋ viou yɛ niŋ o tonyaa niŋ?” Naapum waŋndo nyuuniaa num niŋ naa ɔɔ num bɛɛ nyuuniaa niŋ waŋndo lende. Te ŋ soliŋ pɛ diomndo hoo “tonyaa” kpeku, yɛɛ naŋ yiyaŋ yɛ? O kpeekpei niŋ, miŋ soliŋ ndu kpeku le suɛi a laalaŋnda naalaŋ okɔɔ, mɛɛ naŋ piɛi Mɛlɛka naa yɛ a mɛɛ naŋ bii yoomu naa yɛ. Wanaa cho “o tonyaa niŋ” nda sina nyɛ Baabuiyo pɛɛku wo nduyɛ, sawala mandaala cho leniŋ ndaŋ nda tual kɔɔli ni. Le hei, a laalaŋ ndɛ choola nda pɛɛku waŋnda a Mɛlɛka okɔɔ laŋ te. Nduyɛ mi che bɛɛ a cho o chieeŋ Setana wo niŋ, kɛ a cho yoomu ndaa tueiyɔɔ yeela.—Chɔŋ 8:​32.

2. A mɛɛ Chɔŋ 13:​34, 35 dimi yɛ, yɛɛ tosa yɛ mi waŋndo hiŋ lepum o tonyaa niŋ?

² Yɛɛ tosa yɛ ma huŋ o tonyaa niŋ? Naapum kaa kɛndɛ wanaa Chɛhowaa ŋ che ni mi nyɔɔ hɛnaŋ num tau. (1 Pitɛ 2:​12) Ɔɔ kɛlɛŋgaa kaala nda nɔ le waŋnda wo tosa vɛlɛ ni. Mi wanaa bɔɔbɔɔ che mɛɛ kpɛ wanaa Chɛhowaa nɔ kaalaa le waŋnda yɛ te a kuɛ pɛ o bɔŋaŋnda naalaŋ le teleŋ tasoo. Mi che bɛɛ a loonuŋ nyɛ nda dimi paaleleŋ o bɔŋaŋndo kpou le, kɛ fɛŋ bɛɛ a puɛɛnuŋ a kaala nda chɔm nda wo le. Hei nɔ mii bii naa kɔndɔfili le kanifuule, mi Chiisu dimi maa kaala cho buɛiyaa nduaa tɛɛŋ ndo cho tosa ni mi waŋnda sina maa nda cho Kilisiɔŋaa tonyaa ni. (Nuawɔ Chɔŋ 13:​34, 35.) Kɛ o cho ko kaalaa hoo le tosa miŋ nɔ tiindaŋ kala kalaa le.

3. Te o wa pɛ maa le mɛɛ puaapiliaa a ndepiliaa kaala naa yɛ kinɛi naŋ nɔ tiindaŋndo o Mɛlɛka niŋ ni, yɛɛ nɔla yɛ mbo yɔŋnuŋ?

³ Kaala cho wanaa Mɛlɛka tɛɛŋndo suee nɔla mbo tosa miŋ nɔ tiindaŋ kala kalaa le. Le yɛɛ naŋ dimi yɛ lende? Yiyaŋndɔ a hei okɔɔ. Yɛɛ ŋ cho yɛ tosa te chaaŋ num laalaŋndo mɛɛ bɛndu kundaa ɔɔ kɔɔfanɔɔ cho naa yɛ, tosa pɛ haki wɔɔŋ wɔɔŋndo? Yɛɛ  ŋ cho yɛ tosa te o yɔŋ pɛ mi puaapilɛnɔɔ ɔɔ ndepilɛnɔɔ pilaŋ num tana? Ɔɔ te o wa yɛ mi waŋndo mal tonyaa mbo wa keiyo tɔɔ Seiyaa Chɛhowaa tɛɛmbuuwo maa o choolaŋ choo nda cho ni. Baa a cho pa kɔl tambu ma mal Chɛhowa piɛiyo? Kɛsiŋ hei o kɔl: A nɔ ma kindiŋ le chaŋyɛi kpɛɛluŋnde nɔɔ a Chɛhowa le ma nɔ tiindaŋ kala kalaa o ndu niŋ. Te tiindaŋ numndo tɔlnuŋ pɛ o sɔɔŋ waŋnda tosa woŋ choo, mɛɛ o cho wa o kala le. Kaala cho wanaa Chɛhowaa tɛɛŋndo a kaa nda kɛndɔɔ nɔla mbo mala num ma nɔ tiindaŋ pɔmbɔ. Kɛ le ma nɔ tiindaŋ kala kalaa, mɛɛ ma pɛɛku Baabuiyo nyɛkɛndɛi nduyɛ ma bii nyɛ ŋ cho pɛɛkoo wo bila. A nɔ vɛlɛ ma tosa yaasiaa le ma sina kɛsɛ maa tonyaa ŋ cho pɛɛkoo a Chɛhowa okɔɔ ni.—Luomaŋ. 12:​2.

