1. Ki savedir “laverite”?

“KOUMA to’nn konn laverite?” “Eski to’nn grandi dan laverite?” “Komie tan to dan laverite?” Kitfwa sertin finn deza poz twa sa bann kestion-la, ouswa twa to finn poz lezot sa bann kestion-la. Me ki savedir “laverite”? Souvan, nou servi sa lexpresion-la kan nou koz lor nou bann krwayans, lor nou ladorasion, ek lor fason ki nou viv. Bann dimounn ki dan “laverite,” zot konn seki Labib ansegne ek zot viv dapre bann prinsip ki ena dan Labib. Akoz sa, zot nepli krwar dan lansegnman bann fos relizion ek zot ere mem si zot pe viv dan lemond Satan.​—Zan 8:32.

2. Dapre Zan 13:34, 35, ki kitsoz o-koumansman kapav atir enn dimounn dan laverite?

² O-koumansman, ki kitsoz finn atir twa dan laverite? Kitfwa se bon kondwit bann serviter Zeova. (1 Pier 2:12, NW) Ouswa kitfwa se lamour ki zot ena pou bann dimounn. Boukou dimounn ki asiste renion pou premie fwa trouv sa lamour-la ek sa plis tous zot ki seki zot tande depi lor lestrad. Sa pa etonn nou parski Zezi ti dir ki bann dimounn ti pou rekonet so bann disip par lamour ki ena ant zot. (Lir Zan 13:34, 35.) Li vre ki lamour se kalite ki idantifie pep Zeova. Me pou ki nou ena enn lafwa for, ena lezot kitsoz osi ki nou bizin fer.

3. Ki kapav arive si nou lafwa li baze zis lor lamour ki ena parmi bann serviter Bondie?

³ Fode pa ki nou lafwa li baze zis lor lamour ki ena parmi bann serviter Bondie. Kifer? Fer koumadir enn frer,  kitfwa enn ansien ouswa enn pionie, inn fer enn pese grav. Ouswa enn kikenn inn bles twa dan enn sertenn fason. Ouswa enn kikenn inn vinn enn aposta ek li pe dir ki bann Temwin Zeova pa dan laverite. Si bann kitsoz koumsa arive, eski to pou aret servi Zeova? An realite, si to lafwa li baze zis lor seki lezot fer ek pa lor to relasion avek Zeova, to lafwa pa pou solid. To lamour pou Zeova ek pou to bann frer ek ser kapav ed twa pou devlop to lafwa. Me li bien inportan osi ki to etidie Labib an profonder, to konpran seki to pe aprann, ek to fer bann resers pou ki to sir ki to pe aprann laverite lor Zeova. To bizin ‘verifie par tomem’ ki Labib ansegn laverite lor Zeova.​—Rom. 12:2, NW.

4. Dapre Matie 13:3-6, 20, 21, ki arive kan sertin gagn bann problem?

⁴ Zezi ti dir ki sertin ti pou aksepte laverite avek “lazwa,” me ki zot lafwa ti pou afebli kan zot ti pou gagn bann difikilte. (Lir Matie 13:3-6, 20, 21.) Kitfwa zot pa ti realize ki tou bann ki swiv Zezi pou gagn bann difikilte. (Mat. 16:24) Ouswa zot ti panse ki bann Kretien pena okenn problem, zot gagn zis benediksion. Me dan sa lemond ki nou pe viv la, nou pou gagn bann difikilte. Nou sitiasion kapav sanze ek parfwa sa kapav diminie nou lazwa.​—Ps. 6:6; Ekle. 9:11.

5. Kouma laplipar nou bann frer ek ser montre ki zot sir ki zot dan laverite?

⁵ Laplipar nou bann frer ek ser montre ki zot sir ki zot dan laverite. Kouma zot fer sa? Kan enn frer ouswa enn ser bles zot ouswa fer enn move kitsoz, zot lafwa pa afebli. (Ps. 119:165) Sak fwa ki zot pas par enn leprev, zot lafwa vinn pli for, olie ki li afebli. (Zak 1:2-4) Kouma to kapav ena enn lafwa for koumsa?

