1. Uuna tatu popi oshitya “oshili,” otwa hala okutya shike?

OMAPULO ngaka taga landula otashi vulika we ga pulwa nenge tashi vulika ongoye we ga pula yalwe. “Oshili owe yi mona ngiini?” “Owa putudhilwa moshili?” “Moshili owa ninga mo ethimbo li thike peni?” Uuna tatu popi oshitya “oshili,” otwa hala okutya ngiini? Paulelalela, ohatu shi longitha tu ukitha kwaashoka twi itaala, komukalo gwetu gwokulongela Kalunga nogwokukalamwenyo kwetu. Aantu mboka ye li “moshili” oye shi shoka Ombiimbeli tayi longo nohaya kaleke onkalamwenyo yawo metsokumwe nomakotampango gayo. Oshizemo, ohayi ikaleke kokule nomalongelokalunga giifundja nohaya kala ya nyanyukwa, nonando otu li aantu inaatu gwanenena. — Joh. 8:32.

2. Shi ikolelela kuJohannes 13:34, 35, oshinima shotango shini tashi vulika sha nanene omuntu moshili?

² Oshinima shotango shini tashi vulika she ku nanene moshili? Otashi vulika eihumbato ewanawa lyaapiya yaJehova. (1 Pet. 2:12) Nenge tashi vulika ohole ndjoka haya ulukilathana. Oyendji oshikando shawo shotango pokugongala kwetu, oya mona nkene aapiya yaJehova tayu ulukilathana ohole, nohole ndjoka nokuli ohaya kala noku yi dhimbulukwa shi vulithe pwaashoka yu uvu ko. Shika itashi kumitha, molwaashoka Jesus okwa popya kutya aalongwa ye, otaya ka ndhindhilikwa mo, omolwohole yawo yokuholathana. (Lesha Johannes 13:34, 35.) Ihe otwa pumbwa okuninga  oshindji, ngele otwa hala okukala tu na eitaalo lya kola.

3. Oshike tashi vulika shi holoke po, ngele eitaalo lyetu muKalunga oli ikolelela owala kohole yopaKriste, ndjoka hayi ulikwa kaamwatate naamwameme?

³ Eitaalo lyetu inali kala owala lyi ikolelela kohole yopaKriste ndjoka aapiya yaJehova haya ulukilathana. Omolwashike? Natu tye nduno omwiitaali omukwetu, nokuli nando omukuluntugongalo nenge omukokolindjila, okwa yono eyono lya kwata miiti. Nenge ongiini ngele omumwatate nenge omumwameme gwontumba okwe ku uvitha nayi momukalo gwontumba? Nenge tashi vulika gumwe a ningi omushunimonima, nota ti kutya shoka twi itaala kashi shi oshili. Ngele iinima mbyoka oya holoka, mbela otayi ke ku pundukitha noku ku ethitha po okulongela Jehova? Shoka tatu ilongo mpaka osho kutya ngele owu na owala eitaalo muKalunga, lyi ikolelela kwaashoka tashi ningwa kaantu, ihe hamolwaashoka wu na ekwatathano naye, kungawo eitaalo lyoye itali ka kola. Momukalo moka wu uvitile Jehova noshigwana she, otagu vulu oku ku kwathela wu kale wu na eitaalo. Ihe osha simanenena wo wu konakone Ombiimbeli wa mana mo, wu uve ko shoka to ilongo nowu ninge omapekapeko, opo wu kale wa tompwa kutya shoka to ilongo kombinga yaJehova, oshili. — Rom. 12:2.

4. Shi ikolelela kuMateus 13:3-6, 20, 21, yamwe uuna eitaalo lyawo lya makelwa, ohashi ya gumu ngiini?

⁴ Jesus okwa ti kutya yamwe otaya ka taamba ko oshili “nenyanyu,” ihe ngele oya makelwa, eitaalo lyawo otali ka nkundipala. (Lesha Mateus 13:3-6, 20, 21.) Otashi vulika ya li inaaye shi dhiladhila kutya okulandula Jesus okwa kwatela mo omashongo nomaupyakadhi. (Mat. 16:24) Nenge otashi vulika ye wete kutya okukala Omukriste, otashi ti kutya okumona owala omayambeko monkalamwenyo noito adhika komashongo. Ihe muuyuni muka tu li, otashi wapa ngaa? Hasho nando. Oonkalo ohadhi vulu okulunduluka, noku tu ningitha tu kanithe enyanyu omathimbo gamwe. — Eps. 6:6; Omuuv. 9:11.