4. A mɛɛ Maatiu 13:​3-6, 20, 21 dimi yɛ, yɛɛ yɔŋnuŋ yɛ waŋnda apum te bahawɛilaŋ la komal nda pɛ?

⁴ Mi Chiisu dimi maa waŋnda apum cho tonyaa tueiyɔɔ ma chɛl ndu a “kɔl kɛndɛ.” Kɛ maa tiindaŋ ndaa cho yɔŋyɔla te bahawɛilaŋ la komal nda pɛ. (Nuawɔ Maatiu 13:​3-6, 20, 21.) Naapum waŋnda haa ndaa bii ndi bila maa te waŋndo simnuŋ pɛ buɛi Chiisu wo, sɔɔŋ palaŋ nɔ le ndu komal lo le. (Maa. 16:​24) Ɔɔ kɛlɛŋgaa ndaa yiyaŋ ko maa te wana simnuŋ pɛ Kilisiɔŋnɔɔ, yoomoo tuŋ ŋ tuɛi yeela ni nduyɛ, bahawɛi kɛ kɛ komal lɛ num te. Kɛ o cho chieeŋ koŋ te cho hoo le. Lepum mi sɔɔŋ naŋ ve kɔl te woŋ komal naa o yoomoo niŋ nduyɛ, miŋ tambu kɔl tau.​—Sam 6:​6; Ikili. 9:​11.

5. Vɛɛ puaapiliaa a ndepiliaa naa bɔɔbɔɔ cho yɛ chɔmndo maa o tonyaa niŋ kɛsɛ nda cho ni?

⁵ Puaapiliaa a ndepiliaa bɔɔbɔɔ cho hau chɔmndo maa a nɔ tiindaŋndo kɛsɛ maa o tonyaa niŋ nda cho ni. Le yɛɛ naŋ dimi yɛ lende? O yɔŋ bɛɛ mi chaaŋ nda laalaŋndo pilaŋ nda tana ɔɔ mi waŋndo luei balaŋ o sɔɔŋ wɔɔŋndoŋ niŋ, a feŋaŋ o tiindaŋ ndaa choo le. (Sam 119:​165) Sɔɔŋ palaŋ komal nda woŋ yɔŋyɔla tiindaŋ ndaa le. Kɛ mɛɛ ŋ komal nda fau, lende koni tiindaŋ ndaa hiau lachi a kaloo ni. (Chemi. 1:​2-4) Yɛɛ ŋ nɔ yɛ ma tosa le ma nɔ tiindaŋ kala waa lende?