6. Lor ki kitsoz lafwa bann Kretien dan premie siek ti baze?

⁶ Dan premie siek, lafwa bann Kretien ti baze lor konesans ki zot ti ena lor bann Lekritir ek lor bann lansegnman Zezi Kris, setadir ‘laverite konsernan Bonn Nouvel.’ (Gal. 2:5) Sa ‘laverite-la’ se tou bann lansegnman Kretien, parmi ena sakrifis Zezi ek so rezireksion. Lapot Pol ti sir ki sa bann lansegnman-la ti vre. Kifer? Parski li ti servi bann Lekritir pou explike ki “Lekris ti bizin soufer e resisite parmi bann mor.” (Zist. 17:2, 3) Bann Kretien dan premie siek ti aksepte sa bann lansegnman-la ek zot ti kont lor lespri sin pou ed zot konpran Parol Bondie. Zot ti verifie par zotmem ki sa bann lansegnman-la ti baze lor bann Lekritir. (Zist. 17:11, 12; Ebre 5:14) Zot lafwa pa ti baze zis lor lamour ki ena parmi bann serviter Bondie, ek zot pa ti pe servi Zeova zis parski zot ti santi zot bien parmi zot bann frer ek ser. Okontrer, zot lafwa ti baze lor “vre konesans Bondie.”​—Kol. 1:9, 10.

7. Kouma nou lafwa dan bann lansegnman Labib kapav ed nou?

⁷ Bann verite ki ena dan Labib zame pa sanze. (Ps. 119:160) Par exanp, zot pa sanze kan enn konpagnon Kretien ofans nou ouswa fer enn pese grav. Ek zot pa sanze kan nou gagn bann difikilte. Alor, nou bizin konn bien bann lansegnman ki ena dan Labib ek nou bizin sir ki zot vre. Nou lafwa dan bann lansegnman Labib pou ed nou pou tini ferm kan nou fer fas ar bann leprev, parey kouma enn lank ki tini enn bato kan lamer move. Kouma nou kapav fer sir ki nou dan laverite?

8. Dapre 2 Timote 3:14, 15, kouma Timote ti sir ki li ti dan laverite?

⁸ Timote ti sir ki li ti dan laverite. Kifer li ti sir? (Lir 2 Timote 3:14, 15, NW. *) So mama ek so granmer ti ansegn li bann “lekritir sakre.” Me pena dout ki li ti osi pran letan ek fer zefor pou etidie sa bann lansegnman-la. Akoz sa, li ti sir ki sa bann lansegnman-la ti laverite. Plitar, Timote, so mama, ek so granmer ti vinn Kretien. Timote sirman ti bien inpresione par lamour ki ti ena parmi bann Kretien. Li ti bien kontan pas letan avek bann frer ek ser, ek ed zot. (Fil. 2:19, 20) Selman, so lafwa pa ti baze lor so lamour pou so bann konpagnon Kretien, me lor bann lansegnman ki ena dan bann Lekritir. Li ti sir ki sa bann lansegnman-la ti vre, ek sa ti fer li vinn pros ar Zeova. Twa osi to bizin etidie Labib ek reflesi lor seki li aprann twa lor Zeova.

9. Ki trwa lansegnman bien inportan to bizin sir?

⁹ Pou koumanse, ena trwa lansegnman bien inportan ki to bizin sir. Premierman, to bizin sir ki Zeova Limem Kreater tou kitsoz. (Ex. 3:14, 15; Ebre 3:4; Rev. 4:11) Deziemman, to bizin sir ki Labib se mesaz ki Bondie inn donn bann imin. (2 Tim. 3:16, 17) Ek trwaziemman, to bizin sir ki Zeova ena enn pep organize ki pe ador Li, ki sa pep-la se bann Temwin Zeova, ek ki se Zezi zot sef. (Iza. 43:10-12; Zan 14:6; Zist. 15:14) Pou ki to sir ki sa bann lansegnman-la zot vre, sa pa vedir ki to bizin konn tou lor Labib. To bizin servi to “kapasite pou rezone” pou fer sir ki to dan laverite.​—Rom. 12:1, NW.