5. Aamwatate naamwameme oyendji, ohaye shi ulike ngiini kutya oya tompwa kutya shoka yi itaala oshili?

⁵ Aamwatate naamwameme oyendji, ohaye shi ulike kutya oya tompwa kutya shoka yi itaala oshili. Ngiini mbela? Eitaalo lyawo ihali nkundipala, nonando oyu uvithwe nayi komwiitaali omukwawo nenge keihumbato lye. (Eps. 119:165) Ethimbo kehe taya adhika keshongo, eitaalo lyawo ohali kolo owala, pehala lyokunkundipala. (Jak. 1:2-4) Ongiini to vulu okukokeka eitaalo lyoye, opo li kale lya kola ngawo?

6. Aalongwa yomethelemimvo lyotango, oya li ya tungile eitaalo lyawo kushike?

⁶ Aalongwa yomethelemimvo lyotango, oya li ya tungile eitaalo lyawo kontseyo yopaMbiimbeli nokomalongo gaJesus Kristus, ano “oshili yomevaangeli.” (Gal. 2:5) Oshili ndjika oya kwatela mo iinima ayihe mbyoka twi itaala, tu li Aakriste, ngaashi oshili kombinga yekuliloyambo lyaJesus neyumuko lye. Omuyapostoli Paulus okwa li a tompwa kutya omalongo ngaka ogoshili. Omolwashike? Omolwaashoka okwa li a longitha omanyolo, opo u ulike “kutya Kristus okwa li e na okuhepekwa nokuyumuka kuusi.” (Iil. 17:2, 3) Aalongwa yomethelemimvo lyotango, oya li ya taamba ko omalongo ngoka noya li yi inekela ombepo ondjapuki yi ya kwathele yu uve ko Oohapu dhaKalunga. Oya li ya tompwa kutya omalongo ngoka, ogi ikolelela kOmanyolo. (Iil. 17:11, 12; Heb. 5:14) Kaya li owala ya tungile eitaalo lyawo komaiyuvo nokaya li ya longele Jehova, molwaashoka owala yu uvite nawa sho taye endathana nooitaali ooyakwawo. Pehala lyaashono, eitaalo lyawo olya li lya tungilwa ‘kontseyo yashili yokutseya Kalunga.’ — Kol. 1:9, 10.

7. Eitaalo lyetu moshili yOmbiimbeli otali ke tu ningila shike?

⁷ Oshili yOohapu dhaKalunga ihayi lunduluka. (Eps. 119:160) Pashiholelwa, ihayi lunduluka uuna omwiitaali omukwetu e tu uvitha nayi nenge a yona eyono lya kwata miiti. Ihayi lunduluka  wo, uuna twa adhika komaupyakadhi. Onkee ano, otwa pumbwa okutseya omalongo gOmbiimbeli nawa nokukala twa tompwa kutya ogoshili. Eitaalo lyetu lya kola, lya kankamena koshili yOmbiimbeli, otali ke tu gamena, uuna tu li momamakelo, ngaashi owala ohangela hayi vulu okugamena ombautu, pethimbo lyoshikungulu. Ongiini to vulu okukoleka eitaalo lyoye, mokukala wa tompwa kutya shoka wi itaala oshili?

8. Ngaashi sha popiwa muTimoteus omutiyali 3:14, 15, oshike sha kwathele Timoteus a thike pehulithodhiladhilo kutya shoka i itaala oshili?