6. Yɛɛ tosa yɛ mi buɛiyaa Chiisuaa wa o wɔsiŋ kɛmɛ tasoŋ niŋnda nɔ tiindaŋ kala kalaa?

⁶ Buɛiyaa Chiisuaa o wɔsiŋ kɛmɛ tasoŋ niŋ ndaa nɔ tiindaŋ kala kalaa kanifuule, ma pɛɛku Diom Mɛlɛkaa a sɔɔŋ Chiisu dimi woŋ. Sɔɔŋ muŋ cho ‘tonya cho a yooŋgu kɛndɛ Mɛlɛkaa o kɔɔ wo ni.’ (Kalee. 2:​5) Tonyaa hoo cho sɔɔŋ Kilisiɔŋnda laalaŋ kpou woŋ ni, mɛɛ sala baŋaa Chiisu wo a fulasɛiniŋ o sɔla wo cho naa yɛ. Pɔɔl ndoo nɔ tiindaŋndo kɛsɛ maa nyɛ Baabuiyo dimi a sɔɔŋ muŋ okɔɔ wo cho tonya. Le hei, mi ndoo soliŋ Diom Mɛlɛkaa kpeku le waŋnda chɔmndo maa “i cho i poonyiaa maa, mɛɛ mi Kiliti . . . bii mɔnɛi, o koŋ kɔɔli, mi Mɛlɛka miŋgi ndu yoomu.” (Walta. 17:​2, 3) Mi buɛiyaa Chiisuaa wa o wɔsiŋ kɛmɛ tasoŋ niŋnda chɛl pɛɛkulaŋ ndaŋ. Nduyɛ, ma tiindaŋ nyina diandaa Mɛlɛkaa le nda malaa ma bii Baabuiyo bila. Mi ndapila tosa yaasiaa le sinaa kɛsɛ maa nyɛ nda wa nda pɛɛkoo wo chɛlaŋ a nyɛ Baabuiyo dimi wo. (Walta. 17:​11, 12; Hibu. 5:​14) O cho kaala puaapiliaa ndaa nɔ le nda wo suee le tosa ma duau tiindaŋ ndaa o Mɛlɛka niŋ te. Nduyɛ, o cho vɛlɛ nyaale ndaa sɔla le waa latulu a chaaŋaa ndaa laalaŋnda wo le tosa ma piɛi Chɛhowa le. Kɛ o ‘dɛnɛ sinaa ndaa nɔ a Mɛlɛka okɔɔ’ wo choo tiindaŋ ndaa ndoo tɔlnuŋ ni.—Kolo. 1:​9, 10.

7. Te tiindaŋ naa tɔlnuŋ pɛ o Baabuiyo choo, yɛɛ cho yɛ yɔŋnɔŋ?

⁷ Fɛŋ bɛɛ tonya cho o Diom Mɛlɛkaa niŋndo siŋgaŋ te. (Sam 119:​160) Le taamaseliiyo, o yɔŋ bɛɛ mi chaaŋ naa laalaŋndo pilaŋ naa tana ɔɔ mbo tosa haki wɔɔŋ wɔɔŋndo, tonyaa hoo siŋgaŋ te. Nduyɛ o yɔŋ bɛɛ mi bahawɛilaŋ la komal naa, o siŋgaŋ vɛlɛ le keŋ te. Lelaŋ, ŋ nɔ miŋ kindiŋ le Baabuiyo sinaa nyɛkɛndɛi nduyɛ miŋ nɔ tiindaŋndo maa nyɛ cho leniŋndo cho tonya. Te tiindaŋ naa tɔlnuŋ pɛ o Baabuiyo choo, simul kɛ kɛ hiiluu naa miŋ mal Chɛhowa piɛiyo le. Tiindaŋ naa cho ko maa nyɛ  saa dɛndɛ bɛndu kua o mɛŋndaŋ choo le mbo pɛŋgi hiilɔŋndo a teleŋ ihueiyo wo. Yɛɛ ŋ nɔ yɛ ma tosa le ma nɔ tiindaŋndo maa o tonyaa niŋ kɛsɛ ŋ cho ni?