10. Anplis ki nou konn laverite, ki kitsoz nou bizin kapav fer?

¹⁰ Apre ki to’nn sir ki sa trwa lansegnman-la  zot vre, to bizin kapav servi Labib pou konvink lezot osi konsernan sa bann lansegnman-la. Kifer? Parski antan ki Kretien, nou ena responsabilite pou ansegn bann verite ki nou’nn aprann, ar bann ki anvi ekoute. * (1 Tim. 4:16) Anplis, kan nou ed lezot pou krwar dan sa bann lansegnman-la, nou ranforsi nou prop lafwa dan sa bann verite-la.

11. Kouma nou kapav swiv lexanp lapot Pol kan nou ansegn bann dimounn?

¹¹ Kan lapot Pol ti ansegn bann dimounn, li ti “servi lalwa Moiz ek liv profet pou li konvink zot lor Zezi.” (Zist. 28:23) Kan nou ansegn lezot, kouma nou kapav imit Pol? Nou bizin pa zis dir zot seki Labib ansegne. Nou bizin ed zot pou etidie ek pou reflesi lor seki zot aprann dan Labib pou ki zot vinn pros ar Zeova. Nou anvi ki zot aksepte laverite, pa parski zot respekte nou, me parski zot finn trouve par zotmem ki seki zot pe aprann lor Bondie li laverite.

12-13. Kouma bann paran kapav ed zot zanfan pou res dan laverite?

¹² Pena dout ki bann paran anvi ki zot zanfan res dan laverite. Kitfwa zot panse ki si zot zanfan ena bann kamarad dan lasanble, sa pou ed zot pou progrese lor plan spiritiel. Selman, pou ki zot zanfan sir ki li dan laverite, li pa ase ki li zis ena bann bon kamarad. Li bizin ena enn bon relasion avek Zeova ek li bizin sir ki seki Labib ansegne li laverite.

¹³ Pou ansegn zot zanfan laverite lor Bondie, bann paran bizin donn lexanp, setadir zotmem zot bizin kontan etidie Labib. Zot bizin pran letan pou medit lor seki zot aprann. Lerla, zot pou kapav ansegn zot zanfan pou fer parey. Zot bizin montre zot zanfan kouma pou servi bann zouti ki lorganizasion donn nou pou etidie, parey kouma zot ti pou fer avek zot bann etidian Labib. Kan zot fer sa, zot pou ed zot zanfan pou kontan Zeova ek pou ena konfians dan “lesklav fidel ek saz” ki Zeova servi pou nouri nou lor plan spiritiel. (Mat. 24:45-47, NW) Paran, pa zis ansegn zot zanfan bann lansegnman sinp ki ena dan Labib. Ed zot pou ena enn lafwa for an Zeova. Kouma? Dapre laz ek kapasite zot zanfan, ansegn zot “bann kitsoz profon ki konsern Bondie.”​—1 Kor. 2:10, NW.

14. Kifer nou bizin etidie bann profesi ki ena dan Labib? (Get lankadre “ Eski To Kapav Explik Sa Bann Profesi-La?”)

¹⁴ Bann profesi Labib ena enn gran  linportans dan Parol Bondie. Zot ed nou pou ena enn lafwa for an Zeova. Ki bann profesi Labib finn ranforsi to lafwa? Kitfwa to mazinn bann profesi lor bann “dernie tan.” (2 Tim. 3:1-5; Mat. 24:3, 7) Me ki lezot profesi kapav ranforsi to lafwa? Par exanp, eski to kapav explike kouma bann profesi ki trouv dan Daniel sapit 2 ouswa dan Daniel sapit 11 finn realize dan lepase ek pe kontign realize azordi? * Kan to ena enn lafwa bien for dan bann lansegnman Labib, nanye pa pou kapav diminie to lafwa. Anou get lexanp nou bann frer ek ser ki ti gagn persekision dan Lalmagn pandan Deziem Lager Mondial. Mem si zot pa ti bien konpran bann profesi lor bann dernie zour, zot ti ena enn lafwa bien for dan Parol Bondie.