⁸ Timoteus okwa li a tompwa kutya shoka i itaala oshili. Oshike she mu kwathele a thike pehulithodhiladhilo ndyoka? (Lesha 2 Timoteus 3:14, 15.) Yina nayinakulu, oyo ye mu longo tango “omanyolo omayapuki.” Ihe osha yela kutya naye mwene wo okwa longitha ethimbo noonkondo, a konakone omanyolo ngoka. Oshizemo, okwa li i “itaala” kutya omanyolo ngoka oge li paushili. Lwanima, Timoteus, yina nayinakulu, oyi ilongo omalongo gopaKriste. Kapu na omalimbililo kutya Timoteus, okwa li a kuminwa ohole ndjoka yu ulikwa kaalanduli yaJesus nokwa li e na ehalo lyokweendathana naamwahe noku ya kwathela. (Fil. 2:19, 20) Nonando ongawo, eitaalo lye kalya li lyi ikolelela kohole ye yokuhola aantu, ihe okomalongo gOmbiimbeli, ngoka ge mu nanene popepi naJehova. Nangoye wo konakona Ombiimbeli nokuthika pehulithodhiladhilo kutya shoka tayi longo kombinga yaJehova, oshi li paushili.

9. Owa pumbwa okukala wa tompwa kiinima itatu yini?

⁹ Petameko, owa pumbwa okukala wa tompwa kiinima itatu. Shotango, owu na okukala wa tompwa kutya Jehova Kalunga oye Omushiti gwiinima ayihe. (Eks. 3:14, 15; Heb. 3:4; Eh. 4:11) Oshitiyali, owu na okukala wa tompwa kutya Ombiimbeli oyi li etumwalaka lyaKalunga lya nwethwa mo, ndyoka lya nuninwa aantu. (2 Tim. 3:16, 17) Oshititatu, owu na okukala wu na uushili kutya Jehova oku na ongundu yaantu yu unganekwa, ndjoka tayi mu longele kohi yewiliko lyaKristus, nongundu ndjoka Oonzapo dhaJehova. (Jes. 43:10-12; Joh. 14:6; Iil 15:14) Okukala wa tompwa kiinima mbyoka, itashi ti kutya owu shi iinima ayihe kombinga yOmbiimbeli. Elalakano lyoye nali kale okulongitha ‘oondunge dhoye dhokuyoolola,’ opo wu koleke eitaalo lyoye kutya shoka wi itaala oshili. — Rom. 12:1.

10. Kakele kokutseya oshili, oshike ishewe twa pumbwa okuninga?

¹⁰ Konima ngele wi itaale kutya shoka wi ilonga kombinga yaKalunga, yOmbiimbeli noyoshigwana shaKalunga, iinima yi li paushili, owa pumbwa okulongitha omanyolo, opo wu kwathele yalwe kombinga yiinima mbyoka. Omolwashike? Omolwaashoka tu li Aakriste, otu na oshinakugwanithwa shokulonga mboka taye tu pulakene, oshili ndjoka twi ilonga. * (1 Tim. 4:16) Uuna tatu kambadhala okukwathela yalwe, yi itaale kutya shoka Ombiimbeli tayi longo oshi li paushili, kungawo otatu koleke wo eitaalo lyetu momalongo ngoka.

11. Omuyapostoli Paulus okwe tu tulila po oshiholelwa shini, kokutala momukalo moka a li a longo aantu?

¹¹ Omuyapostoli Paulus okwa li ha longo aantu, “ta totha omatumbulo mompango yaMoses nomiinyolwa yaahunganeki, e ya tompe, yi itaale Jesus.” (Iil. 28:23) Ongiini tatu vulu okuholela Paulus, uuna tatu longo yalwe oshili? Otu na okuninga oshindji, shi vulithe owala pokulombwela omuntu shoka Ombiimbeli tayi ti. Otu na okukwathela aakonakonimbiimbeli yetu, ya konakone noya dhiladhile muule kombinga yaashoka tayi ilongo mOmbiimbeli, sho taya hedha popepi naJehova. Otwa hala ya taambe ko oshili, molwaashoka oya tompwa kutya shoka tayi ilongo kombinga yaKalunga ketu omunahole, oshili, ihe hamolwaashoka ye tu hole.

12-13. Ongiini aavali taya vulu okukwathela oyana ya kale moshili?