8. A mɛɛ Timoti Diiŋ Ndɔɔ 3:​14, 15 dimi yɛ, yɛɛ ndoo ke yɛ Timoti tiindaŋndo kɛsɛ maa o tonyaa niŋ o wa ni?

⁸ Timoti ndoo nɔ tiindaŋndo kɛsɛ maa o tonyaa niŋ o wa ni. Yɛɛ ndoo ke yɛ ndu tiindaŋ waa lende? (Nuawɔ Timoti Diiŋ Ndɔɔ 3:​14, 15.) Wanaa pɛɛku ndu “sɔɔŋ cho o Yau Mɛlɛkaa niŋ ndoŋ” wa kala ndɔ a mama ndɔ ni. Kɛ mi ndupila bɛɛ wou dɔɔ sɛmbɔɔ nduyɛ, mbo chua dɔɔ vɛlɛ teleŋndo tau le sɔɔŋ muŋ pɛɛkoo. Le hei, mbo hiau lachi a “sisilaŋ . . . nyɛ kɛndɛ yi” o ‘laalaŋ bɛndu o laalaŋ ndo’ choo mɛɛ o sina maa tonyaa cho o sɔɔŋ o pɛɛku woŋ niŋ. Okoŋ kɔɔli, mɛɛ yooŋgu kɛndɔɔ komal Timoti, kala ndɔ a mama ndɔ, ma pɛɛku vɛlɛ a sɔɔŋ Chiisu dimi woŋ okɔɔ. Mi nyɔɔ hɛnaŋ dɔɔ Timoti tau a kaala wa buɛiyaa Chiisuaa tɛɛŋndo. Nduyɛ, ndoo nɔ bɔɔ yeemɛi le waa latulu a puaapiliaa a ndepiliaa nduaa a le nda malaa. (Filipi. 2:​19, 20) Kɛ o cho kaala ndoo nɔ le chaaŋaa nduaa laalaŋnda wo suee le tosa mbo nɔ tiindaŋ kala kalaa o Mɛlɛka niŋ te. Tonya o pɛɛku o Baabuiyo niŋndo tosa ni nduyɛ tonya koŋ nyindu ndu ni mbo simnuŋ chaaŋ o Chɛhowa. Num bɛɛ nɔ ma pɛɛku Baabuiyo nyɛkɛndɛi nduyɛ ma laalaŋ kɛsɛ maa nyɛ o cho dimioo a Chɛhowa okɔɔ wo cho tonya.

9. Le tiindaŋndo nɔɔ maa o tonyaa niŋ ŋ cho ni, sɔɔŋ ŋgaa kuɛɛ ŋ nɔ yɛ ma yaasiaa?

⁹ Le tiindaŋndo nɔɔ maa o tonyaa niŋ ŋ cho ni, a nɔ ma yaasiaa sɔɔŋ ŋgaa nduyɛ ma chɛl tonya Baabuiyo pɛɛku a muŋ okɔɔ wo. I tasei, a nɔ ma nɔ tiindaŋndo kɛsɛ maa Chɛhowa toosiaa nyɔɔŋ kpou ni. (Ɛsɔ. 3:​14, 15; Hibu. 3:​4; Sɔɔŋ. 4:​11) I diiŋ nduɛi, a nɔ ma sina nyɛ tosa ma laalaŋ maa Baabuiyo kinɛi cho Diom Mɛlɛkaa ni wo. (2 Timo. 3:​16, 17) Nduyɛ i yaa nduɛi, a nɔ ma nɔ tiindaŋndo kɛsɛ maa Chɛhowa nɔ wanaa o kɔɔna ma wa ndu piɛiyo Chiisu o ba bɛŋgu wa. Nduyɛ maa, wanaa kaŋ cho Seiyaa Chɛhowaa ni. (Aisaya 43:​10-12; Chɔŋ 14:​6; Walta. 15:​14) O cho le ma nɔ kɔl kalu Baabuiyo tau le ŋ nɔ ma kindiŋ le tonya cho a sɔɔŋ muŋ okɔɔ wo sinaa le. Kɛ kpeleŋ numndo nɔ mbo wa le ma kindi tiindaŋ numndo maa o “nɛi kpekpeiyo” choo ŋ cho Mɛlɛka piɛiyo ni.—Luomaŋ. 12:​1.

10. O faŋaŋndɔ o tonya naŋ sina wo kɔɔli, yɛɛ naŋ nɔ yɛ vɛlɛ miŋ tosa?

¹⁰ Numpila nɔ fɛŋ ma laalaŋ kɛsɛ maa nyɛ ŋ pɛɛku a Mɛlɛka, Baabuiyo vɛlɛ a wanaa Mɛlɛkaa okɔɔ wo cho tonya. Te a laalaŋ pɛ tonya cho a sɔɔŋ muŋ okɔɔ wo, a nɔ ma soliŋ Diom Mɛlɛkaa kpeku le waŋnda malaa mi nda bɛɛ laalaŋ. Le yɛɛ? Kanifuule naa Kilisiɔŋnda, ŋ nɔ miŋ chɔm wanaa yaŋ naa nilaŋ nda tonya naŋ pɛɛku o Baabuiyo niŋndo. * (1 Timo. 4:​16) Mɛɛ naŋ mala waŋnda le ma dɔu tiindaŋ ndaa o tonya cho o Baabuiyo niŋndo fau, lende ko tiindaŋ naa bɛɛ nɔ o tonyaa hoo niŋndo hiau lachi a kaloo ni.