15-17. Kouma nou bann frer ti reisi fer fas ar persekision gras-a seki zot ti etidie dan Labib?

¹⁵ Kan bann Nazi ti pe diriz Lalmagn, zot ti avoy plizir milye nou bann frer ek ser dan bann kan konsantrasion. Hitler ek enn sef dan so larme ki apel Heinrich Himmler, ti deteste bann Temwin Zeova. Enn ser rakonte seki Himmler ti dir ar enn group ser ki ti dan enn kan konsantrasion. Himmler ti dir: “Kitfwa se zot Zeova ki pe dirize dan lesiel, me isi lor later se nou ki pe dirize! Nou pou gete kisannla pou tini pli lontan, zot ouswa nou!” Ki kitsoz ti ed bann serviter Zeova pou res fidel?

¹⁶ Sa bann Etidian Labib la ti kone ki Rwayom Bondie ti koumans dirize an 1914. Alor, zot pa ti etone kan zot ti gagn boukou persekision. Selman, zot ti sir ki okenn gouvernman imin pa ti pou kapav anpes Bondie realiz so proze. Hitler pa ti pou kapav eliminn vre ladorasion, ni etabli enn gouvernman ki pli for ki Rwayom Bondie. Nou bann frer ek ser ti sir ki bann proze Hitler pa ti pou reisi dan okenn fason.

¹⁷ Nou bann frer ek ser ti ena rezon pou krwar sa. De-trwa lane apre, gouvernman  Nazi ti aret existe. Heinrich Himmler, sa misie ki ti dir ki “isi lor later se nou ki pe dirize” la, ti pe sove pou sap so lavi. Kan li ti pe sove, li ti zwenn Frer Lübke, enn prizonie ki li ti kone. Himmler ti bien dekouraze ek li ti demann Frer Lübke: “Alor, Etidian Labib, ki pou arive asterla?” Frer Lübke ti explik Himmler ki bann Temwin Zeova ti kone depi bien lontan ki gouvernman Nazi pa ti pou reisi ek ki bann Temwin Zeova ti pou libere. Himmler, ti dir boukou kitsoz lor bann Temwin Zeova. Me dan sa ler-la, li pa’nn kapav dir nanye. Inpe letan apre, li ti swiside. Ki sa aprann nou? Kan nou etidie Labib ek bann profesi, sa fer nou lafwa an Bondie vinn pli for ek sa ed nou pou tini ferm kan nou gagn bann persekision.​—2 Pier 1:19-21.

18. Dapre Zan 6:67, 68, kifer nou bizin ena enn “vre konesans ek konpreansion” bann lansegnman Labib?

¹⁸ Lamour se kalite ki idantifie bann vre Kretien, alor nou tou nou bizin ena lamour. Me nou bizin osi ena enn “vre konesans ek konpreansion” bann lansegnman Labib. (Fil. 1:9) Sinon, nou riske les nou inflianse par “toukalite doktrinn ki bann dimoun rize servi pou antrenn lezot dan lerer,” mem par bann aposta. (Efe. 4:14) Dan premie siek, kan boukou disip Zezi ti aret swiv li, lapot Pier ti montre ki li ti sir ki Zezi ti ena bann “parol lavi eternel.” (Lir Zan 6:67, 68.) Mem si sa lepok-la Pier pa ti ankor konpran tou seki Zezi ti ansegne, li ti res fidel parski li ti konpran ki Zezi ti Lekris. Twa osi, to kapav ranforsi to lafwa dan seki Labib ansegne. Si to fer sa, to lafwa pou res for ninport ki arive, ek to pou ed lezot osi pou ena enn lafwa for.​—2 Zan 1, 2.