¹² Kapu na omalimbililo kutya aavali omwa hala aanona yeni ya kale moshili. Otashi vulika mu kale mu uvite kutya ngele oye na ookuume aawanawa megongalo, nena otaya ka kala ye na eitaalo lya kola. Nonando ongawo, opo aanona yeni ya kale ya tompwa kutya shoka yi itaala oshili, oya pumbwa oshindji shi vulithe pookuume aawanawa. Oya pumbwa okukala ye na ekwatathano naKalunga nokukala ya tompwa kutya shoka Ombiimbeli tayi longo, oshili.

¹³ Opo aavali ya longe oyana oshili kombinga yaKalunga, oye na oku ya tulila po oshiholelwa, mokukala aakonakoni yOmbiimbeli aawanawa. Oye na okukutha ethimbo, ya tedhatedhe kwaashoka yi ilongo. Opo nduno otaya ka vula okulonga oyana, ya ninge sha faathana. Oya pumbwa okulonga oyana ya longithe iikwathithi yopaMbiimbeli, ngaashi owala haye shi ningi naakonakonimbiimbeli yawo. Ngele oya ningi ngawo, otaya ka kwathela oyana ya kale ye hole Jehova nokukala yi inekela kutya oha longitha ‘omupiya omudhiginini nomunandunge,’ e tu kwathele tu uve ko Ombiimbeli. (Mat. 24:45-47) Aavali, omwa pumbwa okuninga oshindji, shi vulithe pokulonga owala aanona yeni oshili yOmbiimbeli yopetameko. Ya kwatheleni ya kale ye na  eitaalo lya kola, moku ya longa kombinga yiinima ‘yomuule womadhiladhilo gaKalunga,’ shi thike pomimvo dhawo nopokuvula kwawo. — 1 Kor. 2:10.

14. Omolwashike tu na okukonakona omahunganeko gOmbiimbeli? (Tala wo oshimpungu “ Oto vulu okuyelitha omahunganeko ngaka?”)

¹⁴ Omahunganeko gOmbiimbeli oge li oshitopolwa sha simana shOohapu dhaKalunga, ngoka hage tu kwathele tu kale tu na eitaalo lya kola muJehova. Omahunganeko geni ga koleka eitaalo lyoye? Otashi vulika wu tye omahunganeko kombinga ‘yomasiku gahugunina.’ (2 Tim. 3:1-5; Mat. 24:3, 7) Ihe omahunganeko galwe geni ga gwanithwa taga vulu okukoleka eitaalo lyetu? Pashiholelwa, mbela oto vulu okuyelitha ehunganeko ndyoka li li muDaniel ontopolwa 2 nenge ndyoka li li muDaniel ontopolwa 11, nkene ga gwanithwa monakuziwa nankene taga gwanithwa kunena? * Ngele owa kala wu na eitaalo lya kola lya kankamena kOmbiimbeli, itali ka tenguka. Natu tale koshiholelwa shaamwatate mboka ya li ya patanekwa sha kwata miiti mOndowishi pethimbo lyIita Iitiyali yUuyuni. Nonando kaya li yu uvite ko thiluthilu omahunganeko gOmbiimbeli ge na ko nasha nomasiku gahugunina, oya li ye na eitaalo lya kola mOohapu dhaKalunga.

15-17. Okukonakona Ombiimbeli okwa li kwa kwathele ngiini aamwatate mboka ya li ya patanekwa kepangelo lyaNazi, ya kale ye na eitaalo lya kola?

¹⁵ Sho epangelo lyaNazi lya li tali pangele moNdowishi, aamwatate naamwameme oyendjiyendji oya li ya tuminwa kookamba dhoonkwatwa. Hitler nosho wo ondjayi SS Heinrich Himmler oya li ye tonde Oonzapo dhaJehova. Omumwameme gumwe okwa ti, Himmler okwa li a lombwele ongundu yaamwameme mokamba yimwe yoonkwatwa a ti: “Jehova gweni na pangele megulu, ihe kombanda yevi otse tatu pangele ko! Otu na oku mu ulukila kutya pokati ketu nane olye ta shuna omutse miipeta!” Oshike sha kwathele aapiya yaJehova ya tsikile okukala aadhiginini?