11. Te o hiŋ pɛ a waŋnda pɛɛkoo tonya cho o Baabuiyo niŋndo okɔɔ, taamasi kuɛɛ Pɔɔl kɛsul lɛ naa?

¹¹ Te Pɔɔl ndoo wa pɛ waŋnda pɛɛkoo tonya cho a Chiisu okɔɔ wo, mi ndoo “tombola sawala Mɛlɛka ke Muuse le Chuuwa laŋ kpolototo, a diomnda wanaa suaa le Mɛlɛka wa a poonyiaa laŋ le ma laalaŋ.” (Walta. 28:​23) Vɛɛ naŋ tuallɛ taamasi Pɔɔllo kɔɔli te ŋ wa pɛ waŋnda tonya cho o Baabuiyo niŋndo pɛɛkoo? O cho ko bolii Baabuiye le naŋ nɔ miŋ yaandial nda le. Kɛ ŋ nɔ miŋ mala wanaa naŋ cho Baabuiyo pɛɛkoo wa ma sina nyɛ nda cho pɛɛkoo wo nduyɛ ma yiyaŋ lechoo. Koŋ tosa nda ma sɔɔŋguu Chɛhowa ikɛi kpɛɛluŋ. O cho le mɛɛ nda nɔ bɛɛle naaleŋ yɛ le nda nɔ ma chua tonyaa le. Kɛ a nɔ ma chua ndu le mɛɛ nda pɛɛku Baabuiyo nduyɛ mi ndapila laalaŋ tonya cho leniŋ a Mɛlɛka naa kaalaa okɔɔ wo yɛ.

12-13. Vɛɛ kalaŋ chuauwa mala yɛ chuauwaa ndaa le ma wa o tonyaa niŋ?

¹² Kalaŋ chuauwa, ŋ sina maa la yeema mi chuauwaa nyaa wa o tonyaa niŋ. Naapum ma yiyaŋ dɔɔ maa te chuauwaa numnda nɔ pɛ chaŋyaŋ kɛndɔŋ o kundaa niŋ, a cho hiouwɔɔ lachioo tosa o Mɛlɛka piɛiyo niŋ. Kɛ le mi chuauwaa numnda nɔ tiindaŋndo kɛsɛ maa o tonyaa niŋ nda cho ni, o cho ko chaŋyaŋ kɛndɔŋ te nda nɔ ma nɔ le. Mɛɛ mi ndapila nɔ chaŋyɛi kpɛɛluŋnde a Mɛlɛka nduyɛ ma laalaŋ kɛsɛ maa Baabuiyo nɔ tonyaa a ndu okɔɔ.

¹³ Le mi kalaŋ chuauwa pɛɛku chuauwaa ndaa tonya cho a Mɛlɛka okɔɔ wo, mɛɛ mi ndapila kɛsi fɛŋ taamasi kɛndɔɔ le Diom Mɛlɛkaa pɛɛkoo nyɛkɛndɛi. A nɔ ma chua teleŋndo le yiyaŋndo o nyɛ nda cho pɛɛkoo wo choo. Te a tosa pɛ hei, a cho batiuwaa sɔla le chuauwaa ndaa malaa ma tol taamasi ndaa kɔɔli. O cho ko wanaa nda pɛɛku Baabuiyo wa le nda nɔ ma chɔm mɛɛ wana tosa yaasiaa o yaula naalaŋ niŋ a o tɛɛŋgii nɛi choo yɛ le. Kɛ, a nɔ vɛlɛ ma chɔm chuauwaa ndaa. Te a tosa hei pɛ, a cho chuauwaa ndaa mala ma nɔ balika melaa le Chɛhowa a wanaa o cho soliŋndo kpeku le naa pɛɛkoo wa. Nda cho yɛ “buɛi cho sakpo, nduyɛ, mbo wa buɛi kɔl kalu wo” ni. (Maa. 24:​45-47)  Kalaŋ chuauwa, la pɛɛku chuauwaa nyaa sɔɔŋ taseŋ cho o Baabuiyo niŋndoŋ kinɛi mi la chalnuŋ te. La mala nda ma nɔ tiindaŋ kala kalaa o Mɛlɛka niŋ. La tosa hei te la pɛɛku nda pɛ sɔɔŋ cho “ŋ viaŋnaŋ kpiŋ kpiŋ” o Diom Mɛlɛka niŋndoŋ a mɛɛ wɔsila ndalaŋ la cho yɛ.​—1 Kɔliŋ. 2:​10.

14. Le yɛɛ naŋ nɔ yɛ miŋ pɛɛku huuluŋ Baabuiyoŋ? (Tofa vɛlɛ kɔfoo hoo “ A Nɔla Pa Ma Tɛɛsiaa Huuloŋ Muŋ?”)

¹⁴ Huuluŋ cho o Diom Mɛlɛkaa niŋndoŋ cho bɔɔ nyɛ sɔvɛ kanifuule, ŋ nɔla miŋ mala naa le tiindaŋ kala kalaa nɔɔ o Chɛhowa niŋ. Huuluŋ kuɛɛ kindi yɛ niŋ tiindaŋ numndo? Naapum ma dimi dɔɔ maa huuluŋ soo a “palɛi mɛɛlɛi” okɔɔ woŋ. (2 Timo. 3:​1-5; Maa. 24:​3, 7) Kɛ o faŋaŋndɔ o muŋ kɔɔli, huuluŋ kuɛɛ nɔla yɛ vɛlɛ miŋ kindi tiindaŋ numndo? Le taamaseliiyo, a nɔla pa ma tɛɛsiaa mɛɛ huuluŋ cho o Daaniɛɛ bolle 2 ɔɔ 11 niŋndoŋ peeluŋ niŋ yɛ? A nɔla pa ma tɛɛsiaa mɛɛ ŋ cho wɔ kɔlaŋ a peelɔŋndo yɛ? * Te tiindaŋ numndo tɔlnuŋ pɛ nyɛkɛndɛ yi o Baabuiyo choo, nyɛ o nyɛ hiiluu ndu le. Tofawɔ taamasi puaapiliaa naa nda tuisi nyɛpalaa choo Chamani a teleŋ Chɔu Chieeŋ Diiŋ Ndɔɔ wo. Puaapiliaa haa ndaa bii huuluŋ Baabuiyo dimi a palɛi mɛɛlɛi okɔɔ woŋ bila kpou le. Kɛ a koŋ kpou, ndaa nɔ tiindaŋ kala kalaa o Diom Mɛlɛkaa niŋ.

15-17. Vɛɛ Baabuiyo pɛɛkoo kindi yɛ tiindaŋ puaapiliaa ndaa tusi nyɛpalaa choo Chamani wa?

¹⁵ Mɛɛ kunda lemasa ndaa veelu aa Naasi wo sɔla masaleŋ Chamani, ma kua a puaapiliaa a ndepiliaa naa o dɔɔŋgɔla ndaa kota waŋnda laŋ niŋ o waalaŋ niŋ. Mi Hitila a sovɛinɔ bɛndu pilɛ Hɛnluich Himla tul Seiyaa Chɛhowaa leyɛ tau. Mi ndepilɛnɔ pilɛ dimi maa paale pilɛ, mi Himla dimul ndepiliaa wa o dɔɔŋgɔɔ opum nda aa: “O choo choo niŋ Chɛhowa nyaa nɔ kpaayaa ni. Kɛ o chieeŋndo choo naŋ ndu, naŋ nɔ kpaayaa ni! Ŋ malaŋ pɛ naa nyaa waŋ, wana banaa cho fula!” Yɛɛ mala yɛ wanaa Chɛhowaa le loo o tiindaŋ ndaa choo?

¹⁶ Puaapiliaa a ndepiliaa naa kaŋ ndaa sina maa Masale Mɛlɛkaleŋ le kanduŋ niŋ choo choo o wɔsi 1914 niŋ. Lelaŋ, kɔndɔfili bii nda le nyɛpalaa nda wa nda tusioo choo wo le. Wanaa Chɛhowaa ndaa nɔ tiindaŋndo maa masale wanachioo le nɔla mi le kuuna hɛnaŋ Mɛlɛkaa  yɔŋnɔŋndo le. Ndaa sina vɛlɛ maa Hitila nɔla mbo faŋa piɛile tonyaleŋ te. Nduyɛ maa masale ndɔleŋ le nɔla mi le kpeeŋa Masale Mɛlɛkaleŋ ikɛi le. Puaapiliaa naa ndaa nɔ tiindaŋndo maa mɛɛ mɛɛ Hitila kindiŋ, masale ndɔleŋ le cho mɛɛlu.