¹⁶ Aakonakoni yOmbiimbeli mboka oya li ye shi kutya Uukwaniilwa waKalunga owa tameka okupangela mo 1914. Onkee ano, kaya li ye shi kuminwa,  sho ya adhika komapataneko ngoka ga kwata miiti. Nonando ongawo, aapiya yaJehova oya li ya tompwa kutya kapu na epangelo lyopantu tali vulu okukeelela Kalunga a gwanithe po elalakano lye. Hitler ina vula nando okuhulitha po elongelokalunga lyashili nenge okutota po epangelo enankondo li vule Uukwaniilwa waKalunga. Aamwatate oya li ya tompwa kutya okupangela kwaHitler, onaku ke ye ngaa pehulilo.

¹⁷ Shoka sha li shi itaalwa kaamwatate naamwameme mboka, osha li paushili. Omathimbo hamale, epangelo lyaNazi olya hulu po. Heinrich Himmler okwa li a yi ontuku, nonando okwa li a ti kutya “huka kombanda yevi otse tatu pangele ko.” Sho a yi ontuku, okwa tsakanene nomumwatate Lübke, ngoka a li nale mondholongo, nokwa li e mu shi kutya oku li Onzapo yaJehova. Himmler ngoka a li a gwililwa po, okwa pula omumwatate Lübke a ti: “Omukonakoni gwOmbiimbeli ngoye, oshike ano sha ningwa po ngashingeyi?” Omumwatate Lübke okwa lombwele Himmler kutya Oonzapo dhaJehovah odha kala dhi shi nale kutya epangelo lyaNazi itali ka pondola nonokutya dho otadhi ka mangululwa. Okuza mpono Himmler, omulumentu ngoka a li ha pataneke Oonzapo dhaJehova, ka li we e na sho ta ti. Konima yethimbo efupi, okwi idhipaga. Shika otashi tu longo shike? Otashi tu longo kutya okukonakona kwetu Ombiimbeli, mwa kwatelwa omahunganeko gawo, otaku vulu oku tu kwathela tu kale tu na eitaalo lya kola muKalunga nokukala tu na omukumo, uuna tatu patanekwa. — 2 Pet. 1:19-21.

18. Ngaashi shu ulikwa muJohannes 6:67, 68, omolwashike twa pumbwa ‘ontseyo yashili noondunge dhokuyoolola,’ iinima mbyoka Paulus a popi?

¹⁸ Kehe gumwe gwomutse oku na okuulika ohole ndjoka hayi ndhindhilikitha mo Aakriste yashili. Ihe otwa pumbwa wo ‘ontseyo yashili noondunge dhokuyoolola.’ (Fil. 1:9, yelekanitha NW.) Ngele hasho, otatu vulu okunwethwa mo “kombepo kehe yomalongo gaantu aafundja, mboka taa pukitha yakwawo,” mwa kwatelwa aashunimonima. (Ef. 4:14) Sho aalongwa oyendji mboka ya li ko omimvo 2 000 nasha dha ka pita, ye etha po okulandula Jesus, omuyapostoli Petrus okwa holola eitaalo lye lya kola kutya Jesus oku na “oohapu ndhoka tadhi gandja omwenyo gwaaluhe.” (Lesha Johannes 6:67, 68.) Nonando Petrus pethimbo ndyoka, ka li u uvite ko ashihe kombinga yoohapu ndhoka, okwa tsikile okukala omudhiginini, molwaashoka okwa li u uvite ko oshili kombinga yaKristus. Nangoye oto vulu okukoleka eitaalo lyoye, mokukala wi itaala kutya shoka Ombiimbeli tayi longo, oshi li paushili. Ngele owa ningi ngawo, eitaalo lyoye otali ka tsikila okukala lya kola kutya nduno owu iyadhe monkalo ya fa peni. Oto ka kwathela wo yalwe ya kale ye na eitaalo lya kola. — 2 Joh. 1, 2.