¹⁷ Tiindaŋ puaapiliaa a ndepiliaa naa ndaa nɔ koŋ ndo del lɛŋ te. Nyɔɔ viu bɛɛ le mi masale Hitila leŋ le piɔl. Mi Hɛnluich Himla, laŋunɔ dimi maa ‘nda nɔ kpaayaa o chieeŋndo choo naŋndo’ nyaanuŋ yɔŋi nda dii ndu. Mɛɛ o wa nyaanɔŋndo, mbo komal Ŋgɔɔ Lubke puaapilɛnɔ ndaa bii paandu wo nduyɛ, mbo loonuŋ maa Sei Chɛhowaa o cho ni. Mi siɔmbulaŋ la bii Himla okoŋ, mbo nyuna Ŋgɔɔ Lubke aa: “Nya cho Sukuuwaa Pɛɛkaa Baabuiya ni fallo, vɛɛ sɔɔŋ cho yɛ wa?” Mi Ŋgɔɔ Lubke dimul Himla maa Seiyaa Chɛhowaa ndaa sina maa masale Hitila leŋ le cho piɔl ma fula o kotaa bɛŋgu. Sondo suaa bɛɛ ve lɛ laŋunɔɔ hoo le mi che bɛɛ ndu ndoo dimi sɔɔŋ wɔɔŋndoŋ tau a Seiyaa Chɛhowa okɔɔ ni. Nduyɛ nyɔɔ viu bɛɛ le mbo diinuŋ. Yɛɛ hei pɛɛku yɛ naa? Ŋ nɔ miŋ chua teleŋndo le Baabuiyo pɛɛkoo a huuluŋ cho leniŋ ndoŋ kpou. Keŋ nɔla mii kindi tiindaŋ naa o Mɛlɛka niŋ nduyɛ miŋ sim yi te a tusi naa pɛ nyɛpalaa choo.​—2 Pitɛ 1:​19-21.

18. A mɛɛ Chɔŋ 6:​67, 68 dimi yɛ, le yɛɛ naŋ nɔ yɛ miŋ “chɔɔlu dɛnɛ sinaa kpeekpeiyo sɔla a kɔl kalu kpeekpeiyo”?

¹⁸ Kaalaa cho pondale Kilisiɔŋaa tonyaa ni. Lelaŋ, naa kpou nɔ miŋ chɔm puaapiliaa a ndepiliaa naa kaalaa. Kɛ o cho ko kaalaa le naŋ nɔ miŋ nɔ le. Ŋ nɔ vɛlɛ miŋ “chɔɔlu dɛnɛ sinaa kpeekpeiyo sɔla a kɔl kalu kpeekpeiyo.” (Filipi. 1:​9) Te o cho koŋ te, ‘wanaa leyalaa nɔ hunɔɔ a pɛɛkula ndala lachoowalaŋ le naa huiyo wa nɔla ma hui naa ma faŋa naa o nɛi.’ Nduyɛ, wanaa simul tonyaa wa cho o waŋnda haa tɛɛŋ. (Ɛfi. 4:​14) Mi buɛiyaa Chiisuaa a bɔɔbɔɔ faŋaŋ ndu kɔɔli teleŋ pilɛ. Mɛɛ hei yɔŋnuŋ, mi Pitɛ dimul Chiisu a kɔl ndɔɔ kpou aa: “Diomnda numndaŋ, laŋ la tosa ni mi waŋnda sɔla yoomu kpeekpeiyo.” (Nuawɔ Chɔŋ 6:​67, 68.) Pitɛ ndoo bii diomnda laŋ bila kpou a teleŋ koŋ te. Kɛ a koŋ kpou, mbo chɔm lolechoo wo o Chiisu lo kanifuule ndoo bii niŋ tonya wa a ndu okɔɔ wo bila. Num bɛɛ nɔ ma hiou lachi a sɔɔŋ Baabuiyo pɛɛkoo le ma nɔ tiindaŋndo maa tonya ŋ cho ni. Te a tosa lende pɛ, nyɛ o nyɛ feŋa num o tiindaŋ numndo choo le. Nduyɛ, a nɔla vɛlɛ ma mala acheleŋnda le ma nɔ tiindaŋ kala kalaa.—2 Chɔŋ 1, 2.